კახეთი. წელიწადზე მეტია რაც საქართველოში მიმდინარეობს პროექტი - ,,საქართველო ევროპაში”, რომელიც მიზნად ისახავს, საზოგადოებას მიაწოდოს ინფორმაცია ევროკავშირზე, მის საშინაო და საგარეო პოლიტიკაზე, ასევე საქართველო-ევროკავშირის ურთიერთობასა და ერთობლივ პროექტებზე, რომელიც ხელს უწყობს საქართველოს ინსტიტუციურ გაძლიერებას და სხვადასხვა სფეროებში ევროპული სტანდარტების დამკვიდრებას. პროექტში ჩართულია არასამთავრობო ორგანიზაცია ,,ახალი თაობა ახალი ინიციატივა". ,,პროექტის ფარგლებში ამ კვირაში შეხვედრები დავიწყეთ კახეთის რეგიონიდან, შევხვდით ყვარლის, გურჯაანისა და თელავის მოსახლეობას. შევხვდით საზოგადოების სხვადასხვა ფენას, მივაწოდეთ საინფორმაციო მასალები ევროკავშირის, მისი სტრუქტურების და საქართველოში მიმდინარე იმ რეფორმებზე,რომელიც მიმდინარეობს ,,აღმოსავლეთის პარტნიორობის" ფარგლებში" – აღნიშნა ,,ახალი თაობა ახალი ინიციატივის" აღმასრულებელმა დირექტორმა ქეთევან ჩაჩავამ.

კახეთი. 13 ივლისს თელავის დემოკრატიული ჩართულობის ცენტრში საზოგადოებრივი ორგანიზაციის „თანადგომის" მიერ ორგანიზებული 5 დღიანი „თანასწორთა განათლების ტრენინგი"  დასრულდა. ტრენინგის მიზანი იყო ახალგაზრდებში ჯანმრთელი ცხოვრების წესის დამკვიდრებისა და სქესობრივი გზით გადამდები დაავადებების თავიდან აცილებისთვის დამსწრეთა ინფორმირება. ტრენინგში  50-მდე  მოსწავლე მონაწილეობდა. ტრენინგის კოორდინატორის თქმით, ტრენინგის მთავარი მიზანია, ახალგაზრდებმა თანატოლებში გაავრცელონ მიწოდებული ინფორმაცია, რათა თავიდან იქნეს აცილებული სხვადასხვა სახის დაავადებების გავრცელება. მაია ჯიბუტი, პროექტის კოორდინატორი, ფსიქოლოგი: „თანასწორთა განათლების ტრენინგის მიზანი იყო ტრენერთა მომზადება, რომელშიც აქტიური და ლიდერის თვისებებით გამორჩეული ახალგაზრდები მონაწილეობდნენ. გარდა ამისა, იყო საუბარი გენდერული თანასწორობის შესახებ და ეს ყველაფერი ჩაჯდა რეპროდუქციული ჯანმრთელობისა და უფლებების შესახებ საკითხებში".

კახეთი. 28 ივნისიდან 6 ივლისის ჩათვლით საგარეჯოს რაიონში ადგილობრივი მოსახლეობისათვის ჩატარდება ტრენინგი თემაზე: „ტრენერთა სწავლება მზის კოლექტორების მშენებლობის საკითხებზე" ტრენერთა სწავლებას ჩაატარებენ პროექტის სამუშაო ჯგუფის წარმომადგენლები, ასევე მოწვეული ექსპერტები ჰოლანდიიდან და გერმანიიდან. ტრენინგის მონაწილეები მიიღებენ დეტალურ ინფორმაციას, თუ როგორ ასწავლონ დაინტერესებულ პირებს საყოფაცოვრებო პირობებში მზის კოლექტორების აწყობა, დამონტაჟება და შემდგომი ექსპლოატაცია პროექტი ხორციელდება "საქართველოს მწვანეთა მოძრაობა/ დედამიწის მეგობრები–საქართველოს" მიერ პროექტის „საოჯახო პირობებში მზის ენერგიით გათბობის, ცხელი წყლისა და თბოსაიზოლაციო სისტემების დანერგვა და ადგილობრივი შესაძლებლობების გაძლიერება სოფლად აღმოსავლეთ ევროპისა და კავკასიის რეგიონში" ფარგლებში.   ვრცლად იხილეთ ბმულზე წყარო: www.greens.ge 

იმერეთი. 28 ივნისს,  სასტუმრო „ქუთაისი პალასში" სამოქალაქო განათლებისა და გადამზადების ცენტრის საქმიანობის შემაჯამებელი პრეზენტაცია გაიმართა. ღონისძიებაზე სამოქალაქო კლუბებმა პროგრამის ფარგლებში მიღებული გადაწყვეტილებების ანგარიში წარმოადგინეს. ასევე დამსწრე საზოგადოებას მცირე საგრანტო კონკურსში გამარჯვებულმა სკოლის მოსწავლეებმა თავიანთი პროგრამა წარუდგინეს. შეხვედრაში მონაწილეობა იმერეთის რეგიონის საჯარო სკოლებისა და საინიციატივო ჯგუფის წევრებმა, სამოქალაქო განათლების პედაგოგებმა და პარტნოირი ორგანიზაციის წევრებმა მიიღეს. ღონისძიება ორგანიზებული იყო სამოქალაქო განათლებისა და პედაგოგთა გადამზადების პროგრამის ფარგლებში, რომელსაც ამერიკული ორგანიზაცია PH International ახორციელებს. პრეზენტაცია ამერიკის შეერთებული შტატების საერთაშორისო განვითარებიას სააგენტოს (USAID) დაფინანსებით გაიმართა. აღნიშნული პროგრამა იმერეთის რეგიონში 125 პარტნიორ სკოლასთან თანამშრომლობს. შეხვედრის ბოლოს ბლოგებისა და საკლუბო კონკურსებში გამარჯვებული მოსწავლეები დაჯილდოვდნენ.

თბილისი. 28 ივნისს, ამერიკის შეერთებული შტატების საერთაშორისო განვითრების სააგენტომ (USAID) საქართველოს რვა უნივერსიტეტთან გააფორმა თანამშრომლობის მემორანდუმი, რომელიც გულისხმობს აღნიშნულ უნივერსიტეტებში სამოქალაქო განათლების პროგრამის და კურსის დანერგვას. სამოქალაქო განათლების პროგრამა ხორციელდება IFES-ის მიერ USAID-ის ფინანსური მხარდაჭერით და მასში ჩრთულია 800–ზე მეტი ქართველი სტუდენტი. USAID-ის ახალი პარტნიორი უნივერსიტეტები არიან: საქართველოს საზოგადოებრივ საქმეთა ინსტიტუტი, იაკობ გოგებაშვილის სახელობის თელავის სახელმწიფო უნივერსიტეტი, ახალციხის სახელმწიფო სასწავლო უნივერსიტეტი, აკაკი წერეთლის სახელმწიფო უნივერსიტეტი, სოხუმის სახელმწიფო უნივერსიტეტი, გორის სასწავლო უნივერსიტეტი, შოთა მესხიას ზუგდიდის სახელმწიფო უნივერსიტეტი და ბათუმის შოთა რუსთაველის სახელმწიფო უნივერსიტეტი.  ურთიერთგაგების მემორანდუმის ხელმოწერის შემდეგ გაიმართა სამუშაო შეხვედრა სამოქალაქო განათლების თემაზე, სადაც სამოქალაქო განათლების კურსდამთავრებულმა სტუდენტებმა კურსის ფარგლებში განხორციელებული პროექტების პრეზენტაცია გამართეს. 

თბილისი. 28 ივნისს, ფონდი „ღია საზოგადოება –საქართველოს" ოფისში გაიმართა ახალი საზოგადოებრივი ორგანიზაციის პრეზენტაცია. ორგანიზაცია გამოცდების ეროვნული ცენტრიდან წამოსულმა თანამშრომლებმა დააფუძნეს.  „საგანმანათლებლო პოლიტიკისა და კვლევების ასოციაციის" პრეზიდენტია გამოცდების ეროვნული ცენტრის ყოფილი ხელმძღვანელი, მაია მიმინოშვილი. ასოციაციის მუშაობის ძირითადი მიმართულებებია: სამეცნიერო–საგანმანათლებლო კვლევები სკოლამდელი, სასკოლო და უმაღლესი განათლების საფეხურებზე, საერთაშორისო გამოცდილების შესწავლა, განათლების სფეროში არსებული თანამედროვე ლიტერატურისადმი წვდომის ხელშეწყობა, პედაგოგების პროფესიული განვითარების ხელშეწყობა, განათლების სისტემაში მიმდინარე პროცესების შესახებ საზოგადოების ინფორმირება და ა.შ  „ეს ორგანიზაცია შექმნა გუნდმა, რომელიც 10 წლის განმავლობაში მუშაობდა განათლების სისტემაში. (...) ის გამოცდილება, რომელიც ჩვენ 10 წლის განმავლობაში დავაგროვეთ განათლების სისტემაში ერთად მუშაობით, გვაძლევს იმის თქმის საშუალებას, რომ ეს ახლად შექმნილი ორგანიზაცია ნამდვილად წარმატებული იქნება და  ჩვენ ვაპირებთ ყველაფრის გაკეთებას იმისთვის, რომ ქვეყენაში განათლების ხარისხის ამაღლებას შევუწყოთ ხელი", – თქვა დღევანდელ პრეზენტაციაზე ასოციაციის პრეზიდენტმა, მაია მიმინოშვილმა.

გურია. საზოგადოებრივმა ორგანიზაციამ „ახალგაზრდა პედაგოგთა კავშირმა" ოზურგეთში, საქართველოს განათლებისა და მეცნიერების სამინისტროს ინკლუზიური განათლების პროგრამაში ჩართული გურიის მულტიდისციპლინური გუნდის მიერ მომზადებული ანგარიშის პრეზენტაცია მოაწყო. შეხვედრაზე საგანმანათლებლო სპეციალისტების ჯგუფმა ადგილობრივი თვითმმართველობის, საზოგადოებრივი ორგანიზაციებისა და მედიის წარმომადგენლებს გააცნო სამივე მუნიციპალიტეტში არსებული მდგომარეობა ინკლუზიურ განათლებასთან დაკავშირებით. პრეზენტაციის ბოლოს გაიმართა დისკუსია, რომელმაც ცხადყო, რომ ამ თვალსაზრისით გურიის სამივე მუნიციპალიტეტში არასახარბიელო მდგომარეობაა და პრობლემების გადაჭრაში უნდა ჩაერთონ როგორც ცენტრალური, ისე ადგილობრივი ხელისუფლების შესაბამისი სტრუქტურები, ასევე უფრო აქტიური უნდა იყოს საზოგადოება. პრეზენტაცია 21 ივნისს ოზურგეთის დემოკრატიული ჩართულობის ცენტრში გაიმართა.

თბილისი. 21 ივნისს, სამოქალაქო განვითარების ინსტიტუტმა კვლევის და ფილმის პრეზენტაცია გამართა. სტუდია მონიტორის მიერ გადაღებული ფილმი ეხებოდა საქართველოს სხვადასხვა რეგიონში სკოლიდან გათავისუფლებულ პედაგოგებს. მასწავლებლები მათი გათავისფულების მიზეზს მათი ოჯახის წევრების ოპოზიციურ პოლიტიკურ შეხედულებებს უკავშირებენ. სტუდია მონიტორმა რამდენიმე ასეთი შემთხვევა შეისწავლა და გაარკვია, რომ მათი გათავისუფლების ბრძანებაში საფუძველი დაკონკრეტებული არ არის. ფილმში ასევე აღწერილია თუ როგორ ხორციელდება ცვლილებები და რეფორმები განათლების სამინისტროში 2005 წლიდან დღემდე. შეხვედრაზე ასევე გაიმართა სამოქალაქი განვითარების ინსტიტუტის მიერ ჩატარებული კვლევის პრეზენტაცია, რომელიც იკვლევდა სასკოლო თემის დამოკიდებულებას სკოლის უსაფრთხოების პოლიტიკისადმი. კველვა ორ ნაწილად მიმდინარეობდა, რაოდენობრივი და თვისებრივი მეთოდოლოგიის გამოყენებით. იგი თბილისის სკოლებს მოიცავს და მე–6–დან მე 12 კლასამდე მოსწავლეების და მათი მშობლების დამოკიდებულებას იკლევს, კვლევის ფარგლებში ჩატარდა ფოკუს ჯგუფებიც. გამოიკვლიეს შემდეგი საკითხები: სკოლის კლიმატი, ძალადობის შემთხვევები სკოლაში და გარეთ, დამოკიდებულებები და წარმოდგენები და განსხვავებები  ამ დამოკიდებულებებში.  დღევანდელი ღონისძიება პროექტის  – „ბავშვზე ორიენტირებული სკოლის ადვოკატირების” –ფარგლებში ხორციელდება აღმოსავლეთ-დასავლეთის მართვის ინსტიტუტის (EWMI) პროგრამის – „საქართველოში საჯარო პოლიტიკის, ადვოკატირებისა და სამოქალაქო საზოგადოების განვითარების" (G-PAC) ფარგლებში.

თბილისი. 14 ივნისს საზოგადოებრივმა ორგანიზაციამ „ახალგაზრდა ადვოკატებმა" პრესკონფერენცია გამართა. ორგანიზაციის წარმომადგენლები 2012 წლის ზაფხულის არდადეგებზე სტუდენტური დასაქმების "Summer Job” ერთთვიან პროგრამაში მონაწილე სტუდენტებთან გაფორმებული ხელშეკრულების განსაჯაროებას ითხოვენ. ორგანიზაციაში ეჭვობენ, რომ პროგრამაში მონაწილე სტუდენტებისთვის სავალდებულო იქნება იმ საზოგადოებრივ ღონისძიებებში მონაწილეობა, რომელსაც ორგანიზებას პოლიტიკური პარტიები გაუწევენ. პრესკონფერენციაზე ასევე, ყურადღება გამახვილდა ბიუჯეტიდან დედაქალაქის რამდენიმე სკოლისთვის გადარიცხულ თანხებზე, რომლებიც პედაგოგების ხელფასის დანამატში აისახა. ორგანიზაცია გეგმავს მიმართოს აღნიშნული სკოლების დირექციას.  მიუხედავად იმისა, რომ არც ერთი ზემოთხსენებული ფაქტი დადასტურებული არ არის, ორგანიზაციის მესვეურები თვლიან, რომ ეს საკმარისი ინფორმაციაა იმისთვის, რომ მათ მოითხოვონ ოფიციალური უწყებებიდან პასუხი და რეაგირება. ამიტომაც, „ახალგაზრდა ადვოკატები" წერილობით მიმართავს საქართველოს ეროვნული უშიშროების საბჭოს, საქართელოს კონტროლის პალატას და საქართელოს განათლებისა და მეცნიერების სამინისტროს. 

კახეთი. თელავის დემოკრატიული ჩართულობის ცენტრის ბაზაზე შექმნილი ბიბლიოთეკის წიგნადი ფონდი განახლდა. ბიბლიოთეკას წიგნები იმ არასამთავრობო ორგანიზაციების წარმომადგენლებმა გადასცეს, რომლებიც ხშირად ატარებენ სხვადასხვა სახის ღონისძიებებს. დემოკრატიული ჩართულობის ცენტრის კოორდინატორ მაია ფურცხვანიძის თქმით, ამ წიგნებით  სარგებლობა ყველა დაინტერესებულ პირს შეუძლია. ,,ბიბლიოთეკა სულ ახლახანს აღიჭურვა ახალი წიგნებით. ისინი გადმოგვცეს იმ არასამთავრობო ორგანიზაციებმა, რომლებიც ჩვენთან ღონისძიებებს ატარებენ’’, აცხადებს მაია ფურცხვანიძე. დემოკრატიული ჩართულობის თელავის ფილიალი ემსახურება კახეთის რეგიონის რვა მუნიციპალიტეტს.

სამცხე–ჯავახეთი. 6 ივნისს, მშვიდობის კორპუსმა, ახალციხის დემოკრატიული ჩართულოში ცენტრში,  „არასამთავრობო ორგანიზაციების განვითარების" ტრენინგ–სესიის მორიგი სესია გამართა, რომლის თემა იყო –  „რატომ გვჭირდება მოხალისეთა პროგრამა". მსმენელები გაერკვნენ მოხალისეთა და ბენეფიციართა შორის არსებულ განსხვავებასა და მსგავსებაში, შეიძინეს ორგანიზაციებში მათი აყვანის, ტრენინგის, დასაქმების ანაზღაურებისა და შენარჩუნების გამოცდილება და მოხალისეთა საქმიანობის აღწერის უნარ–ჩვევები. განიხილეს საქართველოში მოხალისეობის კულტურის საკითხები.

კახეთი. თელავის სახელმწიფო უნივერსიტეტს, 4 ივნისს, იაპონიის საგანგებო და სრულუფლებიანი ელჩი საქართველოში მასაიოში კამოჰარა ესტუმრა. იგი აგრარულ მეცნიერებათა სკოლის სტუდენტებისა და პროფესორ მასწავლებლების შეხვდა.  მათ, სამომავლო გეგმებზე ისაუბრეს. მასაიოში კამოჰარა, იაპონიის ელჩი საქართველოში: ,,ვაპირებთ, დავაფუძვნოთ საქართველო-იაპონიის ურთიერთობის ასოციაციის კახეთის ფილიალი, რაც  ხელს  შეუწყობს კახეთის რეგიონისა და იანსეს პრეფექტურის მჭიდრო ურთიერთკავშირს სოფლის მეურნეობის, კერძოდ კი ღვინის წარმოების სფეროში. გარდა ამისა, ამ ორი რეგიონის უნივერსიტეტს შორის დამყარდება პარტნიორული ურთიერთობები და სტუდენტებს ექნებათ საშუალება შეისწავლონ ღვინის წარმოების ტექნოლოგიები".

კახეთი. თელავის სახელმწიფო უნივერსიტეტმა აღმოსავლეთ-დასავლეთის მართვის უნივერსიტეტის G–PAC-ის პროგრამის ანაზღაურებადი სტაჟირების ღია კარის დღეს უმასპინძლა. უნივერსიტეტის თურქული ენის დარბაზში შეკრებილ მაგისტრატურის და დოქტორანტურის სტუდენტებს სტაჟირების გრანტის პროგრამის პრიორიტეტებზე სააპლიკაციო პროცედურებსა და მიმღებ ორგანიზაციებთან ურთიერთობის წესებზე ინფორმაცია პროექტის ხელმძღვანელმა ფრონ ნაზიმ მიაწოდა: ,,აღმოსავლეთ-დასავლეთის მართვის ინსტიტუტის GG–PAC-ის პროგრამა USAID-ის მიერ დაფინანსებული პროგრამაა. მისი ერთ-ერთი კომპონენტი სტაჟირების გრანტებია, რაც ხელს უწყობს სტუდენტებს თეორიული ცოდნის პრაქტიკაში გამოყენებაში. ამ შეხვედრის მიზანიც ეს არის. გარდა ამისა, გვაქვს სხვა კომპონენტები პროექტის, მაგრამ თვითონ სტაჟირების პროგრამა არის მაგისტრატურის პროგრამის ნაწილი, რომელიც ყალიბდება ილიას სახელობის უნივერსიტეტში კოლუმბიის უნივერსიტეტთან ერთად”.

სამცხე–ჯავახეთი. 1 ივნისს ახალციხეში, საზოგადოებრივი ორგანიზაცია ,,დემოკრატ მესხთა კავშირის” ოფისში გაიმარტა ტრენინგი თემაზე - ფასილიტაცია. ტრენინგი ახალგაზრდა მსმენელებისთვის  ფსიქოლოგიის მეცნიერებათა დოქტორმა გულიკო ბექაურმა ჩაატარა.

კახეთი. გურჯაანში, არასამთავრობო ორგანიზაციის ,,მედია ცენტრ კახეთის"  ოფისში  გაიმართა საჯარო შეხვედრა თემაზე -  მოსწავლეთა და მასწავლებელთა უფლებები და მოვალეობები. შეხვედრაზე მოწვეულები იყვნენ მასწავლებლები, მოსწავლეები, მშობლები, რესურს ცენტრის ხელმძღვანელი და ჟურნალისტები. დამსწრე საზოგადოებამ განიხილა საჯარო სკოლებში არსებული მდგომარება. მოსწავლეებმა, მშობლებმა და მასწავლებლებმა დისკუსია გამართეს. ,,ჩემი შვილი მეთერთმეტე კლასში სწავლობს. მასწავლებლები ზოგჯერ არაკორექტულნი არიან და ყოფილა შემთხვევები, როდესაც ჩემი შვილი ვერ დამიყოლიებია და სკოლაში არ წასულა. მიხარია, თუ ბოლოსდაბოლოს გაიმიჯნება უფლებები და ყველა თავის მოვალეობას შეასრულებს", განაცხადა შეხვედრაში მონაწილე ნინო თევდორაძე. სამოქალაქო განათლების პედაგოგი მარიკა შანყულაშვილი აღნიშნავს, რომ შეხვედრა  სასარგებლო და მრავლისმომცველი იყო. „მსგავსი ღონისძიება ხელს შეუწყობს ახალგაზრდების განათლებას, მათში პასუხისმგებლობის გაღრმავებას საქმისა და სწავლისადმი", დასძინა მან.

შიდა ქართლი. 30 მაისს გორის დემოკრატიული ჩართულობის ცენტრში გაიმართა ორგანიზაციის – ნიდერლანდების ინსტიტუტი მრავალპარტიული დემოკრატიისთვის – საქართველოს» პროგრამის პრეზენტაცია. შეხვედრას ესწრებოდნენ საზოგადოებრივი ორგანიზაციების, მედიის და პოლიტიკური პარტიების წარმომადგენლები. ორგანიზატორებმა დამსწრეებს მიაწოდეს ინფორმაცია მათი ორგანიზაციის, გაწეული სამუშაოებისა და დაგეგმილი საქმიანობის შესახებ. განსაკუთრებით გამახვილდა ყურადღება დემოკრატიის სკოლებზე: დემოკრატიის სკოლები წარმოადგენს 5-თვიან საგანმანათლებლო  პროგრამას, რომლის ფარგლებშიც მონაწილეები გადიან სიღრმისეულ სწავლებას სამოქალაქო მონაწილეობისთვის აუცილებელ ცოდნასა და უნარებში. სასწავლო კურსი მოიცავს თანამედროვე უნარებს, დემოკრატიული საზოგადოების, დემოკრატიული მმართველობის და ლიდერობის ძირეულ საკითხებს. დემოკრატიის სკოლებში ტრენინგებს ატარებენ მაღალი კვალიფიკაციის მკვლევარები, პრაქტიკოსები, ექსპერტები და აკადემიური სფეროს წარმომადგენლები. მონაწილეები ასევე სარგებლობენ ელექტრონული სასწავლო გარემოთი და მცირე გრანტების კონკურსში მონაწილეობის შესაძლებლობით. დემოკრატიის სკოლაში მონაწილეობა შეუძლიათ დაინტერესებულ მოქალაქეებს, დევნილებს, საზოგადოებრივი ორგანიზაციის, ადგილობრივი თვითმმართველობის, მედია ორგანიზაციების და პოლიტიკური პარტიების წარმომადგენლებს.   მონაწილეთა ასაკი უნდა აღემატებოდეს 18 წელს. გორის დემოკრატიის სკოლა გაიხსნება 1 ოქტომბერს. სასწავლო პროგრამა გრძელდება 5 თვე.  ტრენინგები ტარდება კვირაში ორჯერ. ერთი სატრენინგო დღის ხანგრძლივობაა 6 საათი. შეხვედრის დასასრულს, მსურველებს ჰქონდათ შესაძლებლობა, ადგილზევე შეევსოთ სათანადო აპლიკაცია, რათა ჩართულიყვნენ დემოკრატიის სკოლის მუშაობაში, რითაც დამსწრეთაგან ნაწილმა დაუყოვნებლივ ისარგებლა.

თბილისი. „როცა ცდები" – ასე ჰქვია ამერიკელი მწერლის, ქეთრინ შულცის  წიგნს, რომელიც  ორგანიზაცია „რადარამის" ძალისხმევით ქართულად ითარგმნა. სწორედ „რადარამის" მოწვევით და ინიციატივით ქეთრინ შულცი დღეს „ლიგამუსში" სტუდენტებს და დაინტერესებულ პირებს შეხვდა. წიგნის ავტორმა დამსწრე საზოგადოებასთან ერთად იმაზე იმსჯელა, თუ რა ხდება მაშინ, როცა ცდები; რამდენად მნიშნველოვანია იმის გაცნობიერება, რომ შეცდომას უშვებ ან უკვე დაუშვი და როგორ უნდა შევხედოთ ამ შეცდომებს პოზიტიური პერსპექტივიდან;  რატომ ხდება , რომ ყბადაღებული ფრაზის შემდეგ „შეცდომა ყველას მოსდის" , ხშირად გვიჭირს ან გვრცხენია მათი აღიარების. იმის მიუხედავად, რომ შეცდომებს შეიძლება სერიოზული შედეგები მოჰყვეს, როცა ცდები, ეს  ნორმალურია და თუკი შეცდომის აღიარება შეგვიძლია, ეს პირიქით უნდა წახალისდეს.  მსგავსი შეხვედრები თავად წიგნის ავტორის მონაწილეობით სხვადასხვა ქალაქებსა და უნივერსიტეტბში გაიმართება. საზოგადოებრივი ორგანიზაცია „რადარამი" ქართულ ენაზე თარგმნის და გამოსცემს წიგნებს, რომლებიც აქტულუარ პოლიტიკურ, სიციალურ თუ ეკონომიკურ  საკითხებს ეხება. 

თბილისი. 2011 წელს ნოემბერში აფხაზეთის უსინათლოთა  და ყრუ–მუნჯთა კავშირ "ჰერას" ბაზაზე შეიქმნა სოციალური საწარმო – ხმის ჩამწერი სტუდია "ჰერა". პროექტი ხორციელდება ევრაზიის თანამშრომლობის ფონდისა და შვედეთის საერთაშორისო განვითარების სააგენტოს (SIDA) მხარდაჭერით. ხმის ჩამწერი სტუდიის საშუალებით გამოუშვეს 30 აუიდო წიგნი (CD ფორმატი), აქედან 12 აუდიო წიგნი ქართული და მსოფლიოს სხვადასხვა ქვეყნების ზღაპრებია, რომლებსაც ახმოვანებენ კინოსა და თეატრის კორიფეები: ეროსი მანჯგალაძე, მედეა ჩახავა, გოგი გეგეჭკორი, გურამ საღარაძე და სხვა. დანარჩენი აუდიო წიგნები მოიცავს ქართველი და უცხოელი კლასიკოსების ნაწარმოებებ. წიგნების დამზადების პროცესი შეგიძლიათ იხილოთ: http://www.youtube.com/watch?v=5n4q4I0NzEQ  

სამცხე–ჯავახეთი. ბაკურიანში 23 მაისს დაიწყო და 28 მაისამდე ახალგაზრდები დებატების ხელოვნებას გაეცნობიან. დებატების ბანაკში, ისინი შეიძენენ დებატებში მონაწილეობისა და მისი გამართვის უნარ–ჩვევებს. აღნიშნული ღონისძიება საზოგადოებრივი ორგანიზაციის ტრენინგებისა და კონსულტაციების ცენტრის მიერ არის ორგანიზებული.

სამცჯხე–ჯავახეთი. 22 მაისს, ახალციხის დემოკრატიული ჩართულობის ცენტრში გაიმართა დისკუსია ბიომრავალფეროვნების თემაზე. დისკუსიაში მონაწილეობა მიიღეს ახალციხის საჯარო სკოლის მოსწავლეებმა, ეკო–კლუბის წევრებმა, აგრეთვე სამცხე–ჯავახეთის რეგიონული გარემოსდაცვითი კავშირის „ეკოდახის" წარმომადგენლებმა. შეხვედრაზე გადაწყდა, რომ ანალოგიური შეხვედრები ყოველთიურ ხასიათს მიიღებს, რათა ახალგაზრდებმა ბიომრავალფეროვნების შესახებ ცოდნა გაიღრმაონ და ცნობიერება აიმაღლონ. ასევე დაიგეგმა სხვადასხვა აქტივობები, სკოლის მოსწავლეები გეგმავენ ეკოლოგიური გაზეთის გამოშვებას, ლაშქრობების მოწყობას ბორჯომ–ხარაგაულის ეროვნულ პარკში და ა.შ.

აჭარა. 9 მაისი ევროპის საერთაშორისო დღეა. იგი სათავეს 1950 წლიდან იღებს, როდესაც საფრანგეთის საგარეო საქმეთა მინისტრი რობერ შუმანი პარიზში განცხადებით გამოვიდა და ევროპული ინტეგრაციის იდეა წამოაყენა. ევროპის დღესთან დაკავშირებით, საზოგადოებრივმა ორგანიზაციამ ,,რეაბილიტაციის ცენტრმა" ბენეფიციარებისათვის ღონისძიება გამართა. შეხვედრაზე პროექტის კოორდინატორმა მათ დეტალურად გააცნო ევროკავშირის ისტორია და ესაუბრა მისი სიმბოლოების შესახებ. მონაწილეებისთვის სლაიდ-შოუს საშუალებით ნაჩვენები იყო რამდენიმე მაგალითი, თუ რას აკეთებს ევროკავშირი მსოფლიოში თავისი ინტერესების და ფასეულობების წარმოსაჩენად. შეხვედრის ორგანიზატორებმა ბენეფციარებს ევროკავშირისა და საქართველოს ურთიერთობების ისტორია გააცნეს. ევროპის დღისადმი მიძღვნილი ღონისძიება ,,რეაბილიტაციის ცენტრმა" მიმდინარე პროექტის - ,,ახალი ინიციატივა არასრულწლოვანთა მართლმსაჯულებაში" ფარგლებში გამართა. პროექტზე მუშაობა ორგანიზაციამ, ევროკავშირის ფინანსური მხარდაჭერით, 2010 წლის დეკემბრიდან დაიწყო და იგი 2012 წლის ივნისში დასრულდება.

სამცხე–ჯავახეთი. სამოქალაქო განვითარების ინსტიტუტი, აღმოსავლეთ-დასავლეთის მართვის ინსტიტუტისა და აშშ საერთაშორისო განვითარების სააგენტოს მხარდაჭერით, ახორციელებს პროექტს „ბავშვზე ორიენტირებული სკოლის ადვოკატირება". ამ პროექტის ფარგლებში შეიქმნა უსაფრთხო სკოლის პოლიტიკის ალტერნატიული დოკუმენტი, რომელიც ინსტიტუტის წარმომადგენლებმა ახალციხის საზუგადოებას წარუდგინეს. შეხვედრა ,,დემოკრატიული ჩართულობის ცენტრში” 2 საათს გაგრძელდა და მას ახალციხის საჯარო სკოლების პედაგოგები, მოსწავლეები და მშობლები, ასევე ახალციხის სახელმწიფო უნივერსიტეტის სტუდენტები, ლექტორები და მედიის წარმომადგენლები ესწრებოდნენ. უსაფრთხო სკოლის დოკუმენტი განათლების სპეციალისტების სიმონ ჯანაშიასა და სოფო გორგოძის მიერაა მომზადებული. მასში ასახულია სკოლაში ძალადობის მხრივ არსებული მდგომარეობა, დასავლური და საქართველოს წარმატებული გამოცდილება და არსებული პოლიტიკის ალტერნატივები. შეხვედრაზე, ასევე იმსჯელეს მანდატურის სამსახურის დადებით და უარყოფით მხარეებზე. აღინიშნა, რომ მანდატურების შესვლის შემდგომ პედაგოგები უფრო მობილიზებულნი გახდნენ, ასევე შემცირდა გაკვეთილებზე დაგვიანებების შემთხვევები, თუმცა იქვე აღინიშნა, რომ არის შემთხვევები როცა მანდატურები სკოლაში არ უშვებენ დაწყებითი კლასის მოსწავლეების მშობლებს, არ ითვალისწინებენ ზოგიერთ საპატიო გარემოებას, მაგალითად, სკოლიდან შორს მცხოვრები ბავშვების დაგვიანებების მიზეზი შესაძლოა ტრანსპორტირებით იყოს გამოწვეული და ა.შ. უსაფრთხო სკოლის ალტერნატიული დოკუმენტის განხილვა  საქართველოს შვიდ ქალაქშია დაგეგმილი. ახალციხემდე დოკუმენტი ბათუმში, ოზურგეთსა და ქუთაისში განიხილეს.