შიდა ქართლი. საქველმოქმედო ჰუმანიტარული ცენტრი „აფხაზეთის" პროექტის -„ახალგაზრდების ჩართულობა და განვითარება" - ფარგლებში, ხიდისთავის სკოლის ქიმია-ბიოლოგიის კლუბის წევრები სასწავლო პრაქტიკისთვის ექსპერტიზის ლაბორატორიებში იმყოფებოდნენ. მოსწავლეებმა სოფლის მეურნეობის საკვები პროდუქტების ექსპერტიზის განყოფილებები რადიოლოგიური და ქიმიური კვლევის ბლოკი, მიკრობიოლოგიური კვლევის და ტოქსიკოლოგიის ლაბორატორიები დაათვალიერეს და მიმდინარე პროცესებს გაეცნენ. სპეციალისტებმა მოსწავლეებს აუხსნეს, როგორ და რა ტიპის კვლევები ტარდება ლაბორატორიებში. მოსწავლეებს შესაძლებლობა მიეცათ, მესამე დონის ლაბორატორიებშიც შესულიყვნენ, სადაც ცოფის, ფრინველის გრიპის, ჯილეხისა და სხვა დაავადებების ანალიზი მიმდინარეობს. პროექტი აშშ-ს საერთაშორისო განვითარების სააგენტოს (USAID) დაფინანსებითა და გაეროს ბავშვთა ფონდის (UNICEF) მხარდაჭერით ხორციელდება. წყარო:ორგანიზაციის გვერდი სოციალურ ქსელში

თბილისი. სოციალურ ქსელში ვებგვერდმა „ერთად შევეგებოთ ევროპას" Erasmus Mundus–ის პროგრამის შესახებ ვიდეორგოლი განათავსა. აღნიშნული პროგრამით ათასობით სტუდენტი ევროპის წამყვან უნივერსიტეტებში სწავლობს. გაეცანი ვიდეორგოლს და ჩაერთე პროგრამაში წყარო: ერთად შევეგებოთ ევროპის ვებგვერდი სოციალურ ქსელში

თბილისი. საქართველოს პარლამენტის ეროვნული ბიბლიოთეკის საგამოფენო დარბაზში, პროექტის „აუდიოწიგნები უსინათლო და მცირემხედველი ბავშვებისთვის" დახურვა გაიმართა. პროექტი არასამთავრობო ორგანიზაცია „მარიანისა" და სამოქალაქო ინიციატივის ორგანიზებით განხორციელდა. პროექტის ფარგლებში კომპაქტდისკებზე ჩაიწერა 20 აუდიოწიგნი. წიგნები შეირჩა თავად მასწავლებლებისა და მოსწავლეთა სურვილის მიხედვით და ჩაიწერა მოხალისეთა მიერ. სრულად წყარო: freea.ge

აჭარა. ორგანიზაციის - „ცვლილებები თანაბარი უფლებებისათვის" ორგანიზებით შეზღუდული შესაძლებლობების თემაზე სემინარები გაიმართა. სემინარები შეზღუდული შესაძლებლობების მქონე პირები პროექტის - „შშმ პირების საზოგადოებაში ინტეგრაციის პირველი ნაბიჯი" - ფარგლებში ჩატარდა. პროექტის ფინანსური მხარდამჭერია აჭარის სპორტისა და ახალგაზრდობის საქმეთა დეპარტამენტი. წყარო:ორგანიზაციის გვერდი სოციალურ ქსელში

თბილისი. „იუნისეფის" მხარდაჭერით საქართველოს განათლებისა და მეცნიერების სამინისტრომ და საქართველოს საგანმანათლებლო და სამეცნიერო ინფრასტრუქტურის განვითარების ეროვნულმა სააგენტომ მოამზადეს სტანდარტი, თუ როგორი უნდა იყოს სიტუაცია წყალთან, სანიტარიასა და ჰიგიენასთან დაკავშირებით სკოლებში. პროექტის ფარგლებში მომზადდა სახელმძღვანელო „იყავი სუფთა და ჯანმრთელი", რომელიც გამოიყენება დამატებით რესურსად ბუნებისმეტყველების გაკვეთილებზე. წარმოდგენილი სახელმძღვანელოთი სწავლება ხელს შეუწყობს ბუნებისმეტყველების სტანდარტში მოცემული შედეგების მიღწევას და მრავალფეროვანს გახდის გაკვეთილის მიმდინარეობას. სახელმძღვანელო წყარო: გაეროს ბავშვთა ფონდის ვებგვერდი სოციალურ ქსელში

იმერეთი. 25 მარტს, სტუდენტური გაერთიანება „ინფორმაციის ძალის" ორგანიზებით, ქუთაისის ნიკო ნიკოლაძის სახელობის სკოლა-ლიცეუმში მოსწავლეებისთვის საინფორმაციო შეხვედრა გაიმართა. შეხვედრის მთავარი თემა გაცვლით პროგრამებსა და საერთაშორისო განათლების შესაძლებლობებს ეხებოდა. სხვადასხვა ორგანიზაციების მიერ შემოთავაზებული პროგრამების შესახებ მოსწავლეებს ინფორმაცია, საერთაშორისო განათლების ცენტრის რეგიონული წარმომადგენელმა, ელენე ბერეკაშვილმა მიაწოდა.

თბილისი. 25 მარტს, აირექსის პროექტის „გამოხატვის თავისუფლების უზრუნველყოფის" ფარგლებში ტარდება ერთდღიან სემინარს ჯიპას ჟურნალისტიკისა და მედია მენეჯმენტის სამაგისტრო პროგრამის სტუდენტებისთვის. სემინარი შეეხება ჟურნალისტების პროფესიულ უნარ-ჩვევებს ახალ მედიაში. ტრენინგების თემაა ონლაინ იდენტობა, რისკების მართვა და ინფორმაციის მენეჯმენტი. სემინარი გაიმართება მულტიმედიური განათლების ცენტრში 13:00 საათზე. წყარო:media.ge

სამცხე-ჯავახეთი. 20 მარტს, სამცხე-ჯავახეთის სახელმწიფო უნივერსიტეტში, პავლე ზაზაძის სახელობის საკონფერენციო დარბაზში, ჩატარდა პროექტის პრეზენტაცია: „უმაღლესი განათლებისა და მეცნიერების სტრატეგიული განვითარება საქართველოში - რეფორმის განხორციელების მხარდამჭერი პლატფორმის ჩამოყალიბება" . პროექტის მიზანია ქვეყნის უმაღლესი განათლებისა და მეცნიერების განვითარების სტრატეგიული მიმართულებების იდენტიფიცირება და სექტორის გარდაქმნის სტრატეგიული გეგმის შემუშავება. აკადემიური საზოგადოების, სტუდენტების და სამოქალაქო სექტორის აქტიური ჩართულობა უმაღლესი განათლების სარეფორმო პროცესებში. შეხვედრა პროექტის პრეზენტაციით დაიწყო. დისკუსია ორ საათს გაგრძელდა. შეხვედრას ესწრებოდნენ ექსპერტები, უნივერსიტეტის ადმინისტრაციის, სახელმწიფო სტრუქტურებისა და სამოქალაქო საზოგადოების წარმომადგენლები, პედაგოგები, სტუდენტები, პროექტი „უმაღლესი განათლებისა და მეცნიერების სტრატეგიული განვითარება საქართველოში - რეფორმის განხორციელების მხარდამჭერი პლატფორმის ჩამოყალიბება", 2013 წელს, ფონდ „ღია საზოგადოება-საქართველოს” ფინანსური მხარდაჭერით განათლების პოლიტიკის დაგეგმვისა და მართვის საერთაშორისო ინსტიტუტმა (EPPM) განახორციელა. პროექტის პარტნიორები იყვნენ: TEMPUS-ის ეროვნული ოფისი, სოციალურ მეცნიერებათა ცენტრი (CSS), საერთაშორისო განათლების ცენტრი(CIE) და ღია საზოგადოების ფონდების აკადემიური მხარდაჭერის პროგრამა(AFP).

თბილისი. 17 მარტს „აისში” ჩატარდა ლექცია „ტოპოგრაფია – რუკის კითხვა”. კურსანტები გაეცნენ ტოპოგრაფიის ზოგად პრინციპებსა და რუკასთან მუშაობის წესებს. შესაძლებლობის ფარგლებში აეხსნათ რუკის საშუალებით მოძრაობისა და ორიენტირების გამოყენების პრაქტიკული წესები, რელიეფის მახასიათებლები, რუკის პირობით ნიშნები, გარე გაფორმება, ჰორიზონტალები, მასშტაბი და ა.შ. შემდეგ შაბათს და კვირას მოეწყობა პრაქტიკული მეცადინეობა, სადაც შეფასდება კურსანტების შესაძლებლობები რუკით გადაადგილებაში. წყარო:ორგანიზაციის გვერდი სოციალურ ქსელში

სამცხე-ჯავახეთი. საერთაშორისო განათლების ცენტრი - ახალციხე 20 მარტს გამართავს საჯარო დისკუსიას - „უმაღლესი განათლებისა და მეცნიერების სტრატეგიული განვითარება საქართველოში". დისკუსიის მიზანია აკადემიური საზოგადოების, სტუდენტების, სახელმწიფო სტრუქტურების წარმომადგენლების და სამოქალაქო საზოგადოების აქტიური ჩართვა უმაღლესი განათლების სარეფორმო პროცესებში.  სრულად წყარო:ორგანიზაციის გვერდი სოციალურ ქსელში

თბილისი. ორგანიზაციამ „პირველი ნაბიჯი საქართველომ" ამერიკულ ორგანიზაციასთან „VORT Corporation”–სთან თანამშრომლობით მოიპოვა ორი მნიშვნელოვანი ინსტრუმენტის ქართული თარგმანისა და მისი გამოყენების საავტორო უფლება. აღნიშნული ინსტრუმენტების დანერგვა კიდევ უფრო გააუმჯობესებს შეზღუდული შესაძლებლობების მქონე ბავშვების და მოზარდების მომსახურების ხარისხს ადრეული ჩარევის, დღის ცენტრის და შინ მოვლა, მომსახურების პროგრამებს. სრულად წყარო: ორგანიზაციის ვებგვერდი სოციალურ ქსელში

თბილისი. საერთაშორისო გამჭვირვალობა – საქართველო აქვეყნებს ბლოგს – „აჭარაში სკოლის დირექტორთა შესარჩევი კონკურსი უკანონოდ ჩატარდა". მეცნიერებისა და განათლების მინისტრმა გამოსცა ბრძანება, რომლითაც იმ პირთა ვინაობა გამოაცხადა, რომლებმაც წარმატებით დაძლიეს 2013 წლის საჯარო სკოლის დირექტორის შესარჩევი კონკურსის სერტიფიცირების ეტაპი და მოიპოვეს დირექტორობის უფლება საქართველოში არსებულ საჯარო სკოლებში. საერთაშორისო გამჭვირვალობა – საქართველოს მიაჩნია, რომ „აჭარის ავტონომიური რესპუბლიკის სკოლებში კონკურსის ჩატარების წესი არსებითად დარღვეული იყო და ის უკანონოდ უნდა გამოცხადდეს". სრულად წყარო: transparency.ge

თბილისი. „ტფილისის ჰამქარმა" განაახლა საგანმანათლებლო ექსკურსიები თბილისში. წელს პირველი ასეთი ტური 16 მარტს გაიმართა. მონაწილეებმა ფეხით შემოიარეს თბილისი_ კალა–კლდისუბანი–აბანოთუბანი და ხარფუხი. მონაწილეობის მსურველებს შემდგომი ტურებისა და პირობების შესახებ ინფორმაცია შეუძლიათ იხილონ ორგანიზაციის ვებგვერდზე სოციალურ ქსელში.

თბილისი. სოციალურ ქსელში „მოქალაქის" ვენგვერდზე გამოქვეყნდა არასამთავრობო ორგანიზაციის „მოქალაქის" სახელით ახალი ინფორმაცია. კერძოდ, „მოქალაქე" მედიაორგანიზაციებს სთავაზობს, ტრენინგების ჩატარებას ჟურნალისტებისთვის კვალიფიციური ადგილობრივი და საერთაშორისო ექსპერტებისა და ორგანიზაციების მონაწილეობით. მიუხედავად იმისა, რომ ორგანიზაციას აქვს საკუთარი შეხედულება, თუ რა მიმართულებით იქნება ტრენინგების ჩატარება მნიშვნელოვანი, საჭიროდ მიიჩნევს, მიიღოს დამატებითი ინფორმაცია თავად მედიასაშუალებების ხელმძღვანელებისაგან, კონკრეტულად, რომელ საკითხებს თვლიან ისინი აქტუალურად და რაში საჭიროებენ მათდამი დაქვემდებარებული მედიაორგანიზაციების თანამშრომლები ცოდნის გაღრმავებას". ინფორმაციის მიწოდება შესაძლებელია ელ–ფოსტით: info@mokalake.ge სრულად წყარო: „მოქალაქის ვებგვერდი" სოციალურ ქსელში

თბილისი. ჰალტის საერთაშორისო ბიზნეს სკოლა ქართველ სტუდენტებს იწვევს საინფორმაციო სესიაზე დასასწრებად. სესია გაიმართება 22 მარტს, 15:00 საათზე საერთაშორისო განათლების ცენტრში (თბილისი, ჭოველიძის 10, ფონდ „ღია საზოგადოება – საქართველოს" დარბაზი). სესიამ წარუძღვება ჰალტის ბიზნეს კოლის რეკრუტირების ასოცირებული დირექტორი ოქსანა ფედოროვა. დაწვრილებითი ინფორმაციისათვის შეგიძლიათ მიმართოთ: საერთაშორისო განათლების ცენტრს (ჭოველიძის ქუჩა 10; თბილისი , ტელ.: 2252615, ელ-ფოსტა: cie@osgf.ge). სრულად წყარო: jobs.ge

სამცხე–ჯავახეთი. 14 მარტს, 15:00 საათზე საერთასორისო განათლების ცენტრი საორიენტაციო შეხვედრას გამართავს ამერიკაში სწავლის მსურველებისთვის. განხილული იქნება საკითხები, თუ როგორ მიიღება განათლება ამერიკის შეერთებულ შტატებში, როგორ შეიძლება დაფინანსების მოძიება, სასურველი უნივერსიტეტის ან კოლეჯის შერჩევა და სხვა. შეხვედრას გამართავს ცენტრის ამერიკული განათლების კონსულტანტი – დალი ხომერიკი. დასწრება თავისუფალია. მისამართი: ახალციხე, კოსტავას #109, ახალციხის ამერიკის კუთხე. წყარო: საერთაშორისო განათლების ცენტრის ვებგვერდი სოციალურ ქსელში

თბილისი. საერთაშორისო განათლების და განვითარების აკადემია გაძლევთ საშუალებას დასვათ თქვენთვის საინტერესო კითხვები, რომელიც შეეხება ბუღალტერიას, საგადასახადო მართვას, მენეჯმენტსა და კომპიუტერულ უნარ-ჩვევებს. პასუხებს მიიღებთ ორგანიზაციის მაღალკვალიფიციური ტრენერებისგან ყოველი კვირის ხუთშაბათს. სრულად წყარო: ორგანიზაციის ვებგვერდი სოციალურ ქსელში

აჭარა. 11 მარტს, ბათუმის დემოკრატიული ჩართულობის ცენტრში, ახალგაზრდულმა ორგანიზაციამ - „ცვლილებები თანაბარი უფლებებისათვის" წარმოადგინა ახალი პროექტი. პროექტი – „შშმ პირების საზოგადოებაში ინტეგრაციის პირველი ნაბიჯი" – მიზნად ისახავს შეზღუდული შესაძლებლობების მქონე პირების შესახებ მოსწავლეების ცნობიერების ამაღლებას და შშმ პირების საზოგადოებაში ინტეგრაციის ხელშეწყობას. პროექტი ორ თვეს მოიცავს და ბათუმის ათ საჯარო სკოლებში შშმ პირების მიერ მე-10, მე-11 და მე-12 კლასის მოსწავლეებისთვის საინფორმაციო გაკვეთილების ჩატარებას გულისხმობს. პროექტის ფინანსური მხარდამჭერია აჭარის სპორტისა და ახალგაზრდობის საქმეთა დეპარტამენტი.

კახეთი. თელავის დემოკრატიული ჩართულობის ცენტრში, ფონდი ,,ღია საზოგადოება-სართველოს” მიერ ფინანსური მხარდაჭერით ჩატარდა ტრენინგი ახალგაზრდები სამოქალაქო საზოგადოების სამსახურში. „პროექტის მიზანია გააძლიეროს ახალგაზრდები რათა მათ დამოუკიდებლად შეძლონ აქტუალური თემების გამოყოფა და შესაბამის სამთავრობო თუ საზოგადოებრივ ფენებზე მოახდინონ ზეგავლენა. დღევანდელი ტრენინგის თემა იყო თანამედროვე საინფორმაციო ტექნოლოგიები", განაცხადა ტრენერმა ნინო თოდუამ. ახალგაზრდებმა მიიღეს ინფრომაცია რა არის სოციალური მედია, ბლოგი, სოციალური ქსელი და როგორ გამოიყენონ ადგილობრივი პრობლემების გადასაჭრელად. პროექტი ახორციელებენ არასამთავრობო ორგანიზაციები ცენტრი „აფხაზეთი" სამოქალაქო საზოგადოების განვითარების ცენტრი და საუნჯე. ფონდი „ღია საზოგადოება – საქართველოს" ფინანსური მხარდაჭერით.

ქვემო ქართლი. 13 მარტს სიქაში კიდევ ერთი ინგლისურენოვანი კლუბი „კომიქსების კლუბი" დაიწყებს ფუნქციონირებას. კლუბის მიზანია: ინგლისური ენის პრაქტიკაში გამოყენება, სმენისა და ლაპარაკის უნარების განვითარება, ინგლისურენოვანი კომიქსების პოპულარიზაცია. ახალგაზრდები შეისწავლიან კომიკოსებს სხვადასხვა პოპულარული კომპანიებისგან. მონაწილეები გამართავენ დისკუსიას ინგლისურად ამათუ იმ კომიქსზე. ასევე მათ ექნებათ საშუალება თვითონვე შექმნან კომიქსები მათივე იდეებითა და სცენარით კლუბში სამუშაო ენა იქნება ინგლისური. კლუბში გაწევრიანება შეუძლია ყველა დაინტერესებულ პირს ასაკით 12 წლიდან. კლუბში დასწრება თავისუფალია. „კომიქსების კლუბი" გაიმართება ყოველ ხუთშაბათს 17:00 საათზე. წყარო:ორგანიზაციის გვერდი სოციალურ ქსელში

აჭარა. 8 მარტს, არასამთავრობო ორგანიზაციამ „ბორჯღალიმ" დემოკრატიის მთხრობელთა სკოლის ფარგლებში მორიგი სემინარი ჩაატარა. ამჯერად სემინარის თემა სამოქალაქო სექტორი და მოქალაქეობის არსი იყო. მომსენების შემდეგ განხილეს საქართველოს რეალობაში არსებული მესამე სექტორის საქმიანობა, მათი მიღწევები და ის შეცდომები, რომელიც ორგანიზაციების „გაქრობას" იწვევს. დემოკრატიის მთხრობელთა სკოლის მოსწავლეებს პრეოქტების წერის ტექნიკა და დონორების მოძიების პრინციპებზე მიაწოდეს ინფორმაცია.

სამეგრელო. 8 მარტს, ასოციაცია „ათინათში" არსებულ ახალგაზრდულ ცენტრ „ორტუსში" „სწავლა ამერიკაში" - საორიენტაციო შეხვედრა ჩატარდა. შეხვედრის მიზანი იყო ცოდნის მირება აშშ-ში სწავლების პერსპექტივებზე და იმ აუცილებელ ნაბიჯებზე, რომლებიც ამერიკაში სწავლის გასაგრძელებლადაა აუცილებელი. შეხვედრის განმავლობაში განხილული იყო ისეთი საკითხები, როგორიცაა ცხოვრება აშშ-ში, კოლეჯის შერჩევა, უმაღლეს საგანმანათლებლო დაწესებულებაში მიღების კრიტერიუმები და სხვა სწავლებასთან დაკავშირებული საკითხები. ასევე, მონაწილეებმა მიიღეს ინფორმაცია სხვადასხვა საგანმანათლებლო ინტერნეტ-რესურსების შესახებ. წყარო:ორგანიზაციის გვერდი სოციალურ ქსელში