კახეთი. 8 მარტს, თელავის დემოკრატიული ჩართულობის ცენტრში „კახეთის სამოქალაქო ლიგის" ორგანიზებით, „საბავშვო ბაღების მართვისა და სერვისის მიწოდების გაუმჯობესების ხელშეწყობის" პროექტის პრეზენტაცია გაიმართა. პროექტის მიზანია: მმართველობითი სისტემის გაუმჯობესების გზით ეფექტური სკოლამდელი აღზრდის პროცესის ხელშეწყობა. პროექტის ფარგლებში სკოლამდელი სააღმზრდელო დაწესებულებების მართვის სიღრმისეული კვლევა ჩატარდება. თელავსა და თელავის სოფლებში სკოლამდელი აღზრდის მნიშვნელოვნების შესახებ საჯარო განხილვები და დებატები მოეწყობა, რომელშიც სკოლამდელი აღზრდის მუშაკები, არასამთავრობო ორგანიზაციები, ექსპერტები, მშობლები და ხელისუფლების წარმომადგენლები აქტიურად ჩაერთვებიან. ორგანიზატორთა განცხადებით „აღნიშნულ პროექტს 2014 წლის 3 თებერვლიდან „კახეთის სამოქალაქო ლიგა" „რეგიონის განვითარების ცენტრთან" ერთად აღმოსავლეთ-დასავლეთის მართვის ინსტიტუტის (EWMI), „საქართველოში საჯარო პოლიტიკის, ადვოკატირებისა და სამოქალაქო საზოგადოების განვითარების" პროგრამის (G-PAC) ფარგლებში თელავის მუნიციპალიტეტში ახორცილებს.

თბილისი. 8-9 მარტს, არასამთავრობო ორგანიზაცია „საქართველოს დემოკრატიული ინიციატივის" ოფისში გაიმართა ტრენინგი სტუდენტებისთვის დისკრიმინაციის აკრძალვის და პირადი ცხოვრების უფლების შესახებ. ტრენინგზე განხილულ იქნა პირადი ცხოვრების უფლების დაცვის მექანიზმები, საერთაშორისო სტანდარტები და შიდა კანონმდებლობა, დისკრიმინაციის ნიშნები და ასევე დისკრიმინაციისგან დამცავი ნორმები. ტრენინგს უძღვებოდნენ ადამიანის უფლებათა სამართლის სპეციალისტები. წყარო:ორგანიზაციის გვერდი სოციალურ ქსელში

აჭარა. 6 მარტს ბათუმის ახალგაზრდული ცენტრის წევრებისათვის გაიმართა საორიენტაციო შეხვედრა ამერიკაში სწავლასთან დაკავშირებით. როგორ მივიღოთ განათლება ამერიკის შეერთებულ შტატებში? სად და როგორ მოვიძიოთ დაფინანსება და შევარჩიოთ სასურველი უნივერსიტეტი ან კოლეჯი? ამ და სხვა კითხვებს „საერთაშორისო განათლების ცენტრის" ამერიკული განათლების კონსულტანტმა - დალი ხომერიკმა უპასუხა. შეხვედრა გაიმართა პროექტის „ეროვნული ინტეგრაციის გაძლიერება საქართველოში" (ANI) ფარგლებში, რომელსაც ახორციელებს საქართველოს გაეროს ასოციაცია (UNAG) აშშ-ს საერთაშორისო განვითარების სააგენტოს (USAID) ფინანსური მხარდაჭერით. წყარო:ორგანიზაციის გვერდი სოციალურ ქსელში

კახეთი. 1 მარტს თელავის მეხუთე საჯარო სკოლაში სამოქალაქო განათლების პედაგოგთა ფორუმის კახეთის რეგიონალური კონფერენცია ჩატარდა, რომელსაც ფორუმის რეგიონალური კოორდინატორი უძღვებოდა.   ღონისძიებას თელავის, გურჯაანის, ლაგოდეხის,საგარეჯოს, დედოფლისწყაროს, ახმეტის, ყვარელის და სიღნაღის რაიონებიდან 30–მდე პედაგოგიდაესწრო. კოორდინატორმა მათ საქართველოს განათლებისა და მეცნიერების სამინისტროს  პოლიტიკის დოკუმენტი – სამოქალაქო განათლების სტრატეგიული გეგმა გააცნო, რომელიც ძირითადად სამოქალაქო განათლების პედაგოგთა რეკომენდაციებზე დაყრდნობით შეიქმნა.  სრულად წყარო:კონსულტაციებისა და ტრენინგების ცენტრის გვერდი სოციალურ ქსელში

შიდა ქართლი. 5 მარტს, გორის დემოკრატიული ჩართულობის ცენტრში,  ქალთა საინფორმაციო ცენტრმა ჩაატარა ტრენინგი.  ტრენინგს  ესწრებოდნენ ქალები საოკუპაციო ზოლის გასწვრივ განლაგებული სოფლებიდან  (დიცი, ქორდი, მეღვრეკისი) და ადგილობრივი არასამთავრობო ორგანიზაციების წარმომადგენლები. ტრენინგის მიმდინარეობისას მონაწილენი გაეცვნენ ერთი ფანჯრის პრინციპის შეხვედრების მეთოდოლოგიას, შეასრულეს ჯგუფური სამუშაოები და ნახეს ვიდეო სიუჟეტი, რომლის შემდეგაც გაიმართა დისკუსია.

სამცხე–ჯავახეთი. ახალციხელმა მოსწავლეებმა, განათლებისა და მეცნიერების მინისტრის მოადგილესთან ონლაინკონფერენცია გამართეს. კონფერენციის მიზანს საზოგადოებაში მიმდინარე მნიშვნელოვან პროცესებში მოსწავლეთა ჩართულობა წარმოადგენდა. კონფერენცია ახალციხის ახალგაზრდულ ცენტრში, სამოქალაქო განათლებისა და პედაგოგთა გადამზადების პროგრამის ფარგლებსი ჩატარდა. მინისტრის მოადგილემ ლია გიგაურმა დემოკრატიული სახელმწიფოს ჩამოყალიბების პროცესში მოსწავლეთა როლზე ისაუბრა და ამ კუთხით ახალგაზრდებს საკუთარი ხედვა გაუზიარა. კონფერენციაზე ასევე განიხილეს საკითხები დამამთავრებელი კლასების საატესტატო გამოცდებთან, სამოქალაქო კლუბების განვითარებასთან დაკავშირებით. კითხვა–პასუხის რეჟიმში მიმდინარე კონფერენციაზე მოსწავლეებს საშუალება ჰქონდათ თავიანთთვის საინტერესო კითხვებზე ამომწურავი პასუხები მიეღოთ.

27-28 თებერვალს ქუთაისსა და ბათუმში უმაღლესი განათლებისა და მეცნიერების სტრატეგიულ განვითარებაზე საჯარო დისკუსიები გაიმართა. ადგილობრივ უნივერსიტეტებში ჩატარდა პროექტის „უმაღლესი განათლებისა და მეცნიერების სტრატეგიული განვითარება საქართველოში - რეფორმის განხორციელების მხარდამჭერი პლატფორმის ჩამოყალიბება" პრეზენტაცია, რომელიც ფონდი „ღია საზოგადოება-საქართველოს" ფინანსური მხარდაჭერით განხორციელდა.  რეგიონებში ჩატარებული პრეზენტაციებისა და დისკუსიები მიზანი უმაღლესი განათლების რეფორმის პროცესებში აკადემიური საზოგადოების, სტუდენტების, სახელმწიფო სტრუქტურების წარმომადგენლების და სამოქალაქო საზოგადოების აქტიური ჩართვა იყო.  ექსპერტებმა დამსწრე საზოგადოებას გააცნეს უმაღლესი განათლების სისტემაში არსებული მდგომარეობის ანალიზი.  პრეზენტაციის შემდეგ გაიმართა დისკუსიები, მიღებული კომენტარები და გამოთქმული შენიშვნები გათვალისწინებული იქნება პროექტის ავტორების მიერ საბოლოო დოკუმენტის შემუშავებაში, რომელიც დახმარებას გაუწევს განათლებისა და მეცნიერების სამინისტროს სტრატეგიული გეგმის შემუშავების პროცესში. სტუდენტებმა გამოთქვეს სურვილი, რომ მათი საჭიროებები მეტად იყოს გათვალისწინებული სტრატეგიაში.  პროექტის პარტნიორები არიან: TEMPUS-ის ეროვნული ოფისი, სოციალურ მეცნიერებათა ცენტრი (CSS), საერთაშორისო განათლების ცენტრი (CIE) და ღია საზოგადოების ფონდების აკადემიური მხარდაჭერის პროგრამა (AFP). წყარო: ფონდ „ღია საზოგადოება – საქართველოს" ვებგვერდი სოციალურ ქსელში

კახეთი. თელავში სამოქალაქო განთლების პედაგოგთა ფორუმის რეგიონული კონფერენცია ჩატარდა, სადაც განხილული იყო ფორუმის სამომავლო განვითარების პერსპექტივა. პედაგოგებმა იმსჯელეს სხვადასხვა კონცეფციებზე. შევხედრაზე განიხილებოდა სამოქალაქო განათლების პრობლემები და ხელის შემშლელი ფაქტორები. ფორუმის მხარდამჭერები არიან სამოქალაქო განათლების პედაგოთა გადამზადების პროგრამა, რომელიც ხორციელდება PH International-ის მიერ, კონსულტაციისა და ტრენინგების ცენტრთან თანამშრომლობით, განათლების და მეცნირების სამინისტროსთან ერთად.

აჭარა. საზოგადოება „ბილიკის" ორგანიზებით 28 თებერვალს და 1 მარტს გაიმართა სამუშაო შეხვედრა დაბა ჩაქვში. შეხვედრის მიზანი იყო მონაწილეებისთვის ქსელის - „კავკასიის ქსელი ბავშვებისთვის" - მიზნების, სამომავლო გეგმების, არსებული საგანმანათლებლო პოლიტიკის და განხორციელებული საქმიანობების გაცნობა. „კავკასიის ქსელი ბავშვებისთვის" 2013 წლის იანვარში 15 არასამთავრობო ორგანიზაციის ინიციატივით, ღია საზოგადოების ინსტიტუტის, ავსტრიული საერთაშორისო ორგანიზაციის ინტერკულტურული ცენტრისა და ავსტრიის განათლების სამინისტროს მხარდაჭერით შეიქმნა. სამოქალაქო განვითარების ინსტიტუტი და საზოგადოება „ბილიკი" ერთობლივად ახორციელებენ ბავშვთა უფლებების ადვოკატირების პროექტს კავკასიური საგანმანათლებლო ქსელის ფარგლებში, რომლის მიზანია კავკასიის რეგიონში ყველა ბავშვისთვის ხარისხიანი განათლების ხელმისაწვდომობა. წყარო:ორგანიზაციის გვერდი სოციალურ ქსელში

თბილისი. 27 თებერვალს,  განათლების მულტიმედია ცენტრში, გაიმართა ონლაინ კონფერენცია სამოქალაქო განათლების თემაზე. კონფერენციის სტუმარი იყო ლია გიგაური, საქართველოს განათლებისა და მეცნიერების მინისტრის მოადგილე. ონლაინ კონფერენციის განმავლობაში სტუმარი პასუხობდა აუდიტორიაში მყოფი თბილისის სასკოლო სამოქალაქო კლუბების წევრების და „სკაიპის" მეშვეობით მიღებულ შეკითხვებს. მოსწავლეების მიერ დასმული შეკითხვები ეხებოდა აქტიური მოქალაქის ჩამოყალიბების და მოსწავლეთა ჩართულობის მნიშვნელობას დემოკრატიული საზოგადოების განვითარების პროცესში, სამინისტროს მიერ დაგაგმილ ცვლილებებს სამოქალაქო განათლების სწავლების ხელშეწყობის მიზნით და ზოგადად, სიახლეებს სასწავლო პროცესში. მოსწავლეები, ასევე, დაინტერესდნენ სხვადასხვა საგრანტო კონკურსებით და მათში მონაწილეობის შესაძლებლობებით, რომლებსაც სამინისტრო აცხადებს. სულ კონფერენციაში 150-ამდე მოსწავლემ მიიღო მონაწილეობა. ონლაინ კონფერენცია გაიმართება სამოქალო განათლებისა და პედაგოგთა გადამზადების პროგრამის ფარგლებში, რომელსაც ახორციელბს PH International, ამერიკის შეერთებული შტატების საერთაშორისო განვითარების სააგენტოს (USAID) დაფინანსებით და საქართველოს განათლებისა და მეცნიერების სამინისტროს მხარდაჭერით. წყარო:ორგანიზაციის გვერდი სოციალურ ქსელში

თბილისი. 26 თებერვალს არასამთავრობო ორგანიზაცია „რადარამმა" გამართა ჯეი მათეუსის წიგნის წარდგენა მასწავლებლის და სხვა დაინტერესებული პირებისთვის. „იშრომე ბევრი, იყავი კეთილი" – ბოლო წლების საერთაშორისო ბესტსელერია იგი ეხება განათლების პოლიტიკას, მასწავლებლებსა და მოსწავლეებთან ეფექტიანი კომუნიკაციის გზების ძიებას. წიგნში მოთხრობილია სიხარულისა და წარუმატებლობის, ბიუროკრატიული თუ პირადი სირთულეების გადალახვის შესახებ. მომხსენებლებმა, ალექსანდე ლორთქიფანიძემ და ირაკლი კაკაბაძემ ისაუბრეს ამ წიგნის აქტუალობაზე საქართველოში დღევანდელი განათლების მდგომარეობის გათვალისწინებით და უპასუხეს დამსწრე საზოგადოების შეკითხვებს. წყარო: ორგანიზაციის ვებგვერდი სოციალურ ქსელში

კახეთი. ,,საერთაშორისო განათლების ამერიკული საბჭოების” წარმომადგენლებმა თელავის სახელმწიფო უნივერსიტეტში შეხვედრა გამართეს. შეხვედრაზე, ამერიკული საბჭოების მიერ გამოცხადებულ კარნეგის მკვლევართა სტაჟირების პროგრამის პრეზენტაცია შედგა.  პროექტს მენეჯერის, ალექს ხარლამოვის თქმით, კონკურსში მონაწილეობა შეუძლიათ ჰუმანიტარული და სოციალური მეცნიერებების მკვლევარებს, რომლებმაც უნდა შეავსონ განაცხადი ინდივიდუალურად ამერიკის შეერთებული შტატების უნივერსიტეტებსა და ინსტიტუტებში.  ალექს ხარლამოვი, პროექტს მენეჯერი: „ჩამოვედით თელავის სახელმწიფო უნივერსიტეტში, რომ დაინტერესებული პირებისთვის გაგვეცნო აღნიშნული პროექტი. იმედი მაქვს, თესაუში კარგი მკვლევარები იქნებიან და კონკურენციას გაუწევენ სხვა უნივერსიტეტის წარმომადგენლებს. განაცხადების მიღების ბოლო ვადაა 30 აპრილი".

იმერეთი. საერთაშორისო განათლებისა და განვითარების აკადემიაში 25 თებერვალს „ინგლისურად მოლაპარაკეთა კლუბის" მორიგი შეხვედრა გაიმართა. ღონისძიება საქართველოსა და უცხო ქვეყნების მოქალაქეებს შორის ურთიერთობის თემას მიეძღვნა, კერძოდ, განხილეს ენობრივი ბარიერები და კომპლექსები. კლუბის შეხვედრას ამერიკის შეერთებული შტატების მოქალაქე ბეთსი ჯენსონი უძღვებოდა. წყარო:ორგანიზაციის გვერდი სოციალურ ქსელში

შიდა ქართლი. აშშ–ის საელჩოს საზოგადოებასთან ურთიერთობის განყოფილების სტაჟიორი, მარიამ ხატიაშვილი სოფელ გალავნში „ბუქმობილს" ესტუმრად ა სკოლის მოსწავლეებს ინგლისური ენის შემსწავლელი ვიდეო–თამაშის შესახებ ესაუბრა. თამაში უფასოა და ნებისმიერ მსურველისთვის ხელმისაწვდომია. მათ ვისაც სურს გაიღრმავოს ინგლისური ენის ცოდნა შეუძლიათ ინტერაქციული თამაშისთვის ეწვიოთ ვებგვერდს: http://americanenglish.state.gov წყარო: აშშ–ის საელჩოს ვებგვერდი სოციალურ ქსელში

შიდა ქართლი. 18 თებერვალს, ფონდი საქველმოქმედო ჰუმანიტარული ცენტრ „აფხაზეთის" ორგანიზებით, გორში გაიმართა მოსწავლეთა კონფერენცია ფიზიკასა და მათემატიკაში. კონფერენციაში მონაწილეობას იღებდნენ გორის მუნიციპალიტეტის რვა სოფლის საჯარო სკოლის ფიზიკისა და მათემატიკის კლუბების წევრი მოსწავლეები. წარმოდგენილი თემების შესაფასებლად წინასწარ მოხდა მათი რეცენზირება ავტორიტეტული ექსპერტების - გორის სასწავლო უნივერსიტეტის პროფესორების მიერ. კონფერენციის ყველა მონაწილე მოსწავლეს გადაეცა მონაწილის სერთიფიკატი, ხოლო გამარჯვებულ მოსწავლეებს - წამახალისებელი საჩუქრები.

თბილისი. ჰაინრიჰ ბიოლის ფონდის სამხრეთ კავკასიის რეგიონული ბიუროს (HBS) საქმიანობაში მნიშვნელოვანი ადგილი უჭირავს საბჭოთა წარსულის გააზრებას. ქვეყნის ტოტალიტარულ წარსულზე მსჯელობა მნიშვნელოვანი წინაპირობაა საზოგადოების დემოკრატიული განვითარებისა და ლიბერალური ღირებულებების მხარდაჭერისათვის. სწორედ ამიტომ, ჰაინრიჰ ბიოლის ფონდი ყურადღებას უთმობს უახლესი ისტორიის მიმართულებით კვლევების და შესაბამისი ცოდნა-უნარების მხარდაჭერას. ჰაინრიჰ ბიოლის ფონდის სამხრეთ კავკასიის რეგიონული ბიურო, საერთაშორისო საზოგადოება მემორიალთან თანამშრომლობით, ახალგაზრდა ისტორიკოსებს, სოციოლოგებს, ჟურნალისტებს, ფსიქოლოგებს და პოლიტოლოგებს, ასევე, უახლესი ისტორიის კვლევის სფეროში მოღვაწე ან მსგავსი საქმიანობით დაინტერესებულ სამოქალაქო აქტივისტებს სთავაზობს სამ ეტაპიან სასემინარო ციკლს. სასწავლო კურსის მიზანია ზეპირი ისტორიების კვლევითი მეთოდიკის დაუფლება. სწავლების შედეგად მონაწილეებმა დამოუკიდებლად უნდა შეძლონ კვლევითი პროექტების ინიცირება და განხორციელება, რომლებიც ქვეყნის მეოცე საუკუნის ისტორიაში მნიშვნელოვანი მოვლენების შესახებ სხვადასხვა საზოგადოებრივი და ასაკობრივი ჯგუფების მეხსიერების ფიქსაციის და შენარჩუნების საშუალებას მოგვცემენ. სრულად წყარო: ge.boell.org

იმერეთი. 17-18 თებერვალს, ქუთაისის ახალგაზრდული ცენტრის წევრებისათვის გაიმართა ტრენინგ–სემინარი ადამიანის უფლებების შესახებ. მისი მიზანი იყო ადამიანის უფლებების შესახებ ახალგაზრდებისთვის ინფორმაციის მიწოდება და ცნობიერების ამაღლების ხელშეწყობა. მონაწილეები გაეცნენ რა არის ადამიანის უფლებები, პირადი ცხოვრების ხელშეუხებლობის უფლება, კონსტიტუციური დებულებები, დისკრიმინაციის განსაზღვრება, ლიბერალური ღირებულებები, სიძულვილის ენა, საერთაშორისო აქტები და ა.შ. ღონისძიება გაიმართა ეროვნული ინტეგრაციის გაძლიერების პროექტის ფარგლებში, რომელსაც ახორციელებს საქართველოს გაეროს ასოციაცია, აშშ–ის საერთაშორისო განვითარების სააგენტოს მხარდაჭერით. წყარო: ორგანიზაციის ვებგვერდი სოციალურ ქსელში

თბილისი. დავით ტვილდიანის სახელობის სამედიცინო უნივერსიტეტის სტუდენუტრი სამეცნიერო ასოციაციის (SYSSA)ორგანიზებით იმართება „სტუდენტთა და ახალგაზრდა მეცნიერთა მეორე სამეცნიერო კონფერენცია". მასში მონაწილეობას მიიღებენ სტუდენტები ლიტვის კლაიპედას უნივერსიტეტიდან, ყაზახეთის ყარაგანდის უნივერსიტეტიდან და ჩეხეთის ჩარლზის უნივერვიტეტიდან. მონაწილეობის მიღება შეუძლიათ დიპლომამდელ, PhD სტუდენტებსა და ახალგაზრდა მეცნიერებს მედიცინის, ფარმაციისა და ბიომედიცინასთან დაკავშირებული ყველა ფაკულტეტიდან. კონფერენციაზე განიხილება თანამედროვე მედიცინის, ბიომედიცინისა და ჯანდაცვის აქტუალური საკითხები. წარდგენილი თემები უნდა იყოს კლინიკური ან ექსპერიმენტალური. დეტალური ინფორმაცია  წყარო:ასოციაციის გვერდი სოციალურ ქსელში

თბილისი. ლიბერლიზმის სასწავლო ცენტრმა გასაუბრების ეტაპი დაასრულა. 80 განაცხადიდან გასაუბრება 40-მა აპლიკანტმა გაიარა, რის შემდეგაც ლიბცენტრმა მიიღო გადაწყვეტილება და ნაცვლად 20 სტუდენტისა ცენტრის წევრი 22 მათგანი გახდება. შერჩეული სტუდენტების სია წყარო:ორგანიზაციის გვერდი სოციალურ ქსელში

აჭარა. 15 თებერვალს, არასამთავროო ორგანიზაციამ „ბორჯღალმა" ახალი პროექტი - „დემოკრატიის მთხრობელთა სკოლა" დაიწყო. პირველი სემინარი ქართულ-ამერიკული უნივერსიტეტის პროფესორმა და პოლიტოლოგმა ბაქარ ბერეკაშვილიმა ჩაატარა, რომლის თემა იყო: „დემოკრატია - მისი კლასიკური და თანამედროვე აღქმა". მან ისაუბრა თუ საიდან მოდის დემოკრატიის ცნება და როგორია მისი ისტორიული განვითარების დინამიკა. 16 თებერვალს კი სკოლის 22 მოსწავლეს კობა კუპრაშვილიმა, დემოკრატიასა და სახელმწიფოს შორის არსებულ კავშირზე ესაუბრა. „დემოკრატიის მთხრობელთა სკოლა" შეიქმნა პროექტის „დემოკრატიის ისტორიები სამოქალაქო ცნობიერებისათვის" ფარგლებში, რომელიც ფონდი „ღია საზოგადოება - საქართველოს" მხარდაჭერით ხორციელდება.

იმერეთი. 14 თებერვალს საერთაშორისო განათლებისა და განვითარების აკადემიის ოფისში ჩატარდა ღია კარის დღე ბუღალტერიის კურსთან დაკავშირებით. შეხვედრა კითხვა-პასუხის რეჟიმში წარიმართა, რომელსაც 10 დაინტერესებული პირი ესწრებოდა. წყარო:ორგანიზაციის გვერდი სოციალურ ქსელში

ქვემო ქართლი. 14 თებერვალს სიქას ორგანიზებით ჩატარდა სოციალური მედიის ტრენინგი რუსთავის სასკოლო სამოქალაქო კლუბის წევრებისთვის. ტრენინგის მონაწილეები გაეცნენ ვიდეოს დამუშავებას და მის ატვირთვას პორტალზე Youtube.com. ტრენინგზე მიღებულ ცოდნას მოსწავლეები გამოიყენებენ კლუბის აქტივობების გაშუქებისას. ტრენინგის დასასრულს სამოქალაქო კლუბების წარმომადგენლებს გადაეცათ სამოქალაქო განათლებისა და პედაგოგთა გადამზადების პროგრამის ფარგლებში ორგანიზაცია PH International-ის მიერ გამოცემული აქტიური მოქალაქის სახელმძღვანელო „ვიდეო ადვოკატირება". ტრენინგს დაესწრო რუსთავის საჯარო სკოლების 6 მონაწილე. წყარო:ორგანიზაციის გვერდი სოციალურ ქსელში