თბილისი. საქართველოს სახალხო დამცველი, ბოლო დროს ქალთა მიმართ გახშირებული გენდერული ძალადობის შემთხვევებს ეხმაურება. „საქართველოს სახალხო დამცველი მოუწოდებს საქართველოს მთავრობას შექმნილი ვითარების ფონზე, დაუყოვნებლივ მოხდეს შესაბამისი უწყებების მხრიდან დროული, ეფექტური და ანგარიშვალდებული ღონისძიებების განხორციელება. საგანგებო ყურადღება დაეთმოს ოჯახში ძალადობისა და ოჯახური კონფლიქტის თითოეულ შეტყობინებას და გატარდეს ყველა შესაბამისი ღონისძიება ქალთა მიმართ ძალადობის აღმოფხვრისა და პრევენციისათვის," ნათქვამია ომბუდსმენის განცხადებაში. სრულად... წყარო: www.ombudsman.ge

თბილისი. სახალხო დამცველი შეუერთდა გაეროს მოსახლეობის ფონდის საქართველოს ოფისის და არასამთავრობო ორგანიზაციების კამპანიას „კაცები ზრუნავენ". კამპანია მიზნად ისახავს, წაახალისოს კაცების, როგორც მზრუნველი მამების და მეუღლეების ჩართულობა ოჯახების ჯანმრთელობისა და კეთილდღეობისთვის, რათა კაცებმა მეტად დაუჭირონ მხარი ქალთა თანასწორობას და თანაბრად გადაინაწილონ საოჯახო საქმე. სრულად... წყარო: ombudsman.ge

შიდა ქართლი. გორის გენდერის მედიაცენტრმა პოლიტიკური პარტიების და საზოგადოების წარმომადგენლებთან შეხვედრა-დისკუსიები დაიწყო თემაზე „აირჩიე თანასწორობა." „შეხვედრები იმართება პროექტის „ხმა მიეცი თანასწორობას" ფარგლებში. პროექტის მიზანია ხელი შეუწყოს მოსახლეობაში ინფორმირებულობის გაზრდას გენდერული თანასწორობის და ქალთა პოლიტიკური მონაწილეობის მნიშვნელობის კუთხით," ნათქვამია ორგანიზაიცის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. სასტუმრო „რუმსი", 8 ივლისი, პარასკევი, 19 საათი _ გაეროს მოსახლეობის ფონდის (UNFPA) საქართველოს ოფისის და არასამთავრობო ორგანიზაცია WeCare-ის ინიციატივით, საქართველოში კამპანია „MenCare" იწყება. დევიზით „კაცები ზრუნავენ". ინიციატორები კამპანიაში ჩასართავად ყველა იმ მამაკაცს იწვევენ, ვისთვისაც გენდერული თანასწორობა, მზრუნველობა, ჯანსაღი გარემოს შექმნა და პასუხისმგებლობის განაწილება მნიშვნელოვან ღირებულებას წარმოადგენს. კამპანიის საქართველოში დაწყება კიდევ ერთი მნიშვნელოვანი ნაწილია იმ მასშტაბური ინიციატივისა, რომელიც გენდერული თანასწორობის მიღწევის პროცესში მამაკაცების ჩართულობის გასაზრდელად გაეროს მოსახლეობის ფონდის (UNFPA) საქართველოს ოფისს ეკუთვნის. კამპანია მთლიანად ეფუძნება ქვეყანაში არსებული სიტუაციის ანალიზსა და ითვალისწინებს საქართველოს სოციალურ-კულტურულ კონტექსტს. წყარო: გაეროს მოსახლეობის ფონდი

თბილისი. გენდერული საინფორმაციო პორტალი აქვეყნებს სალომე მოდებაძის ბლოგპოსტს: „წარმოიდგინეთ, დგახართ x კომპანიის შესასვლელთან..." „თანასწორობისთვის ბრძოლა დაბადებამდე იწყება. მომავალი დედის სხეული ფიზიოლოგიურად მზად უნდა იყოს ნაყოფის მოსამწიფებლად, ხშირად, ორსულობა არასრულწლოვანი დედებისთვის სასიკვდილოდ საშიშია, ყველას არ აქვს შესაძლებლობა ამ პერიოდში ყველა საჭირო მედიკამენტი მიიღოს, ეს ახალშობილის ჯანმრთელობაზეც აისახება. საბავშვო ბაღიდან უნივერსიტეტის კარამდე ცნობიერების კუთხითაც ბევრია სამუშაო. კაცებით დომინირებულ სამყაროში ბევრი ისეთი ადათ-წესი გვაქვს, რომელიც, პირდაპირ გოგონებისა და ქალების წინააღმდეგ მოქმედებს და მათ ჯანმრთელობას ფიზიკურ საფრთხეს უქმნის," ნათქვამია ორგანიზაციის ვებ-გვერდზე. სრულად... წყარო: www.ginsc.net

თბილისი. გენდერული საინფორმაციო პორტალი აქვეყნებს ანა ფანცულაიას ბლოგპოსტს: „აჩრდილად ქცეული ქალები". „ჩემ გვერდით იყო ქალი, რომლიც იმაზე ფიქრით იძინებდა, თუ რა სადილი მოემზადებინა მეორე დღეს. დილას კი მთვლემარე მეუღლისთვის პერანგის გაუთოვებით იწყებდა. მთელ დღეს სახლის დალაგებაში, სადილის მომზადებასა და სარეცხის რეცხვაში ატარებდა. ხანდახან იმის უფლებასაც აძლევდა თავს, შვილიშვილებზე ეოცნება. შემდეგ სკოლიდან ადრე მოსული შვილების ტალახიანი ფეხსაცმელის რეცხვაში გართულს, მეუღლის ზარი გამოაფხიზლებდა და თმააწეწილი გავარდებოდა კარის გასაღებად. ის ვერ ამჩნევდა, რომ აჩრდილად იქცა, რომ გულისსწორი მისი გაუხეშებული ხელებისგან მხოლოდ სადილსა და სუფთა თეთრეულს ისურვებდა, რომ ტახტზე წამომჯდარ ოჯახის წევრებს, მის გამომცხვარ ნამცხვარს რომ მიირთმევდნენ, აზრადაც არ მოუვიდოდათ მადლობის გადახდა, რომ ვერცერთი მათგანი ვერ მიხვდებოდა თუკი თმას სხვა ფრად შეიღებავდა, რომ მის არსებობას მხოლოდ მაშინ შეამჩნევდნენ, თუკი სადილის მომზადება დააგვიანდებოდა, ან მაგიდის გადაწმენდა დაავიწყდებოდა," ნათქვამია ბლოგპოსტში. სრულად... წყარო: www.ginsc.net

თბილისი. თავდაცვის აკადემიაში გენდერულ მრჩეველთა სამდღიანი სემინარი - „გენდერული საკითხების ინტეგრირება უსაფრთხოების სექტორში და გაეროს უშიშროების საბჭოს რეზოლუციები ქალებზე, მშვიდობასა და უსაფრთხოებაზე" გაიხსნა. „სემინარის ფარგლებში ტრენერები გენდერული თანასწორობის ძირითად ცნებებზე, გენდერულ როლებზე, სტერეოტიპებზე და კონფლიქტის დროს გენდერული ნიშნით ძალადობასა და სექსუალურ ძალადობაზე ისაუბრებენ," ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. ჟენევის საერთაშორისო დისკუსიებში მონაწილე ქართული დელეგაციის წევრები არასამთავრობო ორგანიზაციების წარმომადგენლებს შეხვდნენ. „ქალთა საინფორმაციო ცენტრის დირექტორი ელენე რუსეცკაია ჟენევის საერთაშორისო დისკუსიების მონაწილეებისა და არასამთავრობო ორგანიზაციების საინფორმაციო შეხვედრას დაესწრო. ჟურნალისტებთან საუბრისას მან ხაზი გაუსვა ჟენევის წინა რაუნდზე მიღწეული გადაწყვეტილების მნიშვნელობას, ოთხწლიანი პაუზის შემდეგ გალის ინციდენტების პრევენციისა და მათზე რეაგირების მექანიზმის სამუშაო ჯგუფის განახლების შესახებ. თუმცა, იქვე უარყოფითად შეაფასა ის ფაქტი, რომ მაისში გამართულ პირველივე შეხვედრას არ ესწრებოდა სამუშაო ჯგუფის მონაწილე არცერთი გადაწყვეტილების მიმღები ქალი. ქალთა საინფორმაციო ცენტრი მოუწოდებს სახელმწიფოსა და საერთაშორისო ორგანიზაციებს, ხელი შეუწყონ ქალების ჩართულობას სამშვიდობო მოლაპარაკებების პროცესში," ნათქვამია ორგანიზაციის ვებ-გვერდზე. სრულად... წყარო: www.ginsc.net

17 ივნისს, ჟენევაში, გაეროს ადამიანის უფლებათა საბჭოს 32–ე სესიაზე ქალთა მიმართ ძალადობის, ძალადობის მიზეზებისა და შედეგების შესახებ გაეროს სპეციალურმა მომხსენებელმა საქართველოს თაობაზე ანგარიში წარმოადგინა. „გაეროს სპეციალურმა მომხსენებელმა ისაუბრა ოჯახში ძალადობის წინააღმდეგ ბრძოლის სფეროში საქართველოს მიღწევებსა და გამოწვევებზე. განსაკუთრებული ყურადღება გაამახვილა ქალთა მიმართ ძალადობის დეფინიციის განსაზღვრის და საკანონმდებლო სივრცის დახვეწის მნიშვნელობაზე. ამასთან, ისაუბრა ფემიციდის შემთხვევების შესწავლისა და მონიტორინგის მნიშვნელობაზე და დადებითად შეაფასა საქართველოს სახალხო დამცველის აპარატის მიერ განხორციელებული მონიტორინგი," ნათქვამია სახალხო დამცველის ვებ-გვერდზე. სრულად... წყარო: www.ombudsman.ge

აჭარა. 17 ივნისს, ბათუმის დემოკრატიული ჩართულობის ცენტრში დისკუსია გაიმართა - „ნუ მოერგები სტერეოტიპებს, შეცვალე რეალობა". პროექტის ფარგლებში არასამთავრობო ორგანიზაცია „ახალგაზრდა სოციალისტებმა", გენდერულ საკითხზე ჩატარებული კვლევის შედეგები შეაჯამეს. კვლევა თბილისში, ქუთაისში, ზუგდიდში, ბათუმსა და თელავში ჩატარდა. გამოკითხული ახალგაზრდების ნაწილს გენდერზე სტერეოტიპული შეხედულებები აქვს. პროექტის მიზანია გენდერული დისკრიმინაციის აღმოფხვრა და სტუდენტების ცნობიერების ამაღლება.

თბილისი. საქართველოს ახალგაზრდა იურისტთა ასოციაცია ეხმაურება ადამიანის უფლებათა დაცვისა და სამოქალაქო ინტეგრაციის კომიტეტის უარყოფით დასკვნას ფემიციდის კანონპროექტთან დაკავშირებით. სრულად... წყარო: gyla.ge

თბილისი. ქალთა საკითხებზე მომუშავე არასამთავრობო ორგანიზაციებმა წერილი გაუგზავნეს დეპუტატებს. „ჩვენ, ქალთა პოლიტიკური მონაწილეობის მხარდამჭერი სამუშაო ჯგუფი მივიჩნევთ, რომ 2012 წლის მოწვევის პარლამენტს ეძლევა ისტორიული შანსი, საფუძველი ჩაუყაროს ქალთა პოლიტიკაში მონაწილეობის სამართლიანობის პრინციპების დამკვიდრებას. და ისტორიაში შევიდეს იმ მოწვევის პარლამენტის სახელით, რომელმაც მნიშვნელოვანი გადაწყვეტილება მიიღო საქართველოს მიერ გენდერული თანასწორობის მიღწევის კუთხით აღებული საერთაშორისო ვალდებულებების შესასრულებლად", - ნათქვამია წერილში. სრულად... წყარო: ჟურნალისტთა ქსელის – გენდერული თანასწორობისთვის ვებგვერდი სოციალურ ქსელში

თბილისი. ფემინისტური ტური – ასე ჰქვია ჰაინრიჰ ბიოლის ფონდის ახალ ინიციატივას. იგი მოიცავს სტატიებსა და ვიდეოებს – 4 ისტორიულ ადგილს თბილისში, რომლებიც ქალთა წვლილს ასახავს ქვეყნის განვითარებაში. საჯარო სივრცეები - ქუჩები, სკვერები თუ სხვადასხვა შენობები - ინახავს და გადმოსცემს იმ მეხსიერებას, რომელიც ქალაქის ისტორიას ქმნის. თბილისში, როგორც მსოფლიო ქალაქების უმეტესობაში, ძალიან ცოტაა ისეთი ადგილი, რომელიც ქალების სახელს ატარებს. ეს კი ხელს უწყობს ქვეყნის განვითარებაში ქალების მიერ შეტანილი წვლილის დავიწყებას და მათი მიღწევების წაშლას კოლექტიური მეხსიერებიდან. ის, თუ ვინ შედის ისტორიის აღიარებულ ვერსიაში - ცალსახად პოლიტიკური საკითხია. სწორედ ამიტომ, ვფიქრობთ, მნიშვნელოვანია გავიხსენოთ და დავაფასოთ ქალები, რომლებიც იბრძოდნენ ცვლილებებისთვის. ფემინისტური ტურის ძალიან მოკლე ვერსია, რომელიც ჰაინრიჰ ბიოლის ფონდის სამხრეთ კავკასიის რეგიონული ბიუროს ინციატივით 2016 წლის გაზაფხულზე დაიგეგმა, წარმოგიდგენთ 4 ისტორიულ ადგილს თბილისში: მწერალთა სახლს, ქართველთა შორის წერა-კითხვის გამავრცელებელი საზოგადოების მემორიალს, საქართველოს დამფუძნებელი კრების შენობასა და მხატვარ ელენე ახვლედიანის სახლ-მუზეუმს. იმას, თუ როგორ უკავშირდება ქალების ისტორია ამ ადგილებს, ტურის შესახებ დაწერილი სტატიებითა და ვიდეოთი შეიტყობთ. სრულად... წყარო: feminism-boell.org

თბილისი. სახალხო დამცველი აქვეყნებს ანგარიშს, რომელიც ასახავს ქალთა უფლებრივი მდგომარეობის და გენდერული თანასწორობის შესახებ ქვეყანაში არსებულ მდგომარეობას. ანგარიშის მიხედვით, „2015 წელს ქმედითი ნაბიჯები არ გადადგმულა ქალთა პოლიტიკური მონაწილეობის ხელშესაწყობად. გენდერული მეინსტრიმინგის არსებული პრაქტიკისა და გამოწვევების შესწავლის შედეგებმა ცხადყო, რომ აღმასრულებელ ხელისუფლების დონეზე, დასაქმებულთა უმრავლესობა ქალია, თუმცა ხელმძღვანელ პოზიციებზე ისინი ნაკლებად არიან წარმოდგენილნი. არცერთ სამინისტროს არ აქვს სტრუქტურული ერთეული გენდერული თანასწორობის საკითხებზე. ..." ნათქვამია ომბუდსმენის ვებგვერდზე. სრულად... წყარო: ombudsman.ge

თბილისი. საქართველოს პარლამენტმა დეპუტატების, თამარ კორძაიასა და თამარ ხიდაშელის მიერ ფემიციდის შესახებ წარმოდგენილი საკანონმდებლო ინიციატივა განიხილა. „კანონპროექტის მიხედვით, ქალის გენდერული ნიშნით მოტივირებული, დამამძიმებელ გარემოებებში მკვლელობა ისჯება 11-დან 14 წლამდე თავისუფლების აღკვეთით. იგივე ქმედება ჩადენილი განსაკუთრებული სისასტიკით, ისჯება თავისუფლების აღკვეთით ვადით თექვსმეტიდან ოც წლამდე ან უვადო თავისუფლების აღკვეთით. კანონპროექტით გათვალისწინებული ცვლილებები გულისხმობენ ფემიციდის ადამიანის წინააღმდეგ მიმართულ დანაშაულად აღიარებას და მის განსაკუთრებით მძიმე დანაშაულთა კატეგორიაში მოქცევას. ცვლილებები, ასევე მოიცავენ გენდერული ნიშნით ჩადენილი დანაშაულების დამამძიმებელ გარემოებად აღიარებას, მათ შორის, ისეთ დანაშაულებთან მიმართებაში, როგორებიცაა ჯანმრთელობის განზრახ მძიმე დაზიანება, ჯანმრთელობის განზრახ მსუბუქი დაზიანება, ცემა, ძალადობა, იძულება, მუქარა," ნათქვამია ორგანიზაციის ვებ-გვერდზე. სრულად... წყარო: www.ginsc.net

თბილისი. 2 ივნისს, ქალთა საინფორმაციო ცენტრმა თბილისის მუნიციპალიტეტის საკრებულოში ქალაქის წარმომადგენლობითი ორგანოს გენდერული აუდიტის ანგარიშის პრეზენტაცია გამართა. „გენდერული აუდიტი საკრებულოს დოკუმენტებისა და პროგრამების ანალიზია, რომლის საფუძველზეც თბილისის საკრებულოსთვის რეკომენდაციები შემუშავდა. გენდერული აუდიტის მიზანია შემუშავებული რეკომენდაციების საფუძველზე თბილისის საკრებულოს გენდერულად მგრძნობიარე ბიუჯეტისა და პროგრამების შემუშავება," ნათქვამია ორგანიზაციის ვებ-გვერდზე. სრულად... წყარო" ორგანიზაციის ვებ-გვერდი სოციალურ ქსელში

თბილისი. ქალთა საინფორმაციო ცენტრი აქვეყნებს თამარ კურატაშვილის ბლოგპოსტს: „ეგრე არ არისო". „რა ბედნიერებაა, რომ ჭუჭრუტანიდან არ გიდევნებია თვალი და გითმენია, როგორი გამეტებით ურტყამს მამა დედას, რადგან ყველას ასე არ გაუმართლა. არც იმ ქალებს გაუმართლათ, თავს რომ აიძულებენ, დალურჯებული ადგილები დამალონ და მომხდარი დაივიწყონ, რადგან სხვა გამოსავალს ვერ ხედავენ, დედ-მამა სახლში არ იბრუნებთ, ბავშვებით ქუჩაში უპატრონოდ დარჩენის ეშინიათ, სახელმწიფო ჯერ ისედაც რას სთავაზობთ და, რასაც სთავაზობთ, იმის შესახებაც არაფერი სმენიათ," ნათქვამია ორგანიზაციის ვებ-გვერდზე. სრულად... წყარო: www.ginsc.net

კახეთი. 29 მაისი - 1ივნისი, სასტუმრო „ყვარლის ედემში" ქალთა საინფორმაციო ცენტრი პროდიუსერების, რედაქტორებისა და ჟურნალისტებისათვის, მართავს ტრენინგს „გენდერულად მგრძნობიარე საკითხების გაშუქება კონფლიქტურ და პოსტ-კონფლიქტურ სიტუაციებში". „ტრენინგის მიზანია, ტრადიციული და ახალი მედიის წარმომადგენლების ცნობიერების ამაღლება გენდერული თანასწორობის საკითხების, კონფლიქტური და პოსტ-კონფლიქტური სიტუაციების გაშუქებისა და ადგილობრივი სამშვიდობო მოლაპარაკებების პროცესის უშუალო მონაწილეებთან ჯანსაღი დისკუსიის უზრუნველყოფა იმ სხვადასხვა მნიშვნელოვანი საკითხის შესახებ, რაც გამყოფ ხაზთან მცხოვრებ მოსახლეობას აწუხებს. ტრენინგი ტარდება პროექტის „გაძლიერებული ქალები მშვიდობისა და განვითარებისათვის" ფარგლებში," ნათქვამია ორგანიზაციის ვებ-გვერდზე. სრულად... წყარო: www.ginsc.net

თბილისი. „საერთაშორისო გამჭვირვალობა - საქართველომ" დასავლეთ საქართველოს 44 მუნიციპალიტეტიდან მიღებული საჯარო ინფორმაციის საფუძველზე, ადგილობრივი თვითმმართველობის ორგანოებში გენდერული წარმომადგენლობა შეისწავლა. „კვლევის მიზანი იყო შეგვედარებინა 2015 წლის ივლისში არსებული მდგომარეობა 2016 წლის აპრილში არსებულ ვითარებასთან. 2015 წელს გამოქვეყნებული კვლევისგან განსხვავებით, ამჯერად ორგანიზაციამ არამხოლოდ დასავლეთ საქართველოს რეგიონები, არამედ სამცხე-ჯავახეთის მუნიციპალიტეტებში არსებული ვითარებაც შეისწავლა. დასავლეთ საქართველოს მუნიციპალიტეტების საკრებულოებსა და გამგეობა/მერიებში ქალებს არ უკავიათ მნიშვნელოვან გადაწყვეტილებათა მისაღებად აუცილებელი პოზიციები...," ნათქვამია ორგანიზაციის ვებ-გვერდზე. სრულად... წყარო: transparency.ge

თბილისი. საქართველოს ახალგაზრდა იურისტთა ასოციაციამ (საია) ფემიციდის დანაშაულად აღიარებასთან მიმართებით საქართველოს პარლამენტს საკუთარი მოსაზრებები წარუდგინა. „ქვეყანაში არსებული ქალთა მიმართ ძალადობის ზოგადი კონტექსტის გათვალისწინებით, საია ერთმნიშვნელოვნად მხარს უჭერს წარმოდგენილ ინიციატივას და აუცილებლად მიიჩნევს გენდერის ნიშნით ჩადენილი ქალთა მკვლელობების მიმართ განსაკუთრებული მიდგომის არსებობას. მომზადებული დასკვნაც, სწორედ კანონპროექტის შემდგომ სრულყოფას ისახავს მიზნად და იმედს ვიტოვებთ, რომ გათვალისწინებული იქნება კანონპროექტის ავტორთა/ინიციატორთა მიერ. მომზადებულ დოკუმენტს საფუძვლად უდევს ორგანიზაციის მიერ უახლოეს წარსულში ჩატარებული სიღრმისეული კვლევა, რომლის ფარგლებშიც შესწავლილი იქნა ფემიციის საქმეები, ამ მიმართულებით არსებული პრაქტიკა და პრობლემატიკა", ნათქვამია ორგანიზაციის ვებ-გვერდზე. სრულად... კვლევა... წყარო: gyla.ge

თბილისი. 13 მაისს, ომბუდსმენმა მთავრობის წარმომადგენლებს, საერთაშორისო ორგანიზაციებსა და არასამთავრობო სექტორს საქართველოში ქალთა უფლებრივი მდგომარეობისა და გენდერული თანასწორობის შესახებ ანგარიში წარუდგინა. „2015 წლის სახალხო დამცველის საპარლამენტო ანგარიშის მიხედვით ქალთა უფლებრივი მდგომარეობის დაცვა და გენდერული თანასწორობის მიღწევა კვლავ გამოწვევას წარმოადგენს", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. საქართველოს სახალხო დამცველი განცხადებას აქვეყნებს სექსუალური შევიწროების დეფინიციის განსაზღვრისთვის მომზადებული საკანონმდებლო ინიციატივის შესახებ. „განსაკუთრებით მნიშვნელოვანია, რომ საკანონმდებლო ინიციატივა იზიარებს ევროპის საბჭოს კონვენციის „ქალთა მიმართ ძალადობის და ოჯახში ძალადობის პრევენციისა და აღკვეთის შესახებ" მე-40 მუხლის სულისკვეთებას, რომლის მიხედვითაც სახელმწიფოებმა უნდა მიიღონ ყველა ზომა სექსუალური შევიწროების დეფინიციისა და აკრძალვისათვის. აღსანიშნავია, რომ კონვენციის რატიფიცირება უახლოეს პერიოდში იგეგმება. და ბოლოს, იმედს ვიტოვებთ, რომ საქართველოს პარლამენტი მხარს დაუჭერს წარდგენილ საკანონმდებლო ინიციატივას და კიდევ ერთი მნიშვნელოვანი ნაბიჯი გადაიდგმება გენდერული თანასწორობის მიღწევის ხელშეწყობისათვის", ნათქვამია სახალხო დამცველის ვებ-გვერდზე. სრულად... წყარო: www.ombudsman.ge