თბილისი. საქართველოს სახალხო დამცველის 2015 წლის საპარლამენტო ანგარიშში წარმოდგენილ ერთ–ერთ საკითხს ქალთა პოლიტიკური მონაწილეობის და გენდერული მეინსტრიმინგის გამოწვევების განხილვა წარმოადგენს. „შესწავლის შედეგებმა აჩვენა, რომ რიგი სამინისტროების, ისევე როგორც ადგილობრივი თვითმმართველობის ორგანოების მიერ, დასაქმებულთა გენდერული შემადგენლობის შესახებ ინფორმაცია არ გროვდება, მით უფრო, არ ხდება ამ ინფორმაციის გაანალიზება და გამოქვეყნება. აღმასრულებელი ხელისუფლების დონეზე, როგორც სამინისტროებში, ისე სახელმწიფო მინისტრის აპარატებში დასაქმებულთა უმრავლესობა ქალია, თუმცა ხელმძღვანელ პოზიციებზე ისინი ნაკლებად არიან წარმოდგენილნი", ნათქვამია ომბუდსმენის ვებ-გვერდზე. სრულად... წყარო: www.ombudsman.ge

თბილისი. 26 აპრილს, ორგანიზაცია „კონსტიტუციის 42-ე მუხლმა" გამართა კონფერენცია თემაზე „ქალების გაძლიერება სამუშაო ადგილებზე". „კონფერენციაზე განიხილეს შემდეგი საკითხები: წინასახელშეკრულებო ურთიერთობები (რომელიც გულისხმობს ვაკანსიის გამოქვეყნებისას თანასწორობის პრინციპების დაცვას), დასაქმებულების უფლებები, შევიწროების ფაქტებისაგან დაცული სამუშაო გარემო და შრომის ინსპექციის როლი დასაქმების ადგილებზე თანასწორი გარემოს უზრუნველყოფაში”, ნათქვამია ორგანიზაციის განცხადებაში. სრულად... წყარო: ორგანიზაციის ვებ-გვერდი სოციალურ ქსელში

აჭარა. 23 აპრილს, თანამედროვე ხელოვნების სივრცეში NIMD-ს მიერ მცირე გრანტების კონკურსის ფარგლებში დაფინანსებული პროექტის შემაჯამებელი შეხვედრა გაიმართა. პროექტი საზოგადოებამ გამოფენის სახით გაიცნო. 7 მოყვარული ფოტოგრაფის ობიექტივში 20 პერსონაჟის 36 ფოტო მოხვდა. პროექტი - „მაღალმთიან აჭარაში მცხოვრები ქალების ფოტოპორტრეტები" - გულისხმობდა მაღალმთიან აჭარაში რელიგიური და გენდერული კუთხით არსებულ საკითხების ფოტო კოლაჟის სახით წარმოჩენას. გამოფენის გახსნის შემდეგ გაიმართა დისკუსია, სადაც მომხსენებელმა იდა ბახტურიძემ, ქალთა მოძრაობის ისტორიის შესახებ ისაუბრა, ასევე საქართველოს სხვა კუთხეებში არსებული მდგომარება აღწერა და დამსწრე საზოგადოებასთან ერთად გარკვეული შედარებები გააკეთა. აღნიშნული გამოფენა თანამედროვე ხელოვნების სივრცეში სამი დღე დარჩება, დაინტერესებულ პირებს კი საშუალებას აძლევს მოყვარული ფოტოგრაფების ნამუშევრები დაათვალიეროს.

სამცხე-ჯავახეთი. 21-22 აპრილს, „კონსტიტუციის 42-ე მუხლი" პროექტის „ქალთა, განსაკუთრებით კი ეთნიკურ უმცირესობათა ჯგუფს მიკუთვნებულ ქალთა გაძლიერება და მართლმსაჯულებაზე ხელმისაწვდომობის ხელშეწყობა" ფარგლებში გეგმავს ვიზიტს ახალციხის მუნიციპალიტეტში. „ვიზიტის მიზანია ორ დღიანი ტრენინგის ჩატარება ეთნიკური უმცირესობების წარმომადგენელი მოსახლეობისათვის. ტრენინგის თემატიკა შეირჩა რეგიონში არსებული პრობლემატური საკითხების მიხედვით და შეეხება ისეთ თემებს, როგორიცაა გენდერული თანასწორობა, საკუთრების უფლება გენდერული თანასწორობის ჭრილში, ოჯახში ძალადობა და ადრეული ქორწინება. ტრენინგის ფარგლებში მოხდება ბენეფიციარების ინფორმირება მათი უფლებების შესახებ, თუ როგორ ისარგებლონ ამ უფლებებით და როგორ მოიქცნენ მათი უფლებების დარღვევის შემთხვევაში", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

იმერეთი. ქუთაისის გენდერის მედიაცენტრმა, პოლიტიკაში ქალების გააქტიურების მიზნით, პოლიტიკური პარტიების ქალ წარმომადგენლებთან შეხვედრები დაიწყო. „პოლიტიკური პარტიების ქალ წარმომადგენლებთან შეხვედრები პროექტის ,,აირჩიე თანასწორობა" ფარგლებში იმართება, რომელსაც არასამთავრობო ორგანიზაცია „ჟურნალისტთა ქსელი გენდერული თანასწორობისათვის" აშშ საერთაშორისო განვითარების სააგენტოს USAID–ისა და საარჩევნო სისტემების განვითარების ფონდის IFES -ის მხარდაჭერით ახორციელებს", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში

ქვემო ქართლი. 14-15 აპრილს, ტოლერანტობის და მრავალფეროვნების ინსტიტუტმა (TDI), ქალაქ გარდაბანში, რელიგიური და ეთნიკური უმცირესობების წარმომადგენელი გოგოებისთვის ჩაატარა ტრენინგი გენდერულ თანასწორობაზე. „ტრენინგი მიზნად ისახავდა: გენდერული თანასწორობის ცნებების გაზიარებას, გენდერული ცნებებისა და მიდგომების გააზრებას, საზოგადოებრივ სივრცეში გენდერული სტერეოტიპებისა და გენდერული უთანასწორობის ამოცნობასა და კრიტიკულ ანალიზს, სხვადასხვა რელიგიურ ტრადიციაში გენდერული როლების არსებული მოდელების გაცნობასა და მათი გენდერული თანასწორობის ჭრილში განხილვას", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

შიდა ქართლი. 9 აპრილს, გორის სამოქალაქო აქტივიზმის ცენტრის მოხალისეებისათვის მოწვეულმა სტუმარმა, გორის გენდერის მედია ცენტრის ხელმძღვანელმა ახალგაზრდებთან შეხვედრა-დისკუსია გამართა გენდერული თანასწორობის შესახებ. „შეხვედრის მიზანი იყო ემსჯელათ თუ რა იყო გენდერული თანასწორობა და რა მნიშვნელობა აქვს მას ქვეყნის განვითარებისთვის. ასევე თუ რა უშლის ხელს გენდერულ თანასწორობას და რა უნდა გაკეთდეს ქვეყანაში გენდერული ბალანსის აღსადგენად, რატომ უნდა მივცეთ ხმა ქალებს და რატომ უნდა გაიზარდოს მათი რიცხვი გადაწყვეტილების მიმღებ პოზიციებზე", ნათქვამია ორგანიზაციის ვებ-გევრდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

აჭარა. 24 მარტს, ბათუმის დემოკრატიული ჩართულობის ცენტრის ორგანიზებით შეხვედრა გაიმართა - ისტორიიდან გამქრალი ქალების, მათი როლის და მიღწევების საზოგადოებაში დაბრუნება. მწერალმა - თამთა მელაშვილმა, ეკატერინე გაბაშვილზე, ნინო ტყეშელაშვილსა და ლიდია მეგრელიძეზე ისაუბრა. შეხვედრაზე ქართველი ქალების ღვაწლი, მათი მდიდარი ბიოგრაფიები გაიხსენეს. ქალთა ისტორიის თვის აღნიშნვის ფარგლებში, საჯარო ლექციებს ახალგაზრდა მწერალი საქართველოს სხვადასხვა რეგიონში მართავს. მარტი, როგორც ქალთა ისტორიის თვე, მსოფლიოს სხვადასხვა ქვეყანაში ყოველწლიურად აღინიშნება. ორგანიზატორები ცდილობენ ხელი შეუწყონ ქალთა წვლილის აღიარებას და წარმოჩენას სხვადასხვა სფეროში.

აჭარა. 21 მარტს, ბათუმის დემოკრატიის სკოლაში ახალგაზრდა იურისტთა ასოციაციის და რადიო თავისუფლების წარმომადგენლებმა პროექტის შედეგების პრეზენტაცია წარმოადგინეს. აღნიშნული პროექტი ეხებოდა აჭარის მუნიციპალიტეტში არსებული სიტუაციის ანალიზს გენდერული თანასწორობის ჭრილში. მომხსენებლებმა ფოკუს ჯგუფების შედეგებზე ისაუბრეს, რომელიც ქალთა მიმართ ფსიქოლოგიურ ძალადობას უსვამდა ხაზს. სტერეოტიპებისა და საზოგადოების არაჯანსაღი აზრი, განსაკუთრებით მაღალმთიან აჭარაში მცხოვრებ ქალებს აჩვევს იმ გარემოს, რომელიც მათ მიმართ უპატივცემულობასა და ჩაგვრაში გამოიხატება. შეხვედრაზე განხილულ იქნა ანონიმური მაგალითები, რომლებიც ქალთა უფლებების დარღვევასა და უგულვებელყოფას ეხებოდა, საუბარი შეეხო ასევე, სახელმწიფო პოლიტიკის ცვლილებას, რომლის დაჩქარებას აუცილებელია. შეხვედრას სტუდენტები, მესამე სექტორისა და მედია ორგანიზაციების წარმომადგენლები ესწრებოდნენ.

აჭარა. 19 მარტს, NIMD-ის ბათუმის ოფისში დისკუსია გაიმართა - „ქალების პოლიტიკური მონაწილეობა და სავალდებულო გენდერული კვოტა". -ეს იყო მთავარი თემა, რომელზეც მომხსენებელმა იდა ბახტურიძემ და დისკუსიის მონაწილეებმა არაერთგვაროვანი პოზიცია დააფიქსირეს. იდა ბახტურიძე ქალთა საინიციატივო ჯგუფის წევრია, რომლის მოთხოვნაა, პროპორციული სიების 50 პროცენტს ქალები წარმოადგენდნენ. პოლიტიკაში ქალების მეტ ჩართულობას საქართველოს საერთაშორისო ორგანიზაციების რეკომენდაციებიც ავალდებულებს. ნიმდის სკოლის მოსწავლეებმა, საზოგადოებრივი ორგანიზაციების წარმომადგენლებმა და სტუდენტებმა სწორედ ადგილობრივ პოლიტიკაში ქალთა ჩართულობა და მასთან დაკავშირებული საკითხები განიხილეს. ქალთა საინიციატივო ჯგუფი გენდერული კვოტირების შემოღების მოთხოვნით კამპანიას აგრძელებს, რომელსაც ბათუმში გენდერულ საკითხებზე მომუშავე საზოგადოებრივი ორგანიზაციებიც უერთდებიან.

სამეგრელო. 18 მარტს, ასოციაცია „ათინათის" ახალგაზრდული ცენტრის წევრებისთვის ჩატარდა სიმულაციური თამაში „გენდერული თანასწორობა", გენდერის კვირეულის ფარგლებში. აქტივობა ორგანიზებული იქნა ტოლერანტობის, სამოქალაქო ცნობიერებისა და ინტეგრაციის მხარდაჭერის პროგრამის (PITA) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) ფინანსური მხარდაჭერით. სამეგრელოში პროგრამის პარტნიორია ასოციაცია „ათინათი". სრულად... წყარო: ორგანიზაციის ვებ-გვერდი სოციალურ ქსელში

კახეთი. 15 მარტს პანკისის ხეობის სოფელ დუისში, პანკისის სათემო რადიოს ოფისში, ადამიანის უფლებათა ცენტრის წარმომადგენლებმა შეხვედრა გამართეს ხეობაში მცხოვრებ ქალებთან და სამოქალაქო აქტივისტებთან. ადამიანის უფლებათა ცენტრის აღმასრულებელმა დირექტორმა ისაუბრა პროექტის -„ქალების, რელიგიური და ეთნიკური უმცირესობების უფლებების დაცვის ხელშეწყობა საქართველოს რეგიონებში" შესახებ. პროექტი მიზნად ისახავს, სტრატეგიული სამართალწარმოების გზით, მოწყვლადი ჯგუფების, ქალების, რელიგიური და ეთნიკური უმცირესობების წარმომადგენლებისათვის მართლმსაჯულების ხელმისაწვდომობის გაუმჯობესების ხელშეწყობას საქართველოს რეგიონებში, კერძოდ - ქვემო ქართლსა და კახეთში. სრულად... წყარო: ცენტრის ვებგვერდი სოციალურ ქსელში

თბილისი. 15 მარტს, ათასწლეულის გამოწვევის ფონდმა, სასტუმრო „რუმსში" გამართა რიგით მესამე შეხვედრა ციკლიდან - გენდერული თანასწორობა განათლებაში. „შეხვედრა მიეძღვნა ათასწლეულის გამოწვევის ფონდის მიერ უმაღლესი განათლების სექტორში მიმდინარე საქმიანობის ჭრილში გენდერული სტრატეგიის თემატიკას. მოეწყო სან დიეგოს სახელმწიფო უნივერსიტეტი - საქართველო 2020 პროექტში გენდერული ჩართულობის მიმართულებით განხორციელებული აქტივობების პრეზენტაცია და განხილვა. საქართველოს წარმომადგენლებმა, ასევე, ისაუბრეს თემაზე „როგორ შევუწყოთ ხელი გოგონების ჩართვას ტექნიკურ და საბუნებისმეტყველო პროგრამებში", ნათქვამია ორგანიზაციის ვებ-გვერდზე სოციალურ ქსელში. სრულად... წყარო: ორგანიზაციის ვებ-გვერდი სოციალურ ქსელში

თბილისი. გაეროს მოსახლეობის ფონდის საქართველოს ოფისის ორგანიზებით, დარო სულაკაურის ფოტოგამოფენა „დაკარგული სიყმაწვილე" გაიმართა. ღონისძიება ჩატარდა ქალთა საერთაშორისო დღის აღსანიშნავად, გაეროს ერთობლივი პროგრამის „გენდერული თანასწორობისთვის" ფარგლებში. ფოტოგამოფენის მიზანი იყო, ხაზი გაესვა ადრეული ქორწინების საკითხის აქტუალობას და ქორწინებაში მყოფი მოზარდების ფოტოების საშუალებით ნათლად წარმოეჩინა საქართველოში არსებული ის რეალობა, რომელიც ადრეულ ქორწინების პრაქტიკას უკავშირდება. წყარო: გაეროს მოსახლეობის ფონდი

თბილისი. ქალთა საინფორმაციო ცენტრმა ჩაატარა კვლევა, რომლის მიზანიც იყო ახალგაზრდების დამოკიდებულებებისა და განწყობების შესწავლა გენდერული თანასწორობის საკითხების შესახებ. „ამ მიზნის განსახორციელებლად, კვლევამ მოიცვა 2013 წლის ერთიანი ეროვნული გამოცდების ქართული ენისა და ლიტერატურის I და II ვარიანტების საგამოცდო ტესტებში გენდერული თანასწორობის თემაზე შეტანილი დავალებების პასუხები. სულ გაანალიზდა 1706 ნაწერი. თითქმის თანაბარი რაოდენობით იყო წარმოდგენილი ნაწერები 10 რეგიონიდან და თბილისიდან", ნათქვამია ორგანიზაციის ვებ-გვერდზე. ქალთა საინფორმაციო ცენტრის (WIC) და ამერიკის შეერთებული შტატების განვითარების სააგენტოს (USAID) მხარდაჭერით პროექტის „ქალები, როგორც აქტორები ცვლილებებისა და გაძლიერებისათვის” ფარგლებში მომზადდა ვიდეო რგოლი. სრულად... წყარო: www.ginsc.net

თბილისი. ომბუდსმენის ადამიანის უფლებათა აკადემიამ თბილისის და რეგიონული მედიასაშუალებების 20 დამწყებ ჟურნალისტს ტრენინგი ჩაუტარა თემაზე „გენდერული საკითხების გაშუქება და ჟურნალისტური ეთიკა". „ჟურნალისტებისთვის განკუთვნილი სატრენინგო პროგრამა დატვირთული იყო როგორც თეორიული, ისე პრაქტიკული სწავლების ელემენტებით. კურსი მიზნად ისახავდა მონაწილეთა ცნობიერების ამაღლებას ქალთა უფლებებისა და გენდერული თანასწორობის ძირითად საკითხებზე", ნათქვამია სახალხო დამცველის ვებ-გვერდზე. სრულად... წყარო: www.ombudsman.ge

შიდა ქართლი. საზოგადოება „ბილიკისა" და ქალთა საინფორმაციო ცენტრის ორგანიზებით, 3 მარტს, გორის უნივერსიტეტში გაიმართა კონფერენცია. პროექტში „გაძლიერებული ქალები მშვიდობისა და განვითარებისთვის" – ჩართულა სტუდენტებმა წარადგინეს ქალთა უფლებების თემატიკაზე შექმნილი ნამუშევრები. სრულად... წყარო: ქალთა საინფორმაციო ცენტრი

ქვემო ქართლი. 29 თებერვალს, არასამთავრობო ორგანიზაციამ „სამოქალაქო განვითარების სააგენტომ" (CIDA) რუსთავში, დემოკრატიული ჩართულობის ცენტრში წარადგინა პროექტი - „იურიდიული დახმარებისა და სტრატეგიული სამართალწარმოების სერვისები ქვემო ქართლში". პროექტი ეხება ოჯახში ძალადობისა და დისკრიმინაციის ან/და არათანაბარი მოპყრობით გამოწვეული უფლებების აღდგენის გზით მართლმსაჯულების ხელმისაწვდომობას, აგრეთვე მსხვერპლთა და დაზარალებულთა სამართლებრივ დახმარებასა და მოსახლეობის ცნობიერების ამაღლებას. არასამთავრობო ორგანიზაცია CIDA-მ პროექტის განხორციელება დაიწყო საქართველოს იურიდიული ფირმების ასოციაციასთან (სიფა) პარტნიორობით. პროექტის განმახორციელებელი ორგანიზაციები ქვემო ქართლში მცხოვრებ ქალებსა და ეთნიკური უმცირესობების წარმომადგენლებს შესთავაზებენ იურიდიული დახმარებისა და სტრატეგიული სამართალწარმოების სერვისებს. ბენეფიციარებს აღნიშნული მომსახურების მიღება რუსთავსა და დმანისში შეეძლებათ. „იურიდიული დახმარებისა და სტრატეგიული სამართალწარმოების სერვისები ქვემო ქართლში" მხარდაჭერილია აღმოსავლეთ-დასავლეთის მართვის ინსტიტუტის (EWMI) მიერ. დაფინანსება უზრუნველყო აშშ-ის საერთაშორისო განვითარების სააგენტომ (USAID). სრულად... წყარო: ორგანიზაციის ვებგვერდი სოციალურ ქსელში

თბილისი. აშშ–ის საელჩო 1 მარტს აწყობს ფოტოგამოფენას „16 დღე". მასზე წარმოდგენილი იქნება 16 ქალის პორტრეტი, რომლებსაც საელჩოს მხარდაჭერით, ნოემბრის გენდერული თანასწორობის კამპანიის ფარგლებში გადაუღეს. გამოფენას რამდენიმე მათგანი დაესწრება და სტუმრებს თავიანთი საქმიანობის შესახებ მოუთხრობს, რომელსაც გენდერული ძალადობის პრევენციისა და უთანასწორობის წინააღმდეგ ახორციელებს. გახსნა: 1 მარტი, 19:00 საათი თბილისის ისტორიის მუზეუმი - ქარვასლა. სიონის 8. სრულად... წყარო: აშშ–ის საელჩოს ვებგვერდი სოციალურ ქსელში

კახეთი. არასამთავრობო ორგანიზაცია „სამოქალაქო აქტივობების ცენტრის" ხელშეწყობით პანკისის ხეობაში ქალთა სათემო ორგანიზაცია დაფუძნდა. სათემო ორგანიზაციის ხელმძღვანელად გამგეობის წევრებმა, 4 წლის ვადით, ლეილა აჭიშვილი აირჩიეს. „პანკისის ხეობის ქალთა სათემო ორგანიზაციის მიზნებია ქალთა განათლება, გაძლიერება და ჩართულობა სოციალურ, პოლიტიკურ, კულტურულ და ეკონომიკურ ცხოვრებაში, პანკისის ხეობაში მცხოვრებ ქალთა ინიციატივების მხარდაჭერა, რელიგიური და ეროვნული უმცირესობების უფლებათა დაცვა, დემოკრატიული ღირებულებებისა და ფასეულობების დამკვიდრება, ქალთა საკითხებით დაინტერესებულ ორგანიზაციებთან თანამშრომლობა", ნათქვამია ორგანიზაციის ვებ-გვერდზე. სრულად... წყარო: activities.ge

აჭარა. 25 თებერვალს, ნიდერლანდების ინსტიტუტმა მრავალპრატიული დემოკრატიისათვის (NIMD) აღმოსავლეთ ევროპის სამეზობლოს ოფისის და კანადის ადგილობრივი ინიციატივების ფონდის ორგანიზებით/მხარდაჭერით, ბათუმის დემოკრატიის სკოლაში ლექცია და დისკუსია გაიმართა - „ადვოკატირება თანაბარი უფლებებისათვის/თანასწორობისათვის”. პროექტი, რომლის ფარგლებშიც აღიშნული დისკუსია გაიმართა სპეციალურად აჭარის რეგიონისთვის მომზადდა და რეგიონში რელიგიური უმცირესობების ინტეგრაციისა და გენდერული თანასწორობის პრინციპების საზოგადოებრივი ცხოვრების სხვადასხვა სფეროში ასახვის ხელშეწყობას ისახავს მიზნად. ამჯერად, აჭარის რეგიონში (განსაკუთრებით, მაღალმთიან რეგიონში) ერთი მხრივ, რელიგიური უმცირესობების ინტეგრაციის პრობლემებისა და მეორე მხრივ, ქალთა პოლიტიკური მონაწილეობის კუთხით არსებული გამოწვევების უკეთ გააზრებისა და ინფორმირებული მსჯელობის გამართვის მიზნით, NIMD-ის მიერ ლექციების ციკლი ჩატარდა. ამ ციკლის ფარგლებში უკვე შედგა შვიდი შეხვედრა, რიგით მერვე შეხვედრას კი ანა აბაშიძე გაუძღვა, რომელმაც ისაუბრა იმაზე, თუ როგორ შეუძლიათ ქალებს მოახდინონ სააკუთარი უფლებების ადვოკატირება და იბრძოლონ თანასწორობისთვის. ლექციის დასრულების შემდეგ, მსმენელებმა დისკუსიის ფორმატში აჭარის რეგიონში ლექციის თემასთან დაკავშირებით არსებულ რეალობის შესახებ იმსჯელეს.

სამცხე-ჯავახეთი. ქალთა საინფორმაციო ცენტრი, ბორჯომში ტრენინგებს მართავს იმ პირებისთვის, რომლებიც ადგილობრივი თვითმმართველობის დონეზე გენდერული თანასწორობის უზრუნველყოფაზე არიან პასუხისმგებელნი. „ტრენინგები რამდენიმე ეტაპად იმართება, რათა სხვადასხვა მუნიციპალიტეტის წარმომადგენლებმა მოწვეული ექსპერტებისგან ინფორმაცია მიიღონ ინსტიტუციური მექანიზმის მნიშვნელობასა და სტრუქტურაზე, ფუნქციებსა და მოვალეობებზე, გენდერული თანასწორობის არსზე, გენდერულ მიდგომებზე, სტერეოტიპებზე, გენდერისა და სქესის განსხვავებაზე", ნათქვამია ორგანიზაციის ვებ-გვერდზე. სრულად... წყარო: ორგანიზაციის ვებ-გვერდი სოციალურ ქსელში