აჭარა. 5 აპრილს, ბათუმის დემოკრატიული ჩართულობის ცენტრში, „ინვალიდ-მეომართა და დაღუპულ მებრძოლთა მეუღლეთა კავშირმა" დისკუსია გამართა, თემაზე: „გენდერული თანასწორობა პოლიტიკურ პროცესებში".  დისკუსიის მიზანი იყო მოსახლეობის ცნობიერების ამაღლება გენდერული თანასწორობის საკითხებში, გენდერული თანასწორობის ქსელის მიზნების, საქმიანობისა და აქტივობების შესახებ. შეხვედრას ესწრებოდნენ აჭარის რაიონებიდან მოწვეული წარმომადგენლები. დისკუსიაში ასევე მონაწილეობდნენ აჭარში მცხოვრები აქტივისტი/ლიდერი ქალები, გენდერულ თემაზე მომუშავე არასამთავრობო და საერთაშორისო ორგანიზაციების, ხელისუფლების, პოლიტიკური პარტიების, სხვადასხვა სოციალური ჯგუფების წარმომადგენელი ქალბატონები.

თბილისი. ჰაინრიჰ ბიოლის ფონდში, 28 მარტს გაიმართა დისკუსია  თემაზე: „გენდერული დღის წესრიგი ქალთა და მამაკაცთა თანასწორი მონაწილეობისთვის". ფონდმა გამოაქვეყნა დისკუსიის შესახებ ვრცელი მასალა, რომელშიც მონაწილეობდნენ: პარლამენტის გენდერული თანასწორობის საბჭოს წევრი გუგული მაღრაძე, იურისტი თამარ გურჩიანი, ექსპერტი გენდერის საკითხებში თამარ ბაგრატია და გაეროს ქალთა ორგანიზაციის მრჩეველი გენდერის საკითხებში თამარ საბედაშვილი. დისკუსია – „გენდერული დღის წესრიგი ქალთა და მამაკაცთა თანასწორი მონაწილეობისთვის" წყარო: www.ge.boell.org

თბილისი.„იდენტობამ" და ტრანსგენდერი ადამიანების მხარდამჭერმა ორგანიზაცია „ტრანს საქართველომ" 31 მარტი – ტრანსგენდერი ადამიანების ხილვადობის საერთაშორისო დღე რუსთაველის გამზირზე მსვლელობით აღნიშნეს. მსვლელობის მონაწილეებმა გამვლელებს  საინფორმაციო ბუკლეტები და ტკბილეული დაურიგეს, რუსთაველის ძეგლთან კი ტრანსგენდერი ადამიანების დროშის ფერებში აწყობილი ბუშტები გაუშვეს. წყარო:ორგანიზაციის გვერდი სოციალურ ქსელში

კახეთი. თელავის სახელმწიფო უნივერსიტეტში არასამთავრო ორგანიზაცია საარჩევნო სისტემების საერთაშორისო ფონდმა გამართა საჯარო ლექცია: "ქალის როლი პოლიტიკაში”.ლექციაზე ყურადღება გამახვილდა გენდერული თანასწორობის საკითხებზე. საარჩევნო სისტემების საერთაშორისო ფონდის ექსპერტმა გენდერულ საკითხებში ირინა ჟვანიამ ისაუბრა ქალების როლზე საჯარო პოლტიკაში გადაწყვეტილების მიღებაზე, ქალებისა და მამაკაცების უფლებების თანაბარი რეალიზების შესაძლებლობებზე. შეხვედრას ესწრებოდნენ სტუდენტები, პროფესორ-მასწავლებლები და ადმინისტრაციის წარმომადგენლები.ირინა ჟვანია:"გენდერული თანასწორობის კონცეფცია არ გულისხმობს რომელიმე სქესის უფლებების გაძლიერებას. ქალსა და მამაკაცს შორის სქესობრივი განსხვავების მიუხედავად, ქალსა და მამაკაცს უნდა ჰქონდეს თანაბარი უფლებები. რაც შეეხება. საჯარო პოლიტიკაში გადაწყვეტილების მიღებას. ქალმა და მამაკაცმა თანაბრად უნდა მიიღონ მონაწილეობა გადაწყვეტილების მირების პროცესში”.საარჩევნო სისტემების საერთაშორისო ფონდმა საჯარო ლექცია გამართა პროექტის "ნდობის გაზრდა საარჩევნო პროცესებისადმი” ფარგლებში.   ეთო შოშიაშვილი, თელავის სახელმწიფო უნივერსიტეტის ჟურნალისტიკის ფაკულტეტის მეორე კურსის სტუდენტი:,,საინტერესო თემაა ქალი და პოლიტიკა, სიამოვნებით მოვისმინე საჯარო ლექცია. მართალია, ქალთა ჩართულობის მაჩვენებელი პოლიტიკაში დაბალია, თუმცა წინა წლებთან შედარებით გაზრდილი".

ქალთა სტატუსის კომისიამ გაეროს შენობაში  შეხვედრა გამართა, რომელსაც 180 ქვეყნის წარმომადგენლებთან ერთად  საქართველოს  საკანონმდებლო და აღმასრულებელი ორგანოების და არასამთავრობო ოგანიზაციების წარმომადგენლები ესწრებოდნენ. შეხვედრაზე განიხილეს ქალთა და გოგონათა მიმართ ძალადობის აღმოფხვრა და პრევენცია, ადრეული ქორწინებები, პარტნიორის მიერ ძალადობა, ქალთა პოლიტიკური მონაწილეობა და ეკონომიკური გაძლიერება. გაეროს ქალთა სტატუსის კომისიამ შეხვედრის საბოლოო დასკვნა 15 მარტს მიიღო. დოკუმენტის ძირითადი არსი, ქალთა მიმართ ძალადობის აღმოფხვრა და მათი პოლიტიკური თუ ეკონომიკური მონაწილეობების გაუმჯობესებაა. წყარო: ginsc.net

თბილისი. 25 მარტს ნიდერლანდების ინსტიტუტის მრავალპარტიული დემოკრატიისათვის სამხრეთ კავკასიის წარმომადგენლობის (NIMD) ორგანიზებით გამართულ შეხვედრაზე მედიაში გენდერული თანასწორობის საკითხების გაშუქება განიხილეს. შეხვედრას პოლიტიკური პარტიების და არასამთავრობო ორგანიზაციების წარმომადგენლები ესწრებოდნენ. „მაუწყებელი ვალდებულია ხელი შეუწყოს სტერეოტიპების აღმოფხვრას საზოგადოებაში. კვლევები ცხადყოფს, რომ ქართული მედია არა თუ ანგრევს სტერეოტიპებს, არამედ ამყარებს და მეტიც, ახალ-ახალ სტერეოტიპებს აყალიბებს გენდერთან დაკავშირებით", - აღნიშნა „ქალთა საინფორმაციო ცენტრის" ხელმძღვანელმა ელენე რუსეცკაიამ. შეხვედრის მონაწილეებს 2011-2012 წლებში ჩატარებული მედიამონიტორინგის შედეგები განიხილეს, რომლის თანახმადაც  ხშირად არიან ქალი რესპონდენტები სოციალურ თემატიკასთან დაკავშირებით ჩაწერილები, როცა მასალა გაჭირვებას ან ოჯახურ პრობლემებს ეხება. საექსპერტო დონეზე ქალები თითქმის არ ჩანან. შეხვედრის მონაწილეებმა სიტუაციის გაუმჯობესების გზებზეც ისაუბრეს,  ელენე რუსეცკაიას აზრით, აუცილებელია საკანონმდებლო აქტების შესწავლა და ცვლილებების ინიცირება პარლამენტში, აგრეთვე საჭიროა საერთაშორისო ორგანიზაციების მხრიდან ადგილობრივი არასამთავრობო ორგანზაციების ხელშეწყობა გენდერულად მგრძნობიარე მედია პროდუქტების რეალიზებსითვის. წყარო:media.ge

სამეგრელო. ქალთა პოლიტიკაში მონაწილეობასა და ამ პროცესის თანმდევ პრობლემატიკაზე 22 მარტს, ზუგდიდში შეხვედრა გაიმართა. ნიდერლანდების მრავალპარტიული დემოკრატიის ინსტიტუტის წარმომადგენლის, ირაკლი ქობალიას თქმით, პოლიტიკურ პარტიებში გენდერული თანასწორობა მნიშვნელოვანი ინდიკატორია დემოკრატიის თანამედროვე გაგების, ამ მიზეზით კი სუბიექტებმა ინდივიდუალურად უნდა უზრუნველყონ შიდაპარტიული დემოკრატიის დამკვიდრება. ექსპერტმა თამარ ბაგრატიამ 2012 წლის პარლამენტის არჩევნებსა და პოლიტიკური სუბიექტების მიერ მაჟორიტარულ და პროპორციულ სიებში გენდერული თანასწორობის მხრივ არსებულ ვითარებაზე ისაუბრა. მისი თქმით, მიუხედავად იმისა,რომ 2008 წელთან შედარებით საარჩევნო სიაში ქალები ორჯერ მეტი რაოდენობით იყვნენ წარმოდგენილი, ეს გარემოება არ იძლევა მნიშვნელოვან პროგრესზე საუბრის საფუძველს. ქალთა პოლიტიკაში მონაწილეობის პრობლემატიკაზე შეხვედრა ნიდერლანდების მრავალპარტიული დემოკრატიის ინსტიტუტის და კანადის ლოკალური ინიციატივების ფონდის ერთობლივი პროექტის ფარგლებში, ასოციაცია „იმედის" თანაორგანიზატორობით გაიმართა. დისკუსიას პოლიტიკური პარტიების,  ადგილობრივი ხელისუფლების, არასამთავრობო სექტორის და მედიის წარმომადგენლები დაესწრნენ.

აჭარა.  22 მარტს, ბათუმის დემოკრატიული ჩართულობის ცენტრში, ჰაინრიხ ბიოლის ფონდის ორგანიზებით დისკუსია გაიმართა თემაზე: „ქალი, ოჯახი, საზოგადოება და ფემინისტური თვალთახედვა". მომხსენებლთა შორის იყვნენ როგორც ადგილობრივი, ასევე თბილისში მომუშავე ორგანიზაციების წარმომკადგენლები. ერთ-ერთი მომხსენებლის ინიციატივით აჩვენეს დოკუმნტური ფილმი, რომელიც ქალის უფლებების შელახვას ეხებოდა. შეხვედრაზე დამსწრე საზოგადოებამ თავიანთი აზრი დისკუსიის თემაზე და ნაჩვენები ფილიმის შესახებ დააფიქსირა.

მცხეთა–მთიანეთი. კონსტიტუციის 42-ე მუხლი პროექტის – „ქალთა გაძლიერება სოციალური განვითარებისათვის" – ფარგლებში 22 და 23 მარტს, თიანეთში ორდღიანი სემინარი ჩატარდა. პროქტის მიზნობრივ ჯგუფში მოხვდნენ საქართველოს რეგიონებში მცხოვრები საზოგადოებრივ ცხოვრებაში აქტიურად ჩართული ქალებატონები, რომელთაც შეუძლიათ საკუთარ რაიონში ქალთა უფლებების რეალიზაციის პროცესში გარკვეული წვლილის შეტანა. სემინარი მიეძღვნა სოფლად მცხოვრები ქალების ძირითადი უფლებებისა და თავისუფლებების შესახებ ცოდნის ამაღლებას, აგრეთვე სამოქალაქო საზოგადოების როლის გაძლიერებასა და დემოკრატიული პროცესების სტიმულირებას. პროექტის მონაწილეები გაეცნენ იმ უფლებებსა და მექანიზმებს, რომლებიც მათ ენიჭებათ ეროვნული კანონმდებლობითა და საერთაშორისო კონვენციებით და ქალთა წინააღმდეგ ძალადობის შემცირებას უწყობს ხელს. ორგანიზაციის იურისტებმა იურიდიული კონსულტაციები გაუწიეს, როგორც სემინარების მონაწილეებს, ასევე რაიონის მოსახლების დაინტერესებულ მოსახლეობას. პროექტი ხორციელდება გერმანიის საერთაშორისო თანამშრომლობის საზოგადოების (GIZ) მხარდაჭერით და მოიცავს საქართველოს 31 რაიონსა თუ სოფელში ანალოგიური შეხვედრების ორგანიზებას და ჩატარებას. წყარო:ორგანიზაციის გვერდი სოციალურ ქსელში

თბილისი.ქალთა არასამთავრობო ორგანიზაციები და ლიდერი ქალები მხარდაჭერას უცხადებენ საქართველოს პარლამენტში ახალ ინიციატივას საქართველოს ორგანულ კანონში „საქართველოს საარჩევნო კოდექსი" ცვლილებების შეტანის შესახებ. როგორც სამხრეთ კავკასიის გენდერული ქსელის ვებგვერდის თანახმად „კანონპროექტის მიღების მიზანია საქართველოს პარლამენტსა და თვითმმართველობის წარმომადგენლობით ორგანოში, პროპორციული სიით არჩეულ ქალთა რაოდენობის შენარჩუნება". ქალთა არასამთავრობო ორგანიზაციები მოუწოდებენ საქართველოს პარლამენტის წევრებსა და სამოქალაქო საზოგადოების წარმომადგენლებს მხარი დაუჭირნ აღნიშნულ ინიციატივას და ხელი მოაწერონ პეტიციას. სრულად წყარო ginsc.net

კახეთი. თელავის დემოკრატიული ჩართულობის ცენტრში არასამთავრობო ორგანიზაცია ,,NIMD''-ის მიერ დისკუსია გაიმართა, რომელიც პოლიტიკაში  ქალების მონაწილეობის გაზრდას მიეძღვნა. ორგანიზაციის წარმომადგენლების თქმით, აღნიშნული შეხვედრა პირველად არ ტარდება და მასში მონაწილეობას არაერთი ქალბატონი ღებულობს. „ეს პროექტი უკვე ორი წელი მოქმედებს საქართველოში. მსგავსი შეხვედრები იმართება საქართველოს სხვადასხვა რეგიონებში. თბილისში ჩვენთან თანამშრომლობენ „ცეესკო" და პარლამენტი. სწორედ ასეთი შეხვედრებით ვცდილობთ ამ პროექტის განხორციელებას და პოლიტიკაში ქალების აქტიურ ჩარევას”, აცხადებს ნიკა შარვაშიძე, ,,NIMD''–ის თელავის ოფისის ხელმძღვანელი. დისკუსიაზე დამსწრე საზოგადოების თქმით, მსგავსი სახის შეხვედრების ჩატარება მნიშვნელოვანია.

იმერეთი. ბიოლის ფონდის რიგით მეორე დებატი დისკუსიის ფონზე წარიმართა. შეხვედრის მონაწილეებმა ქართულ რეალობაში ქალის როლზე ისაუბრეს. აგრეთვე აქცენტი გაკეთდა ქალის ჩაგვრის, საზოგადოებაში მისი მეორე პლანზე გადაწევის ტენდეციებზე. გამოიკვეთა აზრი, რომ მსგავსი რეალობის შეცვლის ერთ- ერთი საშუალება ქალის მიერ ეკონომიური დამოუკიდებლობის მოპოვებაა. ქალის ფუნქციებთან, მის საზოგადოებრივ აქტიურობასთან, პოლიტიკაში ჩართულობასა და ზოგადად, თვითრეალიზაციასთან დაკავშირებით შეხვედრაზე განსხვავებული მოსაზრებები ისმოდა.  შეხვედრას დემოკრატიული ჩართულობის ცენტრი მასპინძლობდა, სადაც ჟურნალისტები, არასამთავრობო ორგანიზაციები და სხვა საზოგადოებრივად აქტიური პირები შეიკრიბნენ.

თბილისი. ფემინისტების დამოუკიდებელმა ჯგუფმა დოკუმენტური ფილმი „უთქმელი ისტორიები" გამოაქვეყნა, რომელიც ქართული ფემნიზმის ისტორიაზე მოგვითხრობს. ფილმში თანამედროვე ფემინისტები საუბრობენ სამ საზოგადო მოღვაწეზე, რომლებიც გამოირჩევიან საკუთარი მსოფლმხედველობითა და ქალთა უფლებების დაცვის კუთხით განხორციელებული აქტივიზმით, ესენი არიან: ბარბარე ჯორჯაძე, ეკატერინე გაბაშვილი და კატო მიქელაძე. ფილმის რეჟისორია სალომე საღარაძე. სცენარის ავტორი: თამთა მელაშვილი. ფილმი შეიქმნა ქალთა ფონდის ფინანსური მხარდაჭერით. წყარო:ორგანიზაციის გვერდი სოციალურ ქსელში უთქმელი ისტორიები

თბილისი. გაეროს ქალთა ორგანიზაციის ინიციატივით არასამთავრობო სექტორისა და ადამიანის უფლებებისა და გენდერის საკითხებში პრემიერ-მინისტრის თანაშემწე თამარ ჩუგოშვილის შეხვედრა შედგა. შეხვედრაზე ისაუბრეს თუ  როგორ მოხდება ყურადღების დათმობა გენდერული საკითხებისადმი, რა დამატებითი რჩევები და მუშაობა იქნება საჭირო იმისათვის, რათა არ მოხდეს თემის გადაფარვა, როგორ იმუშავებს პრემიერის თანაშემწე და რა პრიორიტეტები არსებობს. თამარ ჩუგოშვილმა შეხვედრაზე არასამთავრობოებს აპარატის სტრუქტურა და პრიორიტეტები გააცნო. წყარო:ginsc.net

თბილისი. საარჩევნო სისტემების საერთაშორისო ფონდის, ეუთოს დემოკრატიული ინსტიტუტებისა და ადამიანის უფლებათა ოფისის, აგრეთვე ნიდერლანდების მრავალპარტიული დემოკრატიული ინსტიტუტის ერთობლივი ღონისძიებით ორდღიანი კონფერენცია გაიმართა. პარტიების დაფინანსებისა და პოლიტიკაში ქალთა ჩართულობის საკითხებიკონფერენციის მთავარი თემები იყო. თამარ ბაგრატიამ,რომელიც გენდერულ საკითხებზე მუშაობს, საზოგადოებას კვლევა წარუდგინა ბოლო ცხრა წლის მანძილზე პოლიტიკაში ქალთა ჩართულობის მაჩვენებლების შესახებ. შეხვედრას, ადგილობრივ არასამთავრობო ორგანიზაციებსა და პოლიტიკური პარტიების წარმომადგენლებთან ერთად, შეერთებული შტატებისა და ნიდერლანდების ელჩებიც ესწრებოდნენ. წყარო: www.ginsc.net

‎შიდა ქართლი. 12 მარტს, საზოგადოება „ბილიკმა", სამოქალაქო განათლებისა და პედაგოგთა გადამზადების პროგრამის ფარგლებში (USAID / PH International) ღონისძიება გამართა სახელწოდებით „ქალი – აქტიური მოქალაქე". ღონისძიებაზე განიხილეს ქალთა უფლებრივი მდგომარეობა ისტორიულ და თანამედროვე კონტექსტში, ბილიკის მიერ ჩატარებული ესეების კონკურსის გამარჯვებულებმა წაიკითხეს თავიანთი ნაშრომები. ღონისძიებას ადგილობრივი ხელისუფლების და არასამთავრობო სექტორის წარმომადგებლები, საჯარო სკოლების პედაგოგები და სხვა აქტიური მოქალაქეები ესწრებოდნენ, რომლებმაც მოზარდებს საკუთარი გამოცდილება გაუზიარეს. გაიმართა დისკუსია გენდერულ საკითხებთან დაკავშირებით. წყარო:ორგანიზაციის გვერდი სოციალურ ქსელში

თბილისი. ფემინისტების დამოუკიდებელმა ჯგუფმა 8 მარტს პუშკინის სკვერიდან ფილარმონიამდე მშვიდობიანი აქცია–მსვლელობა მოაწყო. აქციის ლოზუნგი იყო „შემოგვიერთდი, თუ იბრძვი რეალური თანასწორობისათვის". აქციის 100–მდე მონაწილე ქალთა შრომით უფლებებსა და მათ საზოგადოებაში ემანსიპაციას უჭერდა მხარს. წყარო: ginsc.net

გურია. 7 მარტს ორგანიზაციის „ქალები რეგიონის განვითარებისთვის" ორგანიზებით ოზურგეთის დემოკრატიული ჩართულობის ცენტრში გაიმართა დისკუსია - ქალთა უფლებების თემაზე. დისკუსიაში მონაწილეობას სხვადასხვა სფეროში მომუშავე ქალები, ჟურნალისტები, პედაგოგები, ხელოვანები იღებდნენ. საუბარი იყო ქალთა მიმართ დამოკიდებულებაზე წინა საუკუნეებში. გაიმართა ფილმის ჩვენებაც, რომელიც  რომელიც გაეროს ქალთა ორგანიზაციის დაკვეთით ქალთა ფონდმა ტასომ მოამზადა. გაიმართა ფილმის განხილვა და დისკუსია.  წყარო:ორგანიზაციის გვერდი სოციალურ ქსელში

აჭარა. 7 მარტს, ბათუმის დემოკრატული ჩართულობის ცენტრში, ფონდ „სოხუმის" ორგანიზებით მოეწყო აქცია - მრგვალი მაგიდა, რომელიც ქალთა სოლიდარობის საერთაშორისო დღეს, 8 მარტს,  მიეძღვნა. ღონისძიების ფარგლებში საქართველოს 9 ქალაქსა და რაიონში ფონდის აქტივისტებმა, ბენეფიციარებმა, პარტნიორებმა და სხვადასხვა საზოგადოებრივი ჯგუფების წარმომადგენლებმა ისაუბრეს ქალთა მიღწევებზე პოლიტიკურ, ეკონომიკურ, სოციალურ სფერობეში.ასევე, მათი მხრიდა,  საერთაშორისო მასშტაბით წარმატებული ქალების  მაგალითებზე აქცენტის გაკეთება  მიზნად ისახავდა საქართველოში ქალთა უფლებების დასაცავად სტრატეგიის შემუშავებას, რათა საზოგადოებრივ-პოლიტიკურ პროცესებში ქალთა ჩათულობის დონე ამაღლდეს.

თბილისი. „ქალთა ინიციატივების მხარდამჭერი ჯგუფის” (WISG) ორგანიზებით 3 მარტს დედის დღესთან დაკავშირებით აქცია–მსვლელობა „ქართლის დედების მარში" მოეწყო. აქცია-პერფორმანსის მონაწილეებმა  მათი უფლებების შელახვა გააპროტესტეს და ქართლის დედის როლი მოირგეს, სახეშეღებილებს ცალ ხელში ხმალი, მეორეში კი ღვინის ფიალა  ეჭირათ.  წყარო:ორგანიზაციის გვერდი სოციალურ ქსელში

კახეთი. გაეროს ქალთა ორგანიზაციამ პროგრამის ,,გენდერული თანასწორობის ხელშეწყობისათვის საქართველოში" ფარგლებში ქალთა საერთაშორისო დღესთან დაკავშირებით თელავის მედია კაფეში შეხვედრა გამართა. ღონისძიების ფარგლებში მწერალმა, დათო ტურაშვილმა ქალთა მიმართ ძალადობის წინააღმდეგ შექმნილი პიესა „დოდოს მოლოდინში" წაიკითხა. პიესის წაკითხვის შემდეგ დებატები გაიმართა, რომელშიც მონაწილეობა ექსპერტებმა გენდერის საკითხებში თათა ცოფურაშვილმა, ლელა გაფრინდაშვილმა და თამარ საბედაშვილმა მიიღეს. დათო ტურაშვილი, მწერალი: ,,წავიკითხე ჩემი პიესა, რომელიც დაიწერა სპეციალურად ქალთა მიმართ ძალადობის წინააღმდეგ. ყველაზე საინტერესო ნაწილი იყო დისკუსია, სადაც ბევრი საინტერესო ფაქტი გახდება ხოლმე ცნობილი".

თბილისი. საარჩევნო სისტემების საერთაშორისო ფონდმა (IFES) არასამთავრობო ორგანიზაცია „ინვალიდ და დაღუპულ მეომართა ცოლების კავშირთან” (ქალთა კავშირთან) და გენდერული თანასწორობის ქსელთან თანამშრომლობით,  1 მარტს, თბილისის სამხატვრო აკადემიაში,  გამართა პროექტის „გენდერული თანასწორობა პოლიტიკურ პროცესებში" პრეზენტაცია. პროექტი მიზნად ისახავს ქალთა პოლიტიკურად გაძლიერების მექანიზმების განმტკიცებას მომავალი არჩევნებისათვის; გენდერული თანასწორობის ქსელის გაძლიერებას; საზოგადოების ცნობიერების ამაღლებას გენდერული თანასწორობისა და ქალის პოლიტიკურად გაძლიერების მექანიზმებზე.ღონისძიებასთან ერთად გაიმართა გამოფენა „გენდერული ჰარმონია", რომელზეც  სამხატვრო აკადემიის მხატვარი ქალების გენდერულ თემატიკაზე შესრულებული ნამუშევრები იყო წარმოდგენილი.  პროექტს განახორციელებს გენდერული თანასწორობის ქსელი, რომელიც წარმოადგენს გენდერულ საკითხებზე მომუშავე 15 არასამთავრობო ორგანიზაციისაგან შემდგარ გაერთიანებას. წყარო:npo.ge