სამეგრელო. გენდერული თანასწორობის ქსელი აგრძელებს საჯარო დისკუსიებს დასავლეთ საქართველოში. 27 ნოემბერს ორგანიზაციამ  საჯარო დისკუსია - „გენდერული თანასწორობა პოლიტიკურ პროცესებში" - ზუგდიდში გამართა. შეხვედრის მიზანი იყო საზოგადოების ინფორმირება ქალთა პოლიტიკური უფლებების შესახებ გადაწყვეტილების მიღების დონეზე და ადგილობრივი თვითმართველობის არჩევნებისათვის აქტიურ ლიდერ ქალთა გამოვლენა. ღონისძიებაში მონაწილეობდა რეგიონის სამოქალაქო სექტორში, საჯარო სამსახურებში დასაქმებული და პოლიტიკურ პარტიებში გაწევრიანებული ქალები. ღონისძიება გაიმართა პროექტის „გენდერული თანასწორობა პოლიტიკურ პროცესებში" ფარგლებში, რომელიც ხორციელდება „გენდერული თანასწორობის ქსელის" მიერ, „საარჩევნო სისტემების საერთაშორისო ფონდის" (IFES) და „ამერიკის შერთებული შტატების საერთაშორისო განვითარების სააგენტოს" (USAID) მხარდაჭერით. წყარო:ორგანიზაციის გვერდი სოციალურ ქსელში

კახეთი. დემოკრატიული ჩართულობის ცენტრები და სახალხო დამცველის აპარატი  გენდერული ძალადობის წინააღმდეგ მიმართულ 16 დღიან საერთაშორისო კამპანიას შეუერთდნენ. აღნიშნულ  საკითხზე ტრენინგი 28 ნოემბერს,   თელავის დემოკრატიული ჩართულობის ცენტრში გაიმართა.  მასში მონაწილეობას დემოკრატიული ჩართულობის ცენტრებთან არსებული ქალთა კლუბები, გენდერული საკითხებით დაინტერესებული სტუდენტები, მასწავლებლები, ექიმები, ჟურნალისტები და სამოქალაქო საზოგადოების სხვა წევრები იღებდნენ. ტრენინგების მიზანია სამოქალაქო საზოგადოების წარმომადგენელთა ცნობიერების ამაღლება გენდერული თანასწორობის საკითხებზე  და რეგიონული ინიციატივების გაძლიერება გენდერული ძალადობის წინააღმდეგ ბრძოლისთვის.

აჭარა. ბათუმის ახალგაზრდული ცენტრი უერთდება ქალთა მიმართ ძალადობის აღმოფხვრის კამპანიას და 20-დან 30 ნოემბრის ჩათვლით მართავს ძალადობის წინააღმდეგ ბრძოლის კვირეულს. ღონისძიების ფარგლებში გაიმართა დისკუსია ბავშვთა ძალადობის თემაზე და შეხვედრა მოწვეულ სტუმართან და განიხილეს საკითხები: მოძალადისა და მსხვერპლის ცნება, არის თუ არა მოძალადე ფსიქიკურად არაჯანსაღი პიროვნება, როგორია ადამიანის ფსიქიკა, შესაძლებელია თუ არა ქალი იყოს მოძალადე. შეხვედრის დროს ასევე გაიმართა გეშტალტ-თერაპია, რომელიც მიმართულია პიროვნული განვითარებისა და ზრდის პროცესზე. კვირეულის დასრულებამდე გაიმართება შიდა და გასვლითი თანატოლგანმანათლებელთა ტრენინგები თემაზე: გენდერული თანასწორობა და ოჯახური ძალადობა. წყარო:ორგანიზაციის გვერდი სოციალურ ქსელში

იმერეთი. 26 ნოემბერს გენდერული თანასწორობის ქსელმა ქუთაისში საჯარო დისკუსია გამართა თემაზე: „გენდერული თანასწორობა პოლიტიკურ პროცესებში". შეხვედრის მიზანი იყო საზოგადოების ინფორმირება ქალთა პოლიტიკური უფლებების შესახებ გადაწყვეტილების მიღების დონეზე და ადგილობრივი თვითმართველობის არჩევნებისათვის აქტიურ ლიდერ ქალთა გამოვლენა. ღონისძიებაში მონაწილეობდა რეგიონის სამოქალაქო სექტორში, საჯარო სამსახურებში დასაქმებული და პოლიტიკურ პარტიებში გაწევრიანებული ქალები. ღონისძიება იმართება პროექტის „გენდერული თანასწორობა პოლიტიკურ პროცესებში" ფარგლებში, რომელიც ხორციელდება გენდერული თანასწორობის ქსელის მიერ, „საარჩევნო სისტემების საერთაშორისო ფონდიმ" (IFES) და ამერიკის შერთებული შტატების საერთაშორისო განვითარების სააგენტოს(USAID) მხარდაჭერით. წყარო:ორგანიზაციის გვერდი სოციალურ ქსელში

კახეთი. ძალადობის წინააღმდეგ მიმართული ორკვირიანი კამპანიის ფარგლებში, თელავის დემოკრატიული ჩართულობის ცენტრში გაიმართა დისკუსია თემაზე: ,,ქალთა გაძლიერება საკუთარი უფლებების დასაცავად''. დისკუსიას უძღვებოდნენ თელავის ,,ქალთა კლუბის" წევრები და ისაუბრეს ქალთა პოლიტიკურ უფლებებზე, მათი ჩართულობის მნიშვნელობაზე სხვადასხვა საზოგადოებრივ საქმიანობაში. ასევე, ნაჩვენები იყო მადლენ ოლბრაიტის მოხსენების ჩანაწერი ქართული სუბტიტრებით.

შიდა ქართლი. გორის ინვალიდთა კლუბთან არსებული გორის ახალგაზრდული ცენტრი გენდერული ძალადობის წინააღმდეგ ბრძოლის კამპანიაში ჩაერთო. კამპანიის ფარგლებში ახალგაზრდულმა ცენტრმა ქალთა საკონსულტაციო ცენტრ „სახლთან" ერთად განახორციელა აქტივობა, მოეწყო ფილმ – „ძალადობა დანაშაულიას" – ჩვენება და განხილვა. გაიმართა დისკუსია, რომელიც ფსიქოლოგმა და გენდერზე მომუშავე სპეციალისტებმა წაიყვანეს. 16 დღიანი კამპანიის მიზანია ქალთა მიმართ ძალადობის საკითხებზე საზოგადოებრივი ცნობიერების ამაღლებასა და ქალთა უფლებების ირგვლივ სამოქალაქო კონსოლიდაციის გაძლიერებას. აქტივობა დაიგეგმა „ეროვნული ინტეგრაციის გაძლიერება საქრთველოში" პროექტის ფარგლებში, რომელსაც ახორციელებს საქართველოს გაეროს ასოციაციის მიერ, აშშ-ს საერთაშორისო განვითარების სააგენტოს (USAID) მხარდაჭერით. გორში პროექტის პარტნიორი ორგანიზაციაა „გორის ინვალიდთა კლუბი". წყარო:ორგანიზაციის გვერდი სოციალურ ქსელში

სამცხე–ჯავახეთი. ახალქალაქის ახალგაზრდული სამოქალაქო ცენტრის წევრებმა ქალების მიმართ ძალადობის აღმოფხვრის საერთაშორისო დღე აღნიშნეს. ღონისძიება ჩატარდა პროექტ – „ეროვნული ინტეგრაციის გაძლიერება საქართველოში" – ფარგლებში, რომელიც ხორციელდება საქართველოს გაეროს ასოციაციის მიერ, აშშ-ს საერთაშორისო განვითარების სააგენტოს ფინანსური მხარდაჭერით. წყარო:ორგანიზაციის გვერდი სოციალურ ქსელში

იმერეთი. 25 ნოემბერს, ქუთაისის ახალგაზრდული ცენტრი შეურთდა საერთაშორისო კამპანიას ქალთა მიმართ ძალადობის წინააღმდეგ. კამპანიის ფარგლებში ცენტრმა რამდენიმე აქტივობა განახორციელა. ახალგაზრდებმა მოამზადეს საინფორმაციო პოსტერები და მოაწყვეს ქალაქის ცენტრალურ უბანში მსვლელობა. გაიმართა ასევე სადისკუსიო კლუბის შეხვედრა თემაზე: „ქალთა მიმართ ძალადობა და გენდერული სტერეოტიპები". დისკუსიაზე მონაწილეებს საშუალება მიეღოთ პასუხები მათთვის საინტერესო საკითხების შესახებ. დისკუსიის მსვლელობისას ასევე ნაჩვენები იქნება დოკუმენტური ფილმი „ქალები საქართველოდან". ახალგაზრდული ცენტრის წევრებმა ორგანიზება გაუკეთეს თანატოლთა განათლების ტრენინგს: „ოჯახური ძალადობა და გენდერული სტერეოტიპები". ტრენინგის მიზანს წარმოადგენდა ოჯახური ძალადობის და გენდერის საკითხების შესახებ ცოდნისა და უნარ–ჩვევების განვითარება მოსწავლეებისათვის. წყარო:ორგანიზაციის გვერდი სოციალურ ქსელში

გურია. 25 ნოემბერს „ახალგაზრდა პედაგოგთა კავშირის" ბაზაზე არსებული ახალგაზდული ცენტრის წევრებმა ქალების მიმართ ძალადობის აღმოფხვრის საერთაშორისო დღის აღსანიშნავად ჩაატრეს თანატოლ განმანათლებელთა ტრენინგი გენდერული თანასწორობის შესახებ და ქალთა მიმართ ძალადობის წინააღმდეგ მოაწყვეს ფლეშ-მობი. მისი მიზანი იყო გაემახვილებინათ საზოგადოების ყურადღება ქალთა მიმართ ძალადობის ფაქტებზე. მისი შინაარსი ასახავდა საზოგადოების დამოკიდებულებას ძალადობასთან დაკავშირებით.

კახეთი. თელავის დემოკრატიული ჩართულობის ცენტრში გაიმართა სოფლის პრობლემების კვლევების შედეგების პრეზენტაცია, „ქალთა გაძლიერება ცვლილებებისთვის". „სათემო კავშირის" წარმომადგენლებმა, როგორც სოფლის, ასევე თელავის მუნიციპალიტეტის გამგეობისა და საკრებულოს წევრებს სოფლებში დღეისთვის არსებული პრობლემები გააცნეს. როგორც არასამთავრობო ორგანიზაცია, „საქართველოს სტრატეგიული კვლევებისა და განვითარების ცენტრის" წარმომადგენელი, კახა ჯამბურია აცხადებს, აღნიშნულ საკითხზე პროექტი „საქართველოს სტრატეგიული კვლევებისა და განვითარების ცენტრისა" და „გაეროს განვითარების ფონდის" მხარდაჭერით ხორციელდება, რომლის მიზანია ქალთა ეკონომიკური და სამოქალაქო გააქტიურების ხელშეწყობა კახეთის რეგიონში.

თბილისი. გაეროს განვითარების პროგრამამ ახალი კვლევა გამოაქვეყნა: „საზოგადოებრივი დამოკიდებულებები გენდერულ თანასწორობაზე პოლიტიკასა და ბიზნესში". კვლევის ძირითადი მიზანი იყო ქართული საზოგადოების დამოკიდებულების შესწავლო გენდერული თანასწორობის შესახებ, განსაკუთრებული აქცენტი გაკეთდა ქალების ბიზნესში და პოლიტიკაში მონაწილეობაზე. კვლევა მოიცავს რაოდენობრივ და თვისებრივ კვლევით კომპონენტებს. რაოდენობრივი კვლევის ფარგლებში ჩატარდა 1760 პირისპირ ინტერვიუ მთელი საქართველოს მასშტაბით. თვისებრივი კვლევის ფარგლებში ჩატარდა 16 ფოკუს–ჯგუფი ქალაქისა და სოფლის მაცხოვრებელ ქალებთან – 8 ჯგუფი ჩატარდა სამეგრელოში, დანარჩენი კი კახეთში. კვლევა ჩაატარა კომპანია „ეისითიმ" გაეროს განვითარების პროგრამის დაკვეთით. კვლევა: „საზოგადოებრივი დამოკიდებულებები გენდერულ თანასწორობაზე პოლიტიკასა და ბიზნესში" წყარო: www.ge.undp.org

თბილისი. სახალხო დამცველმა ქალთა მიმართ ძალადობის აღმოფხვრის საერთაშორისო დღეს განცხადება გაავრცელა. „25 ნოემბერს მსოფლიო აღნიშნავს ქალთა მიმართ ძალადობის აღმოფხვრის საერთაშორისო დღეს. ამავე დღეს იწყება 16 დღიანი საერთაშორისო კამპანია გენდერული ძალადობის წინააღმდეგ, რომელიც მიზნად ისახავს გენდერული ძალადობის ყველა ფორმის წინააღმდეგ ბრძოლას საზოგადოებრივი ცნობიერების ამაღლების გზით და გენდერული ძალადობის მსხვერპლთა მიმართ ქალთა სოლიდარობის დემონსტრირებას მთელი მსოფლიოს მასშტაბით. სახალხო დამცველი უერთდება გენდერული ძალადობის აღმოფხვრისაკენ მიმართულ კამპანიას, რადგან სწორედ ერთობლივი ძალებითა და სექტორთა შორის თანამშრომლობით გახდება შესაძლებელი საქართველოში გენდერული ძალადობის წინააღმდეგ ბრძოლა, მსხვერპლთა დაცვა და დახმარება", ნათქვამია განცხადებაში. განცხადება წყარო: ombudsman.ge

სამეგრელო. 24 ნოემბერს ასოციაცია „ათინათის" ახალგაზრდული ცენტრ „ორტუსის" ორგანიზებით ზუგდიდში ჩატარდა ველორბოლა, რომელშიც მონაწილეობა მხოლოდ მდედრობითი სქესის წარმომადგენლებმა მიიღეს. ეს ღონისძიება მიეძღვნა ძალადობის აღმოფხვრის კვირეულს, რომელიც 20–დან 25 ნოემბრის ჩათვლით გაიმართა ზუგდიდის ახალგაზრდულ ცენტრში, პროექტის „ეროვნული ინტეგრაციის გაძლიერება საქართველოში" – ფარგლებში, რომელსაც ახორციელებს საქართველოს გაეროს ასოციაცია, ამერიკის შეერთებეული შტატების საერთაშორისო განვითარების სააგენტოს ფინანსური მხარდაჭერით. ღონისძიებაში 9 კონკურსანტი მონაწილეობდა. ღონისძიება ეძღვნებოდა ქალთა ძალადობის წინააღმდეგ ბრძოლის კვირეულს. ველორბოლის მიზანი იყო ქალების მიმართ ძალადობის დაგმობა, გოგოების გააქტიურება და ჯანსაღი ცხოვრების წესის პოპულარიზაცია. წყარო: ორგანიზაციის გვერდი სოციალურ ქსელში

იმერეთი. ფონდ „სოხუმის" ინიციატივით, ქუთაისში, გენდერული საკონსულტაციო საბჭოების პრეზენტაცია გაიმართა. როგორც გაეროს ქალთა ორგანიზაციის პროგრამის სპეციალისტმა, თამარ საბედაშვილმა განაცხადა, საკონსულტაციო საბჭოების შექმნის მიზანია, მოქალაქეების  მეტი ჩართულობა ქალაქში მიმდინარე  გენდერული თანასწორობისა და ქალთა უფლებების კუთხით საკითხების გადაწყვეტაში. ღონისძიებაზე ასევე ფონდ „სოხუმსა" და ქუთაისის საკრებულოს შორის  ურთიერთანამშრომლობის მემორანდუმი გაფორმდა. ქუთაისის საკრებულოს წევრის თქმით მემორანდუმის ფარგლებში, ფონდი „სოხუმი" საკრებულოს იმ ინიციატივებსა და შეხედულებებს მიაწვდის, რომელიც აუცილებელია ქალაქისა და ქვეყნის განვითარებისთვის. გაეროს ქალთა ორგანიზაციის პროგრამის სპეციალისტის შეფასებით, მემორანდუმი  საშუალებას იძლევა მოქალაქეები უფრო მეტად ჩაერთონ ისეთი საკითხების გადაწყვეტაში, როგორიცაა საბავშვო ბაღების საკითხები, მათი მდგომარეობა, რაოდენობა, ქალთა მიმართ ძალადობის პრეცენდენტები,  ქალთა გააქტიურება საზოგადოებრივ სფეროში და სხვა.

სამეგრელო. ასოციაცია ათინათის ახალგაზრდული ცენტრი „ორტუსი" გენდერის კვირეულს აღნიშნავს. კვირეულის ფარგლებში, 21 ნოემბერს ახალგაზრდებმა ქალაქის ცენტრში დაარიგეს ცენტრის წევრების მიერ დამზადებული საინფორმაციო ბროშურები. ბროშურაზე დატანილი იყო ინფორმაცია ბავშვთა დაცვის და ქალების მიმართ ძალადობის აღმოფხვრის კონვენციებზე.ღონისძიება ჩატარდა პროექტ „ეროვნული ინტეგრაციის გაძლიერება საქართველოში" ფარგლებში, რომელსაც ახორციელებს საქართველოს გაეროს ასოციაცია,ამერიკის შეერთებული შტატების საერთაშორისო განვითარების სააგენტოს ფინანსური მხარდაჭერით. წყარო:ორგანიზაციის გვერდი სოციალურ ქსელში

სამცხე–ჯავახეთი. 21 ნოემბერს არასამთავრობო ორგანიზაცია ,,სამცხე–ჯავახეთის დემოკრატ ქალთა საზოგადოების" ოფისში ჩატარდა დისკუსია თემაზე: „ოჯახური ძალადობა – მითი თუ რეალობა". დისკუსიას ესწრებოდა 25 სხვადასხვა პროფესიის ქალბატონი, სტუდენტები და სკოლის მოსწავლეები. როგორც შეხვედრის ინიციატორმა ნანა იოსელიანმა გვაცნობა, შეხვედრის მიზანი იყო ქალბატონების ინფორმირებულობა: სტატისტიკური მონაცემების, კვლევის შედეგების და საქართველოს კანონის „ოჯახში ძალადობის შესახებ" გაცნობა.

შიდა ქართლი. 19 ნოემბერს, გენდერული თანასწორობის ქსელმა გორში საჯარო დისკუსია – „გენდერული თანასწორობა პოლიტიკურ პროცესებში" – გამართა. შეხვედრის მიზანს წარმოადგენდა საზოგადოების ინფორმირება ქალთა პოლიტიკური უფლებების შესახებ გადაწყვეტილების მიღების დონეზე და ადგილობრივი თვითმართველობის არჩევნებისათვის აქტიურ ლიდერ ქალთა გამოვლენა. ღონისძიება გაიმართა პროექტის – „გენდერული თანასწორობა პოლიტიკურ პროცესებში" – ფარგლებში, რომელიც ხორციელდება „გენდერული თანასწორობის ქსელის" მიერ, „საარჩევნო სისტემების საერთაშორისო ფონდი"-ს (IFES) და „ამერიკის შერთებული შტატების საერთაშორისო განვითარების სააგენტოს" (USAID) მხარდაჭერით. წყარო:ორგანიზაციის გვერდი სოციალურ ქსელში

ქვემო ქართლი.18 ნოემბერს, თეთრიწყაროს მუნიციპალიტეტში პროექტის – „ქალები თანასწორობის, მშვიდობისა და განვითარებისათვის" – ფარგლებში, „ერთი ფანჯრის პრინციპის" საკონსულტაციო შეხვედრა გაიმართა. შეხვედრას ესწრებოდნენ ადგილობრივი მუნიციპალიტეტისა და სოციალური მომსახურების სააგენტოს წარმომადგენლები, ასევე, რეგიონული განვითარებისა და ინფრასტრუქტურის სამინისტროს, განათლებისა და მეცნიერების სამინისტროს წარმომადგენლები და ბენეფიციარები, რომლებიც თავად წარადგენდნენ პრობლემურ საკითხებს. შეხვედრაზე განიხილეს მოსახლეობისათვის ყველაზე მწვავე 6 შემთხვევა. პროექტი – „ქალები თანასწორობის, მშვიდობისა და განვითარებისათვის" – ხორციელდება გაეროს ქალთა ორგანიზაციის მიერ ქალთა საინფორმაციო ცენტრთან და ფონდ ,,ტასოსთან'' თანამშრომლობით, ნორვეგიის მთავრობის მხარდაჭერით. წყარო:ginsc.net  

შიდა ქართლი. 19 ნოემბერს, გენდერული თანასწორობის ქსელის ორგანიზებით გამართა დისკუსია – „გენდერული თანასწორობა პოლიტიკურ პროცესებში". შეხვედრის მიზანი იყო საზოგადოების ინფორმირება ქალთა პოლიტიკური უფლებების შესახებ გადაწყვეტილების მიღების დონეზე და ადგილობრივი თვითმართველობის არჩევნებისათვის აქტიურ ლიდერ ქალთა გამოვლენა. შეხვედრაში მონაწილეობა მიიღეს გენდერული თანასწორობის ქსელის შიდა ქართლის რეგიონის კოორდინატორმა და რაიონული თანაკოორდინატორებმა, 2014 წლის ადგილობრივი თვითმართველობის არჩევნებისათვის, პოლიტიკურ პროცესებში მონაწილეობის მსურველი ლიდერმა ქალებმა, გენდერულ თემატიკაზე მომუშავე ადგილობრივი არასამთავრობო და საერთაშორისო ორგანიზაციების, ხელისუფლების, პოლიტიკური პარტიების, სხვადასხვა სოციალური ჯგუფების (ჯანდაცვა, მასწავლებლები), რეგიონში მცხოვრები ეთნიკური უმცირესობების, მასმედიის წარმომადგენლებმა. წყარო:ორგანიზაციის გვერდი სოციალურ ქსელში

კახეთი. თელავში, მედია კაფეში, ჟურნალისტთა ქსელმა  „გენდერული თანასწორობისათვის" გამართა საჯარო დისკუსია „გენდერული საუბრები". დისკუსიის მთავარ თემას „გენდერული თანასწორობა და ქალის პოლიტიკაში მონაწილეობა" წარმოადგენდა. შეხვედრას არასამთავრობო ორგანიზაციებისა და სამთავრობო სექტორის წამომადგენლების გარდა ესწრებოდნენ ადგილობრივი მოსახლეობა, ჟურნალისტები და სტუდენტები. ღონისძიება გაიმართა პროექტის „ჟურნალისტები გენდერული თანასწორობისათვის" ფარგლებში, რომელსაც ახორციელებს „ჟურნალისტთა ქსელი გენდერული თანასწორობისათვის" ამერიკის შეერთებული შტატების განვითარების სააგენტოს (USAID) და საარჩევნო სისტემების საერთაშორისო ფონდის (IFES) მხარდაჭერით.

კახეთი. ფონდ „ახალ სიცოცხლეში" შეხვედრა გაიმართა თემაზე თუ რა მნიშვნელობა აქვს ჯანმრთელობას ქალისთვის. შეხვედრას კახეთის მასშტაბით, სხვადასხვა პროფესიის ქალები და ქალთა არასამთავრობო ორგანიზაციების წარმომადგენლები ესწრებოდნენ. პროექტის მიზანია ქალების ინფორმირებულობის გაზრდა ქალთა ჯანმრთელობის მნიშვნელობის შესახებ. ღონისძიების ორგანიზატორის, ნატო როსტომაშვილის თქმით, აღნიშნულ ღონისძიებას სხვადასხვა ქალაქებიდან და მუნიციპალიტეტებიდან მოწვეული ქალები ესწრებოდნენ: ,,ფონდი „ახალი სიცოცხლის" ორგანიზებით მოვიწვიეთ სხვადასხვა ქალაქიდან სხვადასხვა პროფესიის მქონე ქალები, ქალთა ორგანიზაციებისა და ასოციაციების წარმომადგენლები. შეხვედრა ძალიან მნიშვნელოვანი იყო და ვისურვებდი, ხშირად ჩატარდეს. ’’ ღონისძიება „მშვიდობის კორპუსის" მოხალისე ამერიკელებისა და ფონდი „ახალი სიცოცხლის" ორგანიზებით ჩატარდა.

კახეთი. 6 ნოემბერს, თელავის დემოკრატიული ჩართულობის ცენტრში, მუნიციპალური მომსახურების უზრუნველყოფის ასოციაციის ორგანიზებით ჩატარდა ლიდერთა სკოლის ტრენინგი თემაზე  ,,თვითგამოხატვა და იმიჯი" . აღნიშნული ტრენინგი საქართველოს მასშტაბით ყველა რეგიონის საკრებულოს წევრ ქალბატონებს გაეროს მხარდაჭერით უტარდებათ.   ლიდერთა სკოლის ტრენინგების მიზანია ხელი შეუწყობს ქალბატონებს ლიდერული უნარ-ჩვევების გაუმჯობესებასა და გააქტიურებაში.  ნინო ჭანტურაია, ტრენერი: ,,მუნიციპალური მომსახურების უზრუნველყოფის ასოციაცია, საქართველოს მასშტაბით, საკრებულოს წევრ ყველა ქალბატონს, ატარებს ლიდერთა სკოლის ტრენინგებს გაეროს მხარდაჭერით. შეხვედრების მიზანია, ქალაბტონებს გამოუმუშავდეთ ლიდერული უნარ-ჩვევები".