კახეთი. მარტის თვიდან ორგანიზაცია ,,ლელი"  იწყებს გრანტგამცემ საქმიანობას. ორგანიზაციის აღნიშნული საქმიანობის სამიზნე ჯგუფებს წარმოადგენენ ქალები, მათ უნდა შეძლონ სხვადასხვა საკითხებსა და აქტუალურ პრობლემებზე საგრანტო განაცხადების შექმნა.  პირველი საგრანტო კონკურსი აპრილის თვეში გამოაცხადდება. ორგანიზაცია „ლელი" გრანტგამცემი საქმიანობის ფარგლებში ფინანსურ მხარდაჭერას აღმოუჩენს ქალთა ისეთ საინიციატივო ჯგუფებს, რომლებიც წარმოადგენენ მცირე ინფრასტრუქტურულ და ინოვაციურ იდეებზე მომზადებულ საგრანტო განაცხადებს. სრულად წყარო: leliblog.weebly.com

სამეგრელო. ზუგდიდში მოქმედი არასამთავრობო ორგანიზაცია „გაენათმა" 2 მარტს, სასტუმრო „ანაკლიაში" კონფერენცია გამართა. ორგანიზაციის ხელმძღვანელის ეკატერინე მაჭავარიანის განცხადებით, კონფერენციია მიზანია საზოგადოებას ჰქონდეს ინფორმაცია ორგანიზაციის მიერ 2013 წელს განხორციელებულ პროექტებზე.  მისივე თქმით, „გაენათის" მიმდინარე წლის  პრიორიტეტული მიმართულებაა ქალის როლის გაძლიერება გადაწყვეტილების მიღების პროცესში. ორგანიზაციიაში მომუშავე უცხოელმა მოხალისემ სოფია სტაივმა განაცხადა, რომ ძალიან მნიშვნელოვანია საზოგადოების დამოკიდებულება გენდერული თანასწორობის მიმართ.

კახეთი. გაეროს ქალთა ორგანიზაცია (UN WOMAN) გაეროს ერთობლივი პროგრამის „გენდერული თანასწორობის ხელშეწყობისათვის საქართველოში" ფარგლებში კვირეული დაიწყო. ქალთა საერთაშორისო დღესთან დაკავშირებით კვირეულის ფარგლებში, 3 მარტს, ვაჟა-ფშაველას სახელობის დრამატულ თეატრში მარჯანიშვილის თეატრის მსახიობები ადგილობრივი მაყურებლებისთვის ქალთა მიმართ ძალადობის წინააღმდეგ შემნილი პიესა ,,სიზმარი" გააცოცხლეს.  თელავის კულტურის სამსახურის ხელძღვანელის, ფიქრია ყუშიტაშვილის თქმით ,,სიზმარი" ერთ-ერთია იმ 9 საუკეთესო პიესათაგან, რომელიც ქართველმა დრამატურგებმა ოჯახში ძალადობის თემატიკაზე შექმნეს. გუშინვე თელავის თეატრში მოეწყო გამოფენა ,,ქალთა საკითხი საქართველოში XIX-XX საუკუნეების მიჯნაზე". ექსპოზიცია წარმოაჩენს XIX-XX საუკუნეების მიჯნაზე საქართველოს საზოგადო მოღვაწე ქალებს, მათ ისტორიებს, ნარკვევებს, წერილებსა და პუბლიკაციებს. გამოფენაზე წარმოდგენილი იყო იმ ეპოქის ცნობილი საზოგადო მოღვაწე მამაკაცები, რომლებიც ხელს უწყობდნენ ქალთა ემანსიპაციას საქართველოში.

იმერეთი. ქალთა საინფორმოციო ცენტრისა და  ასოციაცია „დეას" ორგანიზებით, პარლამეტის გენდერული თანასწორობის საბჭოს წევრებსა და ზუგდიდის, ფოთის ქალთა განვითარების კომიტეტის წარმომადგენლებს შორის შეხვედრა  გაიმართა. შეხვედრის ერთ-ერთი მთავარი თემა იყო ქალთა პოლიტიკური აქტივობის გაზრდის და გადაწყვეტილების მიმღებ დონეზე ქალების მეტად ჩართულობის საკითხები. ლიდერი ქალები გაეცვნენ გენდერული თანასწორობის საბჭოს მუშაობას, მოისმინეს საბჭოს სამოქმედო სრტატეგია და წამოაყენეს მათთვის აქტუალური საკითხები გენდერული თანასწორობისა და ქალთა უფლებების სფეროში.  აღნიშნული შეხვედრა გაიმართა პროექტის, „პოლიტიკური თანამონაწილეობის გაზრდა და ქალებისა და ახალგაზრდების გაძლიერება საქართველოსა და სომხეთში", ფარგლებში, რომელიც დაფინანსებულია ბრიტანეთის საელჩოს მიერ და მას ახორციელებს OXFAM GB, და ასოციაცია „დეა". წყარო:ორგანიზაციის გვერდი სოციალურ ქსელში

თბილისი. ორგანიზაციამ „ქალთა ფონდი საქართველოში" პროექტი –"Women's Rights – Art in Action” განახორციელა,რომლის მიზანია ქალთა საკითხებისადმი საზოგადოების ცნობიერების ამაღლება და მგრძნობელობის გაზრდა.  პროექტის ფარგლებში ორგანიზაციამ 14, 16 და 17 თებერვალს  ქუჩის პერფორმანსები ჩაატარა: მილიარდი ამბოხებული (One Billion Rising),  გაწყვიტე ჯაჭვი (Break The Chain) და ქართველი ქალი არტისტების ნამუშვრების გამოფენა „პირადი კანონი" („Auto Nomos"), თემაზე ქალთა სექსუალური უფლებები და გამოცდილებები. პროექტი ესტონეთის საელჩოს მხარდაჭერით განხორციელდა. სრულად წყარო: ორგანიზაციის გვერდი სოციალურ ქსელში

კახეთი. გაეროს ერთობლივი პროგრამის – „გენდერული თანასწორობის ხელშეწყობისთვის საქართველოში"–  ფარგლებში თელავის დემოკრატიული ჩართულობის ცენტრში, კახეთში მოქმედ არასამთავრობო ორგანიზაციებთან საინფორმაციო შეხვედრა გაიმართა. შეხვედრის ძირითადი მიზანი იყო ერთობლივი პროგრამის ფარგლებში გათვალისწინებული პრიორიტეტებისა და მიმართულებების წარდგენა კახეთის არასამთავრობო ორგანიზაციებისთვის. სოსო მოქელაძე, ,,ბიზნესცენტრი კახეთის" დირექტორი: „აღნიშნული შეხვედრა, ჩემი აზრით, ხელს შეუწყობს გაეროს ერთობლივი პროგრამისა და კახეთის არასამთავრობო ორგანიზაციების პარტნიორობასა და სამომავლო ერთობლივი პროექტების განხორციელებას". შეხვედრა დასრულდა დისკუსიით თემაზე: კახეთის რეგიონში გენდერული თანასწორობისვის ხელსაყრელი გარემოს შექმნა – გამოწვევები და პრიორიტეტები. 

თბილისი. ქეა საერთაშორისო კავკასიის პარტნიორმა ორგანიზაციამ - იძულებით გადაადგილებულ ქალთა ასოციაცია „თანხმობამ" კამპანია დაიწყო, რომელიც ქალთა საკუთრების უფლებებზე ყურადღების მიპყრობას ისახავს მიზნად. კამპანია ევროკავშირის დაფინანსებული პროექტის „ქალთა გაძლიერება სამხრეთ კავკასიაში მშვიდობის მშენებლობისთვის" ფარგლებში ხორციელდება. კამპანიის ფარგლებში ქეა და პარტნიორებმა მოამზადეს მასალების პაკეტი ორგანიზაციებისა და აქტივისტებისთვის, რათა უზრუნველყოს ქალთა საკუთრების უფლებების მნიშვნელობის წარმოჩენა, ასევე მოსახლეობის ინფორმირება, თუ სად შეიძლება აღნიშნულ საკითხზე იურიდიული დახმარების მიღება. პაკეტში ასევე შედის 10 წუთიანი ფილმი სადაც იურისტები, არასამთავრობო ორგანიზაციების აქტივისტები და ქალები საუბრობენ, რამდენად დაუცველები არიან ქალები საკუთრების გარეშე. წყარო: ქეას გვერდი სოციალურ ქსელში

კახეთი. „სათემო განვითარების ცენტრმა” პოლონურ არასამთავრობო ორგანიზაცია B4-თან პარტნიორობით კახეთში პროექტის, „ბიზნესი სტარტისთვის" განახორციელა. პროექტის ფარგლებში კონკურსის შედეგად შერჩეულ ნახევარფინალისტ 60 ქალბატონს ჩაუტარდა ტრენინგები. პროექტი მიზნად ისახავდა ხელი შეეწყო ქალებისთვის მცირე მეწარმეობის დაწყებასა და  თვითდასაქმებაში. პროექტის ბოლო ეტაპზე მომზადდა ბიზნეს პროექტები. საუკეთესო ბიზნეს პროექტის მქონე 20 ქალბატონმა მიიღო მცირე გრანტი 3000 ლარის ოდენობით საკუთარი ბიზნესის დაწყებისთვის. ტატო ხუნდაძე, პროექტის კოორდინატორი: ,,რადგან გრანტის მიმღები ბენეფიციართა უმეტესობა დიასახლისია და ძირითადად ოჯახური საქმიანობით არის დაკავებული, მათ საკმაოდ გაუჭირდათ მუშაობა ტრენინგებისა და კონსულტაციების პერიოდში. მიუხედავად ამისა, შეიძლება ითქვას, რომ პროექტმა „ბიზნესი სტარტისთვის", ათეულობით ქალბატონს დააძლევინა უიმედობისა და უსუსორობის განცდა, განპირობებული მრავალწლიანი „ოჯახური იზოლაციით".

სამეგრელო. საარჩევნო სისტემების საერთაშორისო ფონდმა (IFES) გენდერული თანასწორობის და ქალის პოლიტიკურ პროცესებში გააქტიურების საკითხებზე არასამთავრობო ორგანიზაციების, პოლიტიკური პარტიების, ადგილობრივი ხელისუფლების და მედიის წარმომადგენლების მონაწილეობით, 14 ოქტომბერს, ზუგდიდში შეხვედრა გამართა.  IFES-ის გენდერის და ინფორმირებულობის პროექტის მენეჯერმა, ლადო მკერვალიშვილმა განაცხადა, რომ გენდერული ვითარების ერთ-ერთი პრობლემა საქართველოში არის გარემოება, რომლის მიხედვით, ხშირად თავად ქალები არ არიან სოლიდარულები ერთმანეთის მიმართ. შეხვედრაზე მყოფმა ევროკავშირის წარმომადგენელმა შვედეთიდან აუდიტორიას განუცხადა, რომ მის ქვეყანაში ქალები საჯარო სამსახურებში მამაკაცების მსგავსად თანაბარი რაოდენობით მუშაობენ, თუმცა შედარებით დაბალ პოზიციებზე. „შვედეთი შესაძლოა მისაბაძი მაგალითი იყოს საქართველოსთვის, მაგრამ სრულყოფილებისგან შორს ვართ", – განმარტა ევროკავშირის წარმომადგენელმა.

აჭარა. 13 დეკებერს, ბათუმის დემოკრატიული ჩართულობის ცენტრში, გენდერული ძალადობის წინააღმდეგ მიძღვნილ საერთაშორისო კამპანიის ფარგლებში გაიმართა ფილმის ჩვენება და დისკუსია. კამპანია მთელი მსოფლიოს მასშტაბით მოიცავს გენდერული ძალადობის წინააღმდეგ მიმართულ სხვადასხვა სახის აქტივობებს. 1991 წლიდან დღემდე 130 ქვეყნის 1700-მდე ორგანიზაციამ მიიღო მონაწილეობა კამპანიაში და შეიტანა თავისი წვლილი პრობლემის მოგვარებაში. აღნიშნული ფილმი გადაღებულია  არასამთავრობო ორგანიზაცია „სახლის" მიერ. სადაც ნაჩვენებ იქნა ოჯახური ძალადობის ამსახველ კადრები. ფილმში დასმული პრობლემა მოგვიანებით მოწვეული სტუმრების და ექსპერტების დისკუსიის საგანი გახდა. ომბუსმენდისა და ახალგაზრდა იურისტთა ასოციაციის წარმომადგენლებმა საქართველოში ძალადობის სტატისტიკის შესახებ ისაუბრეს,  შეხვედრა ძალადობის მსხვერპლთათვის განკუთვნილი ცხელი ხაზის სარეკლამო რგოლების ჩვენებით დასრულდა.

სამეგრელო.ზუგდიდში მოქმედმა არასამთავრობო ორგანიზაცია „გაენათმა" 9 დეკემბერს,  კინოთეატრ „ატრიუმის" წინ ადამიანის უფლებების დაცვის დღისადმი მიძღვნილი აქცია მოაწყო. ორგანიზაციის ხელმძღვანელის ეკა მაჭავარიანის თქმით, „გაენათი" ყოველწლიურად უერთდება ქალთა და გოგონათა მიმართ ძალადობის წინააღმდეგ მიმართულ საერთაშორისო კამპანიას, და სხვადასხვა სახის ღონისძიებებს ატარებს. მისივე თქმით, „ორგანიზაციასთან არსებულმა ახალგაზრდულმა კლუბმა  საღამოს, სანთლებით დეკორაცია შექმნა და ქუჩაში კონცერტი ჩაატარა, ვფიქრობდით, რომ თეატრალიზებული სახის აქციის გამართვით  საზოგადოების ყურადღებას მივაპყრობდით ძალადობის წინააღმდეგ". – განაცხადა  ეკა მაჭავარიანმა.

სამეგრელო. ზუგდიდში მოქმედმა არასამთავრობო ორგანიზაციამ „მერკურიმ" 8 დეკემბერს,  დემოკრატიული ჩართულობის ცენტრში, ფილმის ჩვენება მოაწყო. ორგანიზაციის პროექტების მენეჯერის ოლგა კაკავას თქმით, ჩვენებისთვის გერმანელი რეჟისორის დევიდ განზელის ფილმი  ,,ტალღა” ორგანიზაციის მოხალისეებმა შეარჩიეს. ერთ–ერთი მოხალისე, 16 წლის ანი როდონაია ამბობს, რომ ფილმი, სადაც ნაცისტური სქემით  მოსწავლეები საკუთარ მაგალითზე რწმუნდებიან, თუ რაოდენ ადვილია ადამიანებით მანიპულირება, ბევრს დააფიქრებს ძალადობის შედეგებზე. „მერკურის" მოხალისეები ამბობენ, რომ ისინი ძალადობის თემაზე, უახლოეს დღეებში, ქალაქის ქუჩებში, თეატრალიზებულ აქციას  გამართავენ, რითაც უფრო მეტ ადამიანს დააფიქრებენ საზოგადოებისთვის აქტუალურ პრობლემაზე. არასამთავრობო ორგანიზაციის მიერ ღონისძიებები ქალთა და გოგონათა მიმართ მიმართული ძალადობის წინააღმდეგ მიმდინარე საერთაშორისო 16 დღიანი კამპანიის ფარგლებში მიმდინარეობს.

სამცხე–ჯავახეთი. 7 დეკემბერს,  ახალციხის დემოკრატიული ჩართულობის ცენტრში გაიმართა შეხვედრა გენდერული ძალადობის წინააღმდეგ მიმართული საერთაშორისო 16 დღიანი კამპანიის მხარდასაჭერად. შეხვედრას ძალადობის თემაზე მომუშავე ორგანიზაციები და ახალციხის მცხოვრებლები, ძირითადად ქალები ესწრებოდნენ. ექსპერტებმა ისაუბრეს ძალადობის სტატისტიკის შესახებ, ნაჩვენები იქნა არასამთავრობო ორგანიზაცია ,,სახლის" მიერ მიწოდებული ფილმი ოჯახური ძალადობის შესახებ და ძალადობის მსხვერპლთათვის განკუთვნილი ცხელი ხაზის სარეკლამო რგოლები. 16-დღიანი საერთაშორისო კამპანია გენდერული ძალადობის წინააღმდეგ 1991 წლიდან იღებს სათავეს. მისი დაარსების ინიციატორია „ქალთა გლობალური ლიდერობის ცენტრი". 25 ნოემბერი შერჩეულია, როგორც ქალთა მიმართ ძალადობის დაძლევის, ხოლო 10 დეკემბერი - როგორც ადამიანის უფლებათა დაცვის საერთაშორისო დღე. ამგვარად, ამ ორი თარიღის ერთობლიობა სიმბოლურად უსვამს ხაზს ურთიერთკავშირს გენდერულ ძალადობასა და ადამიანის უფლებების დარღვევას შორის. კამპანია მთელი მსოფლიოს მასშტაბით მოიცავს გენდერული ძალადობის წინააღმდეგ მიმართულ სხვადასხვა სახის აქტივობებს.

აჭარა. 25 ნოემბერს  ქალთა მიმართ ძალადობის აღმოფხვრის საერთაშორისო დღის აღსანიშნავად  ხანდაზმულ ქალთა ასოციაციაში სემინარი გაიმართა. სემინარის თემა იყო ,,გავერთიანდეთ ქალთა მიმართ ძალადობის წინააღმდეგ." სემინარზე მოწვეული იყვნენ  მუნიციპალიტეტის 12 თემის ამბულატორიის მედპერსონალი. სემინარი იურისტმა მარინე ჟღენტმა ჩაატარა, რომელმაც მონაწილეებს გააცნო ინფორმაცია  თუ რას გულისხმობს ოჯახში ძალადობა და როგორ იცავს სახელმწიფო ოჯახში ძალადობის მსხვერპლს. დარიგდა საინფორმაციო მასალა, რომელიც მუნიციპალიტეტის ყველა თემში გავრცელდება. სრულად წყარო: awa.org.ge

თბილისი. 28 ნოემბერს ქალთა საინფორმაციო ცენტრის ოფისში გაიმართა ტრენინგი „გაძლიერებული ქალები საჯარო ცხოვრებისათვის". ტრენინგი მიზნად ისახავს ლიდერი ქალების უნარ-ჩვევების გაძლიერებას კომუნიკაციებისა და საჯარო გამოსვლების მიმართულებით და მათი ინფორმირებულობის გაზრდას ქალთა მიმართ ძალადობის აღმოფხვრის ეროვნულ და საერთაშრისო მექანიზმების სფეროში.  ტრენინგში მონაწილეობენ ლიდერი ქალები საქართველოს სხვადასხვა რეგიონებიდან, ეთნიკური უმცირესობების წარმომადგენლები პანკისის ხეობიდან, ჟურნალისტები რეგიონებიდან და ახალგაზრდული სათემო ჯგუფების წარმომადგენლები. ტრენინგები იმართება პროექტის - „გაძლიერებული ქალები საჯარო ცხოვრებისათვის” ფარგლებში, რომელიც დაფინანსებულია საქართველოში აშშ-ს საელჩოს დემოკრატიის განვითარების მცირე საგრანტო პროგრამის მიერ და გენდერული ძალადობის წინააღმდეგ 16 დღიანი კამპანიის ფარგლებში.

შიდა ქართლი. 25 ნოემბერს, ქალთა ძალადობის აღკვეთის საერთაშორისო დღესთან დაკავშირებით „სამოქალაქო განათლებისა და პედაგოგთა გადამზადების პროგრამის" ფარგლებში ხაშურის მე-9 სკოლის სამოქალაქო კლუბში მოსწავლეებმა მოიწვიეს სტუმარი – შიდა ქართლის გენდერული თანასწორობის რესურს ცენტრის ხელმძღვანელი ნინო სუხიაშვილი. მან ისაუბრა ქალთა ძალადობასა და მისი აღკვეთის მიზნით განსაზღვრულ კანონმდებლობაზე, განიხილა ოჯახური ძალადობის სტატისტიკა და გაეროს დოკუმენტები.  ოჯახური ძალადობის მსხვერპლთა შესახებ საქართველოში ჩატარებული კვლევის შედეგად დადგენილია, რომ ოჯახური ძალადობის მსხვერპლნი, ხშირ შემთხვევაში, ქალები და ბავშვები არიან, ხოლო მოძალადეები – მამაკაცები. თუმცა, როგორც ქალბატონმა ნინომ განაცხადა, ოჯახური ძალადობის ობიექტი შეიძლება ხანდაზმული მშობელი ან მამაკაციც გახდეს. მისი თქმით, გარდა სხვადასხვა საერთაშორისო ორგანიზაციების, რომელიც ზრუნავს ქალთა უფლებების დაცვაზე, სახალხო დამცველიც უფლებამოსილია განიხილოს ეს საკითხები და დაიცვას ქალთა უფლებები. სტუმარმა სამოქალაქო კლუბს საჩუქარიც გადასცა - ქალთა უფლებათა დეკლარაცია.

თბილისი. საქართველოში ძალადობის წინააღმდეგ 16 დღიანი კამპანია დაიწყო. გაეროს მოსახლეობის ფონდის ორგანიზებით გენდერული ძალადობის წინააღმდეგ მიმართული კამპანია 25 ნოემბერს, ქალთა მიმართ ძალადობის წინააღმდეგ ბრძოლის საერთაშორისო დღეს დაიწყო და 10 დეკემბერს, ადამიანის უფლებათა დაცვის საერთაშორისო დღეს დასრულდება.  ამ პერიოდის განმავლობაში ფონდი არაერთ ღონისძიებას გამართავს, მათ შორისაა ქალთა უფლებებისადმი მიძღვნილი რადიო და ტელე გადაცემები, კინოჩვენებები და დისკუსიები გენდერული ძალადობის საკითხებზე.  გენდერული ძალადობის წინააღმდეგ 16 დღიანი კამპანია მიზნად ისახავს ქალთა მიმართ ძალადობის საკითხებზე საზოგადოებრივი ცნობიერების ამაღლებასა და ქალთა უფლებების ირგვლივ სამოქალაქო კონსოლიდაციის გაძლიერებას. კამპანია გაეროს ერთობლივი პროგრამის –"გენდერული თანასწორობის ხელშეწყობისათვის საქართველოში" – ფარგლებში ტარდება, რომელიც შვედეთის საერთაშორისო განვითარებისა და თანამშრომლობის სააგენტოს მხარდაჭერით გაეროს მოსახლეობის ფონდის, გაეროს ქალთა ფონდისა და გაეროს განვითარების პროგრამის მიერ ხორციელდება. სრულად წყარო: ginsc.net

თბილისი. „კონსტიტუციის 42-ე მუხლმა", თბილისის ივანე ჯავახიშვილის სახელობის უნივერსიტეტის II კორპუსთან, ქალთა მიმართ ძალადობის აღმოფხვრის საერთაშორისო დღე აღნიშნა. ორგნაზაციის წარმომადგენლებმა საზოგადოებისათის ცნობილ ადამიანებთან, თეატრალური კვარტეტის წევრებთან ერთად დაარიგეს თემატურ ბუკლეტები ქალთა უფლებების შესახებ. სრულად წყარო: ორგანიზაციის გვერდი სოციალურ ქსელში

შიდა ქართლი. ,,ომისა და მშვიდობის გაშუქების ინსტიტუტმა" (IWPR) „გაეროს ქალთა ორგანიზაციასთან" (UN Women) ერთად დაიწყო პროექტი, რომლის მიზანია დევნილთა კომპაქტურ დასახლებებში ქალთა პრობლემების უკეთ გაშუქების ხელშეწყობა და მათი უფლებების ადვოკატირება.  გორში ახალგაზრდა იურისტთა ასოციაციის ოფისში ახალგაზრდა დევნილი ქალებს სწორედ ეს პროექტი წარუდგინეს. ადგილობრივმა არასამთავრობო ორგანიზაციებმა  ჟურნალისტებს კომპაქტურ დასახლებებში არსებული პრობლემები გააცნეს, რომლებსაც დევნილი ქალები აწყდებიან. ჩატარებული კვლევების მიხედვით იკვეთება, რომ დევნილთა დასახლებებში სულ უფრო იზრდება ოჯახური ძალადობის მსხვერპლთა რაოდენობა, გარდა ამისა იძულებით გადაადგილებულმა ქალებმა საკუთარი უფლებების შესახებ ბევრი არაფერი იციან.    „ომისა და მშვიდობის გაშუქების ინსტიტუტის" მიერ შექმნილია მოქალაქე ჟურნალისტების ქსელი, რომელებიც ქალთა პრობლემებს გაშუქებენ. პროექტის ფარგლებში შექმნილ ვებგვერდზე (women-peace.net) აფხაზი, ოსი და ქართველი ჟურნალისტები საკუთარ მასალებს უკვე ათავსებენ. პროექტის მიზანია, მეტი ქალის გაერთიანება სამშვიდობო და ქალთა უფლებების საკითხების ირგვლივ. სრულად წყარო: media.ge

აჭარა. 16 ნოემბერს, ბათუმის დემოკრატიული ჩართულობის ცენტრში, კულტურულ–ჰუმანიტარულმა ფონდმა „სოხუმმა", პროექტი _ „ქალთა  სამოქალაქო მონაწილეობა" წარადგინა.  პროექტის მიზანია ქალთა  შესაძლებლობების გაზრდა სამოქალაქო აქტიურობის კუთხით, მნიშვნელოვან გადაწყვეტილებებში მათი სრულფასოვანი მონაწილეობა, სამოქალაქო საზოგადოების ჩამოყალიბების ხელშეწყობა, მომავალ ადგილობრივ არჩევნებში გენდერული სურათის მოდიფიცირება, ქვეყანაში მშვიდობის, სტაბილურობისა და გენდერული თანასწორობის დამკვიდრება. აღნიშნული პროექტის გეოგრაფიული არეალი  მოიცავს  დასავლეთ საქართველოს ოთხ რეგიონს (იმერეთი, სამეგრელო, აჭარა, გურია), ხოლო მისი ხანგრძლივობა განისაზღვრება ერთი წლით. პროექტის ფინანსური მხარდამჭერია დემოკრატიის მხარდაჭერის ეროვნული ფონდი (NED).

თბილისი. ოქტომბერის ბოლოს ქალთა ფონდმა მოაწყო სამდღიანი შეხვედრა გრანტის მიმღებ ორგანიზაციებთან. შეხვედრის მიზანი იყო გრანტის მიმღებებს შორის ქსელური მუშაობის და ქალთა მოძრაობაში მათი აქტიური ჩართვისა და ეფექტური თანამშრომლობის  ხელშეწყობა. შეხვედრას ესწრებოდა 70 გრანტის მიმღები ორგანიზაცია, რომლებიც გრანტებს ქალთა ფონდის შემდეგი საგრანტო პროგრამებისგან იღებდნენ:  ქალთა ეკონომიკური დამოუკიდებლობის პროგრამა (DGP), ღია კარის საგრანტო პროგრამა, სწრაფი რეაგირების საგრანტო პროგრამა და ქალთა უფლებების კულტურის დანერგვის საგრანტო პროგრამია (ქალთა ორგანიზაციების წარმომადგენლები, საინიციატივო ჯგუფები, ახალგაზრდა აქტივისტები, სოფლად მცხოვრები ქალები და ა.შ.) . გრანტის მიმღებმა ორგანიზაციებმა ერთამენთს გაუზიარეს  მიღწევები და გამოწვევები.  სრულად წყარო: womenfundgeorgia.org

თბილისი. საზოგადოებრივი ორგანიზაციების, დასაქმების საერთაშორისო ორგანიზაციისა და სახელმწიფო სტრუქტურების როგორც ცენტრალური, ისე რეგიონული წარმომადგენლებისთვის  თბილისში, ჩატარდა ტრენინგი თემაზე ,,გენდერული აუდიტი ფასილიტატორებისთვის”.  ტრენინგს უძღვებოდა ანჟელიკა მიულერი, შრომის უფლებების  ექსპერტი, შრომის საერთაშორისო ორგანიზაციის გენდერის ექსპერტი. გენდერული აუდიტი გულისხმობს ორგანიზაციის სუსტი და ძლიერი მხარეების გამოვლენის შესაძლებლობას  გენდერული თანასწორობის მხარდამჭერ საქმიანობაში, დახმარებას  ორგანიზაციებისთვის, დამოუკიდებლად შეიმუშაონ წინადადებები კომპლექსური გენდერული მიდგომების დასანერგად. სრულად წყარო: ginsc.net