თბილისი. საქართველოში კორონავირუსის (COVID-19) გავრცელების საპრევენციო ღონისძიებების ფარგლებში და თანამშრომლებისა და მოქალქეების ჯანმრთელობის მეტი უსაფრთხოებისთვის, ნატოსა და ევროკავშრის შესახებ საინფორმაციო ცენტრი მუშაობის დისტანციურ რეჟიმზე გადავიდა. „ცენტრის მუშაობის სპეციფიკიდან გამომდინარე, გადაიდო ხალხმრავალი ღონისძიებები, რომლებიც საფრთხის შემცველია ახალი ვირუსის გავრცელების თვალსაზრისით. აღნიშნული გადაწყვეტილების მიღება საზოგადოების უსაფრთხოებიდან გამომდინარე მოხდა. ჩვენ შევეცდებით უფრო საინტერესო და ნაყოფიერი გავხადოთ ჩვენი სახლში ყოფნა, მოგაწოდოთ განახლებული ინფორმაცია, ვირტუალურად ვიმოგზაუროთ ევროპაში, გავეცნოთ მის კულტურას, ღირებულებებსა და ისტორიას“, ნათქვამია ცენტრის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ქალთა ინიციატივების მხარდამჭერი ჯგუფი (WISG) სახელმწიფო უწყებებს მიმართავს კორონავირუსის გავრცელებასთან დაკავშირებული მდგომარეობის შესახებ.  „ვირუსით გამოწვეული კრიზისული მდგომარეობა ყველაზე მწვავედ აისახება მათზე, ვისაც არ აქვს თვითიზოლაციაში ან დისტანციურად მუშაობის “ფუფუნება”, მარტოხელა და მიუსაფარი მოხუცები, უსახლკარო ადამიანები, დევნილები, მარტოხელა დედები, შშმ პირები და სხვა. მათ შორის არიან ტრანსგენდერი ადამიანები, რომელთაც სახელმწიფო დღემდე უარს ეუბნება გენდერის სამართლებრივი აღიარების რეგულირებაზე, რაც უბრალო იურიდიული ფორმალობა კი არა, სასიცოცხლოდ მნიშვნელოვანი სამართლებრივი ინსტრუმენტია ტრანსგენდერი ადამიანების ჯანდაცვის, დასაქმების და სოციალური დაცვის სხვა მექანიზმებზე ხელმისაწვდომობისთვის“. სრულად... წყარო: women.ge

თბილისი. „ადამიანის უფლებების სწავლებისა და მონიტორინგის ცენტრი“ (EMC) ეხმიანება 2020 წლის 20 მარტს სინოდის მიერ მიღებულ დადგენილებას, რომელიც Covid 19 ვირუსის ეპიდემიასთან დაკავშირებით ეკლესიაში ღვთისმსახურების წესის უცვლელად დატოვების საკითხს უკავშირდება. ორგანიზაცია მიიჩნევს, რომ სინოდის ეს გადაწყვეტილება ეწინააღმდეგება მწვავე სოციალურ ინტერესებს და საჯარო წესრიგს. „საგანგებო მდგომარეობის შემოღების შესახებ მთავრობის დღევანდელი გადაწყვეტილება სავარაუდოდ საპატრიარქოს გუშინდელ გადაწყვეტილებაზე პოლიტიკური რეაქცია იყო. EMC მიიჩნევს, რომ სინოდის გადაწყვეტილება ვირუსის გავრცელების მასშტაბს და რისკებს სათანადოდ არ იაზრებს და უგულბელეყოფს ადამიანის სიცოცხლის, ჯანმრთელობის და უსართხოების დაცვის მაღალ საჯარო ინტერესებს, რაც ორგანიზაციის მხრიდან სოციალური პასუხისმგებლობის პრობლემას აჩვენებს და საჯარო წესრიგის დაცვის იდეასთან მოდის ღია წინააღმდეგობაში“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) მოუწოდებს საქართველოს მთავრობას და ადგილობრივ თვითმმართველობებს განსაკუთრებული ყურადღება მიაქციონ სოფელებში წყლის უფლების დაცვას, რომელიც კრიტიკულად მნიშვნელოვანია COVID-19 ვირუსის პრევენციის მიზნით. „EMC სისტემურად ახორციელებს ქვემო ქართლის რეგიონსა და ახმეტის მუნიციპალიტეტში ეთნიკური უმცირესობებით დასახლებული სოფლების საჭიროებების კვლევას. სოფლების უმეტესობაში მთავარ გამოწვევად სწორედ სუფთა სასმელ და სამომხმარებლო წყალზე ხელმისაწვდომობა რჩება“, ნათქვამია განცხადებაში. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: არის თუ არა დამსაქმებელი ვალდებული, დასაქმებული პირბადეებით და სხვა ინდივიდუალური დაცვის საშუალებებით უზრუნველყოს. „სახელმწიფოს რეკომენდაციების გათვალისწინებით და კორონავირუსის გავრცელების მაღალი საფრთხიდან გამომდინარე, განსაკუთრებით ისეთ სამუშაო ადგილებში, სადაც დასაქმებულებს ხშირი შეხება აქვთ მესამე პირებთან, დამსაქმებელი ვალდებულია უზრუნველყოს დასაქმებულთა უსაფრთხოება ყველა სათანადო ინდივიდუალური დაცვის საშუალებებით, მათ შორის, პირბადეებით, სადეზინფექციო საშუალებებითა და სხვა სახის ინვენტარით“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს კორონავირუსთან დაკავშირებულ რეკომენდაციებზე. „მასალა მომზადებულია დაავადებათა კონტროლისა და საზოგადოებრივი ჯანმრთელობის ეროვნული ცენტრის მიერ, თარგმნილია საქართველოს ღია საზოგადოების ფონდის მიერ სომხურ და აზერბაიჯანულ ენებზე პროექტის “კორონავირუსის (COVID-19) შესახებ ინფორმაციის გავრცელება ეთნიკური უმცირესობებს შორის” ფარგლებში“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. საქართველოს წითელმა ჯვარმა დაიწყო მერიის ცხელ ხაზზე დარეგისტრირებული მოხალისეების გადამზადება. „ტრენინგის მიზანია მერიასთან ერთად განვახორციელოთ თვითიზოლაციაში მყოფი, უფასო სასადილოებით მოსარგებლე, ასევე სოციალურად დაუცველი და ქრონიკული დაავადებების მქონე მარტო მცხოვრები ხანდაზმულებისა და განსაკუთრებული საჭიროებების მქონე პირებისთვის, სურსათის, ჰიგიენური საშუალებებისა და მედიკამენტების ბინაზე მიტანა. გარდა ამისა, საბავშვო ბაღებსაც დავეხმარებით საკვები ამანათების განაწილებასა და ბენეფიციარებისთვის მიწოდებაში“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ჰელფინგ ჰენდი (Helping Hand) მადლობას უხდის მოქალაქეებს, რომლებიც უანგაროდ ეხმარებიან საქართველოში მოწყვლად ჯგუფებს, სოციალურად დაუცველ თუ სხვადასხვა საჭიროების მქონე ადამიანებს. „კორონა ვირუსის (COVID – 19) გავრცელების პრევენციისა და მართვის უზრუნველოყოფის პროცესში საზოგადოებამ კვლავ გამოიჩინა/იჩენს მაღალ სამოქალაქო პასუხისმგებლობას, უამრავი ადამიანი ჩაერთო მოხალისეობრივ საქმიანობაში. ამ ადამიანებს უნდა ვიცნობდეთ და მადლობა გადავუხადოთ“, ნათქვამია ორგანიზაციის გვერდზე სოციალურ ქსელში.  სრულად...  წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია აქვეყნებს ბლოგპოსტს: COVID-19-თან დაკავშირებული გამოწვევები შრომით ურთიერთობებში (დროებითი შრომისუუნარობისა და შვებულების გამო შრომითი ურთიერთობის შეჩერება). „საქართველოში კორონავირუსის გავრცელება მნიშვნელოვანი გამოწვევაა, როგორც ჯანმრთელობის, ისე - ეკონომიკური და სამართლებრივი თვალსაზრისით. პანდემიის გავრცელებამ გავლენა მოახდინა შრომით ურთიერთობებზეც. დღეის მდგომარეობით, მთავრობის მიერ გაცემული რეკომენდაციებისა და უსაფრთხოების ზომებიდან გამომდინარე, დამსაქმებლები ეფექტიანი ღონისძიებების განსაზღვრის აუცილებლობის წინაშე აღმოჩნდნენ. არსებული მდგომარებობის პირობებში, აქტუალურია შემდეგი საკითხები:  - შრომის კანონმდებლობით განსაზღვრული რა უფლებები და ვალდებულებები გააჩნიათ თვითიზოლაციასა და კარანტინში მყოფ პირებს;  - შეუძლია თუ არა დამსაქმებელს დასაქმებულის შვებულებაში მისი ნების საწინააღმდეგოდ გაშვება“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. „სამოქალაქო საზოგადოების განვითარების ინიციატივის“ განმახორციელებელი ორგანიზაციები ყურადღებით ადევნებენ თვალს ბოლო დროს საქართველოსა და მსოფლიოში ახალი პანდემიის, #COVID-19-ის, ირგვლივ განვითარებულ მოვლენებს. „ვირუსის გავრცელების დღიდან ზედმიწევნით ვიცავთ ჯანდაცვის მსოფლიო ორგანიზაციის, საქართველოს მთავრობისა და საქართველოს დაავადებათა კონტროლისა და საზოგადოებრივი ჯანმრთელობის ეროვნული ცენტრის მიერ გაცემულ რეკომენდაციებს. ჩვენი კონსორციუმის წევრებისთვის თანამშრომელთა, ბენეფიციართა და პარტნიორთა ჯანმრთელობა და კეთილდღეობა უპირველესი ღირებულებაა. ვირუსის გავრცელების რისკის მომატების დღიდან კონსორციუმის წევრმა ყველა ორგანიზაციამ მიიღო შესაბამისი ზომები, რათა შეემცირებინა ვირუსის გავრცელების შესაძლებლობა, კერძოდ: გადადო თანამშრომელთა და ექსპერტთა საერთაშორისო და ქვეყნის შიდა მივლინებები; შეხვედრები და ღონისძიებები გადაიტანა ონლაინ რეჟიმში; შემოიღო ჰიგიენის წესების დაცვის განსაკუთრებული ზომები საკუთარ ოფისებში“, ნათქვამია განცხადებაში. სრულად... წყარო: პროექტის გვერდი სოციალურ ქსელში

თბილისი. საქართველოს სახალხო დამცველი, ნინო ლომჯარია აქვეყნებს ინფორმაციას ადამიანის უფლებების სტანდარტების შესახებ პანდემია/ეპიდემიის დროს. ომბუდსმენი შექმნილ ვითარებაში ადამიანის უფლებების დაცვის სტანდარტების შესახებ ხშირად დასულ შეკითხვებს პასუხიბს. სრულად... წყარო: ombudsman.ge

თბილისი. გაეროს ბავშვთა ფონდი (UNICEF) აქვეყნებს ბლოგპოსტს პანდემიის პერიოდში ამოყალიბებულ სტიგმებზე. „პანდემიის პერიოდში ერთ-ერთ საშიშროებას წარმოადგენს სოციალური სტიგმა, რაც ხშირად დაავადებულებისადმი სტერეოტიპებისა და იარლიყების მიწებებაში, მათ დისკრიმინაციაში გამოიხატება. სტიგმასთან ბრძოლა მნიშვნელოვანია, რადგან მან შეიძლება: უბიძგოს ადამიანებს, დისკრიმინაციის თავიდან აცილების მიზნით დამალონ დაავადება; ხელი შეუშალოს ადამიანებს, რომ მყისიერად მიმართონ სამედიცინო დაწესებულებას; თავი შეაკავებინოს მათ ჯანსაღი ქცევისგან; მოერიდეთ გადამოუწმებელი ინფორმაციის გავრცელებას. - არასწორი წარმოდგენები, ჭორები და მცდარი ინფორმაცია ხელს უწყობს სტიგმას და დისკრიმინაციას, რაც აფერხებს დაავადებაზე რეაგირების ეფექტიანობას“. სრულად... წყარო: ორგანიზაციის გვერდი სოციალურ ქსელში

თბილისი. 17 მარტს, EMC-ის წარმომადგენლებმა და ტყიბულში არსებული ძიძიგურის სახელობის შახტის მეშახტეებმა ერთობლივი პრესკონფერენცია გამართეს. „მეშახტეები რამდენიმე დღეა უარს აცხადებენ შახტში მუშაობაზე, იქ არსებული საფრთხისშემცველი სამუშაო გარემოს გამო. EMC მხარდაჭერას უწევს ძიძიგურის შახტის მეშახტეებს და მოუწოდებს სახელმწიფოს, გაითვალისწინოს მისივე დაკვეთით შესრულებული აუდიტის დასკვნის რეკომენდაციები და უსაფრთხო სამუშაოს გარემოს უზრუნველყოფამდე შეაჩეროს ნახშირმოპოვებითი სამუშაობი შახტებში და დაიცვას მეშახტეების შრომითი უფლებები“, ნათქვამია ორგანიზაციის ვებგვერდზე. სრულად... წყარო: emc.org.ge

აჭარა. 15 მარტს, საქართველოს წითელი ჯვრის ბათუმის ფილიალის მოხალისეებმა და თანამშრომლებმა განახორციელეს მორიგი საინფორმაციო კანპანია, რომლის მიზანი იყო კორონავირუსთან დაკავშირებით რეკომენდაციების გავრცელება მოსახლეობაში. სრულად... წყარო: ორგანიზაციის გვერდი სოციალურ ქსელში

თბილისი. გაეროს ბავშვთა ფონდი (UNICEF) ნეიროფსიქოლოგ, თამარ გაგოშიძის რეკომენდაციების შესახებ აქვეყნებს ვლოგს: როგორ ვაკონტროლოთ ბავშვების მიერ ელ. მოწყობილობების გამოყენების სიხშირე. „სკოლებში სწავლის შეჩერების გამო ბავშვებს სახლში უწევთ ყოფნა და ახლა განსაკუთრებით რთულია, ვაკონტროლოთ მათ მიერ ელექტრონული მოწყობილობების გამოყენების სიხშირე“. სრულად... წყარო: ორგანიზაციის გვერდი სოციალურ ქსელში

თბილისი. COVID-19 ვირუსის გავრცელების პრევენციის მიზნით, ინფორმაციის თავისუფლების განვითარების ინსტიტუტი (IDFI) 16 მარტიდან დისტანციური მუშაობის რეჟიმზე გადადის. „IDFI-ის თანამშრომლებთან დაკავშირება სამუშაო საათებში შეგიძლიათ ელ. ფოსტით და ტელეფონის ნომრით. ორგანიზაცია არ წყვეტს სატელეფონო და ელექტრონულ კომუნიკაციას პარტნიორ ორგანიზაციებთან და ყველა დაინტერესებულ პირთან“. სრულად... წყარო: ორგანიზაციის გვერდი სოციალურ ქსელში

თბილისი. საქართველოს წითელი ჯვრის საზოგადოება აქტიურად აგრძელებს მოხალისეთა მობილიზებას ახალი კორონა ვირუსის (COVID-19) გავრცელების რისკის შესამცირებლად, მოსახლეობის ინფორმირებისათვის და პრევენციული ზომების გასატარებლად. „მოხალისეებს მიეცემათ შესაძლებლობა ჩაერთონ სხვადასხვა საქმიანობაში: მოსახლეობის ინფორმირება პრევენციულ ზომებთან დაკავშირებით; თვითიზოლაციაში მყოფი, ასევე სოციალურად დაუცველი და ქრონიკული დაავადებების მქონე მარტო მცხოვრები ხანდაზმულებისა და განსაკუთრებული საჭიროების მქონე პირებისათვის პროდუქტების, ჰიგიენური ამანათების და მედიკამენტების მიტანა“. სრულად... წყარო: ორგანიზაციის გვერდი სოციალურ ქსელში

თბილისი. EWMI ACCESS COVID 19 ვირუსის გავრცელების საფრთხის გათვალისწინებით და სახელმწიფოს მიერ ინიცირებული პრევენციული ღონისძიებების მხარდასაჭერად 2020 წლის 16 მარტიდან დისტანციურ მუშაობაზე გადადის. ორგანიზაცია ასევე, დროებით აჩერებს ყველა იმ აქტივობას, რომელსაც 10-ზე მეტი მონაწილე/დამსწრე ჰყავს. სრულად... წყარო: ორგანიზაციის გვერდი სოციალურ ქსელში

ადგილობრივი დემოკრატიის სააგენტო საქართველო (LDA Georgia), იზიარებს პასუხისმგებლობას იმოქმედოს, ქვეყანაში კორონავირუსთან (COVID 19) დაკავშირებული ვითარების გათვალისიწინებით და დროებით აჩერებს მუნიციპალიტეტებში დაგეგმილ აქტივობებს. წყარო: LDA საქართველოს გვერდი სოციალურ ქსელში

12 მარტს, საქართველოს წითელი ჯვრის სამტრედიის ფილიალის მოხალისეებმა ჩაატარეს საინფორმაციო აქცია ახალ კორონავირუსთან (COVID-19) დაკავშირებით. "აქციის მიზანი იყო თემის წევრებისთვის ახალი კორონავირუსისაგან თავდაცვის საშუალებების შესახებ რეკომენდაციების მიწოდება". სრულად... წყარო: ორგანიზაციის გვერდი სოციალურ ქსელში

თბილისი. მსოფლიო ჯანდაცვის ორგანიზაციის მიერ გამოცხადებული პანდემიის გამო, საქართველოს მთავრობის მიერ გაცემული რეკომენდაციის შესაბამისად, საქართველოს სახალხო დამცველის აპარატი 16 მარტიდან მუშაობის საგანგებო რეჟიმზე გადადის, რაც აპარატის თანამშრომელთა დიდი ნაწილისთვის მუშაობის დისტანციურ რეჟიმს გულისხმობს. "აღნიშნული არ ვრცელდება სახალხო დამცველისა და მისი მოადგილეების საქმიანობაზე, ასევე, აპარატის იმ თანამშრომლებზე, რომელთა ადგილზე ყოფნა აუცილებელია სახალხო დამცველის აპარატის კონსტიტუციური მანდატის უწყვეტი განხორციელებისთვის (მათ შორის, დახურულ დაწესებულებებში ვიზიტებისთვის)". სრულად... წყარო: ომბუდსმების გვერდი სოციალურ ქსელში

თბილისი. წამების მსხვერპლთა ფსიქოსოციალური და სამედიცინო რეაბილიტაციის საქართველოს ცენტრი (GCRT) აქვეყნებს ინფორმაციას პანდემიის დროს სტრესის მართვის სტრატეგიებზე. "პანდემიის ადრეულმა ეტაპმა შეიძლება განსაკუთრებით მაღალი შფოთვა გამოიწვიოს საზოგადოებაში. უსიამოვნოა იმის გაგება, რომ კორონავირუსი (COVID-19) მთელს მსოფლიოში ვრცელდება. შიშის, შფოთვისა და გაურკვევლობის გრძნობა ასეთ დროს ნორმალურია. საბედნიეროდ, ფსიქიკურ ჯანმრთელობაზე აქტიური ზრუნვა ხელს შეგიწყობთ, შეინარჩუნოთ გონებისა და სხეულის სიმტკიცე. საკუთარ თავზე ზრუნვის გზები მოიცავს: მიიღეთ ინფორმაცია მხოლოდ სანდო, გადამოწმებული წყაროდან. მოერიდეთ მედიის ზედმეტ მოხმარებას და ფოკუსირდით ისეთ იფნორმაციაზე, სადაც პრევენციის ზომებზე და სხვა საჭირო თემებზეა საუბარი. მოინიშნეთ საკითხები, რომელზეც თქვენ გაქვთ კონტროლი. მაგ: კარგი ჰიგიენა, დისტანციური სამუშაო, შეძენილი საჭირო მედიკამენტები და საკვები და აშ. დაიცავით მხოლოდ ის წესები, რომლებსაც დაავადების კონტროლის ცენტრი აცხადებს. ნუ მიჰყვებით გაურკვეველ რეკომენდაციებს, რომელსაც მეცნიერული მტკიცებულება არ გააჩნია.  შეეცადეთ შეინარჩუნოთ აქტივობები, რომლებიც თქვენი ყოველდღიური რუტინის ნაწილი იყო. მაგ: ვარჯიში, დაბალანსებული კვება, თამაში და აშ. შეადგინეთ სამოქმედო გეგმა, რომელიც დაგეხმარებათ სიმშვიდის შენარჩუნებაში და მობილიზებაში. მაგ: იცოდეთ ვის უკავშირდებით სიმპტომის გაჩენის შემთხვევაში. გაუზიარეთ გეგმა ახლობელ ადამიანს.  იმ შემთხვევაში, თუ ამჩნევთ, რომ გაქვთ უძილობა, მოუსვენრობა, დაქვეითებული გუნებ-განწყობა, გამოუვალობის განცდა, დანაშაულისა და შიშის გრძნობა, მიმართეთ ფსიქიკური ჯანმრთელობის სფეროს სპეციალისტს. მკვლევარები აღნიშნავენ, რომ ეპიდემიის დროს იზრდება ფსიქოლოგიური სტრესით გამოწვეული ფსიქიკური პრობლემები, როგორიცაა დეპრესია, შფოთვა, ფსიქოსომატური აშლილობა და ადაპტაციის სირთულეები; იზრდება ნივთიერებებისა და თამბაქოს ჭარბად გამოყენების რისკი. ამიტომ, ასეთ დროს სტრესის მართვა და ნეგატიური ემოციების ბალანსი მაქსიმალური პოზიტიური გამკლავების სტრატეგიის შემუშავებით უნდა მოხდეს". წყარო: GCRT; www.verywellmind.com