თბილისი. 30 ოქტომბერს, სასტუმრო Holiday Inn- ში გაიმართა პროექტის „საგანგებო სიტუაციების დროს ჯანდაცვის გამოწვევების მიმართ სამხრეთ კავკასიის ადგილობრივი თემების მდგომარეობების გაძლიერება“ ოფიციალური წარდგენა. „პროექტი დახმარებას გაუწევს საქართველოში კატასტროფების რისკის ქვეშ მყოფ რეგიონებში დაუცველ თემებს, რათა გაძლიერდნენ და გაუმკლავდნენ ჯანდაცვის გამოწვევებს საგანგებო სიტუაციების დროს”, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ნოემბრის დასაწყისიდან „ქალთა მზერა“ იწყებს უპროცედენტო პროექტს „იზრუნე შენზე“, სადაც 16-25 წლის ქალებს საშუალება ექნებათ უფასოდ გაიარონ კონსულტაცია ორგანიზაციის მოწვეულ გინეკოლოგთან და ჩაიტარონ საჭირო გამოკვლევები. „პირველი სარეგისტრაციო ფორმა ნოემბრის დასაწყისში დაიდება. მსურველებს ყოველი თვის დასაწყისში შეეძლებათ დარეგისტრირდნენ და ისარგებლონ უფასო გინეკოლოგიური მომსახურებით ერთჯერადად. დაგველოდეთ და თვალი ადევნეთ „ქალთა მზერის“ FB გვერდს დამატებითი ინფორმაციისთვის“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

კახეთი. საქართველოს წითელი ჯვრის საზოგადოების პირველადი ჯანდაცვის მობილური კაბინეტის პროფესიონალი და მაღვალკვალიფიციური ექიმების მიერ ჩატარდა უფასო სამედიცინო დიაგნოსტიკური კვლევები სიღნაღის მუნიციპალიტეტის მოსახლეობისათვის. „ასამდე საჭიროების მქონე მოქალაქემ მიიღო შემდეგი სახის სამედიცინო მომსახურება: მუცლის ღრუ და სხვა შინაგანი ორგანოების ექოსკოპირება უახლესი აპარატურით, ოფთალმოლოგია, კარდიოლოგიური გამოკვლევა, სისხლში შაქრის შემცველობის დონის განსაზღვრა, ფარისებრი ჯირკვლის რადიოლოგიური კვლევა და აგრეთვე ექიმი-თერაპევტის და კარდიოლოგიის კონსულტაცია”, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

იმერეთი. ქუთაისის ახალგაზრდული ცენტრის წევრები სამტრედიის შშმ ბავშვთა დღის ცენტრს ეწვივნენ და მოსავლის თემასთან დაკავშირებით შშმ ბავშვთა დღის ცენტრის ბენეფიციარებთან ერთად საშემოდგომო აქტივობები განახორციელეს. ღონისძიების მიზანი იყო შშმ ბავშვების სოციალიზაცია და ინტეგრაცია საზოგადოებაში, მხარეთა სოციალური პასუხისმგებლობების განაწილება და ბავშვზე მზრუნველობა. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს განცხადებას ფსიქიკური ჯანმრთელობის საერთაშორისო დღესთან დაკავშირებით. „უმწვავეს პრობლემად რჩება საზოგადოებაში არსებული სტიგმა ფსიქოსოციალური საჭიროების მქონე პირებთან დაკავშირებით. ხშირ შემთხვევაში, ამ ჯგუფის მიმართ განხორციელებული ძალადობა საზოგადოებისა და სახელმწიფოსათვის უჩინარი რჩება, ხოლო გახმაურებული ძალადობრივი შემთხვევები ავტომატურად ფსიქოსოციალურ საჭიროებას მიეწერება“, ნათქვამია განცხადებაში.  სრულად... წყარო: emc.org.ge

თბილისი. 10 ოქტომბერს, ფსიქიკური ჯანმრთელობის მსოფლიო დღესთან დაკავშირებით საქართველოს სახალხო დამცველმა, ნინო ლომჯარიამ საჯარო შეხვედრა გამართა თემაზე - „ფსიქიკური ჯანმრთელობის დაცვა და ადამიანის უფლებები“.  „ფსიქიკური ჯანმრთელობის მსოფლიო დღე 1992 წლიდან აღინიშნება და მისი მიზანია ფსიქიკურ ჯანმრთელობასთან დაკავშირებულ საკითხებზე საზოგადოების ცნობიერების ამაღლება, მხარდამჭერი ღონისძიებების მობილიზება. წელს ამ დღის ფოკუსი სუიციდის პრევენციაა“, ნათქვამია ომბუდსმენის ვებგვერდზე.  სრულად...  წყარო: ombudsman.ge

თბილისი. 11 ოქტომბერს, პარასკევს, 1 საათზე, ფრონტლაინ საქართველოში (ლადო ასათიანის 62), ღია საზოგადოების ფონდის მხარდაჭერით, საქართველოს ფსიქოტრავმის საზოგადოება, „ღია“ მოძრაობა ფსიქიკური ჯანმრთელობისათვის და დართ ცენტრი ჟურნალისტებთან ჩაატარებენ შეხვედრას - „ტრავმის ფაქტორი“. დარტ ცენტრი რესურს ცენტრია ტრავმის, ძალადობის, კონფლიქტისა და ტრაგიკული მოვლენების თემაზე მომუშავე ჟურნალისტებისათვის და ტრავმული ისტორიების გაშუქების დიდი გამოცდილება აქვს. სრულად...  წყარო: https://osgf.ge

4 ოქტომბერს, გორის სამოქალაქო აქტივიზმის ცენტრი შეუერთა მასშტაბურ აქციას „ვარდისფერი ოქტომბერი”. „კამპანია მიზნად ისახავს ძუძუს კიბოს შესახებ ცნობადობის გაზრდას და იმის ჩვენებას, რომ კიბო განაჩენი არ არის და რომ მისი დამარცხება შესაძლებელია". სრულად...  წყარო: ორგანიზაციის გვერდი სოციალურ ქსელში

თბილისი. „ქალები საქართველოდან“ აქვეყნებს მკითხველის წერილს, რომელიც მწვანე აქტივისტის გრეტა თუნბერგის გაეროს სამიტზე გამოსვლას და ამ გამოვლის გამოხმაურებებს ეხება. „მე არ მიკვირს გრეტას განწყობა, რადგან მახსოვს მომენტი, როდესაც ჩემი გოგო გაიტაცა პლანეტებმა და ასტრონომიამ. ტელესკოპიც ვიყიდეთ და სხვადასხვა წიგნები ასტრონომიის შესახებ. მახსოვს ვნახეთ ვიდეო, სადაც ნაჩვენები იყო, რომ მზე X წლის შემდეგ ჩაქრება და მოკვდება. ეს ამბავი ძალიან განიცადა, შეეცოდა მზე, შეეცოდა პლანეტა, მცენარეები, ცხოველები და ადამიანები. მთელი კვირა მის დამშვიდებას მოვუნდი. როდესაც გრეტას ვუყურებ, ჩემს წინ ტიპური მაღალფუნქციური აუტიზმის მქონე გოგონა დგას - ძალიან ნიჭიერი, ჭკვიანი და მამაცი. მიხარია და იმედი მაქვს, რომ ჩემი შვილისთვის იგი მისაბაძი მაგალითი გახდება და არამხოლოდ, კლიმატის ცვლილების და გლობალური დათბობის შესახებ გაზრდის საზოგადოების ცნობიერებას, არამედ ქალებში და გოგონებში აუტისტური სპექტრის შესახებაც დაანგრევს სტერეოტიპებს“, ნათქვამია წერილში.  პროექტი „ქალები საქართველოდან“ ხორციელდება ქალთა საინიციატივო ჯგუფის მიერ (ავტორები: მაიკო ჩიტაია, იდა ბახტურიძე, ნინო გამისონია, ფოტოგრაფები: ნინო ბაიდაური, სალომე ცოფურაშვილი). პლატფორმა შეიქმნა ეროვნულ-დემოკრატიული ინსტიტუტის (NDI) მხარდაჭერით და შვედეთის განვითარების სააგენტოს (SIDA) დაფინანსებით. ამჟამად, ახალი ინტერვიუების ჩაწერა და სტატიების ნაწილის მომზადება ხდება აღმოსავლეთ-დასავლეთის მართვის ინსტიტუტის (EWMI) ACCESS-ის პროექტის ფარგლებში, ამერიკის შეერთებული შტატების საერთაშორისო განვითარების სააგენტოს (USAID) დაფინანსებით.  სრულად...  წყარო: „ქალები საქართველოდან“ გვერდი სოციალურ ქსელში ადამიანის უფლებები ეკოლოგია ჯანდაცვა

თბილისი. 67 ათასი აშშ დოლარის მობილიზება მოხდა ბავშვთა ჰოსპისის, „ციცინათელების ქვეყნის“ მხარდასაჭერ, რიგით მესამე აუქციონზე, რომელიც 19 სექტემბერს გაიმართა. აუქციონზე წარმოდგენილი ნამუშევრების ავტორებს შორის იყვნენ ოლეგ ტიმჩენკო, ნიკო ცეცხლაძე, სალომე რიგვავა, ნინო მორბედაძე, თუთუ კილაძე, მაკა ჯებირაშვილი და სხვები. მხატვრებმა ჰოსპისს ნამუშევრები უსასყიდლოდ გადასცეს.  ბავშვთა ჰოსპისი „ციცინათელების ქვეყანა” 2017 წელს გაიხსნა. ჰოსპისის შექმნაზე მუშაობა ღია საზოგადოების ფონდმა 2013 წელს, ბავშვთა პალიატიური მზრუნველობის საჭიროებების შესახებ კვლევის ჩატარების შემდეგ დაიწყო. კვლევის შედეგების მიხედვით, პალიატიური მზრუნველობის მომსახურება საქართველოში წელიწარდში 840 ბავშვს ესაჭიროება. აქედან, 30-მდე ბავშვს - სტაციონარული პალიატიური მზრუნველობა ჰოსპისში. სრულად...  წყარო: https://osgf.ge

თბილისი. პარტნიორობა ადამიანის უფლებებისთვის (PHR) სამართლებრივი დახმარების შედეგად, თბილისის სააპელაციო სასამართლომ ფსიქიატრიულ დაწესებულებაში პირის არანებაყოფლობით მოთავსება უკანონოდ ცნო.  „სასამართლომ 2019 წლის 13 სექტემბერს, გააუქმა თბილისის საქალაქო სასამართლოს 2019 წლის 31 აგვისტოს ბრძანება პირის არანებაყოფლობით ფსიქიატრიულ დაწესებულებაში მოთავსების შესახებ“. სრულად...  წყარო: phrgeorgia.wordpress.com

საქართველო. კანადის ფონდის - ადგილობრივი ინიციატივები GFLI - მიერ დაფინანსებული პროექტის, „შეზღუდული შესაძლებლობის მქონე ახალგაზრდა ქალები მდგრადი განვითარების მიზნებისთვის“, ფარგლებში, ორგანიზაციამ „ქალი და რეალობა“ აჭარისა და იმერეთის ინკლუზიურ ჯგუფებთან სალონური ტიპის ლექცია-სემინარების ციკლი გამართა.  შეხვედრების თემა იყო მდგრადი განვითარების (SDG) მიზნები - პერსპექტივები შეზღუდული შესაძლებლობის მქონე ქალთა თემისთვის. ლექცია-სემინარების მონაწილეები გაეცნენ მდგრადი განვითარების მთავარ გზავნილსაც - „არავინ დარჩეს პროცესის მიღმა“ (Leaving no one behind), იმას, თუ რა როლი აქვს ეკონომიკური და სოციალური უთანასწორობა დაძლევაში შეზღუდული შესაძლებლობის მქონე ქალთა ინტერესების გათვალისწინებას. სრულად  წყარო: გვერდი სოციალურ ქსელში

თბილისი. „ადამიანის უფლებების სწავლებისა და მონიტორინგის ცენტრი“ (EMC) 2019 წლის 1 სექტემბრიდან „შრომის უსაფრთხოების შესახებ“ საქართველოს ორგანული კანონის რიგი ნორმების ამოქმედებას ეხმაურება. ორგანიზაციის განცხადებით, ცვლილებები წინგადადგმულ ნაბიჯად შეიძლება ჩაითვალოს, თუმცა, არის რიგი საკითხებისა, რომელიც ჯერაც მოგვარებას საჭიროება. კერძოდ, EMC მოუწოდებს: „საქართველოს მთავრობას და საქართველოს პარლამენტს: დროულად შეიმუშავოს და მიიღოს საკანონმდებლო და კანონქვემდებარე აქტები, რომლებიც გაწერილია „შრომის უსაფრთხოების შესახებ“ ორგანული კანონით და აუცილებელია ორგანული კანონის სრულფასოვნად ამოქმედებისა და შრომის უსაფრთხოების სრულფასოვანი სისტემის დანერგვისა და ეფექტურობისათვის; დროულად შეიმუშაოს და მიიღოს საკანონმდებლო და კანონქვემდებარე აქტები და უზრუნველყოს შესაბამისი ფინანსური და ადმინისტრაციული რესურსის მობილიზება შრომის ინსპექციის ინსტიტუციურად გაძლიერებისა და მის დამოუკიდებელ ინსტიტუციად ჩამოყალიბებისთვის; დროულად შეიმუშაოს და მიიღოს საკანონმდებლო და კანონქვემდებარე აქტები შრომის ინსპექციის მანდატის გაფართოების მიზნით, რათა იგი გავრცელდეს ზოგადად შრომის კანონმდებლობის აღსრულების ზედამხედველობაზე; უზრუნველყოს შრომის უსაფრთხოების სწავლების აკრედიტირებული პროგრამების სტანდარტიზება და გამართვა. დამსაქმებლებს: დროულად დანერგონ სამუშაო ადგილზე საერთაშორისო სტანდარტებისა და საქართველოს კანონმდებლობის მოთხოვნების შესაბამისი შრომის უსაფრთხოების სისტემა“.  სრულად   წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ოლგა კალინას ბლოგპოსტს: ძალადობა და ფსიქიკური პრობლემები: არარსებული კავშირი?. „საზოგადოებამ მანამდე დაიწყო ამ ადამიანის ფსიქიკურ პრობლემებზე საუბარი, ვიდრე მისი არსებობის ან არარსებობის საკითხი დადასტურდებოდა. ყოველთვის როცა საქმე ეხება სასტიკ დანაშაულს, პირველადი ფსიქიკურ პრობლემებზე გადაბრალება არის ხოლმე. კაცობრიობას არ უნდა დაჯერება, რომ ძალადობა, მათ შორის, სასტიკი ძალადობა ყოველთვის არ უკავშირდება რაიმე სახის ავადმყოფობას. (ეკლესიის პოზიცია ამ შემთხვევაში უფრო ადეკვატურია: ჩვენ ყველანი ცოდვილები ვართ და თითოეულ ჩვენგანში არსებობს პოტენციალი ბოროტი ქმედებების ჩადენის)“, ნათქვამია ბლოგპოსტში.  სრულად... წყარო: emc.org.ge 

თბილისი. წამების მსხვერპლთა ფსიქო-სოციალური რეაბილიტაციის ცენტრი (GCRT) აქვეყნებს რჩევებს ტრავმირებული ადამიანებისთვის. მიეცი საკუთარ თავს დრო და სივრცე იმისთვის, რომ გააცნობიერო თუ რა გადაგხდა. ნორმალურია, რომ გაქვს მძიმე ემოციური რეაქცია მომხდარზე. შეეცადე, არ იყო თვით-კრიტიკული იმ პრობლემების მიმართ, რომელიც გაქვს. ბევრ ადამიანს აქვს მსგავსი სირთულეები და ეს არ არის სისუსტის მანიშნებელი. შენ შესაძლოა გქონდეს სურვილი, თავი აარიდო სოციალურ აქტივობებს და საყვარელ ადამიანებს, მაგრამ მნიშვნელოვანია, იყო იმ ადამიანებთან ახლოს, ვინც შენზე ზრუნავს. ახლობელი ადამიანების ზრუნვა სასიცოცხლოდ მნიშვნელოვანია შეეცადე, თავიდან აირიდო ალკოჰოლისა და ნარკოტიკების მოხმარება, იმისთვის რომ თავი კარგად იგრძნო. ამ მეთოდმა შესაძლოა ცოტა ხნით გაგრძნობინოს თავი კარგად, მაგრამ მან შეიძლება სერიოზული პრობლემები შეგიქმნას შენ და შენს გარშემომყოფებს. ნარკოტიკებმა და ალკოჰოლმა შესაძლოა დაამძიმოს შენი სიმპტომები და შეანელოს გამოჯანმრთელების პროცესი. შეეცადე იყო ჯანმრთელი. იკვებე ბალანსირებულად და ივარჯიშე რეგულარულად, თუნდაც იარე ფეხით და ისეირნე. შეინარჩუნე ნორმალური დღის რეჟიმი. თუ ძილთან დაკავშრებული პრობლემები გაქვს, შეეცადე დაიძინო და გაიღვიძო ერთსა და იმავე დროს. თავი აარიდე კოფეინის მიღებას 16:00 საათის შემდეგ. დაუსახე საკუთარ თავს პატარა მიზნები და გამოიწვიე შენი თავი იმ დავალებების შესასრულებლად, რისთვის თავის არიდებაც გინდა. სრულად... წყარო: ორგანიზაციის გვერდი სოციალურ ქსელში

თბილისი. 2019 წლის 16 ივლისს, მშენებლობაზე დასაქმებული არასრულწლოვანის გარდაცვალებასთან დაკავშირებით, სახალხო დამცველმა განცხადება გაავრცელა.  „ქვეყანაში შრომის უსაფრთხოების კუთხით არსებული მდგომარეობა კვლავ უმთავრეს გამოწვევად რჩება. არსებული შემაშფოთებელი ვითარების გაუმჯობესებას მნიშვნელოვნად აფერხებს, ერთი მხრივ, შრომის ინსპექტორების სამუშაო ადგილებზე დაშვებისთვის გათვალისწინებული შეზღუდვები, რომლებიც მხოლოდ 2019 წლის სექტემბრიდან მოიხსნება, ხოლო, მეორე მხრივ - შრომის პირობების ინსპექტირების დეპარტამენტის ხელთ არსებული არასაკმარისი ადამიანური თუ მატერიალური რესურსები. აღნიშნული ფაქტორების გამო, დასაქმების ადგილებზე ინსპექტირება ვერ ხორციელდება იმდენად ხშირად და სრულყოფილად, რამდენადაც ეს აუცილებელია შრომის უსაფრთხოების ნორმების ეფექტური აღსრულების უზრუნველსაყოფად. შედეგად, უკანასკნელი შემთხვევის მსგავსად, მონიტორინგის გარეშე რჩება არაერთი დასაქმების ადგილი, სადაც სამუშაო პროცესი საქართველოს კანონმდებლობით გათვალისწინებული მოთხოვნების მნიშვნელოვანი დარღვევებით მიმდინარეობს“, - აღნიშნულია განცხადებაში.  სრულად...  წყარო: ორგანიზაციის ვებგვერდი

თბილისი. წამების მსხვერპლთა ფსიქოსოციალური რეაბილიტაციის ცენტრი (GCRT) აქვეყნებს რჩევებს ფსიქოლოგიური ტრავმის მქონე ადამიანების ოჯახის წევრების, პარტნიორებისა და მზრუნველებისთვის. შეეცადეთ იყოთ ემპათიური და გამგები ტრავმირებული ადამიანის მიმართ; შეეცადეთ არ იყოთ კრიტიკული იმის მიმართ, თუ როგორ უმკლავდება ის ამ მოვლენას. გაიხსენეთ, რომ მათ გამოცადეს საშიში და მძიმე სიტუაცია; შეეცადეთ არ მიიღოთ პირადულად სიმპტომები, როგორიცაა ემოციური გახევება, ბრაზი და გაშეშება. თუ ადამიანი, რომელმაც გადაიტანა ტრავმა, ჩანს დისტანციური და გაღიზიანებული, გაიხსენეთ, რომ ამას არანაირი კავშირი არ აქვს თქვენ ურთიერთობასთან; არ დააძალოთ ტრავმირებულ ადამიანს, მოყვეს ტრავმული გამოცდილების შესახებ, მაგრამ უთხარით, რომ თუ საუბარი მოუნდება, თქვენ მზად ხართ მის მოსასმენად; ტრავმირებული ადამიანები ხშირად თავს უიმედოდ და შერცხვენილად გრძნობენ იმის გამო, რომ მათ არ შეუძლიათ გაუმკლავდნენ სიმპტომებს. დაეხმარეთ მათ თავიანთი ძლიერი და პოზიტიური მხარეების გაცნობიერებაში; დაეხმარეთ მას თავიდან შექმნას დღის რუტინა, რაც დაეხმარება კონტროლისა და წესრიგის განცდის აღდგენაში. დაეხმარეთ მას, დაიწყოს პატარა ყოველდღიური მიზნებით და გააცნობიერებინეთ ყოველი წარმატება; თუ ჩათვლით, რომ აღნიშნული რჩევები არ მუშაობს, წაახალისეთ ის, მიმართოს პროფესიულ დახმარებას; სრულად...  წყარო: ორგანიზაციის გვერდი სოციალურ ქსელში

თბილისი. 17 ივლისს, მართლმსაჯულების საერთაშორისო დღეს, სისხლის სამართლის საერთაშორისო სასამართლოს საქართველოს კოალიციის წევრი ორგანიზაციები სპეციალური ანგარიშის, „ათი წელი აგვისტოს ომიდან: დაზარალებულთა მდგომარეობა საქართველოში“, პრეზენტაციას გამართავენ.  ანგარიში ასახავს 2008 წელს, რუსეთ-საქართველოს ომის დროს, ცხინვალის რეგიონიდან/სამხრეთ ოსეთიდან დევნილთა წინააღმდეგ ჩადენილ დანაშაულებს, ასევე, განსახლების ადგილზე მათ ამჟამინდელ სოციალურ-ეკონომიკურ მდგომარეობასა და საჭიროებებს. ანგარიშში, ასევე, საუბარია სისხლის სამართლის საერთაშორისო სასამართლოს მიერ საქართველოს სიტუაციასთან დაკავშირებით 2016 წლის იანვარში დაწყებულ გამოძიებაზე, მის მიმდინარეობასა და დღეს არსებულ გამოწვევებზე; წარმოდგენილია რეკომენდაციები სახელმწიფო ინსტიტუტებისა და სისხლის სამართლის საერთაშორისო სასამართლოს შესაბამისი ორგანოებისთვის.  სრულად...  წყარო: https://gyla.ge

თბილისი. „პარტნიორობა ადამიანის უფლებებისთვის“ (PHR) შეზღუდული შესაძლებლობის მქონე მოზარდების სექსუალური და რეპროდუქციული ჯანმრთელობის უფლების სამართლებრივ და პრაქტიკულ მიმოხილვას აქვეყნებს. კვლევა მომზადებულია MAC Georgia-ს მხარდაჭერით განხორციელებული პროექტის - „შეზღუდული შესაძლებლობის მქონე გოგონების სექსუალური ძალადობისგან დაცვა“ - ფარგლებში. პროექტი ითვალისწინებდა სექსუალური ძალადობის პრევენციის მნიშვნელოვანი მექანიზმის, კერძოდ, სექსუალური და რეპროდუქციული ჯანმრთელობის უფლებებთან დაკავშირებით შშმ მოზარდებთან მომუშავე პროფესიონალების ცნობიერების ამაღლებას.  სრულად...  წყარო: ორგანიზაციის ვებგვერდი

კახეთი. ღია საზოგადოების ფონდის ორგანიზებით, კახეთში ხელოვნებისა და კულტურის სფეროს წარმომადგენლების მონაწილეობით ტრენინგში ჩატარდა. ტრენინგს, რომლის მიზანია შემოქმედებითი ადამიანების მონაწილეობის გაზრდა ადამიანის უფლებების დაცვის სფეროში, უძღვებოდნენ ბულგარული ორგანიზაციის, Fine Acts Sprints-ის ტრენერები. ტრენინგი საზოგადოებრივი ჯანმრთელობის პროგრამის ფარგლებში ჩატარდა და შეზღუდული შესაძლებლობების და პალიატიური მზრუნველობის საჭიროების მქონე ადამიანებს ეხებოდა.  სრულად...  წყარო: ორგანიზაციის ვებგვერდი

დასავლეთ საქართველოში პირველადი ჯანდაცვის რგოლის ექიმებთან, სოფლის ექიმებთან და ონკოლოგებთან ტკივილის მართვის პრაქტიკის დანერგვასთან დაკავშირებით საინფორმაციო შეხვედრები ჩატარდა. შეხვედრების მიზანია ექიმების კვალიფიკაციის გაზრდა ტკივილისა და პალიატიური სიმპტომების მართვის საკითხებში. მონაწილეები იმის მიხედვით შეირჩნენ, თუ რამდენად აქვთ შეხება ქრონიკული და განუკურნებელი დიაგნოზის მქონე პაციენტებთან. ასეთი ღონისძიებები უკვე ჩატარდა შიდა ქართლის და ქვემო ქართლის 100-ზე მეტ ექიმთან. შეხვედრები პირველადი ჯანდაცვის რგოლის ექიმებთან, სოფლის ექიმებთან და ონკოლოგებთან ტარდება პროექტის - „დაინახე ჩემი ტანჯვა“ - ფარგლებში, რომელსაც ჯანმრთელობის დაცვისა და ადამიანის უფლებების კვლევის ცენტრი საქართველოს ღია საზოგადოების ფონდის მხარდაჭერით ახორციელებს.  სრულად   წყარო: osgf.ge

თბილისი. 26 ივნისს, საქართველოს კარიტასის ჯანმრთელობის დაცვის პროგრამის ორგანიზებით გამართა სიმპოზიუმი თემაზე: „გერიატრიული პაციენტის პრობლემები საქართველოს ჯანდაცვის სისტემაში“. სრულად... წყარო: ორგანიზაციის გვერდი სოციალურ ქსელში