სამცხე–ჯავახეთი. 28 იანვარს, ,,სამოქალაქო განათლებისა და პედაგოგთა გადამზადების პროგრამის” ფარგლებში ახალციხის მუნიციპალიტეტის სოფელ კლდის საჯარო სკოლაში, ამავე სკოლის სამოქალაქო კლუბის წევრებმა ტრენინგი ჩაატარეს. ტრენინგის თემა იყო  ,,ჯანსაღი ცხოვრების წესი".  ტრენინგი სამ ეტაპად ჩატარდა. თანატოლგანმანათლებლებმა განიხილეს ახალგაზრდებში ალკოჰოლის, ნარკოტიკებისა და სიგარეტის გამოყენების  შემთხვევები და მისი სავალალო შედეგები.  გაიმართა დისკუსიაც, მოსწავლეებმა იმსჯელეს,  რა არის ცხოვრების ჯანსაღი ცხოვრების წესი, რა მავნე ჩვევები უყალიბდებათ ახალგაზრდებს,  რა პრობლემები ახლავს ამ ჩვევებს და რა უნდა გაკეთდეს იმისთვის, რომ მოზარდი არ მიეჯაჭვოს ალკოჰოლს, ნარკოტიკს და ნიკოტინს.

კახეთი. 24 იანვარს თელავის დემოკრატიული ჩართულობის ცენტრში გაიმართა ღონისძიება სახელწოდებით „საქართველოში თამბაქოსაგან თავისუფალი გარემოს კანონის მხარდასაჭერი კამპანია”. კამპანია არასამთავრობო ორგანიზაცია ველფეარ ფაუნდეიშენმა, საქართველოში თამბაქოს კონტროლის ჩარჩო კონვენციის (FCTC) იმპლემენტაციის და მონიტორინგის ცენტრმა და  თამბაქოს კონტროლის ალიანსმა მოაწყო. აკაკი ჯიყაშვილი, სტუდენტი: ,,მსგავსი კამპანიები აუცილებელია და წელიწადში რამდენჯერმე უნდა ტარდებოდეს. მე თამბაქოს მომხმარებელი ვიყავი და ბევრს ვეწეოდი, თუმცა საჭირო ინფორმაციის მიღების შემდეგ ნელ–ნელა გადავეჩვიე და ახლა საერთოდ აღარ ვეწევი სიგარეტს. სკოლის მოსწავლეები უფრო აქტიურად უნდა ჩართულები ასეთ აქციებში".

აჭარა. ბათუმის დემოკრატიული ჩართულობის ცენტრში, საინიციატივო ჯგუფმა - „BATUMI REPRESENTS" – გამართა კონფერენცია თემაზე - ახალგაზრდები და ნარკოდამოკიდებულება. შეხვედრაზე ასევე ისაუბრეს ფსიქოტროპული პრეპარატების მიღება-გავრცელების პრობლემაზეც. როგორც, კონფერენციის ორგანიზატორები განაცხადეს მსურველებს, ფსიქოტროფიულ პრეპარატებზე, აფთიაქებში შეზღუდვისა და ექიმის დანიშნულების გარეშე მიუწვდებათ ხელი. ერთ-ერთმა მომხსენებელმა აჭარის ჯანმრთელობისა და სოციალური დაცვის მინისტრის მოადგილემ, ლევან გორგილაძემ, დასმული პრობლემის გადასაწყვეტად ახალგაზრდებთან ერთად, სამინისტროს მხრიდან ქმედითი ნაბიჯების გადადგმის პირობა დადო. შეხვედრას ესწრებოდნენ სტუდენტები,მოსწავლეები, საზოგადოებრივი ორგანიზაციების და მედიის წარმომადგენლები. ასევე, ჯანდაცვის სამინისტროს წარმომადგენლები და ახალგაზრდა ხელოვანები, რომლებმაც შეხვედრის ბოლოს დამსწრე საზოგადოებას თანამედროვე პოეტების ლექსები წაუკითხეს და საკუთარი შემოქმედების, კერძოდ თექის ნამუშევრების გამოფინეს.

აჭარა. ხანდაზმულთა სოციალური ცენტრში პერიოდულად იმართება საინფორმაციო სემინარები, რომლებიც ხანდაზმულთათვის აქტუალურ თემებს ეხება. 21 იანვარს ჩატარებული სემინარის თემა ჯანმრთელი დაბერების საკითხებს ეხებოდა. სემინარზე საუბარი შეეხო იმ ფაქტორებს,, რომლებიც ხელს უწყობენ ადამიანების დღეგრძელობას: ცხოვრების ჯანსაღი წესი, ბალანსირებული კვება, ზომიერი ფიზიკური აქტივობა და სხვა. სრულად წყარო: ორგანიზაციის გვერდი სოციალურ ქსელში

აჭარა. 17 იანვარს, ბათუმის დეომკრატიული ჩართულობის ცენტრში, „ველფეარ ფაუნდეიშენმა" ადგილობრივ საზოგადოებრივ ორგანიზაციებთან და მედიის წარმომადგენლებთან გამართა საინფორმაციო შეხვედრა. რომელიც მიზნად ისახავდა თამბაქოს რეკლამირების შეზღუდვის მოთხოვნას და ლოკალურ დონეზე ამ კამპანიის წარმოებას. პროექტის ავტორების განცხადებით, თამბაქოს მოხმარების, როგორც პირდაპირი, ისე არაპირდაპირი რეკლამა უნდა შეიზღუდოს. ალიანსის ინიციატივით საქრთველოში უკვე დაიწყო პასიური მწეველების უფლებების ადვოკატირება. აღნიშნული კამპანიის წარმოება საჭიროა, რადგანაც მიუხედავად იმის, რომ კანონი არამწეველი ადამიანების უფლებების დასაცავად 2003 წელსაა მიღებული, ის დღემდე არ სრულდება. პროექტი დაფინანსებულია აღოსავლეთ-დასავლეთის მართვის ინსტიტუტის მიერ.

იმერეთი. ქუთაისის დემოკრატიული ჩართულობის ცენტრში, 16 იანვარს, არასამთავრობო ორგანიზაციამ „საქართველოში თამბაქოს კონტროლის ალიანსმა" ინფორმაციული შეხვედრა გამართა. შეხვედრაზე განხილეს თამბაქოს კონტროლის შესახებ კანონის აღსრულების საკითხები, თუ რას ნიშნავს  მეორადი მოწევა, როგორ უნდა დავიცვათ ადამიანები მეორადი კვამლისგან, ასევე საზოგადოების თავშეყრის ადგილებსა და ტრანსპორტში მოწევის აკრძალვის შესახებ კანონის აღსრულების საკითხები. „მზარდი სტატისტიკა გვაქვს – საქართველოში ახალგაზრდა გოგონებში თამბაქოს მოხმარება ბოლო 7 წლის განმავლობაში დაახლოებით ორნახევარჯერ გაიზარდა. დაახლოებით ყოველი მეოთხე ადამიანი იღუპება თამბაქოსგან გამოწვეული დაავადებებით. დღეს საქართველოს 40% თამბაქოს მომხმარებელია. ჩვენ დიდი ხნის განმავლობაში ვმუშაობდით ამ კუთხით. შევქმენით  საკანონმდებლო ბაზა, თუმცა ამ კანონის აღსრულების კუთხით სერიოზული წინააღმდეგობები გვაქვს. ამ შემთხვევაში კანონის აღსრულებას მნიშვნელოვნად უშლის ხელს თამბაქოს ინდუსტრია. სახელმწიფო ორგანოებს ევალებათ განახორციელონ თამბაქოს მოწევის აკრძალვის ადმინისტრირება. ჩვენი მოთხოვნაა, რომ არამხოლოდ პოლიციამ აკონტროლოს თამბაქოს მოხმარების წესები, არამედ ეს გადანაწილდეს სხვა ორგანიზაციებზეც. ჩვენი მოთხოვნაა ასევე თამბაქოს რეკლამის სრული აკრძალვა", განაცხადა  ორგანიზაციის „საქართველოში თამბაქოს კონტროლის ალიანსის" ხელმძღვანელმა გიორგი ბახტურიძემ.  შეხვედრაში მონაწილეობას სკოლიის მოსწავლეები, სტუდენტები და არასამთავრობო სექტორის წარმომადგენლები იღებდნენ. შეხვედრა ინტერაქტიულ რეჟიმში მიმდინარეობდა.

სამეგრელო. ზუგდიდში მოქმედმა არასამთავრობო ორგანიზაცია „თანაზიარმა" 20 დეკემბერს,  „ადამიანთა უსაფრთხოების პროექტის" პრეზენტაცია გამართა. პროექტს იაპონიის მთავრობა აფინანსებს. პროექტის წარდგენისთვის ზუგდიდს ეწვია იაპონიის ელჩის მოვალეობის შემსრულებელი საქართველოში, ჰიროკი ტოკუნაგა. „ზუგდიდის სამედიცინო ცენტრს შვიდი სახის სამედიცინო აღჭურვილობა გადაეცა. მოხარული ვარ გარემოებით რომ ადგილობრივ მოსახლეობას მიეცემა საშუალება, ისარგებლოს ხარისხიანი სამედიცინო დახმარებით. პირველი პროექტის ფარგლებში ჩვენი დახმარებით, დადიანების სასახლის საგამოფენო დარბაზი განახლდა", განაცხადა ჰიროკი ტოკუნაგამ.  იაპონიის საელჩოს მადლობა გადაუხადა ორგანიზაცია „თანაზიარის" ხელმძღვანელმა ხათუნა ბეჭვაიამ. მისი თქმით, 1 წლის განმავლობაში პროექტის ფარგლებში, სამედცინო ცენტრის მომსახურეობით უფასოდ ისარგებლებენ შეზღუდული შესაძლებლობის მქონე პირები, მრავალშვილიანი ოჯახები.

კახეთი. საზოგადოებრივი ორგანიზაცია ბემონი UNICEF-თან (გაეროს ბავშვთა ფონდი) ერთად ატარებს კვლევას, რომელიც მიმართულია მოზარდებსა და ახალგაზრდებში აივ ტესტირების პრაქტიკის შესწავლაზე.  კვლევის ფარგლებში შესწავლილი იქნება ახალგაზრდების შეხედულებები, მოსაზრებები და გამოცდილება აივ ტესტირებასთან დაკავშირებით. კითხვარი ანონიმურია. კვლევაში მონაწილეობის მიღება მსურველებს შეუძლიათ საკუთარი კომპიუტერიდან. გამოკითხვაში მონაწილეობა არ შეიცავს რისკებს. მსურველებს შეულიათ ნებისმიერ დროს შეწყვიტონ კითხვარის შევსება. დავით ღონღაძე, ,,ბემონის" თელავის ოფისის ხელმძღვანელი: ,,მიღებული პასუხები დაეხმარება მოზარდებისა და ახალგაზრდების აივ ტესტირებასთან დაკავშირებული პრობლემების უკეთ გაგებაში და იმ რეკომენდაციების შემუშავებაში, რომლებიც დაგვეხმარება მოზარდებსა და ახალგაზრდებზე მიმართული აივ ტესტირების მომსახურების გაუმჯობესებაში".

თბილისი. 1 დეკემბერს, შიდსთან ბრძოლის მსოფლიო დღისადმი მიღძვნილი ღონისძიების ფარგლებში თბილისში გაიმართება მარათონი „ჩვენ ვირჩევთ ცხოვრების ჯანსაღ წესს". მარათონში მონაწილეობას მიიღებენ როგორც 14 დან 18 წლამდე ასაკის  IX-XII კლასის მოსწავლეები, კოლეჯის სტუდენტები, ასევე საზოგადოებისთვის ცნობადი სახეები. მარათონი სტარტს აიღებს მერაბ ბერძენიშვილის საერთაშორისო კულტურის ცენტრიდან და დასრულდება ვაკის პარკის ტერიტორიაზე.  მარათონის მონაწილეთა  რეგისტრაცია დაიწყება 1 დეკემბერს, 11 საათზე, საერთაშორისო კულტურის ცენტრ "მუზას" ეზოში მარათონის 5 გამარჯვებული ფასიანი საჩუქრებით დაჯილდოვდება.  აღნიშნული ღონისძიება ტარდება აშშ–ს საერთაშორისო განვითარების სააგენტოს მიერ დაფინანსებული საქართველოში აივ პრევენციის პროექტის ფარგლებში. სრულად წყარო: geoyouth.ge

კახეთი. 8 ნოემბერს თელავში, დემოკრატიული ჩართულობის ცენტრში, გაიმართა კახეთის რეგიონში ანტინარკოტიკული მედიაკლუბის რიგით მეოთხე შეხვედრა. მედიაკლუბის მიზანია ერთმანეთთან  დაახლოვოს ამ მიმართულებით სხვადასხვა სფეროებში (მედიცინის მუშაკები, იურისტები, არასამთავრობო ორგანიზაციების წარმომადგენლები) მომუშავე სპეციალისტებისა და ჟურნალისტების თვალთახედვა, რათა უფრო ადექვატურად, კვალიფიციურად და ზუსტად მოხდეს აღნიშნული პრობლემების გაშუქება და საზოგადოებისთვის მიწოდება. დათო ღონღაძე, ორგანიზაცია „ბემონის" თელავის ოფისის ხელმძღვანელი: ,,დღევანდელ შეხვედრაზე მოხდა ანტინარკოტიკული პოლიტიკის განხილვა იმის გათვალისწინებით, რომ ქვეყანაში შეცვლილი პოლიტიკური სიტუაცია იძლევა კანონის მეტად დახვეწის იმედს, რაც თავის თავში გულისხმობს ერთის მხრივ მთლიანად საზოგადოების და მეორეს მხრივ მისი იმ ნაწილის ინტერესების გათვალისწინებას და შესაბამისობაში მოყვანას, რომლებსაც შეეხოთ ნარკოტიკების მოხმარების პრობლემა. თემის წარდგენა გააკეთეს საზოგადოებრივი გაერთიანება ბემონის ხელმძღვანელმა თამარ სირბილაძემ და თბილის ანტინარკოტიკული მედიაკლუბის სპიკერმა,  ნინო ბურჭულაძემ. 

კახეთი. 24-27 ოქტომბერს, ფონდ „ღია საზოგადოება-საქართველოს" ინიციატივითა და ორგანიზებით ჩატარდა ტრენინგი ჟურნალისტებისთვის ადამიანის უფლებებსა და ჯანდაცვაზე. ტრენინგში მონაწილეობა მიიღო ოცამდე ჟურნალისტმა სხვადასხვა მედიასაშუალებებიდან. სრულად წყარო: „ღია საზოგადოება-საქართველოს" გვერდი სოციალურ ქსელში 

შიდა ქართლი. 6 ოქტომბერს, საზოგადოება „ბილიკში" სამოქალაქო განათლებისა და პედაგოგთა გადამზადების პროგრამის (USAID / PH International) პარტნიორი სკოლების მოსწავლეებისთვის ჯანდაცვის საკითხებზე ტრენინგი ჩატარდა.  ტრენინგზე ყურადღება გამახვილდა ბავშვის ჯანმრთელობის დაცვის უფლებაზე, ასევე ისეთ თემებზე როგორიცაა ბავშვის უფლება, დაცული იყოს ძალადობისგან, მიიღოს ინფორმაცია და ა.შ. მონაწილეებმა ტრენინგზე ასევე მოისმინეს, თუ რა ეროვნული და საერთაშორისო სტანდარტები არეგულირებს აღნიშნულ საკითხებს.   ტრენინგს გორის და ხაშურის რაიონის სამოქალაქო კლუბების 30-მდე წევრი დაესწრო. შეხვედრები მსგავს საკითხებზე კვლავაც გაგრძელდება. სრულად  წყარო: ორგანიზაციის გვერდი სოციალურ ქსელში

აჭარა. 25 სექტემბერს, ბათუმის დემოკრატიული ჩართულობის ცენტრში, კოალიცია „ადამიანის უფლებათა დაცვა ჯანდაცვის სფეროში" ადვოკატთა ასოციაციის წევრებს შეხვდნენ. კოალიცია 8 არასამთავრობო ორგანიზაციის ბაზაზე შეიქმნა და მათი მთავარი მიზანია მედიცაციის გზით მოხდეს პაციენტისა და ექიმის სადავო ურთიერთობების დარეგულირება. შეხვედრაზე გაჟღერდა ადვოკატთა ქსელის შექმნის იდეა. ეს ადვოკატები სპეციფიკური მიმართულებით იმუშავებენ კერძოდ, ისინი კონსულტირებასა და ადვოკატირებას გაუწევენ ძირითადად ჯანდაცვის სფეროში შექმნილი პრობლემების მქონე ადამიანებს. ამ ადვოკატებს ჩაუტარდებათ ტრეინინგები მედიაციაში. პროექტი – „ადამიანის უფლებათა დაცვა ჯანდაცვის სფეროში მედიცაციის გზით" –ხორციელდება ფინდ ღია საზოგადოება საქართველოს ფინანსური მხარდაჭერით.

გურია.  9–13 სექტემბერს ლანჩხუთში გაიმართა ტრენინგი ასპინძის, ჩოხატაურის და ლანჩხუთის სასწრაფო დახმარების ექიმებისთვის. ტრენინგი პროექტის –  „ერთობლივი მუშაობა - თემების მზაობა კრიზისული სიტუაციებისთვის და საჯარო-სამაშველო სამსახურების დახმარება" – ფარგლებში მიმდინარეობს, რომელიც დაფინანსებულია პოლონეთის საგარეო საქმეთა სამინისტროს მიერ და ახორციელებს „კივიტას გეორგიკა" პოლონურ ორგანიზაცია „პოლონეთის საერთაშორისო დახმარების ცენტრთან" ერთად. ტრენინგი ჩაატარეს პოლონელმა ექსპერტებმა პოლონეთის კატასტროფების ცენტრიდან. ტრენინგის მიზანია ასწავლოს ექიმებს იმ აპარატურის გამოყენება, რომელიც პოლონეთმა საჩუქრად გადასცა მუნიციპალიტეტებს. სამივე მუნიციპალიტეტს გადეცა სხვადასხვა აპარატურა – დეფიბრილატორები, ლარინგოსკოპები და სპეციალური საკაცეები. მათი დამონტაჟება მოხდება მუნიციპალურ სასწრაფო დახმარების მანქანებზე. 

თბილისი. 7 სექტემბერს, გაეროს აივ/შიდსის ერთიანი პროგრამისა და საინფორმაციო-სამედიცინო ცენრტის „თანადგომის" ორგანიზებით შედგა სამუშაო შეხვედრა. შეხვედრის თემა იყო: „აივ ინფექცია, მასთან დაკავშირებული სტიგმა და დისკრიმინაცია და პრევენციის ახალი საჭიროებები ჰომოსექსუალური ურთიერთობების მქონე მამაკაცებთან მიმართებაში". შეხვედრაზე წარადგინეს პროექტის ფარგლებში განხორციელებული სტიგმასა და დისკრიმინაციასთან დაკავშირებული კვლევის შედეგები და რეკომენდაციები, ასევე შეთანხმდნენ სამუშაო ჯგუფის შექმნაზე, რომელიც შეიმუშავებს გზამკვლევს.  მოხსენებების და პრეზენტაციების შემდეგ გაიმართა დისკუსია სტრატეგიული გეგმის განხორციელების მიმდინარეობისა და 2014-2016 წლების ციკლის სავარაუდო პერსპექტივების შესახებ. სრულად წყარო: tanadgomaweb.ge

იმერეთი.  31 აგვისტოს, ზედოზირების შესახებ საზოგადოების ცნობიერების ამაღლების საერთაშორისო დღე აღინიშნა. ჯანმრთელობის უფლების განხორციელების ხელშეწყობის ცენტრმა „რუბიკონმა" მოქალაქეთა ჯგუფისთვის პრაქტიკული მეცადინეობა ჩაატარა თემაზე: „რა არის ზედოზირება და როგორ დავეხმაროთ ზედოზირებულს ექიმის მისვლამდე."  შეხვედრაზე „რუბიკონის" ხელმძღვანელმა რატი ასათიანმა ასევე ისაუბრა ზედოზირებით გამოწვეულ სიკვდილიანობის შემთხვევებსა და აღრიცხვიანობაზე.  ჯანმრთელობის უფლების განხორციელების ხელშეწყობის ცენტრ „რუბიკონში" აცხადებენ, რომ მსგავსი შეხვედრები მომავალშიც გაიმართება.

სამცხე–ჯავახეთი. 17 აგვისტოს, ახალციხის ახალგაზრდულმა ცენტრმა ახალციხის მუნიციპალიტეტის სკოლების მოსწავლეებისთვის აივ-შიდსის პრევენციაზე კონკურსი გამოაცხადა. კონკურსი გაიმართება  „ერთობლივი ადვოკატირება აივ-პრევენციისათვის ახალციხის მუნიციპალიტეტში" პროექტის ფარგლებში და მასში მონაწილეობის შესაძლებლობა აქვს  ახალციხის სკოლების მე-8 - მე-12 კლასის მოსწავლეებს.  საკონკურსო ნამუშევრებს ესეს, ნახატის, ან ვიდეო-რგოლის სახით, მონაწილეები 14 სექტემბრამდე წარმოადგენენ. ნამუშევარში უნდა იყოს გამოკვეთილი აივ-შიდსის პრობლემის იდენტიფიცირება და მისი ეფექტური გადაჭრის გზები. კონკურსში გამოვლენილი სამი გამარჯვებული დაჯილდოვდება ფასიანი საჩუქრებით.კონკურსი მიზნად ისახავს მოსწავლე-ახალგაზრდობის გააქტიურებას და მათი ინფორმირებულობის გაზრდას.

გურია. „ახალგაზრდა პედაგოგთა კავშირის" ბაზაზე არსებული ლიდერთა სკოლის მოსწავლეებმა გადაიღეს დოკუმენტური ფილმი  „ჩემი ექიმი მინდა გამოვიდე". იგი ასახავს მამიდის ოჯახთან ერთად მცხოვრები 5 წლის ბიჭის ამბავს. ფილმი ასახავს რამდენიმე პრობლემას, რომლის წინაშეც, გადაღების მომენტში, ოჯახი იდგა. კერძოდ, შეწყვეტილი ჰქონდათ სოციალური დახმარება, ბავშვი საჭიროებდა სასწრაფო ოპერაციას და ინვალიდობის სტატუსის დადგენას. ასევე ოჯახს უჭირდა ნათესაური შვილობილობის პროგრამაში ჩართვა. ლიდერთა სკოლის მოსწავლეები ჩართულნი არიან ოჯახის პრობლემების ადვოკატირების პროცესში. ამ დროისთვის ოჯახს მიენიჭა სარეიტინგო ქულა და სოციალურად დაუცველის პოლისი, რომელიც ითვალისწინებს ოპერაციის ხარჯებს. რაც შეეხება შვილობილობის პროგრამაში ჩართვას,  მამიდამ განმეორებითი განცხადებით  მიმართა ოზურგეთის სოციალური მომსახურების სააგენტოს და ელოდება გადაწყვეტილებას.

მცხეთა–მთიანეთი. 2012 წლის 3-5 აგვისტოს ყაზბეგში, სასტუმრო „რუმს ყაზბეგი" საქართველოს შრომის, ჯანმრთელობის და სოციალური დაცვის სამინისტროს სსიპ სამედიცინო მედიაციის სამსახურის თანამშრომლებისთვის გაიმართება 2 დღიანი სემინარი/ტრენინგი - სამედიცინო მედიაციის საკითხებზე, როგორც დავის გადაწყვეტის ალტერნატიულ საშუალებებზე. სემინარი/ტრენინგი იმართება „ღია საზოგადოება ფონდების" მიერ დაფინანსებული პროექტის „ადამიანის უფლებების დაცვა ჯანდაცვის სფეროში მედიაციის განვითარების ხელშეწყობის გზით" ფარგლებში, რომელსაც ახორციელებს კოალიცია " ადამიანის უფლებები ჯანმრთელობის დაცვის სფეროში." ტრენინგის ფარგლებში განხილული იქნება ჯანდაცვაში დავის გადაწყვეტის ალტერნატიული საშუალებების უპირატესობები და პერსპექტივები, მოქალაქეთა სარჩელების განხილვისა და რეაგირების პროცედურა. სემინარზე განხორციელდება სამედიცინო მედიაციის იმიტირებული პროცესების და პრაქტიკულ სავარჯიშოების განხილვა. ტრენინგის მიზანია, ჯანდაცვის სფეროში მედიაციის დამკვიდრების ხელშეწყობა, იმიტირებულ პროცესებზე პრაქტიკული სავარჯიშოების განხილვა და მედიაციის პროცესის უპირატესობების დაფიქსირება. წყარო: osgf>ge

თბილისი. 2010 წლის  იანვრიდან ივლისამდე საერთაშორისო ფონდმა „კურაციომ”,  ლონდონის ჰიგიენისა და ტროპიკული მედიცინის სკოლასთან და სხვა პარტნიორებთან ერთად, ჩაატარა კვლევა, რომელიც მიზნად ისახავდა გლობალური ფონდის აივ/შიდსის პროგრამების გავლენის შესწავლას საზოგადოებრივი ორგანიზაციების როლზე საქართველოში, ყირგიზეთსა და უკრაინაში. შესწავლის პროცესში ჩატარდა ნახევრად სტრუქტურირებული ჩაღრმავებული ინტერვიუები სამივე ქვეყანაში.  კვლევის ფარგლებში გამოკითხეს 49 სამოქალაქო საზოგადოებრივი ორგანიზაციის წარმომადგენელი და 22 გადაწყვეტილების მიმღები პირი. ფონდის ოფიციალურ ვებ–გვერდის მიხედვით, კვლევის შედეგებმა ცხადყო, რომ  გლობალური ფონდის მხარდაჭერის შედეგად უფრო ეფექტური გახდა სამოქალაქო საზოგადოებრივი ორგანიზაციების გავლენა აივ/შიდსთან და ნარკოტიკებთან დაკავშირებულ პოლიტიკაზე. თუმცა, რესპონდენტებმა ასევე აღნიშნეს, რომ გლობალური ფონდის მიერ ადვოკატირებისთვის გამოყოფილი დაფინანსება არასაკმარისი  და არაპირდაპირი იყო; გარდა ამისა,  ხშირად ჰქონდა ადგილი დაფინანსების შეწყვეტას. კვლევა განხორციელდა ღია საზოგადოების ფონდების მხარდაჭერით.  წყარო: www.curatiofoundation.org სრულად 

თბილისი.28 ივლისს, საქართველოში C ჰეპატიტის საერთაშორისო დღე აღინიშნა სლოგანით „მეც მიმკურნალე". ღონისძიებები საქართველოს სხვადასხვა ქალაქებში ზიანის შემცირების ქსელის ორგანიზებით  და ფონდ „ღია საზოგადოება საქართველოს", „მსოფლიო ექიმები - საფრანგეთის" და ევროკავშირის მხარდაჭერით ჩატარდა. საქართველოში 200 000 ადამიანი C ჰეპატიტით ცხოვრობს. ამ დაავადების მკურნალობა 20 000 ლარზე მეტი ღირს და პაციენტთა უმრავლესობას ამ თანხის გადახდა არ შეუძლია. ბევრი მათგანი 10 წელიწადზე მეტი ხნის წინ დაინფიცირდა და დღეს მათი მკურნალობა გადაუდებელ აუცილებლობას წარმოადგენს. მკურნალობის ხელმისაწვდომობის მოთხოვნით ორგანიზატორები თბილისში, პარლამენტის წინ შეიკრიბნენ.მოეწყო სიმბოლური გარბენი ბარიერებით, რომელშიც მონაწილეობა მიიღეს პაციენტებმა და სხვა აქტივისტებმა. გარბენის ფინიშთან მონაწილეები მკურნალობის მომლოდინეთა სიაზე ხელს აწერდნენ. ბარიერები გამოხატავს ხარჯის მატებას მკურნალობის პროცესში. ბარიერზე გადახტომა კი ხარჯის სიმბოლურად დაძლევას და ხელმისაწვდომობის გაზრდას ნიშნავს. წყარო: osgf.ge

თბილისი. 27 ივლისს, „საერთაშორისო გამჭვირვალობა – საქართველომ" გამოაქვეყნა რიგით მესამე ანგარიში საქართველოს ჯანმრთელობის დაცვის სექტორში არსებული მდგომარეობის შესახებ. პროექტი ფოკუსირებულია ფარმაცევტულ, სადაზღვევო და ჰოსპიტალურ სექტორებზე. ანგარიშში გაანალიზებულია ჯანმრთელობის დაზღვევის სახელმწიფო პროგრამები, ასევე, საქართველოს ჯანმრთელობის დაზღვევის სექტორში არსებული ვითარება.  ანგარიშში ნათქვამია, რომ კვლევის ძირითადი მიგნებები ეფუძნება 2008-2012 წლებში სადაზღვევო ბაზარზე მიმდინარე მოვლენების ღრმა ანალიზს;  სიღრმისეულ ინტერვიუებს, სტრუქტურირებულ ინტერვიუებსა და ვრცელ მიმოწერას ყველა აქტორთან რომელიც ჩართულია ამ პროცესში და  ასევე სადაზღვევო სოციოლოგიურ კვლევას, რომელიც 2012 წლის აპრილ-მაისში ჩატარდა. კვლევამ მოიცვა სახელმწიფო დაზღვევის პროგრამის 252 და კორპორატიული და ინდივიდუალური დაზღვევის პროგრამის 100 ბენეფიციარი, ასევე, საკონტროლო ჯგუფი, რომელიც 350 დაუზღვეველი რესპონდენტისგან შედგებოდა.  ანგარიში ასევე მოიცავს რეკომენდაციებს  საქართველოს მთავრობის, ეროვნული ბანკისა და მზღვეველებისთვის. პროექტი ხორციელდება ნიდერლანდების სამეფოს საელჩოს მხარდაჭერით. კვლევა