თბილისი. გაეროს ბავშვთა ფონდის მიერ შეზღუდული შესაძლებლობის მქონე ბავშვების აღზრდის ხარჯების შესახებ ჩატარებული კვლევის თანახმად, საზოგადოებაში შეზღუდული შესაძლებლობების მქონე ბავშვის თანასწორი მონაწილეობისათვის საჭირო საგნებისა და მომსახურებების საფასურის გადახდა საქართველოს ოჯახების უმეტესობას არ შეუძლია. სრულად... წყარო: www.unicef.org

კახეთი. ევროკავშირი (EU) და გაეროს განვითარების პროგრამა (UNDP) პროექტის „ადამიანის უფლებები ყველასათვის“ ფარგლებში „თემ ქედელთან“ თანამშრომლობით ხელს უწყობენ  შშმ პირების სოციალურ ინკლუზიას სიღნაღის მუნიციპალიტეტში პერსონალური ასისტენტის სერვისის განვითარებით.  „შეზღუდული შესაძლებლობის მქონე პირებისთვის მხარდამჭერი სერვისების არსებობა მათი უფლებების დაცვისა და დამოუკიდებელი ცხოვრების მთავარი წინაპირობაა. „თემ ქედელში“ გამართულ შეხვედრაზე სიღნაღისა და  კახეთის სხვა მუნიციპალიტეტების წარმომადგენლებმა იმსჯელეს შშმ პირებისთვის პერსონალური ასისტენტის სერვისის მნიშვნელობასა და მისი დანერგვის გზებზე“. სრულად... წყარო: ორგანიზაციის გვერდი სოციალურ ქსელში

თბილისი. კოალიციამ ინფორმაციის სანდოობისთვის მასშტაბური საინფორმაციო კამპანიის „ახლა“ პრეზენტაცია გამართა. „ევროკავშირის წევრობა საქართველოს მოსახლეობის ურყევ მისწრაფებად რჩება. კამპანია „ახლა“ წარმოაჩენს თუ რა მნიშვნელოვან სარგებელს მიიღებს თითოეული ოჯახი საქართველოს ევროკავშირში გაწევრებით. ის გვიჩვენებს მაგალითებს, თუ რამდენად სწრაფად და თვალსაჩინოდ შეიცვალა სოციალურ-ეკონომიკური მდგომარეობა უკეთესობისკენ იმ ქვეყნებში, რომლებიც ახლახან შეუერთდნენ ევროკავშირს. თუმცა, ამ სიკეთეების მისაღებად საჭიროა მოქმედება ახლა! კამპანიის პრეზენტაციაზე საზოგადოების სხვადასხვა სფეროს წარმომადგენლები, მუსიკოსები, მსახიობები, მეწარმეები, ექიმები, ჟურნალისტები, ერთი მიზნით შეიკრიბნენ -  აჩვენონ ევროპული მომავლისკენ საკუთარი მტკიცე და ურყევი არჩევანი და მოითხოვონ კანდიდატის სტატუსის მისაღებად საჭირო ქმედითი ნაბიჯები და რეფორმები ახლა.  ღონისძიების გამომსვლელები შეკრებილ აუდიტორიას ესაუბრნენ საქართველოს მისწრაფებაზე დაუახლოვდეს ევროპულ ოჯახს; იმ სიკეთეებზე, რასაც ქვეყანას ევროკავშირის წევრობა მოუტანს. პრეზენტაციაზე აუდიტორიამ პირველად ნახა კამპანიის ფარგლებში შექმნილი ახალი ვიდეო, რომელიც სხვადასხვა თაობის ადამიანებზე გვიყვება, თუ როგორ შეცვლის ევროკავშირში წევრობა მათ ცხოვრებას პენსიებისა და დასაქმების ზრდით, ასევე განათლების, აგრობიზნესის და მეცნიერების მხარდაჭერის გზით. რეზო კიკნაძის ჯაზბენდმა საქართველოს და ევროკავშირის ჰიმნებიც შეასრულა... კამპანია „ახლა“, როგორც სოციალურ ქსელებში, ასევე თბილისსა და საქართველოს სხვა ქალაქებში ბილბორდებზე, ავტობუსებსა და მეტროში ბანერების განთავსებით აპრილის თვიდან დაიწყო. მომდევნო თვეების განმავლობაში, ევროინტეგრაციის მხარდამჭერ არაერთ პარტნიორთან ერთად, კამპანია სხვადასხვა არხებისა და ღონისძიებების მეშვეობით საქართველოს მასშტაბით გაიშლება.  ახლა მოქმედების დროა! მოითხოვე რეფორმები დაპირებების ნაცვლად!“ კოალიციის ფეისბუქ გვერდი... წყარო: კოალიცია ინფორმაციის სანდოობისთვის

თბილისი. პარტნიორობა ადამიანის უფლებებისთვის (PHR) ცნობით, ორგანიზაციაში იურიდიული კონსულტაციის მიღების მიზნით, საქართველოს მოქალაქეების მიმართვიანობის მაგალითზე შეიძლება ითქვას, რომ შვილებისთვის ჯანმრთელობის სერვისების მისაღებად მიგრაცია ევროპის სხვადასხვა ქვეყნებში ქალების მძიმე არჩევანია. „ბოლო 3 წლის განმავლობაში, არაერთი სატელეფონო ზარი და შეტყობინება ყოფილა ლტოლვილის სტატუსის მინიჭებასთან დაკავშირებით. ისტორიები განსხვავებულია, თუმცა ინტერესი ერთი - ყველა შესაძლებლობის გამოყენება, რათა შვილებმა მიიღონ ის საჭირო ჯანმრთელობის სერვისები, რომელსაც საკუთარ ქვეყანაში ვერ იღებენ. ვრცლად იმის შესახებ, თუ კიდევ რატომ მიდიან ქალები შრომით მიგრაციაში, წაიკითხავთ  PHR-ის ადვოკატის, სოფიკო მენაბდიშვილის ბლოგპოსტში. სრულად... წყარო: phr.ge

თბილისი. პარტნიორობა ადამიანის უფლებებისთვის (PHR) დიდი ხანია მუშაობს შეზღუდული შესაძლებლობის მქონე ქალთა სექსუალურ და რეპროდუქციულ უფლებებზე.  სწორედ ამ თემაზე, ორგანიზაციის წარმომადგენლებმა, ანა თავხელიძემ და სოფიკო მენაბდიშვილმა, ჩაატარეს ტრენინგი ადვოკატებისთვის თემაზე: „შეზღუდული შესაძლებლობის მქონე ქალთა სექსუალური და რეპროდუქციული ჯანმრთელობის უფლებების შესახებ“. სრულად... წყარო: phr.ge

თბილისი. მსოფლიო იმუნიზაციის კვირეულის ფარგლებში, გაეროს ბავშვთა ფონდმა და საერთაშორისო სავაჭრო პალატამ გამართეს შეხვედრა ვაქცინაციის შესახებ, რომელსაც ალერგიისა და იმუნოლოგიის ცენტრის ექიმი, ბიძინა კულუმბეგოვი გაუძღვა. საუბარი შეეხო ვაქცინაციის როლს ინფექციური დაავადებების გავრცელების პრევენციაში. სრულად... წყარო: ორგანიზაციის გვერდი სოციალურ ქსელში

სამეგრელო. ასოციაცია HERA XXI - ი გთავაზობთ ვიდეოების ციკლს საკუთარი საქმიანობის საზოგადოებისთვის გაცნობის მიზნით. ვიდეოში საუბრობს ანა აბულაძე, რომელიც სამეგრელო ზემო-სვანეთის სათემო მუშაკია. ის ზრუნავს რეგიონის მკვიდრი მოსახლეობის ინფორმირებაზე, სექსუალური და რეპროდუქციული ჯანმრთელობის შესახებ. მუშაობს ძალადობის მსხვერპლ ქალებთან, შშმ პირებთან, კონფლიქტის შედეგად დაზარალებულ და ე.წ საზღვრისპირა სოფლების მცხოვრებლებთან. სამეგრელოსა და ოკუპირებული აფხაზეთის რეგიონში HERA XXI-ის მუშაობა შესაძლებელი გახდა ევროკავშირის ქვეყნებში არსებული ფონდების ფინანსური მხარდაჭერით. სრულად... წყარო: ორგანიზაციის გვერდი სოციალურ ქსელში

თბილისი. Grlz Wave გიზიარებთ ინფორმაციას მშობიარობის შემდგომი დეპრესიის შესახებ. „შვილის დაბადება მშობლის ცხოვრებაში ერთ-ერთი ყველაზე მნიშვნელოვანი ცვლილებაა. როცა ახალ რეალობაში იღვიძებ, რთულია ყველაფრის ერთად გაცნობიერება. იზოლირებული ხარ, ბევრ რამეს აკლდები, ეს კი დედებისთვის შესაძლოა, საკმაოდ მძიმედ მისაღები აღმოჩნდეს. გლობალურად, 5-დან ერთი დედა განიცდის მშობიარობის შემდგომ დეპრესიას, დეპრესიის დაწყების დრო და ხანგრძლივობა ინდივიდუალურია, რადგან შესაძლებელია დეპრესია ორსულობის პერიოდშიც გამოვლინდეს. ... იმისთვის, რომ დედამ მშობიარობის შემდგომ თავი კარგად იგრძნოს, მნიშვნელოვანია ირგვლივ მყოფთა ემოციური მხარდაჭერა. არ უნდა ვუთხრათ: „არ არის ამის დრო, ბავშვს ახლა დედის ზრუნვა სჭირდება” - დედამ ეს ისედაც იცის, უბრალოდ იმ მომენტში მნიშვნელოვანია გვერდით დავუდგეთ და ავუხსნათ, რომ ბავშვის კარგად ყოფნისთვის, პირველ რიგში დედის კარგად ყოფნაა აუცილებელი. თუ ორსული ან ახალნამშობიარები აღმოაჩენ, რომ ხასიათი შეგეცვალა, უიმედოდ გრძნობ თავს და სულ ტირილი გინდა, ეს ნიშანია იმისა, რომ გჭირდება თვითზრუნვა და სტრესისგან გათავისუფლება“. სრულად... წყარო: ორგანიზაციის გვერდი სოციალურ ქსელში

თბილისი. შეზღუდული შესაძლებლობის მქონე პირები და  მათ საკითხებზე მომუშავე ორგანიზაციები საერთო განცხადებას ავრცელებენ. „აქონდროპლაზიის მქონე ბავშვები კარგად იაზრებენ იმ რეალობას, რომლის წინაშეც დგანან, ხედავენ საკუთარი მშობლების ბრძოლასა და დარდს, რაც ფსიქოლოგიურ ზიანს აყენებს ბავშვებს; მათ იციან, რომ არსებობს რეალური მედიკამენტი, რაც მათ ცხოვრებას რადიკალურად შეცვლის, და უწევთ მოლოდინსა და შიშში ყოფნა, მშობლების განცდების გაზიარებასთან ერთად, მათი პირადი შეგრძნებები და ემოციები არ უნდა იყოს უგულებელყოფილი. სახელმწიფო ვალდებულია უზრუნველყოს ჯანდაცვის ხელმისაწვდომობა და იმოქმედოს ბავშვის საუკეთესო ინტერესებიდან გამომდინარე. სამკურნალო პრეპარატს Voxzogo Vosorotide 2021 წელს „ამერიკის წამლისა და საკვების ადმინისტრაციამ“ (FDA) მიანიჭა ავტორიზაცია, რაც მის უსაფრთხოებასა და ეფექტურობას ადასტურებს. ამავე წელს მედიკამენტი შეაფასა და ავტორიზაცია მიანიჭა „ევროპის მედიცინის სააგენტომ“ (EMA). ამ ორი ყველაზე ავტორიტეტული ინსტიტუტის მიერ ავტორიზაციის მინიჭება, ცალსახად მეტყველებს მედიკამენტის უსაფრთხოებასა და ეფექტურობაზე. ცხადია, ყველა მედიკამენტის გამოყენებას სჭირდება შესაბამისი მართვა და ყველას აქვს გვერდითი ეფექტები, რაც სათანადო მართვის პირობებში უნდა დარეგულირდეს - ეს არ გახდეს მედიკამენტის შემოტანაზე უარის თქმის მიზეზი“, ნათქვამია განცხადებაში. სრულად... წყარო: socialjustice.org.ge

თბილისი. სოციალური სამართლიანობის ცენტრი ეხმაურება აქონდროპლაზიის მქონე ბავშვების ოჯახის წევრების რამდენიმეთვიან პროტესტს და საქართველოს მთავრობას მოუწოდებს, მიიღოს ყველა ღონისძიება არასრულწლოვნების სიცოცხლისა და ჯანმრთელობის გარანტირებისათვის. სახელმწიფომ უნდა გაიაზროს საკუთარი ვალდებულებები აქონდროპლაზიის მქონე ბავშვების მიმართ და: ინტენსიურად დაიწყოს მშობლებთან დიალოგი, ბავშვების საჭიროებებისა და გამოწვევების უკეთ იდენტიფიცირებისათვის; უმოკლეს ვადებში შეიმუშაოს და საზოგადოებასა და მშობლებს გააცნოს ზუსტი ხედვა (მათ შორის, საბიუჯეტო სახსრების გამოყოფის მიმართულებით) მედიკამენტის ქვეყანაში შემოტანასა და მასზე წვდომასთან დაკავშირებით; უმოკლეს ვადებში უზრუნველყოს მედიკამენტზე წვდომა, სულ მცირე, ყველაზე მწვავე საჭიროების მქონე ბავშვებისათვის. სრულად... წყარო: socialjustice.org.ge ფოტო: პუბლიკა

თბილისი. გაეროს ბავშვთა ფონდის ახალი ანგარიშის თანახმად, საქართველოში, ბოსნია-ჰერცეგოვინაში, მონტენეგროში, რუმინეთსა და უკრაინაში ყველაზე მაღალია იმ ბავშვთა წილი, რომლებიც არასრულად არიან აცრილნი. „კორონავირუსის დაწყების შემდეგ, ევროპასა და ცენტრალურ აზიაში დაახლოებით ერთი მილიონი ბავშვი დარჩა ერთი ან რამდენიმე რუტინული ვაქცინის გარეშე“. გაიგეთ მეტი... წყარო: www.unicef.org

თბილისი. „კავკასიური სახლი“ გთავაზობთ საჯარო შეხვედრების ციკლს ფსიქოგანათლების თემაზე. შეხვედრის პირველი თემაა - „ადამიანის ფსიქიკური კეთილდღეობა და მასთან დაკავშირებული გამოწვევები“. მომხსენებელი ლევან ანდრონიკაშვილი - ექიმი, ფსიქიატრი. შეხვედრის თემები: რას ნიშნავს ფსიქიკური ჯანმრთელობა და რატომ არის, რომ ხშირად ადამიანი საკუთარ ფსიქიკურ პრობლემებს ვერ აღიქვამს ჯანმრთელობის პრობლემად; რა სტიგმები არსებობს ფსიქიატრიასთან, როგორც სამედიცინო სფეროსთან მიმართებით ჩვენს საზოგადოებაში და როგორაა მათი გადალახვა შესაძლებელი; როგორ განვასხვავოთ ფსიქოლოგიური და ფსიქიკური პრობლემები ერთმანეთისგან; რომელი მიდგომებია დღეს დასავლურ საზოგადოებაში წამყვანი და როგორია ჩვენი რეალობა ფსიქიკური დაავადებებისა თუ ფსიქოლოგიური პრობლემების მკურნალობისას. დასწრების მსურველებმა, გთხოვთ, შეავსოთ სარეგისტრაციო ფორმა... სრულად... წყარო: ორგანიზაციის გვერდი სოციალურ ქსელში

თბილისი. გაეროს ბავშვთა ფონდი აქვეყნებს საინფორმაციო ბლოგპოსტს პანიკური შეტევის შესახებ. „პანიკური შეტევა არის შიშის და შფოთვის ძლიერი განცდა. ის ხშირად მაშინ გვემართება, როცა ვღელავთ ჩვენს ცხოვრებაში მიმდინარე მოვლენაზე, ან თუ სირთულესთან ან სტრესთან მოგვიწია გამკლავება. პანიკური შეტევები შეიძლება ძალიან საშიშად მოგვეჩვენოს, განსაკუთრებით ბავშვობაში, მაგრამ, როგორც წესი, სათანადო მკურნალობით მათი შეწყვეტა შესაძლებელია. მნიშვნელოვანია იცოდეთ, რომ პანიკური შეტევა არანაირ ზიანს არ გამოიწვევს და, თუნდაც შეტევის დროს ამას ვერ იჯერებდეთ, ეს შეგრძნება აუცილებლად დასრულდება“. სრულად... წყარო: www.unicef.org

გურია. ახალგაზრდა პედაგოგთა კავშირის ახალგაზრდული ცენტრის წევრებისა და „საზოგადოებრივი ჯანდაცვის ახალგაზრდული პროგრამის“ მონაწილეების ფასილიტაციით საზოგადოებრივი ჯანდაცვის შესახებ ტრენინგი ჩატარდა. „მონაწილეებმა მიიღეს ინფორმაცია საზოგადოებრივი ჯანდაცვის ბაზისურ საკითხებზე: გადამდები და არაგადამდები დაავადებების პრევენციის, ზოონოზური ინფექციების საფრთხეების, ბავშვთა ინფექციების, ვაქცინაციის, ჰიგიენის, დედათა და ბავშვთა ჯანმრთელობის, რეპროდუქციული ჯანმრთელობის, დამოკიდებულებების, თამბაქოს კონტროლის, ანტიმიკრობული რეზისტენტობის და სხვა საკითხების გარშემო“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ასოციაცია HERA XXI-მა ანიმაციური ვიდეორგოლების გავრცელება დაიწყო, რომლებიც მარტივად პასუხობენ მოზარდებისთვის საინტერესო კითხვებს. ვიდეორგოლები ხელმისაწვდომია ქართულ, სომხურ, აზერბაიჯანულ და ჟესტურ ენებზე. JAMnews-ი სტატიაში საუბარია არასრულწლოვნებისთვის სექსუალური განათლების მიღების აუცილებლობაზე და სტატიისთვის, ამ თემებზე HERA XXI-ის მიერ მომზადებული ვიდეორგოლებია დართული. სრულად... წყარო: jam-news.net

თბილისი. Grlz Wave ცრემლსადენი გაზით მოწამვლის ნიშნებსა და გრძელვადიან გვერდით ეფექტებზე წერს. „აქციის მონაწილეები, რომლებიც ცრემლსადენი გაზით მოიწამლნენ, დღემდე სხვადასხვა სიმპტომს ებრძვიან, რადგან ინტოქსიკაცია ხშირად იწვევს გრძელვადიან გვერდით ეფექტებს. მათ შორის,  თვალის შემთხვევაში: სიბრმავეს, ჰემორაგიას, ნერვის დაზიანებას, კატარაქტას, რქოვანას ეროზიას. რესპირატორული და კუჭ-ნაწლავის სისტემის დაზიანების დროს: ხველებას და სუნთქვის გაძნელებას, თავბრუსხვევას, დიარეას, გულმკერდის შებოჭილობასა და ტკივილს, ღებინებას. კანის დაზიანების შემთხვევაში: ქავილს, სიწითლესა და შეშუპებას, ალერგიულ დერმატიტს, ქიმიურ დამწვრობას.  თუ ცრემლსადენი გაზით ინტოქსიკაციის შემდეგ, სიმპტომების გამოვლენა გაგრძრელდა, აუცილებელია მიმართოთ სპეციალისტს“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში ფოტო: მარიამ გიუნაშვილი

თბილისი. პარტნიორობა ადამიანის უფლებებისთვის აქვეყნებს დოკუმენტს: სექსუალური და რეპროდუქციული ჯანმრთელობა ინტელექტუალური შეზღუდვის მქონე ქალებში და გოგონებში. „შშმ პირთა უფლებებზე და სერვისებში მომუშავე ორგანიზაციებმა ბოლო რამდენიმე წელია შეზღუდული შესაძლებლობის მქონე პირთა სექსუალურ განათლებაზე და სექსუალური და რეპროდუქციული ჯანმრთელობის უფლებებზე დაიწყეს საუბარი. ამის მიუხედავად,  ისეთი ჯგუფის წევრებს, როგორიცაა ინტელექტუალური შეზღუდული შესაძლებლობის მქონე პირები, საკმაოდ ბევრი ბარიერი ეღობებათ წინ. ხშირად, საქართველოში ადამიანს, რომელსაც ინტელექტუალური შეზღუდული შესაძლებლობა აქვს, ქცევის ფუნქციის შესწავლის გარეშე უნიშნავენ ფსიქოტროპულ მედიკამენტებს პუბერტატის ასაკში და არ ითვალისწინებენ მის სექსუალურ მოთხოვნილებებს და სურვილებს. ამის მიზეზი ინფორმაციის ნაკლებობა და არაკვალიფიციური კადრებია. არ ჩნდება შეკითხვა, ხომ არ შეიძლება ქცევა იყოს ასაკიდან გამომდინარე ჰორმონალური ცვლილებებით გამოწვეული, რომლის მართვაც მას უჭირს. ხშირად ამაზე არც კი ლაპარაკობენ და ექიმთან ან/და ფსიქოლოგთან მიმართვის ძირითადი მიზეზი უკვე არსებული ქცევაა (მაგალითად: საკუთარი თავის ან სხვისი დაზიანება, ნივთების დაზიანება ან სხვ).  ძირითადად,  ნევროლოგებს მიმართავენ, რადგან ქვეყანაში არ გვყავს სექსოლოგი, რომელსაც იშშმ პირებთან მუშაობის გამოცდილება აქვს.  მნიშვნელოვანია, მოზარდობის ასაკამდე ოჯახებს ჰქონდეთ ინფორმაცია, თუ როგორ უნდა ესაუბრონ სექსუალურ და რეპროდუქციულ ჯანმრთელობასთან დაკავშირებით იშშმ გოგონას, ასევე იცოდნენ, თუ ვის უნდა მიმართონ საჭირო დროს“. სრულად... წყარო: phr.ge

სამეგრელო. თუ თქვენ აივ ინფექციითა და С ჰეპატიტით ინფიცირების რისკი გქონდათ და არ შეგიძლიათ, ან არ გსურთ ტესტირების ჩატარება სამედიცინო თუ სხვა დაწესებულებაში, ასოციაცია „ქსენონი“ უსასყიდლოდ მოგაწვდით აივ/ინფექციისა და С ჰეპატიტის ნერწყვის სწრაფ ტესტებს. „თვითტესტების გამოყენებით თქვენ შეძლებთ სახლიდან გაუსვლელად, სპეციალისტის დახმარების გარეშე, გაიგოთ თქვენი აივ- ის და С ჰეპატიტის სტატუსი რამდენიმე წუთში“. დამატებითი ინფორმაციისთვის მისწერეთ ასოციაცია „ქსენონს“ ფეისბუქის გვერდზე. სრულად... წყარო: ორგანიზაციის გვერდი სოციალურ ქსელში

თბილისი. ხელმომწერი ორგანიზაციები, კიდევ ერთხელ ეხმიანებიან საქართველოს მესამე პრეზიდენტის, მიხეილ სააკაშვილის ჯანმრთელობის მდგომარეობის უკიდურესად დამძიმებას. „მოვუწოდებთ სასამართლოს, გაითვალისწინოს დარგის სპეციალისტთა დასკვნები და უმოკლეს ვადაში, მიიღოს ადამიანის უფლებების სტანდარტების შესაბამისი გადაწყვეტილება. ასევე, მოვუწოდებთ საერთაშორისო თანამეგობრობას, გამოიყენონ მათ ხელთ არსებული ყველა საშუალება, რათა თავიდან იქნას აცილებული ადამიანის სიცოცხლისა და ჯანმრთელობისთვის მიყენებული გამოუსწორებელი ზიანი და საქართველოს სახელმწიფოს პოლიტიკური კოლაფსი“, ნათქვამია ერთობლივ განცხადებაში. ვრცლად… წყარო: idfi.ge

თბილისი. სამოქალაქო საზოგადოების ორგანიზაციები, კიდევ ერთხელ ეხმიანებიან საქართველოს მესამე პრეზიდენტის, მიხეილ სააკაშვილის ჯანმრთელობის მდგომარეობის უკიდურესად დამძიმებას. „მიხეილ სააკაშვილის ჯანმრთელობის მდგომარეობის უკიდურესი გაუარესება ნათელია სამედიცინო დასკვნებიდან და ექსპერტთა ჩვენებებიდან. მისი ჯანმრთელობის კიდევ უფრო დამძიმება და შესაძლო ლეტალური შედეგის დადგომა, ადამიანის უფლებების უმძიმეს დარღვევას გამოიწვევს, რაც, თავის მხრივ, ქვეყნის რეპუტაციას გამოუსწორებელ ზიანს მიაყენებს. აქედან გამომდინარე, მოვუწოდებთ სასამართლოს, გაითვალისწინოს დარგის სპეციალისტთა დასკვნები და უმოკლეს ვადაში, მიიღოს ადამიანის უფლებების სტანდარტების შესაბამისი გადაწყვეტილება. ასევე, მოვუწოდებთ საერთაშორისო თანამეგობრობას, გამოიყენონ მათ ხელთ არსებული ყველა საშუალება, რათა თავიდან იქნას აცილებული ადამიანის სიცოცხლისა და ჯანმრთელობისთვის მიყენებული გამოუსწორებელი ზიანი და საქართველოს სახელმწიფოს პოლიტიკური კოლაფსი“, ნათქვამია ერთობლივ განცხადებაში. სრულად... წყარო: socialjustice.org.ge

თბილისი. კავკასიის გარემოსდაცვითი არასამთავრობო ორგანიზაციების ქსელის (CENN) ცნობით, თებერვალი შიმშილის აღმოფხვრის თვეა. 2022 წლის შიმშილის გლობალური ინდექსის თანახმად, საქართველო 22-ე ადგილზეა 121 ქვეყანას შორის და 5.7 ქულით შიმშილის დაბალი დონის ქვეყნებს შორისაა… მსოფლიოს, მათ შორის საქართველოს, ერთ-ერთი მთავარი მიზანია, რომ 2030 წლისთვის არავის შიოდეს. თქვენც შეგიძლიათ წვლილი შეიტანოთ ამ მიზნის მიღწევაში. მხარი დაუჭირეთ ადგილობრივი, უსაფრთხო და ჯანსაღი პროდუქტების წარმოებას. გადმოწერეთ კალენდარი და იხელმძღვანელეთ ყოველთვიური რჩევებით... შემოგვიერთდით ინსტაგრამზე და ჩაერთე კამპანიის ფარგლებში დაგეგმილ ყოველთვიურ სახალისო ქვიზებში... სრულად... წყარო: ორგანიზაციის გვერდი სოციალურ ქსელში

თბილისი. საქართველოს შემეცნებითი ცენტრი წარმოგიდგენთ ინტერვიუს „მხლენელთა საკითხავის“ ერთ-ერთ თანაავტორთან - ნათია გვინიაშვილთან, რომელიც დალხენისა და მლხენელობის კონცეფციას შესახებ საუბრობს.  ინტერვიუ მომზადდა პროექტის „დალხენის პრაქტიკების გავრცელების ხელშეწყობა ჯანსაღი სოციალური ტრანსფორმაციისთვის“ ფარგლებში, საქართველოს შემეცნებით ცენტრთან (CDC-Creative Development Center) თანამშრომლობით და ქალთა ფონდის  Women's Fund in Georgia) მხარდაჭერით. “ნათიას თქმით, დალხენა მისთვის სასიცოცხლოდ მნიშვნელოვანი რამეა. ეს არის ყველაფერი რასაც გაცნობიერებულად ვაკეთებ საკუთარი კეთილდღეობისთვის, ყველაფერს რასაც ვაკეთებ სხვისი კეთილდღეობისთვის და რასაც კოლექტიურად ვაკეთებთ ერთმანეთისთვის. ეს არის იმის აღიარება, რომ რეალობა, რომელშიც ვცხოვრობთ, მიმართულია სისტემური უსამართლობისა და ჩაგვრის შენარჩუნებისკენ და ამ პროცესში ჩვენგან მაქსიმალური რესურსის ამოღებისკენ. ეს სისტემა ჩვენ გვანადგურებს და გადარჩენისთვის არა მხოლოდ ინდივიდუალური, არამედ კოლექტიური ზრუნვა და დალხენაა საჭირო”. სრულად... წყარო: ccgeorgia.ge