თბილისი. კონრად ადენაუერის ფონდის ინიციატივით ქვეყნდება ბლოგების სერია „კორონას დღიურები“, რომელიც ასახავს კოვიდ 19-ის შემდეგ შეცვლილ რეალობასა და გამოწვევებს სხვადასხვა სექტორში. „გთავაზობთ პირველ ასეთ ბლოგს, რომელიც მოამზადა ექიმმა, საზოგადოებრივი ჯანდაცვის სპეციალისტმა ქეთავან ჩხატარაშვილმა. ბლოგში მიმოხილულია, თუ რა უნდა გააკეთოს სახელმწიფომ, რომ მიღწეული შედეგები შეინარჩუნოს კოვიდ 19-თან წინააღმდეგ ბრძოლაში“. სრულად... წყარო: ორგანიზაციის გვერდი სოციალურ ქსელში

თბილისი. გაეროს ქალთა ორგანიზაციის საქართველოს ოფისმა გადაწყვიტა, ის ქალები წარმოეჩინა, რომელთა წვლილსაც ვირუსზე რეაგირებაში განსაკუთრებული მნიშვნელობა ჰქონდა. ეჩვენებინა, რომ ყველაზე საპასუხისმგებლო მომენტში ისინი ადამიანების უსაფრთხოებასა და კეთილდღეობას ხშირად საკუთარი ჯანმრთელობის ფასად, გამბედავად იცავდნენ. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ინტერვიუს დოქტორობის კანდიდატთან, სოციალური პოლიტიკის მკლვევართან, ნინო ხელაისთან. „პანდემიამ კიდევ ერთხელ დაგვანახა, რომ საქართველოში მოქმედი ჯანდაცვის სფეროში საყურადღებო გარემოებას წარმოადგენს ის, რომ ჰოსპიტალური სექტორის მფლობელობის ფორმის 95%-ს წარმოადგენს კერძო მესაკუთრეობა. ამის პრობლემატიზება მანამდეც ხდებოდა, მაგრამ ეპიდემიამ უფრო თვალსაჩინო გახადა, რომ კრიზისის შემთხვევაში, შესაძლოა სახელმწიფო აღმოჩნდეს სიტუაციაში, როდესაც მას არ გააჩნია გადაყვეტილების მიღების არც უნარი და არც ბერკეტები“. სრულად... წყარო: emc.org.ge

აჭარა. თავისუფალი სივრცის ინფორმაციით, 8 ივნისიდან ორგანიზაცია „კოალიცია დამოუკიდებელი ცხოვრებისათვის“, ევროკავშირის მხარდაჭერით შშმ პირებისთვის, რომლებსაც Covid-19-ს რეგულაციების გამო საზოგადოებრივი ტრანსპორტით სარგებლობა არ შეუძლიათ ადაპტირებული ტრანსპორტით მომსახურებას უზრუნველყოფს. ტრანსპორტით სარგებლობა ხდება წინასწარ რეგისტრაციით. შეგიძლიათ დარეკოთ ნომერზე 591227883. სრულად... წყარო: თავისუფალი სივრცის გვერდი სოციალურ ქსელში

თბილისი. იაპონიის საელჩოს ინფორმაციით, იაპონიის მთავრობამ მიიღო გადაწყვეტილება საქართველოს აღმოუჩინოს მხარდაჭერა სამედიცინო დანადგარებით. „დეტალები დაზუსტდება ორმხრივი შეთანხმების შედეგად. ამჟამად მიმდინარეობს სამუშაო პროცესი იაპონიისა და საქართველოს მთავრობებს შორის რათა დროულად მოეწეროს ხელი ორმხრივ შეთანხმებას. იაპონიის მთავრობამ გადაწყვიტა საქართველოს აღმოუჩინოს სამედიცინო მხარდაჭერა მსოფლიოში ახალი კორონა ვირუსის გავრცელებისას, თუმცა ეს არა მხოლოდ COVID-19-ის წინააღმდეგ მიმართული ზომების აღმოფხვრას ემსახურება, არამედ ამით იაპონია მხარს უჭერს საქართველოს; საშუალო და გრძელვადიანი განვითარების თვალსაზრისით, იაპონიის მთავრობის მიზანია მხარი დაუჭიროს საქართველოს სოციალურ და ეკონომიკურ განვითარებას, ისევე როგორც სამედიცინო სისტემის გაძლიერებას“, ნათქვამია საელჩოს გვერდზე სოციალურ ქსელში. სრულად... წყარო: საელჩოს გვერდი სოციალურ ქსელში

თბილისი. საზოგადოებრივი ორგანიზაციები მთავრობას მოუწოდებენ დაეხმაროს სომხეთს კორონავირუსით გამოწვეული კრიზისის დაძლევაში. „ამ რთულ ვითარებაში მხარდაჭერის აღმოჩენა ჩვენი მეზობელი ხალხისთვის და ქვეყნებისთვის სომხეთთან კეთილმეზობლობის დადასტურება, ქვეყნებსა და მოქალაქეებს შორის მეგობრობაზე და სოლიდარობაზე დაფუძნებული თანამშრომლობისა და ურთიერთობების გაღრმავებისთვის კიდევ ერთი მნიშვნელოვანი წინ გადადგმული ნაბიჯი იქნება“, ნათქვამია ერთობლივ განცხადებაში.  სრულად... წყარო: emc.org.ge

თბილისი. გაეროს განვითარების პროგრამის (UNDP) ხელშეწყობით, დევნილთა, შრომის, ჯანმრთელობისა და სოციალური დაცვის სამინისტრომ შეიმუშავა და დაამტკიცა სახელმძღვანელოები და პროტოკოლები, რომლებიც ხელს შეუწყობს პაციენტების უსაფრთხო მართვას ფსიქიკური ჯანმრთელობის სტაციონარულ და სტაციონარგარეთა სერვისებში.  სრულად... წყარო: ორგანიზაციის გვერდი სოციალურ ქსელში

თბილისი. მაკლეინის ასოციაცია ბავშვებისთვის (MAC Georgia) აქვეყნებს რეკომენდაციებს ყურადღების დეფიციტისა და ჰიპერაქტივობის სინდრომის მქონე ბავშვებისთვის.  „ყურადღების დეფიციტისა და ჰიპერაქტივობის სინდრომი ნეირობილოგიური საფუძვლის მქონე დარღვევაა, რომელიც ბავშვების დაახლოებით 5%-ს აღენიშნება და ყურადღების დეფიციტით, იმპულსურობითა და ჰიპერაქტივობით ვლინდება, თუმცა გარკვეულ შემთხვევებში იგი ჰიპერაქტივობის გარეშეც შეიძლება შეგვხდეს“. შეამცირეთ მხედველობითი და სმენითი გამაღიზიანებლები ბავშვის ოთახში; სასურველია, ბავშვს ცალკე ოთახი ჰქონდეს სამეცადინოდ. თუ ეს ვერ ხერხდება, სულ მცირე სამუშაო კუთხე მაინც უნდა ჰქონდეს სათანადოდ მოწყობილი და უმჯობესია თუ მეცადინეობისას ოთახში სხვა ოჯახის წევრები არ იქნებიან; დაუყავით ბავშვს სასკოლო თუ სხვა სახის დავალებები და წაახალისეთ; ნუ მოსთხოვთ დავალების მაგიდასთან შესრულებას. მიეცით უფლება, იჯდეს დივანზე, პუფზე... თუ თქვენს შვილს სკამზე ჯდომა უჭირს, გამოიყენეთ დამხმარე საშუალებები, რომელიც მას საშუალებას მისცემს დავალების შესრულების პარალელურად სხვადასხვა აქტივობაც აკეთოს... სრულად... წყარო: ორგანიზაციის გვერდი სოციალურ ქსელში

თბილისი. გაეროს ბავშვთა ფონდის განცხადებით, ახალი კორონავირუსის პანდემიამ დიდი ზეგავლენა მოახდინა ბავშვებსა და მოზარდებზე, ყველაზე მეტად - მათ მოწყვლად ნაწილზე. ორგანიზაციას განსაკუთრებით აღელვებს იმ ბავშვების მდგომარეობა, რომელთაც ნაკლებად მიუწვდებათ ხელი ძირითად მომსახურებებსა და რესურსებზე. „კორონავირუსის სწრაფად გავრცელებისადმი განსაკუთრებით დაუცველნი არიან ისეთ ოჯახებში მცხოვრები ბავშვები, სადაც სივიწროვეა ან არ არის სათანადო პირობები - ხელსაბანი და სხვა სანიტარიული კვანძები და საშუალებები. გაეროს ბავშვთა ფონდის მრავალინდიკატორული კლასტერული კვლევის მიხედვით, საქართველოში 29 800 ბავშვს სახლში არ აქვს წყლითა და საპნით ხელის დაბანის პირობები. შესაბამისად, უფრო მაღალია ასეთი ბავშვების კორონავირუსით დაინფიცირების რისკი. მიმდინარე კრიზისის პერიოდში ყველა ბავშვმა უნდა განაგრძოს სწავლა და შეძლოს სკოლაში უსაფრთხოდ დაბრუნება. ელექტრონული ინსტრუმენტებისა და ინტერნეტის კავშირის, შინ სათანადო სასწავლო გარემოს და მშობლების მხარდაჭერის ნაკლებობის გამო ისედაც გარიყული ბავშვები ჩამორჩენის საფრთხის წინაშე იმყოფებიან“, ნათქვამია ორგანიზაციის ვებგვერდზე. სრულად... წყარო: www.unicef.org

თბილისი. 31 მაისს, 17:00 საათზე, ადიქტოლოგიის ცენტრი საგანმანათლებლო პლატფორმა Educator - თან თანამშრომლობით წარმოგიდგენთ ონლაინ ტრენინგს: მშობლის როლი მოზარდებში ფსიქოაქტიური ნივთიერებების მოხმარების პრევენციისთვის. ტრენინგის მიზანია მსმენელებს გააცნოს მოზარდებს შორის სხვადასხვა ნივთიერებების მოხმარების შემთხვევაში რა როლი აკისრია მშობელს, რამდენად მნიშვნელოვანია მათი მხარდაჭერა და ემპათია. ტრენერი: ნათია სტეფანიშვილი, ადიქციის კვლევების მაგისტრი, მკვლევარი და სოციალური მუშაკი, ადიქტოლოგიის ცენტრის დამფუძნებელი. ტრენინგი ჩატარდება ფეისბუქ ლაივის საშუალებით. სრულად... წყარო: ორგანიზაციის გვერდი სოციალურ ქსელში

თბილისი. მედია ჩექერი აქვეყნებს ვიდეოგზამკვლევს, რომელიც გასწავლით რას უნდა მიაქციოთ ყურადღება კორონავირუსის შესახებ მომზადებული მასალების გაცნობისას, იმისათვის, რომ დეზინფორმაციის მსხვერპლი არ გახდეთ. „გახსოვდეთ, არ ენდოთ ბრმად სამედიცინო რჩევებსა და შემოთავაზებულ პრეპარატებს, თუ წყაროს სანდოობაში დარწმუნებული არ ხართ. ვიდეო მომზადებულია EWMI Access-ის მხარდაჭერით.“ სრულად... წყარო: ორგანიზაციის გვერდი სოციალურ ქსელში

თბილისი. საქართველოს წითელი ჯვრის საზოგადოება აქვეყნებს რეკომენდაციებს ტუბერკულოზის მქონე პირებისთვის COVID-19 ეპიდემიის დროს. „არ შეწყვიტოთ ტუბერკულოზის მკურნალობა. იქონიეთ მჭიდრო და მუდმივი კონტაქტი თქვენს მკურნალ ექიმთან და შეასრულეთ მისი რეკომენდაციები. კოვიდ19-ით ინფიცირების შემთხვევაში სამედიცინო პერსონალს მიაწოდეთ ინფორმაცია ყველა სამკურნალო საშუალების შესახებ, რომელსაც ტუბერკულოზის მკურნალობისთვის იყენებთ და კოვიდ-19 ინფიცირების შესახებ აცნობეთ თქვენს მკურნალ ექიმს“. სრულად... წყარო: ორგანიზაციის გვერდი სოციალ ქსელში

თბილისი. გაეცანით კონსულტაციისა და ტრენინგის ცენტრის და ონლაინ გამოცემა „პუბლიკას“ ერთობლივ პროექტს - „Covid-19 და საზოგადოებრივი ინიციატივები“. „პუბლიკას ვებ-გვერდის მოცემულ სვეტში გაერთიანდება და გაშუქდება ყველა ის სოციალური მიმართულების საზოგადოებრივი ინიციატივა, რომელიც COVID 19 პანდემიის საპასუხოდ განხორციელდება. ორი საინტერესო ისტორია ამ ეტაპზე უკვე მომზადდა და სამომავლოდ ერთი სვეტის ქვეშ გაერთიანდება პროექტის ფარგლებში მომზადებული ყველა მასალა. თუ გაქვთ ინფორმაცია და გსურთ გაგვიზიაროთ სოციალური მიმართულებით სამოქალაქო ინიციატივების შესახებ, გთხოვთ მოგვწეროთ ჩვენ ან ონლაინ გამოცემა „პუბლიკას““. იხილეთ სტატიები „პუბლიკაზე“... წყარო: ორგანიზაციის გვერდზე სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი აქვეყნებს მარიამ გოშაძის ბლოგპოსტს: როდესაც სეკულარული დისკურსი წინ უსწრებს სეკულარულ პრაქტიკას: „კოვზმადიდებლები” და სეკულარული სახელმწიფო. „ჯანდაცვის მსოფლიო ორგანიზაცა გვაცნობებს, რომ ნერწყვი კორონა ვირუსის გავრცელების მთავარი წყაროა. შესაბამისად, საქართველოს მთავრობის მიერ დაწესებული შეზღუდვების სამიზნე თავიდანვე ადამიანებს შორის ახლო ურთიერთობების აღმოფხვრა იყო. ეპიდემოლოგების რეკომენდაციების მიუხედავად, საქართველოს ეკლესიამ ზიარება საერთო კოვზით გააგრძელა. პანდემიისას გამეფებული სამედიცინო ჟარგონის ფონზე, ეს გადაწყვეტილება საზოგადოების ნაწილმა „ბრმა რწმენას” მიაწერა და მასობრივი ინფიცირების მთავარ საფრთხედ შერაცხა“. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება „საზოგადოებრივი ჯანმრთელობის შესახებ“ კანონში დაგეგმილ ცვლილებებს და მიიჩნევს, რომ წარმოდგენილი კანონპროექტი ადამიანის უფლებების უხეში დარღვევის პირდაპირ და აშკარა რისკებს შეიცავს. „ინიციატივის კანონად ქცევა, აღმასრულებელი ხელისუფლების შესაბამის ორგანოებს ანიჭებს ორდინალურ ვითარებაში თითქმის იმავე ზომების გატარების უფლებას, რისი შესაძლებლობაც მას აქამდე მხოლოდ საგანგებო მდგომარეობის პირობებში ჰქონდა. საზოგადოებრივი ჯანმრთელობის შესახებ კანონის დღეს მოქმედ რედაქციას ბევრი ხარვეზი აქვს და ის ნამდვილად საჭიროებს გამოსწორებას, თუმცა არა აღმასრულებელი ხელისუფლების უკონტროლო ძალაუფლების საკანონმდებლო დონეზე განმტკიცების გზით. წარმოდგენილი ინიციატივა საგანგებო მდგოამრეობის ნორმალიზაციას ახდენს და ფაქტობრივად შეუზღუდავ ძალაუფლებას ანიჭებს აღმასრულებელ ხელისუფლებას, რადგან ზემოაღნიშნულ საკითხებზე გადაწყვეტილების მიღების პროცესზე მინიმალურ საპარლამენტო ან სასამართლო კონტროლსაც კი არ ითვალისწინებს კანონპროექტი“, ნათქვამია ორგანიზაციის განცხადებაში. სრულად... წყარო: emc.org.ge

სამოქალაქო საზოგადოების განვითარების ინიციატივის პროექტის ფარგლებში COVID 19-ის გავრცელების შეჩერების მიზნით საინტერესო საინფორმაციო კამპანია განხორციელდა. პური სპეციალური საინფორმაციო ეტიკეტებით გაიყიდა – ჯამში 173 760 პური. ასევე, ამ კამპანიის ფარგლებში, საქართველოს ათ რეგიონში მოსახლეობას 22.500 მრავალჯერადი ჩანთა გადაეცა, სადაც ასევე კოვიდ19-ის პრევენციული ღონისძიებების შესახებ, ასევე საზოგადოებრივი უსაფრთხოების მართვის ცენტრის-112, ჯანდაცვის სამინისტროს, დაავადებათა კონტროლის ეროვნული ცენტრის და მთავრობის ერთიანი ცხელი ხაზის შესახებ ინფორმაცია ქართულ, აზერბაიჯანულ და სომხურ ენებზეა დაბეჭდილი. ეს კამპანია „განათლების განვითარების და დასაქმების ცენტრმა” დაგეგმა პროექტის „სამოქალაქო საზოგადოების განვითარების ინიციატივის“ ფარგლებში, რომელიც ხორციელდება კონრად ადენაუერის ფონდის (KAS) მიერ სამოქალაქო საზოგადოების ინსტიტუტთან (CSI), კონსულტაციისა და ტრენინგის ცენტრთან (CTC), საქართველოს სტრატეგიული კვლევებისა და განვითარების ცენტრთან (CSRDG) და განათლების განვითარების და დასაქმების ცენტრთან (EDEC) თანამშრომლობით. პროექტს აფინანსებს ევროკავშირი (EU), ხოლო თანადამფინანსებელია კონრად ადენაუერის ფონდი (KAS).  სრულად კამპანიის შესახებ... წყარო: ევროკავშირის წარმომადგენლობა

თბილისი. EMC ეხმიანება ფსიქიატრიული და სახელმწიფო ზრუნვის დაწესებულებების ბენეფიციარების უმძიმესი უფლებადარღვევების შემთხვევებს და სახელმწიფო უწყებებს დეინსტიტუციონალიზაციის პროცესის დაუყოვნებლივ წარმართვისკენ, ხოლო მის დასრულებამდე ინსტიტუციების ბენეფიციარების უფლებებისა და უსაფრთხოების ეფექტიანი დაცვისკენ მოუწოდებს. სრულად... წყარო: emc.org.ge

თბილისი. საქართველოს ახალგაზრდა იურისტთა ასოციაციის ინფორმაციით, გარდაცვლილი პაციენტის მშობელმა სამედიცინო დაწესებულებას სასამართლო დავა მოუგო. „საქართველოს უზენაესმა სასამართლომ ძალაში დატოვა თბილისის სააპელაციო სასამართლოს გადაწყვეტილება, რომლითაც სამედიცინო დაწესებულებას პაციენტის მშობლის სასარგებლოდ მორალური ზიანის სახით 5000 ლარის, ხოლო მატერიალური ზიანისათვის 10 000 ლარის (დაკრძალვის ხარჯები) გადახდა დაეკისრა. მოსარჩელის ინტერესებს სასამართლოში საია იცავდა“. სრულად... წყარო: gyla.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: ანტივაქსერული მოძრაობა და რუსული პროპაგანდა. „საქართველოში ანტივაქსერული კამპანია დღესდღეისობით იმხელა მასშტაბებს ვერ აღწევს, როგორსაც აშშ-სა და ევროპაში, თუმცა ვაქცინების შესახებ კონსპირაციული თეორიები ვრცელდება და ამ კუთხით საქართველოშიც შეინიშნება რუსული კვალი. მაგალითად, 2019 წელს, გაზეთ „ასავალ-დასავალის“ 25 თებერვალი - 3 მარტის ნომერში გამოქვეყნდა ინტერვიუ Veterans Today-ს ქართული ბიუროს ხელმძღვანელთან ჯეფრი სილვერმანთან, რომელშიც იგი საუბრობს იმაზე, რომ ღორის გრიპისა და წითელას ვაქცინები იქმნება არა ევროპაში, არამედ საქართველოში, ამერიკულ ლუგარის ლაბორატორიაში“. სრულად... წყარო: idfi.ge

თბილისი. საქართველოს ახალგაზრდა იურისტთა ასოციაცია აქვეყნებს სტრატეგიული სამართალწარმოების იურისტის თამარ ონიანის ბლოგპოსტს: თავისუფალი პრესა, როგორც ვაქცინა. ბლოგპოსტი პრესის თავისუფლების დღეს ეძვნება და მასში დასმულია ისეთი მნიშვნელოვანი საკითხები, როგორიცაა პრესის დევნა, ცენზურა, ადამიანის უფლებების შეზღუდვა ობიექტური და სანდო ინფორმაციის მიღებაზე. „შეძლებდა თუ არა მსოფლიო ერთი ნაბიჯით წინ ყოფილიყო ვირუსთან ბრძოლაში, თუკი ვირუსის პირველწყაროს თავისუფალი პრესა ეყოლებოდა?! პანდემიის ყველაზე ადრეული დღეებიდან, როდესაც ჩინეთის მთავრობამ, ისევე, როგორც უკვე შემდგომ პერიოდში არაერთმა სახელმწიფომ, გვაჩვენა მაგალითი, თუ რა გავლენა აქვს ადამიანის თავისუფლებაზე, ადამიანის სიცოცხლესა და ჯანმრთელობაზე, პრესის დევნას, ჩაგვრას, შევიწროებას. დღევანდელი დღე შეხსენებაა ყველა სახელმწიფოს ხელისუფლებისა და ჩვენთვის, ადამიანებისთვის, რომ ჩვენი თავისუფლების მოპოვების გზაზე, სიტყვა - მთავარი იარაღია, ხოლო ჩვენი სათქმელი კიდევ იმ ადამიანების, ჟურნალისტების, რეპორტიორების მიერ გაღებული შრომის შედეგად ფორმირდება, რომლებიც, თავიანთი ყოველდღიური საქმიანობით ქმნიან „ვაქცინას“ ყველა იმ „ვირუსის“ წინააღმდეგ, რომელიც მიზანმიმართულია ადამიანის, არა მიზნად აღქმის, არამედ მისი საშუალებად ქცევისკენ. დღეს პრესის თავისუფლების დღეა, და ყველას, ვინც თავისუფლების ამ ქოლგის ქვეშ მოიაზრება, მადლობა უნდა ვუთხრათ! მადლობა.“ სრულად... წყარო: gyla.ge

თბილისი. მსოფლიოს ჯანდაცვის ორგანიზაციის ევროპის რეგიონალური ოფისის, ევროპის საბჭოს ადამიანის უფლებათა კომისრის, წამების საწინააღმდეგო კომიტეტის და გაეროს ნარკოტიკებისა და დანაშაულის წინააღმდეგ ბრძოლის ბიუროს რეკომენდაციით, თავისუფლების აღკვეთის დაწესებულების პოპულაციის შემცირება COVID-19-ის გავრცელების პრევენციის გზაზე ერთ-ერთი აუცილებელი და უფრო მეტიც, გარდაუვალი ნაბიჯია. „პენიტენციურმა სისტემამ ციხის ადმინისტრაციის, ჯანდაცვისა და იურიდიული სფეროების წარმომადგენლებთან ერთად წინასწარ უნდა შეიმუშავოს იმ პირთა წრის ჩამონათვალი, ვინც კრიზისის გამწვავების შემთხვევაში დატოვებს საპატიმროებს. რა თქმა უნდა, ყველა იმ პირმა, რომელიც მოხვდება წინასწარ განსაზღვრულ კატეგორიაში, უნდა გაიაროს შემოწმება, თუ რამდენად აკმაყოფილებს დაბალი რისკის მოთხოვნებს. პირები, რომლებიც დროებით ან სამუდამოდ დატოვებენ საპატიმროებს, არ უნდა შეიცავდნენ საფრთხეს საზოგადოებრივი უსაფრთხოებისთვის. ზემოაღნიშნული ნაბიჯი, როგორც სხვადასხვა ორგანიზაციებმა თუ კომიტეტებმა აღნიშნეს, არათუ საჭირო, არამედ გარდაუვალია ქვეყნებში, სადაც ციხეების გადატვირთულობის პრობლემა არსებობს“. სრულად... წყარო: idfi.ge

თბილისი. ინფორმაციის თავისუფლების განვითარების ინსტიტუტი აქვეყნებს ინფოგრაფიკას: კორონავირუსის გავრცელების პრევენცია და საინფორმაციო წყაროები. მასალა აღწერს კორონავირუსის პრევენციის მიზნით სახელმწიფოში მოქმედ წესებს, სახელმწიფოს მიერ საგანგებო მდგომარეობის ფარგლებში გააქტიურებულ სერვისებზე, განახლებული ინფორმაციის მიღების საშუალებებზე. საინფორმაციო ბროშურა მომზადებულია საქართველოს პარლამენტის მიერ, ევროკავშირისა (EU) და გაეროს განვითარების პროგრამის (UNDP) მხარდაჭერით და IDFI-სთან თანამშრომლობით. სრულად... წყარო: idfi.ge