თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება ტელეკომპანია ფორმულას ტელეწამყვანზე, ვახო სანაიაზე და მისი ოჯახის წევრებზე ძალადობრივი თავდასხმის ფაქტს. „მნიშვნელოვანია, რომ პოლიციის მიერ დაწყებული გამოძიება გაჭიანურების გარეშე წარიმართოს და მიმდინარე საქმეს სათანადო კვალიფიკაცია მიეცეს. მათ შორის, გამოძიებამ სათანადოდ შეისწავლოს სისხლის სამართლის კოდექსის 53 პრიმა მუხლის საფუძველზე (სასჯელის დამამძიმებელი გარემოებები) სავარაუდო სიძულვილის მოტივი, რომელიც ვახო სანაიას ჟურნალისტურ საქმიანობასა და მის გამოხატვას, შეხედულებებს უკავშირდება. ჩვენი აზრით, მსგავსი შემთხვევები პოლიტიკური გარემოს პოლარიზების, ოპონენტების და კრიტიკული მედიაორგანიზაციების და ჟურნალისტების მიმართ აგრესიული საჯარო რიტორიკის შედეგია, რომელიც ძალადობის და დაპირისპირების რისკებს მიკრო-სოციალურ დონეებზეც აჩენს და არაუსაფრთხო და მტრულ გარემოს ქმნის პოლიტიკური, სამოქალაქო და მედია აქტორებისთვის“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ეკონომიკური პოლიტიკის კვლევის ცენტრის პროექტის - POWER • Promoting Opportunities for Women's Economic Resilience მიზანია გამოიკვლიოს თუ რა საჭიროებები აქვთ დღეს ქალებს ბიზნესში. ასევე, პროექტის ფარგლებში ორგანიზაცია გთავაზობთ ღონისძიებებს, რომლებიც მოემსახურება ცოდნის და გამოცდილების გაზიარებას. „ჯგუფში ჩატარებული გამოკითხვის შედეგად, გამოიკვეთა ინტერესი ციფრული მარკეტინგის მიმართულებით, ჩვენ კი თქვენი მოთხოვნის შესაბამისად, გადავწყვიტეთ შემოგთავაზოთ დისტანციური შეხვედრა შემდეგ თემაზე: როგორ გავყიდოთ პროდუქცია სოციალური მედიით? შემოგვიერთდით ზუმში, 23 თებერვალს, 19:00 საათზე". ტრენინგი.  ტრენინგს გაუძღვება სოციალური მედიის მენეჯერი და ქოფირაითერი - თამარა კაჭახიძე“.  სრულად... წყარო: ორგანიზაციის გვერდი სოციალურ ქსელში

თბილისი. „უფლებები საქართველო“ „კვირას“ გადამღებ ჯგუფზე თავდასხმის ფაქტს ეხმიანება და მზადყოფნას გამოთქვამს სამართლებრივი დახმარება გაუწიოს დაზარალებულ პირებს. „საჯაროდ გავრცელებული ინფორმაციის თანახმად, მედიაჰოლდინგ „კვირას“ გადამღები ჯგუფის წევრებს რამდენიმე პირი თავს დაესხა და უკანონოდ ხელი შეუშალა პროფესიული საქმიანობის განხორციელებაში. (დეტალები...) „უფლებები საქართველო“ მოუწოდებს შინაგან საქმეთა სამინისტროს დროულად და ეფექტიანად გამოიძიოს მომხდარი ფაქტი“, ნათქვამია ორგანიზაციის ვებგვერდზე. სრულად... წყარო: rights.ge

თბილისი. კოალიცია „მედიის ადვოკატირებისთვის“ საქართველოს პარლამენტის თავმჯდომარეს ოფიციალური განმარტებისათვის მიმართავს. „9 თებერვალს ჩვენთვის ცნობილი გახდა რომ „მთავარი არხის“ წარმომადგენელს, მარიამ გეგუჩაძეს, უარი ეთქვა პარლამენტში შესვლაზე და შეეზღუდა ჟურნალისტური საქმიანობის უფლება. ჩვენი ინფორმაციით, პარლამენტის წარმომადგენელთა მხრიდან ზეპირი ფორმით უარის მიზეზად მარიამ გეგუჩაძის სამოქალაქო აქტივიზმი დასახელდა. მოვუწოდებთ საქართველოს პარლამენტის თავმჯდომარეს გააკეთოს საჯარო განმარტება შესაძლო დისკრიმინაციულ მოპყრობასთან დაკავშირებით და დაუყოვნებლივ შეუქმნას ჟურნალისტებს შესაბამისი სამუშაო გარემო პროფესიული მოვალეობის შესრულებისათვის“. სრულად... წყარო: gdi.ge

თბილისი. IDFI–ის ცნობით, ადამიანის უფლებათა ევროპულმა სასამართლომ 2021 წლის 21 იანვრის მნიშვნელოვანი გადაწყვეტილებით კიდევ ერთხელ დაადასტურა, რომ ჟურნალისტური საქმიანობის განხორციელებისას საჯარო ინტერესის შემცველ ინფორმაციაზე ხელმისაწვდომობის შეზღუდვა გამოხატვის თავისუფლებას არღვევს. „საქმე შეეხებოდა უკრაინის ყოფილი პრეზიდენტის - ვიქტორ იანუკოვიჩის მიერ სახელმწიფო ქონების შეძენასთან დაკავშირებული ინფორმაციის უკრაინელი ჟურნალისტისათვის გაცემას. დავის საგანს ასევე წარმოადგენდა საკონსტიტუციო სასამართლოს უარი, განმცხადებლისათვის მიეწოდებინა პარლამენტის წევრთა საკონსტიტუციო სარჩელის ასლი, რომლითაც 2012 წელს უკრაინაში მიღებული ენის პოლიტიკის შესახებ კანონი გასაჩივრდა. სასამართლოს უნდა ემსჯელა განმცხადებლისთვის ინფორმაციის მიწოდებაზე საჯარო ორგანოების უარი წარმოადგენდა თუ არა გამოხატვის თავისუფლებაში არამართლზომიერ ჩარევას. სასამართლომ ერთხმად დაადგინა გამოხატვის თავისუფლების დარღვევა. საქმეზე ორი ურთიერთსაწინააღმდეგო ინტერესის - პერსონალური ინფორმაციის დაცვასა და საჯარო ინფორმაციის ხელმისაწვდომობას შორის სამართლიანი ბალანსი ამ უკანასკნელის სასარგებლოდ დადგინდა“, ნათქვამია ორგანიზაციის ვებგვერდზე. სრულად... წყარო: idfi.ge

იმერეთი. PITA-ქუთაისის ახალგაზრდული ცენტრის წევრებმა ანა ჯავახაძემ და გიორგი ქავთარაძემ წყალტუბოს მუნიციპალიტეტის სოფელ ფარცხანაყანების და გეგუთის საჯარო სკოლის მოსწავლეებისთვის და პედაგოგებისთვის საინფორმაციო შეხვედრა გამართეს მედია წიგნიერებაზე. „შეხვედრის მიზანი იყო მონაწილეთა ცნობიერების ამაღლება სოციალური მედიის და ყალბი ინფორმაციის გავრცელების თავიდან აცილების საკითხებზე. შეხვედრაზე განიხილეს შემდეგი საკითხები: სოციალური მედია და ყალბი ინფორმაციის გავრცელების გამოწვევები; როგორ გადავამოწმოთ ვებ-გვერდები, წყაროები, პიროვნებები, ტროლები; როგორ გადავამოწმოთ ყალბი ფოტოები“. სრულად... წყარო: ორგანიზაციის გვერდი სოციალრუ ქსელში

იმერეთი. PITA-ქუთაისის ახალგაზრდული ცენტრის წევრმა ბაღდათის მუნიციპალიტეტის სოფელ ვარციხის საჯარო სკოლის მოსწავლეებისთვის გამართა საინფორმაციო შეხვედრა მედია წიგნიერებაზე.  შეხვედრა ორგანიზებულია ტოლერანტობის, სამოქალაქო ცნობიერებისა და ინტეგრაციის მხარდაჭერის პროგრამის (PITA) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) ფინანსური მხარდაჭერით. პროგრამის პარტნიორია განათლების განვითარების და დასაქმების ცენტრი (EDEC). სრულად... წყარო: ორგანიზაციის გვერდი სოციალურ ქსელში

თბილისი. „მითების დეტექტორი“ აქვეყნებს მარიამ დანგაძის ბლოგპოსტს: რა არის კორონავირუსი და შესაძლებელია თუ არა ანტიბიოტიკებით მისგან განკურნება. ბლოპოსტი ფბ მომხმარებლის Gocha Bakradze-ს მიერ გამოქვეყნებულ დეზინფორმაციას პასუხობს. მომხმარებლის მიერ გავრცელებული მცდარი ინფორმაციის თანახმად, კორონა ვირუსი არ არის ინფექცია, მისი გამომწვევი მიზეზი კი ბაქტერიაა და კოვიდისგან განკურნება ანთებისსაწინააღმდეგო, ე.წ. სისხლის გამათხელებლების გამოყენებით არის შესაძლებელი. ასევე, ფბ მომხმარებელი აღნიშნავს, რომ თითქოს კოვიდ 19-ით გარდაცვლილთა სხეულის აუტოპსია აკრძალულია. „გოჩა ბაქრაძის პოსტი რამდენიმე დეზინფორმაციას შეიცავს, რეალურად 1) Covid-19-ის ინფექციას იწვევს არა ბაქტერია, არამედ SARS-CoV-2-ის ვირუსი; 2) Covid-19-ით გარდაცვლილთა აუტოპსია აკრძალული არ არის; 3) ვინაიდან Covid-19 ვირუსის მიერაა გამოწვეული, მის წინააღმდეგ ანტიბიოტიკის გამოყენება არაეფექტიანი იქნება. რაც შეეხება ანტიანთებით და სისხლის გამათხელებელ საშუალებებს, ისინი კორონავირუსის მხოლოდ ზოგიერთი სიმპტომის პრევენციისა და მკურნალობის პროცესში გამოიყენება“, ნათქვამია მასალაში. სრულად... წყარო: mythdetector.ge

თბილისი. მედიის განვითარების კვლევა (MDF) კვლევა საქართველოს 4 რეგიონში ჩაატარა და მიგნებები ხელმისაწვდომია აქ... ორგანიზაცია უკვე მეორე კვლევას ატარებს, რომლის მიზანიც იმის შესწავლაა, თუ რა გავლენას ახდენს დეზინფორმაცია და კონსპირაციები საზოგადოებრივ აღქმებზე და რომელი ანეკდოტური მტკიცებულებებია ყველაზე მეტად გავრცელებული საზოგადოებაში. „ამასთანავე კვლევის მიზანი იყო, შეგვესწავლა საზოგადოების დამოკიდებულებები საგარეო პოლიტიკის ზოგიერთი საკითხისა და კორონავირუსის პანდემიისადმი, მათ შორის ვაქცინაციის საკითხებისადმი. კვლევა ეყრდნობა ანეკდოტური მტკიცებულების მეთოდს, რომელიც მეტწილად არაფორმალური გზით შეგროვებულ, პირად გამოცდილებაზე დაფუძნებულ მონაცემებს იყენებს“.  სრულად... წყარო: mdfgeorgia.ge

თბილისი. კოალიცია მედიის ადვოკატირებისთვის მორიგ განცხადებას ავრცელებს „კომუნიკაციების კომისიის მიერ უხამსობის რეგულირების მიზნით წამოწყებულ აქტივობებთან“ დაკავშირებით და მიჩნევს, რომ კომისია კანონის საწინააღმდეგოდ მოქმედებს.  „კატეგორიულად მიუღებელია კომისიის მცდელობა, შეითავსოს თვითრეგულირების ორგანოს ფუნქცია და ჩაერიოს მაუწყებლის შინაარსში, ვინაიდან მას ამის უფლებამოსილება არ გააჩნია. ასეთი ფაქტის დაშვებით სახეზე იქნება მედიის შინაარსობრივი კონტროლი, რაც სიტყვის თავისუფლების შეზღუდვის უმკაცრესი ფორმაა. საქართველოს კანონმდებლობასა და კონსტიტუციასთან შეუსაბამო პრაქტიკის დამკვიდრება წარმოადგენს ცენზურის პირდაპირ საფრთხეს“, - აცხადებს კოალიცია.  სრულად...  წყარო: gyla.ge/ge

თბილისი. საქართველოს პოლიტიკის ინსტიტუტის (GIP) ორგანიზებით, მემარჯვენე რადიკალური ჯგუფების მედია გაშუქების საკითხზე, 3 დოკუმენტური მასალის გარშემო, საჯარო ონლიან დისკუსია გაიმართა. დისკუსიაზე განხილული იქნა: Deutsche Welle-ს 2019 წლის დოკუმენტური ფილმი “მემარჯვენე პოპულისტები და ევროკავშირი”, BBC-ის მოკლე დოკუმენტურ ფილმი “Georgia’s rave revolution”, რადიო თავისუფლების მოკლე მედია სიუჟეტი “უნდა გვეშინოდეს, თუ არა თანამედროვე ფაშიზმის”. დისკუსიის მთავარი შეკითხვა შეეხებოდა იმას, თუ რამდენად შეუძლიათ ჟურნალისტებს შეინარჩუნონ ობიექტურობა მემარჯვენე რადიკალური ჯგუფების ნარატივებზე სიუჟეტების მომზადებისას და ზოგადად მათი გაშუქებისას. ასევე, თუ სად გადის ზღვარი მიუკერძოებელ მედია გაშუქებასა და რადიკალი მემარჯვენე ნარატივების წახალისებას შორის.  ღონისძიება გაიმართა საჯარო დისკუსიების სერიის, „ანტილიბერალური ტენდენციების ანალიზი საქართველოში“ ფარგლებში, რომელიც ხორციელდება ფონდი ღია საზოაგდოების (OSGF) დაფინანსებული პროექტით და მისი მიზანია საქართველოში მემარჯვენე რადიკალიზაციის გამომწვევი ფაქტორების გამოვლენა.  სრულად...  წყარო: osgf.ge

თბილისი. „ფაქტ ჩეკი“ ავრცელებს ინფორმაციას Pfizer-BioNTech-ის ვაქცინასთან დაკავშირებით გავრცელებული დეზინფორმაციის შესახებ. საუბარია საიტზე Geomediapress.ge, რომელის მიხედვით, Pfizer-BioNTech-ის ვაქცინა შეაჩერეს, რისი მიზეზიც გახდა ნორვეგიაში ჩატარებული ვაქცინაცია, რამაც 400-მდე ადამიანის სიკვდილი გამოიწვია.  „Pfizer-BioNTech-ის ოფიციალურ გვერდზე დაყრდნობით, Pfizer-BioNTech-ს ვაქცინაცია არც ერთ ქვეყანაში არ შეუჩერებია, მათ შორის არც სტატიაში ნახსენებ ნორვეგიაში. ყალბია ინფორმაციაც, რომ ვაქცინაციას ნორვეგიაში 400-მდე ადამიანის სიცოცხლე შეეწირა. რეალურად, დღეის მონაცემებით, ნორვეგიაში მოხუცთა საცხოვრებელში მყოფი ხანდაზმული პირების COVID-19-ის საწინააღმდეგო Pfizer-BioNTech ვაქცინის პირველი დოზით აცრიდან მცირე ხნის შემდეგ, 33 ადამიანი გარდაიცვალა. 2020 წლის 14 იანვრისთვის, ნორვეგიაში ოფიციალურად პირველად დაფიქსირდა ვაქცინის შემდგომ 23 გარდაცვალების შემთხვევა. 18 იანვრის მონაცემებით, ნორვეგიის საყოველთაო ჯანდაცვის ინსტიტუტს უკვე შესწავლილი და გამოქვეყნებული ჰქონდა 23 გარდაცვალების შემთხვევიდან 13-ის აუტოპსიის შედეგები, რომლის თანახმადაც, უშუალოდ ვაქცინასა და გარდაცვალებას შორის კავშირი ვერ დადგინდა. Geomediapress.ge-ის სტატია, 19 იანვარსაა გამოქვეყნებული, მას შემდეგ, რაც ნორვეგიის საყოველთაო ჯანდაცვის ინსტიტუტმა განაცხადა, რომ გარდაცვალებასა და ვაქცინას შორის კავშირი არ მტკიცდება“, - აცხადებს „ფაქტ ჩეკი“.  სრულად...  წყარო: ორგანიზაციის ვებგვერდი

თბილისი. საქართველოს ჟურნალისტური ეთიკის ქარტიისა და ევროპის საბჭოს თანამშრომლობით, "საქართველოს ჟურნალისტური ეთიკის ქარტიის პრინციპების განმარტება" მომზადდა.  წიგნში საუბარია - რა პრინციპების დაცვა მოეთხოვებათ ჟურნალისტებს მედიაპროდუქტზე მუშაობისას, როგორია შესწორების სტანდარტი მედიაში, როგორ უნდა გაიმიჯნოს სარედაქციო და სარეკლამო მასალები ერთმანეთისგან, რომელ ჟურნალისტურ მასალებში დაირღვა ქარტიის ძირითადი პრინციპები. სრულად...  წყარო: ორგანიზაციის ვებგვერდი

თბილისი. საქართველოს ჟურნალისტური ეთიკის ქარტია მოუწოდებს შინაგან საქმეთა სამინისტროს, გამოიძიოს on.ge-ს ჟურნალისტისთვის პროფესიულ საქმიანობაში ხელის შეშლის ფაქტი.  „2020 წლის 16 იანვარს, სამართალდამცავებმა, საპროტესტო აქციის გაშუქებისას, პროფესიული მოვალეობის შესრულებაში ხელი შეუშალეს ონლაინგამოცემა "on.ge-ს" ჟურნალისტს, ხატია ღოღობერიძეს. ეს ფაქტი ასახულია On.ge-ის ჟურნალისტისა და ტელეკომპანია მთავარი არხის მიერ გადაღებულ კადრებში, სადაც ჩანს როგორ ეცემა ძირს რეპორტიორი გადაღების პროცესში. კადრებში ისმის, რომ ჟურნალისტი რამდენჯერმე იმეორებს სიტყვებს: “რას აკეთებთ, ჟურნალისტი ვარ?!” - მიუხედავად ამისა, სამართალდამცავები მას უხეშად აწვებიან და აქცევენ. ჩვენი ინფორმაციით, საქმესთან დაკავშირებით ამ ეტაპზე გამოძიება დაწყებული არ არის“, - ვკითხულობთ ქარტიის მიერ გავრცელებულ განცხადებაშ, - „ჟურნალისტური ეთიკის ქარტია მოუწოდებს შინაგან საქმეთა სამინისტროს, დაიწყოს საქმის გამოძიება და გაატაროს პრევენციული ღონისძიებები, რათა სამართალდამცავებმა დაიცვან და უზრუნველყონ ჟურნალისტების უსაფრთხოება, შეუქმნან მათ ნორმალური სამუშაო პირობები“.  სრულად...   წყარო: ორგანიზაციის ვებგვერდი

თბილისი. COVID-19-ის წინააღმდეგ ვაქციანაციის ირგვლივ გავრცელებულ დეზინფორმაციას, ევროკავშირის წარმომადგენლობა საქართველოში ვრცელ სტატიას უძღვნის.  „ვაქცინაცია საზოგადოებრივი ჯანმრთელობის დაცვის სფეროში ერთ-ერთ ყველაზე მნიშვნელოვან მიღწევას წარმოადგენს. ის, რომ ჩვენ ისეთი დაავადებების შესახებ, როგორიცაა ყვავილი, ისტორიის წიგნებიდან და არა ახალი ამბებიდან ვიგებთ, სწორედ ვაქცინების დამსახურებაა, რომლებმაც ეს დაავადებები სრულად აღმოფხვრეს. თუმცა, პანდემიის დაწყებისთანავე გაჩნდა დიდი რაოდენობით დეზინფორმაცია და შეთქმულების თეორიები ვაქცინების შესახებ. „ვაქცინაციის შიში“ უკვე დიდი ხანია არსებობს საინფორმაციო სივრცეში, რომელსაც წარმატებით იყენებენ სხვადასხვა წარმომავლობის დეზინფორმაციის გამავრცელებლები“, - ვკითხულობთ სტატიაში, - „ისევე, როგორც ვაქცინებს შეუძლიათ ვირუსების, მათ შორის COVID-19-ის, წინააღმდეგ იმუნიტეტის გამომუშავება, ჩვენც შეგვიძლია შევიქმნათ იმუნიტეტი დეზინფორმაციის წინააღმდეგ“.  სრულად...   წყარო: ორგანიზაციის ვებგვერდი

თბილისი. საქართველოს ჟურნალისტური ეთიკის ქარტიის საბჭოს გადაწყვეტილებით, ტელეკომპანია ფორმულას გადაცემა „პოლიტმეტრის“ წამყვანმა, ვახო სანაიამ ქარტიის მეშვიდე (დისკრიმინაცია) პრინციპი დაარღვია.  მის წინააღმდეგ ქარტიას “საქართველოს პარაოლიმპიური კომიტეტმა”, გვანცა გოგსაძემ, კესო ქარდავამ და მარიამ ქრისტესიაშვილმა მომართეს. სადავო ჟურნალისტური პროდუქტი ტელეკომპანიის ეთერში, 2020 წლის 13 ნოემბერს გავიდა. განმცხადებელი განმარტავდა, რომ გადაცემაში მოწვეულმა სტუმარმა, შეზღუდული შესაძლებლობების მქონე პირები დისკრიმინაციულ კონტექსტში მოიხსენია, ჟურნალისტის მხრიდან კი, ამას არც მყისიერი გამოხმაურება და არც გამონათქვამისგან გამიჯვნა მოჰყოლია.  სრულად...   წყარო: ორგანიზაციის ვებგვერდი

თბილისი. ინფორმაციის თავისუფლების განვითარების ინსტიტუტის (IDFI) მიერ მედიაკრიტიკის კონტენტის ანალიზმა აჩვენა, რომ კრიტიკის უმეტესი ნაწილი მიემართება ისეთ მედიას, რომელსაც პლატფორმის ექსპერტები ხშირად „ოპოზიციურ” ან „პარტიულ” მედიას უწოდებენ. „ფეისბუქზე დასპონსორებული სტატიების უმეტესი ნაწილიც სწორედ ასეთ მედიაზე მოდის. გამოიკვეთა, რომ ზოგ შემთხვევაში პლატფორმაზე განთავსებული მასალა წინ უძღვის ან მოსდევს კომუნიკაციების ეროვნული კომისიისათვის მნიშვნელოვანი საკითხების გადაწყვეტის პროცესს, ან მათზე კომისიის პოზიციის დაფიქსირებას. როგორც წესი, ასეთ შემთხვევებში მედიაკრიტიკის ავტორებისა და კომისიის პოზიციები სრულ თანხვედრაშია“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. ევროკავშირის (EU) მიერ დაფინანსებული საარჩევნო მედიამონიტორინგი ხორციელდება გაეროს განვითარების პროგრამის (UNDP) მიერ სამ არასამთავრობო ორგანიზაციასთან თანამშრომლობით - საქართველოს ჟურნალისტური ეთიკის ქარტია, ინტერნიუს საქართველო და CRRC-საქართველო. მედიამონიტორინგი მოიცავს 43 მედია საშუალებას - 12 ტელევიზიას, 10 რადიოს, 8 გაზეთსა და 13 ონლაინ გამოცემას. „ტრადიციულ საარჩევნო მედიამონიტორინგთან ერთად, 2020 წლის კვლევა ასევე სწავლობს, თუ როგორ იყენებენ ქართული მედია-საშუალებები სოციალურ მედიას, კერძოდ ფეისბუკს, აუდიტორიასთან დასაკავშირებლად, და რა სახის მედია-კონტენტი ზიარდება ფეისბუკის გვერდებსა და ჯგუფებში, მათ შორის პოლიტიკური პარტიებისა და პოლიტიკოსების გვერდებზე“, ნათქვამია ორგანიზაციის ვებგვერდზე. სრულად... წყარო: www.ge.undp.org

შიდა ქართლი. 14 დეკემბერს, სასწავლო პროგრამის „ახალგაზრდები ცვლილებისთვის“ ფარგლებში ჩატარდა სემინარი მასმედიისა და პოლიტიკური ლანდშაფტის შესახებ, პოლიტიკურად აქტიური ახალგაზრდებისთვის ქ. გორიდან, რომელსაც უძღვებოდა გიორგი თარგამაძე, საქართველოს სტრატეგიული ანალიზის ცენტრის დამფუძნებელი. „პროექტის მიზანია ადგილობრივი აქტივისტებისა და არასამთავრობო ორგანიზაციების, მუნიციპალიტეტის თანამშრომლებისა და მედიის წარმომადგენლების ჩართვა აქტიურ დისკუსიაში“. სრულად... წყარო: ორგანიზაციის გევრდი სოციალურ ქსელში

ADAMI მედია პრიზი კულტურული მრავალფეროვნებისთვის აღმოსავლეთ ევროპაში 2020 წლის დაჯილდოების ცერემონიალს წარმოგიდგენთ. უყურეთ ღონისძიებას დღეს 19:00 საათზე საქართველოს საზოგადოებრივი მაუწყებლის ეთერში. ევროკავშირის ელჩი საქართველოში, კარლ ჰარცელი დაჯილდოების ცერემონიალის საპატიო სტუმარია და „გერმანიის ხმის“ გამარჯვებულ ნათია თოდუასთან ერთად მუსიკალურ ნომერსაც წარმოგიდგენთ. გაიგეთ მეტი...  წყარო: ევროკავშირის გვერდი სოციალურ ქსელში

თბილისი. კოალიცია „მედიის ადვოკატირებისათვის“ წევრი ორგანიზაციები ეხმიანებიან „მთავარი არხის“ დირექტორის და დამფუძნებლის, ნიკა გვარამიას განცხადებას, „რომ მას დაჭერით და ქონების ჩამორთმევით დაემუქრნენ“. „ჩვენ არაერთხელ გამოვთქვით საფუძვლიანი ეჭვი, რომ კრიტიკული მოსაზრებების გამო ნიკა გვარამიას მიმართ სისტემატურად ხდება სხვადასხვა სახის ზეწოლა მმართველი პარტიის წარმომადგენლების მხრიდან. ხელისუფლებისაგან დამოუკიდებელი მედიის მიმართ ხელისუფლების წარმომადგენლების მუდმივი კრიტიკის ფონზე, ვშიშობთ, ნიკა გვარამიას წინააღმდეგ დაწყებული სისხლის სამართლებრივი დევნის მიზანია „მთავარი არხის“ სარედაქციო პოლიტიკის ცვლილება. ეს პროცესი უარყოფითად აისახება „მთავარი არხის“ გუნდზე და ჟურნალისტების სამუშაო გარემოზე. კოალიცია „მედიის ადვოკატირებისათვის“ წევრი ორგანიზაციები გამოვხატავთ მხარდაჭერას ნიკა გვარამიასა და „მთავარი არხის“ მიმართ. მოვუწოდებთ საერთაშორისო პარტნიორებს, პოლიტიკურ დღის წესრიგში დააყენონ ჟურნალისტთა უსაფრთხოებისა და მედიის თავისუფლების საკითხები, დაიცვან „მთავარი არხის“ დირექტორი და დამფუძნებელი აშკარა საფრთხეებისა და პოლიტიკური დევნისაგან“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. 11 დეკემბრიდან 21 დეკემბრის ჩათვლით, საქართველოს გაეროს ასოციაციისა და USAID-ის #PITA პროგრამის ფარგლებში, იწყება ტრენერთა ტრენინგი პროგრამის მონაწილე ახალგაზრდებისთვის - „მედია წიგნიერებისა და კრიტიკული აზროვნების განვითარებისათვის“. სრულად... წყარო: ორგანიზაციის გვერდი სოციალურ ქსელში