თბილისი. საქართველოს ჟურნალისტური ეთიკის ქარტია რეკომენდაციებს აწვდის ჟურნალისტებს, რომლებიც კორონავირუსთან დაკავშირებულ საკითხებს აშუქებენ.  „26 თებერვალს, საქართველოში ოფიციალურად დაფიქსირდა კორონავირუსით ადამიანის დაინფიცირების პირველი ფაქტი. აღნიშნული შემთხვევა გუშინვე მოექცა მედიის ყურადღების ცენტრში. მსგავსი შემთხვევების გაშუქებისას, განსაკუთრებით მნიშვნელოვანია მედიის მიერ გავრცელებული ინფორმაცია იყოს ამომწურავი და ზუსტი“, - ვკითხულობთ ქარტიის მიერ გავრცელებულ განცხადებაში.  სრულად...  წყარო: https://www.qartia.ge

სამცხე-ჯავახეთი. „საერთაშორისო გამჭვირვალობა-საქართველოს“ მედია გუნდის წარმომადგენლებმა, 22-23 თებერვალს, ბორჯომში, სტუდენტებს ღია მონაცემების მოძიების შესახებ ტრენინგი ჩაუტარეს. „სტუდენტებმა ისწავლეს, როგორ გაუწიონ მონიტორინგი სახელმწიფო შესყიდვებს, მოიძიონ ბიზნესის მფლობელები, პოლიტიკური პარტიების შემომწირველები და ა.შ.“ სრულად... წყარო: ორგანიზაციის გვერდი სოციალურ ქსელში

თბილისი. საია მიიჩნევს, რომ აჭარის ტელევიზიის სარედაქციო პოლიტიკა შეცვლის საფრთხის წინაშე დგას. „2020 წლის 19 თებერვალს აჭარის საზოგადოებრივი მაუწყებლის მრჩეველთა საბჭომ მხარი დაუჭირა დირექტორის მიერ წარდგენილ საშტატო განრიგს, რომლის თანახმადაც გაუქმდა სამსახურების უფროსების მოადგილეების შტატები“, - ვკითხულობთ ორგანიზაციის განცხადებაში, - „აჭარის საზოგადოებრივ მაუწყებელში მიმდინარე პროცესები, მათ შორის საშტატო განრიგის შეცვლა, ამყარებს ეჭვებს, რომ ხორციელდება კონკრეტული პირების საინფორმაციო პოლიტიკისგან ჩამოშორება, ახალი თანამშრომლების მიღება და არხის სარედაქციო პოლიტიკის შეცვლა”. სრულად...  წყარო: https://gyla.ge

თბილისი. კოალიცია მედია ადვოკატირებისთვის აჭარის საზოგადოებრივ მაუწყებელში განვითარებულ პროცესებს აფასებს. „ჩვენ, კოალიცია „მედია ადვოკატირებისთვის“ წევრი, ორგანიზაციები აჭარის მაუწყებელში მიმდინარე პროცესებს კვლავაც საგანგაშოდ და საზოგადოებრივი მაუწყებლის იდეისათვის დამაზიანებლად მივიჩნევთ. ბოლო პერიოდში განვითარებულმა მოვლენებმა კიდევ ერთხელ დაადასტურა, რომ აჭარის მაუწყებელში წარმოქმნილი ხელოვნური კრიზისი პოლიტიკური ხასიათისაა და არ უნდა დარჩეს შიდა თუ საერთაშორისო საზოგადოების ყურადღების მიღმა“, - ნათქვამია კოალიციის მიერ გავრცელებულ განცხადებაში. სრულად...  წყარო: https://www.qartia.ge

თბილისი. ამ სათაურით, საქართველოს ჟურნალისტური ეთიკის ქარტია, ამ წუთებში, სასტუმრო „ბილტმორში“ კონფერენციას მართავს.  კონფერენცია საქართველოში ამერიკის შეერთებული შტატების საელჩოს ფინანსური მხარდაჭერით იმართება და მისი მიზანია გაანალიზდეს მაუწყებლების არსებული თვითრეგულირების სისტემის ხარვეზები, გამოწვევები და გზები; ის, თუ როგორ შეიძლება გახდეს მაუწყებელთა თვითრეგულირების მექანიზმები უფრო ეფექტური; მსჯელობის საგანი, ასევე, იქნებამაუწყებელთა ქცევის კოდექსში დაინტერესებული პირის ცნების გაფართოება.  სრულად...  წყარო: ორგანიზაციის ვებგვერდი

თბილისი. სსიპ „საზოგადოებრივი მაუწყებლის აჭარის ტელევიზიასა და რადიოში“ მიმდინარე მოვლენების გამო, საქართველოს სახალხო დამცველი შეშფოთებას გამოთქვამს. სახალხო დამცველის შეფასებით, ტელევიზიის ირგვლივ არსებული გარემოებები აჩენს ეჭვებს კრიტიკული მედიის სარედაქციო პოლიტიკის ცვლილების მცდელობის შესახებ. აღნიშნული განსაკუთრებით შემაშფოთებელია ხელისუფლებისგან დამოუკიდებელი ტელეკომპანიების მესაკუთრეებთან პირდაპირ თუ არაპირდაპირ დაკავშირებული სისხლისსამართლებრივი საქმეების წარმოების სიმრავლის გათვალისწინებით. სრულად...  წყარო: http://ombudsman.ge

თბილისი. პირველი მედია კონკურსი CSR-ის შესახებ, რომელიც საქართველოს სტრატეგიული კვლევებისა და განვითარების ცენტრის (CSDRG) მიერ დაფუძნდა უკვე მეორე წელია წარმატებით ტარდება. „მედია კონკურსის „ჟურნალისტები კორპორაციული სოციალური პასუხისმგებლობისათვის 2019”-ის გამარჯვებულთა ვინაობა ცნობილია. საუკეთესო სატელევიზიო სიუჟეტი - მანანა გიგინეიშვილი - პირველი არხი საუკეთესო რადიო გადაცემა, რუბრიკა ან სიუჟეტი - ნინო ხუგაშვილი რადიო იმედი Radio Imedi საუკეთესო სტატია - ქეით რუთ დეივისი Georgia Today საუკეთესო მულტიმედია პროექტი - ნინო ვართაპეტიანი ტელეკომპანია ბორჯომი საუკეთესო ბლოგი - მარიკა მჭედლიძე Forbes Georgia კონკურსი იმართება პროექტის „სამოქალაქო საზოგადოების განვითარების ინიციატივა” ფარგლებში, ევროკავშირისა და კონრად ადენაუერის ფონდის მხარდაჭერით”, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში მასმედია

თბილისი. ინფორმაციის თავისუფლების განვითარების ინსტიტუტმა (IDFI) „ღია მონაცემების სახელმძღვანელო“ მოამზადა. სახელმძღვანელოში წარმოდგენილის რჩევები, რომელიც, ცალკეულ ეტაპებზე, მონაცემებთან მუშაობისას გამოიყენება.  სახელმძღვანელო მომზადდა IDFI -ის პროექტის - სადამკვირვებლო ჯგუფების გაძლიერება მთავრობის ანგარიშვალდებულებისთვის - ფარგლებში. პროექტი დაფინანსებულია ვიშეგრადის საერთაშორისო ფონდის მიერ, ვიშეგრადის გრანტების პროგრამით, ჩეხეთის, უნგრეთის, პოლონეთისა და სლოვაკეთის მთავრობების თანა-დაფინანსებით. ფონდის მისიაა ცენტრალურ ევროპაში მდგრადი რეგიონული იდეების წახალისება.  სახელმძღვანელო  წყარო: https://idfi.ge

აჭარაში მოქმედი ექვსი არასამთავრობო ორგანიზაცია ერთობლივი განცხადებით ეხმიანება საზოგადოებრივი მაუწყებლის აჭარის ტელევიზიასა და რადიოში მიმდინარე მოვლენებს. სრულად... წყარო: batumelebi.netgazeti.ge

თბილისი. კოალიცია მედია ადვოკატირებისთვის აჭარის საზოგადოებრივ მაუწყებელში მიმდინარე პროცესების თაობაზე საერთაშორისო ორგანიზაციებს კიდევ ერთხელ მიმართავს. „მიგვაჩნია, რომ საზოგადოებრივი მაუწყებლის აჭარის ტელევიზიისა და რადიოში განვითარებული პროცესები საგანგაშოა. არსებობს რეალური საფრთხე ახალმა არჩეულმა მრჩეველთა საბჭომ და მათ მიერ დანიშნულმა მენეჯმენტმა შეცვალოს საშტატო ნუსხა და სარედაქციო პოლიტიკას ჩამოაშოროს თანამშრომელთა ნაწილი. ვფიქრობთ, რომ არსებული მდგომარეობა საგანგაშოა და მოიცავს როგორც მედიის თავისუფლების, ასევე ადამიანის უფლებების დარღვევის რისკებს. ჩვენ, კოალიციის წევრი ორგანიზაციები, ჩვენი კომპეტენციის ფარგლებში კვლავაც ჩავერთვებით და დავიცავთ საზოგადოებრივი მაუწყებლის იდეას, მეორეს მხრივ კი ჩვენ პარტნიორ საერთაშორისო ორგანიზაციებს ვთხოვთ გამოხატვის თავისუფლების გარანტიების შენარჩუნებაში დახმარებას“, ნათქვამია ერთობლივ განცხადებაში. სრულად... წყარო: gyla.ge

თბილისი. საერთაშორისო გამჭვირვალობა - საქართველოს ინფორმაციით, აჭარის ტელევიზიის სარედაქციო დამოუკიდებლობა საფრთხეშია. „აჭარის ტელევიზიის დირექტორის ბოლო პერიოდის განცხადებები, დაგეგმილი საკადრო ცვლილებები თუ თანამშრომლების წინააღმდეგ დაწყებული დისციპლინური წარმოება წამოადგენს მენეჯმენტის მხრიდან კრიტიკულად განწყობილ ჟურნალისტებზე ზეწოლასა და შევიწროებას. ტელევიზიაში მიმდინარე მოვლენები ადასტურებს ჩვენს შეშფოთებას, რომ მთელი ამ პროცესების რეალური მიზანი ხელისუფლების მხრიდან ტელევიზიის სარედაქციო პოლიტიკაზე სრული კონტროლის მოპოვებაა. „საერთაშორისო გამჭვირვალობა-საქართველო“ კიდევ ერთხელ უცხადებს სოლიდარობას აჭარის ტელევიზიის თანამშრომლებს, რომლებიც საკუთარი პროფესიული მოვალეობის შესასრულებლად იბრძვიან. მზად ვართ, საჭიროების შემთხვევაში, დავიცვათ მათი უფლებები და აღმოვუჩინოთ სამართლებრივი დახმარება“, ნათქვამია ორგანიზაციის გვერდზე.  სრულად... წყარო: www.transparency.ge

თბილისი. კოალიცია მედია ადოკატირებისათვის „TV პირველის“ გარშემო განვითარებულ პროცესებს საგანგაშოდ მიიჩნევს. „„TV პირველის“ ირგვლივ განვითარებული მოვლენები ერთ-ერთი საგანგაშო სიგნალია, რადგან ასევე კრიტიკული მდგომარეობაა სხვა დამოუკიდებელი მედიამენეჯერების და დამფუძნებლების საქმიანობის თავისუფლების შემთხვევებშიც. დამოუკიდებელი მედია ერთ - ერთი აუცილებელი და საიმედო ინსტრუმენტია დემოკრატიის განვითარებისათვის ნებისმიერ ქვეყანაში. ადამიანების უფლებების დაცვის გარანტიები მხოლოდ სიტყვის თავისუფლებით შეიძლება შენარჩუნდეს, ხელისუფლება კი ვალდებულია მოქალაქეებს და ორგანიზაციებს შეუქმნას თავისუფალი არსებობისთვის საჭირო ეს სასიცოცხლოდ მნიშვნელოვანი პირობა. განსაკუთრებული გამოწვევაა მედიის სარედაქციო დამოუკიდებლობის და ჟურნალისტების საქმიანობის თავისუფლების უზრუნველყოფა. ჩვენ კიდევ ერთხელ მოვუწოდებთ ხელისუფლებას სწრაფი და ობიექტური გამოძიებით შეაჩეროს მედიის თავისუფლებისათვის შექმნილი რისკები“, ნათქვამია განცხადებაში. სრულად... წყარო: gdi.ge

თბილისი. „მედია კოალიცია” ავრცელებს განცხადებას ნიკა გვარამიას მიმართ განხორციელებულ თავდასხმაზე. „ინციდენტის შედეგად ნიკა გვარამიამ სხეულის დაზიანება მიიღო, თუმცა ჩვენთვის ამ დრომდე უცნობია დაიკითხა თუ არა თვითმხილველი რომელიმე პირი და განხორციელდა თუ არა სხვა აუცილებელი საგამოძიებო მოქმედებები. აღნიშნულის გათვალისწინებით, კოალიცია მოუწოდებს სამართალდამცავ ორგანოებს, განახორციელონ დროული, სრულყოფილი, ეფექტური და მიუკერძოებელი გამოძიება ამ კონკრეტულ ინციდენტთან დაკავშირებით. კოალიცია ასევე მნიშვნელოვნად მიიჩნევს დამნაშავეთა დროულ გამოვლენასა და პასუხისმგებლობის დაკისრებას, რათა მოხდეს მომავალში მსგავსი ინციდენტების პრევენცია“, ნათქვამია ორგანიზაციის ვებგვერდზე. სრულად... წყარო: gyla.ge

25 იანვარს, ჩატარდა დისკუსია თემაზე: ყალბი ანგარიშები სოციალურ მედიაში და ანეკდოტური მტკიცებულებები საზოგადოებაში. „შეხვედრის მიზანი იყო ხელი შევუწყოთ ყალბი ინფორმაციისა და დეზინფორმაციის გავრცელების წინააღმდეგ ბრძოლას. შეხვედრა იმართება „თავისუფალ ჟურნალისტთა სახლის“ პროექტის „დემოკრატიული იდეებისა და ღირებულებების პოპულარიზაცია აჭარაში“ ფარგლებში. პროექტის მხარდამჭერია ფონდი „ეროვნული წვლილი დემოკრატიისთვის“ (NED)“, ნათქვამია ორგანიზაციი გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის (საია) განცხადებით, საქართველოს ჟურნალისტური ეთიკის ქარტიამ გასართობ გადაცემაში პირადი ცხოვრების ხელშეუხებლობის პრინციპის დარღვევა დაადგინა. „25 იანვარს ჟურნალისტური ეთიკის ქარტიამ სამაუწყებლო კომპანია „რუსთავი 2“-ის გადაცემაში „გვიანი SHOW" დისკრიმინაციისა და პირადი ცხოვრების ხელშეუხლებლობის პრინციპების დარღვევა დაადგინა. აღნიშნული საქმე პრეცედენტულია, ვინაიდან ქარტიამ პირველად იმსჯელა გასართობ გადაცემაში ფარული კამერის გამოყენებასა და მე-10 (პირადი ცხოვრების ხელშეუხებლობის) პრინციპის დარღვევაზე. განმცხადებლის ინტერესებს ახალგაზრდა იურისტთა ასოციაცია იცავდა“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. დაჯილდოების ოფიციალურ ცერემონიაზე ევროკავშირის წარმომადგენლობამ საქართველოში კონკურსის „ევროკავშირის პრიზი ჟურნალისტიკაში“ 2019 წლის გამარჯვებულები დააჯილდოვა 6 კატეგორიაში, რომელიც მოიცავდა ბეჭდურ, სამაუწყებლო, ელექტრონულ და ფოტო ჟურნალისტიკის მიმართულებებს. გამარჯვებულები:  ნინო თარხნიშვილი: საუკეთესო სტატია ბეჭდურ ან ელექტრონულ მედიაში ბესო გვენეტაძე: საუკეთესო სიუჟეტი სამაუწყებლო ან ელექტრონულ მედიაში გიორგი მგელაძე: საუკეთესო საგამოძიებო სტატია ან სიუჟეტი ბეჭდურ, ელექტრონულ ან სამაუწყებლო მედიაში ჯიმშერ რეხვიაშვილი: საუკეთესო ბლოგი/თვალსაზრისი/სვეტი ბეჭდურ ან ელექტრონულ მედიაში ლაშა ცერცვაძე: საუკეთესო ორიგინალური და ინოვაციური ნაშრომი ბეჭდურ, ელექტრონულ ან სამაუწყებლო მედიაში დათო ქორიძე: საუკეთესო დოკუმენტური ფოტო, რომელიც ევროკავშირის ფასეულობებს ასახავს მამუკა ყუფარაძე: ევროკავშირის სადამკვირვებლო მისიის სპეციალური პრიზი სამშვიდობო ჟურნალისტიკაში სრულად... წყარო: eeas.europa.eu

აჭარა. „თავისუფალ ჟურნალისტთა სახლის“ გუნდი აგრძელებს სტუდენტურ დისკუსიათა ციკლს. „17 იანვარს, ბათუმის №10 და 20 იანვარს,№25 საჯარო სკოლის მოსწავლეებს შევხვდით. დისკუსიაზე ანტიდასავლური პროპაგანდისა და დეზინფორმაციის შესახებ ვისაუბრეთ“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში მასმედია

თბილისი. სამოქალაქო საზოგადოების ინსტიტუტმა კონკურსში „ჟურნალისტები სოციალური ცვლილებებისთვის“ გამოავლინა გამარჯვებულები. კონკურსი კამპანიის „ეს ქვეყანა შენიას“ ნაწილია და მისი მიზანია საქართველოს მასშტაბით გამოავლინოს ჟურნალისტები საქართველოს მასშტაბით, რომლებიც რეგულარულად და კომპეტენტურად აშუქებდნენ სამოქალაქო საზოგადოების წინაშე არსებულ გამოწვევებს და განვითარების შესაძლებლობებს. საქართველო რეგიონებში მომუშავე ორგანიზაციებს საშუალება ჰქონდა შეერჩიათ თავიანთ რეგიონში მომუშავე საუკეთესო ჟურნალისტი და ასევე დაესახელებინა ცენტრალური მედიის ერთი წარმომადგენელი. სამოქალაქო საზოგადოების ინსტიტუტმა 17 იანვარს გამარჯვებულები დაასახელა: გურია - თამთა დოლიძე - ტელეკომპანია "გური", აჭარა - ირაკლი ყურუა - გადაცემა ჰეშთეგი, აჭარა TV, იმერეთი - თამუნა ქავთარაძე, მეგა TV , კახეთი - მარიამ მეგრელიშვილი - TV ,,თანამგზავრი'',  სამეგრელო-ზემო სვანეთი - ნანა ხუბუტია, live press, სამცხე – ჯავახეთი - რუსუდან გვარამაძე TV9,  ქვემო ქართლი - ეკატერინე ერაძე, მარნეული TV , შიდა ქართლი - ნინო ჩიბჩიური, ტელეკომპანია „თრიალეთი“ , რაჭა–ლეჩხუმი და ქვემო სვანეთი - მარინე სვანიძე, kvira.ge.  ცენტრალური - მიხეილ სესიაშვილი, მთავარი არხი,  CSI-ის სპეციალური პრიზი - ნეტგაზეთი. ეს არის კარგი შესაძლებლობა საზოგადოებრივი ორგანიზაციებისთვის, გამოხატონ მადლიერება და წაახალისონ მედიის ის წარმომადგენლები, რომლებიც სამოქალაქო საზოგადოების ცხოვრებას და საზოგადოებრივი ორგანიზაციების საქმიანობას აქტიურად აშუქებენ. კამპანია „ეს ქვეყანა შენია“ ემსახურება საქართველოში სამოქალაქო საზოგადოების გაძლიერებას, სამოქალაქო ღირებულებების, საზოგადოებრივი ორგანიზაციების საქმიანობის პოპულარიზაციასა და სამოქალაქო აქტივიზმის ხელშეწყობას. სამოქალაქო კამპანია „ეს ქვეყანა შენია“ მიმდინარებს „სამოქალაქო საზოგადოების განვითარების ინიციატივის“ ფარგლებში, რომელიც ხორციელდება კონრად ადენაუერის ფონდის (KAS) მიერ სამოქალაქო საზოგადოების ინსტიტუტთან (CSI), კონსულტაციის და ტრენინგის ცენტრთან (CTC), საქართველოს სტრატეგიული კვლევებისა და განვითარების ცენტრთან (CSRDG) და განათლების განვითარების და დასაქმების ცენტრთან (EDEC) თანამშრომლობით. პროექტს აფინანსებს ევროკავშირი და კონრად ადენაუერის ფონდი.

თბილისი. მედიის განვითარების ფონდი (MDF) აქვეყნებს კვლევას: ანეკდოტური მტკიცებულებების კვლევა. „ანეკდოტური მტკიცებულება, არაფორმალური გზით შეგროვებული მონაცემებია, რომლებიც მეტწილად პირად გამოცდილებას ეფუძნება. ანეკდოტურ მტკიცებულებებსა და მეცნიერულ მტკიცებულებებს შორის დიდი სხვაობაა. „წინამდებარე კვლევის მიზანი იყო შეგვესწავლა, თუ რა გავლენას ახდენს დეზინფორმაცია და კონსპირაციები საზოგადოებრივ აღქმებზე და რომელი ანეკდოტური მტკიცებულებებია გავრცელებული დასავლეთთან მიმართებით საზოგადოებაში. ამასთანავე, ჩვენი მიზანი იყო შეგვესწავლა საზოგადოების დამოკიდებულებები საგარეო პოლიტიკის ზოგიერთი საკითხისადმი“, ნათქვამია ორგანიზაციის გვერდზე სოციალურ ქსელში.  სრულად... წყარო: ორგანიზაციის გვერდი სოციალურ ქსელში

თბილისი. „კოალიცია მედიის ადვოკატირებისათვის“ მოუწოდებს ფინანსთა სამინისტროს შექმნას თანაბარი საგადასახადო პირობები მაუწყებლებისათვის და საბიუჯეტო დავალიანების დაფარვის პროცესი გახადოს გამჭვირვალე და სამართლიანი. „ტელეკომპანიების, TV პირველის, რუსთავი 2-ის, კავკასიის, ასევე რამდენიმე რეგიონული არხის ანგარიშებზე, საბიუჯეტო დავალიანების გადაუხდელობის გამო, შემოსავლების სამსახურმა საინკასო დავალება წარადგინა. მსგავს ავტომატურ სანქციას საქართველოს ხელისუფლება წლების განმავლობაში არ იყენებდა მსხვილი მაუწყებლების მიმართ“, - აღნიშნულია კოალიციის მიერ გავრცელებულ განცხადებაში. სრულად...  წყარო: https://www.qartia.ge

თბილისი. Mediacritic ge ახალი ვებ-პლატფორმაა, რომელიც დღეიდან პროფესიულ და კვალიფიციურ, მიუკერძოებელ მედიაკრიტიკას შესთავაზებს საზოგადოებას. ვებ-პლათფორმის შემქნელთა განცხადებით, ახალი ონლაინ-პლატფორმის მიზანია, ინფორმაციის კრიტიკული აღქმის და საბოლოო ჯამში, გააზრებული და ინფორმირებული არჩევანის ხელშეწყობა. მედიაკრიტიკის პლატფორმა კომუნიკაციების ეროვნული კომისიის მედიააკადემიამ მედიაწიგნიერების განვითარების ხელშეწყობის მიზნით შექმნა.  სრულად...  წყარო: http://media.ge

თბილისი. 21 დეკემბერს „თბილისი მარიოტში“, ქარტიის რიგით მეთერთმეტე საერთო კრებაზე, ჟურნალისტური ეთიკის ქარტიის პრიზის 2019 მფლობელები დსახელდნენ. ყოველწლიურად ქარტიის პრიზი რამდენიმე ნომინაციაში გაიცემა. წელს ქარტიის პრიზი ხუთ ჟურნალისტს გადაეცა: ვიდეორეპორტაჟი - ბესო გვენეტაძე, "ინდიგო"; მულტიმედია პროექტი - ლაშა ცერცვაძე, ინდიგო; სტატია ან ნარკვევი ბეჭდურ ან ონლაინ მედიაში -ლუკა პერტაია, "ნეტგაზეთი"; ჟურნალისტური გამოძიება - ნინო რამიშვილი, "სტუდია მონიტორი"; ბავშვთა საკითხები - ეკა ქევანიშვილი, "რადიო თავისუფლება".  საერთო კრებაზე საქართველოს ჟურნალისტური ეთიკის ქარტიის წევრებმა ქარტიის საბჭოს სამი ახალი წევრი აირჩიეს. საბჭოს წევრები გახდნენ: თბილისის კვოტით - ზვიად ქორიძე; რეგიონების კვოტით - ნინა ხელაძე და ნათია ზოიძე. სრულად...  წყარო: https://www.qartia.ge