თბილისი. საზოგადოებრივი ორგანიზაციები ეხმაურებიან აჭარის ტელევიზიის გარშემო განვითარებულ მოვლენებს.  „მიგვაჩნია, რომ მაუწყებლის სარედაქციო დამოუკიდებლობაში ჩარევა და სარედაქციო პოლიტიკის შეცვლა მნიშვნელოვან ზიანს მიაყენებს ქვეყანაში მედიის თავისუფლებასა და დემოკრატიულ განვითარებას. ჩვენ მხარს ვუჭერთ ჟურნალისტთა მოთხოვნას სარედაქციო დამოუკიდებლობის შენარჩუნებასთან დაკავშირებით და ყურადღებით ვაკვირდებით აჭარის ტელევიზიასა და რადიოს გარშემო მიმდინარე პროცესებს“, ნათქვამია ერთობლივ განცხადებაში.  სრულად... წყარო: www.transparency.ge

თბილისი. „საერთაშორისო - გამჭვირვალობა საქართველო“ ჟურნალისტების ნანუკა ჟორჟოლიანისა და ნოდარ მელაძის უფლებებს სასამართლოში დაიცავს. „გასაჩივრებულია ტელეკომპანია „რუსთავი 2“-ის გენერალური დირექტორის პაატა სალიას გადაწყვეტილება, რომლითაც ნანუკა ჟორჟოლიანი და ნოდარ მელაძე სამსახურებრივი მოვალეობის უხეში დარღვევის მოტივით უკანონოდ გაანთავისუფლეს ტელეკომპანიიდან. ჩვენი ორგანიზაციისათვის მნიშვნელოვანია ჟურნალისტები არ იდევნებოდნენ მათი პროფესიული საქმიანობის განხორციელებისას, მათ მიერ გამოთქმული მოსაზრებებისა თუ შეხედულებებისათვის. ასევე, შრომის კოდექსის დარღვევით არ ხდებოდეს მათი სამსახურიდან განთავისუფლება და საქართველოს კონსტიტუციით გარანტირებული უფლებების დარღვევა“, ნათქვამია ორგანიზაციის გვერდზე სოციალურ ქსელში.  სრულად... წყარო: ორგანიზაციის გვერდი სოციალურ ქსელში

თბილისი. აჭარის ტელევიზიისა და რადიოს დირექტორის კონკურსთან დაკავშირებით, საქართველოს ჟურნალისტური ეთიკის ქარტია განცხადებას ავრცელებს.  „მას შემდეგ, რაც მრჩეველთა საბჭომ იმპიჩმენტით თანამდებობიდან გაათავისუფლა დირექტორი, სამი კონკურსის გამართვის შემდეგ ვერ მოახერხა ახალი დირექტორის არჩევა და უკვე 5 თვეა მაუწყებელი ფაქტობრივად დირექტორის გარეშე ფუნქციონირებს, მეოთხედ გამოცხადებული კონკურსი კი სასამრთლოს განჩინებით შეჩერდა”, - ვკითხულობთ განცხადებაში, - „ქარტიის საბჭო იზიარებს ტელევიზიისა და რადიოს თანამშრომელთა ეჭვებსა და შიშს. გვსურს ხაზი გავუსვათ საზოგადოებრივი მაუწყებლის განსაკუთრებულ როლს და იმ მიუკერძოებელი სარედაქციო პოლიტიკის მნიშვნელობას, რითიც აჭარის ტელევიზია და რადიო გამოირჩევა. ამ მიუკერძოებლობის შენარჩუნება უნდა იყოს უპირველესი ამოცანა როგორც მრჩეველთა საბჭოსთვის, ისე ყველა იმ პირისთვის, ვისაც პირდაპირ, თუ ირიბად ზეგავლენა აქვს პროცესზე. შესაბამისად, უკიდურესად მნიშვნელოვანია თითოეული მათგანი პასუხისმგებლობით მოეკიდოს ყველა ქმედებას და გაიაზროს ის ზიანი, რაც შეიძლება მიადგეს საზოგადოებრივი მაუწყებლის აჭარის ტელევიზიასა და რადიოს, საბოლოოდ კი აუდიტორიას“.  სრულად...  წყარო: ორგანიზაციის ვებგვერდი

თბილისი. მედიის განვითარების ფონდმა გამოაქვეყნა ახალი კვლევა, „სიძულვილის ენა - 2018“. კვლევა 2018 წლის 1 იანვრიდან 31 დეკემბრის ჩათვლით მედია მონიტორინგის შედეგებს და ფოკუს ჯგუფების მონაცემებს ასახავს. კვლევის მიზანია მედიასა და საჯარო დისკურსში სიძულვილის ენის სხვადასხვა ფორმებისა და მათი წყაროების გამოვლენა, ასევე ძირითადი ტენდენციების ანალიზი. სრულად...  წყარო: ორგანიზაციის ვებგვერდი

თბილისი. მედიის განვითარების ფონდი (MDF) ერთწლიანი მედია მონიტორინგის შედეგების ანალიზს - სიძულვილის ენა, 2018 აქვეყნებს.  „დაკვირვების პერიოდში მონიტორინგის სუბიექტ მედია საშუალებებში 1 814 დისკრიმინაციული შინაარსის განცხადება გაშუქდა. ყველაზე დიდი წილი 44,1% ქსენოფობიაზე მოდის. ჰომოფობიური განცხადებები - 40,4%, რელიგიური ნიშნით დისკრიმინაცია - (8,5%) და სხვადასხვა ნიშნით სიძულვილის ენის გაღვივება -(4%). რასისტული შინაარსის განცხადებები - 3%-ია“, ნათქვამია ორგანიზაციის გვერდზე სოციალურ ქსელში.  სრულად... წყარო: ორგანიზაციის გვერდი სოციალურ ქსელში

თბილისი. საქართველოს ჟურნალისტური ეთიკის ქარტიის საბჭოს გადაწყვეტილებით, ონლაინ გამოცემა mcm.ge - ს რედაქტორმა ეკა გულუამ ქარტიის პირველი (სიზუსტე), მეშვიდე (დისკრიმინაცია) და მეთერთმეტე (ფაქტის განზრახ დამახინჯება) პრინციპები დაარღვია.  ეკა გულუას წინააღმდეგ ქარტიას მიმართა მიხეილ მეფარიშვილმა, რომელიც სადავოდ ხდიდა mcm.ge-ზე გამოქვეყნებულ 6 მასალას. ეს მასალები თბილისი პრაიდს ეხებოდა.  სრულად  წყარო: ორგანიზაციის ვებგვერდი

თბილისი. კოალიცია „მედიის ადვოკატირებისთვის“ გამოცემა ,,ბათუმელებთან“ დაკავშირებით გავრცელებულ ინფორმაციას ეხმიანება. „2019 წლის 21 სექტემბერს გავრცელებული ინფორმაციის თანახმად, ,,ბათუმელების” დამფუძნებლის ახლობლებს პოლიციაზე თავდასხმას ედავებიან. მთავარი რედაქტორი, ეთერ თურაძე კი არ გამორიცხავს, რომ პოლიციის მიერ განხორციელებული ღონისძიება შესაძლოა იყოს მესიჯი გამოცემის მიმართ. კოალიცია „მედიის ადვოკატირებისთვის“ მიიჩნევს, რომ აუცილებელია, დადგინდეს, ხომ არ უკავშირდება პოლიციის ქმედება მედია საშუალების საქმიანობას. ამასთან, იმ შემთხვევაში, თუ სამართალდამცავთა ქმედება რაიმე სახით კავშირში იქნება გაზეთი ბათუმელების საქმიანობასთან, აუცილებელია, რომ საქმეს მიეცეს შესაბამისი კვალიფიკაცია“, - აღნიშნულია განცხადებაში.  სრულად  წყარო: gyla.ge

საქართველოს სტრატეგიული კვლევების და განვითარების ცენტრის (CSRDG) ორგანიზებით, სასტუმრო ლოპოტაზე დაიწყო სემინარი ჟურნალისტებისთვის „სურსათის უვნებლობის სახელმწიფო კონტროლი - მდგომარეობა და გამოწვევები“.  „სემინარს საქართველოს მასშტაბით მოქმედი მედიასაშუალების 15 ჟურნალისტი ესწრება. შეხვედრაზე საუბარი იქნება სურსათის უვნებლობისა და ვეტერინარიის სფეროებში სახელმწიფო რეგულირებისა და კონტროლის მექანიზმების, საკანონმდებლო რეგულაციებისა და დაგეგმილი რეფორმების შესახებ“, ნათქვამია ორგანიზაციის გვერდზე სოციალურ ქსელში.  სრულად... წყარო: ორგანიზაციის გვერდი სოციალურ ქსელში

18 სექტემბერს, „თავისუფალ ჟურნალისტთა სახლის“ ორგანიზებით, გაიმართა დისკუსია თემაზე: მედია და არჩევნები.  „2020 წლის პროპორციული საპარლამენტო არჩევნების ფონზე, მედიის როლი კვლავაც განსაკუთრებული იქნება, გამომდინარე იქიდან, რომ ის საზოგადოების ინფორმირების ტრადიციულ წყაროს წარმოადგენს. შეხვედრაზე მოხსენებით გამოვიდა: სულხან სალაძე - „ახალგაზრდა იურისტთა ასოციაციის“ თავმჯდომარე“, ნათქვამია ორგანიზაციის განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. ქარტიის საბჭოს განცხადებას ავრცელებს გია ვოლსკის მიერ აჭარის ტელევიზიის ჟურნალისტისთვის აკრედიტაციის შეჩერების მუქარაზე. „საქართველოს ჟურნალისტური ეთიკის ქარტიის საბჭო მიიჩნევს, რომ დეპუტატის მხრიდან ამგვარი მუქარა მიუღებელია. ჟურნალისტის ფუნქცია კრიტიკული და ზოგჯერ რესპონდენტისთვის მიუღებელი კითხვების დასმაა. დეპუტატი კი ვალდებულია უპასუხოს ყველა შეკითხვას“, ნათქვამია ქარტიის ვებგვერდზე.  სრულად... წყარო: www.qartia.ge მასმედია

გურია. „გურიის მოამბის“ რედაქტორი, თეა იოსელიანი, რომელიც რამდენიმე დღის წინათ მის მიმართ განხორციელებულ მუქარაზე საუბრობდა, პროკურატურამ დაზარალებულად სცნო. თეა იოსელიანმა მუქარის შემცველი შეტყობინება „Facebook”-ის მეშვეობით მიიღო და მას შეტყობინების გამგზავნი პირი შვილების დახოცვით დაემუქრა. საია, რომელიც ჟურნალისტს სამართლებრივ დახმარებას უწევს, მიმართავს შინაგან საქმეთა სამინისტროს, რომ ჟურნალისტის მუქარის ფაქტზე გამოძიება მაქსიმალურად შემჭიდროებულ ვადებში, ყოველმხრივ, სრულად და ობიექტურად აწარმოოს.  სრულად...  წყარო: gyla.ge

თბილისი. საქართველოს ჟურნალისტური ეთიკის ქარტიამ სიძულვილის ენასთან დაკავშირებულ სახელმძღვანელო წესებს მოუყარა თავი. „სიძულვილის ენას ხშირ შემთხვევაში აიგივებენ ყველა ტიპის ნეგატიურ გამონათქვამთან. შეურაცხმყოფელი, ცილისმწამებლური თუ დისკრედიტაციისთვის მომზადებული მასალები სიძულვილის ენად აღიქმება. რეალურად, მათ შორის დიდი განსხვავებაა. იმის გამო, რომ ყველა ქვეყანას სხვადასხვა უნიკალური კონტექსტი აქვს, რთულია განსაზღვრო, რა არის სიძულვილის ენა, რომელი ტერმინები, ფრაზები და გამონათქვამები გააძლიერებს ნეგატიურ დამოკიდებულებას რომელიმე პირის მიმართ. მიუხედავად ამისა, არსებობს შეთანხმება თუ რას ეფუძნება სიძულვილის ენა. ევროპის საბჭოს მინისტრთა კომიტეტის 1997 წელს მიღებული რეკომენდაციით, “სიძულვილის ენა მოიაზრებს გამოხატვის ყველა ფორმას, რომელიც ავრცელებს, აქეზებს, ხელს უწყობს ან ამართლებს რასობრივ შუღლს, ქსენოფობიას, ანტისემიტიზმს ან შეუწყნარებლობაზე დაფუძნებულ შუღლის სხვა ფორმებს, ნაციონალიზმის, ეთნოცენტრიზმის, დისკრიმინაციისა და უმცირესობათა ან მიგრანტთა მიმართ გამოხატული მტრობის ჩათვლით”, - ნათქვამია ქარტიის მიერ გავრცელებულ ინფორმაციაში. სრულად...  წყარო: ორგანიზაციის ვებგვერდი

თბილისი. ჟურნალისტიკის რესურს ცენტრთან დაკავშირებით განვითარებული მოვლენების თაობაზე, საქართველოს ჟურნალისტური ეთიკის საბჭო განცხადებას ავრცელებს.  „საქართველოს ჟურნალისტური ეთიკის ქარტიის საბჭოს მომართა “ჟურნალისტიკის რესურს ცენტრმა” (JRC). მისი წარმომადგენლების თქმით, მას შემდეგ, რაც მოამზადეს ფილმი “რეკლამის ეფექტი საზოგადოებრივ მაუწყებელზე”, გახდნენ ზეწოლის და თავდასხმის მსხვერპლნი საზოგადოებრივი მაუწყებლის და ფილმში ნახსენები სარეკლამო კომპანიის, “პანორამას” მხრიდან”, - ვკითხულობთ განცხადებაში, - „როგორც JRC ამბობს, ფილმში გამოყენებული ფარული გადაღების გამო “პანორამას” წარმომადგენლებმა გამოითქვეს პროკურატურისთვის მიმართვის სურვილი. ქარტიის საბჭო მიიჩნევს, რომ ფარული გადაღების დაუშვებლობაზე მსჯელობის დაწყებაც კი მნიშვნელოვნად დააზიანებს საგამოძიებო ჟურნალისტიკის და ზოგადად მედიის მთავარ ფუნქციას - საჯარო მოხელეთა კანონდარღვევის თუ კორუფციის ფაქტების მხილებას. როდესაც ღიად ინფორმაციის მოპოვება ვერ ხერხდება, ფარული გადაღება მაღალი საზოგადოებრივი ინტერესის შემცველ თემებზე მუშაობისას აპრობირებული მეთოდია როგორც საერთაშორისო, ისე ქართული მედიისთვის, ეს დაშვებულია ქართული კანონდებლობითაც“.  სრულად  წყარო: ორგანიზაციის ვებგვერდი

თბილისი. საქართველოს ჟურნალისტური ეთიკის საბჭო „გურიის მოამბის“ რედაქტორთან დაკავშირებული საქმის გამოძიებას მოითხოვს.  „9 სექტემბერს “გურიის მოამბის” რედაქტორმა, თეა იოსელიანმა განაცხადა, რომ მას სოციალური ქსელში უცნობი პირი შვილების მოკვლით დაემუქრა. თეა იოსელიანი მიღებულ შეტყობინებას თავის პროფესიულ საქმიანობას უკავშირებს. მუქარის შესახებ თეა იოსელიანმა შინაგან საქმეთა სამინისტროს“, - ნათქვამია ქარტიის საბჭოს მიერ გავრცელებულ განცხადებაში, - „საქართველოს ჟურნალისტური ეთიკის ქარტია მიმართავს შინაგან საქმეთა სამინისტროს, დროულად გამოიძიოს თეა იოსელიანთან დაკავშირებული შემთხვევა, მიაწოდოს საზოგადოებას ინფორმაცია გამოძიების მიმდინარეობის, შედეგების შესახებ და დანაშაულის დადასტურების შემთხვევაში დადგეს შესაბამის პირთა პასუხისმგებლობის საკითხი“.  სრულად  წყარო: ორგანიზაციის ვებგვერდი

თბილისი. ადამიანის უფლებათა ცენტრი მოითხოვს ჟურნალისტების, ბესლან კმუზოვისა და მერაბ ცაავას დაზარალებულად ცნობას 2019 წლის 20 ივნისს განვითარებული მოვლენების შედეგად მიყენებული ზიანის გამო.  „20 ივნისის ღამეს დაშავებული ჟურნალისტებიდან ადამიანის უფლებათა ცენტრი 4 ჟურნალისტს უწევს სამართლებრივ დახმარებას, მათ შორის - ბესლან კმუზოვი (Кавказский Узел) და მერაბ ცაავა („გურია ნიუსი“) პროფესიულ მოვალეობას ასრულებდნენ. მათ აქციის დარბევისას მიიღეს სხეულის სხვადასხვა სახის დაზიანებები, რა დროსაც საჭირო გახდა სასწრაფო სამედიცინო დახმარების ჩარევა. ბესლან კმუზოვს 6 ტყვია მოხვდა, აქედან ერთი - თავის არეში, მერაბ ცაავას კი რეზინის ტყვიების შედეგად დაუზიანდა ხელი და საჭირო გახდა ქირურგიული ჩარევა“, ნათქვამია ორგანიზაციის გვერდზე სოციალურ ქსელში.  სრულად... წყარო: ორგანიზაციის გვერდი სოციალურ ქსელში მასმედია ადამიანის უფლებები

თბილისი. საქართველოს ახალგაზრდა იურისტთა ასოციაციის (საია) მიხედვით, ეკა მესხიძემ 15 მედია საშუალების წინააღმდეგ ჟურნალისტთა ეთიკის ქარტიას მიმართა.  „იგი მიიჩნევს, რომ თბილისის საქალაქო სასამართლოს 2019 წლის 09 აგვისტოს მიღებულ გადაწყვეტილებასთან დაკავშირებით რიგი მედია საშუალებების მიერ არაზუსტი ინფორმაცია გავრცელდა, რითაც დაირღვა ჟურნალისტური ეთიკის ქარტიის პირველი პრინციპი. მედია საშუალებების მიერ გამოქვეყნებული სადავო მასალის თანახმად, სასამართლომ პაპუნა უგრეხელიძე უდანაშაულოდ სცნო და დაადგინა, რომ მისი საჯარო რეესტრის თავმჯდომარეობის პერიოდში არანაირ ძალადობასა და სექსუალურ შევიწროებას ადგილი არ ჰქონია. ეს ინფორმაცია არ შეესაბამება სინამდვილეს, აღნიშნულ საქმეში სასამართლოს საერთოდ არ უმსჯელია ჰქონდა თუ არა სექსუალურ შევიწროებას ადგილი“, ნათქვამია საიას ვებგვერდზე.  სრულად... წყარო: gyla.ge

თბილისი. 2 აგვისტოს, 10:00 საათიდან 17:30 საათამდე, ბათუმის დემოკრატიული ჩართულობის ცენტრი, ინფორმაციის თავისუფლების განვითარების ინსტიტუტი (IDFI) რეგიონული ჟურნალისტებისა და აქტივისტებისთვის მართავს პრაქტიკულ ტრენინგს თემაზე: საჯარო მონაცემებთან მუშაობა ხელისუფლების საქმიანობის ეფექტური კონტროლისთვის. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს პრაქტიკული სახელმძღვანელოს მონაცემთა ჟურნალისტებისთვის. „მონაცემების ხელმისაწვდომობის გაზრდამ და ტექნოლოგიების გაუმჯობესებამ ჟურნალისტებს მისცა საშუალება ჩაუღრმავდნენ ცალკეულ საკითხებს და გამოიყენონ სხვადასხვა აპლიკაციები თუ პროგრამები ზღვა მასალის გასაანალიზებლად და ძირითადი მიგნებების უკეთ წარმოსაჩენად.  თუმცა, ეს ახალი შესაძლებლობები დაკავშირებულია დამატებით გამოწვევებთან, მონაცემების მოპოვებისა თუ დამუშავებისთვის ახალი უნარების და მეტი დროის აუცილებლობასთან. ამის გამო, ამ ტიპის ჟურნალისტიკას ხშირად მონაცემთა ან საგამოძიებო ჟურნალისტიკას უწოდებენ. მონაცემთა ჟურნალისტის მიზანია არა უბრალოდ ფაქტების აღწერა ან მიმოხილვა, არამედ მათი გამომწვევი მიზეზების კვლევა/განსაზღვრა და, ხშირ შემთხვევაში, პრობლემის გადაჭრის შესაძლო გზების ძიება“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. საქართველოს ჟურნალისტური ეთიკის ქარტია სამთავრობო პრესსამსახურებს განცხადებით მიმართავს. „როგორც ორგანიზაციის წევრი, ისე არაწევრი ჟურნალისტები საუბრობენ რამდენიმე სამთავრობო (განსაკუთრებით ძალოვანი) უწყების მიერ ჩამოყალიბებულ ცუდ პრაქტიკაზე, როდესაც ბრიფინგის ჩანიშვნისას ისე არიან გასაშუქებლად მიწვეულნი, რომ მათთვის უცნობი რჩება ღონისძიების თემა.  უმნიშვნელოვანესია რედაქციებმა იცოდნენ, რა საკითხზე იმართება ბრიფინგი თუ პრესკონფერენცია, რათა საკუთარი ადამიანური თუ ტექნიკური რესურსის გათვალისწინებით, სარედაქციო პოლიტიკისა და ინტერესების შესაბამისად გადაწყვიტონ, სურთ თუ არა დასწრება და გაშუქება. ამასთან, ზოგიერთი მედიასაშუალება დისკრიმინაციულ მიდგომაზეც საუბრობს და ამბობს, რომ მათთვის არათუ თემა, არამედ თავად ღონისძიების გამართვის შესახებ ინფორმაცია უცნობი რჩება. მედიამ უნდა გადაწყვიტოს არსებობს თუ არა აუდიტორიის ინტერესი ამა თუ იმ თემის მიმართ, ამის მიხედვით შეარჩიოს გაშუქების ფორმატიც და მოემზადოს შესაბამისი კითხვების დასასმელად, რისი საშუალებაც დამკვიდრებული პრაქტიკის გათვალისწინებით დღეს მედიას არ ეძლევა“, ნათქვამია ქარტიის ვებგვერდზე. სრულად... წყარო: www.qartia.ge

თბილისი. სამოქალაქო სექტორი საერთაშორისო ორგანიზაციებს მიმართავს „რუსთავი 2“-ის გარშემო განვითარებულ მოვლენებთან დაკავშირებით. „ხელმომწერი ორგანიზაციები გთხოვთ, ყურადღებით მიადევნოთ თვალი  „რუსთავი 2“-ის ირგვლივ მიმდინარე მოვლენებს და განსაკუთრებული მონიტორინგის ქვეშ აიყვანოთ ეს საქმე. მნიშვნელოვანია, შენარჩუნდეს არხის კრიტიკული სარედაქციო პოლიტიკა და არ დაირღვეს ჟურნალისტების შრომითი უფლებები“, ნათქვამია ერთობლივ ვებგვერდზე. სრულად... წყარო: www.transparency.ge

თბილისი. კოალიცია მედიის ადვოკატირებისთვის მოუწოდებს „რუსთავი 2“-ის მფლობელს უზრუნველყოს მაუწყებლის სარედაქციო დამოუკიდებლობა. „კოალიცია მედიის ადვოკატირებისთვის მიიჩნევს, რომ ხელისუფლებისაგან დამოუკიდებელი მედია მნიშვნელოვანი ფაქტორია ქვეყნის დემოკრატიული განვითარებისთვის. ჟურნალისტი საქმიანობის განხორციელებისას ხელმძღვანელობს საკუთარი სინდისისა და პროფესიული სტანდარტების შესაბამისად, მისი პროფესიული საქმიანობა კი დაცულია დირექტორისა და მესაკუთრის ჩარევისგანაც კი. შესაბამისად, მნიშვნელოვანია არ მოხდეს ჟურნალისტის სარედაქციო საქმიანობაში ან შემოქმედებით პროცესში ჩარევა და ცენზურა. ამასთან, მიმდინარე პროცესების ფონზე, აუცილებლად უნდა იქნას დაცული ჟურნალისტთა შრომითი უფლებები“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაცია (საია) განმარტავს სტრასბურგის სასამართლოს მიერ მიღებულ გადაწყვეტილებას ტელეკომპანია „რუსთავი 2-თან“ დაკავშირებით. „სტრასბურგის სასამართლომ არსებითად განიხილა მხოლოდ მოსამართლეების მიუკერძოებლობასა და დამოუკიდებლობასთან დაკავშირებით წარდგენილი საჩივარი, თუმცა, დარღვევა არ დაადგინა. ამ ნაწილში ევროპული სასამართლოს გადაწყვეტილება არ არის შესული კანონიერ ძალაში და მომჩივან მხარეს 3 თვის ვადაში საქმის დიდი პალატისათვის გადაცემა შეუძლია, მოითხოვოს. საჩივარში დაყენებული სხვა მოთხოვნები სასამართლომ დაუშვებლად ცნო, რამაც შექმნა ევროპული სასამართლოს მიერ 2017 წლის 3 მარტს მიღებული დროებითი ღონისძიების გაუქმების საფუძველი. შესაბამისად, ,,რუსთავი 2“-ის საქმეზე უზენაესი სასამართლოს გადაწყვეტილების აღსრულებასთან დაკავშირებით ევროპული სასამართლოს მიერ მიღებული სამართლებრივი შეზღუდვები გაუქმდა“, ნათქვამია ორგანიზაციის ვებგვერდზე. სრულად... წყარო: gyla.ge