თბილისი. მედიის ადვოკატირების კოალიცია ეხმიანება მმართველი პარტიის მიერ შემოთავაზებულ ცვლილებებს „მაუწყებლობის შესახებ” კანონში, რომელიც კოალიციის შეფასებით, ბევრ სადაო მუხლთან ერთად აჭარის ტელევიზიის მრჩეველთა საბჭოს გაუქმებას ითვალისწინებს.  „აღნიშნული კანონპროექტი ცალსახად ეწინააღმდეგება საზოგადოებრივი მაუწყებლის ფუნდამენტურ პრინციპებს, გამოუსწორებელ ზიანს აყენებს ქვეყანაში საზოგადოებრივი მაუწყებლის არსებულ მოდელს და სამეურვეო საბჭოს თავმჯდომარის ვასილ მაღლაფერიძის ძალაუფლების განმტკიცებას ემსახურება. მედიის ადვოკატირების კოალიცია მოუწოდებს მმართველ პარტიას გაითვალისწინოს ის პოტენციური მძიმე შედეგები, რაც ამ ცვლილებას შეიძლება მოჰყვეს, როგორც  დემოკრატიის პრინციპების, ასევე საზოგადოებრივი მაუწყებლებისთვის შესაძლებლობის, სრულფასოვნად შეასრულონ თავიანთი ფუნქცია, შეზღუდვით. “ქართულმა ოცნებამ” სასწრაფოდ უნდა გაიწვიოს აღნიშნული კანონპროექტი და ამგვარი რეგრესული ინიციატივების წამოყენების ნაცვლად, გადადგას ნაბიჯები ევროკავშირის 12 რეკომენდაციის და, კონკრეტულად, მედიასთან დაკავშირებული პუნქტების შესასრულებლად“, ნათქვამია კოალიციის განცხადებაში. სრულად... წყარო: mediacoalition.ge

თბილისი. საქართველოს ჟურნალისტური ეთიკის ქარტია მიშა მშვილდაძეზე თავდასხმის ფაქტს ეხმაურება და საგამოძიებო უწყებებს მოუწოდებს, დროულად და ეფექტიანად გამოიძიონ ეს საქმე. „კიდევ ერთხელ ვაცხადებთ, რომ ბოლო პერიოდში მედიის წარმომადგენლებზე გახშირებული თავდასხმების გამომწვევი ფაქტორები ხელისუფლების მხრიდან მედიის წარმომადგენლების მიმართ აგრესიული რიტორიკა და დანაშაულების გაჭიანურებული და გამოუძიებელი საქმეებია“. სრულად... წყარო: www.qartia.ge

თბილისი. მედიის ადვოკატირების კოალიცია გმობს ტელეკომპანია „ფორმულას“ თანადამფუძნებელსა და წამყვანზე, მიშა მშვილდაძეზე ფიზიკური თავდასხმის ფაქტს. „ქვეყანაში მედიის წარმომადგენლებზე თავდასხმა კვლავ სერიოზულ გამოწვევად რჩება. ხელისუფლების მხრიდან მედიის მიმართ დანაშაულებზე უმოქმედობა, კრიტიკული აზრის მიმართ ანტაგონისტური რიტორიკა თუ მიზანმიმართული დისკრედიტაცია მსგავსი სახის დანაშაულებს კიდევ უფრო ახალისებს. მშვილდაძის განცხადებით, „... მას სახეში მუშტი დაარტყეს, შემდეგ წაიქცა და სანამ წამოდგებოდა, თავდამსხმელი ფიზიკურ ანგარიშსწორებას აგრძელებდა.”“ კოალიცია მოუწოდებს ხელისუფლებას, დროულად გამოიძიოს მიშა მშვილდაძეზე თავდასხმის ფაქტი და დასაჯოს დამნაშავეები კანონის სრული სიმკაცრით. სრულად... წყარო: mediacoalition.ge

თბილისი. Grlz Wave აქვეყნებს ვიდეოს, თუ როგორ ვებრძოლოთ დისკრიმინაციულ კომენტარებს ტიკ-ტოკ პლატფორმაზე. გაფილტრეთ კომენტარები - პლატფორმას აქვს ფუნქცია, თქვენი დასტურის გარეშე კონკრეტული სიტყვის შემცველი კომენტარი არ დაიწეროს. ამისთვის აუცილებელია, გადახვიდეთ თქვენს მთავარ გვერდზე, აირჩიოთ მენიუს ღილაკი, შემდეგ პარამეტრები და კონფიდენციალობა, შემდეგ მოძებნოთ კომენტარების ფილტრის ფუნქცია და საკვანძო სიტყვის ფილტრი ჩართოთ. ამის შემდეგ, მიუთითეთ ის სიტყვები, რომელთა გამოყენებითაც არ გინდათ რომ კომენტარი დაგიწერონ. ნებისმიერ დროს შეგიძლიათ დაარეპორტოთ კომენტარი, რომელიც თქვენთვის დისკრიმინაციულ ინფორმაციას შეიცავს. უფრო მარტივი გამოსავალია მომხმარებლის დაბლოკვა. წყარო: ორგანიზაციის გვერდი სოციალურ ქსელში

თბილისი. 24 და 25 ივნისს, „საერთაშორისო გამჭვირვალობა - საქართველოს“ მიერ ორგანიზებული ტრენერების ტრენინგი გაიმართა თემაზე „როგორ ვიპოვოთ ინფორმაციის დიდ ზღვაში კორუფციის კენჭები?“. მონაწილეები გაეცნენ ღია მონაცემების დამუშავების სპეციფიკას, შესაძლო კორუფციული გარიგებების, ძალაუფლების ბოროტად გამოყენებისა და ბიუჯეტის დაუსაბუთებლად ხარჯვის ფაქტების გამოვლენის ხერხებს. ორგანიზაციის ცნობით, ტრენერების ტრენინგი ქვემო ქართლის ჟურნალისტებისგან დაიწყო და სხვა რეგიონებში გაგრძელდება. სრულად... წყარო: ორგანიზაციის გვერდი სოციალურ ქსელში

თბილისი. „საერთაშორისო გამჭვირვალობა-საქართველო“ აქვეყნებს ბლოგპოსტს: სამი ტენდენცია, რომელიც მედიის წინააღმდეგ სასამართლო საქმეთა განხილვებში გამოიკვეთა. ორგანიზაცია 200-მდე ჟურნალისტის უფლებებს იცავს სასამართლოში. საქმეების განხილვის პროცესში გამოკვეთილი სამი მნიშვნელოვანი ტენდენციაა: გაუმართლებლად ხანგრძლივი განხილვის ვადები; საქმეთა განხილვა სასამართლო პრაქტიკის იგნორირებით; შრომითი დავების დროს სასამართლო მიერ მტკიცების ტვირთს მედიის წარმომადგენლებზე დაკისრება. სრულად... წყარო: transparency.ge

თბილისი. მედიის ადვოკატირების კოალიცია ეხმიანება საქართველოს პრეზიდენტის მიერ ტელეკომპანია „მთავარი არხის“ გენერალური დირექტორის ნიკა გვარამიას შეწყალებას. „კოალიცია მიესალმება საქართველოს პრეზიდენტის გადაწყვეტილებას პოლიტიკურად მოტივირებული ბრალდებით უსამართლოდ მსჯავრდადებული მედიის მენეჯერის ნიკა გვარამიას შეწყალების შესახებ. ეს გადაწყვეტილება მნიშვნელოვანი ნაბიჯია პრესის თავისუფლებისა და ადამიანის ფუნდამენტური უფლების - გამოხატვის თავისუფლების - დასაცავად, და პოზიტიურ როლს შეასრულებს ქვეყნის ევროინტეგრაციის გზაზე“, ნათქვამია ორგანიზაციის ვებგვერდზე. სრულად... წყარო: mediacoalition.ge

თბილისი. სოციალური სამართლიანობის ცენტრის ინფორმაციით, 19 ივნისს ჟურნალისტური ეთიკის ქარტიამ სრულად დააკმაყოფილა ორგანიზაციის განცხადება.  დადასტურდა შალვა რამიშვილის, ასევე, „POSTV“-ის სხვა ჟურნალისტების, ნინო სალუქვაძის, ნათია ბერიძის, ნუგზარ ხავთასის, ანა შანიძის, დათა გვასალიასა და ნუცა კოროშინაძის მხრიდან არაზუსტი ინფორმაციის გავრცელების, ადამიანის პირადი ცხოვრების პატივისცემის უფლების დარღვევის, დისკრიმინაციის წახალისების საფრთხის შექმნის და ფაქტების დამახინჯების აკრძალვის პროფესიული და ეთიკური ვალდებულებების დარღვევა. სრულად... წყარო: socialjustice.org.ge

თბილისი. მედიის ადვოკატირების კოალიცია შეშფოთებულია აჭარის საზოგადოებრივი მაუწყებლის თანამშრომელ კობა ფარტენაძეზე  ფიზიკური თავდასხმის გამო.  კოალიცია გმობს ძალადობის ამ ფაქტს და სამართალდამცველ ორგანოებს თავდასხმის დროულად გამოძიებისა და დამნაშავე პირის პასუხისგებაში მიცემისკენ მოუწოდებს. სრულად... წყარო: კოალიციის გვერდი სოციალურ ქსელში

თბილისი. საქართველოს დემოკრატიული ინიციატივა (GDI) წარმოგიდგენთ სპეციალურ ანგარიშს: „SLAPP საქმეები საქართველოში, ახალი საფრთხე მედიის თავისუფლებისთვის.“ ანგარიში... „SLAPP-ად განიხილება პოლიტიკური თუ ფინანსური თვალსაზრისით გავლენიანი პირების მიერ აღძრული აშკარად უსაფუძვლო სარჩელები (ცილისწამების შესახებ), რომელთა მიზანიც არის არა პატივის, ღირსების და საქმიანი რეპუტაციის დაცვა, არამედ აქტიური მოქალაქეების გაჩუმება და მათთვის ფინანსური ბარიერების შექმნა. GDI-ს დაკვირვებით, 2021-2023 წლებში საქართველოში დაიწყო და მნიშვნელოვნად გაიზარდა კრიტიკული მედიისა და უფლებადამცველების წინააღმდეგ ასეთი სარჩელების რიცხვი. ანგარიში მომზადებულია საქართველოს დემოკრატიული ინიციატივის (GDI) მიერ, USAID სამართლის უზენაესობის პროგრამის მხარდაჭერით. პროგრამას ახორციელებს აღმოსავლეთ-დასავლეთის მართვის ინსტიტუტი (EWMI) ამერიკის შეერთებული შტატების საერთაშორისო განვითარების სააგენტოს (USAID) დაფინანსებით. ანგარიშის შინაარსზე სრულად პასუხისმგებელია GDI და მასში გამოთქმული მოსაზრებები შესაძლოა არ ასახავდეს ზემოთ ნახსენები საერთაშორისო ორგანიზაციების შეხედულებებს“. წყარო: gdi.ge

თბილისი. ანალიტიკურმა პლატფორმა „კომენტარმა“ დაიწყო მომზადებული მასალებისა და სტატიების აზერბაიჯანულ ენაზე თარგმნა. იხ. ვებ-გვერდის აზერბაიჯანულენოვანი ვერსია... სრულად... წყარო: კომენტარის გვერდი სოციალურ ქსელში

თბილისი. სამართლიანი არჩევნებისა და დემოკრატიის საერთაშორისო ორგანიზაციის (ISFED) ინფორმაციით, 17 მაისს, ფეისბუქზე შეიქმნა გვერდი სახელწოდებით „პროგრესული კონსერვატიზმი“, რომელიც ანტიდასავლური განწყობების გასაღვივებლად ანტილიბერალურ, მათ შორის ჰომოფობიურ გზავნილებს იყენებს. ამ გვერდზე პერიოდულად ქვეყნდება მოკლე ვიდეომიმართვები, რომლებშიც ბლოგერებად პოზიციონირებული პირები ანტიდასავლურ ნარატივს ავრცელებენ. ორგანიზაციამ აღმოაჩინა საეჭვო/ყალბი ანგარიშები და ფეისბუქგვერდი, რომლებიც პოსტებს კოორდინირებულად, დროის მცირე მონაკვეთში ავრცელებდნენ. „პოსტების გამავრცელებელთა შორის არიან ადგილობრივ საკრებულოებში „ქართული ოცნების“ წარმომადგენლები, პარტიის ადგილობრივი ორგანიზაციის წევრები და ცალკეული საჯარო მოსამსახურეები. ისინი საკუთარ პროფილებზე გვერდის ვიდეოებს საჯაროდ აზიარებენ“, ნათქვამია ISFED-ის ბლოგპოსტში. სრულად... წყარო: isfed.ge

თბილისი. საერთაშორისო გამჭვირვალობა - საქართველომ (TI Georgia) ჟურნალისტ დიანა ჯოჯუას საქმე პირველი ინსტანციის სასამართლოში წარმატებით დაასრულეს. ტელეკომპანია „რუსთავი 2“ დაზარალებულს კუთვნილ ხელფასს და კომპენსაციას გადაუხდის. სრულად... წყარო: ორგანიზაციის გვერდი სოციალურ ქსელში

თბილისი. მითების დეტექტორი გიზიარებთ ბლოგპოსტს: როგორ გაშუქდა რუსულ მედიაში პუტინის გადაწყვეტილება საქართველოსთან ფრენების აღდგენაზე. „10 მაისს რუსეთის პრეზიდენტმა ვლადიმირ პუტინმა ორი ბრძანებულება გამოსცა, რითაც საქართველოსთან პირდაპირი ფრენების აკრძალვის 2019 წლის გადაწყვეტილება გააუქმა და საქართველოს მოქალაქეებისთვის რუსეთის ფედერაციაში 90 დღით უვიზოდ შესვლა დაუშვა. გადაწყვეტილება აქტიურად გაშუქდა რუსულ მედიაში. კრემლის პროპაგანდისტი ჟურნალისტები, პოლიტიკოსები და ტურისტული სფეროს წარმომადგენლები პუტინის გადაწყვეტილებას დადებითად შეხვდნენ. რუსულმა საინფორმაციო სააგენტოებმა კი “მართვის სტრატეგიული ინსტიტუტის” ხელმძღვანელ პეტრე მამრაძესა და “რადიო იმედის” წამყვან ლალი მოროშკინაზე დაყრდნობით განაცხადეს, რომ პუტინის გადაწყვეტილებას ქართველებიც მიესალმებიან“. სრულად... წყარო: mythdetector.ge

თბილისი. საქართველოს ახალგაზრდა იურისტთა ასოციაცია გიზიარებთ ორგანიზაციის მიერ მომზადებულ პრაქტიკულ სახელმძღვანელოს ჟურნალისტებისთვის. „დოკუმენტში მოცემულია ის ძირითადი სამართლებრივი რეგულაციები და პრაქტიკა, რომლებიც ჟურნალისტებს დარღვეული უფლებების აღდგენაში დაეხმარება, როგორც გამოძიების ფარგლებში, ისე - ზიანის ანაზღაურების საკითხში. ამასთანავე, დოკუმენტში განხილულია უშუალოდ ჟურნალისტების დაცვის საერთაშორისო სტანდარტები, რომლებიც საჯარო შეკრებების გაშუქების დროს მოქმედებს“. სახელმძღვანელო სრულად... წყარო: gyla.ge

თბილისი. „საერთაშორისო გამჭვირვალობა - საქართველომ“ შეისწავლა 2022 წლის 16 მაისს ტელეკომპანია „რუსთავი 2-ის“ ყოფილი დირექტორისა და „მთავარი არხის“ დამფუძნებლის ნიკა გვარამიას მიმართ გამოტანილი გამამტყუნებელი განაჩენი, რომელიც ორგანიზაციის შეფასებით ვერ პასუხობს კანონიერების, დასაბუთებულობისა და სამართლიანობის კრიტერიუმებს.  „მოსამართლის მიუკერძოებლობასა და ობიექტურობასთან დაკავშირებით არსებული ლეგიტიმური კითხვების უგულებელყოფის, ნიკა გვარამიას მსჯავრდებისა და სასჯელის განსაზღვრის კუთხით სამართლებრივი მსჯელობის სიმწირის, მტკიცებულების სახით წარმოდგენილი ფაქტების სისტემური ანალიზისა და სასამართლოების შესაბამისი პრაქტიკის, იურიდიული ლიტერატურისა თუ სამეცნიერო ნაშრომების გამოყენების ნაკლებობის გამო შეგვიძლია დავასკვნათ, რომ ნიკა გვარამიას მიმართ გამოტანილი გამამტყუნებელი განაჩენი დაუსაბუთებელია“, ნათქვამია ორგანიზაციის განცხადებაში. სრულად... წყარო: transparency.ge

თბილისი. მედიის ადვოკატირების კოალიცია სოლიდარობას უცხადებს ნიკა გვარამიას და მის დაუყოვნებლივ გათავისუფლებას მოითხოვს. „ნიკა გვარამიას პატიმრობიდან ერთი წელი გავიდა. ადგილობრივი და საერთაშორისო ორგანიზაციების შეფასებით, „მთავარი არხის“ მენეჯერი პოლიტიკურად მოტივირებულ საქმეზეა დაკავებული. ნიკა გვარამიას პატიმრობა არის უხეში თავდასხმა მედიის თავისუფლებაზე და კრიტიკული აზრის გამოხატვის უფლებაზე“, ნათქვამია კოალიციის განცხადებაში. სრულად... წყარო: კოალიციის გვერდი სოციალურ ქსელში

თბილისი. მითების დეტექტორის ცნობით, ინფორმაცია, თითქოს ნეაპოლელმა ქალმა ქართველ მომვლელს საფეხბურთო გუნდ ნაპოლის ჩემპიონობის და ხვიჩა კვარაცხელიას დამსახურებით ბინა აჩუქა, სიმართლეს არ შეესაბამება. „ფეისბუკ პროფილი ნანა ბიწაძე ყალბი ანგარიშია, რომელსაც მცდარი ინფორმაცია წარსულშიც არაერთხელ გაუვრცელებია. სოციალურ ქსელში გამოქვეყნებულ ფოტოზე არა ქართველი ემიგრანტი, არამედ ჟურნალისტი ირენე სან სეგუნდო და მისი ბებია – კარმენი არიან გამოსახულები“, ნათქვამია მასალაში. სრულად... წყარო: mythdetector.ge

თბილისი. სოციალური სამართლიანობის ცენტრი ეხმიანება პრესის თავისუფლების საერთაშორისო დღეს და მიიჩნევს, რომ ქვეყანაში მედიის მდგომარეობა მკვეთრად გაუარესებულია. „საერთაშორისო ორგანიზაციის „რეპორტიორები საზღვრებს გარეშე“ 2022 წლის ანგარიშის თანახმად, საქართველოში მედია ლანდშაფტი გასულ წელთან შედარებით გაუარესებულია. ანგარიშის თანახმად, მედია მდგომარეობის მიხედვით საქართველო მსოფლიოს 180 ქვეყანას შორის 89-ე ადგილზეა. ეს მაშინ, როდესაც  2021 წლის ანგარიშით, საქართველო 60-ე ადგილზე იყო“. სრულად... წყარო: socialjustice.org.ge

თბილისი. კოალიცია მედიის ადვოკატირებისთვის ეხმიანება სოციალური ქსელის Meta-ს (Facebook) ანგარიშს, რომლის თანახმადაც, მთავრობის ადმინისტრაციის სტრატეგიული კომუნიკაციების დეპარტამენტთან დაკავშირებული ანგარიშები ჩართული იყვნენ ყალბი და მადისკრიტებული ინფორმაციების გავრცელებაში. „აღნიშნული ანგარიში ადასტურებს ღია წყაროებით მოპოვებულ ინფორმაციებს, რომელიც ადრეც აჩენდა ეჭვებს, რომ ხშირად ადმინისტრაციული რესურსის გამოყენება არა საჯარო ინტერესის, არამედ პარტიული მიზნით ხდება, ხოლო მმართველი პარტია პოლარიზაციას და დემოკრატიული ინსტიტუტების მიმართ უნდობლობის გაჩენას უწყობს ხელს, რაც ქვეყანაში არსებულ პოლარიზაციას კიდევ უფრო აღრმავებს“, ნათქვამია განცხადებაში. სრულად... წყარო: mediacoalition.ge

თბილისი. სამოქალაქო საზოგადოების ორგანიზაციები ნიკა გვარამიას საქმესთან დაკავშირებით ერთობლივ განცხადებას ავრცელებენ. „3 მაისი პრესის თავისუფლების საერთაშორისო დღეა. 1993 წლიდან დღემდე ეს თარიღი სიმბოლური მანიფესტია ყველა ხელისუფლებისთვის, რათა პატივი სცენ პრესას, როგორც თავისუფლების ერთ-ერთ მთავარ საყრდენ კედელს. ამ დღესთან დაკავშირებით, სამოქალაქო საზოგადოების ორგანიზაციები კიდევ ერთხელ ვეხმიანებით „მთავარი არხის“ გენერალური დირექტორის ნიკა გვარამიას საქმეს. მოვუწოდებთ: საქართველოს უზენაეს სასამართლოს დროულად, ობიექტურად და მიუკერძოებლად განიხილოს ნიკა გვარამიას წინააღმდეგ მიმდინარე სისხლის სამართლის საქმე; საქართველოს პრეზიდენტს, საქართველოს მიმართ ევროკომისიის რეკომენდაციების გათვალისწინებით, და საქმეზე საერთაშორისო და ადგილობრივი ორგანიზაციების, სახალხო დამცველის შეფასებების შესაბამისად, მიიღოს გადაწყვეტილება ნიკა გვარამიას შეწყალების თაობაზე“. სრულად... წყარო: gyla.ge

თბილისი. საერთაშორისო გამჭვირვალობა - საქართველოს იურისტებმა ჟურნალისტ მიხეილ სესიაშვილის საქმე სამივე ინსტანციის სასამართლოში მოიგეს. რუსთავი 2 სესიაშვილს კუთვნილ ხელფასსაც გადაუხდის და კომპენსაციასაც. სრულად... წყარო: ორგანიზაციის გვერდი სოციალურ ქსელში