თბილისი. საქართველოს პენ-ცენტრი მიიჩნევს, რომ ე.წ. „ხალხის ძალის“ ინიცირებული და „ქართული ოცნების“ მიერ მხარდაჭერილი ორივე კანონპროექტი ე.წ. „უცხოური გავლენის აგენტების“ შესახებ, თავისი შინაარსით, ცალსახად და ერთმნიშვნელოვნად წარმოადგენს ანალოგიური რუსული კანონის საქართველოში დაკანონების მცდელობას. „აღნიშნული კანონის მიღებით, საქართველოს პარლამენტი სამუდამოდ უსპობს ჩვენს ქვეყანას ევროატლანტიკური ინტეგრაციის პერსპექტივას და მიმართულია თავისუფალი სიტყვის, გამოხატვის თავისუფლებისა და ქართული სახელმწიფოებრიობის წინააღმდეგ“, აღნიშნულია განცხადებაში. სრულად... წყარო: manifest.ge

თბილისი. სოციალურ მეცნიერებათა ცენტრი (CSS) მიმართავს მის ერთ-ერთ დამფუძნებელს, საგარეო ურთიერთობათა კომიტეტის თავმჯდომარის მოადგილეს, გიორგი ხელაშვილს: „არ მისცეთ ხმა კანონს თქვენ მიერ დაფუძნებული და სხვა მსგავსი ორგანიზაციების წინააღმდეგ, რომელთა საქმიანობაშიც, წლების მანძილზე, თავად დიდი წვლილი შეიტანეთ!“ CSS 2003 წელს დაარსებული არასამთავრობო ორგანიზაციაა და მისი მიზანია ხელი შეუწყოს კრეატიული, მტკიცებულებებზე დაფუძნებული კვლევის განვითარებას სოციალური მეცნიერებების მიმართულებით საქართველოში, რაც ღირებულების მომტანი იქნება საზოგადოებისთვის. ცენტრში ოთხი კვლევითი განყოფილებაა: საგარეო პოლიტიკა და უსაფრთხოება; ევროკავშირში ინტეგრაცია; გენდერის კვლევები; განათლება. სრულად... წყარო: css.ge

ნორვეგიის საგარეო საქმეთა სამინისტრო შეშფოთებულია „უცხოური გავლენის გამჭვირვალობის შესახებ“ კანონპროექტით, რომელიც სამოქალაქო საზოგადოების ორგანიზაციებს „უცხოელ აგენტებად“ განსაზღვრავს. შემოთავაზებული კანონპროექტი ეწინააღმდეგება ქართველი ხალხის მტკიცე მისწრაფებებს ევროკავშირისკენ და ასევე, ადამიანის უფლებათა დაცვის საერთაშორისო ვალდებულებებს. კანონპროექტი უარყოფითად აისახება ნორვეგია-საქართველოს თანამშრომლობაზე. ნორვეგია მოუწოდებს კანონის ინიციატორებს, იმოქმედონ დემოკრატიული ინტერესების ფარგლებში. სრულად... წყარო: twitter.com

ქვემო ქართლი. ქვემო ქართლის სამოქალაქო საზოგადოების ნაწილი ეხმაურება საქართველოს პარლამენტში ინიცირებულ კანონპროექტებს უცხოური გავლენის გამჭვირვალობის და აგენტების შესახებ. ზაურ ხალილოვი, სამოქალაქო ინტეგრაციის ფონდი: -     „რუსეთში, მსგავსმა კანონმა გაანადგურა სამოქალაქო საზოგადოება. თუ ჩვენი ქვეყანაც მიისწრაფის ამისკენ, რომ შეუზღუდოს სამოქალაქო სექტორს და საერთაშორისო ორგანიზაციებს მუშაობა, ამ გზით, არ მისცეს საშუალება სოციალური, სამართლებრივი და  ეკონომიკური პროექტების განხორციელების, ეს არაფერს სასიკეთოს არ მოუტანს ქვეყანას“. უფლებადამცველი სამირა ბაირამოვა:  -    „ეს კანონი არის ღია ბრძოლა საზოგადოებრივი სექტორის წინააღმდეგ, პირდაპირი შეტევაა. დიდი ხანი მიმდინარეობდა ეს პროცესი, მაგრამ ახლა ეს ყველაფერი „კანონიერად“ მოხდება“. გულიკო შოშიტაშვილი, „საქართველოს სამოქალაქო საზოგადოების განვითარების ასოციაცია“ (ACSDG): -     „ეს კანონი, თუკი ამ სახით იქნება მიღებული, ყველა იმ არასამთავრობო და მედიაორგანიზაციას, რომელსაც დღეს აქვს უნარი, ცოდნა და შესაძლებლობა გამოთქვას კრიტიკული აზრი, არსებობის შესაძლებლობას მოუსპობს. ვინაიდან ფინანსური დამოუკიდებლობაა ამისი მთავარი პირობა, რაც დღევანდელ საქართველოში მხოლოდ საერთაშორისო ორგანიზაციების დახმარებით არის შესაძლებელი”. გვანცა შიშინაშვილი, „სამოქალაქო აქტივობისა და რეგიონული განვითარების ცენტრი“: -    არასამთავრობო სექტორისა და დასავლური დონორების ერთობლივმა მუშაობამ ჩვენს რეგიონში, ქვემო ქართლში, უამრავი შესაძლებლობა გააჩინა და დასანანია, რომ საზოგადოების ფართო წრეებისთვის ამ კანონპროექტის საზიანო შედეგები არასამთავრობო სექტორს არ სცდება. არადა რუსული კანონპროექტის მიღების შემთხვევაში მოწყვლადი ჯგუფები (შშმ პირები, ბავშვები, ქალები, ხანდაზმულები, სპეციალური საჭიროების მქონენი, უმცირესობები და ა.შ.) რჩებიან მათ საჭიროებებზე ორიენტირებული სერვისებისა და შესაბამისი აქტივობების გარეშე; შესაძლებლობების მიღმა რჩებიან ახალგაზრდებიც (მათ შორის სასკოლო ასაკის) და მათთან ერთად პროფესიული ჯგუფებიც, რომელთათვისაც უამრავი მოხალისეობრივი და გაცვლითი საგანმანათლებლო პროგრამა შექმნა დასავლურმა დონაციებმა; გვანცა თვალიაშვილი, ახალგაზრდული მუშაკი: -    ეს კანონპროექტი არის დიქტატურის დამყარების გამოვლინება, ქვეყნის რეგრესი და დემოკრატიაზე უარის თქმა. აგრეთვე ყველა იმ სიკეთისა თუ შესაძლებლობის აკრძალვა, რომელიც გვაახლოებს განვითარებულ სამყაროსთან. როზი დევნოზაშვილი „ნეკერი-ქვემო ქართლის სათემო ორგანიზაცია“: -    უცხოური გავლენის აგენტები იმიტომ ვართ, რომ თანამოაზრეები ერთად ბავშვების კეთილდღეობისთვის ყოველდღიურად ვშრომობთ?! ბაღებსა და სკოლებში ბავშვების საჭიროებებსა და ინტერესებზე მორგებული გარემოს შესაქმნელად გეგმაზომიერ აქტივობებს რომ ვახორციელებთ, ამიტომ?! შეკითხვები რომ გვაქვს და პრობლემების იდენტიფიცირებას ვცდილობთ, რათა ჩვენი დახარჯული რესურსი მათი მოგვარებისკენ მივმართოთ, ამიტომ?! ფიქრობენ, რომ ამ ყველაფერს უცხოური გავლენის გამო ვაკეთებთ? უცხოური ქვეყნების ინტერესია, როცა ფინანსურ მხარდაჭერას გვიცხადებენ და საქართველოს ინტერესი, არა, რომ ერთხელ და სამუდამოდ ღირსეულად ვიცხოვროთ შემდგარ ქვეყანაში?! მასალის ავტორი: მანონ ბოკუჩავა სრულად... წყარო: qvemoqartli.ge

თბილისი. საქართველოს პროფკავშირების გაერთიანება მიიჩნევს, რომ უცხოური გავლენის გამჭვირვალობის კანონპროექტები, უხეშად არღვევს თავად საქართველოს კონსტიტუციით გარანტირებულ გამოხატვისა და გაერთიანების თავისუფლებებს. ასევე, ეწინააღმდეგება საქართველოს საკონსტიტუციო სასამართლოს მიერ დამკვიდრებულ პრაქტიკას უფლებათა შეზღუდვის „ლეგიტიმურობის ტესტთან“ დაკავშირებით. „...როცა ქვეყენაში უამრავი გამოწვევაა და საქართველო ემზადება ევროკავშირის წევრობის კანდიდატის სტატუსის მისაღებად, გაუგებარია, ევროკავშირის 12-პუნქტიანი გეგმის რომელი პუნქტის შესასრულებლად არის საჭირო „უცხოური გავლენის გამჭვირვალობის შესახებ“ კანონის მიღება, მით უფრო, რომ განმარტებით ბარათებში ამის შესახებ ფაქტობრივად  არაფერია ნათქვამი. საქართველოს პროფკავშირების გაერთიანება ხაზს უსვამს, რომ ევროინტეგრაცია ჩვენი ქვეყნის მოქალაქეების ურყევი ნებაა და საქართველოს პარლამენტმა, თავისი კომპეტენციის ფარგლებში, ამისთვის ყველაფერი უნდა გააკეთოს. ამავდროულად, მოსახლეობის პრიორიტეტი, არაერთი სოციალური გამოკითხვის თანახმად, მწვავე შრომითი და სოციალური პრობლემების გადაჭრაა, რაც, ასევე, არის ევროინტეგრაციის მნიშვნელოვანი ნაწილი. პროფკავშირების გაერთიანება მიმართავს პარლამენტს, არ დაუჭიროს მხარი „უცხოური გავლენის გამჭვირვალობის შესახებ“ კანონპროექტებს და გააგრძელოს მუშაობა ევროკავშირის 12-პუნქტიანი გეგმის შესასრულებლად“. სრულად... წყარო: gtuc.ge

თბილისი. ადამიანის უფლებათა კომისარმა დუნია მიატოვიჩმა საქართველოს პარლამენტის თავმჯდომარეს „უცხოური გავლენის გამჭვირვალობის“ კანონპროექტის შესახებ წერილი მისწერა. „გამჭვირვალობა შეიძლება იყოს ლეგიტიმური ინტერესი. მიუხედავად ამისა, ეს მიზანი არ უნდა მიიღწეოდეს არაკომერციული ორგანიზაციებისა და მედია საშუალებათა მიერ თავიანთი უფლებებითა და თავისუფლებებით სარგებლობის, მათი ლეგიტიმური საქმიანობის დაზიანებით. ანგარიშგების მოთხოვნა, შემოსავლის წყაროს მიუხედავად, უნდა ეფუძნებოდეს თანაბარ და მიუკერძოებელ მიდგომას. ნებისმიერი ჩარევა ამ სფეროში უნდა შეესაბამებოდეს აუცილებლობისა და პროპორციულობის პრინციპებს, როგორც ამას ითვალისწინებს ადამიანის უფლებათა ევროპული სასამართლოს პრეცედენტული სამართალი.“ წერილის ქართული ვერსია... წყარო: www.coe.int

თბილისი. ამერიკის შეერთებული შტატების ელჩი საქართველოში კელი დეგნანი პუბლიკასთან ინტერვიუში ამბობს, რომ „უცხოური გავლენის გამჭვირვალობის შესახებ“ კანონპროექტს ძალიან მნიშვნელოვანი გავლენა ექნება ამერიკის შესაძლებლობებზე, გააგრძელოს სხვადასხვა სახის დახმარება, მაგ: ფერმერთა ასოციაციების, იურიდიული სერვისების, ტურიზმის, შეზღუდული შესაძლებლობის მქონე პირების მიმართ. „...ვფიქრობ, ყველა დონორი ქვეყანა შეაფასებს, შეგვიძლია თუ არა ამ სახის მხარდაჭერის გაგრძელება საქართველოსთვის. ზოგიერთ შემთხვევაში, ჩვენი მხარდაჭერა მიმართულია ადგილობრივი მთავრობების ან ცენტრალური ხელისუფლებისადმი, რათა უზრუნველვყოთ ისეთი სერვისები, რომელთა მიწოდებაც მთავრობას არ შეუძლია. ასე რომ, მას ექნება მნიშვნელოვანი გავლენა“, აღნიშნავს კელი დეგნანი. სრულად... წყარო: პუბლიკას გვერდი სოციალურ ქსელში ფოტო: პუბლიკა

„ცოდნის კაფე“ გიზიარებთ ინფორმაციას, რას გულისხმობს ინიცირებული კანონპროექტი „უცხოური გავლენის გამჭვირვალობის შესახებ“. ორგანიზაციისთვის მიუღებელი და ღირსები შემლახავია, კანონპროექტის თანახმად, უცხოური გავლენის გამჭვირვალობის აგენტად დარეგისტრირება - „ჩვენ ძალიან ხისტი და ქიზიყური სიჯიუტით ვუპირისპირდებით რუსულ კანონპროექტს!“ „...კანონპროექტის მიღების შემთხვევაში უდიდესი რისკია ვეღარ მოვემსახუროთ ასობით სოციალურად შეჭირვებულ ახალგაზრდას და ბავშვს, ასობით ხანდაზმულს და რეგიონში მცხოვრებ ქალებს/გოგოებს.  ერთად მოვუწოდოთ საქართველოს პარლამენტი-ს წევრებს არ მიიღონ რუსული კანონპროექტი და არ დაგვინგრიონ საზოგადოებას, რაც აქამდე წვალებით და სიხარულით ერთად ვაშენეთ - საქართველოს დემოკრატია!“. წყარო: ცოდნის კაფეს გვერდი სოციალურ ქსელში

თბილისი. არაკომერციული სამართლის საერთაშორისო ცენტრმა (ICNL) და არაკომერციული სამართლის ევროპულმა ცენტრმა (ECNL) ჩაატარეს შედარებითი ანალიზი - რამდენად თავსებადია „უცხოური გავლენის გამჭვირვალობის შესახებ“ კანონპროექტი საერთაშორისო სამართალთან და ევროპულ სტანდარტებთან. ანალიზის თანახმად, კანონპროექტის ბევრი დებულება არ შეესაბამება საქართველოს მიერ საერთაშორისო კანონებით გათვალისწინებულ და ევროკავშირის სტანდარტების ფარგლებში ნაკისრ ვალდებულებებს. „...მაშინ, როდესაც საქართველო აქტიურად მუშაობს ევროკავშირის კანდიდატის სტატუსის მოპოვებაზე, აღნიშნული კანონპროექტის მიღებამ, შესაძლოა, დააზარალოს ეს ძალისხმევა. ...ყველა ა(ა)იპ-ი და მედია ორგანიზაცია, რომლის გასული წლის ჯამური შემოსავლის 20%-ზე მეტი მიღებულია უცხოური წყაროებიდან უნდა დარეგისტრირდეს და მიენიჭოს უცხოური გავლენის აგენტის სტატუსი. ეს ტერმინი საქართველოში უარყოფით დატვირთვას ატარებს და ხშირად „უცხოური ჯაშუშის“ ან „მოღალატის“ სინონიმად აღიქმება. უცხოური აგენტის სტატუსი საზოგადოებას უარყოფითად განაწყობს, რაც ამ სტატუსის მქონე ორგანიზაციების საქმიანობას საფრთხეს შეუქმნის - დააზარალებს მათ ურთიერთობას დახმარების მიმღებ პირებთან, მხარდამჭერებთან, დასაქმებულებთან და მოხალისეებთან. ...კანონპროექტის მიღების შემთხვევაში დაირღვევა საქართველოს მიერ ECHR-ისა და ICCPR-ის ფარგლებში ნაკისრი არაერთი ვალდებულება, მათ შორის, გაერთიანების თავისუფლების, პირადი ცხოვრების ხელშეუხებლობის და დისკრიმინაციისგან დაცვის ვალდებულებები. კანონპროექტის მიღება უარყოფითად იმოქმედებს საქართველოს ევროკავშირში გაწევრიანების პროცესზე. კანონპროექტი არსებითად დაასუსტებს საქართველოს სამოქალაქო საზოგადოებას, რადგან არასამთავრობო ორგანიზაციებისა და მასმედიის მიმართ ნდობა და მხარდაჭერა შემცირდება. არასამთავრობო სექტორი და მედია ვერ განახორციელებენ ეფექტიან დამოუკიდებელ კონტროლს, ვერ გაუწევენ მოქალაქეებს მნიშვნელოვან დახმარებას და ვერ შეუწყობენ ხელს დემოკრატიის გაძლიერებას“, ნათქვამია ანალიტიკურ დოკუმენტში. სრულად... წყარო: ewmi-activism.org

თბილისი. რონდელის ფონდი აქვეყნებს თეონა მაჭარაშვილის ბლოგპოსტს: ვის რა პრობლემები შეექმნება ე.წ. „აგენტების კანონპროექტის“ დამტკიცების შემთხვევაში. „ე.წ. „აგენტების“ პუტინისეული კანონის მიღება დამოუკიდებელი საქართველოსთვის ერთ-ერთი ყველაზე სახიფათო და დამღუპველი მოვლენაა, რომელიც თითოეულ მოქალაქეს შეეხება. რუსეთის მაგალითმა უკვე ერთმნიშვნელოვნად გვაჩვენა, თუ როგორ მოსპო სწორედ ამ კანონმა რუსეთში არსებული მცირედი თავისუფლება: როგორც რუსული გამოცდილება გვაჩვენებს, კანონის მიღების შემთხვევაში მალევე მოსალოდნელია მძიმე ფორმის რეპრესიები თავისუფალი საზოგადოების წინააღმდეგ. გარდა ამისა, კანონის მიღება საფრთხეს შეუქმნის დონორების დაფინანსებულ მრავალ პროექტს, რომლებითაც საქართველოს მოქალაქეებს ყოველდღიურად მიეწოდება სერვისი. შესაბამისად, ასეთ შემთხვევაში, კანონის მიღება პირდაპირ გააუარესებს თითოეული მოქალაქის მდგომარეობას, „აგენტების“ კანონის გავლენით, სავარაუდოდ, მათ შეუჩერდებათ წვდომა სამედიცინო, საგანმანათლებლო და სხვა უამრავ სიკეთეზე - საბოლოო ჯამში, კანონი დააზიანებს საქართველოს სოციალურ, ეკონომიკურ კავშირებს ევროპასთან, დააზიანებს როგორც უვიზო მიმოსვლის, ისე წევრობის შანსს და გაზრდის საქართველოს დამოკიდებულებას რუსეთზე“, ნათქვამია ბლოგპოსტში. სრულად... წყარო: gfsis.org.ge

თბილისი. ორგანიზაცია “Grlz Wave” მიიჩნევს, რომ „„უცხოური გავლენის გამჭვირვალობის შესახებ“ კანონპროექტის შესაძლო მიღების მიზანია ხელისუფლებისადმი კრიტიკულად განწყობილი მედიისა და არასამათავრობო სექტორის გაქრობა, მათთვის რეპუტაციის შერყევა და კონტროლი“... ორგანიზაცია გიზიარებთ ინფორმაციას კანონპროექტის შესახებ: კანონპროექტის მიხედვით, იმ მედია საშუალებასა თუ ორგანიზაციას, რომელთა შემოსავალში 20%-ზე მეტი დაფინანსების წილი „უცხოური ძალიდანაა” მიღებული, დაერქმევა „უცხოური გავლენის აგენტი” და ვალდებული იქნება, დარეგისტრირდეს იუსტიციის სამინისტროს მიერ მომავალში შექმნილ ვებ-გვერდზე; აგენტი არაკომერციული/არასამეწარმეო იურიდიული პირია და ვალდებული იქნება საჯაროდ (მაგალითად ვებ-გვერდზე) წარმოაჩინოს, რომ უცხოური გავლენის აგენტია; რა იგულისხმება უცხოურ ძალაში? უცხო სახელმწიფოს სისტემის მდგენელი სუბიექტი, არამოქალაქე ფიზიკური და საქართველოს გარეთ რეგისტრირებული იურიდიული პირი, ფონდი, ასოციაცია, კორპორაცია, კავშირი, ნებისმიერი გაერთიანება სხვა, უცხო სახელმწიფოს მიერ დაფუძნებული. აგენტები მიმართავენ იუსტიციის სამინისტროს და რეგისტრირდებიან, სარეგისტრაციო ფორმაში კი ივსება განმცხადებლის როგორც ციფრული, ისე ფიზიკური ადგილსამყოფელი, ასევე საჯაროდ განთავსდება ყველა სადამფუძნებლო დოკუმენტაცია. ეს პროცესი ყოველწლიურია. უფლებამოსილ პირს, ამ შემთხვევაში, იუსტიციის სამინისტროს „საჭიროების“ შემთხვევაში უფლება აქვს მოიძიოს ყველაფერი, რა ინფორმაციაც კი სურს აგენტზე, მათ შორის - პერსონალური. ... წაიკითხეთ სრულად... წყარო: ორგანიზაციის გვერდი სოციალურ ქსელში

თბილისი. არაკომერციული მედია „აი, ფაქტი“ გამომძიებელ ჟურნალისტთა გაერთიანებაა. ის 2016 წელს დაარსდა და მისი მიზანია საზოგადოებას მიაწოდოს ინფორმაცია ქვეყანაში მიმდინარე მნიშვნელოვანი მოვლენების შესახებ. მედია ორგანიზაციის პრინციპები ემყარება ფაქტების სიზუსტეს, გადამოწმებას, მიუკერძოებლობას, ბალანსის დაცვას.  „აი, ფაქტს“ ორი ოფისი აქვს, ერთი - თბილისში, მეორე კი ქუთაისში. ქუთაისში მოქმედი ოფისი ნიდერლანდების სამეფოს საელჩოს მხარდაჭერით გაიხსნა. მედია ორგანიზაციაში 7 გამომძიებელი ჟურნალისტია დასაქმებული.  „აი, ფაქტი“ საერთაშორისო დონორების და კერძო შემომწირველების დახმარებით არსებობს. ორგანიზაციის დახმარება თქვენც შეგიძლიათ - თქვენ მიერ გადარიცხული თანხა კი ისეთი მასალების შემქნას მოხმარდება, რომელიც ამხელს კორუფციას, უსამართლობას, უთანასწორობას... „აი, ფაქტი“ შეუერთდა დამოუკიდებელი მედია საშუალებების და საზოგადოებრივი ორგანიზაციების მიერ გავრცელებულ განცხადებას „უცხოური გავლენის გამჭვირვალობის“ კანონპროექტის შესახებ. „იმერეთის სოფლებში რომ ჩავდივართ, ხალხი თვალებში შემოგვციცინებს, უხარიათ რომ მათზე დავწერთ. მათთან ურთიერთობა ჩვენთვის ერთი დიდი თერაპიაა. გასაჭირსაც კი ჟღურტულით ამბობენ ამ მხარეში. ხშირად უთქვამთ, აქ მთავრობა არ მოსულა და თქვენ რა ქარმა გადმოგაგდოთო. ამ ხალხს იმედი ესახება, რომ ისინი ისევ ახსოვთ და მათი აზრი მნიშვნელოვანია. ხშირად პრობლემებიც მოგვიგვარებია მათთვის. განსაკუთრებით იმ შემთხვევაში, თუ ადგილობრივი ხელისუფლება ნამუსიანია და ესმის მედიასთან კომუნიკაციის მნიშვნელობა. ასეთი ცოტაა, მაგრამ არიან იმერეთში.   ჰოდა, ხვალ და ზეგ, უცხოური გავლენის აგენტების იარლიყს რომ მოგვაკრავს მთავრობა ამ ახალი, რუსული კანონით და მუშაობას აგვიკრძალავენ დამოუკიდებელ მედიასაშუალებებს, ვეღარავინ დაწერს ამ ალალ და კეთილ იმერლებზე ვეღარაფერს. ვერავინ თანაუგრძნობს მათ გასაჭირში. სამთავრობო მედიები მხოლოდ იმაზე დაწერენ, რაც გაკეთდა. რა არ კეთდება - ამაზე არავინ ისაუბრებს საჯაროდ. ასე მუშაობს პიარი.  მედიის საქმე მთავრობის ნაკლოვანებების გამოჩიჩქვნა და გამოფენაა. მედიის საქმე ყველა ნორმალურ ქვეყანაში ესაა და თუ ნორმალური ქვეყანა გვინდა ვიყოთ, ასეც უნდა ვქნათ“, ნათქვამია „აი, ფაქტის“ მიერ გავრცელებულ განცხადებაში. წყარო: „აი, ფაქტის“ ვებგვერდი და გვერდი სოციალურ ქსელში

თბილისი. საზოგადოებრივი ორგანიზაციებისა და მედია საშუალებები უერთდებიან განცხადებას: "რუსული კანონი არ არის საქართველოს არჩევანი". „ჩვენ, საქართველოს მოქალაქეები, კატეგორიულად ვეწინააღმდეგებით საპარლამენტო უმრავლესობის წევრების ინიცირებულ კანონპროექტს უცხოური გავლენის აგენტების შესახებ, რომლის მიმართ მხარდაჭერა პარლამენტის თავმჯდომარემ და უმრავლესობის სხვა წევრებმა გამოხატეს. მიგვაჩნია, რომ ამ რუსული კანონის მიღების მცდელობა მიმართულია არა მხოლოდ თავისუფალი სამოქალაქო საზოგადოების ორგანიზაციებისა და კრიტიკული მედიის, არამედ საქართველოს მოსახლეობის წინააღმდეგ. ეს კანონი მიზნად ისახავს, რომ დაუცველად დარჩნენ ძალადობის მსხვერპლი ბავშვები და ქალები; შეზღუდული შესაძლებლობის მქონე პირები, უმცირესობები, მეცნიერები, მშრომელები და ახალგაზრდები; დახმარება არ გაეწიოთ სოციალურად დაუცველ ოჯახებს, ფერმერებს, მაღაროელებს, უკანონოდ გათავისუფლებულ, დევნილ, უსახლკარო, თავისუფლებაშეზღუდულ და საკუთარი უფლებებისთვის მებრძოლ სხვა ადამიანებს; არ გაშუქდეს მაღალმთიან და სხვა რეგიონებში მცხოვრები ადამიანების ხმა, ვინც მხოლოდ ადგილობრივი, დამოუკიდებელი მედიის მეშვეობით აცნობს საზოგადოებას თავის გასაჭირს. ეს კანონპროექტი არის პასუხი ძალადობის, კორუფციის, უკანონობისა და შერჩევითი სამართლის იმ ასობით ფაქტზე, რომელსაც საზოგადოებრივი ორგანიზაციები და დამოუკიდებელი მედია ვსწავლობთ და ვასაჯაროვებთ. რუსეთში ანალოგიური კანონის მიღების შემდეგ ბევრმა ორგანიზაციამ უარი თქვა მის აღსრულებაზე და დაიხურა. ვინც განაგრძო ფუნქციონირება, მზარდი კონტროლის, შევიწროებისა და რეპრესიების მსხვერპლი გახდა. რუსული კანონი არ არის საქართველოს არჩევანი, რისთვისაც ათწლეულებია ვიბრძვით", ნათქვამია პეტიციაში, რომელზე ხელმოწერაც ნებისმიერ მოქალაქეს შეუძლია. სრულად... წყარო: საია-ს გვერდი სოციალურ ქსელში

თბილისი. აღმოსავლეთ პარტნიორობის სამოქალაქო საზოგადოების ფორუმის საქართველოს ეროვნული პლატფორმაში შემავალი საზოგადოებრივი ორგანიზაციები განცხადებას ავრცელებენ "უცხოური გავლენის გამჭვირვალობის შესახებ" კანონის პროექტზე. „ინიცირებული კანონპროექტი ანტიდემოკრატიულია, ანტიკონსტიტუციურია, ზღუდავს ადამიანის უფლებებს, დისკრიმინაციულია საზოგადოებრივი ორგანიზაციებისა და მედიის მიმართ", - ნათქვამია განცხადებაში. სრულად... წყარო: ეროვნული პლატფორმა

თბილისი. ორგანიზაცია “Grlz Wave” ეხმაურება საქართველოში „უცხოური გავლენის გამჭვირვალობის შესახებ“ კანონპროექტის მიღების ინიციატივას, რომლის მიხედვითაც, უცხოური გავლენის აგენტებად დარეგისტრირდება ყველა მედია საშუალება და ორგანიზაცია, რომლის შემოსავლის 20%-ზე მეტი უცხოეთიდანაა მიღებული. „მსგავსი ტიპის კომპანიებისთვის იუსტიციის სამინისტროს ექნება მონიტორინგის განხორციელების შესაძლებლობა, რომლის ფარგლებშიც, მას მიენიჭება ყველა საჭირო ინფორმაციის, მათ შორის, პერსონალური მონაცემების დამუშავების უფლებამოსილება და ამ ინფორმაციის სათავისოდ გამოყენების შესაძლებლობა. აღნიშნული კანონპროექტის მიზანია ხელისუფლებისადმი კრიტიკულად განწყობილი მედიისა და არასამათავრობო სექტორის გაქრობა, რაც გამოიწვევს თავისუფალი სიტყვისა და აზრის გამოხატვის შეუძლებლობას“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სახალხო დამცველის აპარატი ეხმაურება „უცხოური გავლენის გამჭვირვალობის შესახებ“ საქართველოს კანონის პროექტს და მიიჩნევს, რომ: "შემოთავაზებული პროექტი არ შეესაბამება ადამიანის უფლებათა საერთაშორისო და შიდა ეროვნული დაცვის სტანდარტებს და შეუთავსებელია თანამედროვე დემოკრატიული სახელმწიფოს ძირითად პრინციპებთან. ...ცალკე ყურადღებას იმსახურებს ის გარემოება, რომ წარმოდგენილი კანონპროექტი ქმნის „უცხოური გავლენის აგენტებად“ მიჩნეული და მათთან სხვადასხვა სახის ურთიერთობაში მყოფი პირების შესახებ საკმაოდ დიდი მოცულობის პერსონალური მონაცემების შეგროვების და გამოქვეყნების საფუძველს. გარდა იმისა, რომ აღნიშნული, შესაძლოა, გაუმართლებელ ორგანიზაციულ ტვირთს აკისრებდეს თავად ორგანიზაციებს და წყვეტდეს მათ ძირითადი საქმიანობისგან, ის შესაძლოა ხელყოფდეს პირადი ცხოვრების ხელშეუხებლობის უფლებას ნებისმიერი იმ ინდივიდის პერსონალური მონაცემების დამუშავების და გასაჯაროების შესაძლებლობის შექმნით, ვინც რაიმე სახის, მათ შორის, შრომით ან მომსახურების სახელშეკრულებო ურთიერთობაშია ამ ორგანიზაციებთან“. სრულად... წყარო: ombudsman.ge

თბილისი. სოციალური სამართლიანობის ცენტრი ეხმაურება ტელეკომპანია „ფორმულას“ ოპერატორების პროტესტის ირგვლივ მიმდინარე მოვლენებს და მიიჩნევს, რომ, სამწუხაროდ, ხელიდან იქნა გაშვებული შესაძლებლობა, მხარეებს შორის წამოჭრილი უთანხმოება გადაწყვეტილიყო მოლაპარაკების გზით. ორგანიზაცია სამსახურიდან მასობრივად დათხოვნილი ოპერატორების ნაწილის ინტერესებს სასამართლოში დაიცავს. სოციალური სამართლიანობის ცენტრს მნიშვნელოვნად მიაჩნია ქვეყანაში ხელისუფლებისადმი კრიტიკულად განწყობილი მედიის შეუფერხებლად მუშაობა და ითვალისწინებს ბოლო წლებში მედიისთვის გაუარესებულ პოლიტიკურ და ეკონომიკურ კონტექსტს. თუმცა, როგორც შრომის უფლებებზე და სოციალური სამართლიანობის საკითხებზე მომუშავე ორგანიზაციას, მიაჩნია, რომ დამსაქმებელი ორგანიზაციის საჯარო მნიშვნელობა და მის მიმართ საზოგადოებრივი პატივისცემა, არ ათავისუფლებს მას ვალდებულებისგან, დაიცვას საკუთარი თანამშრომლების შრომითი უფლებები. სრულად... წყარო: socialjustice.org.ge

თბილისი. საქართველოს დემოკრატიულმა ინიციატივამ (GDI) გამოხატვის თავისუფლებაზე გაეროს სპეციალურ მომხსენებელს წარუდგინა ანგარიში, ქვეყანაში არსებული მედია გარემოს შესახებ. კერძოდ, ანგარიშში განხილულია ის პრობლემები, რომელიც ცალსახად უშლის ხელს თავისუფალი მედია გარემოსა და მდგრადი განვითარების მიზნების, კერძოდ კი მე-16 მიზნის მიღწევას. სრულად... წყარო: gdi.ge

თბილისი. ევროკავშირმა კონკურსის „ევროკავშირის პრიზი ჟურნალისტიკაში“ 2022, გამარჯვებულები გამოავლინა და დააჯილდოვა. გაიცანით გამარჯვებულები და წაიკითხეთ მათი ნაშრომები: ნინო ნარიმანიშვილი, ჯემნიუსი, საუკეთესო სტატია ბეჭდურ ან ელექტრონულ მედიაში ანი არველაძე, გადაცემა დროება, ტელეკომპანია ფორმულა, საუკეთესო სიუჟეტი სამაუწყებლო ან ელექტრონულ მედიაში ნინო რამიშვილი - სტუდია მონიტორი, საუკეთესო საგამოძიებო სტატია ან სიუჟეტი ბეჭდურ, ელექტრონულ ან სამაუწყებლო მედიაში ბესიკ პაპასქუა, ინდიგო, საუკეთესო ბლოგი, საავტორო სტატია, სვეტი ბეჭდურ ან ელექტრონულ მედიაში ქრისტინე გოგალაძე, ინდიგო, კატეგორიაში საუკეთესო სტუდენტური ნაშრომი ბეჭდურ, სამაუწყებლო ან ონლაინ მედიაში ლელა კუნჭულია, რადიო თავისუფლება, ევროკავშირის სადამკვირვებლო მისიის სპეციალური პრიზი მშვიდობის ჟურნალისტიკაში თორნიკე მეტრეველი, ინდიგო, საუკეთესო ორიგინალური და ინოვაციური ნაშრომი ბეჭდურ, ელექტრონულ ან სამაუწყებლო მედიაში დინა ოგანოვა, პროექტი 64, ევროკავშირის ფასეულობების ამსახველი, საუკეთესო დოკუმენტური ფოტო სრულად... წყარო: eu4georgia.eu

თბილისი. მედიის ადვოკატირების კოალიცია დაუშვებლად მიიჩნევს საჯარო ინფორმაციის მოთხოვნის გამო ჟურნალისტების დისკრედიტაციის მცდელობას, რაც გამოიხატა ადმინისტრაციული ორგანოების მხრიდან პერსონალური მონაცემების გასაჯაროების და მესამე პირებისთვის უკანონოდ გადაცემის შემთხვევებში. „2023 წლის 16 იანვარს, „მთავარი არხის“ საინფორმაციო სამსახურის მთავარი პროდიუსერი, თეა გილიგაშვილი, პარლამენტიდან საჯარო ინფორმაციის გამოთხოვის გამო დეზინფორმაციული კამპანიის მსხვერპლი გახდა. თეა გილიგაშვილმა პარლამენტიდან კანონით დადგენილი ფორმით გამოითხოვა ინფორმაცია ხარჯების თაობაზე და იკითხა, რა სახსრებით გაემგზავრნენ მმართველი პარტიის წევრები იტალიაში, ხვიჩა კვარაცხელიას საფეხბურთო მატჩზე დასასწრებად და ვინ დააფინანსა მათი მოგზაურობა. საქართველოს პარლამენტისთვის გაგზავნილი წერილი მალევე  მმართველ პარტია „ქართულ ოცნებასთან“, აფილირებულმა Facebook გვერდმა „სინამდვილეში“ გამოაქვეყნა და  გილიგაშვილი საჯარო ინფორმაციის გამოთხოვის გამო ხელისუფლების „დისკრედიტაციის მცდელობაში“ დაადანაშაულა“. სრულად... წყარო: transparency.ge

თბილისი. გამოვლინდა კონკურსის „ევროკავშირის პრიზი ჟურნალისტიკაში“ ფინალისტები კატეგორიაში „ევროკავშირის ფასეულობების ამსახველი საუკეთესო დოკუმენტური ფოტო“. გაიცანით ფინალისტები და იხილეთ მათი ფოტოები: დათო ქორიძე, რადიო თავისუფლება... დინა ოგანოვა, პროექტი 64... მარიამ ნიკურაძე, OC Media... თვალი ადევნეთ ევროკავშირის გვერდს 2022 წლის გამარჯვებულების სანახავად. სრულად... წყარო: ორგანიზაციის გვერდი სოციალურ ქსელში

თბილისი. კონკურსის „ევროკავშირის პრიზი ჟურნალისტიკაში“ ფინალისტები ცნობილია კატეგორიაში „საუკეთესო ბლოგი, საავტორო სტატია, სვეტი ბეჭდურ ან ელექტრონულ მედიაში“. გაიცანით ფინალისტები და წაიკითხეთ მათი ნაშრომები: ბესიკ პაპასქუა, ინდიგო... ჯიმშერ რეხვიაშვილი, რადიო თავისუფლება... ხატია თორდუა, NEXT.On.ge... თვალი ადევნეთ ჩვენს გვერდს სხვა კატეგორიის ფინალისტებისა და 2022 წლის გამარჯვებულების სანახავად. წყარო: ევროკავშირის გვერდი სოციალურ ქსელში