თბილისი. საერთაშორისო გამჭვირვალობა - საქართველომ კიდევ ერთი ჟურნალისტის, თენგო გოგოტიშვილის საქმე მოიგო. ორგანიზაციის იურისტებმა საქმე სამივე ინსტანციის სასამართლოში მოიგეს. სრულად... წყარო: ორგანიზაციის გვერდი სოციალურ ქსელში

იმერეთი. საქართველოს ახალგაზრდა იურისტთა ასოციაცია (საია) სასამართლოში იცავდა სამტრედიის მუნიციპალიტეტის მერიაში შიდა აუდიტის სამსახურის მონიტორინგისა და შიდა კონტროლის განყოფილების უფროსის ინტერესებს, რომელიც დაწესებულებაში მრავალწლიანი მუშაობის შემდეგ სამსახურიდან გათავისუფლდა. „სასამართლომ უკანონოდ მიიჩნია მოხელის სამსახურიდან გათავისუფლება. ამასთან, მოპასუხე უწყებას დაევალა უკანონოდ გათავისუფლებული პირის სამსახურში აღდგენა და მისთვის იძულებითი განაცდურის ანაზღაურება“. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაციას (საია) 2016 წლის ივლისში, მიმართა მოქალაქემ, რომელმაც განაცხადა, რომ იგი წლების განმავლობაში ჩართული იყო საამშენებლო ბიზნესში და აწარმოებდა დაკვეთით შესაბამის სამუშაოებს.  „მოქალაქის განმარტებით, იგი 2011 წელს, დაიბარეს სამართალდამცავ უწყებაში და განუცხადეს, რომ მის მიმართ აღიძრა სისხლის სამართლის საქმე, რომელზეც მხოლოდ იმ შემთხვევაში შეიძლებოდა საპროცესო შეთანხმების გაფორმება, თუ იგი მისი ნებით ქუთაისში შეასრულებდა 200 000 ლარის ღირებულების სამშენებლო სამუშაოებს. შესაძლო სისხლისსამართლებრივი პასუხისმგებლობის დაკისრების შიშის გამო, პირი დაეთანხმა შემოთავაზებას და მასთან 2012 წელს დაიდო შეთანხმება, რომლის საფუძველზე ყოველგვარი ანაზღაურების გარეშე განხორციელდა შიდასახელმწიფოებრივი მნიშვნელობის საავტომობილო გზის თბილისი-სენაკი-ლესელიძის 231 კმ-ის სარემონტო სამუშაოები. საიას დახმარებით, მოქალაქემ მიმართა თბილისის საქალაქო სასამართლოს და მოითხოვა შესაბამისი სარემონტო სამუშაოების ანაზღაურება სახელმწიფოსგან. თბილისის საქალაქო სასამართლოში საქმე წარმატებით დასრულდა. კერძოდ, მოპასუხე საავტომობილო გზების დეპარტამენტს მოსარჩელის სასარგებლოდ 171.000 ლარის გადახდა დაევალა“. მოსარჩელის ინტერესებს იცავდა საქართველოს ახალგაზრდა იურისტთა ასოციაცია. სრულად... წყარო: gyla.ge

თბილისი. „უფლებები საქართველოს“ იურიდიული დახმარებით, ირანელ ბლოგერს საერთაშორისო დაცვა მიენიჭა. საქართველოში თავშესაფარს იგი 2015 წლიდან ითხოვდა.  „ბლოგერი ირანში საპრეზიდენტო არჩევნების შემდეგ საპროტესტო გამოსვლებსა და მოძრაობებზე ღიად საუბრობდა მედიებთან. აქვეყნებდა სტატიებს ირანის პოლიტიკურ და სოციალურ-ეკონომიკურ წყობაზე და ამერიკასთან აქტიური თანამშრომლობის და ირანის პოლიტიკურ სისტემაში ცვლილებების განხორციელების სურვილს საჯაროდ აფიქსირებდა. 2009 წელს მას სასწავლო განყოფილება დახურეს, 2010 წელს კი უშიშროების სამსახურმა ანტი-ისლამურ ორგანიზაციებთან თანამშრომლობა დააბრალა და დააპატიმრა. ირანელმა ბლოგერმა, უძრავი ქონების გარანტიის სახით ჩადების სანაცვლოდ, საპატიმროდან თავი დაიხსნა და ქვეყანა დატოვა, რადგან შიშობდა, რომ თავისი საქმიანობის გამო, მის სიცოცხლეს საფრთხე ემუქრებოდა“. ვრცლად... წყარო: rights.ge

თბილისი. გაეცანით საქართველოს ახალგაზრდა იურისტთა ასოციაციის მოხალისეობრივი პროექტის „ერთი თვე სასამართლო მონიტორად“ მონაწილის, მევლუდ გუმბერიძის ბლოგპოსტს: საპროცესო შეთანხმება და მასთან დაკავშირებული დაკვირვებები ქუთაისის საქალაქო სასამართლოს პრაქტიკაზე დაყრდნობით. „საპროცესო შეთანხმების დადებამ, შესაძლოა, გავლენა მოახდინოს არა მარტო დაზარალებულზე, არამედ სხვა პირების ინტერესებზე. ეს კიდევ უფრო მეტ მნიშვნელობას სძენს პროცესის ეფექტიანი სასამართლო კონტროლს. საქმის არსებითი განხილვის გარეშე განაჩენის გამოტანა ქმნის შთაბეჭდილებას, რომ მოსამართლე თავიდანვე მოწოდებულია დაამტკიცოს მხარეებს შორის მიღწეული შეთანხმება, რაც საბოლოო ჯამში პროცესის მიმდინარეობას ფორმალურ ხასიათს სძენს“, ნათქვამია ბლოგპოსტში. სრულად... წყარო: gyla.ge

თბილისი. სოციალური სამართლიანობის ცენტრი გიზიარებთ თარგმანს, რომელიც ცდილობს პასუხი გასცეს შეკითხვას, რისი გაკეთება შეუძლიათ სასამართლოებს საკუთარი დამოუკიდებლობის დასაცავად და როგორი უნდა იყოს სტრატეგიები, რომლებიც ამ მიზნამდე მიგვიყვანს? „სტატიაში, პირველ რიგში, განხილულია სასამართლო ხელისუფლების ინსტიტუციური სისუსტეები ხელისუფლების სხვა შტოებთან მიმართებით და მათ კავშირი დამოუკიდებლობის საფრთხეებთან. ამასთან, თარგმანი ეხება სასამართლოს მიერ დამოუკიდებლობის მოპოვებისათვის საზოგადოების აღქმების გადამწყვეტ მნიშვნელობას და გადაწყვეტილების მიღების კრიტიკულ მახასიათებლებს, რომლებიც მისი ლეგიტიმაციის შესახებ არგუმენტებზე მსჯელობისას ფიგურირებს. ბოლოს, სტატია მიმოიხილავს სტრატეგიებს, რომლითაც სასამართლოებს შეუძლიათ იზრუნონ საზოგადოებაში საკუთარი ლეგიტიმაციის კულტივირებაზე და ყურადღების მიღმა არ ტოვებს იმ საფრთხეებსაც, რაც ამ სტრატეგიებს შესაძლოა მოჰქონდეს თავად სასამართლოს დამოუკიდებლობისთვის“. სრულად... წყარო: socialjustice.org.ge

თბილისი. საქართველოს ახალგაზრდა იურისტთა ასოციაციის (საია) ცნობით, 2021 წლის 5-6 ივლისის მოვლენებიდან 2 წელი გავიდა, თუმცა, ამ დრომდე შესაძლო დანაშაულების ყველა ეპიზოდი არ არის სათანადოდ გამოძიებული.  „ნათელია, რომ, მიუხედავად კონკრეტული მოძალადე პირების დასჯისა, სისხლის სამართლის საქმის საპროცესო ხელმძღვანელ უწყებას არ აქვს სათანადო ნებელობა, დასაჯოს ძალადობის ორგანიზატორი, ხელმძღვანელი ან ძალადობრივი ქმედებების საჯაროდ მომწოდებელი პირები. მართალია, გამოძიება, მათ შორის, მიმდინარეობს ძალადობის ორგანიზატორთა მიმართ, თუმცა, მისი მიმდინარეობა კონკრეტული პირების მიმართ ბრალის წარუდგენლობისა და გამოძიების ფოკუსიდან გამომდინარე, არ არის ყოველმხრივი,  საია 2021 წლის 5-6 ივლისს განვითარებული ძალადობრივი მოვლენების შედეგად დაზარალებული პირების უფლებებს იცავს. ამ ეტაპზე საია ჩართულია 19 პირის საქმეში“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. სოციალური სამართლიანობის ცენტრი აქვეყნებს ახალ დოკუმენტს, რომელიც იკვლევს დანაშაულის პრევენციის პოლიტიკას საქართველოში. ნაშრომის მიზანია შეაფასოს, რამდენად ქმედითია შესაბამისი ორგანოების მიერ გადადგმული ნაბიჯები პრევენციის დამკვიდრებული პრაქტიკის ცვლილებისა და გაუმჯობესებისთვის. „დანაშაულის პრევენციის არსებული პოლიტიკა, პრევენციული მექანიზმები და ცალკეული ღონისძიებები, სათანადოდ ვერ პასუხობს ქვეყანაში არსებულ გამოწვევებს. ბუნდოვანია მისი იდეოლოგიური ჩარჩოც. სახელმწიფო თითქმის არ იყენებს დანაშაულის სოციალური პრევენციის მეთოდებს. შესაბამისად, პრევენცია კვლავ ვიწროდ, სამართალდამცავი სისტემის ფარგლებშია მოქცეული და საპოლიციო მექანიზმებით ხორციელდება. საპოლიციო რეაგირება დანაშაულზე თითქმის ყოველთვის რეაქტიულია და პოლიცია მეტწილად სიტუაციური მეთოდებით პრევენციის მესამე დონეზე ერთვება. დანაშაულზე მხოლოდ ამგვარ საპოლიციო რეაქციას შეიძლება, ჰქონდეს მისი კონტროლისა და ინდივიდუალურ დონეზე დროებითი შეკავების უნარი, თუმცა საპოლიციო კონტროლით სახელმწიფო ვერ ახდენს სათანადო გავლენას დანაშაულის განმაპირობებელ სოციალურ და ეკონომიკურ ფაქტორებზე. შესაბამისად, არსებული პოლიტიკა ვერ იცავს ზღვარს დანაშაულის კონტროლსა და პრევენციას შორის და ვერ  უზრუნველყოფს მდგრადი პრევენციული შედეგების მიღწევას“. სრულად... წყარო: socialjustice.org.ge

თბილისი. 13 წლის გიორგის (სახელი შეცვლილია) შეზღუდული შესაძლებლობის მქონე ბავშვია, მას ინფორმაციის ვერბალურად გადმოცემა უჭირს. საქმე ეხება 2023 წლის აპრილში მომხდარ ფაქტს, როდესაც ტრანსპორტის მძღოლმა ბავშვზე ფიზიკურად იძალადა. „სკოლიდან დაბრუნებულმა ბავშვმა დედას მაშინვე მიანიშნა ჯერ ფეხზე, შემდეგ კი მკერდზე. დედამ ბავშვის სხეული დაათვალიერა და აღმოაჩინა, რომ გიორგის მარცხენა ბარძაყზე, მკერდის მარჯვენა და მარცხენა მხარეს დაზიანებები ემჩნეოდა და აშკარად ეტყობოდა თითების კვალი. აღსანიშნავია, რომ ბავშვი სახლში მხოლოდ მძღოლმა მოიყვანა, ტრანსპორტირების ასისტენტი მასთან ერთად არ ყოფილა“. მძღოლმა ბავშვის დედას უთხრა, რომ ბავშვს მხოლოდ ეხუმრა. გიორგის დედამ საგამოძიებო უწყებას მიმართა, გამოძიება დაიწყო, გიორგის სამედიცინო ექსპერტიზა ჩაუტარდა. პარტნიორობა ადამიანის უფლებებისთვის (PHR) 2023 წლის აპრილში, ფაქტიდან რამდენიმე დღეში საქმეში ჩაერთო. ბავშვის ადვოკატმა ანა თავხელიძემ განცხადებით მიმართა პროკურორს და გიორგის დაზარალებულად ცნობა მოითხოვა. პროკურორმა ბავშვი მსხვერპლად არ აღიარა, რადგან ის ამ დრომდე გამოკითხული არ არის, მისი ფიზიკური საჭიროებებიდან გამომდინარე (პროკურორის არგუმენტი). 2023 წლის 30 ივნისს ბავშვის ადვოკატმა თბილისის საქალაქო სასამართლოს მიმართა პროკურატურის უარის გაუქმებისა და გიორგის დაზარალებულად აღიარების მოთხოვნით. სრულად... წყარო: phr.ge

ქვემო ქართლი. საქართველოს ახალგაზრდა იურისტთა ასოციაციის (საია) რუსთავის ოფისი იცავდა დაზარალებული ქალის ინტერესებს, რომელიც წლების მანძილზე მეუღლის მხრიდან სისტემატური ძალადობისა (ფსიქოლოგიური, ეკონომიკური, ფიზიკური) და მუქარის მსხვერპლი იყო. „რუსთავის საქალაქო სასამართლომ ქალთა წინააღმდეგ ძალადობისა და ოჯახში ძალადობის აღკვეთისა და პრევენციის შესახებ ევროპის საბჭოს კონვენციის („სტამბოლის კონვენცია“) რეკომენდაციაზე მითითებით, დაადგინა განაჩენი, შედეგად, ბრალდებულს განუსაზღვრა თავისუფლების აღკვეთა 2 (ორი) წლის ვადით“. სრულად... წყარო: gyla.ge

ქვემო ქართლი. 5 ივლისს, სოციალური სამართლიანობის ცენტრი მარნეულის მუნიციპალიტეტის სოფელ ახალი დიოკნისის მოსახლეობისთვის სამართლებრივი დახმარების შეხვედრას გამართავს. ორგანიზაციის იურისტები ადგილობრივ მოსახლეობას შესთავაზებენ უფასო სამართლებრივ კონსულტაციას მათთვის პრობლემატურ სამართლებრივ საკითხებზე. მათ შორის, ეკომიგრაციის, ეთნიკური, რელიგიური ნიშნით დისკრიმინაციის, პოლიციის თანამშრომლების მხრიდან არასათანადო მოპყრობის, მოქალაქეობის, მიწაზე საკუთრების უფლების რეგისტრაციის საკითხებზე, ოჯახში ძალადობისა და იძულებით ქორწინების საკითხებზე. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი გიზიარებთ სტატიას: „შმიტელზენის სასამართლო“. „წინამდებარე სტატიის თარგმანი ეხება „შმიტელზენის სასამართლოს“ ლეგიტიმაციის წყაროს და ხსნის, რატომაა სასამართლოსთვის სასიცოცხლოდ მნიშვნელოვანი, დაეყრდნოს საზოგადოებრივ მხარდაჭერას. თარგმანი ასევე მიმოიხილავს „შმიტელზენის სასამართლოს“ სამ წარმატებული მაგალითის: ამერიკის შეერთებული შტატებისა და ისრაელის უზენაეს სასამართლოებს და ადამიანის უფლებათა ევროპული სასამართლოს საზოგადოებრივი ლეგიტიმაციის საკითხებს.“ სრულად... წყარო: socialjustice.org.ge

თბილისი. 2023 წლის 12 ივნისს, ორგანიზაციამ „პარტნიორობა ადამიანების უფლებებისთვის“ (PHR) საზოგადოებას აცნობა, რომ სამართლებრივად იცავს შეზღუდული შესაძლებლობის მქონე გოგოებს, რომლებიც გახდნენ სქესობრივი დანაშაულების და პირადი ცხოვრების ამსახველი ინფორმაციის უკანონოდ მოპოვების და გავრცელების მსხვერპლები. ორგანიზაციის ადვოკატების ჩართულობით, საქმეზე ამ წუთებშიც გრძელდება საგამოძიებო და საპროცესო მოქმედებები - იკითხებიან მოწმეები, გროვდება მტკიცებულებები, რომლის შემდეგაც, PHR-ი მოითხოვს მსხვერპლი გოგოების დაზარალებულად ცნობას. „მაღალი საზოგადოებრივი ინტერესებიდან გამომდინარე, საქმის პროგრესის შესახებ PHR პერიოდულად მოგაწვდით განახლებულ ინფორმაციას მსხვერპლი გოგოების კონფიდენციალობის და ინტერესების დაცვით“. სრულად... წყარო: ორგანიზაციის გვერდი სოციალურ ქსელში

თბილისი. „საერთაშორისო გამჭვირვალობა-საქართველო“ აქვეყნებს ბლოგპოსტს: სამი ტენდენცია, რომელიც მედიის წინააღმდეგ სასამართლო საქმეთა განხილვებში გამოიკვეთა. ორგანიზაცია 200-მდე ჟურნალისტის უფლებებს იცავს სასამართლოში. საქმეების განხილვის პროცესში გამოკვეთილი სამი მნიშვნელოვანი ტენდენციაა: გაუმართლებლად ხანგრძლივი განხილვის ვადები; საქმეთა განხილვა სასამართლო პრაქტიკის იგნორირებით; შრომითი დავების დროს სასამართლო მიერ მტკიცების ტვირთს მედიის წარმომადგენლებზე დაკისრება. სრულად... წყარო: transparency.ge

თბილისი. კოალიცია დამოუკიდებელი და გამჭვირვალე მართლმსაჯულებისთვის ეხმიანება საერთო სასამართლოების შესახებ ორგანულ კანონში შეტანილ ცვლილებებს. 13 ივნისს საქართველოს პარლამენტმა საერთო სასამართლოების შესახებ საქართველოს ორგანულ კანონში ცვლილებები მესამე მოსმენით მიიღო. „„ქართული ოცნების“ მიერ ცვლილებების მიღების გაცხადებული მიზანი, ევროკომისიის რეკომენდაციების შესრულება იყო, თუმცა ვენეციის კომისიის დასკვნის შესაბამისად, კანონპროექტი ვერ ასრულებდა მართლმსაჯულების შესახებ რეკომენდაციას.  სწორედ ამიტომ: მოვუწოდებთ საქართველოს პრეზიდენტს კანონი დაჩქარებული წესით დასკვნის მისაღებად წარუდგინოს ვენეციის კომისიას; მოვუწოდებთ პრეზიდენტსა და საქართველოს პარლამენტს, საჭიროების შემთხვევაში, გამოიყენონ კონსტიტუციური მექანიზმები, რომლებიც უზრუნველყოფს ვენეციის კომისიის რეკომენდაციების შესაბამისად კანონში მართლმსაჯულების ფუნდამენტური რეფორმის ასახვას“, ნათქვამია კოალიციის განცხადებაში. ვრცლად... წყარო: idfi.ge

თბილისი. საქართველოს ახალგაზრდა იურისტთა ასოციაციის ინფორმაციით, ევროპის საბჭოს მინისტრთა კომიტეტმა „ცინცაბაძის ჯგუფის” საქმეების აღსრულების საკითხი შეაფასა და საქართველოს ხელისუფლებას კიდევ ერთხელ მოუწოდა ინდივიდუალური და ზოგადი ღონისძიებების ფარგლებში კონკრეტული ნაბიჯების გადადგმა. „„ცინცაბაძის ჯგუფის” საქმეები, რომელსაც მინისტრთა კომიტეტი გაძლიერებული პროცედურის ფარგლებში ზედამხედველობს, სიცოცხლის უფლების ხელყოფის, არასათანადო მოპყრობის აკრძალვას და ამ ფაქტებზე მიმდინარე გამოძიების არაეფექტიანობას შეეხება.  ამ საქმეების აღსრულების მონიტორინგს საია USAID სამართლის უზენაესობის პროგრამის მხარდაჭერით აწარმოებს“. სრულად... წყარო: gyla.ge

კახეთი. საქართველოს ახალგაზრდა იურისტთა ასოციაციის ინფორმაციით, დღეს გურჯაანის რაიონული სასამართლო განიხილავს 2023 წლის 20 მაისს, ყვარლის ტბის მიმდებარე ტერიტორიაზე გამართულ მშვიდობიან აქციაზე დაკავებული პირების ადმინისტრაციულ სამართალდარღვევათა საქმეს. სასამართლოში რამდენიმე დაკავებული პირის ინტერესებს საიას ადვოკატი დაიცავს. ამ საქმეს საია USAID სამართლის უზენაესობის პროგრამის მხარდაჭერით აწარმოებს. სრულად... წყარო: ორგანიზაციის გვერდი სოციალურ ქსელში

სამცხე-ჯავახეთი. გავრცელებული ინფორმაციით, 17 ივნისს, ბორჯომში, საბავშვო ბანაკის მონაწილეებსა და ჩვეულებრივ დამსვენებლებს რამდენიმე ათეული მოძალადე თავს დაესხა. „„გირჩი - მეტი თავისუფლებისა“ და „Institute For Individual Liberty“-ის მიერ გამართულ ბანაკს მოძალადეებმა ესროლეს ქვები, წითელი საღებავები, აგინეს და ხელი შეუშალეს მუშაობაში. ერთ-ერთმა მოძალადემ სასტუმროში მყოფ ახალგაზრდებსა და არასრულწლოვნებს გენიტალიებიც უჩვენა. შინაგან საქმეთა სამინისტრო, თვითმხილველების ცნობით, ძალადობას, სულ მცირე 40 წუთი, რეაგირების გარეშე ტოვებდა. თავს დაესხნენ „გირჩი - მეტი თავისუფლების” თავმჯდომარეს, ზურაბ გირჩი ჯაფარიძეს, რომელიც ბორჯომში, ამავე ბანაკში, ლექციის ჩასატარებლად მიემართებოდა. თბილისის სახელმწიფო უნივერსიტეტში ფიზიკურად გაუსწორდნენ მმართველი პარტიის თავმჯდომარის, ირაკლი კობახიძის, სალექციო აუდიტორიის გარეთ მშვიდობიანად, ბანერებით მდგომ სტუდენტებს, რომლებიც პარტიის პრორუსულ პოლიტიკას აპროტესტებდნენ. დროის მცირე მონაკვეთში განხორციელებული სამი თავდასხმა აშკარად წინასწარ დაგეგმილი და ორგანიზებულია. ეს დანაშაულებრივი ქმედებები ეწინააღმდეგება ქართულ ღირებულებებს - შემწყნარებლობას და მშვიდობიანობას. ახალგაზრდებზე, ბავშვებზე თავდასხმა არა მხოლოდ კანონს არღვევს, არამედ შეუთავსებელია ქართული საზოგადოების ღირებულებებთან. ოპოზიციური პოლიტიკოსებისა და მოსახლეობის დევნა არის რუსეთის, პუტინის რეჟიმის, ხელწერა; სწორედ ოკუპანტი სახელმწიფო უსწორდება ოპონენტებს და ძალადობრივად ახშობს სიტყვის და გამოხატვის თავისუფლებას“, ნათქვამია ერთობლივ განცხადებაში. სამოქალაქო საზოგადოების ორგანიზაციები მოუწოდებენ სამართალდამცავ უწყებებს, დაუყოვნებლივ აღკვეთონ სიძულვილის დანაშაულები და კანონის სრული სიმკაცრით დასაჯონ დამნაშავეები. სრულად... წყარო: www.hrc.ge

თბილისი. საერთაშორისო გამჭვირვალობა საქართველოს იურისტებმა კიდევ ერთი მოქალაქის საქმე მოიგეს. კახაძეების შვიდსულიან ოჯახს მეწყერმა სახლი დაუნგრია, თუმცა კომპენსაციის გაცემაზე უარი უთხრეს. ორგანიზაციის იურისტებმა კახაძეების საქმეზე ორი ინსტანციის სასამართლოში იდავეს და შედეგად, დევნილთა, ეკომიგრანტთა და საარსებო შემწეობის უზრუნველყოფის სააგენტო კახაძეების განაცხადს ხელახლა განიხილავს. სრულად... წყარო: ორგანიზაციის გვერდი სოციალურ ქსელში

თბილისი. სოციალური სამართლიანობის ცენტრი გთავაზობთ სტატიის თარგმანს, რომელიც აანალიზებს „სასამართლოს შიდა დამოუკიდებლობის“ კონცეფციას ადამიანის უფლებათა ევროპული სასამართლოს პრაქტიკის მიხედვით. ნაშრომი გვთავაზობს სამართლიანი სასამართლოს უფლებაზე არსებული პრაქტიკის ორი დამფუძნებელი კონცეფციის - დამოუკიდებლობისა და მიუკერძოებლობის - ინტერპრეტაციის მოდიფიცირებას იმგვარად, რომელიც გაითვალისწინებს შიდა დამოუკიდებლობის ელემენტს და გამოსადეგი და რელევანტური იქნება ევროპის საბჭოს წევრი სახელმწიფოებისათვის. სრულად... წყარო: socialjustice.org.ge

თბილისი. „აი, ფაქტი“ აქვეყნებს ანალიტიკურ მასალას „როგორ (არ) იძიებს პოლიცია ქურდობის დანაშაულებს“. ბლოგპოსტში რამდენიმე რესპონდენტის ისტორიაა განხილული. ყველა მათგანი ამბობს, რომ პოლიციის განყოფილებაში მოპარული ნივთის დაკარგულად გაფორმებას სთხოვდნენ. „აი, ფაქტი“ დაინტერესდა, რატომ არ იძიებენ ქურდობის შემთხვევებს პოლიციელები. სამართლის დარგის ექსპერტების აზრით, პოლიციელები გაუხსნელი საქმეების სტატისტიკის „შერბილებას“ და რეალურად დამძიმებული კრიმინოგენური სიტუაციის დაფარვას ცდილობენ. „ქურდობა გავრცელებული ეკონომიკური დანაშაულია. შინაგან საქმეთა სამინისტრომ გასულ წელს ქურდობის 16,000-მდე შემთხვევა დააფიქსირა. ხუთი წლის წინ კი ეს რიცხვი გაცილებით ნაკლები, 11,000-მდე იყო. მიმდინარე წლის პირველ კვარტალში პოლიციამ დაარეგისტრირა ქურდობის 3,502 შემთხვევა, მათი 41 პროცენტი, 1,451 შემთხვევა გაუხსნელია. ...შესაძლოა პოლიციელებს არ სურთ გაზარდონ გაუხსნელი საქმეების სია, ან უბრალოდ საქმეს იმარტივებენ. ეს ყველაფერი კი აწყობს მათ ხელმძღვანელობასაც, რათა ოპოზიციის და სამოქალაქო საზოგადოებისგან არ ისმინონ კრიტიკა, გამოუძიებელი დანაშაულების მაღალ რიცხვზე და მძიმე კრიმინოგენურ სიტუაციაზე“. სრულად... წყარო: ifact.ge

თბილისი. საქართველოს ახალგაზრდა იურისტთა ასოციაცია (საია) შეშფოთებულია, რომ თბილისის შემდგომ, ბათუმშიც გრძელდება გამოხატვისა და შეკრების თავისუფლების რეპრესიული საპოლიციო მექანიზმებით უკანონო შეზღუდვა.  გავრცელებულ კადრებში ჩანს პოლიციის მიერ ფიზიკური ძალის გამოყენება რამდენიმე პირის მიმართ (შეხლა-შემოხლა, ხელის კვრა, ასევე, ჩანს, ძალადობრივი მეთოდით დაკავების ფაქტები და მუქარა („სამარცხვინო ვინ არის, განახებთ”). Როგორც კადრებიდან ჩანს, აქციის მონაწილე პოლიციელისადმი „სამარცხვინოს” წოდების გამო დააკავეს. როდესაც მშვიდობიან დემონსტრაციაზე ადამიანის ქმედება არც ძალადობრივია, არც მიზნად ისახავს ძალადობას, არც აქვს რესურსი, გადაიზარდოს მოვლენათა ესკალაციაში, მისი ადმინისტრაციული წესით დაკავება ეწინააღმდეგება შეკრებისა და გამოხატვის თავისუფლებებით დაცულ გარანტიებს“, ნათქვამია საია-ს განცხადებაში. სრულად... წყარო: gyla.ge