თბილისი. ორგანიზაცია „საფარის“ ინფორმაციით, მცხეთის რაიონულმა სასამართლომ ე.წ. ავტოსტოპის საქმეზე გამამტყუნებელი განაჩენი გამოიტანა და ტრაილერის მძღოლს 5 000-ლარიანი ჯარიმა დააკისრა. დაზარალებული ქალის ინტერესებს „საფარის” იურისტი, თამარ ლუკავა იცავს. ავტოსტოპით გურიიდან თბილისისკენ მიმავალ ქალს ტრაილერის მძღოლმა გაუჩერა და მგზავრობა შესთავაზა. გარკვეული ხნის შემდეგ, მძღოლმა ქალთან სექსუალური ხასიათის, შეურაცხმყოფელი საუბრები დაიწყო. ქალი ცდილობდა, თავის დასაღწევად მოძრავი ტრაილერის კარიც კი გაეღო, თუმცა მძღოლმა კარიც ჩაკეტა. საბოლოოდ, ქალმა მეგობრის დახმარებით პოლიცია გამოიძახა, ეკიპაჟმა კი დასაკითხად გადაიყვანა. „სამი საათის განმავლობაში ვიყავით მოსაცდელში და ველოდებოდი პროკურორს ისე, რომ არავინ ყურადღებას არ მაქცევდა. გარდა ამისა, მოდიოდნენ და მეუბნებოდნენ, რომ მომეჩვენა და ბიჭს ციხისთვის ტყუილად ვიმეტებდი. შეურაცხმყოფელად, დამამცირებლად, ძაან ცუდად მელაპარაკებოდნენ. როგორც კი ჩემმა მეგობარმა ახსენა „საფარი“, იმ წამსვე შემიყვანე თბილ ოთახში, დამსვეს, მომიტანეს წყალი, მაშინვე შეცვალეს დამოკიდებულება. „საფარის“ იურისტის სახელის ხსენების შემდეგ ისე მექცეოდნენ, როგორც მართლა უნდა მოექცე მსხვერპლს“, აღნიშნავს დაზარალებული ქალი. სრულად... წყარო: sapari.ge

თბილისი. კოალიციამ დამოუკიდებელი და გამჭვირვალე მართლმსაჯულებისთვის მოამზადა ბროშურა, რომლის მიზანია მოკლედ პასუხი გასცეს საზოგადოებისთვის მნიშვნელოვან კითხვებს. რატომ არის სასამართლო მნიშვნელოვანი ჩვენთვის? როგორ იცავს ის ჩვენს უფლებებს და კანონის უზენაესობას? როგორი უნდა იყოს სასამართლო და მოსამართლე, რომელიც ჩვენს უფლებებს ეფექტურად დაიცავს? სრულად... წყარო: კოალიციის გვერდი სოციალურ ქსელში

თბილისი. გაეცანით საქართველოს ახალგაზრდა იურისტთა ასოციაციის კვლევას - „გარემოს დაცვის სისხლისსამართლებრივი რეგულირება“. „სისხლისსამართლებრივი პასუხისმგებლობა გარემოს დაცვის სფეროში ერთ-ერთი მნიშვნელოვანი ინსტრუმენტია, რომელიც უზრუნველყოფს დანაშაულთან ქმედით ბრძოლას და ამ სფეროში არსებული იმ დირექტივების ეფექტიან იმპლემენტაციას, რომელთა ეროვნულ დონეზე დანერგვის ვალდებულება საქართველომ ასოცირების შეთანხმების ფარგლებში აიღო.  კვლევის შედეგად გამოკვეთილი მიგნებების გათვალისწინებით, საქართველოს კანონმდებლობის დახვეწის, ევროკავშირის სამართალთან მისი მეტად დაახლოებისა და ჰარმონიზაციის, ასევე, პრაქტიკაში აღსრულების კუთხით გამოვლენილი პრობლემების გამოსწორების მიზნით, საიამ შეიმუშავა რეკომენდაციები“. სრულად... წყარო: www.gyla.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს კვლევას: მოსამართლეები და სასამართლო სისტემაში დასაქმებული მათი ოჯახის წევრები. ორგანიზაციის კვლევის თანახმად: „საქართველოს მოქმედი მოსამართლეების თითქმის ერთი მესამედის (90) ოჯახის წევრი დასაქმებულია საჯარო სამსახურში. 90 განხილული შემთხვევიდან 51 მოსამართლის ოჯახის წევრი დასაქმებულია სხვადასხვა სასამართლოში. 90-დან 60 შემთხვევაში ოჯახის წევრი მოქმედ პოზიციაზე დასაქმდა, დაწინაურდა ან სამუშაო პოზიცია შეიცვალა მოსამართლის დანიშვნის შემდეგ“. სრულად... წყარო: idfi.ge

თბილისი. 19 იანვარს სტრასბურგის სასამართლომ მაჩალიკაშვილის საქმეზე გადაწყვეტილება გამოაქვეყნა. სოციალური სამართლიანობის ცენტრის ცნობით, ამ გადაწყვეტილებით ნაწილობრივ დაკმაყოფილდა განმცხადებლების მოთხოვნა და დადგინდა სიცოცხლის უფლების პროცედურული დარღვევა მაჩალიკაშვილის სიცოცხლის ხელყოფის საქმეზე ჩატარებულ გამოძიებაში გამოვლენილი ფუნდამენტური დარღვევების გამო. დიდწილად სწორედ გამოძიებაში არსებული ხარვეზები გახდა იმის მიზეზი, რომ სასამართლომ, ვერ უპასუხა საკვანძო კითხვას - იყო თუ არა თემირლანის წინააღმდეგ გამოყენებული ძალა არაპროპორციული, და შესაბამისად, ვერ შეძლო სიცოცხლის უფლების შინაარსობრივი დარღვევის აღიარება. ორგანიზაცია გთავაზობთ გადაწყვეტილების მიმოხილვას, რომელშიც წარმოდგენილია სასამართლოს შეფასება ყველა საკვანძო საკითხზე...  სრულად... წყარო: socialjustice.org.ge

კახეთი. სოციალური სამართლიანობის ცენტრი ღრმა მწუხარებას გამოთქვამს, წუხელ, საგარეჯოში მომხდარი უმძიმესი დანაშაულის გამო და უსამძიმრებს დაღუპული მშვიდობიანი მოქალაქეების და პოლიციელის ოჯახებს. დაჭრილებს კი გამოჯანმრთელებას უსურვებს.  „სამართლებრივი საკითხების მიღმა, მნიშვნელოვანია მომხდარ ტრაგედიასთან დაკავშირებით, დავსვათ კითხვები, რომლებიც ამგვარი ძალადობის სტრუქტურულ მიზეზებს შეიძლება ხსნიდეს, მათ შორის:   როგორია ყოფილი სამხედრო პირების სოციალური დაცვის გარანტიები და როგორ მუშაობს ფსიქო-სოციალური მხარდაჭერის პროგრამები მათი საჭიროებების საპასუხოდ? ამ კონკრეტულ შემთხვევაში თავდაცვის სამინისტროს ჰქონდა თუ არა შეფასებული ყოფილი სამხედრო პირის მდგომარეობა და რა ზომები მიიღო მისი ქცევის მართვისთვის? ჰქონდა თუ არა/უნდა ჰქონოდა თუ არა თავდაცვის სამინისტროს და პოლიციას მისგან მომდინარე რისკების შესახებ ინფორმაცია და რამდენად ეფექტიანი იყო მათ მიერ მიღებული პრევენციული ზომები ამ შემთხვევაში?  ეს შემთხვევა თავდაცვის სექტორში დასაქმებული ადამიანებისა და ყოფილი სამხედროების მიმართ სოციალური პოლიტიკისა და ფსიქო-სოციალური მხარდაჭერის პროგრამების გაძლიერების საფუძველი უნდა გახდეს და იმედი გვაქვს, რომ სახელმწიფო, სამოქალაქო და პოლიტიკური ჯგუფები დისკუსიებსა და სამუშაოებს სწორედ ამ მიმართულებით წარმართავენ“. სრულად... წყარო: ორგანიზაციის გვერდი სოციალურ ქსელში ფოტო: რადიო თავისუფლება

თბილისი. სამართლიანი არჩევნებისა და დემოკრატიის საერთაშორისო საზოგადოების ინფორმაციით, ქუთაისის სააპელაციო სასამართლომ ორგანიზაციის დაცვის ქვეშ მყოფი თამარ ქომეთიანის სამსახურიდან გათავისუფლება უკანონოდ და დაუსაბუთებლად ცნო. თამარ ქომეთიანი  ა(ა)იპ ზუგდიდის მუნიციპალიტეტის „მოსწავლე ახალგაზრდობის სასახლეში” 2020 წლიდან მუშაობდა. საქმის დეტალები... ISFED, USAID-ის სამართლის უზენაესობის პროგრამისა და ღია საზოგადოების ფონდის მხარდაჭერით, ახორციელებს სტრატეგიული სამართალწარმოების პროექტს, რომლის ფარგლებშიც უფასო იურიდიულ დახმარებას უწევს სამსახურიდან სავარაუდო პოლიტიკური  ნიშნით გათავისუფლებულ პირებს. წყარო: isfed.ge

თბილისი. სოციალური სამართლიანობის ცენტრის ცნობით, 2022 წლის 8 დეკემბერს თბილისის სააპელაციო სასამართლომ გააუქმა ბოლნისის რაიონული სასამართლოს 2022 წლის 1 ივლისის გადაწყვეტილება, რომელიც მარნეულის მუნიციპალიტეტის მხრიდან, მუნიციპალიტეტის ბიუჯეტიდან, საქართველოს საპატრიარქოს მარნეულისა და ჰუჯაბის ეპარქიისთვის, 400 000 ლარის გადაცემის პროცესში, რელიგიის ნიშნით პირდაპირ დისკრიმინაციას ადგენდა. „სააპელაციო სასამართლომ დაჩქარებულ ვადაში, ერთ სხდომაში, შეაჯამა 3 წლის მანძილზე მიმდინარე მოცულობითი და კომპლექსური ადმინისტრაციული დავა, რომელიც ნორმატიული აქტის ბათილობას, რელიგიის ნიშნით პირდაპირ დისკრიმინაციას და დისკრიმინაციული შედეგების აღმოფხვრას შეეხებოდა.  ...სასამართლომ უგულებელყო დავის მნიშვნელობა, კონტექსტი, ანტიდისკრიმინაციული კანონმდებლობა და კონსტიტუციური პრინციპები, არ გასჩენია არცერთი კითხვა ადმინისტრაციული ორგანოსთან, არ ჩაძიებულა სადავო გარემოებებს და ფორმალურად მიუდგა საკითხს“, ნათქვამია ორგანიზაციის განცხადებაში. სოციალური სამართლიანობის ცენტრი დასაბუთებული გადაწყვეტილების მიღებისთანავე წარმოგიდგენთ სააპელაციო სასამართლოს გადაწყვეტილების დეტალურ კრიტიკას. სრულად... წყარო: socialjustice.org.ge

თბილისი. ღირსეული შრომის პლატფორმა ეხმიანება ბათუმის საქალაქო სასამართლოში 3 სოციალური მუშაკის საქმის განხილვის გაჭიანურებას და მოუწოდებს სასამართლოს, დროულად განიხილოს მათი შრომითი დავები. „როგორც საზოგადოებისათვის ცნობილია, 2020 წლის 29 იანვარს სოციალური მომსახურების სააგენტოს 33 სოციალურ მუშაკს (მათ შორის უფროს სოციალურ მუშაკებს) რეორგანიზაციის შედეგად შეუწყდა შრომითი ხელშეკრულება, თუმცა, მათმა დიდმა ნაწილმა შრომითი სამართლებრივი დავა, უკანონო გათავისუფლების წინააღმდეგ, უკვე წარმატებით დაასრულა. ამ პრაქტიკისაგან განსხვავებით, ბათუმის საქალაქო სასამართლოს წარმოებაში არსებული სამი სოციალური მუშაკის შრომითი დავის განხილვა ამ დრომდე არ მომხდარა. მათ ახალგაზრდა იურისტთა ასოციაციის (საია-ს) აჭარის ფილიალის დახმარებით სარჩელით სასამართლოს ჯერ კიდევ 2020 წლის 11 მარტს მიმართეს. მოქმედი საპროცესო კანონმდებლობის შესაბამისად, სასამართლო შრომითი დავებს განცხადების მიღების დღიდან არაუგვიანეს 1 თვის ვადაში განიხილავს, თუმცა სარჩელის შეტანის შემდეგ რამდენიმე წლის გასვლის შემდეგაც მათ საქმეზე სასამართლო სხდომა ამ დრომდე არ არის ჩანიშნული“. სრულად... წყარო: socialjustice.org.ge

თბილისი. უფლებები საქართველო აქვეყნებს საინფორმაციო პოსტს: როგორ უნდა დაიცვას სახელმწიფომ მსხვერპლი ხელახალი ტრავმირებისგან? სამართალდამცავი სისტემის ან/და სასამართლო ხელისუფლების წარმომადგენლების ქცევა, ხშირად, მსხვერპლის ხელახალ ტრავმირებას იწვევს.  ქალთა მიმართ და ოჯახში ძალადობის მსხვერპლის ხელახალი ტრავმირების თავიდან ასაცილებლად, მნიშვნელოვანია: მსხვერპლმა სახელმწიფოსგან მიიღოს დაცვის, დახმარებისა და მხარდაჭერის სათანადო მომსახურებები, რათა ძალადობასთან გამკლავება და ტრავმის დაძლევა შეძლოს; პოლიციელები, პროკურორები და მოსამართლეები სათანადო მგრძნობელობითა და გულისხმიერებით მოეკიდონ ქალთა მიმართ და ოჯახში ძალადობის საქმეებს; ქალთა მიმართ და ოჯახში ძალადობის საქმეებზე რეაგირება მსხვერპლზე ორიენტირებული მიდგომით, მისი ჭეშმარიტი ინტერესის გათვალისწინებითა და კონფიდენციალურობის დაცვით მოხდეს; მართლმსაჯულების ორგანოებმა აღმოფხვრან სტერეოტიპული დამოკიდებულებები და მსხვერპლის მიმართ გამოიჩინონ ნდობა. სრულად... წყარო: ორგანიზაციის გვერდი სოციალურ ქსელში

თბილისი. ამ წუთებში, სოციალური სამართლიანობის ცენტრი საჯარო დისკუსიას მართავს თემაზე: „სასამართლოს ლეგიტიმაცია და კანონის უზენაესობა კრიტიკული გააზრება”.  დისკუსიის თემატიკასთან დაკავშირებით იხილეთ შემდეგი ანალიტიკური დოკუმენტები: „ლეგიტიმაცია და ნდობა - რას ეფუძნება სასამართლოს ძალაუფლება?”... „როგორ გვესმის კანონის უზენაესობა?“... წყარო: ორგანიზაციის გვერდი სოციალურ ქსელში

თბილისი. 18 ნოემბერს, საქართველოს პროკურატურამ გაავრცელა ცნობა ქალის მკვლელობის შესახებ. ფემიციდის შემთხვევასთან დაკავშირებით ინფორმაცია მედიაშიც გავრცელდა. პროკურატურის ცნობის შესაბამისად, 17 ნოემბერს მოკლული ქალი ტრანსფობიური ფემიციდის მსხვერპლი გახდა, რადგან მკვლელმა იგი გენდერული იდენტობის ნიშნით შეუწყნარებლობის მოტივით მოკლა. ლგბტქი სათემო ორგანიზაციები მოუწოდებენ საქართველოს მთავრობას: სამოქალაქო საზოგადოების აქტიური ჩართულობით შეიმუშავოს მიზოგინიის, ჰომოფობიის და ტრანსფობიის წინააღმდეგ ბრძოლის სამოქმედო გეგმა და მისი ინტეგრირება მოახდინოს ადამიანის უფლებების დაცვის პოლიტიკის დოკუმენტებში; დახვეწოს და საერთაშორისო სტანდარტებთან, მათ შორის სტამბოლის კონვენციასთან შესაბამისობაში მოიყვანოს კანონმდებლობა; გაატაროს შესაბამისი ზომები საზოგადოებაში მყარად ფესვგადგმულ გენდერულ და სხვა სახის სტერეოტიპებთან და წინარწმენებთან საბრძოლველად ზოგადსაგანმანათლებლო სისტემის გამოყენებით. სრულად... წყარო: wisg.org

თბილისი. საქართველოს ახალგაზრდა იურისტთა ასოციაციის ინფორმაციით, 1 დეკემბერს, ადამიანის უფლებათა ევროპულმა სასამართლომ სამი ტრანსგენდერი კაცის საქმეზე ადამიანის უფლებათა ევროპული კონვენციის მე-8 მუხლის (პირადი და ოჯახური ცხოვრების დაცულობის უფლება) დარღვევა დაადგინა. „განმცხადებლებმა ვერ შეძლეს, რომ საქართველოში საკუთარი გენდერის სამართლებრივი აღიარებისთვის მიეღწიათ და პირადობის დამადასტურებელ დოკუმენტებში სქესის შესახებ ჩანაწერი მათი გენდერული იდენტობის შესაბამისად შეეცვალათ“. საქმის დამატებითი დეტალები იხილეთ ბმულზე... წყარო: www.gyla.ge

თბილისი. „უფლებები საქართველოს“ მოთხოვნით სასამართლომ დროებითი განკარგულება გამოსცა. 2022 წლის 25 ნოემბერს, სამტრედიის რაიონულმა სასამართლომ, სრულად დააკმაყოფილა „უფლებები საქართველოს“ მოთხოვნა და არასრულწლოვანს აღარ დასჭირდება მოძალადე მამის ნებართვა იმისათვის, რომ ისწავლოს სკოლაში, დედის და თავისი ადგილსამყოფლის მიხედვით. „უფლებები საქართველო“ ამ საქმეს USAID სამართლის უზენაესობის პროგრამის მხარდაჭერით აწარმოებს. „სიტყვებით ვერ აღვწერ იმ ემოციასა და ბედნიერებას, რაც პროცესზე, სასამართლოს მიერ გადაწყვეტილების გამოცხადების დროს მქონდა. დიდი სიხარულია, მოძალადე მამასთან რომ არ მომიწევს ბავშვის განათლებასთან დაკავშირებული საკითხების შეთანხმება. ბედნიერი ვარ, რომ დღეიდან, ბავშვისთვის განათლების მიცემა დამოუკიდებლად შემიძლია“, - ყვება არასრულწლოვნის დედა. სრულად... წყარო: ორგანიზაციის გვერდი სოციალურ ქსელში

თბილისი. ორგანიზაცია „უფლებები საქართველო“ ბოლო პერიოდში გახშირებულ ფემიციდის შემთხვევებს განცხადებით ეხმიანება. „ფემიციდი არის გენდერის ნიშნით ქალის მკვლელობა, რომლის ჩადენის მოტივი ან კონტექსტი დაკავშირებულია ქალის მიმართ გენდერულ ძალადობასთან, დისკრიმინაციასთან, ან ქალის დაქვემდებარებულ როლთან. ფემიციდის პრევენციისთვის მნიშვნელოვანია: აღმოიფხვრას საზოგადოებაში არსებული გენდერული სტერეოტიპები და მცდარი აღქმები ქალისა და კაცის გენდერულ როლებთან დაკავშირებით; სახელმწიფო ორგანოებმა სათანადოდ შეისწავლონ ქალთა მიმართ ძალადობის ყველა საქმე, შეაფასონ ძალადობის განმეორების რისკები და გაატარონ დაცვისა და დახმარების შესაბამისი ზომები“, ნათქვამია განცხადებაში. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაცია (საია) სამართლებრივი დასკვნას აქვეყნებს ლონდა თოლორაიას საქმეზე. “საკონსტიტუციო სასამართლოს მიერ მიღებული საოქმო ჩანაწერისა და გადაწყვეტილების ერთობლივი ანალიზი აჩენს განცდას, რომ სწორედ საკონსტიტუციო სასამართლომ შეუწყო ხელი ლონდა თოლორაიას უფლებების რეალური აღდგენის შეუძლებლობას. შეუძლებელია აღნიშნულ პრაქტიკას „მსუსხავ ეფექტი“ არ ჰქონდეს სხვა დამოუკიდებელი ორგანოების ხელმძღვანელებზეც, რომ მათი თანამდებობიდან გათავისუფლების შემთხვევაში საკონსტიტუციო სასამართლო ვერ უზრუნველყოფს მათი უფლებების ეფექტიანად დაცვას”. სრულად... წყარო: gyla.ge

თბილისი. თბილისის საქალაქო სასამართლომ ნაწილობრივ დააკმაყოფილა საქართველოს შინაგან საქმეთა სამინისტროს თანამშრომლის სარჩელი. საქართველოს ახალგაზრდა იურისტთა ასოციაციის (საია) ინფორმაციით, გადაწყვეტილება სამართლებრივი თვალსაზრისით მნიშვნელოვანია, რადგან დადგინა, რომ ხელმძღვანელის პირადი განწყობების საფუძველზე დასაქმებულის თვითნებური გადაყვანა ერთი ტერიტორიული ორგანოდან მეორეში უკანონოა. დასაქმებულის ინტერესებს სასამართლოში საია იცავდა. სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის ინფორმაციით, ნარკოტიკული დანაშაულის ჩადენის გამო მსჯავრდებული პირი ადამიანის უფლებათა ევროპული სასამართლოს გადაწყვეტილების საფუძველზე გამართლდა. სრულად... წყარო: www.gyla.ge

თბილისი. საქართველოს ახალგაზრდა იურისტთა ასოციაცია საერთო სასამართლოების შესახებ ორგანულ კანონში ინიცირებულ ცვლილებებს უარყოფითად აფასებს. „მიუხედავად იმისა, რომ კანონპროქტის განმარტებითი ბარათის შესაბამისად, იგი ემსახურება ევროკავშირის მოთხოვნების შესრულებას, ის სინამდვილეში ქვეყანას აშორებს ევროკავშირის  კანდიდატის სტატუსის მიღების პერსპექტივას და წარმოადგენს კიდევ ერთ ხელიდან გაშვებულ შესაძლებლობას მართლმსაჯულების სისტემის არსებით ცვლილებებთან დაკავშირებით“. სრულად... წყარო: gyla.ge

თბილისი. საქართველოს ახალგაზრდა იურისტთა ასოციაციის ინფორმაციით, საკონსტიტუციო სასამართლომ საქართველოს პარლამენტის წინააღმდეგ ლონდა თოლორაიას და საქართველოს სახალხო დამცველის სარჩელები ნაწილობრივ დააკმაყოფილა. „2022 წლის პირველი მატრიდან სახელმწიფო ინსპექტორის სამსახური გაუქმდა და ვადაზე ადრე თანამდებობიდან გათავისუფლდა სახელმწიფო ინსპექტორი ლონდა თოლორაია.  საკონსტიტუციო სასამართლომ დაადგინა, რომ უფლებამოსილების გარანტირებული ვადით არჩეული სახელმწიფო ინსპექტორისა და მისი მოადგილეების ვადამდე უპირობოდ გათავისუფლება მისთვის/მათთვის ან ადეკვატური, ტოლფასი თანამდებობის შეთავაზების ან სამართლიანი კომპენსაციის გადაცემის გარეშე, ვერ აკმაყოფილებდა საჯარო სამსახურის საქმიანობის შეუფერხებლად განხორციელების უფლების დაცვის კონსტიტუციურ სტანდარტებს, რის გამოც არაკონსტიტუციურად სცნო გასაჩივრებული ნორმები. ამ საქმეში ლონდა თოლორაიას ინტერესებს საია იცავდა. გადაწყვტილების შესახებ დეტალურ მოსაზრებას  საია მისი გამოქვეყნების შემდგომ დააფიქსირებს“. სრულად... წყარო: ორგანიზაციის გვერდი სოციალურ ქსელში

თბილისი. ქალთა საინფორმაციო ცენტრის ცნობით, საქართველოს მთავრობამ „ქალთა მიმართ ძალადობის ან/და ოჯახში ძალადობის მსხვერპლისათვის გასაცემი კომპენსაციის ოდენობის განსაზღვრისა და გაცემის წესი“ დაამტკიცა. ამ დადგენილებით, ძალადობის მსხვერპლ ქალებს შეუძლიათ სახელმწიფოსგან მიიღონ კომპენსაცია 10 ათასამდე ლარის ოდენობით. სრულად... წყარო: ორგანიზაციის გვერდი სოციალურ ქსელში

თბილისი. კოალიციამ დამოუკიდებელი და გამჭვირვალე მართლმსაჯულებისთვის საქართველოს იუსტიციის უმაღლეს საბჭოში კოალიციის მიერ მხარდაჭერილი, ხუთი არამოსამართლე წევრობის კანდიდატი წარადგინა. 2022 წლის 30 სექტემბრიდან, პარლამენტში გამოცხადდა იუსტიციის უმაღლესი საბჭოს 5 არამოსამართლე წევრის შესარჩევი კონკურსი. იურიდიული კომიტეტის მიერ 4 ოქტომბერს ინიცირებული საკანონმდებლო ცვლილებების თანახმად კი - იუსტიციის უმაღლესი საბჭოს არამოსამართლე წევრების არჩევისას მათი საჯარო მოსმენის ვალდებულება დადგინდა. კონკურსში მონაწილეობას იღებს კოალიციის მიერ მხარდაჭერილი 5 კანდიდატი, რომლებიც კოალიციაში შემავალმა ცალკეულმა არასამთავრობო ორგანიზაციებმა, ასევე უმაღლესმა საგანმანათლებლო დაწესებულებებმა წარადგინეს: ლიკა საჯაია - ნიუ ვიჟენ უნივერსიტეტის პროფესორი; ანა აბაშიძე - პარტნიორობა ადამიანის უფლებებისათვის ხელმძღვანელი; დიმიტრი ხაჩიძე - ადვოკატი; საქართველოს ადვოკატთა ასოციაციის წევრი; სულხან სალაძე - კარგი მმართველობის და ინფორმაციის თავისუფლების პროგრამის ხელმძღვანელი (ღია სივრცე კავკასია); გიორგი ბურჯანაძე - საქართველოს სახალხო დამცველის მოადგილე; „კოალიცია დიდი ხანია საუბრობს სასამართლო ხელისუფლების ფუნდამენტური რეფორმისა და ამ რეფორმის სტრატეგიის რადიკალური ცვლილებების საჭიროებაზე. პარლამენტის სესიაზე 5 არამოსამართლე წევრის არჩევა ამ მიზნის მიღწევისთვის მნიშვნელოვანი წინგადადგმული ნაბიჯი შეიძლება იყოს. აუცილებელია, თანამდებობაზე მოხვდნენ მიუკერძოებელი, კეთილსინდისიერი და კომპეტენტური კანდიდატები - მოქალაქეები, რომელთა მიმართაც იქნება მაღალი საზოგადოებრივი ნდობა და პოლიტიკურ პარტიებს შორისაც ფართო კონსესუსი იარსებებს“. სრულად... წყარო: ორგანიზაციის გვერდი სოციალურ ქსელში