<div style="text-align: justify;"><span style="font-weight: bold;">თბილისი.</span> „ადამიანის უფლებების სწავლებისა და მონიტორინგის ცენტრი" (EMC) აცხადებს, რომ ფარული საგამოძიებო მოქმედებების ყველა სამოხელეო დანაშაულზე გავრცელება დაუშვებელია.</div> <div> <div style="text-align: justify;">„საქართველოს პარლამენტი განიხილავს მთავრობის ინიციატივას „საქართველოს სისხლის სამართლის საპროცესო კოდექსში ცვლილების შეტანის შესახებ" (07-2/265; 25.10.2018), რომლის თანახმად, ფარული საგამოძიებო მოქმედებები ყველა სამოხელეო დანაშაულზე უნდა გავრცელდეს", - ნათქვამია EMC-ის მიერ გავრცელებულ განცხადებაში, - „წარმოდგენილ კანონპროექტთან დაკავშირებით, რამდენიმე ძირითადი საკითხი გვსურს გამოვყოთ, რომლებზეც საქართველოს პარლამენტმა ყურადღება უნდა გაამახვილოს: ფარული საგამოძიებო მოქმედებების გავრცელება ყველა სამოხელეო დანაშაულზე, მათ შორის გაუფრთხილებლობით ჩადენილ დანაშაულებზეც, დაუშვებელია; საკანონმდებლო ცვლილებები კორუფციასთან ბრძოლის არაეფექტურ და შეუსაბამო გზას წარმოადგენს; საკანონდებლო ცვლილებები ცდება ადამიანის უფლებათა ევროპული სასამართლოს გადაწყვეტილების აღსრულების ფარგლებს; პარლამენტმა უნდა შეისწავლოს ფარული საგამოძიებო მოქმედებების მარეგულირებელი კანონმდებლობის აღსრულება და მხოლოდ მას შემდეგ იქნას შემუშავებული საკანონმდებლო ცვლილებები; ფარული საგამოძიებო მოქმედებების მარეგულირებელი კანონმდებლობის შესახებ საკონსტიტუციო სასამართლოს გადაწყვეტილებამდე, ფრაგმენტული ცვლილებები არ უნდა განხორციელდეს".</div> <div style="text-align: justify;"><a href="http://emc.org.ge/ka/products/faruli-sagamodziebo-mokmedebebis-qvela-samokheleo-danashaulze-gavrtseleba-daushvebelia" target="_blank" style="font-weight: bold;">სრულად </a></div> <div style="text-align: justify;">წყარო: ორგანიზაციის ვებგვერდი</div> <div style="text-align: justify;"><br /> </div></div>

<div style="text-align: justify;"><span style="font-weight: bold;">თბილისი. </span>„საერთაშორისო გამჭვირვალობა-საქართველო” (TI) ავრცელებს ინფორმაციას ქედის მუნიციპალიტეტის თანამდებობის პირების ქონებრივი დეკლარაციების შესახებ.</div> <div style="text-align: justify;">„კვლევის ფარგლებში, 20-ზე მეტი დეკლარაცია იქნა შესწავლილი, რომელთაგან 8 შემთხვევაში თანამდებობის პირებს არასრულად აქვთ ინფორმაცია მითითებული. გარდა ამისა, გამოვლინდა თანამდებობასთან შეუთავსებელი საქმიანობის ერთი შემთხვევა, რაც შესაძლო კანონდარღვევაა და საჯარო სამსახურის ბიუროს მხრიდან შესაბამის რეაგირებას</div> <div style="text-align: justify;">საჭიროებს", - აღნიშნულია ინფორმაციაში.</div> <div style="text-align: justify;"><a href="http://www.transparency.ge/ge/blog/tanamdebobis-pirta-arasrulad-shevsebuli-deklaraciebi-kedis-municipalitetshi" target="_blank" style="font-weight: bold;">სრულად </a></div> <div style="text-align: justify;">წყარო: ორგანიზაციის ვებგვერდი</div> <div style="text-align: justify;"><br /> </div>

<div style="text-align: justify;"><span style="font-weight: bold;">თბილისი.</span> საზოგადოებრივი ორგანიზაციები საქართველოს პარლამენტისგან უზენაესი სასამართლოს დაკომპლექტების შეჩერებას მოითხოვენ.</div> <div style="text-align: justify;">„იუსტიციის უმაღლესი საბჭოს დღევანდელ სხდომაზე, კიდევ ერთხელ, ნათლად დადასტურდა სასამართლო სისტემაში ვიწრო ინტერესთა ჯგუფის უკონტროლო ძალაუფლების არსებობა. დღეს საბჭომ, უხეში პროცედურული დარღვევებით, წინასაახალწლო პერიოდში და დაჩქარებული წესით, უზენაეს სასამართლოში უვადოდ დასანიშნი 10 კანდიდატის წარდგენის გადაწყვეტილება მიიღო. ეს აჩვენებს, რომ მათ სურთ ყოველგვარი საზოგადოებრივი დისკუსიის და გამჭვირვალობის მინიმალური სტანდარტების უგულებელყოფით, მოახვედრონ მათთვის სასურველი კანდიდატები უზენაეს სასამართლოში და ამით სრული კონტროლი მოიპოვონ სასამართლო ხელისუფლებაზე", - ვკითხულობთ დღეს გავრცელებულ განცხადებაში.</div> <div style="text-align: justify;"><a href="http://emc.org.ge/ka/products/samokalako-sektori-parlamentisgan-uzenaesi-sasamartlos-dakomplektebis-shecherebas-moitkhovs" target="_blank" style="font-weight: bold;">სრულად </a></div> <div style="text-align: justify;">წყარო: emc.org.ge</div> <div style="text-align: justify;"><br /> </div>

<div style="text-align: justify;"><span style="font-weight: bold;">თბილისი.</span> EWMI ACCESS-ი ქართულ არასამთავრობო ორგანიზაციებს ინდივიდუალურ და მათ საჭიროებებზე მორგებულ ტექნიკურ დახმარებას სთავაზობს. ამ ეტაპზე ღია კონკურსის შედეგად შეირჩა 6 ორგანიზაცია, რომლებიც პროგრამაში 2019 წლის იანვრიდან ჩაერთვებიან.</div> <div style="text-align: justify;">„ACCESS-ის პარტნიორი ორგანიზაცია – კონსულტაციისა და ტრენინგის ცენტრი - CTC რამდენიმე თვის განმავლობაში აქტიურად იმუშავებს შერჩეულ ორგანიზაციებთან. თავდაპირველად მოხდება მათი შესაძლებლობების შეფასება და ამის შემდეგ თითოეულ ორგანიზაციას ინდივიდუალური დახმარება გაეწევა (კონსულტაციები, დოკუმენტებზე მუშაობა და ა.შ.).</div> <div style="text-align: justify;">EWMI ACCESS-ი ულოცავს შერჩეულ ორგანიზაციებს და წარმატებულ მუშაობას უსურვებს მათ", ნათქვამია ორგანიზაციის ვებგვერდზე სოციალურ ქსელში.</div> <div style="text-align: justify;"><a href="http://www.facebook.com/EWMI.ACCESS/photos/a.606049886189292/1825143560946579/?type=3&theater" target="_blank" style="font-weight: bold;">სრულად...</a></div> <div style="text-align: justify;">წყარო: ორგანიზაციის ვებგვერდი სოციალურ ქსელში</div> <div><br /> </div>

თბილისი. „საერთაშორისო გამჭვირვალობა - საქართველო" აგრძელებს თანამდებობის პირთა ქონებრივი დეკლარაციების მონიტორინგს. ამჯერად, კი ორგანიზაცია დეპუტატების და მათი ოჯახის წევრების მიერ მიღებული მსხვილი საჩუქრების შესახებ, რომლებსაც დეპუტატები ძირითადად ახლო ნათესავებისგან იღებენ. სრულად... წყარო: ორგანიზაციის ვებგვერდი სოციალურ ქსელში

თბილისი. 20 დეკემბერს, ეკონომიკური პოლიტიკის კვლევის ცენტრის ორგანიზებით გაიმართა კვლევების პრეზენტაცია. ისინი „ფონდი ღია საზოგადოება-საქართველო"-ს მიერ დაფინანსებული პროექტის - „ასოცირების სამოქმედო გეგმის ეფექტიანობის შეფასება ექსპორტის დივერსიფიცირების მიმართულებით" ფარგლებში მომზადდა. სრულად... წყარო: ორგანიზაციის ვებგვერდი სოციალურ ქსელში

csogeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი...

შიდა ქართლი. 18 დეკემბერს, გორის „კეთილდღეობისა და განვითარების ცენტრთან" არსებული გორის სამოქალაქო აქტივიზმის ცენტრის მოხალისეებისათვის ჩატარდა ბულინგის თემაზე ფილმის ჩვენება და დისკუსია. „მოზარდებს აჩვენეს ფილმი „Ronan’s Escape”, რომელიც ბულინგს ეხებოდა. დისკუსიის მიზანი იყო ახალგაზრდები გაცნობოდნენ როგორც ბულინგის გამომწვევ მიზეზებს, ისე ძალადობის სახეებს, ტიპებსა და ფორმებს", ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. „ღია მმართველობა - საქართველოს" ფარგლებში, კერძო სექტორის წარმომადგენლებთან შეხვედრა გაიმართა. ღონისძიება ევროკავშირის (EU) და UNDP საქართველოს მხარდაჭერითა და IDFI-სთან თანამშრომლობით ჩატარდა. შეხვედრა, რომლის მთავარი მიზანიც მეწარმეების მოსაზრებების მოსმენა და პარლამენტთან კერძო სექტორის თანამშრომლობის გაღრმავება იყო, საქართველოს პარლამენტის ღია მმართველობის მუდმივმოქმედი საპარლამენტო საბჭოს ეფექტიანობისა და გამჭვირვალობის გაძლიერების და ინოვაციური ტექნოლოგიების დანერგვის ხელშემწყობი სამუშაო ჯგუფმა გამართა. სრულად  წყარო: https://idfi.ge

თბილისი. „ადამიანის უფლებების სწავლებისა და მონიტორინგის ცენტრმა" (EMC) წარმოადგინა ახალი კვლევა - „იდენტობის პრობლემატიკა ქვემო ქართლის აზერბაიჯანელებში და მისი პოლიტიკური და სოციალური განზომილებები". „ჩატარებული პირველადი კვლევის მიზანს წარმოადგენდა ქვემო ქართლში მცხოვრებ აზერბაიჯანელთა თემში ეთნიკური და კულტურული იდენტობის პრობლემატიკის პირველადი შესწავლა, ასევე, იდენტობის კონსტრუირებასთან დაკავშირებული პოლიტიკური, სოციალური და კულტურული მიზეზების გამოვლენა. კვლევის ძირითადი კითხვები იყო: წარმოადგენს თუ არა იდენტობის „გამოღვიძება" პროცესს, რომელიც უშუალოდ ადგილობრივ თემში გაჩნდა? ასეთის შემთხვევაში, რა არის ამის გამომწვევი მიზეზები? რა ნარატივებს ეფუძნება ახალი იდენტობა? როგორი თვითაღქმა აქვთ ქვემო ქართლში მცხოვრებ აზერებაიჯანელებს? ასევე, კვლევის ნაწილს წარმოადგენდა იმ სოციო-კულტურული და პოლიტიკური მიზეზების იდენტიფიცირება, რომელიც ზეგავლენას ახდენს იდენტობის კონსტრუირების ან მისი რევიტალიზაციის პროცესზე", - ვკითხულობთ კვლევის შესავალ ნაწილში. სრულად  წყარო: ორგანიზაციის ვებგვერდი

კახეთი. 12 - 14 დეკემბერს, აღმოსავლეთ პარტნიორობის  6 ქვეყნის სამოქალაქო საზოგადოების წარმომადგენლებმა და საერთაშორისო დონორებმა თავი მოიყარეს ლოპოტაზე, კახეთში, რათა განეხილათ აღმოსავლეთ პარტნიორობის რეგიონში სამოქალაქო საზოგადოების განვითარების აქტუალური გამოწვევები. სამუშაო შეხვედრის დროს ყურადღება გამახვილდა 3 ძირითად თემაზე: სამოქალაქო საზოგადოების ადგილი და როლი შესაბამისი საზოგადოებების ტრანსფორმაციაში; სამოქალაქო საზოგადოების საქმიანობის დაფინანსებისა და ხელშეწყობის სტრუქტურები და მექანიზმები; ახალი ინიციატივები რეგიონული თანამშრომლობის ფორმატებისთვის, აღმოსავლეთის პარტნიორობის ჩათვლით. შევხედრის შედეგად მომზადდება რეკომენდაციების დოკუმენტი, რომელიც დაეგზავნება დაინტერესებულ პირებს და ასევე ხელმისაწვდომი იქნება ფართო საზოგადოებისთვის. სამუშაო შეხვედრა ჩატარდა პროექტის „სამოქალქო საზოგადოების განვითარების ინიციატივა ფარგლებში“, რომელიც ხორციელდება ევროკავშირისა და კონრად ადენაუერის ფონდის  მხარდაჭერით.

თბილისი. „ადამიანის უფლებების სწავლებისა და მონიტორინგის ცენტრი" (EMC), იუსტიციის უმაღლეს საბჭოსა და საპროკურორო საბჭოსთან დაკავშირებით, ვენეციის კომისიის მიერ გაკეთებულ დასკვნას ავრცელებს. „დღეს ვენეციის კომისიამ გამოქვეყნა მოსაზრებები ორი კონსტიტუციური ორგანოს - იუსტიციის უმაღლესი საბჭოსა და საპროკურორო საბჭოს - მარეგულირებელ კანონმდებლობაზე. დასკვნაში კომისია ყურადღებას ამახვილებს, კონსტიტუციის ახალი რედაქციით ფორმირებული კონსტიტუციური ჩარჩოს პირობებში, საპროკურორო საბჭოსა და იუსტიციის უმაღლესი საბჭოს ინსტიტუციური მოწყობის, საქმიანობის ფორმებისა და ანგარიშვალდებულების საკითხებზე. ვენეციის კომისია გატარებული რეფორმების ნაწილს პოზიტიურად აფასებს, თუმცა დასკვნაში წარმოდგენილი მოსაზრებები ნათლად მიუთითებს, როგორც სასამართლოში, ასევე პროკურატურის სისტემაში შემდგომი, ძირეული, რეფორმების საჭიროებაზე", - აღნიშნულია ინფორმაციაში. სრულად  წყარო: https://emc.org.ge

თბილისი. საზოგადოებრივი ორგანიზაციების ნაწილის განცხადებით, გაერთიანებული ოპოზიციისათვის თელავში მიმავალი გზების გადაკეტვა შეკრების თავისუფლების მორიგი შეზღუდვაა. „ხელმომწერი ორგანიზაციები უკიდურეს შეშფოთებას გამოხატავთ ახალი პრეზიდენტის ინაუგურაციის პარალელურად, სახელმწიფოს მხრიდან, გაერთიანებული ოპოზიციის მიერ თელავში მანიფესტაციის ჩატარების ხელშეშლის ფაქტთან დაკავშირებით", - აღნიშნულია მათ მიერ გავრცელებულ განცხადებაში, - „მიგვაჩნია, რომ სახელმწიფოს ქმედება და მანიფესტანტების უფლებების შეზღუდვა ეწინააღმდეგება დემოკრატიულ ღირებულებებს, საქართველოს კონსტიტუციასა და საერთაშორისო ხელშეკრულებებით ნაკისრ ვალდებულებებს. ვითარებას ამძაფრებს ის ფაქტი, რომ მოცემულ შემთხვევაში, სახეზე იყო არა რიგითი საჯარო მოხელეების მხრიდან უფლებამოსილების გადაჭარბება, არამედ სახელმწიფოს ინსტიტუციონალური ნაბიჯი - ოპოზიციის წარმომადგენელთათვის ქ. თელავში შესვლის აკრძალვით, არამართლზომიერად შეეზღუდათ გადაადგილების თავისუფლება და ამდენად არ მიეცათ მათთვის აქციის გამართვის საშუალება. უნდა აღინიშნოს ისიც, რომ მსგავსი გადაწყვეტილებები ზიანს აყენებს პოლიციის რეპუტაციას, რაც თავის მხრივ მოქალაქეებსა და პოლიციას შორის კონფლიქტის მიზეზი ხდება". სრულად  წყარო: www.osgf.ge

13-14 დეკემბერს, აღმოსავლეთ-დასავლეთის ინსტიტუტმა (EWMI ACCESS) გამართა ღია საინფორმაციო შეხვედრები ზუგდიდის და ქუთაისის არასამთავრობო ორგანიზაციებთან და აქტივისტებთან. „შეხვედრებზე დეტალურად განიხილეს მოქალაქეთა ჩართულობის საგრანტო კონკურსი, რომელიც ამჟამად გამოცხადებულია. დამსწრეებს ასევე წარედგინა ACCESS-ის პროექტის ბოლო 4 წლის საქმიანობები და სამომავლო გეგმები,” ნათქვამია ორგანიზაციის ვებგვერდზე სოციალურ ქსელში. სრულად... წყარო: ორგანიზაციის ვებგვერდი სოციალურ ქსელში

თბილისი. „ადამიანის უფლებების სწავლებისა და მონიტორინგის ცენტრი" (EMC), გუშინ, კახეთში პრეზიდენტის ინაუგურაცის პარალელურად, ოპოზიციის მხარდამჭერებსა და პოლიციის წარმომადგენლებს შორის მოხდარ ფიზიკური დაპირისპირებასთან დაკავშირებით, განცხადებას ავრცელებს. „EMC-ის არ ჰქონდა შესაძლებლობა ადგილზე დაკვირვებოდა მოვლენების განვითარებას, მათ შორის, გადაემოწმებინა სხვადასხვა მხარის მიერ გავრცელებული ინფორმაციის სიზუსტე. ინციდენტის სრულფასოვანი შეფასებისთვის საჭირო დეტალური და დაზუსტებული ფაქტობრივი გარემოებები ამ დროისთვის ასევე არ არის ხელმისაწვდომი", - აღნიშნულია განცხადებაში, - „მოვუწოდებთ მთავარ პროკურატურას დაიწყოს გამოძიება 16 დეკემბერს, ოპოზიციის მხარდამჭერებსა და პოლიციის წარმომადგენლებს შორის მომხდარ ინციდენტზე, მათ შორის, დროულად და ობიექტურად გამოიძიოს: პოლიციის ქმედებების კანონიერება გადაადგილების და შეკრების თავისუფლებაში შესაძლო ჩარევის შესახებ; ასევე - აქციის მონაწილეთა და პოლიციელების მიერ მიღებული დაზიანებების საკითხი". სრულად  წყარო: ორგანიზაციის ვებგვერდი

თბილისი. „კოალიცია დამოუკიდებელი და გამჭვირვალე მართლმსაჯულებისთვის" აუცილებლად მიიჩნევს, უზენაესი სასამართლოს მოსამართლეებისა და თავმჯდომარის შესარჩევი პროცესი კანონმდებლობით დარეგულირდეს. „ახლად არჩეული პრეზიდენტის ფიცის დადების მომენტიდან ძალაში შევიდა კონსტიტუციის ახალი რედაქცია, რომლის მიხედვითაც საქართველოს უზენაესი სასამართლოს მოსამართლეებს პრეზიდენტის ნაცვლად, იუსტიციის უმაღლესი საბჭო წარადგენს და მათ თანამდებობაზე უვადოდ აირჩევს საქართველოს პარლამენტი. იმავე წესით მოხდება უზენაესი სასამართლოს თავმჯდომარის არჩევა 10 წლის ვადით", - ვკითხულობთ კოალიციის მიერ გავრცელებულ განცხადებაში, - „კოალიცია მიიჩნევს, რომ ორგანული კანონით იუსტიციის უმაღლესი საბჭოს მიერ კანდიდატის შერჩევისა და ნომინირების საკითხის დეტალურ მოწესრიგებამდე, არსებითად მნიშვნელოვანია, რომ არ განხორციელდეს უზენაესი სასამართლოს მოსამართლეების არჩევა. მოვუწოდებთ საქართველოს პარლამენტს, დაუყოვნებლივ დაიწყოს მუშაობა „საერთო სასამართლოების შესახებ" ორგანულ კანონში განსახორციელებელ ცვლილებებზე. მოვუწოდებთ საქართველოს იუსტიციის უმაღლეს საბჭოს, თავი შეიკავოს კანდიდატთა ნომინირებისაგან შესაბამისი საკანონმდებლო ცვლილებების განხორციელებამდე". სრულად  წყარო: coalition.ge

იმერეთი. ადგილობრივი დემოკრატიის სააგენტო საქართველომ, ზესტაფონის მუნიციპალიტეტში გამართა მოქალაქეთა ფორუმი, რომელშიც მონაწილეობა მიიღეს მუნიციპალიტეტის მოსახლეობამ, მუნიციპალიტეტის მერმა, მერიის სამსახურების უფროსებმა და მერის წარმომადგენლებმა ადმინისტრაციულ ერთეულებში. საერთო ჯამში ფორუმს ესწრებოდა 100-მდე ადამიანი. „ფორუმის ჩატარების მიზანი გახლდათ მუნიციპალურ დონეზე ბიუჯეტის დაგეგმვის პროცესში მოქალაქეთა ჩართულობის გაზრდა, რათა მოხდეს მომდევნო 2019 წლის ბიუჯეტის სწორად განსაზღვრა და ადგილობრივი ხელისუფლების წარმომადგენელთა და მოსახლეობას შორის კომუნიკაციის გაუმჯობესება," ნათქვამია ორგანიზაციის ვებგვერდზე. სრულად... წყარო: ორგანიზაციის ვებგვერდი სოციალურ ქსელში

აჭარა. პროექტის „სასწავლო-საგანმანათლებლო ცენტრი" ფარგლებში „ოცნების ქალაქში" მცხოვრები სხვადასხვა ასაკის ახალგაზრდებისთვის (10-დან 30 წლამდე ბენეფიციარებისთვის) ხორციელდება სასწავლო-საგანმანათლებლო კურსი ინგლისურ ენაში. მას ორგანიზაციის თანამშრომელი, პროფესიით ინგლისური ენის ფილოლოგი - ელზა ლემსაძე ატარებს. „ინგლისური ენის კურსები ტარდება კვირაში ორჯერ, ორი საათის განმავლობაში. სწავლების პროცესი დატვირთულია სხვადასხვა სავარჯიშოებით და ინგლისურენოვანი აუდიო მოსასმენი დავალებებით. სასწავლო-საგანმანათლებლო ცენტრის მეორე აქტივობაა ცენტრის მონაწილეებისთვის პროფესიული უნარ-ჩვევების ჩამოყალიბება, რომელსაც ორგანიზაციის თანამშრომელი ქეთი ადეიშვილი ატარებს. მოხალისეებს ჩაუტარდებათ ტრენინგ-სემინარები შემდეგი მიმართულებით: როგორ დავწეროთ CV/რეზიუმე, სამოტივაციო წერილი, დასაქმებისთვის საჭირო უნარ-ჩვევები, გასაუბრების/ინტერვიუს კითხვებისთვის მომზადება და მათზე სწორი/ეფექტური პასუხების გაცემა, როგორ დავგეგმოთ კარიერა და ა.შ. ტრენინგ/სემინარებზე მონაწილეებს შესაძლებლობა ექნებათ მიიღონ პრაქტიკული გამოცდილებაც, რაც მოიცავს სხვადასხვა ტიპის სავარჯიშოებს და სიტუაციურ ამოცანებს," ნათქვამია ორგანიზაციის ვებგვერდზე. სრულად... წყარო: ორგანიზაციის ვებგვერდი სოციალურ ქსელში

თბილისი. პროექტის „სამოქალაქო საზოგადოების განვითარების ინიციატივის“ ფარგლებში დასრულლდა  „საქართველოს პასუხისმგებელი ბიზნესის კონკურსი – Meliora 2018“. კონკურსის ფარგლებში, კორპორაციული სოციალური პასუხისმგებლობის (CSR) მიმართულებით განხორციელებული საუკეთესო პროექტები დაჯილდოვების ცერემონიალზე, 13 დეკემბერს გამოვლინდა. ესენია: თიბისი - პროექტი #წერექართულად; ACT - Analysis and Consulting Team - სოციალური მისიის მქონე ბიზნესის მხარდაჭერა; ნატახტარის ლიმონათი - პროექტი „იზრუნე მომავალზე“; საქართველოს ბანკი  - აპლიკაცია "გზად"; საბურავების გადამამუშავებელი კომპანია - პროექტი „არ გადაყარო, რისი გადამუშავებაც შეიძლება“; პალიტრა მედია ჰოლდინგი - პროექტი "მაკულიტერატურა"; Policy and Management Consulting Group - PMCG - თანამშრომლების განვითარების პროგრამა; ჯიპიაი ჰოლდინგი - მცირე და საშუალო ბიზნესის ხელშეწყობის პროგრამა; HOLMES&WATSON - "არ გამბოლო" Tegeta Motors - თეგეტა მოტორსი. კონკურსის ორგანიზატორი იყო საქართველოს სტრატეგიული კვლევებისა და განვითარების ცენტრი (CSRDG), რომელიც გაიმართა ევროკავშირისა და გერმანიის ეკონომიკური თანამშრომლობისა და განვითარების ფედერალური სამინისტროს ფინანსური მხარდაჭერით, პროექტის "სამოქალაქო საზოგადოების განვითარების ინციიატივა" ფარგლებში.

თბილისი. "სამართლიანი არჩევნებისა და დემოკრატიის საერთაშორისო საზოგადოება" (ISFED) აქვეყნებს მიმოხილვას, გამოხატვის თავისუფლების შესახებ 2018 წლის საქართველოში. „2018 წელი გამოხატვის თავისუფლებისათვის გამოწვევად შეგვიძლია შევაფასოთ. ერთგვარი ტენდენციის სახე მიიღო რეგრესულმა და თავისუფალი გამოხატვის შემზღუდველმა ინიციატივებმა, მათ შორის საკანონმდებლო ორგანოში. საზოგადოების მწვავე რეაქციის და ნეგატიური გამოხმაურების შედეგად ამ ინიციატივების უმეტესობა კანონად ვერ გადაიქცა, თუმცა, მიუხედავად ამისა, შემაშფოთებელია პარლამენტში მსგავსი ინიციატივების მომრავლება და ამ ფონზე სასამართლოს მიერ მიღებული ცალკეული გადაწყვეტილებები, რომლებიც მოქმედი კანონმდებლობის სადავო და საშიშ ინტერპრეტაციას ახდენს”, - ვკითხულობთ წინასიტყვაობაში. სრულად წყარო: ორგანიზაციის ვებგვერდი

თბილისი. 12 დეკემბერს, 14:00 საათზე, სასტუმრო იოტაში კონსტიტუციის 42-ე მუხლმა სამუშაო შეხვედრა გამართა. ის შეზღუდული შესაძლებლობის მქონე პირთა დასაქმების ხელშეწყობას მიეძღვნა. შეხვედრაზე გამოვლინდა ის პრობლემური საკითხები, რაც შშმ პირთა დასაქმებას უშლის ხელს. სრულად... წყარო: ორგანიზაციის ვებგვერდი სოციალურ ქსელში

csogeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი...