ქვემო ქართლი. 22-23 მაისს, საქართველოს წითელი ჯვრის საზოგადოების ახალგაზრდული პროგრამის „ვიმოქმედოთ ერთად" – ფარგლებში  ბოლნისში ჩატარდა ორდღიანი სპეციალიზირებული ბინაზე მოვლის ტრენინგი.  ღონისძიება განკუთვნილი იყო წითელი ჯვრის საზოგადოების ბოლნისის და მარნეულის ფილიალების თანამშრომლებისა და მოხალისეთათვის, რომლებიც ჩართულები არიან პროექტში. ტრენინგზე განხილული იქნა ბინაზე მოვლის სერვისი, დაავადებათა პრევენცია, სწორი კომუნიკაციის ტექნიკა (ვერბალური და არავერბალური კომუნიკაცია), დაუნის სიმდრომი. ასევე, მოიცავდა ხანდაზმულობასთან დაკავშირებულ საკითხებსაც, როგორიცაა - ასაკი, დაბერება, ხანდაზმულებისთვის დამახასიათებელი დაავადებები. პროექტი „ვიმოქმედოთ ერთად" ხორციელდება საქართველოს ოთხ მრავალეთნიკურ რეგიონში - თბილისი, ბოლნისი, მარნეული, ახმეტა. პროექტის მიზანია სოციალური ჩართულობისა და ნდობის ამაღლების თემზე დაფუძნებული სერვისის მიწოდებისა და მშვიდობის შესახებ განათლების გავრცელების გზით. წყარო:ორგანიზაციის გვერდი სოციალურ ქსელში

თბილისი. საქართველოს სოციალურ მუშაკთა ასოციაციას ესაჭიროება მოხალისეები, რომლებიც შეძლებენ დაეხმარონ ბავშვებს ინგლისური ენის შესწავლაში.  მოხალისეობრივი საქმიანობა განხორციელდება გლდანი–ნაძალადევის რაიონში და მოიცავს მიმდინარე სასწავლო წლის დასრულებამდე პერიოდს (დაახლოებით ერთი თვე). დაინტერესებული პირებმა ასოციაციას  ელექტრონული ფოსტის საშუალების უნდა აცნობონ გადაწყვეტილება ელ–ფოსტა: gasw@gasw.org  სრულად წყარო: ორგანიზაციის გვერდი სოციალურ ქსელში

თბილისი.31 მაისს 18:30 საათზე  საჯარო პოლიტიკის, ადვოკატირებისა და სამოქალაქო საზოგადოების განვითარების პროგრამის" (G-PAC) მხარდაჭერით „მსოფლიო თამბაქოს გარეშე" დღისადმი მიძღვნილი მსვლელობა გაიმართება. მისამართი:თბილისი, თავისუფლების მოედანი

აჭარა. ბათუმის ახალგაზრდულმა ცენტრმა „6 მაისის პარკის" ადმინისტრაციასთან ერთად დაგეგმა მოხალისეობრივი აქტივობა. აქტივობა გულისხმობს, რომ ცენტრის 10 წარმომადგენელი ზაფხულის განმავლობაში იქნება „პარკის მეგობარი" და მონაწილეობას მიიღებს ბათუმის დელფინარიუმის, ზოოპარკისა და „6 მაისის პარკის" საქმიანობაში, სხვადასხვა მოხალისეობრივი აქტივობის განხორციელებით. 25 მაისს გამართულ შეხვედრაზე მოხალისეებმა პარკის წარმომადგენლებისგან დეტალური ინფორმაცია მიიღეს. აქტივობა ხორციელდება პროექტის ფარგლებში „ეროვნული ინტეგრაციის გაძლიერება საქართველოში", რომელსაც ახორციელებს საქართველოს გაეროს ასოციაცია აშშ-ს საერთაშორისო განვითარების სააგენტოს (USAID) ფინანსური მხარდაჭერით. წყარო:ორგანიზაციის გვერდი სოციალურ ქსელში

თბილისი. „საქართველოს სტრატეგიული კვლევებისა და განვითარების ცენტრის” პროექტის - „სოციალური მეწარმეობა – ახალი გამოწვევა საზოგადოებრივი ორგანიზაციებისათვის” - ფარგლებში ჩატარდა ოთხდღიანი ტრენინგი – „სოციალური საწარმო – სოციალური შედეგების შეფასება”. ტრენინგში მონაწილეობდა 15 საზოგადოებრივი ორგანიზაცია, რომლთაგან ზოგიერთი უკვე ეწევა სოციალურ მეწარმეობას, ხოლო ნაწილი დაინტერესებულია სოციალური საწარმოს განვითარებით. ტრენინგის შედეგად მონაწილეებმა მიიღეს თეორიულ და პრაქტიკულ ინფორმაცია სოციალური მეწარმეობის შესახებ, შეისწავლეს სოციალური საწარმოს დაგეგმვის სპეციფიკა და სირთულეები, რომელსაც აწყდებიან ორგანიზაციები სოციალურ და ეკონომიკურ მიზნებს შორის ბალანსის მისაღწევად, ასევე დაეუფლნენ სოციალური შედეგების დაგეგმვის და შეფასების ტექნიკებს. წყარო:cse.ge

აჭარა.  ორგანიზაცია „ღირსეულმა სიბერემ" პროექტ –„ხანდაზმულთა სოციალური ცენტრის" შესახებ ფილმი გამოაქვეყნა. 7 წუთიან ფილმში ცენტრზე თავად პროექტის ბენეფიციარები საუბრობენ,  ყვებიან საკუთარ ისტორიებს,  ცენტრში მოსვლისა და ყოველდღიური ცხოვრების შესახებ.  პროექტის ფინანსური მხარდამჭერია - ევროკავშირი, პარტნიორი- დემოკრატიის ინსტიტუტი. ფილმი   წყარო:ორგანიზაციის გვერდი სოციალურ ქსელში  

ქვემო ქართლი. ,,სიდას" ინიციატივით დაიწყო პროექტი ,,ჩემი უფროსი მეგობარი" რომელშიც რუსთავში მცხოვრები ხუთი არასრულწლოვანი პირობით მსჯავრდებული იღებს მონაწილეობას.  პროექტი მიზნად ისახავს მოზარდებში დანაშაულის პრევენციას და სირთულეების დაძლევაში მათთვის ხელშეწყობას. პროექტის ფარგლებში გაფორმდა ინდივიდუალური მემორანდუმები „უფროს მეგობრებს", არასრულწლოვან პრობაციონერებს, მათ მშობლებს და პროექტის კოორდინატორებს შორის. ,,სიდა" აღნიშნულ პროექტს პრობაციის ეროვნულ სააგენტოსთან ერთად ახორციელებს. წყარო: ორგანიზაციის გვერდი სოციალურ ქსელში

თბილისი. „კოალიცია შინმოვლა საქართველოში" უფასო შინმოვლის პროექტს ახორციელებს. ბინაზე პროფესიული მოვლით შეუძლიათ ისარგებლონ ადამიანებმა, რომლებსაც შეზღუდული აქვთ გადაადგილების და საკუთარი თავის მოვლის უნარი დროებით ან მუდმივად; ამასთან, არიან სოციალურად დაუცველი პირები და მინიჭებული აქვთ 100,000 და ნაკლები ქულა თბილისში, 70,000 და ნაკლები ქულა გორსა და ბათუმში. სრულად წყარო:ორგანიზაციის გვერდი სოციალურ ქსელში

თბილისი. 21 მაისს ორგანიზაცია „სიდასა" და პრობაციის ეროვნულ სააგენტოს შორის ურთიერთთანამშრომლობის მემორანდუმი გაფორმდა. მემორანდუმის მიზანია ქვემო ქართლისა და სამცხე–ჯავახეთის რეგიონებში მცხოვრები კანონთან კონფლიქტში მყოფი არასრულწლოვნების რეაბილიტაცია და რესოციალიზაცია. წყარო: ორგანიზაციის გვერდი სოციალურ ქსელში

თბილისი. მიგრაციის საკითხთა სამოქალაქო კოალიციის და ეკომიგრაციის აჭარის საკოორდინაცო ჯგუფი ერთობლივ განცხადებას ავრცელებენ. ისინი ეკომიგრანტების პრობლემებზე ამახვილებენ ყურადღებას და „მხარდაჭერას უცხადებენ წალკის მუნიციპალიტეტის სოფლებიდან გამოსახლებული ეკომიგრანტების ოჯახებს და შექმნილ სიტუაციაზე სახელმწიფო რეაგირებას არაადეკვატურად აფასებენ". ისინი მზად არიან „რეკომენდაციები მიაწოდონ პასუხისმგებელ სახელმწიფო უწყებებს და დაეხმაროს ეკომიგრაციის სფეროში ეფექტური რეგულაციების დამკვიდრებაში".  სრულად  წყარო: ecomigration.ge

აჭარა. ასოციაცია „ღირსეულმა სიბერემ"  ევროკავშირის ფინანსური მხარდაჭერით პროექტის –„ხანდაზმულთა სოციალური ცენტრი" – ფარგლებში სოციალური რეკლამა მოამზადა. ხანდაზმულთა სოციალურ ცენტრში გამართულ პრეზენტაციას პროექტის ბენეფიციარები და მონაწილეები ესწრებოდნენ. რეკლამის შინაარსი მარტოხელა მოხუცების პრობლემას ეხება.  წყარო:ორგანიზაციის გვერდი სოციალურ ქსელში

თბილისი.საზოგადოებივი ორგანიზაციების წევრებმა მოხალისეებთან ერთად გამართეს საქველმოქმედო აქცია - „გვირილები ქველმოქმედებისთვის". 18 მაისს აქციის მონაწილეებმა კოჯორში მოკრეფილი ყვავილები თბლისის ქუჩებში გაყიდეს და სოფელ  ანაგის დღის ცენტრის შესახებ ბუკლეტებიც დაარიგეს. აქციის - „გვირილები ქველმოქმედებისთვის" მიზანი სოფელ ანაგის დღის ცენტრის დახმარება იყო. აქციის შედეგად შეგროვდა 382 ლარი.  „სამოქალაქო ინიციატივის"  მიერ ინცირებულ საქველმოქმედო აქციას შეუერთდნენ სხვა არასამთავრობო ორგანიზაციებისა და საზოგადოების წარმომადგენლები. წყარო:სამოქალაქო ინიციატივის გვერდი სოციალურ ქსელში

შიდა ქართლი. გორის ინვალიდთა კლუბთან არსებულმა გორის ახალგაზრდულმა ცენტრმა შიდსით გარდაცვლილთა ხსოვნის დღე აღნიშნა. ცენტრის წევრებმა 30 მოხალისესთან ერთად ქუჩაში სანთლები აანთეს,რითაც  სოლიდარობა გამოუცხადეს შიდსით დაავადებულებსა და მათ ახლობლებს. აქტივობა დაიგეგმა პროექტის – „ეროვნული ინტეგრაციის გაძლიერება საქრთველოში" ფარგლებში, რომელიც ხორციელდება საქართველოს გაეროს ასოციაციის მიერ, აშშ-ს საერთაშორისო განვითარების სააგენტოს (USAID) მხარდაჭერით. გორში პროექტის პარტნიორი ორგანიზაციაა „გორის ინვალიდთა კლუბი". წყარო: ორგანიზაციის გვერდი სოციალურ ქსელში

თბილისი. სათემო განვითარების ცენტრმა (CDC), 18 მაისს, კავკასიური სახლის საგამოფენო დარბაზში ნუკრიანის და ნაფარეულის სახელოსნოებში–სოციალური საწარმოებში დამზადებული ნივთების გამოფენა - გაყიდვას გამართა.  ნუკრიანისა და ნაფარეულის  სახელოსნოები, სოციალური საწარმოებია. სახელოსნოს მუშაობაში ამჟამად 15–მდე ქალია ჩართული; სათემო განვითარების ცენტრის მიზანია ხელი შეუწყოს  სახელოსნოების, როგორც სოციალური საწარმოების გაძლიერებასა და განვითარებას, რაც ქალთა თემის გააქტიურებისა და  სოფლის განვითარებაში  უფრო აქტიური მონაწილეობის წინაპირობაა. წყარო: ორგანიზაციის გვერდი სოციალურ ქსელში

თბილისი. სათემო განვითარების ცენტრი (CDC), პარტნიორ ორგანიზაციებთან - კონსულტაციისა და ტრენინგის ცენტრთან (CTC) და საქართველოს მცირე და საშუალო საწარმოთა ასოციაციასთან (GSMEA) ერთად ახალი პროექტის განხორციელებას იწყებს. „მიკრომეწარმეობა, როგორც სიღარიბესთან ბრძოლის ინსტრუმენტის" –  მიზანია მოწყვლადი სოციალური ჯგუფების მიკრო-მეწარმეობის პროგრამების, როგორც სიღარიბესთან ბრძოლის ერთ-ერთი სტრატეგიის სახელმწიფოს სტრუქტურებისათვის წარდგენა და მისი დანერგვის მხარდაჭერა. პროექტი 2013წლის მაისში დაიწყო და 10 თვეს გასტანს.დასასრულს დაგეგმილია საერთაშორისო კონფერენციის ჩატარება და კვლევის შედეგების ანგარიშის გამოცემა. „მიკრომეწარმეობა, როგორც სიღარიბესთან ბრძოლის ინსტრუმენტი" მხარდაჭერილია აღმოსავლეთ-დასავლეთის მართვის ინსტიტუტის პროგრამის - „საქართველოში საჯარო პოლიტიკის,ადვოკატირებისა და სამოქალაქო საზოგადოების განვითარების" (EWMI /G-PAC) მიერ. წყარო:ორგანიზაციის გვერდი სოციალურ ქსელში

გურია.ახალგაზრდული ცენტრი „პროგრესი" ევრაზიის თანამშრომლობის ფონდის დაფინანსებით ანხორციელებს პროექტს - „იყავი ინფორმირებული და იქნები დაცული". პროექტი მომზადდა საგრანტო კონკურსის,  – „საინფორმაციო და ადვოკატირების კამპანიები სურსათის უვნებლობის საკითხებზე" – ფარგლებში.  პროექტი მიზნად ისახავს, ხელი შეუწყოს მოსახლეობის ცნობიერების ამაღლებას სამომხმარებლო ბაზარზე არსებულ საკვებ პროდუქტებში ჯანმრთელობისთვის საშიში დანამატების არსებობის შესახებ, მათ ინფორმირებას მომხმარებელთა უფლებებზე.  პროექტი ხორციელდება ჩოხატაურის მუნიციპალიტეტში. წყარო: თემის განვითარების რესურს–ცენტრის გვერდი სოციალურ ქსელში

აჭარა. ბათუმის ახალგაზრდული ცენტრის ორგანიზებით 15 მაისს, ოჯახის დაცვის საერთაშორისო დღესთან დაკავშირებით საქველმოქმედო აქცია მოეწყო. ღონისძიების ფარგლებში შეგროვდა ტანსაცმელი, სათამაშოები და საკვები ხელვაჩაურში მცხოვრები სოციალურად შეჭირვებული ოჯახისთვის, რომელშიც 10 წლის დიანა განსაკუთრებული საჭიროების მქონე დედასთან ერთად ცხოვრობს და მასზე ზრუნავს. ოჯახს საჩუქრად ცენტრის მიერ პროექტის ფარგლებში დაბეჭდილი სხვადასხვა მალასები, საბავშვო წიგნები და სასკოლო ნივთები გადაეცა. აქტივობა განხორციელდა „ეროვნული ინტეგრაციის გაძლიერება საქართველოში" პროექტის ფარგლებში, რომელსაც ახორციელებს საქართველოს გაეროს ასოციაცია, აშშ-ს საერთაშორისო განვითარების სააგენტოს (USAID) ფინანსური მხარდაჭერით. წყარო:ორგანიზაციის გვერდი სოციალურ ქსელში

კახეთი.16 მაისს, თელავში ,,ადამიანის ჰარმონიული განვითარების ხელშემწყობმა საზოგადოებამ"  (PHDS) რეემიგრანტთა რეინტეგრაციის პოლიტიკის ადვოკატირების კამპანიის ფარგლებში გამართა შეხვედრა არასამთავრობო ორგანიზაციებთან და სამთავრობო სტრუქტურასთან. პროექტის ამოცანააა რეგიონალურ დონეზე რეემიგრანტთა რეინტეგრაციის პოლიტიკის განვითარების ხელშეწყობა რეგიონებში რეფერალური სისტემის განვითარება რეემიგრანტთა ეფექტური რეინტეგრაციისთვის. ლევან შატბერაშვილი (PHDS): „ჩავატარეთ შეხვედრა ფოკუს ჯგუფი რეემიგრანტებისთვის შესაძლო დასაქმების გზების მოძიების საკითხში, სადაც ესწრებოდნენ ადგილობრივი ხელისუფლების, არასამთავრობო და საერთაშორისო ორგანიზაციების და ადგილობრივი მედიის წარმომადგენლები. ჩვენი მიზანია რეფერალური მექანიზმის შემუშავება იმ ხალხისთვის ვინც საზღვარგარეთიდან საქართველოში დაბრუნდა საცხოვრებლად. რეგიონებში ვიღებთ ინფორმაციას და შემდეგ საკანონმდებლო ინიციატივებს მოვამზადებთ".

შიდა ქართლი. 15 მაისს, გორის დემოკრატიული ჩართულობის ცენტრში, გაიმართა საინფორმაციო შეხვედრა შიდა ქართლში ახლადდანიშნულ გუბერნატორ ზურაბ ჩხეიძეს, არასამთავრობო ორგანიზაციებსა და მედიის წარმომადგენლებს შორის. შეხვედრაზე განიხილეს მხარის სოციალურ-ეკონომიკური განვითარების სტრატეგიული გეგმის შემუშავების საკითხები, გამყოფი ზოლის გასწვრივ განლაგებული სოფლების პრობლემები, სოფლების ბუნებრივი აირით მომარაგების საკითხები. მხარის გუბერნატორმა გამოთქვა სურვილი მოსახლეობის წარმომადგენელთა მეტი ჩართულობის შესახებ სტრატეგიული გეგმის შემუშავების პროცესში და აღნიშნა, რომ ასეთი გეგმის არსებობა ხელს შეუწყობს მხარის განვითარებას ხელისუფლებაში ნებისმიერი პოლიტიკური ძალის არსებობის შემთხვევაში. რაც შეეხება გამყოფ ზოლთან განლაგებულ სოფლებს, გამოითქვა საერთო აზრი, რომ არსებული პრობლემების კომპლექსური მოგვარებისთვის კარგი იქნებოდა ამ ზონას მინიჭებოდა რაღაც განსხვავებული სტატუსი.

შიდა ქართლი.ოჯახების საერთაშორისო დღე ასოციაცია „გორის ინვალიდთა კლუბთან" არსებულმა გორის ახალგაზრდულმა ცენტრმა შეჭირვებული ოჯახების დახმარებით აღნიშნა. გაეროს გენერალურმა ასამბლეა 1994 წლიდან მოყოლებული ყოველ წელს, 15 მაისს აღნიშნავს ოჯახების საერთაშორისო დღეს. 15 მაისს ახალგაზრდული ცენტრის წარმომადგენლებმა დახმარება გაუწიეს უკიდურესად შეჭირვებულ სამ ოჯახს და მათ საკვები და პირველადი მოხმარების საგნები გადასცეს. აქტივობა დაიგეგმა „ეროვნული ინტეგრაციის გაძლიერება საქრთველოში" პროექტის ფარგლებში, რომელიც ხორციელდება საქართველოს გაეროს ასოციაციის მიერ, აშშ-ს საერთაშორისო განვითარების სააგენტოს (USAID) მხარდაჭერით. წყარო: ორგანიზაციის გვერდი სოციალურ ქსელში

ქვემო ქართლი. აშშ საერთაშორისო განვითარების სააგენტოს USAID–ის მიერ დაფინანსებულ „ახალი ეკონომიკური შესაძლებლობების" (NEO) პროექტსა და ,,სიდას"  შორის 18 თვიან კონტრაქტს მოეწერა ხელი, რომლის ფარგლებშიც პროექტი „შემოსავლების ზრდის ხელშეწყობა მოწყვლადი ოჯახების და ინდივიდებისთვის" განხორციელდება. პროექტის ბიუჯეტი 995 000 ლარია და მისი მოქმედების არეალი მცხეთა-მთიანეთი და შიდა ქართლია.  პროექტის სამიზნე ჯგუფი სოციალურად დაუცველი ფენაა. პროექტით გათვალისწინებულია: შიდა ქართლსა და მცხეთა–მთიანეთში პირველ ეტაპზე შერჩეულ ბენეფიცართათვის სასოფლო და არასასოფლო სტანდარტული პაკეტების გადაცემა. (პაკეტის საშუალო ღირებულება – 2400 ლარი), პირველ ეტაპზე შერჩეულ ბენეფიცართა გადამზადება და დასაქმება, შიდა ქართლის 12 ახალ თემში მობილიზაცია, ბენეფიცარების შერჩევა, მათთვის სტანდარტული საარსებო პაკეტების გადაცემა. წყარო:ორგანიზაციის გვერდი სოციალურ ქსელში

იმერეთი.საქართველოს სოციალურ მუშაკთა ასოციაციამ პროექტის – „სოციალურად დაუცველი ახალგაზრდების მხარდაჭერა" – ფარგლებში ქუთაისში, წყალტუბოსა და ტყიბულში სამუშაო შეხვედრები გამართა. შეხვედრის მიზანი იყო პროექტის სოციალური მუშაკებისთვის საპილოტე პროექტის ფარგლებში მიღწეული შედეგებისა და გამოცდილების გაზიარება. პროექტი ხორციელდება ჩეხურ არასამთავრობო ორგანიზაციასთან – „ადამიანი გაჭირვებაში"  – თანამშრომლობით და ითვალისწინებს სამ ქალაქში 15–23 წლის სოციალურად დაუცველი ბენეფიციარების შერჩევასა და შეფასებას, მათგან ყველაზე მეტად მოტივირებულებისა და საჭიროების მქონე ახალგაზრდების პროფესიულ გადამზადებასა და დასაქმებას. ასევე, ტრენინგსა და სხვადასხვა ჯგუფურ შეხვედრებს თანატოლებთან, სოციალიზაციის ხელშეწყობისა და გააქტიურების მიზნით. პროექტის ფარგლებში, ასოციაციის მონაწილობით დაგეგმილია 10 სუპერვიზიის სესია სოციალური მუშაკებისათვის და ტრენინგი მეურვეობისა და მზურნველობის ადგილობრივი ორგანოს საბჭოს წევრებისათვის სოციალური მუშაობისა და „გეითქიფინგის" პოლიტიკის საკითხებზე. წყარო:ორგანიზაციის გვერდი სოციალურ ქსელში