იმერეთი. ქუთაისის განათლების განვითარების და დასაქმების ცენტრი იწვევს შემოქმედებითი უნარების მქონე ახალგაზრდებს, რომლებსაც  სურვილი აქვთ დაეხმარონ შეზღუდული შესაძლებლობების მქონე ბავშვებს სახელობო უნარ–ჩვევების გამომუშავებაში გამოყენებითი ხელოვნების ცენტრში.  გამოყენებითი ხელოვნების ცენტრში, ამჟამად, 5 შეზღუდული შესაძლებლობის მქონე პირი ეუფლება ჭრა–კერვას, დაზგაზე ქსოვას, სამკაულების და აქსესუარების დამზადებას და ა.შ. გამოყენებითი ხელოვნების ცენტრი დაარსდა 2012 წელს ქუთაისის განათლების განვითარების და დასაქმების ცენტრის მიერ, მიკროსაფინანსო ორგანიზაცია ,,კრისტალის" ფინანსური მხარდაჭერით. ცენტრის მიზანია შეზღუდული შესაძლებლობების მქონე (შშმ) პირთა სახელობო უნარ-ჩვევების განვითარების ხელშეწყობა, მათი სამომავლო დასაქმების პერსპექტივის გაზრდის მიზნით. სრულად

აჭარა. 21 აგვისტოს ასოციაცია „ღირსეული სიბერის" ორგანიზებით  საქველმოქმედო კვირეული „ჩვენც დავბერდებით" დაიწყო, სლოგანით „ახალგაზრდების თანადგომა მარტოხელა მოხუცებს". აღნიშნული კვირეული ტრადიციული ხასიათისაა. წელს იგი ევროკავშირის მიერ დაფინანსებული პროექტის – „ხანდაზმულთა სოციალური ცენტრი" – ფარგლებში ტარდება. კვირეული 21–28 აგვისტოს ჩათვლით გაიმართება. იგი მოხუცებისთვის სხვადასხვა ღონისძიებას ითვალისწინებს, რომლის ორგანიზებასა და განხორციელებაში ორგანიზაციის მოხალისეები არიან ჩართულნი.   სრულად

გურია. ახალგაზრდა პედაგოგთა კავშირმა მოამზადა დოკუმენტური ფილმი „მე ბოშა ვარ". ფილმის მთავარი გმირი ბოშა ქალი ზინაა, რომელსაც 7 შვილი ჰყავს და მათხვრობით ირჩენს თავს. ზინა ფილმში თავისი ცხოვრების და პრობლემების შესახებ ყვება. დოკუმენტური ფილმი მომზადებულია პროექტის – „ეროვნული ინტეგრაციის გაძლიერება საქართველოში" – ფარგლებში, რომელიც დაფინანსებულია აშშ–ს საერთაშორისო განვითარების სააგენტოს (USAID) მიერ , როემლსაც ახორციელებს საქართველოს გაეროს ასოციაცია.  

იმერეთი.  სამეცნიერო–ინტელექტუალური კლუბი „თაობათა დიალოგი" ახორციელებს პროექტს „ბოლო ზარი", რომლის მთავარი მიზანია დაეხმაროს მოზარდებს ისეთი ნაჩქარევი და უარყოფითი გადაწყვეტილებების მიღების თავიდან აცილებაში, როგორიცაა თვითმკვლელობა, ნაადრევი ქორწინება, სახლიდან გაქცევა. ამ თემებზე პედაგოგის, იურისტის და ფსიქოლოგის კონსულტაციების მიღება შესძლებელია ცხელი ხაზის მეშვეობით.  ასევე ორგანიზაციის საიტზე სკაიპით დაკავშირება. პროექტი სრულად წყარო: ricdog.org

გურია. „ახალგაზრდა პედაგოგთა კავშირის" ბაზაზე არსებული ლიდერთა სკოლის მოსწავლეებმა გადაიღეს დოკუმენტური ფილმი  „ჩემი ექიმი მინდა გამოვიდე". იგი ასახავს მამიდის ოჯახთან ერთად მცხოვრები 5 წლის ბიჭის ამბავს. ფილმი ასახავს რამდენიმე პრობლემას, რომლის წინაშეც, გადაღების მომენტში, ოჯახი იდგა. კერძოდ, შეწყვეტილი ჰქონდათ სოციალური დახმარება, ბავშვი საჭიროებდა სასწრაფო ოპერაციას და ინვალიდობის სტატუსის დადგენას. ასევე ოჯახს უჭირდა ნათესაური შვილობილობის პროგრამაში ჩართვა. ლიდერთა სკოლის მოსწავლეები ჩართულნი არიან ოჯახის პრობლემების ადვოკატირების პროცესში. ამ დროისთვის ოჯახს მიენიჭა სარეიტინგო ქულა და სოციალურად დაუცველის პოლისი, რომელიც ითვალისწინებს ოპერაციის ხარჯებს. რაც შეეხება შვილობილობის პროგრამაში ჩართვას,  მამიდამ განმეორებითი განცხადებით  მიმართა ოზურგეთის სოციალური მომსახურების სააგენტოს და ელოდება გადაწყვეტილებას.

აჭარა. 9 აგვისტოს, დემორატიული ჩართულობის ცენტრში ორგანიზაცია „ევრი ჩაილდმა" ჩაატარა ტრენინგი თემაზე – მინდობით აღზრდა, რომელსაც ესწრებოდნენ პოტენციური მიმღები მშობლები.  აღნიშნული ტრენინგი ინფორმაციული ხასიათისაა და მიზნად ისახავს  ბავშვის პიროვნული განვითარების შესახებ პოტენციური მიმღები მშობელების ინფორმირებულობას. პროექტი დაფინანსებულია UNICEF –ის მიერ.

კახეთი. გურჯაანის #1 საჯარო სკოლასთან არსებული ,,ახალგაზრდულმა კლუბი" აგვისტოს კვირეულში ჩაერთო და საქველმოქმედო აქციას მართავს. კლუბის მოხალისეებმა გულსაბნევი, წითელი ყაყაჩოები, საკუთარი ხელით დაამზადეს და სიმბოლურ ფასად, 1 ლარად გაყიდეს. აქცია გუშინ დაიწყო და ხვალ დასრულდება. საქველმოქმედო აქციიდან შემოსული თანხა გურჯაანის მუნიციპალიტეტში მცხოვრებ აგვისოტოს ომში დაღუპული სოსო ღვინიაშვილისა და ალექსი ნატროშვილის ოჯახებს გადაეცემა. ჯემალ ყალაბეგაშვილი, აქციის ორგანიზატორი: ,,გადავწყვიტეთ, ჩვენი წვლილი შეგვეტანა და საკუთარი ხელით დაგვემზადებინა წითელი ყაყაჩოები, რომელსაც ყველა ორგანიზაციაში მივიტანდით გასაყიდად. გარდა ორგანიზაციებისა, ვმართავთ ქუჩის აქციებსაც რათა მაქსიმალურად ბევრი თანხა მოვაგროვოთ. შეგროვილი თანხა კი აგვისტოს ომში დაღუპულ ოჯახებს გადაეცემათ". გარდა ამისა, დღეს საღამოს 7 საათზე, ,,ახალგაზრდული კლუბი" ღია ცის ქვეშ ფილმის ჩვენებას გეგმავს.

19 ივლისს, სამხრეთ და აღმოსავლეთ საქართველოს ზოგიერთი რაიონი ძლიერმა ქარიშხალმა, წვიმამ და სეტყვამ მნიშვნელოვნად დააზარალა. 20 000–ზე მეტი ოჯახმა დიდი დანაკარი განიცადა; მათ სახლ–კარი და მოსავალი გაუნადგურდათ. დაინგრა გზები, მწყობრიდან გამოვიდა კომუნიკაციები და წყლის სისტემა. დაიტბორა საცხოვრებელი სახლები, სამეურნეო ნაკვეთები, დაიღუპა საქონელი და განადგურდა მოსავალი. ადგილობრივ მცხოვრებთა თქმით, ეს იყო ყველზე უარესი ბუნებრივი კატასტროფა, რაც კი მას ახსოვს. ევროკომისია ყველაზე მეტად დაზარალებულებისა და მოწყვლადი ჯგუფებისთვის € 118,590 ოდენობის დახმარებას გამოყოფს. ეს დახმარება გაიცემა საქართველოს წითელი ჯვრის საზოგადოების მეშვეობით, რომელიც, თავის მხრივ, წითელი ჯვრის და წითელი ნახევარმთვარის საერთაშორისო ფედერაციების კომიტეტის ბუნებრივი კატასტროფების დახმარების საგანგებო ფონდის (DREF) დაფინანსებით მოქმედებს. სრულად წყარო: eeas.europa.eu/delegations/georgia/index_ka.htm

თბილისი. ორგანიზაცია „პირველი ნაბიჯი" იწყებს შეზღუდული შესაძლებლობების საკითხებისადმი მიძღვნილი ორენოვანი (ქართული–ინგლისური) პერიოდული ელექტრონული ბიულეტენის გამოშვებას. ბიულეტენი, რომლის სახელწოდებაც იქნება „პირველი ნაბიჯის მაცნე", მომხმარებელს მიაწვდის ინფორმაციას  ამ სფეროში მიმდინარე პროცესებზე, პროექტებზე, კვლევებზე, ღონისძიებებზე, ადვოკატირების კუთხით განხორციელებულ ინიციატივებზე და შეზღუდულობის საკითხებთან დაკავშირებულ სხვა აქტივობებსა და შესაძლებლობებზე საქართველოსა და მის გარეთ.  „პირველი ნაბიჯის მაცნე" მოუწოდებს ორგანიზაციებს მიაწოდონ ინფორმაციები აქტივობების, კვლევების, პროექტის შესახებ, რათა იგი განთავსდეს ბიულეტენში და გაავრცელოს იგი. დამატებითი ინფორმაცია იხ.ი www.firststepgeorgia.org წყარო: cenn  

კახეთი. ,,მედია ცენტრი კახეთის" ახალგაზრდა მოხალისეებმა, 29 ივლისს, გურჯაანის მუნიციპალიტეტის სოფელ ვაჩნაძიანში კიდევ ერთი აქცია მოაწყვეს. დახმარება სტიქიის შედეგად დაზარალებულმა ხუთმა ოჯახმა მიიღო. ხუთივე ოჯახში, რომელსაც  სასურსათო კალათები, სასკოლო სახელმძღვანელოები და პირადი ჰიგიენის ნივთები გადაეცა, შეზღუდული შესაძლებლობის მქონე პირები ცხოვრობენ. პროექტის კოორდინატორის, ილია საყვარლიშვილის თქმით აქცია  სათემო განვითარების ცენტრის რეგიონული განვითარების პროგრამის ფარგლებში, ფონდის „პური მსოფლიოსთვის” მხარდაჭერით განხორციელდა:,,აქცია ,,მედია ცენტრი კახეთის" ორგანიზებით გაიმართა. მედია ცენტრის ახალგაზრდული პროექტის ფარგლებში სტიქიით დაზარალებულ ოჯახებს, სადაც  უდედმამო ბავშვები და შეზღუდული შესაძლებლობის მქონე პირები ცხოვრობენ, გადავეცით სასურსათო პაკეტი, რომელშიც შედიოდა პირველადი მოხმარების საგნები, სარეცხი საშუალებები, სურსათი, შაქარი, ბრინჯი და პირადი ჰიგიენის ნივთები". ორგანიზაცია სამომავლოდაც გეგმავს მსგავსი ტიპის აქციის გაკეთებას სოციალურუად დაუცველი ოჯახებისათვის, რომლებიც სტიქიამ დააზარალა.

იმერეთი. 27 ივლისს დასავლეთ საქართველოში მოქმედი შშმ პირთა საკითხებზე მომუშავე ორგანიზაციების ქსელის პირველი შეხვედრა გაიმართა. ქსელი შეიქმნა ქუთაისის განათლების განვითარების და დასაქმების ცენტრის (KEDEC) და საქართველოს ახალგაზრდა იურისტთა ასოციაციის ქუთაისის ფილიალის ინციატივით. შეხვედრა გაიმართა  პროექტის:  "თანაბარი შესაძლებლობები შეზღუდული შესაძლებლობების მქონე პირებისათვის’’ ფარგლებში, რომელიც მიზნად ისახავს შეზღუდული შესაძლებლობების მქონე პირების ინტერესებისა და უფლებების დაცვას. პროექტი ხორციელდება  ქუთაისში, სენაკში, ზუგდიდში, სამტრედიასა და ბათუმში და მის სამიზნე ჯგუფს წარმოადგენს 6–დან 18 წლამდე ასაკის შეზღუდული შესაძლებლობების მქონე ბავშვები და მათი ოჯახის წევრები.  პროექტის ფინანსურ მხარდაჭერას უზრუნველყოფს ფონდი ,,ღია საზოგადოება - საქართველო’’ სრული ინფორმაცია იხილეთ ბმულზე

თბილისი. 18 ივლისს სოციალურ მუშაკთა ასოციაციასა და საქართველოს სახალხო დამცველს შორის ურთიერთთანამშრომლობის მემორანდუმი გაფორმდა. თანამშრომლობის მიზანია ადამიანის უფლებების და თავისუფლებების დაცვის მიზნით სოციალური მუშაობის პროფესიის განვითარების მხარდაჭერა. ამ მიზნის მისაღწევად მხარეები ერთად დაგეგმავენ გარკვეულ აქტივობებს, ასევე მემორანდუმის ფარგლებში განხორციელდება ინტერსექტორული სემინარები, ტრენინგები და სხვა აქტივობები, რომლებიც ხელს შეუწყობს სოციალური მუშაობის, როგორც უფლებადამცავი პროფესიის პოპულარიზაციას. სოციალურ მუშაკთა ასოციაცია მეთოდოლოგიურ კონსულტაციის გაწევასაც უზრუნველყოფს ადამიანის უფლებათა და თავისუფლებათა დაცვის მონიტორინგის პროცესში წყარო: www.ombudsman.ge 

კახეთი.საზოგადოებრივი ორგანიზაციის „სისხლის ბანკის" ინიციატივით  გურჯაანის მუნიციპალიტეტში, 13 ივლისს ჯავრიშვილის კლინიკის ოფთალმიჯის შენობაში გაიმართა აქცია სახელწოდებით „გაიღეთ სისხლი და გადაარჩინეთ ბავშვების სიცოცხლე". აქციაზე მისულმა საზოგადოების წევრებმა უანგაროდ გაიღეს სისხლი ბავშვების სიცოცხლის გადასარჩენად.

თბილისი. 11 ივლისს, ფონდ „ღია საზოგადოება– საქართველოს" ოფისში სოციალური დაცვის ლიგამ პროექტის შედეგები შეაჯამა. პროექტის ფარგლებში შეზღუდული შესაძლებლობების მქონე ბავშვების დაცვის  ცენტრი გაიხსნა, რომელიც სხვადასხვა სერვისს უფასოდ სთავაზობდა შშმ ბავშვებს. მისი არსებობის განმავლობაში მომსახურება მიიღო 182–მა ბენეფიციარმა, ცხელ ხაზზე კი დაახლობით 2000–ზე მეტი ზარი შემოვიდა. პრეზენტაციაზე ვრცლად ისაუბრეს იმაზე, თუ რა გაკეთდა პროექტის ფარგლებში, რა პრობლემები და საჭიროებები გამოიკვეთა,  რომელიც შემდგომ მუშაობას საჭიროებს.   „დიდი მოთხოვნაა უფასო რეაბილიტაციაზე და იგი უნდა გულისხმობდეს როგორც ფიზიკურ, ასევე ბავშვის გონებრივი განვითარების რეაბილიტაციას და აუცილებელად მორგებული უნდა იყოს ბავშვის განვითარების ინდივიდუალურ გეგმას"– აღნიშნა პრეზენტაციაზე ორგანიზაციის წარმომადგენლმა. განსაკუთრებით ხაზი გაესვა შშმ ბავშვების მშობლებზე ორიენტირებული სერვისების არსებობის საჭიროებასაც.

აჭარა. 10 ივლისს, ბათუმის პრესკაფეში,  ჰაინრიხ ბიოლის ფონდის ორგანიზებით  გაიმართა დისკუსია თემაზე _ „შეზღუდული შესაძლებლობების მქონე პირები სოციალური და პოლიტიკური მოღვაწეობის გზაზე: რესურსები და პრობლემები".  არასამთავრობო ორგანიზაციების წარმომადგენლებმა, ჟურნალისტებმა და სტუდებტებმა განიხილეს  შშმ პირების სოციალური მდგომარეობა, დასაქმების საკითხი და მათი საზოგადოებაში ინტეგრაციის ხელშემშლელი მიზეზები. აღნიშნული დებატები ხორციელდება ევროკავშირის მიერ დაფინანსებული პროექტის – „სიძულვილის ენის წინააღმდეგ ბრძოლა საქართველოში: ლაკმუსის ტესტი სოციალური ტოლერანტობისა და ადამიანის უფლებებისათვის" – ფარგლებში.

შიდა ქართლი. 14 ივნისს, გორის დემოკრატიული ჩართულობის ცენტრში საერთაშორისო ორგანიზაციამ „ევრიჩაილდმა" და მისმა პარტნიორმა ორგანიზაციებმა: საზოგადოება „ბილიკმა" და „მიმღებ მშობელთა ორგანიზაციამ" წარადგენეს ბავშვზე სახელმწიფო ზრუნვის ალტერნატიული მომსახურებების - მინდობით აღზრდის, მცირე საოჯახო ტიპის სახლებისა და დღის ცენტრების საჭიროებათა კვლევის შედეგები. საჭიროებათა კვლევა „ბავშვთა უფლებების დაცვის საკითხებში ჩართულობის ხელშეწყობის" პროექტის  ფარგლებში ჩატარდა, რომელსაც ევროკავშირი აფინანსებს და „ევრიჩაილდი" ახორციელებს. ეს პირველი შეფასებაა, რომელმაც დეინსტიტუციონალიზაციის რეფორმის ფარგლებში მოქმედ ბავშვზე ზრუნვის სამივე სახის ალტერნატიულ მომსახურება მოიცვა. კვლევის შედეგების საფუძველზე პროექტის 11-მა პარტნიორმა ორგანიზაციამ ერთობლივად შეიმუშავა რიგი რეკომენდაციები, რომლებიც სისტემურ/სტრუქტურულ, ადმინისტრაციულ, ჯანდაცვის, განათლების, დაფინანსებისა და შესაძლებლობების განვითარების სფეროებს ეხება. შეხვედრას ესწრებოდნენ: ადგილობრივი მუნიციპალიტეტის თვითმმართველობის, ბავშვთა კეთილდღეობის სფეროში მომუშავე საზოგადოებრივი ორგანიზაციების, ევროკავშირის სადამკვირვებლო მისიის და მასმედიის წარმომადგენლები. კვლევის შედეგების და შეთავაზებული რეკომენდაციების წარდგენის შემდეგ გაიმართება დისკუსია.

თბილისი. საზოგადოებრივი ორგანიზაცია „საქართველოს სოციალურ მუშაკთა ასოციაცია" 11–17 ივნისს მართავს შეზღუდული შესაძლებლობის მქონე პირთა უფლებების დაცვის კვირეულს. მისი მიზანია სოციალურ მუშაკებში შეზღუდულ შესაძლებლობასთან დაკავშირებული სტიგმისა და სტერეოტიპების დაძლევა და მათი ცნობიერების ამაღლება. კვირეულის ფარგლებში დაგეგმილია სხვადასხვა სემინარისა და მოხალისეობრივი აქტივობების განხორციელება.

სამცხე–ჯავახეთი. 7 ივნისს ორგანიზაცია „კავშირი ღრელის" ინიციატივით, ახალციხის დემოკრატიული ჩართულობის ცენტრში, თექაზე შესრულებული სურათების გამოფენა გაიმართა. გამოფენის გახსნას ადგილობრივი მუნიციპალიტეტის გამგეობის წევრები, საზოგადოებრივი ორგანიზაციების წარმომადგენლები და სხვა დაინტერესებული პირებიც ესწრებოდნენ. გამოფენა მოეწყო ფონდ „ღია საზოგადოება საქართველოს" მიერ დაფინანსებული პროექტის „სოციალური საწარმო სათემო კავშირის მხარდამხარ" ფარგლებში. პროექტი  თემში სოციალური საწარმოს განვითარების ხელშეწყობის მიზნით  6 თვის წინ დაფინანსდა. სოციალურად დაუცველი ოჯახებიდან შერჩეულმა 10-მა ქალბატონმა თექის წარმოებაში სპეციალური კურსები გაიარა და საკუთარი ნამუშევრების პირველი გამოფენით დამთვალიერებლების აღფრთოვანება გამოიწვია.

სამცხე–ჯავახეთი. ახალციხის ახალგაზრდული ცენტრის ორგანიზებითა და ქალაქის #5 საჯარო სკოლის სამოქალაქო კლუბის წევრთა ინიციატივით, ,,თანადგომის კვირეულის” გაგრძელების მიზნით 1 ივნისს ადიგენის მუნიციპალიტეტში ბავშვთა საერთაშორისო დღისადმი მიძღვნილი საქველმოქმედო აქცია მოეწყო. კლუბის წევრებმა სოფელ ლელოვანში სოციალურად დაუცველ ორ ოჯახს სამი თვის პატარებისთვის საჩუქრად ტანსაცმელი გადასცეს.,,თანადგომის კვირეული” სამცხე-ჯავახეთში სამოქალაქო განათლებისა და პედაგოგთა გადამზადების პროექტის ფარგლებში ხორციელდება და მისი მიზანი სოციალურად დაუცველი ოჯახების დახმარებაა.

აჭარა. ფსიქო–სოციალური ინფორმაციისა და კონსულტაციის ცენტრმა ,,იმედმა’’ გამართა შეხვედრა თემაზე: „ნარკოტიკების მომხმარებელ ქალთა საკეთილდღეოდ". კვლევა ასახავს როგორც სტატისტიკურ მონაცემებს,  ასევე გარემოს სიტუაციურ ანალიზს და რეკომენდაციებს. პრეზენტაციის შემდეგ გაიმართა დისკუსია და ყურადღება გამახვილებულდა ანტინარკოტიკულ პოლიტიკაზე. სახელმწიფოს მხრიდან ნარკოტიკების მომხმარებელი ქალებისათვის ზიანის შემცირების აუცილებელი პროგრამების, რეპროდუქციული ჯანმრთელობის სერვისების და კრიზისული დახმარების ცენტრების ხელმისაწვდომობისთვის საჭირო ღონისძიებების შემუშავებასა და გატარებაზე. ასევე, ისაუბრეს ბათუმის ადგილობრივი თვითმმართველობის ორგანოებთან თანამშრომლობის პერსპექტივაზე.  შეხვედრას ესწრებოდნენ აჭარის ჯანმრთელობისა და სოციალური დაცვის სამინისტროს, განათლებისა და კულტურის სამინისტროს, თვითმმართველი ბათუმის მერიის, საზოგადოებრივი ჯანდაცვის, საზოგადოებრივი ორგანიზაციების წარმომადგენლები, ასევე სამედიცინო დაწესებულებათა ხელმძღვანელები.

კახეთი. დღეს, თელავში, დემოკრატიული ჩართულობის ცენტრში საზოგადოებრივი ორგანიზაციების მიერ ბავშვზე ზრუნვის ალტერნატიული მომსახურებების საჭიროებათა კვლევის პრეზენტაცია გაიმართა. საერთაშორისო ორგანიზაციამ „ევრიჩაილდმაЭ და მისმა პარტნიორმა ორგანიზაციებმა მინდობით აღზრდის, მცირე საოჯახო ტიპის სახლებისა და დღის ცენტრების საჭიროებათა კვლევის შედეგები წარადგინეს. საჭიროებათა კვლევა „ბავშვთა უფლებების დაცვის საკითხებში ჩართულობის ხელშეწყობის" პროექტის ფარგლებში ჩატარდა, რომელსაც ევროკავშირი აფინანსებს და „ევრიჩაილდი" ახორციელებს. ეს პირველი შეფასებაა, რომელმაც დეინსტიტუციონალიზაციის რეფორმის ფარგლებში მოქმედი ბავშვზე ზრუნვის სამივე სახის ალტერნატიული მომსახურება მოიცვა. კვლევის შედეგების საფუძველზე პროექტის 11-მა პარტნიორმა ორგანიზაციამ ერთობლივად შეიმუშავა რიგი რეკომენდაციები, რომლებიც სისტემურ-სტრუქტურულ, ადმინისტრაციულ, ჯანდაცვის, განათლების, დაფინანსებისა და შესაძლებლობების განვითარების სფეროებს ეხება. შეხვედრას ადგილობრივი მუნიციპალიტეტების, ხელისუფლების, შესაბამისი სამთავრობო უწყებების, ბავშვთა კეთილდღეობის სფეროში მომუშავე არასამთავრობო, სათემო ორგანიზაციებისა და მასმედიის წარმომადგენლები დაესწრებიან.

თბილისი. კავშირმა „ადამიანებისთვის, განსაკუთრებულ ზრუნვას რომ საჭიროებენ"  სხვადასხვა ნივთების გამოფენა–გაყიდვა მოაწყო. ნივთებს საზოგადოებრივი ორგანიზაციის ბენეფიციარები, შეზღუდული შესაძლებლობის მქონე მოზრდილები ამზადებენ. ისინი ასევე მასპინძლობდნენ ექსკლუზიური ნივთების დასათვალიერებლად და შესაძენად მისულ სტუმრებს. გამოფენაზე წარმოდგენილი იყო სურნელოვანი სანთლები, სხვადასხვა სახი რვეულები, გობელენები, თექისგან დამზადებული სხვადასხვა პროდუქცია, ხის ნივთებიდა ა.შ. იგი 11–დან  7 საათამდე გრძელდებოდა. ორგანიზაცია წელიწადში ორჯერ მართავს გამოფენას – საშობაოდ და სააღდგომოდ. წელს ტრადიციას გადაუხვიეს და წინასააღდგომო გამოფენა გაზაფხულზე გადმოიტანეს.