კახეთი. დღეს, თელავში, დემოკრატიული ჩართულობის ცენტრში საზოგადოებრივი ორგანიზაციების მიერ ბავშვზე ზრუნვის ალტერნატიული მომსახურებების საჭიროებათა კვლევის პრეზენტაცია გაიმართა. საერთაშორისო ორგანიზაციამ „ევრიჩაილდმაЭ და მისმა პარტნიორმა ორგანიზაციებმა მინდობით აღზრდის, მცირე საოჯახო ტიპის სახლებისა და დღის ცენტრების საჭიროებათა კვლევის შედეგები წარადგინეს. საჭიროებათა კვლევა „ბავშვთა უფლებების დაცვის საკითხებში ჩართულობის ხელშეწყობის" პროექტის ფარგლებში ჩატარდა, რომელსაც ევროკავშირი აფინანსებს და „ევრიჩაილდი" ახორციელებს. ეს პირველი შეფასებაა, რომელმაც დეინსტიტუციონალიზაციის რეფორმის ფარგლებში მოქმედი ბავშვზე ზრუნვის სამივე სახის ალტერნატიული მომსახურება მოიცვა. კვლევის შედეგების საფუძველზე პროექტის 11-მა პარტნიორმა ორგანიზაციამ ერთობლივად შეიმუშავა რიგი რეკომენდაციები, რომლებიც სისტემურ-სტრუქტურულ, ადმინისტრაციულ, ჯანდაცვის, განათლების, დაფინანსებისა და შესაძლებლობების განვითარების სფეროებს ეხება. შეხვედრას ადგილობრივი მუნიციპალიტეტების, ხელისუფლების, შესაბამისი სამთავრობო უწყებების, ბავშვთა კეთილდღეობის სფეროში მომუშავე არასამთავრობო, სათემო ორგანიზაციებისა და მასმედიის წარმომადგენლები დაესწრებიან.

თბილისი. კავშირმა „ადამიანებისთვის, განსაკუთრებულ ზრუნვას რომ საჭიროებენ"  სხვადასხვა ნივთების გამოფენა–გაყიდვა მოაწყო. ნივთებს საზოგადოებრივი ორგანიზაციის ბენეფიციარები, შეზღუდული შესაძლებლობის მქონე მოზრდილები ამზადებენ. ისინი ასევე მასპინძლობდნენ ექსკლუზიური ნივთების დასათვალიერებლად და შესაძენად მისულ სტუმრებს. გამოფენაზე წარმოდგენილი იყო სურნელოვანი სანთლები, სხვადასხვა სახი რვეულები, გობელენები, თექისგან დამზადებული სხვადასხვა პროდუქცია, ხის ნივთებიდა ა.შ. იგი 11–დან  7 საათამდე გრძელდებოდა. ორგანიზაცია წელიწადში ორჯერ მართავს გამოფენას – საშობაოდ და სააღდგომოდ. წელს ტრადიციას გადაუხვიეს და წინასააღდგომო გამოფენა გაზაფხულზე გადმოიტანეს.

გურია. ახალგაზრდულმა ცენტრმა „პროგრესმა", ჩოხატაურის მუნიციპალიტეტის ორ სოფელში – ხიდისთავსა და ერკეთში, მოსახლეობის ინფორმირების მიზნით ტრიფლეტები გაავრცელა. რომელშიც ასახულია ჩოხატაურის მუნიციპალიტეტის 2012 წლის ბიუჯეტში არსებული სოციალური პროგრამები და ამ პროგრამებისთვის გათვალისწინებული თანხების შესახებ ინფორმაცია. სოფლებში ტრიფლეტები გავრცელება ადგილობრივი სკოლის მოსწავლეების მეშვეობით.

თბილისი. „სოციალურ მუშაკთა მსოფლიო დღე არის განსაკუთრებული დღე სოციალურ მუშაკთათვის, რათა აღიარებულ და დაფასებულ იქნას მათი წვლილი საზოგადოების კეთილდღეობის გაუმჯობესების საქმეში". – ნათქვამია არასამთვრობო ორგანიზაციის „საქართველოს სოციალურ მუშაკთა ასოციაციის" მიერ გავრცელებულ განცხადებაში. სწორედ სოციალურ მუშაკთა მსოფლიო დღესთან დაკავშირებით არასამთავრობო ორგანიზაციამ ღონისძიება ახალგაზრდობის სასახლეში გაიმართა და მას ასოციაციის წევრები, პრაქტიკოსი სოციალური მუშაკები, სოციალური მუშაობის სტუდენტები, სამოქალაქო სექტორისა და დიპლომატიური კორპუსის წარმომადგენლები ესწრებოდნენ. აუდიტორიას მიმართეს მოწვეულმა სტუმრება, მათ შორის სიტყვით გამოვიდა ქალბატონი ჰოლი ჰოლცერ ბასი, საქართველოში ამერიკის შეერთებული შტატების ელჩის მეუღლე. ქალბატონმა ჰოლცერ ბასმა ისაუბრა სოციალური მუშაობის პროფესიის სხვადასხვა ასპექტებზე. „სოციალური მუშაობა არის ძნელი, იმიტომ რომ თქვენ მუშაობთ ადამიანებთან, რომლებიც გთხოვენ, რამე შეცვალოთ მის ცხოვრებაში. ეს ძალიან რთულია" – აღნიშნა ელჩის მეუღლემ. ჰოლი ჰოლცერ ბასი თავად არის სოციალური მუშაკი და ასევე დიპლომატი, შეხვედრაზე მან რამდენიმე პირადი შემთხვვევაც გაიხსენა მისი სოციალური მუშაობის პრაქტიკიდან. აუდიტორიას ასევე სიტყვით მიმართა „სოციალურ მუშაკთა ასოციაციის" თავმჯდომარემ, სალომე ნამიჭეიშვილმა, რომელმაც ხაზი გაუსვა ადამიანის უფლებების დაცვის სფეროში სოციალური მუშაკის ჩართულობის აუცილებლობას. ამავე ღონისძიებაზე მოეწყო პრეზენტაცია ასოციაციის ინიციატივის „მოხალისე სოციალური მუშაკები ჩვენი საზოგადოების წევრების მხარდასაჭერად", რომლის მიზანია მოხალისეობრივ საქმიანობაში სოციალური მუშაკების გააქტიურება. შეხვედრა კითხვა–პასუხის რეჟიმში მიმდინარეობდა, გაიმართა დაჯილდოვება ასოციაციის საპატიო წევრებისა და სოციალურ მუშაობაში საუკეთესო სტუდენტური ინიციატივისთვის. „საქართველოს სოციალურ მუშაკთა ასოციაცია" 20 დან 26 მარტის ჩათვლით მართავს სოციალური მუშაობის კვირეულს, რომლის ფარგლებშიც დაგეგმილია სხვადასხვა ღონისძიება.