თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 8 თებერვალი „უსაფრთხო ინტერნეტის დღეა“. ორგანიზაცია ამ ინიციატივას ყოველწლიურად უერთდება. „წელსაც, IDFI-ის ინტერნეტისა და ინოვაციების მიმართულების ხელმძღვანელი, თეონა ტურაშვილი, ინტერნეტსაზოგადოების (Internet Society - Georgia Chapter) მიერ ორგანიზებულ ონლაინ კონფერენციაში მიიღებს მონაწილეობას, რომელიც ბავშვებისა და ახალგაზრდებისთვის უსაფრთხო ინტერნეტ გარემოს განვითარებას ეძღვნება. ღონისძიებაზე დასასწრებად მიჰყევით ბმულს… ინტერნეტის თავისუფლება, ციფრული წიგნიერების გაზრდა და ინტერნეტზე ხელმისაწვდომობის გაზრდა IDFI-ის საქმიანობის ერთ-ერთი მნიშვნელოვანი პრიორიტეტია“. გაიგეთ მეტი IDFI-ის საქმიანობის შესახებ… წყარო: idfi.ge

თბილისი. 26 იანვარს, ინფორმაციის თავისუფლების განვითარების ინსტიტუტმა (IDFI) სამუშაო შეხვედრა გამართა საქართველოში ციფრული კონტენტის რეგულირების გამოწვევებსა და მათ საპასუხოდ გასატარებელ ღონისძიებებზე. „სამუშაო შეხვედრაზე IDFI-ის წარმომადგენლებმა დაინტერესებული მხარეებისთვის განსახილველად წარმოადგინეს IDFI-ის მიერ მომზადებული რეკომენდაციები, რომლებიც ქვეყანაში ინტერნეტის თავისუფლებისა და ციფრული უფლებების უკეთ დაცვისკენ არის მიმართული“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. საქართველოს სტრატეგიისა და განვითარების ცენტრი (GCSD) აქვეყნებს ანდრო გოცირიძის პუბლიკაციას „რუსული კიბერშეტევა უკრაინაზე - იანვარი, 2022“. „გასულ კვირას დასავლეთსა და რუსეთს შორის უშედეგო მოლაპარაკებების ფონზე უკრაინის სამთავრობო საიტებზე მასირებული კიბერშეტევა განხორციელდა, რამაც ათეულობით სამთავრობო საიტის საწყისი გვერდის შეცვლა, ე.წ defacement გამოიწვია. წინამდებარე სტატია უკრაინის მაგალითზე დაყრდნობით ხაზს უსვამს რუსეთის მიერ კიბერსივრცეში ორკესტრირებული თავდასხმების მნიშვნელობას რუსული ჰიბრიდული ომის კონცეფციაში“. სრულად... წყარო: www.gcsd.org.ge

თბილისი. 18-19 სექტემბერს, StrategEast, გაეროს განვითარების პროგრამასთან თანამშრომლობითა და GITA-ს მხარდაჭერით, EPAM Engineering Hackathon: Design your future გაიმართა. ტრადიციული მარათონი აერთიანებს ინფორმაციული ტექნოლოგიების პროფესიონალებს, ინოვატორებს და ხელს უწყობს, სხვადასხვა ქვეყნის სამოქალაქო საზოგადოების და საქველმოქმედო ორგანიზაციებს, სკოლებს, საჯარო სექტორს, სამედიცინო დაწესებულებებს ციფრული გადაწყვეტის გზით გააუმჯობესონ მომსახურებები და პროცესები. ჰაკათონის მხარდამჭერი გაეროს განვითარების პროგრამის (UNDP Georgia) სწრაფი განვითარების ლაბორატორიის რჩეული გუნდი გახდა Dart Team, რომელმაც ეტლით მოსარგებლე პირებისთვის ინტერაქტიული რუკის შექმნის იდეა წარმოადგინა. იდეა გულისხმობს მობილური აპლიკაციის შექმნას, რომელიც შეზღუდული შესაძლებლობების მქონე პირებს წინასწარ გააგებინებს თუ სად დახვდებათ ადაპტირებული გარემო. ჰაკათონის ფარგლებში, გუნდმა აპლიკაციის პროტოტიპი შექმნა, ამ ეტაპზე კი პროდუქტის დახვეწაზე მუშაობენ. როგორც აღვნიშნეთ “Dart Team” UNDP Georgia-ს ფავორიტი გუნდი გახდა, თუმცა პრიზის მიღების ნაცვლად გადაწყვიტა, რომ სამტრედიელი მოზარდისთვის კომპიუტერი შეეძინა. „ქართველმა მოსწავლემ ჩვენგან, Dart Team-ისგან და სოციალური საქველმოქმედო პროექტისგან „ჩართე“ საჩუქრად კომპიუტერი მიიღო. ჟანნასთვის ეს მნიშვნელოვანი საჩუქარია, რომელიც ონლაინ სწავლაში და საჭირო ინფორმაციის მოძიებაში დაეხმარება“, აღნიშნულია UNDP Georgia-ს გვერდზე სოციალურ ქსელში.

თბილისი. გაეროს ქალთა ორგანიზაციისა და ნორვეგიის მთავრობის მხარდაჭერით, ბიზნესისა და ტექნოლოგიების უნივერსიტეტი, IT კომპანიების ჩართულობით, ტექნოლოგიებში ქალების გადამზადებას იწყებს. „პროექტი ტექნოლოგიებში ქალთა მონაწილეობის გასაძლიერებლად, მთელი საქართველოს მასშტაბით განხორციელდება. იგი განკუთვნილია როგორც დამწყებთათვის, ისე იმ ქალებისთვის, რომლებსაც ტექნოლოგიების სფეროში გარკვეული გამოცდილება უკვე აქვთ“. სრულად... წყარო: ორგანიზაციის გვერდი სოციალურ ქსელში

თბილისი. 9-10 ნოემბერს, ილიას სახელმწიფო უნივერსიტეტის ორგანიზებით, გაიმართება ჰაკათონი „ციფრული განათლება მომავლისთვის Georgia - Digital Education For Future“, რომელიც საერთაშორისო პროექტის DigiEduHack-ის ფარგლებში ხორციელდება. „პროექტი ორი დღის განმავლობაში მთელს მსოფლიოში ერთდროულად მიმდინარეობს და მონაწილე ქვეყნებს ადგილზე უწევთ თავიანთ გამოწვევებზე მუშაობა. ღონისძიების თანაორგანიზატორები არიან ევროკავშირის დაფინანსებით მიმდინარე პროექტი: „ახალგაზრდული ტექნოლოგიური კლუბების ქსელი” და ინოვაციური განათლების ფონდი“. სრულად... წყარო: ილიას უნივერსიტეტის გვერდი სოციალურ ქსელში

თბილისი. საქართველოს განათლებისა და მეცნიერების სამინისტროს ინიციატივით შექმნილია არაერთი ციფრული რესურსი, რომლებსაც სკოლები ეფექტიანად იყენებენ. იხ. რესურსები ბმულზე... სრულად... წყარო: სამინისტროს გვერდი სოციალურ ქსელში

თბილისი. სოციალური სამართლიანობის ცენტრის განცხადებით, „ჯორჯიან მანგანეზი,” რომელიც წლების განმავლობაში ირიდებდა შეკითხვებს მოპოვების შედეგად მიყენებულ ზიანზე, შუქრუთის მოსახლეობის პროტესტის შედეგად იძულებული გახდა თავად გამხდარიყო მოლაპარაკების მხარე და ამით საკუთარი პასუხისმგებლობა ეღიარებინა. „სამწუხაროდ, საკანონმდებლო დონეზე სასარგებლო წიაღისეულის მოპოვების შედეგად დაზარალებული ადგილობრივი მოსახლეობისთვის ზიანის ანაზღაურების წესი და პირობები განსაზღვრული კვლავ არ არის. შესაბამისად, შუქრუთის მოსახლეობას, მიყენებული ზიანის კომპენსირების წესსა და ოდენობაზე უშუალოდ კომპანიასთან, კერძო ხასიათის მოლაპარაკებების გამართვა და სამოქალაქო წესით შეთანხმება მოუხდათ. ასევე, შეთანხმების შესახებ გავრცელებული ცნობები, ისევე როგორც მოლაპარაკებების პროცესის უთანასწორო და გაუმჭვირვალე ხასიათი, არსებითად პრობლემურია, რადგან კომპენსაციის შეთანხმებული მექანიზმის სამართლიანობა და სანდოობა საეჭვო რჩება, ხოლო პროტესტის მონაწილეთა მიმართ მიმდინარე სისხლისსამართლებრივი დევნის ფაქტები დამატებით კითხვებს აჩენს შეთანხმების საგანზე“, ნათქვამია ორგანიზაციის განცხადებაში. სრულად... წყარო: socialjustice.org.ge

იმერეთი. სოციალური სამართლიანობის ცენტრმა შეისწავლა ერთი მხრივ, შუქრუთის პროტესტის მონაწილეთა მთავარი მოთხოვნები და კომპანიასთან მათი შეუთანხმებლობის მიზეზები, ხოლო მეორე მხრივ, ამ ფართე სოციალური და ეკოლოგიური კრიზისის განმაპირობებელი გარემოებები, რომელიც წინ უძღოდა ამ პროტესტს ჭიათურის მუნიციპალიტეტში. „მოსახლეობა და კომპანიის წარმომადგენლები ზიანს განსხვავებულად აფასებდნენ - როგორც მეთოდოლოგიის, ისე სხვადასხვა ტიპის ზიანის დაფარვის კუთხით, მნიშვნელოვანია, რომ სახელმწიფო უწყებები და იქ თავმოყრილი დარგობრივი ცოდნა მიიმართოს წიაღისეულის მოპოვებასთან დაკავშირებული ზიანის შეფასებისთვის, როგორც კონკრეტულ მესაკუთრეთა შეთხვევაში, ისე მთლიანად მუნიციპალიტეტის ბუნებრივ გარემოსთან მიმართებაში. ეს ინტერვენცია უნდა განხორციელდეს ზიანის შეფასების საერთო სტანდარტის შემუშავების სახით, რაც სამთო-მოპოვებითი სექტორის შესაძლო ნეგატიურ ზეგავლენას უფრო მდგრადად, სამართლიანად და მეთოდურად მოაქცევდა რეგულირების სივრცეში“. სრულად... წყარო: socialjustice.org.ge

თბილისი. სოციალური სამართლიანობის ცენტრმა (ყოფილი EMC) პრესკონფერენცია გამართა სოფელ შუქრუთის პროტესტის მონაწილეებთან ერთად მიმდინარე პროცესებთან დაკავშირებით.  „შუქრუთის მოსახლეობის პროტესტმა, რომელიც უკვე სამ თვეზე მეტია გრძელდება თბილისში გადმოინაცვლა. პროტესტის მონაწილეები მოპოვებითი საქმიანობის შედეგად დაზარალებული ოჯახების კომპენსირებისთვის სამართლიანი სტანდარტის განსაზღვრას ითხოვენ“. სრულად... წყარო: socialjustice.org.ge

ოზურგეთი. ინფორმაციის თავისუფლების განვითარების ინსტიტუტის (IDFI) თანახმად, 2018 წელს საქართველოს განახლებული კონსტიტუციის მე-17 მუხლში შევიდა ჩანაწერი, რომლის მიხედვით, „ყველას აქვს ინტერნეტზე წვდომისა და ინტერნეტით თავისუფლად სარგებლობის უფლება“. „ეს ნიშნავს, რომ სახელმწიფოს აქვს პოზიტიური ვალდებულება, ინტერნეტი გახადოს ფართოდ ხელმისაწვდომი. საქართველოს კონსტიტუციაში აღნიშნული ჩანაწერის არსებობას IDFI აქტიურად ადვოკატირებდა. გაეცანით, საქართველოში ფართოზოლოვანი ინფრასტრუქტურის განვითარების სახელმწიფო პროგრამის საპილოტე პროექტის მიმდინარეობის მიმოხილვას“. წყარო: idfi.ge

სამეგრელო. 1 მარტს ასოციაცია „ათინათის“ ორგანიზებით, ახალგაზრდული ცენტრის წევრებისათვის ჩატარდა საინფორმაციო შეხვედრა თემაზე „ციფრული ტექნოლოგიების პრინციპები“. შეხვედრის მონაწილეებს შესაძლებლობა ჰქონდათ გაცნობოდნენ ინფორმაციას ისეთ საკითხებზე, როგორიცაა: ოპერაციული სისტემები; ციფრული მოწყობილობის მონაცემები და მათი ფორმატები; Adobe პროგრამული პაკეტები; Google Adwords და Google Adsense; მომავლის ტექნოლოგიები: ხელოვნური ინტელექტი, მანქანური სწავლება, ბლოქჩეინი და ნივთების ინტერნეტი. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სტრატეგიის და განვითარების ცენტრი (GCSD) გთავაზობთ ირაკლი ჯღარკავას კვლევას: „საქართველოს კიბერუსაფრთხოების პოლიტიკა, გამოწვევები და შესაძლებლობები“. „ნაშრომში გაეცნობით საქართველოს კიბერუსაფრთხოების პოლიტიკას და მის წინაშე არსებულ გამოწვევებს და საფრთხეებს. კვლევაში ასევე განხილულია კიბერთავდასხმები საქართველოს ეროვნულ უსაფრთხოებაზე გავლენის ჭრილში, კიბერსივცრიდან მომავალ საფრთხეებთან ბრძოლის, შემცირების და მართვის საშუალებები.“ სრულად... წყარო: www.gcsd.org.ge

თბილისი. გენდერული საინფორმაციო პორტალი აქვეყნებს ლელა ხომერიკის სტატიას: თანამედროვე ტექნოლოგიების საშუალებებით განხორციელებული ძალადობა - ქალთა მიმართ და ოჯახში ძალადობის ახალი ფორმა. „ძალადობის რისკის ქვეშ მცხოვრები ქალები მოძალადესთან ერთ სივრცეში იზოლირებული აღმოჩნდნენ. პანდემიის დროს, სხვა ქვეყნების მსგავსად, ოჯახში ძალადობის მასშტაბი საქართველოშიც გაიზარდა. თანამედროვე ტექნოლოგიები გვთავაზობს გენდერულ ძალადობაზე პრევენციისა და მათზე რეაგირების ახალ გზებს. თუმცა ამავდროულად, თავი იჩინა ახალმა პრობლემამ - მოძალადეების მიერ ტექნოლოგიების გამოყენებამ მსხვერპლთა თვალთვალისა და კონტროლისათვის. გენდერული ძალადობის ეს სახე იმდენად გავრცელებულია, რომ დღეს ტექნოლოგიური საშუალებების გამოყენებით ძალადობა (technology-facilitated gender-based violence), ძალადობის ერთ-ერთ ფორმად არის მიჩნეული ძალადობის ფიზიკური, ეკონომიკური თუ სექსუალური ძალადობის ფორმებთან ერთად“, ნათქვამია სტატიაში. სრულად... წყარო: ginsc.net

თბილისი. 19 ნოემბერს, 17:00-ზე, „მშობლის სკივრის“ პირდაპირი ჩართვის (LIVE) სტუმარი იქნება კლინიკური ნეიროფსიქოლოგი, ფსიქოლოგიის დოქტორი, პროფესორი თამარ გაგოშიძე. სასაუბრო თემა: ტექნოლოგიები, ბავშვის განვითარება და ონლაინ სწავლება. „როგორ დავიცვათ ბალანსი ბავშვის მიერ ტექნოლოგიების გამოყენების საკითხში იზოლაციის პირობებში. ჩაინიშნე LIVE-ის დრო და მიიღე პასუხები ან Მოგვწერე ამ საკითხებთან დაკავშირებული დამატებითი კითხვები წინასწარ, პირადი შეტყობინების სახით“. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 14 ოქტომბერს, მსოფლიოში ინტერნეტ თავისუფლების შესახებ Freedom House-ის ყოველწლიური ანგარიში გამოქვეყნდა. „2020 წელს საქართველომ 100-დან 76 ქულა აიღო და ინტერნეტ თავისუფლების მხრივ შეფასდა, როგორც „თავისუფალი“ ქვეყანა. 2019 წელთან შედარებით, ქვეყნის ქულა, საერთო ჯამში, ერთით გაუმჯობესდა“.  სრულად... წყარო: idfi.ge

თბილისი. კონსულტაციისა და ტრენინგის ცენტრი (CTC) აქვეყნებს სკოლა-ლაბის სტიპენდიანტის, მიხეილ იაშვილის ნაშრომს: „დისტანციური სწავლება“. „ნაშრომში დეტალურადაა აღწერილი დისტანციური სწავლების განვითარების ეტაპები, დღეს არსებული ონლაინ სწავლების განსხვავებული მიდგომები და განათლების ახალი პრადიგმა - კონექტივიზმი. ასევე, განხილულია ონლაინსწავლების სხვადასხვა ფორმის სასწავლო შედეგები, მისი ეფექტურობა და ბავშვის განვითარებაზე გავლენა. დასკვნის სახით კი წარმოდგენილია ეფექტური სასკოლო მოდელი იმ სარგებელისა და საფრთხეების გათვალისწინებით, რაც ონლაინსწავლებას და ტექნოლოგიების ინტენსიურ გამოყენებას ახლავს თან“. სრულად... წყარო: ორგანიზაციის გვერდი სოციალურ ქსელში

კახეთი. 26-27 სექტემბერს, კახეთში, მედიის წარმომადგენლებთან ორდღიანი სამუშაო შეხვედრა გაიმართა COVID-19-თან დაკავშირებულ საკითხებზე. "შეხვედრაზე განიხილეს COVID-19-ის მიერ შექმნილი გლობალური და ლოკალური გამოწვევები, ჯანდაცვის სისტემაში კოვიდ-19-ის მართვის სქემა, ეპიდზედამხედველობა და პროფილაქტიკური ღონისძიებები, კლინიკური მართვის პრინციპები, ვაქცინაცია, გაეროს ბავშვთა ფონდის საპასუხო ღონისძიებები COVID-19-თან დაკავშირებით, ბავშვის უფლებათა კოდექსი და სხვა მნიშვნელოვანი თემები". სრულად... წყარო: ორგანიზაციის გვერდი სოციალურ ქსელში

თბილისი. საზოგადოებრივი ორგანიზაციების ნაწილი ეხმაურება განხილვას საქართველოს პარლამენტში კანონპროექტის „ინფორმაციული უსაფრთხოების შესახებ“ საქართველოს კანონში შესატანი ცვლილებების თაობაზე. „2012 წელს მიღებული კანონის არაეფექტურობამ, გახმაურებულმა კიბერშეტევებმა და თანამედროვე გამოწვევებმა ცხადყო, რომ კიბერ უსაფრთხოებასთან დაკავშირებული საკანონმდებლო რეგულაციების განახლება ნამდვილად საჭიროა. თუმცა, მიგვაჩნია, რომ კანონპროექტით: ა) იქმნება სისტემა, რომელიც ვერ უზრუნველყოფს სახელმწიფო დონეზე ინფორმაციული უსაფრთხოების ეფექტურობას; ბ) შეიცავს ინფორმაციულ სისტემებზე და თუ მათში დაცულ პერსონალურ თუ კომერციული სახის ინფორმაციაზე ტოტალური კონტროლის რისკს; გ) ეწინააღმდეგება საქართველოს კონსტიტუციის ნორმებსა და საერთაშორისო ვალდებულებებს“, ნათქვამია ერთობლივ განცხადებაში. სრულად... წყარო: gyla.ge

მცხათა-მთიანეთი. ბულაჩაურის მწვანე ცენტრში, ქალთა საერთაშორისო ასოციაციის წევრები ევროკავშირის მიერ მხარდაჭერილი ახალგაზრდა ლიდერებისა და ინოვატორების მწვანე ბანაკის მონაწილეებს შეხვდნენ.  შეხვედრის ფარგლებში, სტუმრებმა ბანაკის მონაწილეებს თავიანთი გამოცდილება გაუზიარეს და ისაუბრეს გარემოს დაცვის, ტექნოლოგიების განათლებისა და კარიერული წინსვლის შესახებ. მწვანე ბანაკის მონაწილეებმა სტუმრებს თავიანთ თემში არსებული პრობლემები და მათი აღმოფხვრისთვის შემუშავებული სამომავლო ხედვები გააცნეს. შეხვედრისას ასოციაციის წევრმა, საქართველოში ევროკავშირის ელჩის კარლ ჰარცელის მეუღლემ, მეტე ჰარცელმა ბანაკის მონაწილეებს სიტყვით მიმართა და ელჩის მიერ გამოგზავნილი წერილი წაუკითხა.  სრულად…  წყარო: http://enpard.ge

თბილისი. ინფორმაციის თავისუფლების განვითარების ინსტიტუტი აქვეყნებს მსოფლიო ეკონომიკური ფორუმის მიერ მომზადებული კვლევის – გლობალური საინფორმაციო ტექნოლოგიების ანგარიშის მიმოხილვას. კვლევა მოიცავს თანამედროვე ტექნოლოგიების განვითარებისა და მათი ეფექტური გამოყენების შედეგებს ქვეყნების ეკონომიკური კეთილდღეობის საქმეში. აღნიშნული კვლევის მიხედვით დგინდება ქვეყნების ქსელური მზაობის ინდექსი. ინსტიტუტის ინფორმაციით, საქართველომ წინა წელთა შედარებით 2014 წელს მნიშვნელოვნად გაიუმჯობესა პოზიცია. „საქართველო 2013 წელს ქსელური მზაობის ინდექსით 3.93 ქულით (7-დან) 65-ე ადგილს იკავებდა, დღეს იგი 60-ე ადგილზეა (148 ქვეყანას შორის), 4.1-იანი მაჩვენებლით. ზოგადად, ანგარიშში საქართველო სომხეთთან, ყაზახეთთან, პანამასთან, ყატართან და არაბთა გაერთიანებულ საამიროებთან ერთად, „მზარდ ვარსკვლავთა" ("Rising Star”) კატეგორიაშია მოქცეული. ეს გულისხმობს, რომ მისი ქულა საშუალოზე მაღალია და საშუალოზე სწრაფად იზრდება. ასევე, კვლევაში აღნიშნულია, რომ ეს ქვეყნები მკვეთრი პოზიტიური ცვლილებებით გამოირჩევიან", ნათქვამია ორგანიზაციის ვებგვერდზე. სრულად... წყარო: idfi.ge

სამეგრელო. ხობის მუნიციპალიტეტის სოფელ ხამისკურში 23 მაისს, განახლებადი ენერგიის გამოყენების ტექნოლოგიის დანერგვის პრეზენტაცია გაიმართა. სოფელში, არასამთავრობო ორგანიზაციების „საქართველოს მწვანეთა მოძრაობა დედამიწის მეგობრები – საქართველოს" და „სოფლად თემთა განვითარების სააგენტოს" მიერ აშშ საერთაშორისო განვითარების სააგენტოს (USAID) მხარდაჭერით  გაკეთდა მზის კოლექტორი, ხილის და ბოსტნეულის საშრობები, ენერგოეფექტური სათბურის მარტივი ტიპის მზით სახლის გათბობის სისტემები. არასამთავრობო ორგანიზაცია  ხელისუფლებასთან ერთად მუშაობს იმაზე, რომ  განახლებადი ენერგიის გამოყენების ტექნოლოგია მეტად იყოს ხელმისაწვდომი.