აჭარა. 16 ოქტომბერს, თვითმმართველი ქალაქი ბათუმის საკრებულოში, საზოგადოებრივმა ორგანიზაციამ „ახალგაზრდულმა კოლეგიამ" მორიგი შეხვედრა გამართა. საკრებულოს თავმჯდომარემ ახალგაზრდებს საკრებულოს მუშაობის სპეციფიკა გააცნო. შეხვედრაზე ასევე ისაუბრეს საკრებულოს მიერ მიმდინარე წლის განხორციელებული და დაგეგმილი ცვლილებების შესახებ. აღნიშნული შეხვედრის ფარგლებში ახალგაზრდებს საშუალება მიეცათ, მიეღოთ პასუხები მათთვის მნიშვნელოვან და საიტერესო კითხვებზე, გამოეხატა პოზიცია მიმდინარე პროცესებზე და მიეწოდებინათ მათი ხედვა არსებული პრობლემების მოგვარებასთან დაკავშირებით. აღნიშნული შეხვედრა გაიმართა პროექტის - „დისკუსიის კვირეულის" ფარგლებში. პროექტის ფინანსური მხარდამჭერია აჭარის სპორტისა და ახალგაზრდობის საქმეთა დეპარტამენტი.

ქვემო ქართლი. „სამოქალაქო ადვოკატირების ინიციატივის პროექტის ფარგლებში, სიდასა და რუსთავის საზოგადოებრივი საბჭოს ორგანიზებით, 15 ოქტომბერს, რუსთავში, XXI მიკრორაიონში ჩატარდა შეხვედრა საზოგადოებრივ საბჭოსა და ადგილობრივ მოსახლეობას შორის. შეხვედრის მიზანი იყო ადგილობრივი მოახლეობისათვის აქტუალური პრობლემების გამოკვეთა და შემდგომში ადგილობრივ თვითმმრთველობსათან მათი ადვოკატირება. შეხვედრის დროს საბჭოს წევრებმა გააცნეს მოსახლეობას საბჭოს მიზნები, ამოცანები და დაგეგმილი საქმიანობა. თავის მხრივ მოსახლეობამ ჩამოთვალა ის პრობლემები, რომლებიც ყველაზე მეტად აწუხებს ჭყონდიდელის დასახლების მცხოვრებლებს. საბჭოს წევრებმა მოსახლეობას მიაწოდეს ინფორმაცია ქალაქის თვითმმართველობის ახალ ინიციატივის შესახებ, რომელიც ითვალისწინებს ქალაქის ტერიტორიული ორგანიებისათვის ფულადი რესურსის გამოყოფას, რათა ადგილზე, მოსახლოების ჩართულობით მოხდეს სხვადასხვა მნიშვნელოვანი პროექტების განხორციელება. საბჭოს წევრებმა შესთავაზეს მოსახლეობას აქტიურად ჩაერთონ აღნიშნულ პროცესში. პროექტი „სამოქალაქო ადვოკატირების ინიციატივა" ხორციელდება აშშ საერთაშორისო განვითარების სააგენტოს (USAID) დემოკრატიული მმართველობის პროექტის მხარდაჭერით. წყარო: ორგანიზაციის გვერდი სოციალურ ქსელში

თბილისი. „ადგილობრივი თვითმმართველობის კოდექსის" პროექტის შემუშავებაში მონაწილე არასამთავრობო ორგანიზაციებმა განცხადება გაავრცელეს. „უმნიშვნელოვანეს ამოცანად გვესახება 2014 წლის დასაწყისამდე ადგილობრივი თვითმმართველობის საარჩევნო სისტემის რეფორმირების დასრულებაც, რაც შეიძლება შეფერხდეს „ადგილობრივი თვითმმართველობის კოდექსის" დაგვიანებით მიღებით". არასამთავრობოები მოუწოდებენ საქართველოს მთავრობას, დროულად მოახდინონ კანონპროექტის ინიცირება საქართველოს პარლამენტში და „არ დაუშვას წინა ხელისუფლების მიერ ადგილობრივი თვითმმართველობის რეფორმისას დაშვებული შეცდომების გამეორება". სრულად წყარო:osgf.ge

თბილისი. საერთაშორისო გამჭვირვალობა საქართველომ ბლოგპოსტი – ქუთაისი მე–12 მერის მოლოდინში" – გამოაქვეყნა. „2003 წლიდან დღემდე ქუთაისმა 11 მერი გამოიცვალა. პროცესი ახლაც გრძელდება და ქუთაისი ახალი, მე–12 მერის მოლოდინშია. მიგვაჩნია, რომ ქალაქის მერის ხშირი ცვლილება, ასევე შესაბამისი გამოცდილების არმქონე პირის მერის პოსტზე დანიშვნა აფერხებს ქალაქის განვითარებას და მერიის სამსახურების საქმიანობას, ასევე უარყოფითად აისახება მიმდინარე პროექტების განხორციელებაზე", ნათქვამია ბლოგპოსტში. „საერთაშორისო გამჭვირვალობა – საქართველო" მოუწოდებს ქუთაისის საკრებულოს გამჭვირვალე გახადოს საკონკურსო-საატესტაციო კომისიის საქმიანობა, დააკომპლექტოს იგი შესაბამისი ცოდნისა და გამოცდილების მქონე წევრებით, რათა სწორად იქნეს შერჩეული სათანადო კვალიფიკაციის მქონე პირები ქალაქის მერის თანამდებობის დასაკავებლად. სრულად წყარო:transparency.ge

აჭარა. 8 ოქტომბერს, ქალაქ ბათუმის არქიტექტორთა საბჭომ და სამოქალაქო მრჩეველთა საბჭომ ერთობლივი გაფართოებული სხდომა გამართეს. სხდომაზე განიხილეს ქალაქისთვის აქტუალური რამდენიმე მნიშვნელოვანი საკითხი. კულტურული მემკვიდრეობის დაცვის პოლიტიკა ბათუმში - ამ საკითხზე სხდომის მონაწილეთა მსჯელობამ ხმაურიანად ჩაიარა. 2012 წელს, თვითმმართველი ქალაქი ბათუმის მერიამ კლდიაშვილის #8-ში და ვაჟა-ფშაველას #9/10-ში გასცა ნებართვა მაღალსართულიანი საცხოვრებელი სახლის ასაშენებლად. მიმდინარე თვეში აჭარის მთავრობის შუამდგომლობით ქალაქ ბათუმის მერიაში შევიდა მენაშენის განაცხადი სართულების მომატებასთან დაკავშირებით. სამოქალაქო მრჩეველთა საბჭო და საზოგადოებრივი ორგანიზაციები უარყოფითად აფასებენ ამ ფაქტს. მათი თქმით, ეს არის მაგალითი იმისა, რომ სახელმწიფო პოლიტიკა ქალაქის ისტორიული იერსახის შესანარჩუნებლად არ შეცვლილა. ისინი მიიჩნევენ რომ საჭიროა რეაგირება და რეგულაციების მიღება/გამკაცრება კულტურული მემკვიდრეობის დაცვის მიზნით.

აჭარა. 7 ოქტომბერს, არასამთავრობო ახალგაზრდულმა ორგანიზაციამ „ახალგაზრდულმა კოლეგიამ" დაიწყო ახალი პროექტი – „დისკუსიების კვირეული". კვირეულის ფარგლებში პირველი შეხვედრა ქალაქ ბათუმის მერსა და ახალგაზრდებს შორის შედგა. შეხვედრის მიზანი იყო ახალგაზრდებისთვის ქალაქ ბათუმის მერიის საქმიანობის შესახებ ინფორმაციის მიწოდება და მერთან უშუალო კომუნიკაცია. „დისკუსიების კვირეული" ოქტომბრის ბოლომდე გაგრძელდება და მასში აჭარის მთავრობის წარმომადგენლები მიებენ მონაწილეობას.

სამეგრელო. შოთა მესხიას ზუგდიდის სახელმწიფო, სასწავლო უნივერსიტეტში კოალიციური პროექტის – „საზოგადოების ჩართულობა დემოკრატიული თვითმმართველობისათვი" – წარმომადგენლება საჯარო ლექცია ჩაატარეს. ლექციაზე მიმოხილულ იქნა ადგილობრივი თვითმმართველობისა და მოქალაქეთა ჩართულობის ძირითადი საკითხები. მსგავსი ლექცია უკვე ჩატარდა „ზუგდიდის სასწავლო უნივერსიტეტში". მომავალ კვირას ამ უნივერსიტეტების სტუდენტებს შორის ჩატარდება ბრეინ-რინგი თვითმმართველობის თემატიკაზე. პროექტი მხარდაჭერილია „ევრაზიის თანამშრომლობის ფონდის" მიერ. წყარო:სამოქალაქო მონიტორინგისა და კვლევების ცენტრის გვერდი სოციალურ ქსელში

სამცხე–ჯავახეთი. ახალქალაქის ახალგაზრდული ცენტრის წევრებმა, საგრანტო ღონისძიებების ფარგლებში, ახალქალაქის 1–ლი და მე–4 საჯარო სკოლების, ასევე სოფელ გომანის საჯარო სკოლის მოსწავლეებისთვის ადგილობრივი თვითმმართველობის შესახებ ტრენინგები ჩაატარეს. ტრენინგი ჩატარდა პროექტ „ეროვნული ინტეგრაციის გაძლიერება საქართველოში" ფარგლებში, რომელსაც ახორციელებს საქართველოს გაეროს ასოციაცია (UNAG),საერთაშორისო განვითარების სააგენტოს (USAID) ფინანსური მხარდაჭერით. წყარო:ორგანიზაციის გვერდი სოციალურ ქსელში

ქვემო ქართლი. 2 ოქტომბერს, რუსთავში, ჭყონდიდელის დასახლებაში, სიდასა და რუსთავის საზოგადოებრივი საბჭოს ორგანიზებით, ჩატარდა შეხვედრა საზოგადოებრივ საბჭოსა და ადგილობრივ მოსახლეობას შორის. შეხვედრას 30–მდე ადამიანი ესწრებოდა. შეხვედრის დროს საბჭოს წევრებმა გააცნეს მოსახლეობას საბჭოს მიზნები, ამოცანები და დაგეგმილი საქმიანობა. თავის მხრივ მოსახლეობამ ჩამოთვალა ის პრობლემები, რომლებიც ყველაზე მეტად აწუხებს ჭყონდიდელის დასახლების მცხოვრებლებს. შეხვედრის მიზანი იყო ადგილობრივი მოახლეობისათვი აქტუალური პრობლემების გამოკვეთა, შემდგომში ადგილობრივ თვითმამრთველობსათან მათი ადვოკატირების მიზნით. შეხვედრა შედგა პროექტის – „სამოქალაქო ადვოკატირების ინიციატივა" – ფარგლებში, რომელიც ხორციელდება აშშ საერთაშორისო განვითარების სააგენტოს (USAID) დემოკრატიული მმართველობის პროექტის მხარდაჭერით. წყარო:სიდას გვერდი სოციალურ ქსელში

სამეგრელო. კოალიციური პროექტის – „საზოგადოების ჩართულობა დემოკრატიული თვითმმართველობისათვის" – ფარგლებში,ზუგდიდის სასწავლო უნივერსიტეტში საჯარო ლექცია ჩატარდა. ლექციაზე მიმოხილულ იქნა ადგილობრივი თვითმმართველობისა და მოქალაქეთა ჩართულობის ძირითადი საკითხები.  პროექტი მხარდაჭერილია ევრაზიის თანამშრომლობის ფონდის მიერ. წყარო:სამოქალაქო მონიტორინგისა და კვლევების ცენტრის გვერდი სოციალურ ქსელში

იმერეთი. საარჩევნო სისტემების განვითარების, რეფორმირებისა და სწავლების ცენტრისა და ცესკოს იურიდიული დეპარტამენტის ინიციატივით დაიწყო ტრენინგები. ტრენინგის თემაა: საარჩევნო პროცესი და ადგილობრივი თვითმმართველობა, და ადმინისტრაციული რესურსების გამოყენების დაუშვებლობა. ამჯერად ტრენინგები გაიმართა ქუთაისის ადგილობრივი თვითმმართველობის იურისტებისთვის. ტრენინგში მონაწილეები გაეცნენ იმ რეგულაციებს, რომლებიც საარჩევნო კანონმდებლობის მიხედვით არეგულირებს მათ მონაწილეობას საარჩევნო პროცესში, ასევე იმ ვალდებულებებს, რაც მათ არჩევნების დროს აქვთ. მსგავსი სახის ტრენინგი უკვე გაიმართა თბილისში, ბორჯომში, ბოლნისსა და თელავში. ქუთაისის შემდეგ კი სემინარები სენაკსა და ბათუმში გაიმართება.

აჭარა. „საერთაშორისო გამჭვირვალობა – საქართველოს" ორგანიზებით, 26 სექტემბერს ბათუმში აჭარის მუნიციპალიტეტებში მომუშავე საჯარო მოხელეებისთვის საკადრო პოლიტიკის საკითხებში ტრენინგი ჩატარდა. შეხვედრა-ტრენინგს ორგანიზაციის მიერ მოწვეული ადამიანური რესურსების მართვის შვედი ექსპერტი ქირსტენ კაამანი გაუძღვა. მსგავსი შეხვედრები უკვე გაიმართა ქუთაისსა და ზუგდიდში. წყარო:ორგანიზაციის გვერდი სოციალურ ქსელში

შიდა ქართლი. საზოგადოება „ბილიკში" სამოქალაქო კლუბების წევრებთან სასაუბროდ იმყოფებოდა გორის მუნიციპალიტეტის გამგეობის წარმომადგენლები. შეხვედრაზე მოსწავლეებმა დააყენეს ყველა ის პრობლემური საკითხი, რომელიც ადვოკაციის ტრეინინგებზე წარმოიშვა. შეხვედრაზე ისაუბრეს როგორც უკვე განხორციელებულ პროექტებზე, ასევე აქტუალურ პრობლემებზე. შეხვედრის დასრულებისას გამგებლის მოადგილემ მზადყოფნა გამოთქვა გაგრძელდეს სამუშაო შეხვედრები პრობლემების მოსაგვარებლად და ინტენსიური ხასიათი მიეცეს კლუბების და ადგილობრივი მუნიციპალიტეტის თანამშრომლობას.

სამეგრელო. ზუგდიდის მუნიციპალიტეტის გამგეობის შეხვედრების დარბაზში, „საერთაშორისო გამჭვირვალობა – საქართველოს" ორგანიზებით, ადგილობრივ თვითმმართველობაში ადამიანური რესურსების მართვის ტრენინგი გაიმართა. სამუშაო შეხვედრას სამეგრელო-ზემო სვანეთის მუნიციპალიტეტებისა და თვითმმართველ ქალაქ ფოთის გამგეობა-საკრებულოს თანამშრომლები დაესწრნენ. შვედმა ანალიტიკოსმა ქირსტენ კამაანი საატესტატო-საკონკურსო კომისიის არსსა და ზოგადად, ადმინისტრაციულ ორგანოებში თანამშრომლების აყვანა-გათავისუფლების საკითხებზე ისაუბრა.

გურია. ახალგაზრდულ ფორუმზე შემუშავებული კიდევ ერთი პროექტი წარმატებით დასრულდა. ლანჩხუთის მუნიციპალიტეტის საკრებულოსთან და ადგილობრივ თვითმმართველობასთან თანამშრომლობის შედეგად სუფსის საჯარო სკოლას წყალი მიეწოდება. ახალგაზრდული ფორუმის ფარგლებში მოსწავლეებმა პროექტი ინფრასტრუქტურის სფეროში მოამზადეს. იგი მიზნად ისახავდა ლანჩხუთის მუნიციპალიტეტის სოფელ სუფსის სკოლის წყლით უზრუნველყოფას. პროექტის წარმატებით განხორციელების მიზნით ახალგაზრდა ფორუმელები შეხვდნენ ლანჩხუთის მუნიციპალიტეტის საკრებულოს თავმჯდომარეს და მის მოადგილეს. ეფექტური თანამშრომლობის შედეგად სოფელ სუფსის ადგილობრივმა თვითმმართველობამ შეიძინა და დაამონტაჟა მილი, რომლითაც დღეისათვის სკოლას წყალი უწყვეტად მიეწოდება.

იმერეთი. 24 სექტემბერს „საერთაშორისო გამჭვირვალობა – საქართველო" ორგანიზებით ქუთაისში იმერეთის მხარის მუნიციპალიტეტების 15 წარმომადგენლისათვის საკადრო პოლიტიკის საკითხებში სამუშაო შეხვედრა გაიმართა. შეხვედრა-ტრენინგს ადამიანური რესურსების მართვის შვედი ექსპერტი უძღვებოდა. მსგავსი შეხვედრები უახლოეს დღეებში ზუგდიდსა და ბათუმშიც გაიმართება. წყარო: ორგანიზაციის გვერდი სოციალურ ქსელში

კახეთი. სოფელ მაღაროში, ბოდბესა და ქვემო მაჩხაანში ადგილობრივ მოსახლეობასთან შეხვედრები გამართეს რეგიონულმა არასამთავრობო ორგანიზაციებმა -„სამოქალაქო ინიციატივამ" და სათემო კავშირმა „ნუკრიანმა". შეხვედრებზე გაიმართა პროექტის – „ინტერაქცია თვითმმართველობასა და მოსახლეობას შორის ინტერენტ სამოქალაქო ჩართულობის გზით" – პრეზენტაცია, საზოგადოებრივმა ორგანიზაციებმა მოკლედ გააცნეს კონკრეტული თემის მკვიდრებს მათი როლის, უფლებების და შესაძლებლობების შესახებ ინფორმაცია, რაც შესაძლოა დაეხმაროთ სოფლის პრობლემების გადაწყვეტაში. წყარო: „ჩემი სოფელის" გვერდი სოციალურ ქსელში

სამეგრელო. საერთაშორისო გამჭვირვალობა საქართველომ ზუგდიდის მუნიციპალიტეტის ტერიტორიულ ერთეულებში გამართული შეხვედრების შუალედური ანგარიში კოალიციური პროექტის ფარგლებში გამოაქვეყნა. ანგარიშში ანგარიშის თანახმად, ზუგდიდის 15 ტერიტორიულ ორგანოში, ძირითადად, ინფრასტრუქტურული და სოციალური თემატიკის პრობლემა გამოიკვეთა. „განსაკუთრებით მტკივნეულია სანიაღვრე არხების, გზებისა და საბავშვო ბაღების თემები". პროექტს, რომლის ფარგლებშიც ანგარიში მომზადდა, საერთაშორისო გამჭვირვალობა საქართველოს ზუგდიდის წარმომადგენლობა „სამოქალაქო მონიტორინგისა და კვლევების ცენტრსა" და ასოციაცია „ათინათთან" ერთად და ზუგდიდის მუნიციპალიტეტის საკრებულოსა და გამგეობასთან თანამშრომლობით ახორციელებს. სრულად წყარო: transparency.ge

თბილისი. „სამართლიანი არჩევნებისა და დემოკრატიის საერთაშორისო საზოგადოებამ" 2012 წლის საპარლამენტო არჩევნების შემდგომ მუნიციპალიტეტებში განვითარებული მოვლენების მონიტორინგის მეოთხე, შემაჯამებელი ანგარიში გამოაქვეყნა. ანგარიში მოიცავს ინფორმაციას თვითმმართველობებში განვითარებული პოლიტიკური პროცესების, საკადრო ცვლილებების, საპროტესტო აქციებისა და თვითმმართველობის მოხელეთა მიმართ განხორციელებული სამართლებრივი დევნის შესახებ.  ანგარიში წყარო: isfed.ge

სამეგრელო. 8 სექტემბერს, პროექტის – „საზოგადოების ჩართულობა დემოკრატიული თვითმმართველობისათვის" – ფარგლებში   მორიგი შეხვედრები გაიმართა ზუგდიდის მუნიციპალიტეტის სოფლების რუხის, რიყესა და ჩხორიას მოსახლეობასთან.  შეხვედრაზე მიმოხილულ იქნა ადგილობრივი თვითმმართველობის, მოქალაქეთა ჩართულობისა და თვითმმართველობის დაგეგმილი რეფორმის ძირითადი საკითხები. პროექტის წარმომადგენლებმა მოიკვლიეს კონკრეტულ თემში არსებული პრობლემები, რომლებიც გათვალისწინებულ იქნება ზუგდიდის მუნიციპალიტეტის გამგეობის, საკრებულოსა და სხვა უწყებებისათვის შესათავაზებელ რეკომენდაციებში.  შეხვედრები ტარდება ასოციაცია „ათინათის", „საერთაშორისო გამჭვირვალობა-საქართველოს" ზუგდიდის ოფისისა და „სამოქალაქო მონიტორინგისა და კვლევების ცენტრის" კოალიციური პროექტის ფარგლებში. წყარო:ორგანიზაციის გვერდი სოციალურ ქსელში

სამეგრელო. ასოციაცია „ათინათის" სააქტო დარბაზში გაიმართება კვლევის – „ონარიის დასახლების სოციალურ-ეკონომიკური და ინფრასტრუქტურული მდგომარეობის ანალიზი" – პრეზენტაცია. კვლევა მომზადებულია „სამოქალაქო მონიტორინგისა და კვლევების ცენტრის" მიერ, კოალიციური პროექტის „საზოგადოების ჩართულობა დემოკრატიული თვითმმართველობისათვის" ფარგლებში, „ევრაზიის თანამშრომლობის ფონდის" მხარდაჭერით. კვლევა  წყარო:სამოქალაქო მონიტორინგისა და კვლევების ცენტრის გვერდი სოციალურ ქსელში

აჭარა.  3 სექტემბერს, არასამთვრობო ორგანიზაცია „ახალგაზრდა ადვოკატებმა" ქობულეთის მუნიციპალიტეტის თვითმმართველობის 2012 წლის საქმიანობის საჯაროობისა და გამჭვირვალობის შესახებ კვლევის შედეგები წარმოაგინა.  დოკუმენტში ვრცლადაა განხილული 2012 წლის ბიუჯეტის ხარჯვითი წარმომადგენლობითი ორგანოების ხარჯვითი ნაწილი , სატენდერო გარემო, მივლინებები, მიღებული პრემიები, გაღებული საოფისე ხარჯები და სხვა. ორგანიზაცია წარმოდგენილი ფაქტობრივი და სამართლებრივი მასალების საფუძველზე აქვეყნებს დასკვნას და სარეკომენდაციო წერილს, რომლითაც მოუწოდებს საქართველოს აღმასრულებელ და საკანონმდებლო ხელისუფლებას განახორციელოს ეფექტური კონტროლი.