სამეგრელო. 20-21 ივლისს ანაკლიაში „საერთაშორისო გამჭვირვალობა – საქართველოს" ზუდიდის ოფისის, ასოციაცია „ათინათისა" და „სამოქალაქო მონიტორინგისა და კვლევების ცენტრის" ერთობლივი პროექტის ფარგლებში ჩატარდა სემინარი – „ჩართულობა დემოკრატიული თვითმმართველობისათვის". სემინარზე მომხსენებლებმა და სტუმრებმა ადგილობრივი თვითმმართველობის ძირითადი საკითხები განიხილეს. შეხვედრაში მონაწილეობა ზუგდიდის მუნიციპალიტეტის გამგეობისა და საკრებულოს თანამშრომლებმა, სამეგრელო-ზემო სვანეთის სამხარეო ადმინისტრაციისა და ადგილობრივი მედიის წარმომადგენლებმა მიიღეს. ღონისძიების ფარგლებში, სემინარი ჩაატარეს „კავკასიის ეკონომიკური და სოციალური კვლევითი ინსტიტუტის" ექსპერტ-ანალიტიკოსებმა. პროექტი ხორციელდება „ევრაზიის თანამშრომლობის ფონდის მხარდაჭერით". წყარო:საერთაშორისო გამჭვირვალობა – საქართველოს გვერდი სოციალურ ქსელში

აჭარა. „სამოქალაქო მრჩეველთა საბჭომ" თვითმმართველ ქალაქ ბათუმის მერიასთან ერთად რიგით მეორე შეხვედრა ჩაატარა. შეხვედრაზე იმსჯელეს პრიორიტეტებზე განათლების, კულტურის და ახალგაზრდობის მიმართულებით. საუბარი შეეხო ახალგაზრდების დასაქმების, ხელოვანების ხელშეწყობის და სამოქალაქო საზოგადოების განვითარების საკითხებს.  ეხვედრა კითხვა-პასუხის რეჟიმში 2 საათზე მეტხანს გაგრძელდა. სამოქალაქო მრჩეველთა საბჭო პრიორიტეტების განხილვის მიზნით კიდევ ერთ შეხვედრას ჩაატარებს. 

აჭარა. 17 ივლისს, ბათუმის დემოკრატიული ჩართულობის ცენტრში, სამოქალაქო მრჩეველთა საბჭოს და თვითმმართველ ქალაქ ბათუმის მერიის ერთობლივი ორგანიზებით გაიმართა ბათუმის პრიორიტეტების საჯარო განხილვა მოსახლეობის ჯანმრთელობის დაცვის და სოციალური უზრუნველყოფის მიმართულებით.  თავდაპირველად მერიის საფინანსო სამსახურის უფროსმა, არჩილ ვანაძემ ზოგადი მიმოხილვა გააკეთა¸ რის შემდეგაც მოსახლეობის ჯანმრთელობის დაცვის და სოციალური უზრუნველყოფის სამსახურის უფროსმა დეტალურად ისაუბრა არსებულ პროგრამებზე, პრობლემებზე და გეგმებზე, თუ რა უნდა იყოს ამ მიმართულებით პრიორიტეტული  ქალაქ ბათუმისთვის 2014-2017 წლებში.

აჭარა. სამოქალაქო საზოგადოების ინსტიტუტი აგრძელებს მუშაობას თვითმმართველ ქალაქ ბათუმის ურბანული განვითარების სტრატეგიულ გეგმის შემუშავებაზე. მორიგი შეხვედრა გაიმართა 12 ივლისს, ბათუმის დემოკრატიული ჩართულობის ცენტრში სამუშაო ჯგუფთან. ბათუმელი მოქალაქეების მხარდაჭერით და ჩართულობით დამუშავებულ SWOT ანალიზისა და სწრაფი ურბანული სივრცითი ანალიზის საფუძველზე „სამოქალაქო საზოგადოების ინსტიტუტის" ურბანისტებმა და არქიტექტორებმა ჩამოაყალიბეს ქალაქის მთავარი მიზნები, პრობლემები, მათი გადაჭრის გზები და შესაძლებლობები, რომელიც გააცნეს ბათუმელ საზოგადოებას და შენიშვნები და რეკომენდაციები მიიღეს. პროექტი ხორციელდება აშშ საერთაშორისო განვითარების სააგენტოს (USAID) პროგრამა „დემოკრატიული მმართველობა საქართველოში" ფინანსური მხარდაჭერით.

გურია. 15 ივლისს,  ოზურგეთის დემოკრატიული ჩართულობის ცენტრში საზოგადოებრივმა ორგანიზაციებმა  – საქართველოს დემოკრატიული განვითარების კავშირმა და გურიის მედიატორთა ასოციაციამ ერთობლივი პრესკონფერენცია გამართეს და საზოგადოებას ახალი პროექტი წარუდგინეს. „გაერთიანება წყლის მომხმარებელთა უფლებების დასაცავად" - ასე ჰქვია იმ ახალ პროექტს, რომელსაც აღნიშნული ორგანიზაციები კოალიციურად ახორციელებენ „აღმოსავლეთ-დასავლეთის მართვის ინსტიტუტის" (EWMI) ფინანსური მხარდაჭერით.პროგრამის განხორციელების საწყისი ეტაპი მოიცავს მრავალბინიან საცხოვრებელ სახლებში ბინათმესაკუთრეებთან აქტიური ინფორმაციული ხასიათის შეხვედრების ორგანიზებას და ბინათმესაკუთრეთა ამხანაგობების ჩამოყალიბებას. ბინათმესაკუთრეთა ამხანაგობების ჩამოყალიბებით მომხმარებელთა უფლებების დაცვის პროცესი უფრო ეფექტიანად და ოპერატიულად მიიღწევა. ამხანაგობების ჩამოყალიბება შემდგომში უზრუნველყოფს არა მარტო წყლის მიწოდებასთან დაკავშირებული პრობლემების, არამედ, ზოგადად, მრავალბინიან საცხოვრებელ სახლებში შემდგომში წარმოშობილი ყველა საერთო და მნიშვნელოვანი პრობლემის მოგვარებასა და გადაწყვეტას. პროექტი ითვალისწინებს ასევე ადგილობრივი თვითმმართველობის ორგანოებთან მრავალბინიანი საცხოვრებელი სახლების ბინათმესაკუთრეთა ინტერესების ლობირებასა და სამართლებრივ დახმარებას ადგილობრივი ბიუჯეტიდან თანადაფინანსების მოპოვების საკითხებში. წყარო: საქართველოს დემოკრატიული განვითარების კავშირის გვერდი სოციალურ ქსელში

კახეთი. 7 ივლისის თელავში სათემო განვითარების ცენტრის (CDC) პროგრამის – „სათემო ინიციატივების განვითარების ხელშეწყობა კახეთის რეგიონში – პრეზენტაცია გაიმართა. პროგრამის მიზანია ადგილობრივი თემის, საზოგადოების გააქტიურება და განვითარების პროცესებში მეტი ჩართულობის სტიმულირება კულტურულ-საგანმანათლებლო პროგრამების მეშვეობით. პროგრამა ითვალისწინებს სიღნაღის და თელავის მუნიციპალიტეტში მოქმედი საზოგადოებრივი და სათემო ორგანიზაციების შესაძლებლობების განვითარებას კონსულტაციების, ტრენინგების, მცირე საგრანტო პროგრამების შეთავაზების გზით. პრეზენტაციის მონაწილეები გაცენენ პროგრამის სამოქმედო გეგმას, სამუშაო განრიგსა და სათემო განვითარების ცენტრის სხვადასხვა სამუშაო მიმართულებას. წყარო: ორგანიზაციის გვერდი სოციალურ ქსელში

სამეგრელო. საერთაშორისო გამჭვირვალობა – საქართველოს ზუგდიდის ოფისმა ადგილობრივი თვითმმართველობის ორგანოების საჯარო მოხელეებისთვის პრემიების გაცემის საკითხებზე დისკუსია გამართა. ფილიალის წარმომადგენლებმა ორგანიზაციის მიერ ჩატარებული კვლევის შედეგები წარადგინეს. შეხვედრას ზუგდიდის მუნიციპალიტეტის გამგეობის, საზოგადოებრივი და არასამთავრობო ორგანიზაციების წარმომადგენლები ესწრებოდნენ. დისკუსიის დროს გადაწყდა, რომ ორგანიზაციის რეგიონული წარმომადგენლობა ზუგდიდში უკვე შემუშავებულ რეკომენდაციებს გადაუგზავნის მუნიციპალიტეტის საკრებულოს, რათა ადმინისტრაციულმა ორგანომ სპეციალური დადგენილება შეიმუშავოს პრემიების გაცემის პრაქტიკის დასარეგულირებლად. ზუგდიდის მუნიციპალიტეტის გამგეობის წარმომადგენლებმა თანხმობა განაცხადეს, შეიქმნას სპეციალური სამუშაო ჯგუფი, რომლის მუშაობაში მონაწილებას საჯარო და არასამთავრობო სექტორი მიიღებს. წყარო: ორგანიზაციის გვერდი სოციალურ ქსელში

აჭარა. სამოქალაქო საზოგადოების ინსტიტუტი აგრძელებს მუშაობას თვითმმართველ ქალაქ ბათუმის ურბანული განვითარების სტრატეგიულ დაგეგმვაზე. ბათუმის დემოკრატიული ჩართულობის ცენტრში მორიგი შეხვედრა გაიმართა თვითმმართველობის წარმომადგენლების, ადგილობრივი საზოგადოებრივი და არასამთავრობო ორგანიზაციების, ადგილობრივი ექსპერტების და მედია-ორგანიზაციების მონაწილეობით. როგორია ქალაქი მდგომარეობა, რა ფუნქცია და მისია აკისრია ბათუმს და როგორია მისი სტრატეგიული განვითარების საერთო ხედვა და ზოგადი მიზნები. შეხვედრაზე გაკეთდა სწრაფი ურბანული სივრცითი ანალიზის (Rapid Urban Spatial Analysis – RUSA) მეთოდის გამოყენებით არსებული მდგომარეობის ანალიზის პრეზენტაცია. ამას გარდა ორგანიზატორებმა დამსწრე საზოგადოებას წარუდგინეს SWOT ანალიზის მეთოდის გამოყენებით არსებული მდგომარეობის შემაჯამებელი ანალიზი, რომელიც საზოგადოებისვე ჩართულობით იქნა სრულყოფილი და მიეცა საბოლოო სახე. „სამოქალაქო საზოგადოების ინსტიტუტი" აღნიშნულ პროექტს აშშ–ს საერთაშორისო განვითარების სააგენტოს  (USAID) პროგრამის –  „დემოკრატიული მმართველობა საქართველოში" – ფარგლებში ახორციელებს. სტრატეგიული გეგმის შემუშავების მეთოდოლოგია და SWOT ანალიზი 

თბილისი. საქართველოს ადგილობრივი თვითმმართველობის ეროვნულმა ასოციაციამ  „ადგილობრივი თვითმმართველობის შესახებ ორგანული კანონის" ახალი რედაქციის კანონპროექტის სამუშაო ვერსიას გამოაქვეყნა. ვერსია შემუშავებულია მუნიციპალიტეტების წარმომადგენლებთან კონსულტაციების შედეგად. საქართველოს ორგანული კანონის პროექტი ადგილობრივი თვითმმართველობის შესახებ – სამუშაო ვარიანტი წყარო: nala.ge

აჭარა. საქართველოს ახალგაზრდა იურისტთა ასოციაციის ქუთაისის ფილიალის დამოუკიდებელი პროექტის – „ჩემი ხმა პარლამენტის" ფარგლებში ქობულეთში გაიმართება ტრენინგ ციკლი, იმერეთის მხარის 12-ვე მუნიციპალიტეტის მაჟრიტარი დეპუტატის ბიუროების 47 თანამშრომლისთვის.  ტრეინინგის მონაწილეები გადამზადებას გაივლიან შემდეგ საკითხებზე: სახელმწიფო და ადგილობრივი თვითმმარტველოსბის ორგანოების, მაჟორიტარი დეპუტატის ბიუროსა და სახელმწიფო რწმუნებულის გუბერნაროტის კომპეტენციების გამიჯვნა; საბიუჯეტო საკითხები; საკანონმდებლო ინიციატივის მომზადება; საქმის წამოაება(ოფოციალური დოკუმენტების მომზადება); მონიტორინგის განხორციელების მექანიზმები; ადვოკატირება; საზოგადოებასთან ურთიერთბა (P.R); ტრეინინგის მიზანია მაჟორიტარი დეპუტატის ბიუროების გაძლიერება,მათი თანამშრომელიბის გადამზადების და კვალიფიკაციის ამაღლების გზით. აგრეთვე იმერეთის მხარის 12-ვე მუნიციპალიტეტის ბიუროს შორის ეფექტური კომუნიკაციის ჩამოყალიბება. წყარო:ორგანიზაციის გვერდი სოციალურ ქსელში

ქვემო ქართლი. პროექტის ,,სამოქალაქო ადვოკატირების ინიციატივა" ფარგლებში, ,,სიდამ” განაახლა ვებგვერდი www.cems.ge, რომელიც წარმოადგენს სამოქალაქო მონიტორინგის ელექტრონულ სისტემას. ვებგვერდი საშუალებას აძლევს ადგილობრივ მოსახლეობას მიიღოს ინფორმაცია თვითმმართველობის საქმიანობის შესახებ და მიაწოდოს მათ ინფორმაცია აქტუალურ და პრობლემურ საკითხებზე. აღნიშნული საიტი შეიქმნა 2012 წელს, პროექტის ,,შენი ქალაქის თვითმმართველობა და შენ" ფარგლებში. თავდაპირველად საიტი მოიცავდა ინფორმაციას მხოლოდ რუსთავის შესახებ. განახლებულ საიტზე ასევე განთავსდება ინფორმაცია გორის, ქუთაისისა და ფოთის შესახებ. პროექტი „სამოქალაქო ადვოკატირების ინიციატივა" ხორციელდება აშშ საერთაშორისო განვითარების სააგენტოს (USAID) დემოკრატიული მმართველობის პროექტის მხარდაჭერით. წყარო: cida.ge

ქვემო ქართლი. პროექტის ,,სამოქალაქო ადვოკატირების ინიციატივა" ფარგლებში, ,,სიდასა" და რუსთავის საზოგადოებრივი საბჭოს ორგანიზებით, 20 ივნისს,  საზოგადოებრივ საბჭოსა და ადგილობრივ მოსახლეობას შორის შეხვედრა გაიმართა. შეხვედრის მიზანი იყო ადგილობრივი მოსახლეობისათვის აქტუალური პრობლემების გამოკვეთა შემდგომში ადგილობრივ თვითმმართველობასთან მათი ადვოკატირების მიზნით. შეხვედრის დროს საბჭოს წევრებმა გააცნეს მოსახლეობას საბჭოს მიზნები, ამოცანები და დაგეგმილი საქმიანობა. პროექტი „სამოქალაქო ადვოკატირების ინიციატივა" ხორციელდება აშშ საერთაშორისო განვითარების სააგენტოს (USAID) დემოკრატიული მმართველობის პროექტის მხარდაჭერით. სრულად წყარო: cida.ge

აჭარა. 18 ივნისს, ბათუმის დემოკრატიული ჩართულობის ცენტრში, სამოქალაქო საზოგადოების ინსტიტუტმა სამუშაო შეხვედრა გამართა. შეხვედრაზე ქალაქ ბათუმის ურბანული განვითარების სტრატეგიული გეგმის შემუშავების მიზნით  არქიტექტორებმა, არასამთავრობო ორგანიზაციების, თვითმმართველობის და სხვა სექტორის წარმომადგენლებმა  შემდეგი საკითხები განიხილეს:  სწრაფი ურბანული სივრცითი ანალიზის ( Rapid Urban Spatial Analysis-RUSA) მეთოდის გამოყენებით არსებული მდგომარეობის ანალიზი.  SWOT ანალიზის (ძლიერი და სუსტი მხარეები, შესაძლებლობები და საფრთხეები) მეთოდის გამოყენებით არსებული მდგომარეობის ანალიზი.  პროექტის წარმატება მნიშვნელოვანწილად არის დამოკიდებული საზოგადოების სხვადასხვა სეგმენტების ჩართულობაზე, ამიტომ სამოქალაქო საზოგადოების ინსტიტუტი კვლავაც აგრძელებს მსგავს შეხვედრებს დაინტერესებულ მხარეებთან. პროექტი ხორციელდება აშშ საერთაშორისო განვითარების სააგენტოს (USAID) პროგრამა ,,დემოკრატიული მმართველობა საქართველოში" (G3) ფარგლებში.

თბილისი. კონსტიტუციონალიზმის კვლევისა და ხელშეწყობის რეგიონალური ცენტრში გაიმართა  კონფერენცია ადგილობრივი თვითმმართველობის ახალ კონცეფციასთან დაკავშირებით. ღონისძიება შედგა პროექტის –„სამოქალაქო საზოგადოების ფოკუს-ჯგუფების ჩართულობა კონსტიტუციურ სამართალშემოქმედებაში" – ფარგლებში. კონფერენციაში მონაწილეობდნენ საქართველოს უნივერსიტეტის, საქართველოს ჰუმანიტარული უნივერსიტეტისა და თბილისის ივ. ჯავახიშვილის სახელობის უნივერსიტეტის სტუდენტები. კონცეფცია ადგილობრივი თვითმმართველობის შესახებ წარმოადგინეს რეგიონული განვითარებისა და ინფრასტრუქტურის სამინისტროს წარმომადგენლებმა და სამინისტროსთან არსებული ადგილობრივი თვითმმართველობის საბჭოს თავმჯდომარემ დავით ლოსაბერიძემ. წყარო:მშვიდობის, დემოკრატიის და განვითარების კავკასიური ინსტიტუტის გვერდი სოციალურ ქსელში

თბილისი. საქართველოს ადგილობრივი თვითმმართველობის ეროვნული ასოციაცია შეშფოთებულია ბოლო პერიოდში ადგილობრივ თვითმმართველობებში მიმდინარე პროცესების გამო. „არ სრულდება და უგულვებელყოფილია ევროპის საბჭოს ადგილობრივ და რეგიონალურ ხელისუფლებათა კონგრესის მიერ ამა წლის მარტის სესიაზე მიღებული რეკომენდაცია. ჩვენ გამოვთქვავთ შეშფოთებას სამტრედიის, ოზურგეთის, გურჯაანის და რუსთავის მუნიციპალიტეტებში მიმდინარე სხვადასხვა სახის ზეწოლის ფაქტების გამო. ვთვლით, რომ პოლიტიკური ნიშნით გათავისუფლებები ნებისმიერ დონეზე - ეს იქნებიან უმაღლესი პირები თუ სოფლის რწმუნებულები, ეწინააღმდეგება ევროპულ ქარტიას. ასოციაცია დააკვირდება ადგილობრივ თვითმმართველობებში განვითარებულ მოვლენებს და თითოეულ ფაქტზე მოახდენს შესაბამის რაეგირებას და, რა თქმა უნდა, მიაწვდის ინფორმაციას ევროპულ სტრუქტურებს", ნათქვამია ორგანიზაციის გვერდზე სოციალურ ქსელში. წყარო: ორგანიზაციის გვერდი სოციალურ ქსელში

აჭარა. 10 ივნისს, ბათუმის დემოკრატიული ჩართულობის ცენტში, განვითარებისა და თანამშრომლობის ხელშეწყობის კავშირმა „პროგრესმა" და თვითმმართველ ქალაქ ბათუმის საკრებულომ საინფორმაციო შეხვედრა გამართა. თემა:  ბათუმის თვითმმართველობაში ახალგაზრდების სტაჟირების პროგრამა. პროექტის მიზანია საკრებულოს დარგობრივი კომისიებისა და მერიის შესაბამისი სამსახურების საქმიანობაში ახაგაზრდების ჩართვა და მათ ცნობიერების ამაღლების ხელშეწყობაა. სტაჟირებას გაივლის 20/25 ახალგაზრდა (18-27 წელი), რომელთა შერჩევა მოხდება კონკურსის გზით. მსურველები წარმოადგენენ სპეციალურ განაცხადს, რომელიც მოიცავს სააპლიკაციო ფორმას. სააპლიკაციო ფორმების მიღება მოხდება ელექტრონულად. ისინი გაივლიან  სპეციალურ ტრენინგებს, რის შემდეგაც გადანაწილდებიან საკრებულოსა და მერიის შესაბამის  კომისიებსა და სამსახურებში.  სტაჟირებაში მონაწილე პირები  სპეციალურ სერთიფიკატებს მიიღებენ.

გურია.5 ივნისს, ოზურგეთის დემოკრატიული ჩართულობის ცენტრის ორგანიზებით თვითმმართველობის რეფორმის მრჩეველთა საზოგადოებრივი საბჭოს წევრები კონსტანტინე კანდელაკი და მამუკა აბულაძე ოზურგეთის არასამთავრობო ორგანიზაციების წარმომადგენლებს შეხვდნენ. თვითმმართველობის საბჭოს წარმომადგენლებმა  არასამთავრობო ორგანიზაციებს საბჭოს საქმიანობა გააცნეს და საქართველოს თვითმმართველობის კოდექსის ახალ პროექტზე იმსჯელეს. შეხვედრა – „ადგილობრივი თვითმმართველობის საზოგადოებრივი მრჩეველთა საბჭოს ხელშეწყობის პროექტის" ფარგლებში ჩატარდა. პროექტი ხორცილედბა ამერიკის შეერთებული შტატების საერთაშორისო განვითარების სააგენტოს (USAID) და მართვის საერთაშორისო სისტემების (MSI - Management Systems International) მხარდაჭერით.  პროექტს ახორციელებს ფონდი „ღია საზოგადოება-საქართველო".

კახეთი.კავშირი „სათემო ორგანიზაცია ნუკრიანი" და „სამოქალაქო ინიციატივა"  შეხვედრების სერიას განაგრძობენ. 3 ივნისს ორგანიზაციის წარმომადგენლები  ბოდბისხევის, წნორის და საქობოს მოსახლეობას შეხვდნენ პროექტის - „ინტერაქცია თვითმმართველობასა და მოსახლეობას შორის ინტერნეტ სამოქალაქო ჩართულობის გზით" - ფარგლებში. წყარო:ორგანიზაციის გვერდი სოციალურ ქსელში

თბილისი. საქართველოს წითელი ჯვრის საზოგადოების პროექტის –„ვიმოქმედოთ ერთად" –თანამშრომლები და მოხალისეები ასურელი თემის წარმომადგენლებს ასურელთა კულტურის ცენტრში შეხვდნენ. წითელი ჯვრის წარმომადგენლებმა წარმოადგინეს პრეზენტაცია წითელი ჯვრისა და პროექტის „ვიმოქმედოთ ერთად" შესახებ. შეხვედრის მიზანი იყო ასურული თემისთვის წითელი ჯვრის პრინციპებისა და სტრატეგიული მიმართულებების შესახებ ინფორმაციის მიწოდება და პროექტის საქმიანობების გაცნობა.  წყარო:ორგანიზაციის გვერდი სოციალურ ქსელში

კახეთი. 29 მაისს პროექტის – „ინტერაქცია თვითმმართველობასა და მოსახლეობას შორის ინტერნეტ სამოქალაქო ჩართულობის გზით" ფარგლებში, სათემო კავშირმა „ნუკრიანმა" და „სამოქალაქო ინიციატივამ" გამართეს შეხვედრების სერია სიღნაღის მუნიციპალიტეტის სოფლებში, ბოდბეში, მაღაროსა და ილიაწმინდაში. წყარო: ორგანიზაციის გვერდი სოციალურ ქსელში

თბილისი. დეცენტრალიზაცია და ადგილობრივი თვითმმართველობა განიხილება, როგორც დემოკრატიზაციის პროცესის განუყოფელი და საკვანძო ელემენტი. დეცენტრალიზაციასა და ადგილობრივ თვითმმართველობაზე უახლესი, ელექტრონული ფორმატის პუბლიკაციების გაცნობა დაინტერესებულ პირებს შეუძლიათ შემდეგ მისამართზე: www.eldis.org წყარო: participate.ge

კახეთი. სათემო კავშირი „ნუკრიანი" და „სამოქალაქო ინიციატივა" აგრძელებენ შეხვედრების სერიას სიღნაღის მუნიციპალიტეტის სოფლებში. 28 მაისს პროექტის – „ინტერაქცია თვითმმართველობასა და მოსახლეობას შორის ინტერნეტ სამოქალაქო ჩართულობის გზით" – ფარგლებში ორგანიზაციებმა  პრეზენტაციები გამართეს ტიბაანში, ჯუგაანსა და ქვემო მაჩხაანში. წყარო:ორგანიზაციის გვერდი სოციალურ ქსელში