კახეთი. თელავში, 18 ივლისს, კახეთის სამხარეო განვითარების პროგრამის ფარგლებში, ჩატარდა ტრენინგი თემაზე „ახალგაზრდული აქტივიზმი".  შეხვედრას ესწრებოდნენ სამოქალაქო პასუხისმგებლობის და ადვოკატირების პროექტში ჩართული ორი სოფლის შაშიანისა და ქვემო ხოდაშნის საჯარო სკოლების სამოქალაქო კლუბების მოხალისეები. შეხვედრის მიზანია მოსწავლეები გაეცნონ წარმატებული ადამიანების ისტორიებს და გაეცნონ მათ იდეებს, იმის შესახებ, თუ როგორ შექმნან უკეთესი გარემო ახალგაზრდებისთვის საკუთარ სოფლებში.

თბილისი. ორგანიზაცია „ახალგაზრდა ადვოკატები" საქართველოს იუსტიციის უმაღლეს საბჭოს მიმართავს. ორგანიზაცია ითხოვს „სათანადოდ შეფასდეს თბილისის საქალაქო სასამართლოს თავმჯდომარის 2014 წლის 1 ივლისის ბრძანება. რომლის მიხედვითაც, პირველი ინსტანციის სასამართლოში, სისხლის, სამოქალაქო და ადმინისტრაციულ საქმეთა კოლეგიებში მოსამართლეთა შემადგენლობის დადგენა მოხდა”. სრულად...  წყარო: barristers.ge

თბილისი. ლიბერალიზმის სასწავლო ცენტრმა „ლიბცენტრის" მორიგი გადაცემა - „სასკოლო განათლების პრობლემები" - გამოაქვეყნა. „საერთაშორისო კვლევების მიხედვით ქართველი მოსწავლეების შედეგები მათემათიკაში, კითხვასა და საბუნებისმეტყველო საგნებში ევროპის ქვეყნების საშუალო მაჩვენებელზე გაცილებით დაბალია. არის თუ არა სასკოლო განათლება და მასწავლებელთა კომპეტენცია პრობლემა?”. თემაზე წამყვანთან ერთად სტუმარი, შეფასებისა და გამოცდების ცენტრის საგნობრივი კვლევის დეპარტამენტის კოორდინატორი საუბრობს. გადაცემა   წყარო: ორგანიზაციის გვერდი სოციალურ ქსელში

თბილისი. „ინტერნიუსი-საქართველოს" პროექტი Media.GE დროებით, მიმდინარე წლის სექტემბრამდე, აჩერებს ქართულენოვანი კონტენტის ინგლისურ და რუსულ ენებზე თარგმნას და გავრცელებას, რის გამოც ორგანიზაცია ბოდიშს უხდის ვებ-პორტალის მკითხველებს. გამოქვეყნდება მხოლოდ მოწოდებული ინგლისური ან რუსულენოვანი მასალები. ვებ-პორტალის ქართულენოვანი ვერსია აგრძელებს მუშაობას. სრულად... წყარო: media.ge

თბილისი. 17 ივლისს, 2014 წლის მოწვევის ახალგაზრდული პარლამენტის განათლების მეცნიერებისა და კუტურის კომიტეტის ორგანიზებით გაიმართა სემინარი - „საერთაშორისო კონვენცია მსოფლიო კულტურული და ბუნებრივი მემკვიდრეობის დაცვა". სემინარი მიზნად ისახავდა ცნობიერების ამაღლებას კულტურული მემკვიდრეობის დაცვასთან დაკავშირებული იუნესკოს კონვენციების შესახებ. სემინარს გაუძღვა საქართველოს კულტურული მემკვიდრეობის დაცვის ეროვნული სააგენტოს, საერთაშორისო ურთიერთობების სამსახურის უფროსი. წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრმა თვითმმართველობებში ადგილობრივი ქალი პოლიტიკოსების ჩართულობის თემაზე დოკუმენტური ფილმის გადაღება დაიწყო. ორგანიზაცია ფილმს პროექტის - „ქალი პოლიტიკოსების მხარდაჭერა ადგილობრივი თვითმმართველობის დონეზე" - ფარგლებში იღებს. წყარო: ორგანიზაციის გვერდი სოციალურ ქსელში

სამეგრელო. 17 ივლისს, ზუგდიდში, ასოციაცია „ათინათში" ფონდმა „პარტნიორობა საგზაო უსაფრთხოებისათვის" და ახალგაზრდულმა ცენტრმა „ორტუსმა" გამართეს პრეზენტაცია და დისკუსია ჰაერის ხარისხის სამოქალაქო მონიტორინგის პროექტის შესახებ. შეხვედრის მიზანი იყო საქართველოში უსაფრთხო, სუფთა, ხელმისაწვდომი და მწვანე ტრანსპორტის განვითარებას და საზოგადოებაში ჯანსაღი ცხოვრების წესის პოპულარიზაციას ხელშეწყობა. . პროექტის ფარგლებში, ჰაერის ხარისხის საზომი სენსორები დამონტაჟდა საქართველოს სხვადასხვა რეგიონში, მათ შორის ზუგდიდში. აქ შეგიძლიათ ნახოთ მიღბული შედეგები: www.aqe.elva.org: ასევე, შეგიძლიათ იხილოთ საქართველო ჰაერის ხარისხის სენსორების მსოფლიო რუქაზე: www.airqualityegg.com წყარო: ორგანიზაცია „მეგობრული გზების" ვებგვერდი სოციალურ ქსელში

18 ივლისს, 14:00 საათზე, გორში, ომისა და მშვიდობის გაშუქების ინსტიტუტის კავკასიის პროგრამის (IWPR) და ევროკავშირის სადამკვირვებლო მისიის (EUMM) ორგანიზებით გაიმართება საინფორმაციო, სამუშაო შეხვედრა შიდა ქართლის რეგიონში, კონფლიქტის ზონაში მომუშავე ჟურნალისტებთან. მისამართი: გორი, დავით აღმაშენებლის 129, ევროკავშირის სადამკვირვებლო მისიის ოფისი სრულად...

თბილისი. 17 ივლისს „იდენტობაში", თამარ ივერის პრესკონფერენცია გაიმართა. როგორც ორგანიზაცია „იდენტობის" ვებგვერდზეა აღნიშნულია 11 ოქტომბერს, ქამინგ აუთის საერთაშორისო დღეს, თამარ ივერის მონაწილეობით, გაიმართება კონცერტი, რომელიც საქართველოში ყველა სახის დისკრიმინაციის წინააღმდეგ იქნება მიმართული. სრულად... წყარო: identoba.com

18 ივლისს, 19:00 საათზე, საიას იურიდიული განათლების ხელშეწყობის ფონდი 2013-2014 სასწავლო წლის გამოშვების ცერემონიას გამართავს. მისამართი: თბილისი, „გარდენია შევარდნაძე"

18 ივლისს, 18:00 საათზე, უსახლკარო, მარტოხელა დედების მხარდასაჭერად გამოფენა-გაყიდვა -„მისი სახლი" - გაიხსნება. მისამართი: თბილისი, ევროპის სახლი

18 ივლისს, 11:00 საათზე, სახალხო დამცველი ევროკავშირის სადამკვირვებლო მისიის ხელმძღვანელ ტოივო კლარს შეხვდება. მისამართი: თბილისი, კრწანისის 49

18 ივლისს 11:00 საათზე სამოქალაქო საზოგადოების ინსტიტუტი, ბათუმში გამართავს საზოგადოებრივი ორგანიზაციების განვითარების სახელმწიფო მხარდაჭერის კონცეფციის სამუშაო ვერსიის პრეზენტაციასა და განხილვას. მისამართი: ბათუმი, დემოკრატიული ჩართულობის ცენტრი

თბილისი. ინფორმაციის თავისუფლების განვითარების ინსტიტუტი აქვეყნებს მინისტრებისა და მათი მოადგილეების უმაღლესი განათლების დამადასტურებელ დოკუმენტების ქსეროასლებს. ინსტიტუტის ვებგვერდზე ნათქვამია, რომ „ერთადერთ სამინისტროს, რომელმაც აღნიშნული მოთხოვნა უპასუხოდ დატოვა წარმოადგენს საქართველოს შინაგან საქმეთა სამინისტრო. საქართველოს ეკონომიკისა და მდგრადი განვითარების და იუსტიციის სამინისტროებმა აღნიშნეს, რომ მინისტრის და მისი მოადგილეების დიპლომები სამინისტროში არ იყო დაცული. დიასპორის საკითხებში სახელმწიფო მინისტრის აპარატის მიერ განიმარტა, რომ აღნიშნული მოთხოვნა შეიცავდა პერსონალური მონაცემების ნიშნებს და მისი გაცემის დასაშვებობასთან დაკავშირებით შეკითხვა გადაგზავნილი იყო პერსონალურ მონაცემთა დაცვის ინსპექტორთან. აპარატის მიერ 3 თვის დაგვიანებით ინსტიტუტისათვის მოწოდებულ იქნა მხოლოდ სახელმწიფო მინისტრის მოადგილეების დიპლომები. დანარჩენი სამინისტროების მიერ სრულყოფილად იქნა მოწოდებული მინისტრებისა და მათი მოადგილეების უმაღლესი განათლების დამადასტურებელი დოკუმენტების ასლები". სრულად... წყარო: idfi.ge

თბილისი. „საქართველოს მოსამართლეთა ერთობა", საქართველოს ახალგაზრდა იურისტთა ასოციაცია და საერთაშორისო გამჭირვალობა - საქართველო იუსტიციის უმაღლეს საბჭოს მიმართავენ. „საქართველოს იუსტიციის უმაღლესი საბჭოს 2014 წლის 17 ივლისის სხდომის დღის წესრიგში განსახილველ საკითხებს შორის განსაზღვრულია მივლინებულ მოსამართლეთა მივლინების ადგილის სასამართლოებში გადაყვანის, თბილისის საქალაქო სასამართლოს ადმინისტრაციულ საქმეთა კოლეგიის თავმჯდომარის შოთა გეწაძის თბილისის სააპელაციო სასამართლოში გადაყვანისა და თბილისის საქალაქო სასამართლოს ადმინისტრაციულ საქმეთა კოლეგიის თავმჯდომარის დანიშვნის შესახებ საკითხების განხილვა. ...იმედს ვიტოვებთ, რომ 17 ივლისს დანიშნული საბჭოს სხდომის დღის წესრიგში მოსამართლის სხვა თანამდებობაზე ,,გადაყვანის" შესახებ საკითხის დაყენება არ ნიშნავს იმას, რომ იუსტიციის უმაღლესი საბჭო აპირებს კანონის გვერდის ავლით, უბრალო უმრავლესობით მიიღოს გადაწყვეტილება მოსამართლეთა დანიშვნის შესახებ", ნათქვამია ორგანიზაციების ერთობლივ განცხადებაში. სრულად...  წყარო: gyla.ge

კახეთი. 16 ივლისს, სიღნაღის მუზეუმი გაიხსნა გამოფენა და გაიმართა ფილმის ჩვენება ,,დაკარგული ისტორია – მეხსიერება რეპრესირებული ქალების შესახებ". გამოფენაზე წარმოდგენილი იყო XX საუკუნის 20-40-იან წლებში რეპრესირებული ქალების ისტორიები, ხოლო დოკუმენტური ფილმი ,,ცოცხლად მოყოლილი ამბები - მეხსიერება რეპრესირებული ქალების შესახებ" მომზადდა იმ ზეპირი ისტორიებისა და ინტერვიუების საფუძველზე, რომელთა ჩაწერაც საბჭოთა წარსულის კვალვის ლაბორატორიამ აღნიშნული პროექტის ფარგლებში განახორციელა. 2012 წელს, საბჭოთა წარსულის კვლევის ლაბორატორიამ, სახალხო უნივერსიტეტთა გერმანული ასოციაციის საერთაშორისო თანამშრომლობის ინსტიტუტის (DVV International) ფინანსური მხარადჭერით, განახორციელა პროექტი - ,,დაკარგული ისტორია: მეხსიერება რეპრესირებული ქალების შესახებ". პროექტი ითვალისწინებს რეპრესირებული ქალების ისტორიების კვლევას და ფართო საზოგადოებისათვის გაცნობას.

თბილისი. საქართველოს ახალგაზრდული პარლამენტის, განათლების, მეცნიერებისა და კულტურის კომიტეტის წევრებმა ბრიფინგი გამართეს. დეპუტატებმა ისაუბრეს საყდრისის ოქროს საბადოს საკითხზე არსებულ პრობლემებზე და კულტურის სამინისტროს წარუდგინეს პრობლემის მოგვარების გეგმა, რომელიც ახალგაზრდა პარლამენტარებმა ამ დარგის ექსპერტებთან ერთად შეიმუშავეს. წყარო: ორგანიზაციის გვერდი სოციალურ ქსელში

კახეთი. 16 ივლისს, საერთაშორისო არასამთავრობო ორგანიზაციამ ,,გლოუსმა" ახმეტაში პროგრამის „წყალშემკრები აუზის მართვის" ფარგლებში შემაჯამებელი შეხვედრა გამართა. პროექტი მიზნად ისახავდა ადგილობრივი მოსახლეობის საყოფაცხოვრებო და სოციალურ - ეკონომიკური პირობების გაუმჯობესებას. პროგრამამ მოიცვა რიონისა და ალაზან - ივრის წყალშემკრები აუზების ოთხი საპილოტე ტერიტორია. პროგრამის კონსულტანტის თქმით, ,,ერთი პროგრამის ფარგლებში რეგიონებში არსებული ყველა პრობლემის მოგვარება ძნელია, მაგრამ განხორციელებული პროექტებით მნიშვნელოვანი წვლილი შევიტანეთ ადგილობრივი მოსახლეობის კეთილდღეობის გაუმჯობესებაში. სოფლების ნაწილში გაუმჯობესდა სასმელი წყლის მიწოდება, ნაწილში მოწესრიგდა სარწყავი სისტემები, ზოგგან კი მოხდა ალაზნის ნაპირსამაგრი სამუშეობი.

სამცხე–ჯავახეთი. 16 ივლისს, ახალციხის დემოკრატიული ჩართულობის ცენტრში, არასამთავრობო ორგანიზაციამ ,,პარტნიორობა ადამიანის უფლებებისთვის" გამართა ტრენინგ–სემინარი: შეზღუდული შესაძლებლობის მქონე ქალთა მიმართ გამოვლენილი ძალადობის დაფარული ფორმების დაძლევის შესახებ. ღონისძიებას სხვადასხვა უწყების წარმომადგენლები, მათ შორის, სოციალური მომსახურების სააგენტოს მუშაკები და ფსიქიატრები ესწრებოდნენ. ტრენინგის ორგანიზატორებმა მსმენელებს მიაწოდეს ინფორმაცია ძალადობის ფორმებზე და მისი დაძლევის გზებზე. შეხვედრა დისკუსიის რეჟიმში გაგრძელდა. როგორც გაირკვა, აღნიშნულ საკითხზე მუშაობს საქართველოს შრომის, ჯანმრთელობისა და სოციალური დაცვის სამინისტროც, პროგრამის ფარგლებში იგეგმება სოციალური მუშაკებისა და ფსიქიატრების გადამზადება, რათა მათ შეძლონ შეზღუდული შესაძლებლობების მქონე ქალებთან სწორი ურთიერთობა. მსგავს შეხვედრებს ორგანიზაცია სხვა რეგიონებშიც გეგმავს. პროექტი საქართველოში ევროკავშირის მხარდაჭერით ხორციელდება.

თბილისი. 16 ივლისს, გაეროს სახლში, გაეროს მოსახლეობის ფონდის მიერ გამოცხდებული კონკურსის - „დაბერება საქართველოში" - დაჯილდოვების ცერემონიალი გაიმართა. კონკურსში მონაწილეობა საქართველოში მცხოვრებმა ხანდაზმულებმა მიიღეს და თავიანთი ნაშრომებით შემდეგ შეკითხვებს უპასუხეს: რას ნიშნავს დაბერება საქართველოში, რომელია ცხოვრებისგან მიღებული გაკვეთილები და რჩევები, რომლებსაც ახალ თაობას გაუზიარებდით. რას შეცვლიდით საქართველოში დაბერებასთან დაკავშირებული პოლიტიკის ჩარჩოში. კონკურსში სულ 43 თხზულება შევიდა, ავტორებს სპეციალური სერთიფიკატები გადაეცათ. თხზულებები სპეციალურ გამოცემაში დაიბეჭდება. წყარო: „ღირსეული სიბერის" გვერდი სოციალურ ქსელში

სამცხე–ჯავახეთი. ,,საზაფხულო სკოლა 2014", რომელიც დაბა ბაკურიანში 6 ივლისს გაიხსნა, დასასრულს უახლოვდება. ახალციხის და ახალქალაქის ახალგაზრდული ცენტრის წევრები, რომლებიც ბანაკში იმყოფებიან, აქტიურად მონაწილეობენ პროექტის დასკვნით ღონისძიებებში. საზაფხულო სკოლა ფუნქციონირებს 6–დან 20 ივლისამდე პროექტის ,,ეროვნული ინტეგრაციის გაძლიერება საქართველოში" ფარგლებში და მასში მონაწილეობას იღებს საქართველოს 13 ქალაქში არსებული ახალგაზრდული ცენტრის 200-მდე ახალგაზრდა წევრი.. პროექტს ახორციელებს საქართველოს გაეროს ასოციაცია (UNAG), აშშ-ს საერთაშორისო განვითარების სააგენტოს USAID/Georgia ფინანსური მხარდაჭერით.

კახეთი. თელავის მუნიციპალიტეტის სოფელ კისისხევის საჯარო სკოლის სააქტო დარბაზში ფილმის ჩვენება გაიმართა, რომელიც არასამთავრობო ორგანიზაცია, „ჩემი სოფელი 2008"-ის ინიციატივით ჩატარდა. ფილმის ჩვენებას საჯარო სკოლების მოსწავლეები, პედაგოგები და სკოლების სამოქალაქო კლუბების წევრები ესწრებოდნენ. ორგანიზაციის წარმომადგენლების თქმით, ფილმის ჩვენებამ საინტერესოდ ჩაიარა, რომლის შემდეგაც დისკუსია გაიმართა.