იმერეთი. 28 ივნისს, საქართველოს ჟურნალისტური ეთიკის ქარტიის საბჭოს წევრები ადგილობრივ ჟურნალისტებს შეხვდნენ და ჟურნალისტურ საქმიანობაში ეთიკური კუთხით არსებული პრობლემები განიხილეს. ქარტიის წარმომადგენლების განცხადებით, მათ მიზანს ქარტიის, როგორც თვითრეგულირების მექანიზმის პოპულარიზაცია და  მოქალაქეებისათვის მის შესახებ ინფორმაციის მიწოდება წარმოადგენს.საქართველოს ჟურნალისტური ეთიკის ქარტია 2009 წლის დეკემბერში შეიქმნა. ბოლო მონაცემებით, ქარტიაზე ხელმომწერთა რიცხვი 213-ს შეადგენს.

აჭარა. 28 ივნისს, ბათუმის დემოკრატიული ჩართულობის ცენტრში, „საერთაშორისო გამჭვირვალობა - საქართველომ" სასამართლოს ოთხთვიანი ადმინისტრაციულ საქმეთა მონიტორინგის შედეგები გამოაქვეყნა. ორგანიზაციამ 252 სასამართლოს სხდომის მონიტორინგის შედეგად გამოავლინა სასამართლოს როგორც ძლიერი, ისე სუსტი მხარეები. მონაცემებზე დაყრდნობით, შეიძლება მივიჩნიოთ შემდეგი: ცალკეული გამონაკლისების მიუხედავად სასამართლოში საქმის განხილვის საქვეყნოობის პრინციპი არ ირღვევა. შეჯიბრითობის პრინციპი კი საქმეთა დიდ უმრავლესობაში დაცულია. მონაცემების მიხედვით, დავების 92,6%-ის შემთხვევაში დავა სრულად ან ნაწილობრივ სახელმწიფო მხარის სასარგებლოდ დასრულდა. დაგვიანების კუთხით თუ განვიხილავთ ბათუმში პროცესების 70% დაგვიანებით დაიწყო. პრობლემებს შორის უნდა გამოვყოთ აგრეთვე ის ფაქტიც, რომ სასამართლო პროცესები ძალიან ბევრ შემთხვევაში წინასწარ არ იყო გამოცხადებული. „საერთაშორისო გამჭვირვალობა – საქართველო" მონიტორინგს G-PAC-ის ფინანსური მხარდაჭერით ახორციელებდა.

თბილისი. 28 ივნისს, ამერიკის შეერთებული შტატების საერთაშორისო განვითრების სააგენტომ (USAID) საქართველოს რვა უნივერსიტეტთან გააფორმა თანამშრომლობის მემორანდუმი, რომელიც გულისხმობს აღნიშნულ უნივერსიტეტებში სამოქალაქო განათლების პროგრამის და კურსის დანერგვას. სამოქალაქო განათლების პროგრამა ხორციელდება IFES-ის მიერ USAID-ის ფინანსური მხარდაჭერით და მასში ჩრთულია 800–ზე მეტი ქართველი სტუდენტი. USAID-ის ახალი პარტნიორი უნივერსიტეტები არიან: საქართველოს საზოგადოებრივ საქმეთა ინსტიტუტი, იაკობ გოგებაშვილის სახელობის თელავის სახელმწიფო უნივერსიტეტი, ახალციხის სახელმწიფო სასწავლო უნივერსიტეტი, აკაკი წერეთლის სახელმწიფო უნივერსიტეტი, სოხუმის სახელმწიფო უნივერსიტეტი, გორის სასწავლო უნივერსიტეტი, შოთა მესხიას ზუგდიდის სახელმწიფო უნივერსიტეტი და ბათუმის შოთა რუსთაველის სახელმწიფო უნივერსიტეტი.  ურთიერთგაგების მემორანდუმის ხელმოწერის შემდეგ გაიმართა სამუშაო შეხვედრა სამოქალაქო განათლების თემაზე, სადაც სამოქალაქო განათლების კურსდამთავრებულმა სტუდენტებმა კურსის ფარგლებში განხორციელებული პროექტების პრეზენტაცია გამართეს. 

29 ივნისს, 11:00 საათზე, NDI წინასაარჩევნო პროცესზე დაკვირვების საწყის შედეგებს წარმოადგენს.  მისამართი: თბილისი, სასტუმრო „თბილისი მარიოტი"

თბილისი. 28 ივნისს, ფონდი „ღია საზოგადოება –საქართველოს" ოფისში გაიმართა ახალი საზოგადოებრივი ორგანიზაციის პრეზენტაცია. ორგანიზაცია გამოცდების ეროვნული ცენტრიდან წამოსულმა თანამშრომლებმა დააფუძნეს.  „საგანმანათლებლო პოლიტიკისა და კვლევების ასოციაციის" პრეზიდენტია გამოცდების ეროვნული ცენტრის ყოფილი ხელმძღვანელი, მაია მიმინოშვილი. ასოციაციის მუშაობის ძირითადი მიმართულებებია: სამეცნიერო–საგანმანათლებლო კვლევები სკოლამდელი, სასკოლო და უმაღლესი განათლების საფეხურებზე, საერთაშორისო გამოცდილების შესწავლა, განათლების სფეროში არსებული თანამედროვე ლიტერატურისადმი წვდომის ხელშეწყობა, პედაგოგების პროფესიული განვითარების ხელშეწყობა, განათლების სისტემაში მიმდინარე პროცესების შესახებ საზოგადოების ინფორმირება და ა.შ  „ეს ორგანიზაცია შექმნა გუნდმა, რომელიც 10 წლის განმავლობაში მუშაობდა განათლების სისტემაში. (...) ის გამოცდილება, რომელიც ჩვენ 10 წლის განმავლობაში დავაგროვეთ განათლების სისტემაში ერთად მუშაობით, გვაძლევს იმის თქმის საშუალებას, რომ ეს ახლად შექმნილი ორგანიზაცია ნამდვილად წარმატებული იქნება და  ჩვენ ვაპირებთ ყველაფრის გაკეთებას იმისთვის, რომ ქვეყენაში განათლების ხარისხის ამაღლებას შევუწყოთ ხელი", – თქვა დღევანდელ პრეზენტაციაზე ასოციაციის პრეზიდენტმა, მაია მიმინოშვილმა.

კახეთი. USAID-ის ახალგაზრდული პროექტის განხორციელება – ,,ბუნებრივი რესურსების ინტეგრირებული მართვა საქართველოს წყალშემკრებ აუზებში’’ – ახმეტის მუნიციპალიტეტში გუშინ, 27 ივნისს, დაიწყო. პროექტის ფარგლებში იგეგმება მოსწავლეებთან ინტენსიური შეხვედრა და საუბარი თუ როგორია ეკოლოგიურად სუფთა გარემოში ცხოვრება. ორგანიზაციის საზოგადოებასთან ურთიერთობის მენეჯერის, ეკატერინე შალუტაშვილის თქმით, პროექტის მიზანია მოსახლეობის სოციალური მდგომარეობის გაუმჯობესება ბუნებრივი რესურსების მართვის კუთხით, როგორიც არის ბიო მრავალფეროვნება, წყლის რესურსები, ენერგო რესურსები: „პროექტის ფარგლებში შექმნილია საქართველოს სხვადასხვა ადგილას 35 ეკო–კლუბი, რომლებშიც ძირითადად მოსწავლეები არიან გაწევრიანებულები. ამ პროექტის ფარგლებში ხდება ახალგაზრდებში ცნობიერების ამაღლება ბუნებასთან დაკავშირებულ საკითხებზე. ახალგაზრდები სწავლობენ ბუნების გაფრთხილებას, როგორ იცხოვრონ ეკოლოგიურად სუფთა გარემოში. გარდა ამისა, ვიგებთ ასევე მათგან რა პრობლემებია ამ კუთხით  და ვცდილობთ მისი მოგვარების გზების პოვნას". პროგრამა აშშ-ს საერთაშორისო განვითარების სააგენტოს მიერ საქართველოში სხვადასხვა რეგიონში 2010 წლიდან ხორციელდება.

შიდა ქართლი. 28 ივნისს, საქართველოს გაეროს ასოციაციის გორის ფილიალის ოფისში, სამოქალაქო განვითარების სააგენტოს (CIDA) ინიციატივით გაიმართა ადგილობრივი საზოგადოებრივი ორგანიზაციების სამუშაო შეხვედრა. შეხვედრაზე განხილეს სექტორის როლი საზოგადოებაში და მისი მომავლის პერსპექტივები.სამოქალაქო განვითარების სააგენტოს დირექტორმა, ზვიად დევდარიანმა ისაუბრა საზოგადოებრივი სექტორის საქმიანობის ეფექტურობაზე და მის მომავალზე - თუ როგორ უნდა დარჩეს იგი ქვეყანაში მნიშვნელოვან მოთამაშედ» თანდათან შეზღუდული ფინანსური მხარდაჭერის პირობებში. მანვე გააჟღერა ინიციატივა შექმნილიყო ადგილობრივი ორგანიზაციების მონაწილეობით, საქართველოს მასშტაბით, სამოქალაქო საზოგადოების ქსელი, რომელიც ღია იქნებოდა როგორც რეგისტრირებული ორგანიზაციებისთვის, ასევე აქტიური მოქალაქეების ჯგუფებისათვის.შეხვედრის ბოლოს გაიმართა დისკუსია, რომელშიც მონაწილეობა მიიღო 12 ადგილობრივი ორგანიზაციის წარმომადგენელმა.

აჭარა. 27 ივნისს, ბათუმის დემოკრატიული ჩართულობის ცენტრში, ბათუმის ხელოვანთა სახლმა „არგანი"  კინოფესტივალ  BIAFF–ის ფარგლებში განხორციელებული აქტივობები შეაჯამეს. ამასთან მოხდა კინოფესტივალის ახალი ვებ–გვერდის პრეზენტაცია და დაანონსდა დაგეგმილი აქტივობები. საორგანიზაციო ჯგუფი ფესტივალის დაწყებამდე, 27 ივლისიდან 6 აგვისტოს ჩათვლით, საზაფხულო კინოსკოლის ორგანიზებას გეგმავს. პროექტის ფარგლებში ჩატარდება სცენის განვითარების საკითხებზე 8–დღიანი ინტენსიური ტრენინგი, რომელსაც ინგლისელი ტრენერი უხელმძღვანელებს. გარდა ამისა, დაგეგმილია ყოველწლიური კონკურსი და ორდღიანი ვორქშოფი ბლოგერებისთვის. ვორქშოფი ორიენტირებული იქნება სოციალური მედიის მიერ კულტურული საკითხების გაშუქებაზე. ორგანიზატორების თქმით, ეს არის კარგი საშუალება სოციალური მედიის საშუალებით კინოფესტივალი უფრო მასშტაბურად გაშუქდეს.

29 ივნისს, 15:00 საათზე ქუთაისის დემოკრატიული ჩართულობის ცენტრში ეთნოსთა შორის თანამშრომლობისა და კონსულტაციის ანალიტიკური ცენტრი გამართავს შეხვედრას. მისამართი: ქუთაისი, პუშკინის ქუჩა 6

28 ივნისს, 12:00 საათზე, ახალი არასამთავრობო ორგანიზაციის „საგანმანათლებლო პოლიტიკისა და კვლევების ასოციაციის" პრეზენტაცია გაიმართება. მისამართი: თბილისი, ჭოველიძის ქუჩა 10

28 ივნისს, 16:00 საათზე, ბათუმის პრესკაფეში ასოციაცია „თავისუფალ ჟურნალისტთა სახლი" გამართავს დისკუსიას – „საქართველოს საგარეო პოლიტიკური არჩევანი და განვითარების პრიორიტეტები". მისამართი: ბათუმი, მელაშვილის და საბაჟოს შესახვევი 1–2

თბილისი.ადგილობრივი თვითმმართველობის ორგანოების საქმიანობის მონიტორინგით დაინტერესებული პირებისთვის ახალი სახემძღვანელო შეიქმნა. იგი განკუთვნილია საზოგადოებრივი ორგანიზაციებისთვის, მედიისა და სხვა დაინტერესებული ჯგუფებისთვის, რათა მათ კვალიფიციურად განახორციელონ ადგილობრივი თვითმმართველობის საქმიანობის მონიტორინგი. წიგნი მომზადებულია კავკასიის ეკონომიკური და სოციალური კვლევითი ინსტიტუტის მიერ ევრაზიის თანამშრომლობის ფონდის მხარდაჭერითა და შვედეთის საერთაშორისო განვითარების სააგენტოს დაფინანსებით. იგი 16 აქტუალურ თემას მოიცავს, რომელზეც შესაძლოა განხორციელდეს მონიტორნგი. ესენია: შესყიდვების მონიტორინგი, ადმინისტრაციული პროცედურების მონიტორინგი, კანონშემოქმედებითი საქმიანობის მონიტორინგი, საჯარო ინფორმაციის გაცემის მონიტორინგი და ა.შ. თითოეულ თემას, გარდა თეორიული მიმოხილვისა,  თან ახლავს პრაქტიკული მაგალითები წარმატებული თუ წარუმატებელი მონიტორინგების შესახებ. სახელმძღვანელოში ასევე ცალკე თავი აქვს დათმობილი უცხოური გამოცდილების მაგალითებს.  დაინტერესებულ პირებს სახლემძღვანელო შეუძლია მიიღონ ორგანიზაციის ოფისში ან გადმოწერონ ვებ–ვერდიდან – www.ciesr.org

28 ივნისს, 15:00 საათზე ქუთაისის დემოკრატიული ჩართულობის ცენტრში საქართველოს ჟურნალისტური ეთიკის ქარტიის საბჭოს გამართავს შეხვედრას. მისამართი: ქუთაისი, პუშკინის ქუჩა 6. 

28 ივნისს, 14:00 საათზე, ბათუმის  დემოკრატიული ჩართულობის  ცენტრში, „საერთაშორისო  გამჭვირვალობა საქართველო" გამართავს სასამრთლო მონიტორინგის ანგარიშის პრეზენტაციას. მისამართი: ბათუმი, ფარნავაზ მეფის 62–64, დემოკრატიული ჩართულობის ცენტრი

თბილისი.„არ აწამო, იწამე ადამიანი" – ამ ლოზუნგით ჩატარდა 26 ივნისს აქცია ვერის პარკში. აქცია წამების მსხვერპლთა ფსიქო–სოციალური და სამედიცინო რეაბილიტაციის ცენტრის, ადამიანის უფლებათა ცენტრისა და თბილისის ადამიანის უფლებათა სახლის ინიციატივით ჩატარდა. ორგანიზატორების თქმით, ამ აქციით მათ სურთ საზოგადოების ყურადღების გამახვილება წამების თემაზე. ისინი ასევე მოუწოდებენ ხელისუფლებას, რომ აღკვეთონ წამების ფაქტები საპატიმროებში. მათი ინფორმაციით, საქართველოს საპატიმროებში ღირსების შემლახველი და წამების ფაქტები იზრდება და ხშირ შემთხვევაში მათი გამოძიება არ ხდება. ადამიანის უფლება – არ დაექვამდებაროს წამებას – აბსოლუტური უფლებაა და გამყარებული სხვადასხვა საკანონმდებლო აქტებით. საქართველოს კონსტიტუციის მე–17 მუხლის მიხედვით, „დაუშვებელია ადამიანის წამება, არაჰუმანური, სასტიკი ან პატივისა და ღირსების შემლახველი მოპყრობა და სასჯელის გამოყენება". საქართველოს პარლამენტის მიერ რატიფიცირებულია ადამიანის უფლებათა ევროპული კონვენცია, რომლის მიხედვითაც „არავინ შეიძლება დაექვემდებაროს წამებას, არაადამიანურ ან ღირსების შემლახველ მოპყრობას ან დასჯას".

გურია. 25 ივნისს, საქართველოს ახალგაზრდა იურისტთა ასოციაციის ოზურგეთის ოფისში, ბრიტანეთის ელჩი შეხვადრა ოზურგეთში მომუშავე მედიისა და საზოგადოებრივი ორგანიზაციების წარმომადგენლებს. შეხვადრზე საუბარი შეეხო გურიის რეგიონში არსებულ პრობლემებსა და არსებულ ვითარებას.

27 ივნისს, 13:00  საათზე, ბათუმის დემოკრატიული ჩართულობის ცენტრში, საერთაშორისო ბიზნესის განვითარებისა და ინვესტიციათა ხელშეწყობის ცენტრი გამართავს დისკუსიას ტურიზმის განვითარებასთან დაკავშირებით. მისამართი: ბათუმი, ფარნავაზ მეფის 62–64, ბათუმის დემოკრატიული ჩართულობის ცენტრი

გურია. საზოგადოებრივმა ორგანიზაციამ „ახალგაზრდა პედაგოგთა კავშირმა" ოზურგეთში, საქართველოს განათლებისა და მეცნიერების სამინისტროს ინკლუზიური განათლების პროგრამაში ჩართული გურიის მულტიდისციპლინური გუნდის მიერ მომზადებული ანგარიშის პრეზენტაცია მოაწყო. შეხვედრაზე საგანმანათლებლო სპეციალისტების ჯგუფმა ადგილობრივი თვითმმართველობის, საზოგადოებრივი ორგანიზაციებისა და მედიის წარმომადგენლებს გააცნო სამივე მუნიციპალიტეტში არსებული მდგომარეობა ინკლუზიურ განათლებასთან დაკავშირებით. პრეზენტაციის ბოლოს გაიმართა დისკუსია, რომელმაც ცხადყო, რომ ამ თვალსაზრისით გურიის სამივე მუნიციპალიტეტში არასახარბიელო მდგომარეობაა და პრობლემების გადაჭრაში უნდა ჩაერთონ როგორც ცენტრალური, ისე ადგილობრივი ხელისუფლების შესაბამისი სტრუქტურები, ასევე უფრო აქტიური უნდა იყოს საზოგადოება. პრეზენტაცია 21 ივნისს ოზურგეთის დემოკრატიული ჩართულობის ცენტრში გაიმართა.

26 ივნისს, 15:00 საათზე, ფონდი "ღია საზოგადოება – საქართველოს" ოფისში წამების წინააღმდეგ ბრძოლის საერთაშორისო დღესთან დაკავშირებით მოეწყობა ფილმის ჩვენება და გაიმართება დისკუსია. ასევე, დაჯილდოვდებიან ჟურნალისტურ კონკურსში – "ადამიანის უფლებები, ფოკუსი – წამება" გამარჯვებულები.  მისამართი: თბილისი, ჭოველიძის ქუჩა 10, ფონდი "ღია საზოგადოება–საქართველო" 

26 ივნისს, 15:00 საათზე, კავკასიის ეკონომიკური და სოციალური კვლევითი ინსტიტუტი და "ევრაზიის თანამშრომლობის ფონდი" "ადგილობრივი თვითმმართველობის მონიტორნგის სახელმძღვანელოს" პრეზენტაციას გამართავენ.  მისამართი: თბილისი, სასტუმრო "ამბასადორი"

26 ივნისს,  12:30 საათზე, წამების მსხვერპლთა ფსიქოსოციალური და სამედიცინო რეაბილიტაციის ცენტრი ადამიანის უფლებათა სახლთან ერთად  წამების მსხვერპლთა საერთაშორისო დღესთან დაკავშირებით მართავს სხვადასხვა ღონისძიებებს. ღონისძიებები დაიწყება 12:30 ზე ვერის პარკში, სადაც ჩატარდება წამების თემაზე პერფომანსი. მისამართი:თბილისი, ვერის პარკი

აჭარა. 25 ივნისს, განვითარებისა და თანამშრომლობის ხელშეწყობის კავშირა „პროგრესმა", ბათუმის მერიის ახალგაზრდულ დეპარტამენტთან ერთად გამართა პრესკონფერენცია. ღონისძიება, რომელიც ბათუმის დემოკრატიული ჩართულობის ცენტრში ჩატარდა, ეხებოდა ადგილობრივი ახალგაზრდების ინტერესებისა და საჭიროებების შესახებ კვლევის ჩატარებას. მისი მიზანია ახალგაზრდების ინტერესებისა და პრიორიტეტული საკითხების იდენტიფიკაცია და ანალიზი. აღნიშნული კვლევა შედგება ორი  –  თვისობრივი და რაოდებობრივი ნაწილისაგან. კვლევაში მონაწილეობას მიიღებენ აქტიური და ნაკლებად აქტიური ახალგაზრდები, სტუდენტები და სკოლის მოსწავლეები 15–დან 29 წლამდე.   კვლევა აგვისტოს ბოლოს დასრულდება. კვლევის შედეგები კი სექტემბერში გახდება ცნობილი.