თბილისი. 20 სექტემბერს საქართველოს ახალგაზრდული პარლამენტის სპორტისა და ახალგაზრდულ საქმეთა კომიტეტის წევრები „ბავშვთა და ახალგაზრდობის ეროვნული ცენტრის" წარმომადგენლებს შეხვდნენ. შეხვედრაზე ასევე იმყოფებოდნენ ევროპის მოხალისეთა სერვისის (European Voluntary Service) მოხალისეები, პოლონეთიდან და საფრანგეთიდან. გაცნობითი ხასიათის შეხვედრაზე ცენტრის თანამშრომლებმა თავიანთ საქმიანობაზე, პროექტებსა და მიზნებზე დაწვრილებით ისაუბრეს. მათ ასევე მიიღეს ინფორმაცია ახალგაზრდული პარლამენტის შესახებ. განსაკუთრებული ინტერესი გამოიწვია სპორტისა და ახალგაზრდულ საქმეთა კომიტეტის საქმიანობამ, მათ მიერ დღემდე განხორციელებულმა და სამომავლო პროექტებმა. საუბარი შეეხო მოხალისეობის განვითარების საკითხსაც.  შეხვედრის დასასრულს ახალგაზრდების თვითრეალიზაციის ხელშეწყობის სამსახურის სპეციალისტმა პარლამენტარებს ცენტრის საკუთრებაში არსებული ინფრასტრუქტურა დაათვალიერებინა. წყარო:ორგანიზაციის გვერდი სოციალურ ქსელში

იმერეთი. 20 სექტემბერს ქუთაისის ახალგაზრდული ცენტრის წევრებისთვის ორგანიზება გაუკეთდა სასწავლო ვიზიტს ქუთაისის სააპელაციო სასამართლოში. ვიზიტის მიზანს წარმოადგენდა ქუთაისის ახალგაზრდული ცენტრის წევრები გაცნობოდნენ სააპელაციო სასამართლოს ფუნქციებს და მნიშნელობას. სასამართლოში ახალგაზრდებმა დაათვალიერეს სასამართლოს შენობა, გაეცვნენ სასამართლოში მიმდინარე რეფორმებს. სასწავლო ვიზიტი ორგანიზებული იქნა „საქართველოში ეროვნული ინტეგრაციის გაძლიერების პროექტის" (ANI) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) მხარდაჭერით. წყარო:ორგანიზაციის გვერდი სოციალურ ქსელში

ქვემო ქართლი. ახალგაზრდა კონსტიტუციონალისტთა ასოციაცია 19 და 20 სექტემბერს მარნეულში ახალგაზრდებს შეხვდა. პირველ სამუშაო დღეს წაიკითხეს ლექცია თემებზე: ქართული კონსტიტუიონალიზმის ისტორია, კონსტიტუციის უზენაესობის პრინციპი, ხელისუფლების დანაწილების პრინციპი, ადგილობრივი თვითმართველობა, ადამიანის უფლებები და თავისუფლებები და სხვა. მეორე დღეს გაიმართა აქტიური დისკუსია, რომელიც შეეხებოდა საქართველოში მიმდინარე კონსტიტუციურ პროცესს. მარნეულელი ახალგაზრდების მიირ გამოითქვა მრავალი მოსაზრება რიგ საკითხებთან დაკავშირებით, რომლებიც აისახება პროექტის ფინალურ ეტაპზე მომზადებულ სარეკომენდაციო დოკუმენტში. წყარო:ორგანიზაციის გვერდი სოციალურ ქსელში

იმერეთი. 20 სექტემბერს, სამოქალაქო განათლებისა და პედაგოგთა გადამზადების პროგრამის ფარგლებში მცირე გრანტების კოორდინატორმა საჩხერის მუნიციპალიტეტის სოფელ სავანეს მიერ განხორციელებული პროექტის – „წყალი სიცოცხლის ელექსირია" – მონიტრინგი განახორციელა. პროექტმა პროგრამის მცირე გრანტების კონკურსში გაიმარჯვა. პროექტის ფარგლებში სკოლის სამოქალაქო კლუბისა და საპროექტო ჯგუფის წევრებმა ითანამშრომლეს ადგილობრივ ხელისუფლებასა და საქველმოქმედო ორგანიზაცია ასოციაცია „ატუსთან" ერთობლივი ძალისხმევით სკოლაში მოგვარებულ იქნა სასმელი წყლის პრობლემა. აღნიშნული პროექტიდან სარგებელი მიიღო სკოლის 270 მოსწავლემ და 60-მა თანამშრომელმა. წყარო:ორგანიზაციის გვერდი სოციალურ ქსელში

შიდა ქართლი. საზოგადოება ,,ბოლიკი” მშვიდობის საერთშორისო დღეს შეუერთდა და სამოქალაქო კლუბების წევრების ორგანიზებით გორის დრამატული თეატრის ეზოში აქცია გამართა. ღონისძიების დაწყებამდე აქციის მონაწილეებმა წუთიერი დუმილით პატივი მიაგეს მშვიდობისთვის ბრძოლაში დაღუპულ გმირებს. სამოქალაქო კლუბის წევრებმა მშვიდობის დარგში მინიჭებული ნობელის პრემიის ლაურეატების შესახებ პრეზენტაციები გააკეთეს. ამის შემდგომ მსვლელობა მოაწყეს ქალაქის ქუჩებში და გაეროს გენერალური მდივნის გზავნილი, მისალოცი ბარათები და თეთრი ბუშტები დაარიგეს. აქციის დასასრულს შეკრებილები დემოკრატიის სკოლაში თომა ჩაგელიშვილის დოკუმენტური ფილმის ,,ომის ნაკვალევი” ჩვენებას დაესწრნენ, რომელსაც ასევეგორის სამთავრობო და არასამთავრობო სექტორის წარმომადგენლები ესწრებოდნენ. წყარო:ორგანიზაციის გვერდი სოციალურ ქსელში

იმერეთი. 20 სექტემბერს, სამოქალაქო განათლებისა და პედაგოგთა გადამზადების პროგრამის ფარგლებში, ქუთაისის განათლების განვითარების და დასაქმების ცენტრის ინიციატივით, პროექტში ჩართული ჭიათურისა და საჩხერეს სამიზნე სკოლების პედაგოგებისა და მოსწავლეების მონაწილეობით მოეწყო ღია კარის დღე. მონაწილეები გაეცვნენ პროექტის ფარგლებში გამოცხადებულ მცირე საგრანტო კონკურსის პირობებს, გაიარეს კონსულტაციები საპროექტო წინადადებების მომზადების შესახებ. ასევე გაეცვნენ პროგრამის წლის სამუშაო გეგმის პრიორიტეტებს და ისაუბრეს სამომავლო გეგმებსა და ინიციატივებზე. შეხვედრას საჯარო სკოლების 12 წარმომადგენელი ესწრებოდა. წყარო:ორგანიზაციის გვერდი სოციალურ ქსელში

ქვემო ქართლი. 20 სექტემბერს სიქას ადგილობრივი, ევროპელი და ამერიკელი მოხალისეები დასუფთავების კამპანიაში – „დავასუფთაოთ მსოფლიო" – ჩაერთნენ. მათ რუსთავის სასკოლო სამოქალაქო კლუბების წევრებთან ერთად რუსთავში შარტავას ქუჩა და გიული შარტავას ბიუსტის მიმდებარე ტერიტორია დაასუფთავეს. წყარო:ორგანიზაციის გვერდი სოციალურ ქსელში

23 სექტემბერს 14 საათზე, სამოქალაქო საზოგადოების ინსტიტუტი გორში გამართავს ადგილობრივი საზოგადოებრივი ორგანიზაციებისა და ჟურნალისტების შეხვედრას თემაზე:  საზოგადოებრივი ორგანიზაციები და საზოგადოება. შეხვედრის მიზანია საზოგადოებრივი ორგანიზაციებისა და მედიის ურთიერთობის შესახებ დისკუსიის გაგრძელება. მისამართი:გორი, გორის საინფორმაციო ცენტრის ოფისი, ჩიტაძის ქ#3

23 სექტემბერს, 15:30 საათზე,  ,,რადარამი” ათულ გავანდეს წიგნის ,,სირთულეები: ჩანაწერები არასრულყოფილი მეცნიერების შესახებ" პრეზენტაციას გამართავს.  მისამართი:თბილისი, ვაჟა–ფშაველას გამზ. N.33, თბილისის სახელმწიფო სამედიცინო უნივერსიტეტის პირველი კორპუსი

23 სექტემბერს, 19:00 საათზე ფონდი ღია საზოგადოება – საქართველო პროექტის – „დოკუმენტრი ფილმები ორშბათობით" – ფარგლებში „5 გატეხილი კამერის" ჩვენებას გამართავს.  მისამართი: თბილისი,ჭოველიძის 10, ფონდის სააქტო დარბაზი

23 სექტემბერს, 16:00 საათზე ორგანიზაცია „ახალგაზრდა ადვოკატები" პროექტის – „ინსტიტუციური დიალოგი აღმასრულებელ, საკანონმდებლო, სასამართლო ხელისუფლებასთან" – ფარგლებში, სახელმწიფო მინისტრს ევროინტეგრაციის საკითხებში ალექსი პეტრიაშვილს შეხვდებიან.   მისამართი: თბილისი,  ინგოროყვას ქუჩა #7, მთავრობის კანცელარია.

23 სექტემბერს, 11:30 საათზე „უფლებადამცველთა გაერთიანება" ცეზარ ჩოჩელისა და რკინაბეტონის შპალის ქარხნის შესახებ მომზადებულ ანგარიშს წარმოადგენს.     მისამართი: თბილისი,  ვაჟა-ფშაველას 45; მე-17 სართული

23 სექტემბერს, 11:00 საათზე  NDI-ის საზოგადოებრივი აზრის კვლევის შედეგების პრეზენტაცია გაიმართება.  მისამართი:თბილისი, სასტუმრო ქორთიარდ მარიოტი

მცხეთა–მთიანეთი. 9–20 სექტემბერს, გუდაურში, საზოგადოებრივ ორგანიზაციებისა და დონორი ორგანიზაციების დიალოგი გაიმართა. შეხვედრის მიზანი იყო დონორ და საზოგადოებრივ ორგანიზაციებს შორის დიალოგის ხელშეწყობა და ურთიერთთანამშრომლობის გაღრმავება. ამ საკითხებზე ორგანიზაციებმა ჯგუფებში იმუშავებს და პრეზენტაციები გამართეს. შეიქმნა სარედაქციო ჯგუფი, რომელიც დონორ ორგანიზაციებსა და საზოგადოებრივ ორგანიზაციებს შორის ურთიერთშეთანხმების დოკუმენტზე იმუშავებს. ღონისძიება გაიმართა სამოქალაქო საზოგადოების ინსტიტუტის (CSI), სამოქალაქო განვითარების სააგენტოსა (CiDA) და კონსულტაციის და ტრენინგის ცენტრის (CTC) ინიციატივით, აღმოსავლეთ პარტნიორობის საქართველოს ეროვნული პლატფორმის „საზოგადოებრივი ორგანიზაციების განვითარების ეფექტურობის" ჯგუფთაშორისი ქვე–ჯგუფის პარტნიორობით

თბილისი. არასამთავრობო ორგანიზაციებმა მოამზადეს საქართველოს მიერ სამოქალაქო და პოლიტიკური უფლებების შესახებ საერთაშორისო პაქტის შესრულების ანგარიში. იგი მოიცავს ოთხ ძირითად სფეროს: დისკრიმინაციას, ფიზიკურ ხელშეუხებლობას, თავისუფლებისა და უსაფრთხოების უფლებებს, მართლმსაჯულების ხელმისაწვდომობას, მედიის წარმომადგენელთა შევიწროების შემთხვევებსა და შეკრებისა და თავისუფალი არჩევნების უფლებებს. ეს ალტერნატიული დოკუმენტი გაიგზავნება გაეროს ადამიანის უფლებათა კომიტეტის 109-ე სესიაზე, რომელიც გაიმართება ჟენევაში 2013 წლის 14 ოქტომბრიდან 1 ნოემბრამდე და რომლის მსვლელობაშიც შედგება მსჯელობა საქართველოს მიერ სამოქალაქო და პოლიტიკური უფლებების შესახებ საერთაშორისო პაქტის შესრულების თაობაზე. სამოქალაქო სექტორის ანგარიში შეავსებს საქართველოს მთავრობის მიერ 2012 წლის ოქტომბერში გაეროს ადამიანის უფლებათა კომიტეტში წარდგენილ ანგარიშს. ალტერნატიული ანგარიში შეიმუშავა არასამთავრობო ორგანიზაციათა კოალიციამ გაეროს ადამიანის უფლებათა უმაღლესი კომისარიატის (OHCHR) და გაეროს განვითარების პროგრამის (UNDP) ხელშეწყობით. კოალიცია აერთიანებს წამყვან არასამთავრობო ორგანიზაციებს, მათ შორის, ეთნოსთაშორისი თანამშრომლობისა და კონსულტაციის ანალიტიკურ ცენტრს, ციხის საერთაშორისო რეფორმას, საქართველოს ახალგაზრდა იურისტთა ასოციაციას, სამართლიანი არჩევნებისა და დემოკრატიის საერთაშორისო საზოგადოებას და სხვებს. ანგარიში წყარო: npo.ge

თბილისი. 20 სექტემბერს, საქართველოს წითელი ჯვრის საზოგადოების ორგანიზებით ჭავჭავაძის გამზირზე, ჯავახიშვილის უნივერსიტეტის პირველ და მეორე კორპუსის მიმდებარე ტერიტორიაზე, გაიმართა აქცია „გამიცვალე სიგარეტი". აქციის მიზანს წარმოადგენდა ახალგაზრდებისთვის ინფორმაციის მიწოდება თამბაქოს მოხმარების მავნებლობაზე. ახალგაზრდებს, რომლებიც აქციის მსვლელობისას უნივერსიტეტის მიმდებარე ტერიტორიაზე ეწეოდნენ სიგარეტს, საქართველოს წითელი ჯვრის მოხალისეებმა შეთავაზეს სიგარეტის ღერის გაცვლა საღეჭ რეზინში. აქციის შედეგად შეგროვდა 200–ზე მეტი სიგარეტის ღერი. წყარო: ორგანიზაციის გვერდი სოციალურ ქსელში

თბილისი. ორგანიზაცია „ახალგაზრდა ადვოკატების" წარმომადგენლები ივანე ჯავახიშვილის სახელობის თბილისის სახელმწიფო უნივერსტეტის იურიდიული ფაკულტეტის სტუდენტებს შეხვდნენ. შეხვედრაზე სტუდენტები გაეცნენ უფლებადაცვითი ორგანიზაციის საქმიანობას, მიმდინარე და დასრულებულ პროექტებს, ორგანიზაციის სტრუქტურას და სასამართლო ინსტანციებში წარმოებული საქმეების სტატისტიკას. ორგანიზაციამ სტუდენტებს ასევე შესთავაზა პროექტის – „სტუდენტები გამჭვირვალე სტუდენტური თვითმმაართველობისთვის" – მომზადება. ორგანიზაციამ სტუდენტებს ჩართულობა შესთავაზა და საუკეთესო საპროექტო წინადადებების განხორციელების მხარდაჭერა გამოთქვა. „ახალგაზრდა ადვოკატები" მსგავს შეხვედრას ჟურნალისტიკის სპეციალობის სტუდენტებთანაც გამართავს. წყარო:ორგანიზაციის გვერდი სოციალურ ქსელში

კახეთი. 20 სექტემბერს სოფელ ნუკრიანში „დაასუფთავე საქართველოს" აქციის ფარგლებში სოფლის ცენტრის, ცენტრალური სკვერის, სპორტული მოედნის და სოფლის ამბულატორიაში მისასვლელი გზის დასუფთავება მოეწყო. აქციას სათემო ორგანიზაცია „ნუკრიანი" და ნუკრიანის საჯარო სკოლა ერთობლივი ძალებით ყოველწლიურად ატარებს. წყარო:ორგანიზაციის გვერდი სოციალურ ქსელში

20 სექტემბერს, 19:00 საათზე „ლიბერალიზმის სასწავლო ცენტრში" გაიმართება გიორგი მშვენიერაძის ლექცია – „თავისუფლება და პასუხისმგებლობა". დასწრება თავისუფალია. მისამართი: თბილისი, კალისტრატე ცინცაძის ქუჩა 6–7, ჟურნალისტური ეთიკის ქარტიის ოფისი ლექცია ასევე გადაიცემა ონლაინ რეჟიმში ცენტრის გვერდზე სოციალურ ქსელში და ბლოგზე

თბილისი. 20 სექტემბერს, 13:00-დან 17:00 საათამდე აღმოსავლეთ დასავლეთის მართვის ინსტიტუტი G-PAC–ის პროგრამის ფარგლებში ონლაინ კონსულტაციას გაუწევს ანაზღაურებადი სტაჟირების პროგრამით დაინტერესებულ ნებისმიერ პირს. სტაჟირების პროგრამაში მონაწილეობის მიღება შეუძლია მაგისტრატურის სტუდენტს/ახალ კურსდამთავრებულს, რომელსაც სურს შეიძინოს პრაქტიკული გამოცდილება პოლიტიკის ანალიზსა და ადვოკატირების კამპანიის წარმოებაში; არასამთავრობო ორგანიზაციას ან საჯარო სტრუქტურას, რომელსაც სურს აიყვანოს პროგრამის ფარგლებში დაფინანსებული სტაჟიორი.  კონსულტაცია წყარო:ორგანიზაციის გვერდი სოციალურ ქსელში

შიდა ქართლი. 21 სექტემბერს საზოგადოება „ბილიკი" უერთდება მშვიდობის საერთაშორისო დღეს.  დღის აღსანიშნავად გორის მუნციპალიტეტის საჯარო სკოლების სამოქალაქო კლუბების წევრების ინიციატივით გაიმართება შემდეგი ღონისძიებები: 11.30-12.00 საათი - სამოქალაქო კლუბების წევრების მშვიდობიანი მსვლელობა საზოგადოება „ბილიკიდან" გორის სახელმწიფო თეატრის ბაღამდე;  12.00-13.30 საათი - „შუადღის დუმილის წუთი" და საინფორმაციო აქცია „მშვიდობის განმტკიცების დარგში ნობელის პრემიის ლაურეატები". გორის თეატრის ბაღი;  13.30-14.00 საათი - გაეროს გენერალური მდივნის გზავნილის გავრცელება მოსახლეობაში მშვიდობის საერთაშორისო დღესთან დაკავშირებით. გორის თეატრის ბაღი;  14.00-15.00 საათი - ნობელის პრემიის ლაურეანტების შესახებ დოკუმენტური ფილმის ჩვენება და დისკუსია. საზოგადოება „ბილიკის" შეხვედრების დარბაზი. წყარო:ორგანიზაციის გვერდი სოციალურ ქსელში

სამცხე–ჯავახეთი. გაეროს განვითარებისლ პროგრამა (UNDP) უერთდება დასუფთავების კამპანიას – „დაასუფთავე მსოფლიო! დაასუფთავე საქართველო!". ორგანიზაციის თანამშრომლებმა და ეკო კლუბების წევრებმა მონაწილეობა მიიღეს დასუფთავების აქციებში ბორჯომში, წაღვერსა და ახალდაბაში. წყარო:ორგანიზაციის გვერდი სოციალურ ქსელში