თბილისი. ჰაინრიჰ ბიოლის ფონდი, პროექტის „50 ქალი საქართველოდან" – ფარგლებში გეგმავს საღამოს – „ორმოცდაათი ფემინისტის მანიფესტი". ლიტერატურული საღამოზე ცნობილი ქართველი ქალების „უცნობ" ტექსტებს წაიკითხავენ ლელა გაფრინდაშვილი, ეკა აღდგომელაშვილი, დათო გაბუნია. ასევე ქალი პოეტების ლექსებს წაიკითხავენ: შოთა იათაშვილი, გიორგი ლობჟანიძე, პაატა შამუგია, ირაკლი კაკაბაძე, ალექს ჩიღვინაძე, გიორგი კეკელიძე. საღამოზე ნაჩვენები იქნება ნუცა ღოღობერიძის ფილმი „ბუბა". ლიტერატურული საღამო გაიმართება 27 სექტემბერს, 19:00 საათზე მწერალთა სახლში (მაჩაბლის 13). ღონისძიების ორგანიზატორები არიან ბიოლის ფონდი და მწერალთა სახლი წყარო: ბიოლის ფონდის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრმა გამოაქვეყნა მოსაზრებები „პოლიციის შესახებ" საქართველოს კანონის პროექტთან დაკავშირებით. „EMC-ის შეფასებით, კანონპროექტის მიღებამდე მნიშვნელოვანია, ინიციატორმა სათანადოდ დაასაბუთოს პოლიციის პრევენციული უფლებამოსილებების გაზრდის საჭიროება და მიზანშეწონილობა. ასევე, სისტემურად იქნეს შეფასებული და დაგეგმილი სამართალდამცავი უწყებების უფლებამოსილებების გაფართოების პარალელურად კონტროლის ადეკვატური მექანიზმების შექმნის საკითხი", აღნიშნულია გამოქვეყნებულ მოსაზრებებში. სრულად  წყარო:ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციამ ბათუმის რეაბილიტაციის შესახებ მომზადებული ანგარიშის პრეზენტაცია გამართა. „ანგარიშში მიმოხილულია ბათუმის თვითმმართველობის მიერ 2009-2013 წლებში განხორციელებულ ბათუმის „ისტორიული უბნებისა და ტურისტული ინფრასტრუქტურის რეაბილიტაციის" პროგრამა. წარმოდგენილია აღნიშნული პროგრამის ფარგლებში დაფინანსებული ისეთი პროექტები, როგორიცაა ბათუმში ალფაბეტური კოშკისა და პიაცას მოედნის მშენებლობა. ასევე, ისტორიული ფორტის და ოპერის სახლის მშენებლობა ბათუმში. ანგარიშში სათანადო ადგილი ეთმობა ასევე ბათუმის „ისტორიული უბნებისა და ტურისტული ინფრასტრუქტურის რეაბილიტაციის" 2009-2013 წლების პროგრამის განხორციელების დროს კულტურულ მემკვიდრეობასთან დაკავშირებულ საკითხებს. ანგარიშს თან ერთვის ვიზუალური ფოტომასალა, რაც კიდევ უფრო აიოლებს ბათუმის თვითმმართველობის მიერ, ბათუმის „ისტორიული უბნებისა და ტურისტული ინფრასტრუქტურის რეაბილიტაციის" 2009-2013 წლების პროგრამის პარალელურად განვითარებული პროცესების ერთიანობაში აღქმას". სრულად წყარო: gyla.ge

თბილისი. „ახალგაზრდა ადვოკატებმა" „ლიფტების საქმესთან" დაკავშირებით ბრიფინგი გამართეს. „ვეხმაურებით თბილისის მოსახლეობის ერთ–ერთ მნიშვნელოვან პრობლემას, რომელიც მაღალსართულიან ბინებში ექსპლუატაციიდან გამოსული ლიფტების ბიზნესს უკავშირდება. ორგანიზაცია სამართლიანს უწოდებს მოსახლეობის პროტესტს, რა დროსაც, თბილისის მთავრობა ავარიული და ტექნიკურად გაუმართავი ლიფტების შეკეთებისთვის, ექსპლუატაციისთვის უყურადღებობას იჩენს, მეორე მხრივ კი სფეროზე პასუხისმგებელ კერძო კომპანიებთან საეჭვო კორუფციულ გარიგებებში იმყოფება. „ახალგაზრდა ადვოკატების" აზრით, კომპანიები, რომლეთა ვალდებულებაცაა მაღალსართულიან ბინებში ლიფტების გამართული მუშაობა უზრუნველყოს, ფატქობრივად, უმოქმედონი არიან", ნათქვამია ორგანიზაციის გვერდზე სოციალურ ქსელში. სრულად წყარო:ორგანიზაციის გვერდი სოციალურ ქსელში

აჭარა. 24 სექტემბერს, დემოკრატიული ჩართულობის ცენტრის ინიციატივით გაიმართა შეხვედრა თემაზე - „ერთად აღმოვფხვრათ სიძულვილის ენა". შეხვედრის მიზანი მაისი-ივნისის თვეებში ექსპერტთა ფართო ჩართულობით შემუშავებული სიძულვილის წინააღმდეგ ბრძოლის სფეროში სარეკომენდაციო ხასიათის წინადადებათა პაკეტის გაცნიბა იყო. რეკომენდაციებში ასახულია ის ძირითადი მიმართულებები, რომლითაც სასურველია იხელმძღვანელონ პოლიტიკურმა პარტიებმა, საჯარო დაწესებულებებმა, მედია ორგანიზაციებმა, საზოგადოებრივმა ორგანიზაციებმა, ისევე როგორც რიგითმა მოქალაქეებმა.

თბილისი. ევრაზიის თანამშრომლობის ფონდი და კოალიცია დამოუკიდებელი და გამჭვირვალე მართლმსაჯულებისათვის მართავს ფორუმს. ღონისძიების თემაა: სასამათლოს დამოუკიდებლობის და მიუკერძოებლობის ხელშეწყობა: საკანონმდებლო ცვლილებების გარკვეული საკითხები. ფორუმში მონაწილეობას იღებენ საერთაშორისო ორგანიზაციების, აღმასრულებელი, სასამართლო ხელისუფლებისა და არასამთავრობო სექტორის წარმომადგენლები.

აჭარა. 20 სექტემბერს, ბათუმის დემოკრატიული ჩართლობის ცენტრში, ბიოლის ფონდის ორგანიზებით საჯარო დისკუსია გაიმართა თემაზე: „ომით გაყოფილი საზოგადოებები 20 წლის შემდეგ, სამშვიდობო პოლიტიკა და შერიგების რესურსები". დისკუსიის ძირითადი მომხსენებლები სახელმწიფო მინისტრი რეინტეგრაციის საკითხებში პაატა ზაქარეიშვილი და ექსპერტი გია ნოდია იყვნენ.  პაატა ზაქარეიშვილის განცხადებით, სამხრეთ ოსეთთან და აფხაზეთთან ურთიერთობისას, საქართველოს ძირითადი ბერკეტი ევროპული მისწრაფებები უნდა იყოს.  შეხვედრას ადგილობრივი მთავრობის, საზოგადოებრივი ორგანიზაციის, და მედიის წარმომადგენლები ესწრებოდნენ. 

თბილისი. ლიბერალიზმის სასწავლო ცენტრში 20 სექტემბერს გიორგი მშვენიერაძის ლექცია გაიმართა: „თავისუფლება და პასუხისმგებლობა". მათ ვინც ვერ შეძლეს ლექციაზე დასწრება ცენტრი საშუალებას აძლევს ჩანაწერი იხილოს. ლექცია – „თავისუფლება და პასუხისმგებლობა" წყარო: ცენტრის გვერდი სოციალურ ქსელში

თბილისი. მწერალმა ნაირა გელაშვილმა, რომელიც ამავე დროს „კავკასიური სახლის" გამგეობის თავმჯდომარეა მიიღო „საბას" ლიტერატურლი პრემია  რომანისთვის – „მე ის ვარ". ბიოლის ფონდის გვერდზე სოციალურ ქსელში ნათქვამია, რომ ნაირა გელაშვილმა სოლიდარობა გამოუხადა ხუდონჰესის პროექტის წინაამდეგ მებრძოლ მოქალაქეებს და პრემიის ნაწილი სოფელ ხაიშის საჯარო სკოლას და საბავშვო ბაღს გადასცა. წყარო: ბიოლის ფონდის გვერდი სცოიალურ ქსელში

სამცხე–ჯავახეთი. დემოკრატ მესხთა კავშირი განცხადებას ავრცელებს, რომელშიც ნათქვამია, რომ „მიუხედავად საქართველოს პრეზიდენტის ბრძანებისა, სტუდენტების მიერ სამხედრო სავალდებულო სამსახურის გავლის შემთხვევაში პრივილეგიების მინიჭების შესახებ, დღემდე არ არსებობს მექანიზმი, რის მიხედვითაც მოხდება აღნიშნული სტუდენტების სწავლის დაფინანსება". კავშირმა წერილობით მიმართა განათლებისა და თავდაცვის სამინისტროებს, რათა „დროულად მოხდეს ამ საკითხზე რეაგირება და შესაბამისი საკანონმდებლო დოკუმენტის მიღება".  სრულად  წყარო:ორგანიზაციის გვერდი სოციალურ ქსელში

თბილისი. როგორც ცნობილია, 19 სექტემბერს „ლიბერალურმა აკადემია" გამართა პროექტის – „ვიზის ლიბერალიზაციის პერსპექტივები: სამოქალაქო ჩართულობა და ადვოკატირება" – შუალედური ანგარიშის პრეზენტაცია. მისი მიზანია ვიზის ფასილიტაციის ხელშეკრულებისა და ევროპის სავიზო კოდექსის იმპლემენტაციის მონიტორინგი, შედეგების შესახებ საზოგადოების ინფორმირება და ადვოკატირება. ორგანიზაცია გამოაქვეყნა ანგარიში. ვიზის ლიბერალიზაციის პერსპექტივები: სამოქალაქო ჩართულობა და ადვოკატირება (შუალედური კვლევა)  წყარო: ორგანიზაციის გვერდი სოციალურ ქსელში

აჭარა. 20 სექტემბერს, ბათუმის პრესკაფეში სტუდენტური დისკუსია გაიმართა თემაზე -„ბათუმის მერიის სტუდენტთა დასაქმების პროგრამის დადებითი და უარყოფითი მხარეები". მომხსენებლები სტუდენტები იყვნენ. თუმცა დისკუსიაში მერიის თანამშრომლები, არასამთავრობო ორგანიზაციები და სტუდენტური თვითმმართველობის წარმომადგენლებიც მონაწილეობდნენ. შეხვედრის ძირითადი მიზანი არსებული პროგრამის დასახვეწად სტუდნეტების იდეების გაზიარება და სამომავლოდ დასაქმების პროგრამის სუსტი მხარეების აღმოფხვრა იყო.

24 სექტემბერს 15:00 საათზე კლუბი „თაობათა დიალოგი" გამართავს პროექტების: „Last Call" და „ANTI BET" – პრეზენტაციას. მისამართი: ქუთაისი, პუშკინის 6, დემოკრატიული ჩართულობის ცენტრი

სამეგრელო. ასოციაცია „ათინათის" ახალგაზრდული ცენტრის „ორტუსის" წევრებმა ზუგდიდის #1 საჯარო სკოლის უფროსკლასებისთვის გამართეს ახალგაზრდული ცენტრის „ორტუსის" საქმიანობის პრეზენტაცია. შეხვედრის მიზანი იყო ახალგაზრდებისთვის გაეცნოთ და მიეწოდებინათ ინფორმაცია ცენტრის საქმიანობის შესახებ, რათა მომავალში მოსწავლეებმაც მიიღონ მონაწილეობა ცენტრის სამოქალაქო აქტივობებში. ბევრმა მოსწავლემ უკვე გამოთქვა სურვილი ჩაერთოს ასოციაცია „ათინათის" ახალგაზრდული ცენტრის საქმიანობაში. პრეზენტაციები ზუგდიდის სხვადასხვა კოლებში გაგრძელდება. შეხვედრები იმართება ეროვნული ინტეგრაციის გაძლიერების პროექტის ფარგლებში, რომელსაც საქართველოს გაეროს ასოციაცია, აშშ–ის საერთაშორისო განვითარების სააგენტოს ფინანსური მხარდაჭერით ახორციელებს. წყარო: ორგანიზაციის გვერდი სოციალურ ქსელში

თბილისი. „ახალგაზრდა ადვოკატები" ინსტიტუციური დიალოგის ფარგლებში, ევროინტეგრაციის საკითხებში სახელმწიფო მინისტრ ალექსი პეტრიაშვილს შეხვდნენ. დიალოგის მთავარი თემები იყო: აღმოსავლეთ პარტნიორობის არაფორმალურ მინისტერიალში მონაწილეობის შეჯამება; ასოცირების ხელშეკრულების პარაფირების საკითხი; ევროკავშირის სტანდარტიზაციის პროცესის მნიშვნელობა; საქართველოსთან მიმართებით პრორუსული და ევროპული პოლიტიკის შეჯერება, 2013 წლის საპრეზიდენტო არჩევნები და საქართველოს მიმართ პარტნიორი ქვეყნების დამოკიდებულება, ქვეყნის საშინაო პოლიტიკის შესაბამისობა საგარეო პოლიტიკურ გამოწვევებთან, ევროკავშირსა და ნატო – საქართველოს ურთიერთობების პერსპექტივები, საერთაშორისო საზოგადოების ინფორმირება ახალი ხელისუფლების პირობებში გაწეული საქმიანობის შესახებ და ა.შ.  პროექტის ფარგლებში, ეს ორგანიზაციის მიერ გამართული მესამე შეხვედრა იყო.

თბილისი. 26 სექტემბერს, ევროპის სახლი და შვედეთის საელჩო საქართველოში შვედეთის დღეებთან დაკავშირებულ ღონისძიებებს უმასპინძლებენ. ევროპის სახლში გაიმართება შვედი მწერლისა და ილუსტრატორის, სვენ ნურდკვისტის წიგნების „ნადირობა მელაზე" და „მაჭკატების ტორტის" თარგმანების პრეზენტაცია; შვედი და ქართველი ფერმწერი, გრაფიკოსი, ფოტო და ვიდეოხელოვანების ჯგუფური გამოფენა INTRACONNECTIVITY; ასევე შვედური ელექტრო-პოპ ჯგუფის Tikkle Me კონცერტი. სრულად წყარო:ევროპის სახლის გვერდი სოციალურ ქსელში

კახეთი. 20 სექტემბერს, ხანდაზმულებისა და ახალგაზრდებისათვის განკუთვნილი, სოციალურ საქმიანობათა ცენტრი გაიხსნა. სოციალურ საქმიანობათა ცენტრის ჩამოყალიბებაში მონაწილეობა მიიღეს საქართველოს წითელი ჯვრის საზოგადოების პარტნიორებმა: ევროკავშირი, დანიის წითელი ჯვარი, შვეიცარიის განვითარებისა და თანამშრომლობის სააგენტო, ქალაქ ყვარლის ადგილობრივი მუნიციპალიტეტი. ცენტრის გახსნის საზეიმო ცერემონიალის შემდეგ გაიმართა თელავისა და ლაგოდეხის თემების საჭიროებათა კვლევის შედეგების პრეზენტაცია, რომელიც წარმოდგენილ იქნა თანამონაწილეობითი კვლევის ჯგუფის მიერ. კვლევის შედეგების წარდგენის შემდეგ გაიმართა განხილვა და დისკუსია კითხვა-პასუხის ფორმატში, კვლევის ჯგუფს, პარტნიორებსა და დაინტერესებულ მხარეებს შორის. განხილვას 40-მდე მოწვეული პირი ესწრებოდა. წყარო: საქართველოს წითელი ჯვრის საზოგადოების გვერდი სოციალურ ქსელში

24 სექტემბერს, 19:00 საათზე პრეს–კაფე და „თავისუფალ ჟურნალისტთა სახლი" გამართავს ლაშა ფალავანდიშვილის ფოტოგამოფენას. ღონისძიება იმართება პროექტის – „ხედვა დაბრკოლების მიღმა" – ფარგლებში. მისამართი: ბათუმი, მელაშვილისა და საბაჟოს შესახვევი 1–2, ბათუმის პრეს–კაფე

24 სექტემბერს, 11:00 საათზე, საქართველოს ახალგაზრდა იურისტთა ასოციაცია, ანგარიშვალდებულებისა და გამჭვირვალობის ხელშეწყობის პროექტის ფარგლებში, გამართავს ანგარიშის „რეაბილიტაციის პროცესი ფასადს მიღმა, ბათუმის რეაბილიტაცია" - პრეზენტაციას. მისამართი:თბილისი, სასტუმრო ქორთიარდ მარიოტი

24 სექტემბერს 13 საათზე, სამოქალაქო საზოგადოების ინსტიტუტი ახალციხეში გამართავს ადგილობრივი საზოგადოებრივი ორგანიზაციებისა და ჟურნალისტების შეხვედრას თემაზე: საზოგადოებრივი ორგანიზაციები და საზოგადოება. შეხვედრის მიზანია საზოგადოებრივი ორგანიზაციებისა და მედიის ურთიერთობის შესახებ დისკუსიის გაგრძელება. მისამართი: ახალციხე, რუსთაველის 26, დემოკრატ მესხთა კავშირის ოფისი

24 სექტემბერს, 15:00 საათზე გენდერული თანასწორობის სამოქალაქო კლუბი ოზურგეთში გამართავს დისკუსიას: „დავიცვათ ბავშვები პოლიტიკისგან". მისამართი: ოზურგეთი, დემოკრატიული ჩართულობის ცენტრი

24 სექტემბერს, 12:00 საათზე, ქალთა საინფორმაციო ცენტრი პროექტის „გენდერული სამართლიანობა ქალთა პოლიტიკური თანამონაწილეობის გაძლიერების გზით" ფარგლებში მორიგ შეხვედრას მართავს. მისამართი: თბილისი, სასტუმრო „ქორთიარდ მარიოტი"