თბილისი. 20 სექტემბერს საიას მედიის სამართლებრივი დაცვის ცენტრმა კენჭისყრის დღეს კენჭისყრის შენობაში ფოტო-ვიდეო გადაღების შეზღუდვის შესახებ მოქმედი რეგულაციების განხილვასთან დაკავშირებით შეხვედრა გამართა. შეხვედრაზე განიხილეს ცენტრალური საარჩევნო კომისიის 2012 წლის 24 სექტემბრის #42 დადგენილებით კენჭისყრის დღეს კენჭისყრის შენობაში ფოტო-ვიდეო გადაღებასთან დაკავშირებით დაწესებული შეზღუდვები. ამასთანავე, წარმოადგინეს, საიას მედიის სამართლებრივი ცენტრის მიერ ჩატარებული, ჟურნალისტთა გამოკითხვის შედეგები. ღონისძიებას ესწრებოდნენ საერთაშორისო ორგანიზაციების, არასამთავრობო ორგანიზაციების, ცენტრალური საარჩევნო კომისიის, საკანონმდებლო ხელისუფლებისა და მედიის წარმომადგენლები. წყარო:gyla.ge

თბილისი. 22 სექტემბერს, კოჯრის შეზღუდული შესაძლებლობების მქონე ბავშვთა სახლში სსიპ ბავშვთა და ახალგაზრდობის განვითარების ფონდის მხარდაჭერით სატრენაჟორო დარბაზი გაიხსნა. ბავშვთა სახლში 26 აღსაზრდელია. ფონდის მიერ დაფინანსებული საგრანტო პროექტის ფარგლებში არასამთავრობო ორგანიზაცია „კოჯრის ახალგაზრდულმა ასოციაციამ" შეაკეთა და ტექნიკურად აღჭურვა სავარჯიშო დარბაზი, დაიდგა ტრენაჟორები, მოწვეულნი არიან სპეციალისტები, რომლებიც 3 თვის მანძილზე სხვადასხვა ასაკის ბავშვს სათანადო მასაჟებს უტარებენ. ბავშვთა სახლის აღსაზრდელებისთვის გაიმართა მცირე თეატრალური წარმოდგენა „ჩვენი თეატრის" მსახიობების მონაწილეობით. ღონისძიების ბოლოს პატარებს სიმბოლური საჩუქრები გადაეცათ. წყარო:ორგანიზაციის გვერდი სოციალურ ქსელში

ქვემო ქართლი. 21 სექტემბერს დმანისის ახალგაზრდული ცენტრის წევრებმა მოსახლეობასთან მშვიდობის საერთაშორისო დღისადმი მიძღვნილი საინფორმაციო აქცია გამართეს. ცენტრის წევრებმა მოამზადეს პლაკატები, მისალოცი ბარათები და დაურიგეს მოსახლეობას, რითაც საზოგადოებას კიდევ ერთხელ შეახსენეს, რომ მშვიდობაა ყვერაფერზე წინ დგას. წყარო:ორგანზიაციის გვერდი სოციალურ ქსელში სფერო – ახალგაზრდული

თბილისი. 22 სექტემბერს. „სამოქალაქო მონიტორინგისა და კვლევების ცენტრსა" და „განვითარებისა და დემოკრატიის ცენტრს" შორის ურთიერთთანამშორმლობის მემორანდუმი გაფორმდა. მემორანდუმის თანახმად „სამოქალაქო მონიტორინგისა და კვლევების ცენტრი" პროექტის – „დაკვირვება დემოკრატიისა და განვითარებისათვის" – ფარგლებში, „განვითარებისა და დემოკრატიის ცენტრის" მანდატით განახორციელებს წინასაარჩევნო პერიოდისა და არჩევნების დღის მონიტორინგს ზუგდიდის, ხობის, წალენჯიხისა და ჩხოროწყუს საარჩევნო ოლქებში. პროექტი მხარდაჭერილია ფონდ ღია საზოგადოება საქართველოს მიერ. წყარო:სამოქალაქო მონიტორინგისა და კვლევების ცენტრის გვერდი სოციალურ ქსელში

აჭარა. 22 სექტემბერს, „ბათუმის ახალგაზრდული ცენტრის" წევრებმა სოფელ ერგეს საჯარო სკოლაში თანატოლგანმანათლებელთა ტრენინგი ჩაატარეს. ტრენინგი ეხებოდა თემებს: ადამიანის უფლებებს, ტოლერანტობას, დისკრიმინაცია. თანატოლგანმანათლებლებმა ისაუბრეს ჰოლოკოსტის და ანა ფრანკის მაგალითზე, გარდა ამისა გაიმართა მოკლემეტრაჟიანი ფილმის ჩვენება. ტრენინგი მიზნად ისახავდა ახალგაზრდების გაცნობიერებას აღნიშნულ თემებზე, მათ გარშემო არსებული მრავალფეროვნებისა და განსხვავებულობის მიმართ პატივისცემის დამკვიდრებას. აქტივობა განხორციელდა პროექტის – „ეროვნული ინტეგრაციის გაძლიერება საქართველოში" –ფარგლებში, რომელსაც ახორციელებს საქართველოს გაეროს ასოციაცია აშშ-ს საერთაშორისო განვითარების სააგენტოს ფინანსური მხარდაჭერით. წყარო:ორგანიზაციის გვერდი სოციალურ ქსელში

კახეთი. სოფელ მაღაროში, ბოდბესა და ქვემო მაჩხაანში ადგილობრივ მოსახლეობასთან შეხვედრები გამართეს რეგიონულმა არასამთავრობო ორგანიზაციებმა -„სამოქალაქო ინიციატივამ" და სათემო კავშირმა „ნუკრიანმა". შეხვედრებზე გაიმართა პროექტის – „ინტერაქცია თვითმმართველობასა და მოსახლეობას შორის ინტერენტ სამოქალაქო ჩართულობის გზით" – პრეზენტაცია, საზოგადოებრივმა ორგანიზაციებმა მოკლედ გააცნეს კონკრეტული თემის მკვიდრებს მათი როლის, უფლებების და შესაძლებლობების შესახებ ინფორმაცია, რაც შესაძლოა დაეხმაროთ სოფლის პრობლემების გადაწყვეტაში. წყარო: „ჩემი სოფელის" გვერდი სოციალურ ქსელში

სამცხე–ჯავახეთი. თანატოლთა განათლების ფარგლებში ახალციხის ახალგაზრდული ცენტრის წევრებმა წარადგინეს პრეზენტაცია, ტაო-კლარჯეთში არსებულ ისტორიულ კულტურული ძეგლის ბანის შესახებ. ღონისძიება ჩატარდა, პროექტის – „ეროვნული ინტეგრაციის გაძლიერება საქართველოში" – ფარგლებში, რომელსაც ახორციელებს საქართველოს გაეროს ასოციაცია, ამერიკის შეერთებული შტატების საერთაშორისო განვითარების სააგენტოს (USAID) ფინანსური მხარდაჭერით. წყარო:დემოკრატ მესხთა კავშირის გვერდი სოციალურ ქსელში

თბილისი. „ახალგაზრდა ადვოკატებმა" ორგანიზაციის სტრატეგიული ხედვისა და საქმისწარმოების დოკუმენტის „დემოკრატია და უფლებები საქართველოში 2012–2015" სრულყოფისა და საქმანობის მდგრადობის მიზნით, ყოველწლიური, სამუშაო გუნდის შიდა ტრენინგი გამართეს. ორგანიზაციაში შიდა სემინარის მიზანია შესაძლებლობების შეფასება, ადამიანური რესურსის სწორი განვითარება, მმართველობის მენეჯმენტის დახვეწა, გამოწვევების მიმართ დამოკიდებულების ჩამოყალიბება და გადაწყვეტილებების პროცესში პასუხისმგებლობის დადგენა. სემინარის თემა მომზადდა „ინსტიტუციონალური განვითარება და ორგანიზაციის გამყარება" East Foundation 2007-2010 საკონსულტაციო მასალაზე დაყრდნობით. შიდა ტრენინგის დავალებების შესრულების შედეგად დგება „საქმინაობის დაგეგმარებისა და სტრატეგიული განვითარების შეფასების" დოკუმენტი, რომელიც სახელმძღვანელოა „ახალგაზრდა ადვოკატების" გუნდის თითოეული წევრისთვის და გადაწყვეტილებებისთვის. წყარო: ორგანიზაციის გვერდი სოციალურ ქსელში

აჭარა. 21 სექტემბერს „ბათუმის ახალგაზრდულ ცენტრში" მშვიდობის საერთაშორისო დღე სამოქალაქო აქტივობით აღინიშნა. ახალგაზრდებმა მოაწყეს „მშვიდობის კედელი" სადაც ყველა მსურველს შეეძლო მშვიდობასთან დაკავშირებით თავისი სურვილები და ასოციაციები დაეწერა. ამას გარდა ყველა გამვლელს დაურიგდა ბუშტები და მისალოცი ბარათები. აქტივობის ბოლოს იმსჯელეს და გაიხსენეს მსოფლიოში მომხდარი ფაქტები, რომლებმაც დიდი ზიანი მიაყენა მშვიდობიან მოსახლეობას, მათ შორის ყველაზე ცნობილი 2001 წლის 11 სექტემბერს ნიუ-იორკში მომხდარი ტერაქტი, ისაუბრეს აგრეთვე სამანტა სმიტის მაგალითზე, რომელიც მშვიდობის დესპანის სახელითაა ცნობილი. აღნიშნული აქტივობები მიზნად ისახავდა ახალგაზრდების ცნობიერების ამაღლებას. წყარო:ორგანიზაციის გვერდი სოციალურ ქსელში

თბილისი. 20 სექტემბერს საქართველოს ახალგაზრდული პარლამენტის სპორტისა და ახალგაზრდულ საქმეთა კომიტეტის წევრები „ბავშვთა და ახალგაზრდობის ეროვნული ცენტრის" წარმომადგენლებს შეხვდნენ. შეხვედრაზე ასევე იმყოფებოდნენ ევროპის მოხალისეთა სერვისის (European Voluntary Service) მოხალისეები, პოლონეთიდან და საფრანგეთიდან. გაცნობითი ხასიათის შეხვედრაზე ცენტრის თანამშრომლებმა თავიანთ საქმიანობაზე, პროექტებსა და მიზნებზე დაწვრილებით ისაუბრეს. მათ ასევე მიიღეს ინფორმაცია ახალგაზრდული პარლამენტის შესახებ. განსაკუთრებული ინტერესი გამოიწვია სპორტისა და ახალგაზრდულ საქმეთა კომიტეტის საქმიანობამ, მათ მიერ დღემდე განხორციელებულმა და სამომავლო პროექტებმა. საუბარი შეეხო მოხალისეობის განვითარების საკითხსაც.  შეხვედრის დასასრულს ახალგაზრდების თვითრეალიზაციის ხელშეწყობის სამსახურის სპეციალისტმა პარლამენტარებს ცენტრის საკუთრებაში არსებული ინფრასტრუქტურა დაათვალიერებინა. წყარო:ორგანიზაციის გვერდი სოციალურ ქსელში

იმერეთი. 20 სექტემბერს ქუთაისის ახალგაზრდული ცენტრის წევრებისთვის ორგანიზება გაუკეთდა სასწავლო ვიზიტს ქუთაისის სააპელაციო სასამართლოში. ვიზიტის მიზანს წარმოადგენდა ქუთაისის ახალგაზრდული ცენტრის წევრები გაცნობოდნენ სააპელაციო სასამართლოს ფუნქციებს და მნიშნელობას. სასამართლოში ახალგაზრდებმა დაათვალიერეს სასამართლოს შენობა, გაეცვნენ სასამართლოში მიმდინარე რეფორმებს. სასწავლო ვიზიტი ორგანიზებული იქნა „საქართველოში ეროვნული ინტეგრაციის გაძლიერების პროექტის" (ANI) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) მხარდაჭერით. წყარო:ორგანიზაციის გვერდი სოციალურ ქსელში

ქვემო ქართლი. ახალგაზრდა კონსტიტუციონალისტთა ასოციაცია 19 და 20 სექტემბერს მარნეულში ახალგაზრდებს შეხვდა. პირველ სამუშაო დღეს წაიკითხეს ლექცია თემებზე: ქართული კონსტიტუიონალიზმის ისტორია, კონსტიტუციის უზენაესობის პრინციპი, ხელისუფლების დანაწილების პრინციპი, ადგილობრივი თვითმართველობა, ადამიანის უფლებები და თავისუფლებები და სხვა. მეორე დღეს გაიმართა აქტიური დისკუსია, რომელიც შეეხებოდა საქართველოში მიმდინარე კონსტიტუციურ პროცესს. მარნეულელი ახალგაზრდების მიირ გამოითქვა მრავალი მოსაზრება რიგ საკითხებთან დაკავშირებით, რომლებიც აისახება პროექტის ფინალურ ეტაპზე მომზადებულ სარეკომენდაციო დოკუმენტში. წყარო:ორგანიზაციის გვერდი სოციალურ ქსელში

იმერეთი. 20 სექტემბერს, სამოქალაქო განათლებისა და პედაგოგთა გადამზადების პროგრამის ფარგლებში მცირე გრანტების კოორდინატორმა საჩხერის მუნიციპალიტეტის სოფელ სავანეს მიერ განხორციელებული პროექტის – „წყალი სიცოცხლის ელექსირია" – მონიტრინგი განახორციელა. პროექტმა პროგრამის მცირე გრანტების კონკურსში გაიმარჯვა. პროექტის ფარგლებში სკოლის სამოქალაქო კლუბისა და საპროექტო ჯგუფის წევრებმა ითანამშრომლეს ადგილობრივ ხელისუფლებასა და საქველმოქმედო ორგანიზაცია ასოციაცია „ატუსთან" ერთობლივი ძალისხმევით სკოლაში მოგვარებულ იქნა სასმელი წყლის პრობლემა. აღნიშნული პროექტიდან სარგებელი მიიღო სკოლის 270 მოსწავლემ და 60-მა თანამშრომელმა. წყარო:ორგანიზაციის გვერდი სოციალურ ქსელში

შიდა ქართლი. საზოგადოება ,,ბოლიკი” მშვიდობის საერთშორისო დღეს შეუერთდა და სამოქალაქო კლუბების წევრების ორგანიზებით გორის დრამატული თეატრის ეზოში აქცია გამართა. ღონისძიების დაწყებამდე აქციის მონაწილეებმა წუთიერი დუმილით პატივი მიაგეს მშვიდობისთვის ბრძოლაში დაღუპულ გმირებს. სამოქალაქო კლუბის წევრებმა მშვიდობის დარგში მინიჭებული ნობელის პრემიის ლაურეატების შესახებ პრეზენტაციები გააკეთეს. ამის შემდგომ მსვლელობა მოაწყეს ქალაქის ქუჩებში და გაეროს გენერალური მდივნის გზავნილი, მისალოცი ბარათები და თეთრი ბუშტები დაარიგეს. აქციის დასასრულს შეკრებილები დემოკრატიის სკოლაში თომა ჩაგელიშვილის დოკუმენტური ფილმის ,,ომის ნაკვალევი” ჩვენებას დაესწრნენ, რომელსაც ასევეგორის სამთავრობო და არასამთავრობო სექტორის წარმომადგენლები ესწრებოდნენ. წყარო:ორგანიზაციის გვერდი სოციალურ ქსელში

იმერეთი. 20 სექტემბერს, სამოქალაქო განათლებისა და პედაგოგთა გადამზადების პროგრამის ფარგლებში, ქუთაისის განათლების განვითარების და დასაქმების ცენტრის ინიციატივით, პროექტში ჩართული ჭიათურისა და საჩხერეს სამიზნე სკოლების პედაგოგებისა და მოსწავლეების მონაწილეობით მოეწყო ღია კარის დღე. მონაწილეები გაეცვნენ პროექტის ფარგლებში გამოცხადებულ მცირე საგრანტო კონკურსის პირობებს, გაიარეს კონსულტაციები საპროექტო წინადადებების მომზადების შესახებ. ასევე გაეცვნენ პროგრამის წლის სამუშაო გეგმის პრიორიტეტებს და ისაუბრეს სამომავლო გეგმებსა და ინიციატივებზე. შეხვედრას საჯარო სკოლების 12 წარმომადგენელი ესწრებოდა. წყარო:ორგანიზაციის გვერდი სოციალურ ქსელში

ქვემო ქართლი. 20 სექტემბერს სიქას ადგილობრივი, ევროპელი და ამერიკელი მოხალისეები დასუფთავების კამპანიაში – „დავასუფთაოთ მსოფლიო" – ჩაერთნენ. მათ რუსთავის სასკოლო სამოქალაქო კლუბების წევრებთან ერთად რუსთავში შარტავას ქუჩა და გიული შარტავას ბიუსტის მიმდებარე ტერიტორია დაასუფთავეს. წყარო:ორგანიზაციის გვერდი სოციალურ ქსელში

23 სექტემბერს 14 საათზე, სამოქალაქო საზოგადოების ინსტიტუტი გორში გამართავს ადგილობრივი საზოგადოებრივი ორგანიზაციებისა და ჟურნალისტების შეხვედრას თემაზე:  საზოგადოებრივი ორგანიზაციები და საზოგადოება. შეხვედრის მიზანია საზოგადოებრივი ორგანიზაციებისა და მედიის ურთიერთობის შესახებ დისკუსიის გაგრძელება. მისამართი:გორი, გორის საინფორმაციო ცენტრის ოფისი, ჩიტაძის ქ#3

23 სექტემბერს, 15:30 საათზე,  ,,რადარამი” ათულ გავანდეს წიგნის ,,სირთულეები: ჩანაწერები არასრულყოფილი მეცნიერების შესახებ" პრეზენტაციას გამართავს.  მისამართი:თბილისი, ვაჟა–ფშაველას გამზ. N.33, თბილისის სახელმწიფო სამედიცინო უნივერსიტეტის პირველი კორპუსი

23 სექტემბერს, 19:00 საათზე ფონდი ღია საზოგადოება – საქართველო პროექტის – „დოკუმენტრი ფილმები ორშბათობით" – ფარგლებში „5 გატეხილი კამერის" ჩვენებას გამართავს.  მისამართი: თბილისი,ჭოველიძის 10, ფონდის სააქტო დარბაზი

23 სექტემბერს, 16:00 საათზე ორგანიზაცია „ახალგაზრდა ადვოკატები" პროექტის – „ინსტიტუციური დიალოგი აღმასრულებელ, საკანონმდებლო, სასამართლო ხელისუფლებასთან" – ფარგლებში, სახელმწიფო მინისტრს ევროინტეგრაციის საკითხებში ალექსი პეტრიაშვილს შეხვდებიან.   მისამართი: თბილისი,  ინგოროყვას ქუჩა #7, მთავრობის კანცელარია.

23 სექტემბერს, 11:30 საათზე „უფლებადამცველთა გაერთიანება" ცეზარ ჩოჩელისა და რკინაბეტონის შპალის ქარხნის შესახებ მომზადებულ ანგარიშს წარმოადგენს.     მისამართი: თბილისი,  ვაჟა-ფშაველას 45; მე-17 სართული

23 სექტემბერს, 11:00 საათზე  NDI-ის საზოგადოებრივი აზრის კვლევის შედეგების პრეზენტაცია გაიმართება.  მისამართი:თბილისი, სასტუმრო ქორთიარდ მარიოტი