თბილისი. 10 სექტემბერს, საქართველოს მცირე და საშუალო საწარმოთა ასოციაციაში გაიმართა ასოციაციის წევრების შეხვედრა, რომელიც დაეთმო ასოციაციის 6 თვიანი მუშაობის შედეგების განხილვას. შეხვედრაზე წარმოდგენილი იყო ისეთი საკითხები, როგორიცაა: ასოციაციის ჩართულობა ფინანსთა სამინისტროსთან არსებული დავების განხილვის საბჭოში; ასოციაციის მიმდინარე და ახალი პროექტები.  წყარო: gsmea.ge

12 სექტემბერს, 12:00 საათზე „დემოკრატიული განვითარების ეროვნული ცენტრის" თავმჯდომარე მუხრან ბურჭულაძე პრესკონფერენციას გამართავს. თემა: კობა დავითაშვილის საკანონმდებლო ინიციატივები; საარჩევნო კოდექსით განსაზღვრული ნორმების დარღვევების ფაქტები. მისამართი: თბილისი, ვაჟა–ფშაველას 45, „პრესკლუბი მე–17 სართულზე"

12 სექტემბერს, 11:00 საათზე  „უფლებადამცველთა გაერთიანების" თავმჯდომარე ნიკოლოზ მჟავანაძე 2009-2013 წლებში დანაშაულების რაოდენობისა და მედიაში გაშუქებული ფაქტების  თანაფარდობასთან დაკავშირებით ანგარიშის პრეზენტაციას წარმოადგენს.    მისამართი:თბილისი, პრაიმტაიმის პრესკლუბი

12 სექტემბერს 11:00 საათზე ინფორმაციის თავისუფლების განვითარების ინსტიტუტი (IDFI) საჯარო ინფორმაციის გაცემის თვალსაზრისით ყველაზე ანგარიშვალდებულ და ყველაზე დახურულ საჯარო დაწესებულებებს დაასახელებს. კვლევა ჩატარდა ფონდ „ღია საზოგადოება – საქართველოს" მხრდაჭერით, პროექტის „საჯარო ინფორმაციის მონაცემთა ბაზა - www.opendata.ge"-ს ფარგლებში მისამართი: თბილისი, სასტუმრო „რედისონ ბლუ ივერია"

თბილისი. ცენტრალურ საარჩევნო კომისიას ახალი თავმჯდომარე ჰყავს. ცესკოში კენჭისყრა 11 სექტემბრს შედგა და კომისიის წევრებმა მხარი თამარ ძვანიას დაუჭირა. თამარ ჟვანიას კანდიდატურა საქართველოს პრეზიდენტს საარჩევნო საკითხებზე მომუშავე არასამთავრობო ორგანიაზციებმა წარუდგინეს. სრულად წყარო: isfed.ge

თბილისი. საერთაშორისო გამჭვირვალობა საქართველომ განცხადება – „უნდა გაუშვას თუ არა საზოგადოებრივმა მაუწყებელმა „ქართული ოცნების" ანტირეკლამა" – გაავრცელა. „10 სექტემბერს „ერთიან ნაციონალურ მოძრაობას" საზოგადოებრივმა მაუწყებელმა ექვსი პოლიტიკური შინაარსის ვიდეორგოლის ეთერში განთავსებაზე იმ მიზეზით უთხრა უარი, რომ ეს ვიდეომასალა წინასაარჩევნო რეკლამის მოთხოვნებს არ აკმაყოფილებდა. ... მოვუწოდებთ საზოგადოებრივი მაუწყებლის ხელმძღვანელობას, თავი შეიკავონ პოლიტიკური განცხადებებისგან და საკუთარ საქმიანობასა და განმარტებებში კანონის მოთხოვნებით იხელმძღვანელონ", ნათქვამია განცხადებაში. სრულად წყარო: transparency.ge

თბილისი. ახალგაზრდა კონტიტუციონალისტთა ასოციაციამ 11 სექტემბერს ბრიფინგი გამართა თემაზე: საზოგადოებრივი მაუწყებლის სამეურვეო საბჭოსთან დაკავშირებული საკანონმდებლო ცვლილებების აუცილებლობა და საბჭოს საქმიანობის შეფასება. „ეჭვის საფუძველს იძლევა ის ფაქტი, რომ საზოგადოებრივი მაუწყებლის სამეურვეო საბჭო და ყოფილი გენერალური დირექტორი გიორგი ბარათაშვილი განსხვავებულ ინფორმაციას ავრცელებენ მიღებული გადაწყვეტილების მიზეზებზე", განაცხადა ორგანიზაციის წარმომადგენელმა. საქართველოს ახალგაზრდა კონსტიტუციონალისტთა ასოციაცია მოითხოვს გასაჯაროვდეს აღნიშნულ საკითხთან დაკავშირებული მტკიცებულებები, მაღალი საზოგადოებრივი ინტერესის გათვალისწინებით. ასოციაცია ასევე მიმართავს საზოგადოებრივი მაუწყებელის სამეურვეო საბჭოს შეკითხვებით. სრულად წყარო:ორგანიზაციის გვერდი სოციალურ ქსელში

კახეთი. თელავის ახალგაზრდული ცენტრის წარმომადგენლებმა 11 სექტემბერი – მშვიდობის დღე აქციით აღნიშნეს. სპეციალურად აქციისთვის მოამზადეს სამშვიდობო ხასიათისა და ტერორიზმის წინააღმდეგ მიმართული პოსტერები და ქალაქში ქალაქის ქუჩებში მსვლელობა მოაწყვეს. ღონისძიება გაიმართა „საქართველოში ეროვნული ინტეგრაციის გაძლიერების პროექტის" ფარგლებში, რომელსაც ახორციელებს საქართველოს გაეროს ასოციაცია, აშშ–ს საერთაშორის განვითარების სააგენტოს მხარდაჭერით. წყარო: თელავის ახალგაზრდული ცენტრის გვერდი სოციალურ ქსელში

თბილისი. ევროკავშირის წარმომადგენლობა საქართველოში სთავაზობს საზოგადოებრივ ორგანიზაციებს გააგზავნონ მოსაზრებები, კომენტარები პროგრამებთან დაკავშირებით, რომლებსაც წარმომადგენლობა ამჟამად ახორციელებს (2014–2017 წწ). პროგრამების მიზანია სამოქალაქო საზოგადოების გაძლიერება, ადამიანთა უფლებების დაცვისა და დემოკრატიის ხელშეწყობა. სამოქალაქო საზოგადოებრივი ორგანიზაციების/ადგილობრივი მმართველობის ორგანოების პროგრამა 2014-2017 კონსულტაციების პროგრამა - ადამიანის უფლებათა დაცვისა და დემოკრატიის ხელშეწყობის ევროპული ინსტრუმენტების შესახებ 2014-2017 წყარო: eeas.europa.eu

თბილისი. ახალგაზრდა იურისტთა ასოციაციამ ივლისსა და აგვისტოში ადვოკატირების კუთხით განხორციელებული საქმიანობის შესახებ ინფორმაცია გამოაქვეყნა. ინფორმაცია. წყარო: gyla.ge

თბილისი. საერთაშორისო გამჭვირვალობა საქართველომ ბლოგპოსტი – „ვის ეკუთვნის საქართველო: დავით იაკობაშვილი – კეზერაშვილის კომპანიების ახალი მესაკუთრე" – გამოაქვეყნა. „2012 წლის ოქტომბრის საპარლამენტო არჩევნების შემდგომ დავით იაკობაშვილმა, თბილისში დაბადებულმა, მაგრამ რუსეთში მცხოვრებმა ბიზნესმენმა, რომელიც შვედეთის პასპორტით სარგებლობს, რამდენიმე სარეკლამო და ენერგეტიკული კომპანია შეიძინა, რომლებსაც, ჩვენი ინფორმაციით, მანამდე ყოფილი თავდაცვის მინისტრი დავით კეზერაშვილი აკონტროლებდა (ოფშორულ ზონაში რეგისტრირებული კომპანიების მეშვეობით). როგორც ირკვევა, 2011 წლიდან იაკობაშვილი რამდენიმე ენერგეტიკულ კომპანიაში კეზერაშვილის ბიზნესპარტნიორი იყო. თუმცა, გამომდინარე იქიდან, რომ კომპანიებს ოფშორული ჰოლდინგები ფლობს, იაკობაშვილის ცნობადობა კი ქართულ საზოგადოებაში ძალზე დაბალი იყო, მისი კავშირები მხოლოდ  მთავრობის ცვლილების შემდეგ გახდა საჯარო", ნათქვამია ბლოგპოსტში. სრულად წყარო: transparency.ge

თბილისი. 12 სექტემბერს, სასტუმრო ,,რედისონ ბლუ ევერიაში" ინფორმაციის თავისუფლების განვითარების ინსტიტუტი (IDFI) საჯარო ინფორმაციის გაცემის თვალსაზრისით ყველაზე ანგარიშვალდებულ და ყველაზე დახურულ საჯარო დაწესებულებებს დაასახელებს.   დაწესებულებების გამოვლენა ფონდ „ღია საზოგადოება საქართველოს" მხარდაჭერილი პროექტის „საჯარო ინფორმაციის მონაცემთა ბაზა - www.opendata.ge"-ს  ფარგლებში მოხდა.   ღონისძიებას გახსნიან  საქართველოს პრემიერ-მინისტრი ბიძინა ივანიშვილი და ფონდი „ღია საზოგადოება-საქართველოს" აღმასრულებელი დირექტორი ქეთი ხუციშვილი. პრეზენტაციას დაესწრებიან საჯარო დაწესებულებების, საერთაშორისო ორგანიზაციების, დიპლომატიური კორპუსის, მედიისა და არასამთავრობო ორგანიზაციების წარმომადგენლები. ინფორმაციის თავისუფლების განვითარების ინსტიტუტი (IDFI) პროექტს "www.opendata.ge" 2010 წლიდან ახორციელებს, ონლაინ რესურს ბაზა ნებისმიერ დაინტერესებულ პირს საშუალებას აძლევს თვალი ადევნონ საჯარო ინფორმაციის ხელმისაწვდომობის ტენდენციებს საქართველოში, აწარმოონ სხვადასხვა უწყებების ანგარიშების, გეგმების, ბიუჯეტის ხარჯვის მონიტორინგი. www.opendata.ge-ზე პერმანენტულად ქვეყნდება საჯარო დაწესებულებებიდან ოფიციალურად გამოთხოვილი სხვადასხვა შინაარსის საჯარო ინფორმაცია. წყარო: osgf.ge

თბილისი. 10 სექტემბერს, სამოქალაქო საზოგადოების ინსტიტუტის სამართლის ექსპერტები საქართველოს ახალგაზრდული პარლამენტის სპორტისა და ახალგაზრდობის საქმეთა კომიტეტის წევრებს შეხვდნენ. შეხვედრაზე განიხილეს მოხალისეობრივი საქმიანობის სამართლებრივი დარეგულირების საკითხები. მხარეებმა ისაუბრეს სამომავლო თანამშრომლობის გეგმებზეც, რომლის ფარგლებშიც სამოქალაქო საზოგადოების ინსტიტუტი და ახალგაზრდული პარლამენტი ერთად გააგრძელებს მუშაობას მოხალისეობრივი საქმიანობის წახალისების კუთხით.

თბილისი. გამოქვეყნდა პუბლიკაცია აღმოსავლეთ პარტნიორობის შესახებ.  ახალი ბროშურით მკითხველი მიიღებს ინფორმაციას იმის შესახებ, თუ რას წარმოადგენს აღმოსავლეთ პარტნირობა და რა შესაძლებლობებს სთავაზობს ის პროგრამაში ჩართულ ქვეყნებს და მათ მოსახლეობას. პუბლიკაცია მომზადდა ფონდ „ღია საზოგადოება - საქართველოს" შიდა პროექტის–  „აღმოსავლეთ პარტნიორობის სამოქალაქო საზოგადოების ფორუმის ეროვნული პლატფორმების შესაძლებლობათა გაზრდა"  – ფარგლებში. პროექტს აფინანსებს ევროკომისია. პუბლიკაცია – „აღმოსავლეთ პარტნიორობა" წყარო: osgf.ge

თბილისი. „ტფილისის ჰამქარი" ანახლებს საგანმანათლებლო ექსკურსიებს თბილისში. 14 სექტემბერს გაიმართება ტური – „ფეხით შემოვლილი თბილისი - კალა-კლდისუბანი-აბანოთუბანი-ხარფუხი".  მარშრუტი მოიცავს „გალავანს შიგნით" მოქცეული თბილისის ისტორიულ ნაწილს: ზემო კალას, კლდისუბანს, თბილისის ერთ-ერთ ყველაზე ძველ საკულტო ნაგებობას - ათეშგას, ქალაქის ზღუდის ნარჩენებს და უძველესი ბასტიონის შაჰტახტის ნანგრევს, ასევე წავკისისწყლის გაწმენდილ ხევს და სეიდაბადში-ხარფუხში გრიშაშვილის სახლ-მუზეუმს. ექსკურსიაში მონაწილეობა ნებისმიერ მსურველს შეუძლია. სრულად წყარო:ორგანიზაციის გვერდი სოციალურ ქსელში

თბილისი. ორგანიზაცია „დრონი" და „ბავშვთა და ახალგაზრდობის ფონდი" ახორციელებენ ახალ პროექტს – „ახალგაზრდები ბარიერების გარეშე". პროექტის ფარგლებში საქართველოს ოთხ დევნილთა ჩასახლებაში მცხოვრები ახალგაზრდების მონაწილეობით მოეწყობა სხვადასხვა აქტივობები. 3-დან 18 წლამდე ასაკის ბავშვები და მოზარდები სკრის, შაუმიანის, კარალეთისა და შავი ზღვის სკოლის ჩასახლებებიდან ჩაერთვებიან ისეთ ტრენინგებსა და ღონისძიებებში როგორიცაა: ცოცხალი ბიბლიოთეკა, ანიმაციისა და გრაფიკის ტრენინგები, სოციალური მედიის,პიროვნული განვითარებისა და ადამიანის უბლებათა ტრენინგები,სპორტული ღონისძიებები და კულტურული კოქტეილი . პროექტის ფარგლებში ახალგაზრდებთან იმუშავებენ გამოცდილი ტრენერები და კოორდინატორები, როგორც საქართველოდან, ასევე ევროპის სხვადასხვა ქვეყნებიდან. პროექტის გვერდი სოციალურ ქსელში  წყარო:ორგანიზაციის გვერდი სოციალურ ქსელში

თბილისი. თავისუფალი დებატების ლიგა ახალგაზრდებს სიახლეს სთავაზობს: ყოველ კვირას ორგანიზაცია მომავალ პოლიტიკოსთა კლუბს უმასპინძლებს. შეხვედრებზე კლუბის წევრები განიხილავენ პოლიტიკურ, სოციალურ და ეკონომიკურ საკითხებს სხვადსხვა მეცნიერების სტატიებზე დაყრდნობით, აგრეთვე მიიღებენ დავალებებს შემდეგი შეხვედრისთვის. პირველი შეხვედრა გაიმართება 15 სექტემბერს, 17:00 საათზე.  კლუბში გასაწევრიანებლად შეავსეთ აპლიკაცია წყარო: ორგანიზაციის გვერდი სოციალურ ქსელში

თბილისი. მედიის განვითარების ფონდი მოუწოდებს სამართალდამცავებს, შეისწავლონ „ექსპრესნიუსის" ხელმძღვანელის განცხადებები. საქმე ეხება ირაკლი მანაგაძის მიერ სოციალურ ქსელში გავრცელებულ განცხადებას, რომლის მიხედვითაც მას „ექსპრესნიუსის მიერ გავრცელებული ინფორმაციის მოხსნას თხოვენ". MDF თავის განცხადებაში  მოუწოდებს სამართალდამცავ ორგანოებს,  დაინტერესდნენ ჟურნალისტის ინფორმაციით და „მოახდინონ სასწრაფო რეაგირება მასზე, რათა აღკვეთილ იქნას ზეწოლა მედიაზე და დაცული იქნას ჟურნალისტების ფიზიკური უსაფრთხოებაც." სრულად წყარო: media.ge

თბილისი. „ახალგაზრდა ადვოკატები" რეინტეგრაციის საკითხებში სახელმწიფო მინისტრს პაატა ზაქარეიშვილს შეხვდნენ. დიალოგის მთავარი თემები იყო საქართველოს რეინტეგრაციის საკითხები, საქართველოს ტერიტორიული მთლიანობის აღდგენის პერსპექტივები, დეოკუპაცია, აფხაზი, ოსი და ქართველი ეროვნების წარმომადგენლების დაახლოებისთვის სახელმწიფო პოლიტიკა, მთავრობის მიერ დაგეგმილი ინიციატივები და სამომავლო ღონისძიებები კონფლიქტურ რეგიონებში სამშვიდობო პროცესისათვის, რელიგიური და ეთნიკური უმცირესობების წინაშე მდგარი პრობლემების და საკითხების განხილვა, ქართულ-რუსული ურთიერთობები და სამშვიდობო მისიები, სხვა. „ახალგაზრდა ადვოკატებმა" რეინტეგრაციის მინისტრს სოფელ დიცში არსებული ვითარებაც გააცნეს. ორგანიზაცია კონფილიქტის ზონაში 8 აგვისტოს იმყოფებოდა და ადგილობრივი მოსახლეობის არსებულ პრობლემებს გაეცნო.  შეხვედრა შედგა პროექტ – „ინსტიტუციური დიალოგი აღმასრულებელ, საკანონმდებლო, სასამართლო ხელისუფლებასთან" – ფარგლებში.  წყარო: ორგანიზაცია ახალგაზრდა ადვოკატები

კახეთი. 4–5 სქტემბერს საქართველოს ბუნების მოყვარულთა საზოგადოებამ პროექტის – „მდინარე ალაზნის მიმდებარედ მცხოვრები მოსახლეობის მობილიზება გარემოსდაცვითი პრობლემების მოსაგვარებლად" – ფარგლებში გამართა ტრენინგები. მისი თემა იყო – გარემოსდაცვითი სტრატეგია, ფონდების მოძიება და პროექტების წერა. ტრენინგებში მონაწილეობა მიიღეს სოფლების ფშავლის, გულგულის, სანიორეს, კისისხევის, ჰერეთისკარის, კართუბანის, აფენის, ფონას, კაბალის, ომალოს, ლელიანის, ბაისუბნის და წნორის სათემო ორგანიზაციების ლიდერები. ტრენინგები ჩაატარეს გამოცდილმა ექპერტებმა. წყარო: ორგანიზაციის გვერდი სოციალურ ქსელში

 11 სექტემბერს, 14:00 საათზე, „დევნილი ქალები საკუთარი უფლებების დაცვისათვის" პრესკონფერენციას გამართავს. მისამართი:ზუგდიდი, დემოკრატიული ჩართულობის ცენტრი

11 სექტემბერს, 12:00 საათზე, 2013 წლის მოწვევის საქართველოს ახალგაზრდული პარლამენტის ევროპასთან ინტეგრაციის კომიტეტი ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრთან  ალექსი თანამშრომლობის შესახებ მემორანდუმს გააფორმებს.  მისამართი:თბილისი, მთავრობის კანცელარია, მე-8 სართული.