აჭარა.ბათუმის დემოკრატიული ჩართულობის ცენტრში, 26 ივლისს გაიმართა ჰაინრიჰ ბიოლის ფონდის მიერ ორგანიზებული დებატები „ენერგეტიკა და ეკოლოგია: ინტერესთა ბალანსი". შეხვედრას ეკოლოგები, ენერგეტიკოსები, არასამთავრობო სექტორის წარმომადგენლები და ადგილობრივი თემის წარმომადგენლები ესწრებოდნენ, რომელთაც ჰესების მშენებლობას უშუალოდ ეხებათ. სრულად წყარო: georgien.boell-net

თბილისი. ინფორმაციის თავისუფლების განვითარების ინსტიტუტმა ფოთის მერიიდან მიღებული საჯარო ინფორმაცია გამოაქვეყნა. ორგანიზაციის ვებგვერდზე გაეცნობით გათავისუფლებული თანამშრომლების, ორგანიზაციის ბალანსის, თანამდებობისა და თანამშრომლების პრემიების, შესყიდვების, ავტოპარკის, საკუთარი განცხადების საფუძველზე გათავისუფლებული თანამშრომლების შესახებ ინფორმაციას. სრულად წყარო: opendata.ge

თბილისი. საერთაშორისო გამჭვირვალობა – საქართველომ – „გამარჯვებული ხალხის ტელევიზია" – „რუსთავი 2–ის ისტორია" გამოაქვეყნა. „უკვე ათ წელიწადზე მეტია, რაც ტელეკომპანია „რუსთავი 2" პოლიტიკური მოვლენების ცენტრშია და საზოგადოებრივი აზრის ფორმირებაში მნიშვნელოვანი წვლილი შეაქვს. „რუსთავი 2"-მა 2012 წელს 30.7 მილიონი ლარის შემოსავლის დეკლარირება მოახდინა. მაყურებლები ტელევიზორთან გატარებული ყოველი 100 წუთიდან 32 წუთს სწორედ ამ ტელეარხს უთმობენ. თუმცა, ქვეყნის უმსხვილესი ტელევიზიის მფლობელობა კვლავ დავის საგანია", ნათქვამია ორგანიზაციის ვებ–გვერდზე. სრულად წყარო: transparency.ge

აჭარა. 1 აგვისტოს, ბათუმის ხელოვნების უნივერსიტეტში, სამოქალაქო საზოგადოების ინსტიტუტმა მორიგი სამუშაო შეხვედრა გამართა თვითმმართველ ქალაქი ბათუმის ურბანული  განვითარების სტრატეგიული გეგმის შესახებ. ამჯერად სემინარს ადგილობრივი საზოგადოებრივი ორგანიზაციების წარმომადგენლები და ბათუმის მკვიდრი არქიტექტორები ესწრებოდნენ. შეხვედრის მონაწილეებმა ქალაქის ურბანული დაგეგმარების არსებული გეგმაც განიხილეს და მასში აღმოაჩინეს ისეთი ტექნიკური ხავეზები, როგორიცაა რუკაზე ახლად შემოერთებული ტერიტორიების არ არსებობა, ქალაქის  საზღვრების გაურკვევლობა და სხვა. პროექტი ხორციელდება აშშ საერთაშორისო განვითარების სააგენტოს (USAID) პროგრამის -,,დემოკრატიული მმართველობა საქართველოში" (G3)  - ფარგლებში.

თბილისი. საქართველოს მცირე და საშუალო საწარმოთა ასოციაცია იწყებს ახალ პროექტს – „მცირე ბიზნესი და მდგრადი სახელმწიფო შესყიდვები: ადვოკატირება გამჭვირვალობისა და მეტი ჩართულობისთვის". პროექტის მიზანია სახელმწიფო შესყიდვებში მცირე და საშუალო კომპანების მეტი ჩართულობისა და შესყიდვების მდგრადი სისტემის შექმნის უზრუნველსაყოფად ადვოკატირების კამპანიის წარმოება. პროექტი აგვისტოში დაიწყო და 8 თვის მანძილზე გაგრძლედება, რომელიც ფონდ ღია საზოგადოება – საქართველოს ფინანსური მხარდაჭერით ხორციელდება. სრულად წყარო: gsmea.ge

იმერეთი. საქართველოს ახალგაზრდა იურისტთა ასოციაციის ქუთაისის ფილიალსა და ჭიათურის მუნიციპალიტეტის მაჟორიტარი დეპუტატს, მაჟორიტარი დეპუტატის ბიუროსა შორის გაფორმებული ურთიერთთანამშრომლობის მემორანდუმის საფუძველზე გაიმართა საჯარო შეხვედრა. შეხვედრას ესწრებოდა ჭიათურის მუნიციპალიტეტის მაჟორიტარი დეპუტატი, მაჟორიტარი დეპუტატის ბიუროს თანამშრომლები, მედიცინის მუშაკები, სოფლის ამბულატორიის ექიმები, ჯეო-ჰოსპიტალსის ჭიათურის ფილიალის ხელმძღვანელობი და ადგილობრივ მოსახლეობა. შეხვედრაზე საუბარი იყო ჯანდაცვის სფეროში არსებულ პრობლემებზე. წყარო:ორგანიზაციის გვერდი სოციალურ ქსელში

თბილისი. ჟურნალისტიკაში ევროკავშირის პრიზის ფარგლებში ევროკავშირის სადამკვირვებლო მისიის ხელმძღვანელმა საქართველოში ჯერარდ ფიშერმა და ევროკავშირის წარმომადგენლობის ხელმძღვანელის მოვალეობის შემსრულებელმა ბორის იაროშევიჩმა სპეციალური პრიზი წარადგინეს მშვიდობის ჟურნალისტიკაში. პრიზის მიზანია, აღიაროს და დააჯილდოვოს კონფლიქტის მიმართ სენსიტიური ჟურნალისტური ნამუშევრები და სტიმული მისცეს ჟურნალისტებს,  კონფლიქტური სიტუაციები კონსტრუქციულად გააშუქონ. მშვიდობის ჟურნალისტიკაში ევროკავშირის სადამკვირვებლო მისიის პრიზის მინიჭება მოხდება მხოლოდ ერთის აუკეთესო დაბალანსებული და მიუკერძოებელი სტატიისთვის ბეჭდურ ან ელექტრონულ მედიაში; სატელევიზიოდა/ან რადიო რეპორტაჟისთვის; ვებგვერდზე, ბლოგზე ან სოციალურ მედიაში განთავსებული მასალისთვის; ახალიამბების სააგენტოსთვის, ან ელექტრონული გაზეთისთვის მომზადებული მასალისთვის. ევროკავშირის სადამკვირვებლო მისიის პრიზის მფლობელს გადაეცემა სტიპენდია, რომლის მეშვეობითაც მონაწილეობას მიიღებს პროგრამის "Building Bridges/Building Capacity: Conflict Prevention in the South Caucasus” ფარგლებში გათვალისწინებულ ერთთვიან ტრენინგში.ტრენინგი გაიმართება ლონდონში, ომისა და მშვიდობის გაშუქების ინსტიტუტის (IWPR) სათავო ოფისში. სრულად  წყარო: media.ge

თბილისი. ამერიკის შეერთებული შტატების სელჩომ საზაფხულო ფოტო კონკურსში გამარჯვებულები გამოავლინა. წესების მიხედვით, ფოტოზე უნდა ყოფილიყო ავტორის საყვარელი საზაფხულო აქტივობა ასახული. საელჩოს თანამშრომლებმა და ოფიციალურმა პირებმა სამი გამარჯვებული გამოავლინეს. გამარჯვებული ფოტოები წყარო:ორგანიზაციის გვერდი სოციალურ ქსელში

2 აგვისტოს, 12:00 საათზე, არასამთავრობო ორგანიზაციები "ახალგაზრდები სამართლიანობისათვის - საქართველო" და საზოგადოებრივი დამცველი სასჯელაღსრულების დაწესებულებებში პატიმრების ჯანდაცვის საკითხებთან დაკავშირებით კვლევის პრეზენტაციას გამართავენ. მისამართი: ჭოველიძის ქ. #10, ფონდი "ღია საზოგადოება – საქართველოს" ოფისი 

2 აგვისტოს, 11:30 საათზე, უფლებადამცველთა გაერთიანების თავმჯდომარე ნიკოლოზ მჟავამაძე ბრიფინგს გამართავს.თემა: თეა წულუკიანის და არჩილ კბილაშვილის პასუხისმგებლობა მიმდინარე პროცესებთან დაკავშირებით. მისამართი:თბილისი პრესკლუბი მე-17 სართულზე

თბილისი. წინასაარჩევნო მედიამონიტორინგის ფარგლებში სატელევიზიო და რადიო არხების მონიტორინგის უახლესი ანგარიშები გამოქვეყნა, რომელიც მოიცავს 15 ივნისიდან 15 ივლისამდე მონაცემებს. სატელევიზიო სივრცის მონიტორინგს კავკასიის კვლევითი რესურსების ცენტრი ახორციელებს, ხოლო რადიო არხების მონიტორინგს ინტერნიუს–საქართველო. მონიტორინგი ევროკავშირისა და გაეროს განვითარების პროგრამის მიერ დაფინანსებული პროექტის – „პროფესიონალური მედია არჩევნებისთვის" – ფარგლებში ხორციელდება. სატელევიზიო არხების წინასააარჩევნო მონიტორინგი – 16 ივნისი–16 ივლისი რადიოების წინასაარჩევნო მონიტორინგი – 15 ივნისი–15 ივლისი წყარო: mediamonitor.ge

თბილისი. ინფორმაციის თავისუფლების განვითარების ინსტიტუტი (IDFI) საქართველოს ენერგეტიკისა და წყალმომარაგების მარეგულირებელი ეროვნული კომისიისაგან ინფორმაციის გაცემას ითხოვდა. ქუთაისის საქალაქო სასამართლომ 2013 წლის 24 ივნისის გადაწყვეტილებით არ დააკმაყოფილა IDFI-ის სარჩელი. ინსტიტუტის მოთხოვნა იყო საქართველოს ენერგეტიკისა და წყალმომარაგების მარეგულირებელი ეროვნული კომისიის დავალდებულება გაეცა 2013 წლის 26 მარტს მოთხოვნილი ინფორმაცია ხელმძღვანელსა და მის მოადგილეზე (ცალ-ცალკე) დარიცხული პრემიების ოდენობის შესახებ; ინფორმაცია თანამშრომლებზე (საერთო ოდენობა) დარიცხული პრემიების ოდენობის შესახებ; მოქმედი საშტატო ნუსხა თითოეული პოზიციის თანამდებობრივი სარგოს მითითებით; ინფორმაცია ხელმძღვანელის ქვეყნის გარეთ განხორციელებულ ოფიციალურ და სამუშაო ვიზიტებზე გაწეულ სამივლინებო ხარჯების შესახებ; ინფორმაციის თავისუფლების განვითარების ინსტიტუტი „მიიჩნევს, რომ ქუთაისის საქალაქო სასამართლოს გადაწყვეტილება სარჩელის დაკმაყოფილების თაობაზე არ შეესაბამება საქართველოს კანონმდებლობით დადგენილ ნორმებსა და საქართველოს საკონსტიტუციო სასამართლოს მიერ აღნიშნული ნორმების ინტერპრეტაციას". სრულად წყარო: opendatablog.wordpress.com

თბილისი. საერთაშორისო გამჭვირვალობა – საქართველომ საკუთრების უფლებების დარღვევის შესახებ მოპოვებული რამდენიმე ისტორიაზე ფილმი გადაიღო. სადაც უფლებაშელახული მესაკუთრეები თავად ყვებიან საკუთარ ისტორიებს. „საერთაშორისო გამჭვირვალობა – საქართველო" დაზარალებულებს საქართველოს რამდენიმე ქალაქში ესაუბრა: თბილისი, გარდაბანი, რუსთავი, სიღნაღი და ლაგოდეხი. ფილმი  წყარო: ორგანიზაციის გვერდი სოციალურ ქსელში

შიდა ქართლი. საზოგადოება „ბილიკმა" ევროპელ მოხალისეთა მომსახურების (EVS) ფარგლებში გამგზავნი, მიმღები და კოორდინატორი ორგანიზაციის სტატუსი მიიღო. ევროპელ მოხალისეთა მომსახურების აკრედიტაცია ორგანიზაციას საშუალებას აძლევს იყოს ჩართული ევროპელ მოხალისეთა მომსახურების პროექტებში როგორც პარტნიორი ასევე კოორდინატორი ორგანიზაცია 22.07.2013 – 22.07.2016 პერიოდში. წყარო: ორგანიზაციის გვერდი სოციალურ ქსელში

თბილისი. ახალგაზრდა იურისტთა ასოციაციამ სამი ადმინისტრაციული ორგანოს წინააღმდეგ თბილისის საქალაქო სასამართლოს სასარჩელო განცხადებებით მიმართა. საიამ საქართველოს კანონმდებლობით განსაზღვრული საჯარო ინფორმაციის გაუცემლობის და მოთხოვნილი ინფორმაციის არასრულყოფილი სახით გაცემის ფაქტზე, სასამართლოს საქართველოს პრეზიდენტის ადმინისტრაციის, საქართველოს შინაგან საქმეთა სამინისტროს და თბილისის მერიის წინააღმდეგ მიმართა. „საია მოუწოდებს ყველა ადმინისტრაციულ ორგანოს, განსაკუთრებული ყურადღებით მოეკიდოს საჯარო ინფორმაციის საქართველოს კანონმდებლობით დადგენილ ვადებში გაცემის ვალდებულებას და მაქსიმალურად შეუწყოს ხელი დაინტერესებული პირების მიერ  საჯარო ინფორმაციის  მიღების უფლებას", ნათქვამია ორგანიზაციის ვებ–გვერდზე. სრულად წყარო: gyla.ge

თბილისი. განვითარებისა და დემოკრატიის ცენტრმა გაავრცელა განცხადება, რომლითაც უწყებათაშორისო კომისიას, ცენტრალურ ხელისუფლებასა და ადგილობრივ თვითმმართველობებს მიმართავს. განცხადებაში საუბარია ,,აჭარის ავტონომიური რესპუბლიკის 2013 წლის რესპუბლიკური ბიუჯეტის შესახებ" კანონში ცვლილებებზე. „სამწუხაროდ, საქართველოს საარჩევნო კოდექსის 49-ე მუხლის მე 3 პუნქტში ცვლილებები არ ყოფილა განხილული და შეჯერებული საარჩევნო კანონმდებლობის გაუმჯობესების მიზნით შექმნილ  პარლამენტის ინტერფრაქციული ჯგუფის ფორმატში, რომლის მუშაობაში აქტიურად იყო ჩართული, როგორც პოლიტიკური პარტიები, ასევე ადგილობრივი და საერთაშორისო ორგანიზაციების წარმომადგენლები.   ...განვითარებისა და დემოკრატიის ცენტრი (CDD) მოუწოდებს თავისუფალი და სამართლიანი არჩევნებისათვის უწყებათაშორის კომისიას, ცენტრალურ ხელისუფლებასა და ადგილობრივ თვითმმართველობებს, რომ მიიღონ შესაბამისი ზომები აღნიშნული ტენდენციის შესაჩერებლად, რათა 2013 წლის საპრეზიდენტო არჩევნების წინასაარჩევნო პერიოდი წარიმართოს  მაქსიმალურად ჯანსაღ – კონკურენტუნარიან გარემოში და აღმოფხვრილ იქნას ადმინისტრაციული რესურსების გამოყენება საარჩევნო მიზნით", ნათქვამია ორგანიზაციის ვებ–გვერდზე. სრულად წყარო: cdd.ge

თბილისი. საბჭოთა წარსულის კვლევის ლაბორატორიამ საქართველოს კათალიკოს-პატრიარქის, მცხეთა-თბილისისა და ცხუმ-აფხაზეთის მიტროპოლიტის, უწმიდესისა და უნეტარესის ილია მეორის მიერ სტალინის შესახებ გამოთქმულ მოსაზრებასთან დაკავშირებით განცხადება გაავრცელა. „თუ გავითვალისწინებთ საქართველოს კათალიკოს პატრიარქის დიდ ავტორიტეტს, საბჭოთა დიქტატორის განმადიდებელი მითების დამკვიდრება განსაკუთრებით არასასურველია ბოლო დროს სტალინის ძეგლის აღდგენასთან დაკავშირებული პოლიტიკური გადაწყვეტილებების ფონზე. ...მოვუწოდებთ მეცნიერებს, პოლიტიკურ წრეებს, მედიას და მთლიანად ქართულ საზოგადოებას, გამოიკვლიონ და გაიაზრონ საბჭოთა პერიოდის სისტემური დანაშაული და ამით პატივი სცენ სტალინური სისტემის მსხვერპლთა ხსოვნას", ნათქვამია ორგანიზაციის ვებ–გვერდზე. სრულად წყარო: sovlab.ge

კახეთი.30 ივლისს, არტ–კაფე „ქედელში" დაიწყო და შემდეგ სიღნაღის თეატრში გადაინაცვლა პოეზიისა და მუსიკის ფესტივალმა „პოემუსმა". პოეზიისა და მუსიკის ფესტივალი საქველმოქმედო ხასიათი აქვს. სიღნაღში გამართული ღონისძიება მიზნად ისახავდა შეზღუდული შესაძლებლობების მქონე პირების ინტეგრაციას საზოგადოებაში. არტ–კაფე „ქედელი" თემი „ქედელის" სოციალური საწარმოა, რომელშიც „ქედელის" ბენეფიციარებიც არიან დასაქმებულნი. ისინი აღნიშნავენ, რომ მათთვის ლამაზი და დაუვიწყარი იყო ფესტივალში მონაწილე პოეტებთან და მუსიკოსებან გატარებული ერთი დღე. წყარო: არტ–კაფე „ქედელის" გვერდი სოციალურ ქსელში

თბილისი. 30–31 ივლისს, სამოქალაქო საზოგადოების ინსტიტუტმა „შედეგზე ორიენტირებული პროექტის მართვის" პროგრამის ფარგლებში  შერჩეული საპილოტე ორგანიზაციის წარმომადგენლებისთვის ტრენინგები ჩაატარა. ტრენინგების თემები იყო: „სისტემური ცვლილება და მონაწილეობითი მიდგომები" და  „პროექტის დაგეგმვა". „სისტემური ცვლილება და მონაწილეობითი მიდგომების" მოდულის მიზანი იყო მონაწილეებს მიეღოთ თეორიული და პრაქტიკული ცოდნა სისტემური ცვლილებისა და მონაწილეობითი მიდგომების შესახებ, რაც მათ საშუალებას მისცემს განავითარონ გრძელვადიან შედეგსა და გავლენაზე ორიენტირებული პროექტები, რაც საზოგადოებრივი ორგანიზაციების მდგრადი განვითარებისათვის უმნიშვნელოვანესია. მეორე ტრენინგ–მოდულის მიზანს წარმოადგენდა მონაწილეებისათვის პროექტის დაგეგმვის სისტემური მიდგომებისა და ინსტრუმენტების მეთოდოლოგიის გაცნობა, რათა მათ შემდგომში კონკრეტული მეთოდების გამოყენებით, როგორიცაა: შედეგების ჯაჭვი, ლოგიკური ჩარჩო, პრობლემების ანალიზი,  M4P სისტემური ანალიზი, ინტერვენციის ლოგიკის თეორია, დაიწყონ სისტემური და მონაწილეობითი მიდგომების დანერგვა პროექტების დაგეგმვის პროცესში. ეს თავის მხრივ ხელს შეუწყობს საზოგადოებრივი ორგანიზაციების ეფექტურ, ეფექტიან, მდგრად პოზიტიურ ცვლილებაზე ორიენტირებულ მუშაობას. პროგრამა ხორციელდება სამოქალაქო საზოგადოების ინსტიტუტის მიერ, მოწვეული საერთაშორისო ექსპერტის ხელმძღვანელობით. ფინასურ მხარდაჭერას უზრუნველყოფს Bread for the World, „საზოგადოებრივი ორგანიზაციების გარემოს გაუმჯობესებისა და ეფექტურობის გაზრდა" პროექტის ფარგლებში.

სამცხე–ჯავახეთი. 30-31 ივლისს „სიდას" ინიციატივით ახალციხეში ჟურნალისტებისთვის ტრენინგი ჩატარდა. ორდღიანი ტრენინგის მიზანს წარმოადგენდა სამცხე–ჯავახეთის მედიის წარმომადგენელთა ინტერესის გაზრდა და ინფორმირებულობა. კერძოდ ისეთ საკითხებზე, როგორებიცაა: ბავშვის განვითარების თავისებურებები, არასრულწლოვანთა მართლმსაჯულებისა და რეპორტაჟის მომზადების საერთაშორისო სტანდარტები.  ტრენინგი ჩატარდა პროექტის – „არასრულწლოვანთა მართლმსაჯულების რეფორმის მხარდაჭერა ქვემო ქართლისა და სამცხე-ჯავახეთის ეროვნული უმცირესობების თემებში" – ფარგლებში, რომელიც დაფინანსებულია ევროკავშირის მიერ. წყარო:ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა – საქართველომ გამოაქვეყნა პუბლიკაცია – „საზოგადოებრივი საკუთრებიდან პოლიტიკოსის საკუთრებაში: ერთი ნაკვეთის ისტორია კუს ტბის გზაზე". „აღსანიშნავია, რომ ეს არ არის პირველი შემთხვევა, როდესაც თბილისის მერია ქალაქის სარეკრეაციო ზონების მომავლის შესახებ მნიშვნელოვნად გადაწყვეტილებებს ნაჩქარევად და სათანადო საზოგადოებრივი განხილვის გარეშე იღებს, ხოლო გადაწყვეტილების ბენეფიციარი თანამდებობის პირია. ...მოვუწოდებთ თბილისის მერიას, განუმარტოს საზოგადოებას, თუ რა მიზეზით გადაწყდა დაცულ ზონაში არსებული ტერიტორიის გასხვისება, რომელსაც თბილისის მოსახლეობა დასასვენებლად იყენებდა, ასევე რატომ იქნა მიჩნეული საჭიროდ ამ ტერიტორიაზე რესტორნის აშენება", ნათქვამია ორგანიზაციის ვებგვერდზე. სრულად წყარო: transparency.ge

აჭარა. „თავისუფალ ჟურნალისტთა სახლი" იწყებს დისკუსიების ციკლს „ახალგაზრდები და საზოგადოება", სადაც მომხსენებლებიც და სტუმრებიც იქნებიან სტუდენტები, ახალგაზრდები.  თვის განმავლობაში ორგანიზაციის ვებგვერდების საშუალებით (www.presscafe.ge, www.media.org.ge , www.facebook.com/) ახლგაზრდებს შორის ჩაატარებს გამოკითხვა და გამოვლინდება ის საკითხი, თემები, რომელიც მათთვის ყველაზე საიტერესოა. და აღნიშნულ თემატიკაზე გამართონ დისკუსია. გამოკითხვის პარალელურად, შემოსული შეხედულებებისა და გამოთქმული მოსაზრებების საფუძველზე გამოვლინდება ორი განსხვავებული პოზიციის მქონე ახალგაზრდა, რომელსაც შევთავაზებთ დისკუსიაში მონაწილეობა მიღებას მომხსენებლის სტატუსით. წყარო: presscafe.ge