შიდა ქართლი. 6 აგვისტოს არასამთავრობო ორგანიზაცია „სიდამ" რეგიონული პრობლემატიკის მედიაკონკურსის გამარჯვებულები დააჯილდოვა. კონკურსის გამარჯვებულად შემდეგი ჟურნალისტები დასახელდნენ: I ადგილი – ოლიკო ცისკარიშვილი – „ireporter" II ადგილი – სუხლან მესხიძე –„25-ე არხი" III ადგილი- თეა თოფურია - რადიო „თავისუფლება", მანანა ვარდიაშვილი - „ლიბერალი" და თამარ კვინიკაძე - ჟურნალი „გზა". გამარჯვებულებს ფულადი ჯილდო გადაეცათ. წყარო:ორგანიზაციის გვერდი სოციალურ ქსელში

თბილისი. „ეროვნული ინტეგრაციის გაძლიერების პროექტის ფარგლებში ცხადდება წერა–კითხვისა და წიგნიერების საერთაშორისო დღისადმი მიძღვნილი კონკურსი. მონაწილეობის მიღება შეუძლია  პროექტის – „ეროვნული ინტეგრაციის გაძლიერება საქართველოში" –ფარგლებში ჩამოყალიბებულ 13 ახალგაზრდული ცენტრის წევრებს. კონკურსის მონაწილეს შეუძლია ამ დღესთან დაკავშირებით წარადგინოს პროექტი, რომელიც წიგნიერების მნიშვნელობასწარმოაჩენს და წერა–კითხვის პოპულარიზაციას მოახდენს. სრულად წყარო: სამოქალაქო აქტივიზმის ახალგაზრდული ქსელი

თბილისი.„საერთაშორისო გამჭვირთალობა – საქართველომ" ახალი პუბლიკაცია გამოაქვეყნა – „შეესაბამება თუ არა „ახალ პოლიტიკურ სტანდარტს" მარგველაშვილის წინასაარჩევნო კამპანია?". „სწორედ როგორც „ახალი პოლიტიკური სტანდარტების" დამკვიდრებისკენ გადადგმული ნაბიჯი ახსნა გიორგი მარგველაშვილმა განათლებისა და მეცნიერების მინისტრობიდან გადადგომა, მაშინ, როდესაც მოქმედი კანონმდებლობა ამას არ ავალდებულებდა. პრეზიდენტობის მომავალი კანდიდატის ეს გადაწყვეტილება უდავოდ მისასალმებელია. თუმცა მარგველაშვილის ერთგულება მის მიერვე გაცხადებული პოლიტიკის მიმართ ეჭვქვეშ დააყენა ბოლო პერიოდში მისი საჯარო გამოჩენის სპეციფიკამ. მხედველობაში გვაქვს მისი დასწრების ფაქტი იუსტიციის სამინისტროს მიერ ორგანიზებულ შრომის კოდექსის ბეჭდური ვერსიის პრეზენტაციაზე და ახმეტის მუნიციპალიტეტის მიერ ორგანიზებულ თუშეთობის დღესასწაულზე ომალოში, სადაც მარგველაშვილმა ვერტმფრენით იმგზავრა. ჩვენთვის უცნობია არის თუ არა სატრანსპორტო საშუალება სახელმწიფო საკუთრებაში", ნათქვამია ორგანიზაციის პუბლიკაციაში. პუბლიკაციაში აღნიშნულია, რომ გიორგი მარგველაშვილი ამ დრომდე საპრეზიდენტო კანდიდატად ოფიციალურად  დარეგისტრირებული არ არის „თუმცა, იქიდან გამომდინარე, რომ წინასაარჩევნო კამპანია ფაქტობრივად უკვე დაწყებულია, საპრეზიდენტო კანდიდატად რეგისტრაცია კი მხოლოდ ფორმალურ პროცედურას წარმოადგენს, კოალიცია „ქართული ოცნების" პრეზიდენტობის მომავალ კანდიდატს მოვუწოდებთ: დაიცვას ეუთოს კოპენჰაგენის დოკუმენტი, რომლის თანახმად სახელმწიფოსა და პოლიტიკურ პარტიებს შორის მკაფიო განსხვავება უნდა არსებობდეს, რაც ამ შემთხვევაში დარღვეული იყო. დაიცვას მის მიერვე დეკლარირებული მაღალი პოლიტიკური სტანდარტი და კანდიდატად ოფიციალურად დარეგისტრირებამდეც არ დაუშვას ადმინისტრაციული რესურსების გამოყენება, ვინაიდან ამომრჩევლისთვის ის უკვე აღიქმება, როგორც საპრეზიდენტო კანდიდატი". სრულად წყარო: transparency.ge

6 აგვისტოს, 16:00 საათზე ახალგაზრდა იურისტთა ასოციაცია გამართავს პრესკონფერენციას. თემა: სოფლის მეურნეობის სამინისტროს მაღალჩინოსნების საქმე. ასევე ბათუმის საქალაქო სასამართლოში აჭარის ავტონომიური რესპუბლიკის ბიუჯეტთან დაკავშირებით შეტანილი სარჩელი. მისამართი: თბილისი კაჯიძის 15, საიას ოფისი

თბილისი. სამოქალაქო განვითარების ინსტიტუტმა განაახლა მედიამონიტორინგი ევროკავშირისა და გაეროს განვითარების პროგრამის მიერ დაფინანსებული პროექტის ფარგლებში. საპრეზიდენტო წინასაარჩევნო მონიტორინგის ფარგლებში ინსტიტუტი აკვირდება 12 ვებგვერდს: netgazeti.ge, droni.ge, politico.ge, liberali.ge, news.ge, presa.ge, civil.ge, tabula.ge, garbonline.tv, for.ge, dfwatch.net, palitratv.ge. აღნიშნული ანგარიში მოიცავს მედიამონიტორინგის შედეგებს 15 ივნისიდან 15 ივლისის ჩათვლით. ონლაინ მედიის წინასაარჩევნო მონიტორინგი– 15 ივნისი–15 ივლისი წყარო: mediamonitor.ge

თბილისი. ჰაინრიჰ ბიოლის ფონდის სამხრეთ კავკასიის რეგიონული ბიურო 12 აგვისტოდან 25 აგვისტოს ჩათვლით საზაფხულო არდადეგებთან დაკავშირებით იხურება. ფონდი მუშაობას 26 აგვისტოდან განაახლებს. წყარო: ბიოლის ფონდი

თბილისი. საიტი ძლიერი თვითმმართველობა – ძლიერი საქართველო აქვეყნებს პუბლიკაციას „მუნიციპალური რეფორმა, ადმინისტრაციულ–ტერიტორიული ოპტიმიზაციის გარეშე, მხოლოდ კოსმეტიკა იქნება". „საქართველოს მთავრობის მიერ მოწონებული „დეცენტრალიზაციისა და თვითმმართველობის განვითარების სტრატეგიაში"  მოცემულია ქვეყანაში ორდონიანი თვითმმართველობის ჩამოყალიბების რეფორმის ჩასატარებლად საჭირო კომპლექსური კონცეპტუალური ხედვა, რომლის ერთ–ერთი კომპონენტი ადმინისტრაციულ–ტერიტორიული მოწყობის ოპტიმიზაციაა" ნათქვამია მამუკა აბულაძის პუბლიკაციაში. პუბლიკაცია წყარო: lsg.ge

თბილისი. ადამიანის უფლებათა ცენტრმა 5 აგვისტოს ბაჩანა ახალაიას სასამართლო პროცესთან დაკავშირებით განცხადება გაავრცელა. ორგანიზაცია მიიჩნევს, რომ „პროცესის მცირე ზომის დარბაზში გამართვით ბევრ დაინტერესებულ პირს წაერთვა შესაძლებლობა დასწრებოდა სასამართლო პროცესს, როთაც შეიზღუდა საქმის საჯარო მოსმენის უფლება". ადამიანის უფლებათა ცენტრი მოუწოდებს თბილისის საქალაქო სასამართლოს უზრუნველყო საზოგადოებისთვის მნიშვნელოვანი საქმეების სასამართლოს პროცესების დიდი ზომის დარბაზში გამართვა. სრულად წყარო: humanrights.ge

სამცხე–ჯავახეთი. ღია გარემოსდაცვითმა სამოქალაქო ინიციატივამ (OECI), სსიპ ეროვნული სატყეო სააგენტოს სამცხე-ჯავახეთის სატყეო სამსახურის თანამშრომლებთან "ტყის მდგრადი მართვის" პროექტის ფარგლებში მორიგი სამუშაო შეხვედრა გამართა. შეხვედრაზე სამცხე-ჯავახეთის რეგიონში 2013–2014 წლების ზამთრის სეზონისათვის მოსახლეობის საშეშე მერქნით უზრუნველყოფის საკითხები,  რესურსების გამოყოფა-მოხმარების შესახებ სიახლეები  და სახელმწიფო გეგმები განიხილეს. „ინიციატივის მიზანი ტყის რესურსების მოხმარებასთან დაკავშირებით მდგომარეობის გაუმჯობესება, პირველ რიგში კი, ზამთრის სეზონისთვის დროული მომზადებაა. ამისთვის მნშვნელოვანია შეიქმნას რეალურად განხორციელებადი მოდელი, რომელიც მოსახლეობას სასიცოცხლო მნიშვნელობის რესურსით გარანტირებულად უზრუნველყოფს, ყველა დაინტერესებული მხარისთვის მისაღები იქნება, რეგიონის ტყეებს კი იმ სერიოზულ ზიანს ააცილებს, რაც ყოველწლიურად შეშის უსისტემო მოპოვებასთანაა დაკავშირებული. მართვისა და მონიტორინგის ორგანოების გარდა მნიშვნელოვანია პროცესში ადგილობრივი მოსახლეობის ჩართაც – ინფორმაციის დროულად მიწოდებისა და ადგილობრივი საჭიროებების გამოვლენა–გათვალისწინების მიზნით" – აცხადებს ხათუნა ხმალაძე, OECI–ის კოორდინატორი სამცხე–ჯავახეთში. წყარო: cenn

6 აგვისტოს, 15:00 საათზე ადამიანის უფლებათა ცენტრი ანგარიშის – „საქართველოს ფსიქიატრიული დაწესებულებები: პრობლემები, საჭიროებები, რეკომენდაციები" – პრეზენტაციას გამართავს. მისამართი: თბილისი, მელიტონ ქანთარიას 11ა, ადამიანის უფლებათა სახლი

6 აგვისტოს, 13:00 საათზე „სიდას" მიერ ორგანიზებული მედიატურისა და კონკურსის გამარჯვებულების დაჯილდოვება გაიმართება. მისამართი: თბილისი, სასტუმრო „ჰოლიდეი ინნ"

6 აგვისტოს, 12:00 საათზე ცენტრალური საარჩევნო კომისია, საარჩევნო სისტემების საერთაშორისო მხარდაჭერით მედიისა და არასამთავრობო სექტორის წარმომადგენლებთან შეხვედრას გამართავს. მისამართი: თბილისი, სასტუმრო „რედისონ ბლუ ივერია"

6 აგვისტოს 11:30 საათზე ახალგაზრდა უფლებადამცველთა ასოციაცია განცხადებას გააკეთებს ლევან კორტავას გარდაცვალების ფაქტზე. მისამართი: თბილისი, გამსახურდიას 4 ა, მე–5 სართული

6 აგვისტოს, 12:00 საათზე გაეროს ქალთა ორგანიზაციისა და საქართველოს რეგიონული განვითარებისა და ინფრასტრუქტურის სამინისტროს ინიციატივით ზუგდიდში გაიმართება საინფორაციო შეხვედრა.მისამართი: ზუგდიდი, მუნიციპალიტეტის სააქტო დარბაზი

აჭარა. ასოციაცია „თავისუფალ ჟურნალისტთა სახლი" ახორციელებს პროექტს – „ახალგაზრდებში დემოკრატიული იდეების პოპულარიზაცია". პროექტის ფარგლებში  12 კაციანი მოხალისეთა სტუდენტების ჯგუფი, მედია კორდინატორის ხელმძღვანელობით, ამზადებს 12-15 წუთამდე ანალიტიკურ სიუჟეტებს თემებზე: აღმსარებლობისა და რწმენის თავისუფლება, ქალთა უფლებები, გენდერი, ბავშთა უფლებები, განათლების უფლებება, ტრადიციები, სოციალური უფლებები, ინფორმაციის მიღების ხელმისაწვდომობა. სიუჟეტების გადაღება ხორცილედება აჭარის ავტონომიური რესპუბლიკის მაღალმთიან მუნიციპალიტეტებში: ხულო, შუახევი, ქედა, ხელვაჩაური და ქობულეთი.  წყარო:ორგანიზაციის გვერდი სოციალურ ქსელში

თბილისი. საერთაშორისო გამჭვირვალობა – საქართველომ ტენდერების მონიტორინგის ფარგლებში შექმნილი პორტალის tendermonitor.ge საზოგადოებას საშუალება აქვს თვალი ადევნოს  და მიიღოს დეტალური ინფორმაცია სახელმწიფო შესყიდვების შესახებ. აღნიშნული პროექტის ფარგლებში ორგანიზაციამ სოციალურ ქსელში განათავსა ინფორმაცია მთავრობის მიერ შეძენილი სატრანსპორტო საშუალებების შესახებ. სრულად ტენდერები წყარო: ორგანიზაციის გვერდი სოციალურ ქსელში

თბილისი.მშვიდობის, დემოკრატიის და განვითარების კავკასიური ინსტიტუტმა ქვემო ქართლის და სამცხე-ჯავახეთის არაქართულენოვანი სკოლების მოსწავლეებისთვის კონკურსები - „ჩემი საყვარელი აზერბაიჯანული სიტყვა" და „ჩემი საყვარელი სომხური სიტყვა" ჩაატარა. კონკურსის მონაწილეებს ქართულ ენაზე უნდა დაწერათ თემა საყვარელ აზერბაიჯანულსომხურ სიტყვაზე, რომელი ყველაზე მეტად მოსწონთ. შემოსული 51 თემიდან კომისიამ 5 გამარჯვებული გამოავლინა. გამარჯვებულებს გადაეცემათ სერთიფიკატი და ფულადი პრემია. ასევე ისინი მონაწილეობას მიიღებენ 5-11 აგვისტოს კავკასიური ინსტიტუტის მიერ ორგანიზებულ საზაფხულო სკოლაში. წყარო:ორგანიზაციის გვერდი სოციალურ ქსელში

თბილისი. არასამთავრობო ორგანიზაციები გეგუთის ციხეში გარდაცვლილი პატიმრის საქმეზე განცხადებას ავრცელებენ. ორგანიზაციები გამოხატავენ უკიდურეს შეშფოთებას. „საგანგაშოა რომ გამოძიების მიერ გავრცელებული ინფორმაციის თანახმად, გეგუთის ციხის თანამშრომელი პატიმარზე უკანონო ზეგავლენის მოხდენას (რასაც მოყვა პატიმრის ცემა და საბოლოოდ გარდაცვალება) ავალებდა იმავე დაწესებულების სხვა პატიმრებს, რომელთაც სავარაუდოდ გარკვეული კრიმინალური ავტორიტეტი გააჩნდათ სასჯელაღსრულების დაწესებულებაში", ნათქვამია განცხადებაში. ორგანიზაციები მოუწოდებენ  საქართველოს ხელისუფლებას, „ერთი მხრივ, უზრუნველყოს კანონმდებლობის იმდაგვარი სრულყოფა, რომელიც მინიმუმამდე დაიყვანს ციხეში არაფორმალური მართველობის განხორციელების საშუალებას, ხოლო მეორე მხრივ გააძლიეროს დაწესებულებებში შიდა მონიტორინგის სისტემა, რომელიც საშუალებას მისცემს სამინისტროს აღკვეთოს სასჯელაღსრულების დაწესებულებების არაფორმალური მმართველობის ფაქტები". ერთობლივი განცხადების ავტორები არიან: „სამართლიანი არჩევნები", „ახალგაზრდა იურისტთა ასოციაცია", „საერთაშორისო გამჭვირვალობა საქართველო", „საქართველოს დემოკრატიული ინიციატივა", „კონსტიტუციის 42-ე მუხლი", „ადამიანის უფლებათა სწავლების და მონიტორინგის ცენტრი". სრულად წყარო: transparency.ge

 თბილისი. 5 აგვისტოს სპორტისა და ახალგაზრდობის საქმეთა სამინისტროს სსიპ ბავშვთა და ახალგაზრდობის განვითარების ფონდის  2013 წლის მესამე საგრანტო კონკურსის პრეზენტაცია გაიმართა. აღნიშნული კონკურსი სხვა კონკურსებისგან რამდენიმე კომპონენტით გამოირჩევა: პირველად ფონდის არსებობის მანძილზე კონკურსი ცხადდება მხოლოდ რეგიონული ორგანიზაციებისთვის. დედაქალაქში დაფუძნებულ არასამთავრობო ორგანიზაციებს კონკურსში მონაწილეობის საშუალება მხოლოდ რეგიონალურ ორგანიზაციებთან ერთად კოალიციური პროექტის წარმოდგენის შემთხვევაში შეეძლებათ. კონკურსის მთავარი იდეაა საქართველოს რეგიონების გააქტიურება და ადგილობრივი ახალგაზრდების დასაქმების ხელშეწყობა, მათი თავისუფალი დროის სწორად განაწილება და სამუშაო გამოცდილების მიღება. მონაწილეობის უფლება აქვთ როგორც რეგისტრირებულ არასამთავრობო ორგანიზაციებს, ისე საინიციატივო ჯგუფებსა და ფიზიკურ პირებს. იმ შემთხვევაში, თუ წარმოდგენილ საპროექტო წინადადებას მოიწონებს სამინისტროს სათათბირო, საინიციატივო ჯგუფს თუ ფიზიკურ პირს მიეცემა რეკომენდაცია, რომ ოფიციალურად დააფუძნოს ახალგაზრდული ორგანიზაცია; ასევე, პირველი და მეორე საგრანტო კონკურსებისგან განსხვავებით, მონაწილეებს საშუალება მიეცემათ ისარგებლონ საპროექტო აპლიკაციის გამარტივებული ფორმით, რომელიც შესაძლებელია ჩამოიტვირთოს ფონდის ვებ-გვერდიდან; სამინისტროს სახელით გაეგზავნა მიმართვები საქართველოს ყველა რეგიონში არსებულ მუნიციპალიტეტებს. ვიმედოვნებთ, რომ მათი დახმარებით შესაძლებელი გახდება პროექტების ადგილობრივად მიღება. ამრიგად, დაინტერესებული პირები თავისსავე ქალაქში შეძლებენ პროექტების წარმოდგენას; არსებობს მეორე შესაძლებლობაც: სურვილის შემთხვევაში პროექტები მიიღება ელექტრონულადაც, ფონდის ელექტორნული ფოსტის მეშვეობით. სპეციალურად მესამე საგრანტო კონკურსისთვის, ფონდის წარმომადგენლები 3 კვირის განმავლობაში მოაწყობენ შეხვედრებს ადგილობრივ მუნიციპალიტეტებში. ეს იქნება უპრენცენდენტო რეგიონალური კამპანია. ნებისმიერ დაინტერესებულ ადამიანს შესაძლებლობა მიეცემა უშუალოდ შეხვდეს წარმომადგენლებს და დეტალური ინფორმაცია მიიღოს მისთვის საინტერესო საკითხებზე. ინფორმაცია შეხვედრების განრიგების შესახებ ეტაპობრივად განთავსდება სამინისტროსა და ფონდის ვებ-გვერდებზე.   პროექტები მიიღება 5 აგვისტოდან 30 აგვისტოს ჩათვლით  წყარო: საქართველოს სპორტისა და ახალგაზრდობის საქმეთა სამინისტრო

სამეგრელო. 2–3 აგვისტოს, ანაკლიაში ჩატარდა სამოქალაქო საზოგადოების რეგიონული ქსელის სტრატეგიული დაგეგმვის სამუშაო შეხვედრა. შეხვედრას დაესწრო, როგორც ქსელის წევრი ორგანიზაციების წარმომადგენლები ასევე დონორები. სამუშაო შეხვედრაზე განიხილეს მომავალი საუშაო სტრატეგია. „სამოქალაო საზოგადოების რეგიონული ქსელის" (R-CSN) ფასილიტატორია არასამთავრობო ორგანიზაცია „სიდა". პროექტი მხარდაჭერილია „საჯარო პოლიტიკის, ადვოკატირებისა და სამოქალაქო საზოგადოების განვითარების პროგრამის" (G-PAC) მიერ აშშ საერთაშორისო განვითარების სააგენტოს (USAID) დაფინანსებით. წყარო: სიდას გვერდი სოციალურ ქსელში

შიდა ქართლი.2 აგვისტოს ასოციაცია გორის ინვალიდთა კლუბთან არსებულმა გორის ახალგაზრდულმა ცენტრმა, ნატოსა და ევროკავშირის შესახებ საინფორმაციო ცენტრის წარმომადგენლებს უმასპინძლა. საინფორმაციო ცენტრის დირექტორის მოადგილემ გიორგი კეპულაძემ ბავშვებს ნატოსა და ევროკავშირის ისტორიის და საქართველოს ევროატლანტიკურ სივრცეში ინტეგრაციის შესახებ ესაუბრა. ასევე ისაუბრეს ნატოს როლსა და მისიაზე, საქართველოს შანსებზე ევროკავშირში შესვლაზე და ევროკავშირის სიკეთეზე. ლექციის შემდეგ ცენტრის წარმომადგენლებმა ახალგაზრდების კითხვებს უპასუხეს და ნატოსა და ევროკავშირის შესახებ გამოცემული ლიტერატურა გადასცეს. შეხვედრა გაიმართა პროექტის – „ეროვნული ინტეგრაციის გაძლიერება საქრთველოში" – ფარგლებში, რომელიც ხორციელდება საქართველოს გაეროს ასოციაციის მიერ, აშშ-ს საერთაშორისო განვითარების სააგენტოს (USAID) მხარდაჭერით. გორში პროექტის პარტნიორი ორგანიზაციაა „გორის ინვალიდთა კლუბი". წყარო: გორის ახალგაზრდული ცენტრის გვერდი სოციალურ ქსელში

სამცხე–ჯავახეთი. მოსახლეობისათვის უფასო იურიდიული კონსულტაციის შეთავაზების მიზნით, დემოკრატ მესხთა კავშირის იურისტებმა, შეხვედრები გამართეს ახალციხის მუნიციპალიტეტის სოფელი გიორგიწმინდის მოსახლეობასთან. შეხვედრა ჩატარდა პროექტ ,,უფასო იურიდიული დახმარება სამცხე-ჯავახეთის მცხოვრებლებს" ფარგლებში, რომელიც დაფინანსებულია ევრაზიის თანამშრომლობის ფონდის მიერ. პროექტის ფარგლებში ახალციხის, ახალქალაქისა და ნინოწმინდის მუნიციპალიტეტებში მოქმედებს სამი სამართლებრივი დახმარების ცენტრი, რომელიც სამცხე-ჯავახეთის მოსახლეობას სთავაზობს: უფასო სამართლებრივ კონსულტაციებს; წერილების და განცხადებების მომზადებას სხვადასხვა სამსახურებში წარსადგენად; ნებისმიერი სახის სარჩელის მომზადებას; სამოქალაქო და ადმინისტრაციულ საქმეებზე სერთიფიცირებული იურისტის, უფასო, წარმომადგენლობას სასამართლოში, კერძო და საჯარო სამსახურებში; სატელეფონო კონსულტაციებს ON-LINE კონსულტაციას დემოკრატ მესხთა კავშირის გვერდზე სოციალურ ქსელში (www.facebook.com/UDMGeorgia ) ვებ-გვერდის (www.udm.org.ge) მეშვეობით. წყარო: დემოკრატ მესხთა კავშირის გვერდი სოციალურ ქსელში