25 მარტს 14:30 საათზე „უფლებადამცველთა გაერთიანება" უკანონოდ გასამართლებულ პირთა რეგისტრაციის დაწყებასთან დაკავშირებით ბრიფინგს გამართავს.  მისამართი:თბილისი, კოსტავას 68, პრაიმტაიმის პრეს–კლუბი

თბილისი. საზოგადოებრივი ორგანიზაციების ვებპორტალი ელ–ბიულეტენის ხელმოწერას სთავაზობს მომხმარებელს. მათ ვისაც აინტერესებს საგრანტო კონკურსების, ვაკანსიებისა თუ სასწავლო პროგრამების შესახებ ინფორმაცია, შესაძლებლობა ეძლვათ გამოიწერონ ელექტრონული ბიულეტენი. ელ–ბიულეტენს ყოველ ხუთშაბათს მიიღებენ ელ–ფოსტით, ან ყოველდღიურ რეჟიმში გაეცნონ პორტალზე ან სოციალურ ქსელში შესაბამის გვერდზე ინფორმაციას. 

თბილისი. გაერო-ს განვითარების პროგრამამ 22 მარტს წარმოადგინა კვლევის პრეზენტაცია თემაზე „საქართველოში სოციალური და ეკონომიკური მოწყვლადობა". კვლევის მიზანი იყო ეკონომიკური და სოციალური მოწყვლადობის მასშტაბების, სტრუქტურისა და ფაქტორების ანალიზი. კვლევა ჩატარდა 4 მიზნობრივ ჯგუფში: დევნილები, შეზღუდული შესაძლებლობის მქონე პირები, მაღალმთიანი რეგიონის მოსახლეობა და ღარიბი ოჯახები. კვლევამ აჩვენა, რომ საქართველოს მოსახლეობის 70% მოწყვლადია ერთი ან მეტი ფაქტორის მიმართ. დევნილთა ოჯახები განსაკუთრებით მოწყვლადები არიან და ამის ყველაზე დიდი ალბათობა არის კოლექტიურ ჩასახლებებში. მრავალმხრივი მოწყვლადობის მაჩვენებელი ყველაზე მაღალი ასევე დევნილებშია (30%). მიწა არ აქვს დევნილთა 85%-ს, ხოლო საცხოვრებელ სახლს არ ფლობს დევნილთა 64%.  შეხვედრას ესწრებოდნენ საერთაშორისო და ადგილობრივ არასამთავრობო ორგანიზაციები და ხელისუფლების წარმომადგენლები. წყარო: ცენტრ „აფხაზეთის" გვერდი სოციალურ ქსელში

თბილისი. 20 მარტს „შერატონ მეტეხი პალასში" ევრაზიის თანამშრომლობის ფონდმა (EPF) გამართა ღონისძიება „სოციალური მეწარმეობის კონფერენცია და გამოფენა".  ღონისძიებას ესწრებოდნენ არასამთავრობო და საერთაშორისო ორგანიზაციების, შესაბამისი სამინისტროებისა და ადგილობრივი ხელისუფლების წარმომადგენლები. გამოფენაში მონაწილეობა მიიღო 13-მა სოციალურმა საწარმომ, თითოეული საწარმოსთვის გამოყოფილი იყო ცალკე კუთხე, რომელზეც განთავსდა მათი პროდუქცია. გამოფენასთან ერთად გაიმართა აუქციონიც. კონფერენციაზე განხილულ იქნა სოციალური საწარმოებისთვის ძირითადი პრობლემური საკითხები, როგორიც არის მაგალითად საკანონმდებლო ბაზის არ არსებობა, სოციალური საწარმოებისთვის სესხის აღების სირთულე და ა.შ. ღონისძიება შვედეთის საერთაშორისო განვითარების და თანამშრომლობის სააგენტოს (Sida) და ადგილობრივი ინიციატივებისათვის კანადის ფონდის (Canada Fund for Local Initiative) მხარდაჭერით ჩატარდა. წყარო:სოციალური მეწარმეობის ცენტრის გვერდი სოციალურ ქსელში

აჭარა. ასოციაცია „თავისუფალ ჟურნალისტთა სახლმა" ბათუმის შოთა რუსთველის სახელმწიფო უნივერსიტეტში თვითმართველობის არჩევნების შესახებ  დისკუსია გამართა. დისკუსიაზე თვითმართველობის თავმჯდომარის მომავალმა კანდიდატებმა სამოქმედო გეგმაზე ისაუბრეს. ოთხივე კანდიდატი ბათუმის პრესკაფეში მხარდაჭერებთან ერთად შეიკრიბა.  დისკუსიის მსვლელობისას მაყურებელს საშუალება ჰქონდათ პირდაპირი ეთერის დროს დაესვათ კითხვები და ჩართულიყვნენ დისკუსიაში სკაიპის საშუალებით.  წყარო:ორგანიზაციის გვერდი სოციალურ ქსელში

იმერეთი. „ახალგაზრდების ინფორმირებულობა საკუთარი აზრის გამოხატვისა და მოქმედებისათვის" (ART) პროექტის ფარგლებში 20–21 მარტს, ქუთაისის სახალხო დამცველის ოფისში ჩატარდა 2 დღიანი ტრენინგი „მოქალაქე და ადგილობრივი თვითმმართველობა". ტრენინგის თემატიკა იყო: ხელისუფლება და მოქალაქეთა ჩართულობა გადაწყვეტილების მიღების პროცესში, ადგილობრივი თვითმმართველობის საქმიანობის მონიტორინგი, საქართველოს საბიუჯეტო სისტემა, ადგილობრივი ბიუჯეტების საბიუჯეტო ციკლი, მოქალაქეთა ჩართულობა ადგილობრივ დონეზე ბიუჯეტირების პროცესში, ადგილობრივი ბიუჯეტის მონიტორინგის ფორმები და მეთოდები. ტრენინგის მოდული შემუშავებული იყო საქართველოს ახალგაზრდა იურისტთა და ეკონომისტთა ასოციაციების მიერ და შესაბამისად მოიცავდა როგორც იურიდიულ-სამართლებრივ, ასევე ეკონომიკურ საკითხებს. ტრენინგის მიზანი იყო ახალგაზრდული საბჭოს მიერ შემუშავებული „ბიუჯეტის ადვოკატირების" პროექტის ფარგლებში საჭირო უნარ ჩვევების, ინფორმაციისა და ცოდნის მიღება, რათა მოხდეს ახალგაზრდების ჩართულობის გაზრდა ადგილობრივი ბიუჯეტის შემუშავებისა და მონიტორინგის პროცესში. წყარო:ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტმა გამოაქვეყნა სტატია: „შემცირდა თუ გაიზარდა მინისტრების შემოსავალი საქართველოში?". „საქართველოს პრემიერ მინისტრის N53 ბრძანებაზე  დაყრდნობით შეიძლება ითქვას, რომ ამიერიდან საქართველოში მინისტრის ყოველთვიური დასაბეგრი შემოსავალი  განისაზღვრა  7875 ლარით (3540 ლარი ხელფასი და 4335 ლარი დანამატი). შესაბამისად, საპრემიო თანხების გარეშე, საქართველოს მთავრობის წევრის (მინისტრის) ერთი წლის შემოსავალი შეადგენს 94 500 ლარს (ხელზე 75 600 ლარს), ხოლო 19 მინისტრზე სახელფასო ფონდი განისაზღვრება 1 795 500 ლარით.   2011 წელს მინისტრების საჯარო უფლებამოსილების განხორციელებისთვის მიღებული დასაბეგრი საშუალო შემოსავალი  (ხელფასი და პრემია) შეადგენდა 7 372 (ხელზე 5898) ლარს, რაც 503 ლარით ჩამოუვარდება 2013 წლიდან მინისტრის საშუალო ყოველთვიურ დასაბეგრ  შემოსავალს", – ნათქვამია ორგანიზაციის გვერდზე გამოქვეყნებულ სტატიაში . სრულად წყარო: idfi.ge

თბილისი. სამართლიანი არჩევნებისა და დემოკრატიის საერთაშორისო საზოგადოებამ"  2012 წლის 1 ოქტომბრის საპარლამენტო არჩევნების საბოლოო ანგარიში წარმოადგინა. ანგარიში მოიცავს წინსაარჩევნო პერიოდის, არჩევნების დღისა და არჩევნების შემდგომი პერიოდის მონიტორინგის შედეგებს. „შეგვიძლია განვაცხადოთ, რომ მიუხედავად საკმაოდ პრობლემური წინასაარჩევნო პერიოდისა, არჩევნები შედგა, რაც, უპირველეს ყოვლისა, განპირობებული იყო არჩევნების დღეს მოქალაქეთა მაღალი აქტიურობით და კენჭისყრისა და ხმის დათვლის პროცესის გამჭვრვალობით. საქართველოს მოქალაქეებმა გამოხატეს ნება, რაც შესაბამისად იქნა ასახული არჩევნების შედეგების შემაჯამებელ ოქმში", – ნათქვამია ანგარიშში. წყარო:ორგანიზაციის გვერდი სოციალურ ქსელში

თბილისი. ახალგაზრდა იურისტთა ასოციაცია „თბილავიამშენის" ყოფილ მესაკუთრეებს იურიდიულ დახმარებას უწევს. საია აცხადებს, რომ აქციონერთა განმარტებითა და საქმეში არსებულ მტკიცებულებებზე დაყრდნობით იკვეთება, რომ სხვადასხვა სახელმწიფო ორგანოთა მხრიდან მესაკუთრეთა მიმართ მთელი რიგი უკანონო ქმედებები განხორციელდა, რომელთა უმეტესობა აშკარად შეიცავს დანაშაულის ნიშნებს. „ქონების დაბრუნების მოთხოვნით ჩვენ მივმართავთ სასამართლოს. იმის გათვალისწინებით, რომ დღევანდელი ხელისუფლების პოლიტიკას და სურვილს წარმოადგენს წინა ხელისუფლების პირობებში პირთა უკანონოდ შელახული უფლებებისა და სამართლიანობის აღდგენა, რაც არაერთხელ საჯაროდაც იქნა გაცხადებული, გვაქვს იმის მოლოდინი, რომ ეკონომიკის სამინისტრო სწორ პოზიციას დაიჭერს, ხოლო სასამართლო მიიღებს კანონიერ გადაწყვეტილებას, დააკმაყოფილებს სასარჩელო მოთხოვნას და მოსარჩელეებს აღუდგენს შელახულ უფლებებს", – ნათქვამია ორგანიზაციის გვერდზე. სრულად წყარო: gyla.ge

იმერეთი. 21 მარტს ქუთაისის ახალგაზრდულმა ცენტრმა დაუნის სინდრომის საერთაშორისო დღე საინფორმაციო კამპანიით აღნიშნა. სპეციალურად ამ დღისთვის ახალგაზრდულმა ცენტრმა ვიდეო რგოლი და ბროშურები მოამზადა და ქალაქის ცენტრალურ უბნებში მსვლელობა მოეწყო. აქცია მიზნად ისახავდა დაუნის სინდრომის მქონე ადამიანებისთვის სოლიდარობის გამოცხადებას და საზოგადოების ინფორმირებას. ახალგაზრდული ცენტრის წევრებმა მოსახლეობას ბროშურები და ორგანიზაცია „პირველი ნაბიჯი - საქართველოს" მიერ გამოცემული კალენდრები დაურიგეს. ისინი ქუჩაში გამვლელებს უხსნიდნენ თუ რა არის დაუნის სინდრომი, რომ იგი დაავადება არ არის და უნდა მოხდეს დაუნის სინდრომის მატარებელი ადამიანების დაცვა და უზრუნველყოფილ იქნას მათი მონაწილეობა საზოგადოებაში მიმდინარე პროცესებში.  ღონისძიებები ორგანიზებული იქნა „საქართველოში ეროვნული ინტეგრაციის გაძლიერების" პროექტის (ANI) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) მხარდაჭერით. წყარო: ორგანიზაციის გვერდი სოციალურ ქსელში

თბილისი. ახალგაზრდა ფინანსისტთა და ბიზნესმენთა ასოციაცია – „აფბა"  აზარტული და მომგებიანი თამაშობების ორგანიზებასთან დაკავშირებულ საკანონმდებლო ცვლილებებს აკრიტიკებს. „ახალგაზრდა ფინანსისტები მხარს ვუჭერთ „სათამაშო ბიზნესის ასოციაციის" პოზიციას და მივიჩნევთ, რომ სათამაშო ბიზნესის რეკლამირების სრული აკრძალვა დაუშვებელია. სათამაშო ბიზნესის მკაცრი შეზღუდვა მის არალეგალურ ფორმაში გადასვლას გამოიწვევს, რაც არსებულ რეალობას პირიქით უფრო დაამძიმებს", – ნათქვამია ორგანიზაციის გვერდზე. აფბა პარლამენტს მოუწოდებს დღეს არსებული სახით ცვლილებები დასახელებულ კანონპროექტებში არ შეიტანონ.  წყარო:ორგანიზაციის გვერდი სოციალურ ქსელში

თბილისი. ფონდ „ღია საზოგადოება – საქართველოს" ოფისში, 20 მარტს, მერაბ მამარდაშვილისადმი მიძღვნილი სემინარების ციკლის ფარგლებში, ჟურნალისტმა ზვიად ქორიძემ მერაბ მამარდაშვილთან ინტერვიუს აუდიოჩანაწერი გააცნო ფართო საზოგადოებას. ზვიად ქორიძე 21 წლის იყო, როდესაც ფილოსოფოსთან ინტერვიუ ჩაწერა.  საათნახევრიან აუდიოჩანაწერში ფილოსოფოსი საუბრობს ისეთ საკითხებზე, რომელიც დღესაც აქტუალურია საზოგადოებისთვის. მათ ვინც ვერ შეძლო, სემინარზე დასწრება და ზვიად ქორიძის მიერ მერაბ მამარდაშვილთან ჩაწერილი ინტერვიუს მოსმენა, www.liberali.ge საშუალებას აძლევს საზოგადოებას სემინარის ჩანაწერი იხილოს. © www.liberali.ge

თბილისი. აშშ საერთაშორისო განვითარების სააგენტოს ტუბერკულოზის პრევენციის პროექტის ორგანიზებით ტუბერკულოზის მსოფლიო დღისადმი მიძღვნილი კონფერენცია გაიმართა. შეხვედრაზეს დაესწრნენ ტუბერკულოზის სფეროში მომუშავე სამთავრობო და არასამთავრობო ორგანიზაციების წარმომადგენლები. ღონისძიებაზე ტუბერკულოზის ეროვნული პროგრამის მიღწევებისა და გამოწვევების შესახებ მოხსენებით გამოვიდნენ ტუბერკულოზისა და ფილტვის დაავადებათა ეროვნული ცენტრის, დაავადებათა კონტროლისა და საზოგადოებრივი ჯანმრთელობის ეროვნული ცენტრის, საქართველოს სასჯელაღსრულების, პრობაციისა და იურიდიული დახმარების საკითხთა სამინისტროსა და აშშ ტუბერკულოზის პრევენციის პროექტის ხელმძღვანელები. წყარო:ორგანიზაციის გვერდი სოციალურ ქსელში

კახეთი. 3 დღიანი ანიმაციური ფილმების საერთაშორისო ფესტივალი - „თოფუზი ექო" დასრულდა. პროექტის მთავარ მიზანს საქართველოს ყველა რეგიონში ანიმაციური ფილმების პოპულარიზაცია და განვითარება წარმოადგენს.  ღონისძიება ანიმაციის განვითარების კომიტეტისა და თელავის მუნიციპალიტეტის გამგეობის კულტურის სამსახურის ორგანიზებით განხორციელდა. ანიმაციის განვითარების კომიტეტის ხელმზღვანელის, ზურაბ დიასამიძეს თქმით, ფესტივალის ფარგლებში მოსწავლეებმა ისწავლეს ფილმწარმოების ყველა ეტაპი:,,ღონისძიების მიზანი იყო  ის, რომ დავანახოთ ბავშვებს ანიმაციური ფილმის წარმოების პროცესი, ყველა ეტაპი დაწყებული იდეიდან დამთავრებული ბოლო მონტაჟით. ბავშვებს უყვართ ხატვა, უყვართ კომპიუტერები და ანიმაციური ფილმის გაკეთება მათთვის არის ის, რომ თქვან თავისი სათქმელი, თქვან ის პრობლემები, რომლებიც ჩვენ უფროსებს ხშირად გვესმის, მაგრამ ვერ ვხვდებით.’’

თბილისი. ახალგაზრდა იურისტთა ასოციაციამ საჯარო რეესტრის ეროვნული სააგენტოდან თანამშრომელთა გათავისუფლებასთან დაკავშირებით მორიგი განცხადება გააკეთა. „საჯარო რეესტრში განვითარებული მოვლენები კიდევ ერთხელ ადასტურებს, რომ მოქმედი კოდექსი ვერ უზრუნველყოფს დასაქმებულის უფლებებისა და ინტერესების დაცვას შრომითი ხელშეკრულების მოშლისას, ამასთან, ეს კოდექსი არ შეესაბამება საერთაშორისო აქტებით დადგენილ სტანდარტებს შრომითი უფლებების დაცვის სფეროში", ნათქვამია განცხადებაში. საია მიმართავს იუსტიციის სამინისტროს, მანამ სანამ წლების განმავლობაში სხვების მიერ ჩადენილ უამრავ დარღვევაზე სამართლიანობის აღდგენა მოხდება, სამართლიანობა უკანონოდ გათავისუფლებულ საკუთარ თანამშრომლებთან მიმართებაში აღადგინოს. სრულად  წყარო: gyla.ge

კახეთი. 21 მარტს, თელავის დემოკრატიული ჩართულობის ცენტრში, არასამთავრობო ორგანიზაციათა კოალიციამ  –„საზოგადოებრივი დარბაზმა” სამუშაო შეხვედრა გამართა. შეხვედრის მიზანს წარმოადგენდა თელავში მიმდინარე რეაბილიტაციასთან დაკავშირებული პრობლემის საჯარო განხილვა. ჯუმბერ სახეიშვილი: „რეაბილიტაციამ ჩვენი მრავალი თანამოქალაქე დააზარალა და გამოსავალი ვერ ვიპოვეთ. თელავის თვითმმართველობიდან გვიპასუხეს, რომ ეს რეაბილიტაცია მათგან დამოუკიდებლად მიმდინარეობდა. შემდეგ წერილობით მივმართეთ ცენტრალურ ხელისუფლებას, რის შედეგადაც მივიღეთ პასუხი პრემიერ მინისტრისგან, რომელიც დახმარებას გვპირდება და ვნახოთ რა იქნება".

სამცხე–ჯავახეთი. 21 მარტს, ახალციხის საზოგადოებრივ კოლეჯ ,,ოპიზარში"  ყოფილი პატიმრებისთვის ბიზნეს ტრენინგები დაიწყო. ტრენინგი „ყოფილი პატიმრების ინტეგრაციისა და რეაბილიტაციის ხელშეწყობა სამცხე-ჯავახეთის რეგიონში" პროექტის ფარგლებში მიმდინარეობს.  სამცხე-ჯავახეთის ყველა ქალქიდან ჩამოსული 24 ყოფილი პატიმარი ტრენინგების გავლის შემდეგ სპეციალურ სერთიფიკატს მიიღებს. პროექტს „ყოფილი პატიმრების ინტეგრაციისა და რეაბილიტაციის ხელშეწყობა სამცხე-ჯავახეთის რეგიონში" ასოციაცია ,,ტოლერნატი" ახორციელებს. 

იმერეთი. სამოქალაქო განათლებისა და პედაგოგთა გადამზადების პროგრამის ფარგლებში 20 მარტს ქუთაისის განათლების განვითარების და დასაქმების ცენტრის ინიციატივით კონკურსის ,,გაიცანით, ის გმირია’’ შემაჯამებელი ფინალური ეტაპი გაიმართა. კონკურსში პროგრამის იმერეთის რეგიონის პარტნიორი სკოლების  სამოქალაქო კლუბებისა და საინიციატივო ჯგუფების წევრები მონაწილეობდნენ. კონკურსის განმავლობაში მონაწილეებმა სლაიდ შოუები და ვიდეო ფილმები მათ რჩეულ სამოქალაქო გმირებზე წარადგინეს.  გამოვლინდა ხუთი გამარჯვებული, რომლებიც სპეციალური პრიზებითა და სიგელებით დაჯილდოვდნენ. სიგელები და სიმბოლური პრიზები გადაეცა ყველა მონაწილეს. წყარო: kedec.ge

თბილისი. ინფორმაციის თავისუფლების განვითარების ინსტიტუტმა სპორტისა და ახალგაზრდულ საქმეთა სამინისტროდან მიღებული საჯარო ინფორმაცია ვებ-გვერდზე განათავსა. მათ შორისაა ინფორმაცია პრემიების, სამივლინებო ხარჯების, დაფინანსებული ღონისძიებების, საჯარო ინფორმაციის გაცემის,  ავტოპარკის ხარჯების, თანამშრომლების შესახებ და სამინისტროს თანამდებობის პირთა რეზიუმეები.  სრულად  წყარო:ორგანიზაციის გვერდი სოციალურ ქსელში

კახეთი. სათემო კავშირ ,,ნუკრიანის", ბიოლოგიურ მეურნეობათა ასოციაცია ,,ელკანას", ინგლისური ორგანიზაცია ოქსფამის და სადაზღვევო კომპანია ჯი პი აი ჰოლდინგის წარმომადგენლები სტუმრობდნენ. სიღნაღელ და ახმეტელ ფერმერებს ჩაუტარდათ სემინარი თემაზე:რისკების შემცირება და ფერმის მართვის გაუმჯობესება მეცხოველეობაში. ,,ელკანას" და ოქსფამის ერთობლივი პროექტით სიღნაღელ და ახმეტელ ფერმერებს პირველად საქართველოში, სადაზღვევო კომპანიამ დაუზღვია მსხვილფეხა რქოსანი პირუტყვი. ყველა დაზღვეულ ფერმერს გადაეცა სადაზღვევო პოლისი და საკვები ბიო დანამატები დაზღვეული პირუტყვისთვის. წყარო:ორგანიზაციის გვერდი სოციალურ ქსელში

22 მარტს, 12:00 საათზე, „სამართლიანი არჩევნებისა და დემოკრატიის საერთაშორისო საზოგადოება" 2012 წლის 1 ოქტომბრის საპარლამენტო არჩევნებთან დაკავშირებული ანგარიშების პრეზენტაციას გამართავს.  მისამართი : თბილისი, სასტუმრო რედისონ ბლუ ივერია

თბილისი. 27 მარტს 18:00 საათზე „კულტურულ ურთიერთობათა ცენტრ – კავკასიურ სახლში" გაიმართება სომეხი, თურქი და აზერბაიჯანელი რეჟისორების მიერ გადაღებული ფილმის – „მოგონებები საზღვრების გარეშე" – ჩვენება. ფილმი რამდენიმე ნაწილისაგან შედგება და ეხება იდენტობის პრობლემებს. „მოგონებები საზღვრების გარეშე” გადაღებულია  CAM Film (სტამბული), Internews Media Support NGO (ერევანი), Internews Azerbaijan (ბაქო)  და Stepanakert Press Club-ის თანამშრომლობაში. ასევე გადამღები ჯგუფის პარტნიორია დიდი ბრიტანეთის არასამთავრობო ორგანიზაცია Conciliation Resources. წყარო: ორგანიზაციის გვერდი სოციალურ ქსელში