თბილისი.ინფორმაციის თავისუფლების განვითარების ინსტიტუტმა საზოგადოებრივი მაუწყებლიდან განთავისუფლებულთა რაოდენობის შესახებ ინფორმაცია გაავრცელა.  2012 წლის 20 ოქტომბრის შემდეგ პერიოდში საზოგადოებრივ მაუწყებლიდან 164 თანამშრომელი განთავისუფლდა, ხოლო კონტრაქტი გაფორმდა მხოლოდ 22 ახალ თანამშრომელთან. მიღებული თანამშრომლების უმეტესობა დაინიშნა იგივე თანამდებობაზე, საიდანაც წინა თვეებში დაითხოვეს თანამშრომლები. „სამწუხაროდ შეკითხვაზე თანამშრომელთა განთავისუფლების მიზეზების შესახებ საზოგადოებრივმა მაუწყებელმა წერილში განმარტა, რომ „შრომითი ხელშეკრულებები შეწყდა სხვადასხვა მიზეზით მოქმედი კანონმდებლობით დადგენილი წესის შესაბამისად”, თუმცა განთავისუფლების კონკრეტული მიზეზები წერილში არ არის განმარტებული", ნათქვამია ორგანიზაციის ვებგვერდზე. სრულად წყარო:ორგანიზაციის გვერდი სოციალურ ქსელში

კახეთი. 23 თებერვალს „ნუკრიანმა" გამართა პროექტის – „ჩვენ ვსწავლობთ"–პრეზენტაცია. პროექტის მიზანია სოფელ ნუკრიანის კულტურის სახლის ბაზაზე სათემო განათლების ცენტრის შექმნა და სათემო განათლების ცენტრის მეშვეობით სიღნაღის მუნიციპალიტეტში მცხოვრები ახალგაზრდებისთვის არაფორმალური კულტურულ–საგანმანათლებლო პროგრამების შეთავაზება. 4 თვიან სასწავლო პროგრამაში მონაწილეობას მიიღებს 20 ახალგაზრდა მუნიციპალიტეტის სხვადასხვა სოფლებიდან. პროექტი დაფინანსებულია ფონდი „ღია საზოგადოება საქართველოს" მიერ. წყარო:ორგანიზაციის გვერდი სოციალურ ქსელში

აჭარა.ასოციაცია „ღირსეული სიბერის" ორგანიზებით პროექტის „ხანდაზმულთა სოციალური ცენტრის" ფარგლებში სემინარი „მოხალისეობის არსი და განვითარების პერსპექტივები" გაიმართა. სემინარი ემსახურებოდა ახალგაზრდების ინფორმირულობის დონის ამაღლებას და მოხალისეობრივ საქმიანობაში მათი აქტიური მონაწილეობის ხელშეწყობას. პროექტის ფარგლებში შექმნილია მოხალისეთა ჯგუფები, რომლებიც მარტოხელა მოხუცებს საყოფაცხოვრებო და ფსიქიოლოგიურ დახმარებას უწევენ, ჩართული არიან საქველმოქმედო აქციებში.სემინარში მონაწილეობას ქობულეთის მუნიციპალიტეტის მე 2, 3, 6 საჯარო სკოლების მოსწავლეები იღებდნენ. წყარო:ორგანიზაციის გვერდი სოციალურ ქსელში

25 თებერვალს, 11:00 საათზე, საქართველოს რეგიონული განვითარებისა და ინფრასტრუქტურის სამინისტრო არასამთავრობო და საერთაშორისო ორგანიზაციებს თვითმმართველობის რეფორმის კონცეფციას განსახილველად წარუდგენს. მისამართი:  რუსთაველის გამზირი 13, სასტუმრო "თბილისი მარიოტი"

25 თებერვალს, 12:00 საათზე, "ვაჭრობისა და გადამზიდავთა" ასოციაცია საზოგადოებას გააცნობს გადაზიდვათა ბიზნეს საქმიანობაში სახელმწიფოს მხრიდან უხეში ჩარევის ფაქტებს.ი საუბრებენ კორუფციულ ფაქტებზე, ასევე, თუ როგორ აპირებს "საქართველოს ფოსტის"" შესყიდვას აზერბაიჯანული მხარე. მისამართი: თბილისი, კოსტავას 68, "პრაიმტაიმის" პრესკლუბი 

თბილისი. ინფორმაციის თავისუფლების განვითარების ინსტიტუტმა მორიგი ვიდეო რგოლი „შეცვალე კანონი" გაავრცელა. ვიდეო რგოლი განკუთვნილია მათთვის, ვისაც სურს ჩაერთოს საკანონმდებლო პროცესში და მიაღწიოს ცვლილებებს.  საქართველოს საკანონმდებლო მაცნეს ვებგვერდზე შესაძლებელია სასურველი დოკუმენტის მოძებნა, მოსაზრების დაფიქსირება კანონთან ან კანონპროექტთან დაკავშირებით, ცვლილებების ინიცირება, სხვა კომენტარების მოწონება და მხარდაჭერა. ვიდეო-რგოლის მიზანია საზოგადოებას მიაწოდოს ინფორმაცია იმის შესახებ, თუ რა ფორმით შეუძლიათ მოქალაქეებს მიიღონ მონაწილეობა კანონშემოქმედებით პროცესში. წყარო:ორგანიზაციის გვერდი სოციალურ ქსელში

თბილისი. ფონდი „ღია საზოგადოება–საქართველოს" აღმასრულებელმა დირექტორმა, ქეთი ხუციშვილმა და სასჯელაღსრულების, პრობაციისა და იურიდიული დახმარების საკითხთა მინისტრმა სოზარ სუბარმა  სასჯელაღსრულების სისტემაში ჰეპატიტი „C"-ს პრევენციის, დიაგნოსტიკისა და მკურნალობის პროგრამის შემუშავების თაობაზე ერთობლივი განცხადება გააკეთეს.  ფონდი „ღია საზოგადოება–საქართველოს" მხარდაჭერით კონკურსის საფუძველზე შეირჩევა სამი ექსპერტი, რომლებიც პროგრამის დოკუმენტზე მუშაობას მარტის ბოლოს შეუდგებიან. პროგრამული დოკუმენტი განსაზღვრავს თუ რამდენი მსჯავრდებულის მკურნალობა მოხდება წლის განმავლობაში, რა კრიტერიუმების საფუძველზე შეირჩევიან პაციენტები, რა სქემებით ჩაუტარდებათ მათ მკურნალობა და რა ფინანსური რესურსი იქნება საჭირო. ექსპერტების შექმნილ დოკუმენტს განიხილავენ საზოგადოებრივი ჯანდაცვის თემაზე მომუშავე არასამთავრობო ორგანიზაციები და ექსპერტები, რის შემდეგაც ის წარედგინება მთავრობას და დონორ ორგანიზაციებს დასაფინანსებლად. წყარო: osgf.ge

თბილისი. 22 თებერვალი წიგნის მაღაზია „ლიგამუსში" შედგა წიგნის: „ვის ეკუთვნოდა საქართველო 2003–2012 წლებში" პრეზენტაცია. წიგნი საერთაშორისო გამჭვირვალობა – საქართველოსა და ჟურნალისტ პოლ რიმპლის ერთობლივი ნამუშევარია. წიგნი „მოგვითხრობს იმ ბიზნესმენებისა და კომპანიების შესახებ, რომლებიც მნიშვნელოვან წილებს ფლობდნენ ან ამ დრომდე ფლობენ ისეთ სექტორებში, როგორიცაა: ტელემაუწყებლობა, კომუნიკაციები, სარეკლამო ბაზარი, ნავთობის იმპორტი და დისტრიბუცია, ფარმაცევტული ბაზარი და სასარგებლო წიაღისეული. წიგნში ასევე საუბარია ამ კომპანიების კავშირებზე ყოფილი ხელისუფლების წარმომადგენლებთან ან მათთან დაახლოებულ პირებთან". წიგნი – ვის ეკუთვნოდა საქართველო 2003–2012 წყარო:transparency.ge

იმერეთი. ქუთაისის განათლების განვითარების და დასაქმების ცენტრის პროექტის – „ძლიერი სამოქალაქო საზოგადოება - გზა ევროინტეგრაციისკენ" – ფარგლებში დეპუტატმა ომარ ნიშნიანიძემ ახალგაზრდებს თანამედროვე გამოწვევებზე ესაუბრა. შეხვედრა, 22 თებერვალს,  საქართველოს სახალხო დამცველის ქუთაისის ოფისში გაიმართა. სტუდენტებმა შეხვედრაზე საკუთარი მოსაზრებები დააფიქსირეს, რაც დეპუტატისთვის საინტერესო აღმოჩნდა. როგორც ომარ ნიშნიანიძემ აღნიშნა, სტუდენტების მხრიდან კრიტიკული ხედვები ქვეყნის მომავლისთვის ერთ-ერთი მნიშვნელოვანი მომენტია. შეხვედრაზე  საქართველოს საგარეო პოლიტიკა განიხილეს და ევროინტეგრაციისკენ სვლის აუცილებლობას კიდევ ერთხელ გაუსვეს ხაზი. პროექტის მიზანი „აღმოსავლეთ პარტნიორობის" მიზნების მიღწევის პროცესსა და საქართველოს ეროვნული პლატფორმის მუშაობაში, რეგიონული ორგანიზაციების ჩართულობის გაზრდა და მათი სრულფასოვანი მონაწილეობის ხელშეწყობაა. პროექტის ფინანსურ მხარდაჭერას უზრუნველყოფს ფონდი „ღია საზოგადოება - საქართველო".

იმერეთი. ქალთა საინფორმოციო ცენტრისა და  ასოციაცია „დეას" ორგანიზებით, პარლამეტის გენდერული თანასწორობის საბჭოს წევრებსა და ზუგდიდის, ფოთის ქალთა განვითარების კომიტეტის წარმომადგენლებს შორის შეხვედრა  გაიმართა. შეხვედრის ერთ-ერთი მთავარი თემა იყო ქალთა პოლიტიკური აქტივობის გაზრდის და გადაწყვეტილების მიმღებ დონეზე ქალების მეტად ჩართულობის საკითხები. ლიდერი ქალები გაეცვნენ გენდერული თანასწორობის საბჭოს მუშაობას, მოისმინეს საბჭოს სამოქმედო სრტატეგია და წამოაყენეს მათთვის აქტუალური საკითხები გენდერული თანასწორობისა და ქალთა უფლებების სფეროში.  აღნიშნული შეხვედრა გაიმართა პროექტის, „პოლიტიკური თანამონაწილეობის გაზრდა და ქალებისა და ახალგაზრდების გაძლიერება საქართველოსა და სომხეთში", ფარგლებში, რომელიც დაფინანსებულია ბრიტანეთის საელჩოს მიერ და მას ახორციელებს OXFAM GB, და ასოციაცია „დეა". წყარო:ორგანიზაციის გვერდი სოციალურ ქსელში

აჭარა. 21 თებერვალს, ბათუმის პრესკაფეში, არასამთავრობო ორგანიზაცია „პროგრესის" ორგანიზებით, საჯარო დისკუსია გაიმართა. სადაც საზოგადოებრივი ორგანიზაციების, მედიის წარმომადგენლებმა და საკრებულოს წევრებმა   განიხილეს თვითმმართველ ქალაქ ბათუმის მერის კანდიდატურის შერჩევის კრიტერიუმები. კერძოდ, უნდა იყოს თუ არა საზოგადოებისთვის ღია და გამჭვირვალე ქალაქის მერის კანდიადტურის შერჩევის პროცესი,  შეირჩეს თუ არა კონკურსის გზით, საკრებულოს მიერ მერობის კანდიდატის შერჩევისას კენჭისყრა ღია უნდა იყოს თუ ფარული?! ამ კითხვებს ახალგაზრდა იურისტის - გია ქარცივაძის მოდერატორობით შეხვედრის მონაწილეები პასუხობდნენ. 

თბილისი. „საერთაშორისო გამჭვირვალობა - საქართველო" აგრძელებს საჯარო სამსახურებში საკადრო პოლიტიკის საკითხების კვლევას და ლენტეხის მუნიციპალიტეტში მომხდარ ფაქტს ეხმიანება. ორგანიზაციის მიერ 22 თებერვალს გავრცელებულ ინფორმაციაში ნათქვამია, რომ 2013 წლის 13 თებერვალს ლენტეხის მუნიციპალიტეტის გამგებელმა ზაზა ლიპარტელიანმა, რომელიც გამგებლად ლენტეხის მუნიციპალიტეტის საკრებულომ ფრაქცია „ქართული ოცნების" წარდგინებით აირჩია, გამოსცა ბრძანება, რომლის მიხედვითაც, მუნიციპალიტეტის გამგეობის საკადრო ცვლილებების აუცილებლობასთან დაკავშირებით მიმდინარე წლის 13 თებერვლიდან სამსახურეობრივი უფლებამოსილება შეუწყდა გამგეობის ტერიტორიული ერთეულის ყველა რწმუნებულს. „მიგვაჩნია, რომ ეს ბრძანება გარკვეული მიზეზების გამო არის უკანონო და ეხმიანება საპარლამენტო არჩევნების შემდეგ საჯარო სამსახურში (განსაკუთრებით, ადგილობრივ დონეზე) მიმდინარე მანკიერი საკადრო პოლიტიკის ტენდენციას", ნათქვამია ორგანიზაციის ვებგვერდზე. სრულად წყარო:ორგანიზაციის გვერდი სოციალურ ქსელში

იმერეთი. 21 თებერვალს ქუთაისში სამოქალაქო განათლებისა და პედაგოგთა გადამზადების პროგრამის პარტნიორი სკოლის მოსწავლეებისთვის ფოტო სკოლის მორიგი შეხვედრა ჩატარდა. შეხვედრაზე მსმენელებმა მიიღეს ინფორმაცია მხატვრული ფოტოს, პორტრეტის, ახალი ამბის და ფარული გადაღების შესახებ. ფოტო სკოლის მსმენელები მონაწილეობას მიიღებენ ქუთაისის განათლების განვითარების და დასაქმების ცენტრის მიერ პროგრამის ფარგლებში გამოცხადებულ ფოტო –კონკურსში. წყარო: ორგანიზაციის გვერდი სოციალურ ქსელში

თბილისი.  საქართველოს სოციალურ მუშაკთა ასოციაცია იწვევს მოხალისეებს ,რომლებსაც შეუძლიათ დაეხმარნონ ბავშვებს სწავლაში. შემდეგი მიმართულებებით: ქართული ენა, მათემატიკა (IV კლასის პროგრამა), ინგლისური (VI-VIII კლასის პროგრამა), ქიმია-ფიზიკა (VI-VIII კლასის პროგრამა). ასევე, რუსულის ენის მცოდნე მოხალისე, რომელიც დახმარება V კლასელ ბავშვს ქართული სასკოლო პროგრამის დაძლევაში. მოხალისეობრივი საქმიანობა განხორციელდება გლდანი-ნაძალადევის რაიონში და იგი მოიცავს მიმდინარე სემესტრს. წყარო:ორგანიზაციის გვერდი სოციალურ ქსელში

კახეთი. ორგანიზაცია „ლელი" სამოქალაქო ინსტიტუციონალიზმის განვითარების ფონდის ხელშეწყობით ახორციელებს პროექტს „პიროვნული განვითარება ახალგაზრდებისთვის".   პროექტის მიზანია საქართველოში მცხოვრები ქართველი, ოსი და აზერბაიჯანელი ახალგაზრდების პიროვნული განვითარება, დამეგობრება და ჩართვა-ინტეგრაცია საზოგადოებრივ ცხოვრებაში. პროექტის ფარგლებში ახალგაზრდებისთვის ჩატარდება ტრენინგები და კომპიუტერის  ტექნიკური უნარ-ჩვევის შემსწავლელი  სასწავლო კურსები. პროექტში ჩაერთვება  ლაგოდეხის მუნიციპალიტეტში მცხოვრები ორმოცდაათი  ქართველი, ოსი და აზერბაიჯანელი ახალგაზრდა. წყარო:leliblog.weebly.com 

23 თებერვალს, 13:00 საათზე ორგანიზაცია „რადარამი" გამართავს ჩიპ და დენ ჰითების წიგნის „გარდატეხა: როგორ გავატაროთ ცვლილება, როცა ეს ასე რთულია" პრეზენტაციას. მისამართი: ზუგდიდი, დრამატული თეატრის შენობა

თბილისი. საქართველოს სტრატეგიული კვლევებისა და განვითარების ცენტრმა სოციალური მეწარმოების სახელმძღვანელო გამოსცა. წიგნში მოცემულია ინფორმაცია სოციალური მეწარმეობობის, სოციალური საწარმოს ბიზნეს გეგმის, მიზნებისა და ამოცანების შესახებ. პუბლიკაცია განკუთვნილია სოცალური მეწარმეობით დაინტერესებულ მკითხველთა წრისთვის და საზოგადოებრივი ორგანიზაციებისთვის. წიგნი გამოიცა ფონდი „ღია საზოგადოება საქართველოს" ფინანსური მხარდაჭერით.  წიგნი  წყარო: cse.ge

თბილისი. საბჭოთა წარსულის კვლევის ლაბორატორიამ დოკუმენტური ფილმი „ცოცხლად მოყოლილი ამბები - მეხსიერება რეპრესირებული ქალების შესახებ" გამოაქვეყნა. ფილმის მთავარი გმირები ქალები და მათი ოჯახები არიან, რომლებიც თავად გახდნენ საქართველოში განხორციელებული მასობრივი რეპრესიების მსხვერპლნი. ისტორიებს ყვებიან ადამიანები, რომლებმაც თავად გადაიტანეს რეპრესიები და მათი შთამომავლები, რომლებმაც ეს ამბები გადმოცემით იციან. ფილმი შეიქმნა პროექტის – „დაკარგული ისტორია - მეხსიერება რეპრესირებული ქალების შესახებ" – ფარგლებში, გერმანიის სახალხო უნივერსიტეტთა ასოციაციის საერთაშორისო თანამშრომლობის ინსტიტუტის ფინანსური მხარდაჭერით. ფილმი   წყარო:ორგანიზაციის გვერდი სოციალურ ქსელში

კახეთი. თელავის მედია კაფეში დასაქმების შესახებ ორდღიანი სემინარი მიმდინარეობს. სემინარებს თელავის ახალგაზრდული ქრისტიანული ასოციაცია და ფისქორფის ამერიკელი მოხალისეები ატარებენ.  კარლ სქენსონი, ამერიკელი მოხალისე: ,,შეხვედრაზე მოვიწვიეთ დაუსაქმებელი ადამიანები, მათ შორის თელავში მცხოვრები დევნილები. ვცდილობთ, შევასწავლოთ რამდენიმე მეთოდი თუ როგორ მოიძიონ სამსახური. ეს არის ტრენინგის პირველი ეტაპი. მსგავსი საინფორმაციო შეხვედრები დაგეგმილი გვაქვს კახეთის დანარჩენ მუნიციპალიტეტებშიც". შეხვედრას 20 ადამიანი ესწრებოდა. მონაწილეთა თქმით, მსგავსი სახის საინფორმაციო შეხვედრები მნიშვნელოვანია, რომელიც მათ სამსახურის ძიებისას გამოადგებათ.

თბილისი. „თავისუფლების კლუბმა" 19 თებერვალს, გამოცდების ეროვნული ცენტრის ხელმძღვანელ მაია მიმინოშვილთან შეხვედრა გამართა. შეხვედრის თემა იყო „განათლების სისტემის რეფორმა, მისი ეფექტიანობა დღეს და სამომავლო პერსპექტივები". კითხვა–პასუხის რეჟიმში იქნა განხილული განათლების ძველი და ახალი სისტემები, საშუალო და უმაღლეს განათლებაში არსებული პრობლემები, მასწავლებელთა სასერთიფიკაციო გამოცები. მაია მიმინოშვილმა იმ 14 პრიორიტეტულ ფაკულტეტზე ისაუბრა, რომლებზეც სწავლა უფასო გახდა. მისი თქმით მსგავსი ნაბიჯის გადადგმის ერთ–ერთი მიზეზი უმაღლესი სასწავლებლების საბაზისო დაფინანსების გაუმჯობესებისთვის ხელის შეწყობა იყო. წყარო: clubofliberty.org

შიდა ქართლი. 20 თებერვალს, გორის დემოკრატიული ჩართულობის ცენტრში მუნიციპალური სერვისების მიმწოდებელთა ასოციაციამ ჩაატარა  მომსახურების გაუმჯობესების გეგმის (SIP) საჯარო მოსმენა. რომელიც მუნიციპალიტეტის ადგილობრივი თვითმმართველობის მუშაობის გამჭვირვალობისა  და თვითმმართველობის საქმიანობაში მოსახლეობის ჩართულობის გაზრდას ისახავს  მიზნად.   შეხვედრზე საუბარი შეეხო გორში ნარჩენების გატანისა და გადამუშავების პერსპექტივას. როგორც გამომსვლელებმა აღნიშნეს, გორის მოსახლეობის რაოდენობიდან გამომდინარე, ნარჩენების გადამამუშავებელი წარმოების შექმნა რენტაბელური იქნება და მისი ღირებულება შეადგენს 16 მილიონ დოლარს. მათ მიერ წარმოდგენილ იქნა შესაბამისი გაანგარიშება და მონახაზი. გაიმართა დისკუსია წარმოდგენილი გეგმის გარშემო. გორის ნარჩენების გატანის გეგმა შემუშავდა აშშ–ს საერთაშორისო განვითარების სააგენტოს (USAID მიერ დაფინანსებული პროგრამის – „დემოკრატიული მმართველობა საქართველოში" (G3) – ადგილობრივი თვითმმართველობის კომპონენტის ფარგლებში.  შეხვედრას ესწრებოდნენ გორის არასამთავრობო ორგანიზაციების, მასმედიის და ადგილობრივი თვითმმართველობის  წარმომადგენლები.

თბილისი. საქართველოს ჟურნალისტური ეთიკის ქარტიის საბჭომ გაზეთ „ვერსიაში" გამოქვეყნებული სტატიის შესახებ  მოსაზრება გაავრცელა. საბჭო თვლის, რომ 2013 წლის 15 თებერვლის ნომერში გამოქვეყნებული სტატიით, რომელშიც ერთ–ერთ სკოლაში მოსწავლეზე ძალადობის ფაქტებია მოყვანილი, გაზეთმა ჟურნალისტური  ეთიკური სტანდარტები დაარღვია. „სტატიაში ჟურნალისტმა პატივი არ სცა და სიფრთხილით არ მოეკიდა სხვისი პირის პირად ცხოვრებას, მითუმეტეს როცა ხელყოფის სუბიექტი არასრულწლოვანი იყო, საბჭო მიიჩნევს, რომ სტატიაში მითითებული ფაქტების გათვალისწინებით, არასრულწლოვნების იდენტიფიცირება გამოუსწორებელ ზიანს მიაყენებს მათ და წარმოადგენს  პირადი ცხოვრების ხელშეუხებლობის პრინციპის დარღვევას", - აღნიშნულია საბჭოს მოსაზრებაში. სრულად წყარო:ორგანიზაციის გვერდი სოციალურ ქსელში