თბილისი. 12 ოქტომბერს გაიმართა საქართველოს მცირე და საშუალო საწარმოთა ასოციაციის კონგრესი. დღის წესრიგის შესაბამისად დამტკიცდა ახალი წესდება, რომლის შემდგომაც აირჩა ორგანიზაციის ახალი პრეზიდენტი და სამეთვალყურეო საბჭოს შემადგენლობა. საქართველოს მცირე და საშუალო საწარმოთა ასოციაციის  პრეზიდენტად არჩეულ იქნა ასოციაციის  ვიცე პრეზიდენტი კახა კოხრეიძე.  ასოციაციის პრეზიდენტი გიორგი ისაკაძე არჩეულ იქნა სამეთვალყურეო საბჭოს წევრად. სამეთვალყურეო საბჭოს შემადგენლობაში რჩებიან – კახა კოხრეიძე, კონსტანტინე ზალდასტანიშვილი (ევროკავშირი–საქართველოს ბიზნეს საბჭოს გენერალური მდივანი), არჩეულ არიან – მაია ერისთავი (საერთაშორისო სავაჭრო პალატის დირექტორი), ნინო ფანჯიკიძე (საქართველოს ბიზნეს ასოციაციის აღმასრულებელი დირექტორის მოადგილე),  ასოციაციის წევრი კომპანიების ხელმძღვანელები: გიორგი ზვიადაძე (კომპანია „გლობალსელი’), შოთა მალაღურაძე („ტრანსკავკასია"), დავით ქურხული (კომპანია „ექსპრეს ლაინ სერვისი"), მიხეილ ჭელიძე (აუდიტორული კომპანია „ფინანსური ოფისის აუდიტორი). სამეთვალყურეო საბჭოს შემადგენლობა განისაზღვრა ცხრა წევრით.

თბილისი. ციხის საერთაშორისო რეფორმის მანდატის ფარგლებში საზოგადოებრივი ორგანიზაციები ახორციელებდნენ მონიტორინგს სასჯელაღსრულების დაწესებულებებში მიმდინარე საარჩევნო პროცესზე. მონიტორინგი განხორციელდა სასჯელაღსრულების დაწესებულებებში გახსნილ 12 საარჩევნო უბანზე. დამკვირვებლად მონაწილობდნენ შემდეგი ორგანიზაციები – „კონსტიტუციის 42-ე მუხლი", ასოციაცია „ქალი და ბიზნესი", „ადამიანის უფლებათა პრიორიტეტი", „დემოკრატიის ისტიტუტი", ასოციაცია „თანაზიარი". ორგანიზაცია ,,ციხის საერთაშორისო რეფორმა" გეგმავს წარუდგინოს რეკომენდაციები ცენტრალურ საარჩევნო კომისიას და სასჯელაღსრულების, პრობაციისა და იურიდიული დახმარების საკითხთა სამინისტროს არჩევნების მიმდინარეობისას დაფიქსირებული ხარვეზების აღმოფხვრის მიზნით შემდგომი არჩევნების კანონმდებლობასთან მეტი შესაბამისობის უზრუნველსაყოფად. სრულად წყარო: article42.ge

თბილისი. 25 სექტემბრიდან 3 ოქტომბრის ჩათვლის სიქა-ს პარტნიორობით ჰოლანდიურმა ორგანიზაციამ თბილისში პროგრამა „Youth in Action" ფარგლებში ორგანიზება გაუკეთა ტრენინგკურსს თემაზე: „ევროპული იდენტობა და დემოკრატია".  პროექტში მონაწილეობდნენ 4 ქვეყნის 35 ახალგაზრდა, მათ შორის 8 ქართველი. პროექტის მონაწილეების საერთაშორისო დამკვირვებლების სტატუსით აკვირდებოდნენ არჩევნების პროცესს თბილისის სხვადასხვა უბნებში. სრულად  წყარო: ორგანიზაციის გვერდი სოციალურ ქსელში

13 ოქტომბერს, 18:00 საათზე ჰაინრიჰ ბიოლის ფონდი და ბრიტანული ორგანიზაცია „შერიგების რესურსები" აწყობს პრეზენტაციას „დიალოგი ფილმით: სახელმძღვანელო". ასევე ფილმის ჩვენებას „მოგონებები საზღვრების გარეშე". პრეზენტაციის შემდეგ გაიმართება დისკუსია მისამართი: თბილისი, ზოვრეთის ქუჩა #38, ჰაინრიხ ბიოლის ფონდი

თბილისი. სამოქალაქო საზოგადოების წარმომადგენლები და სხვადასხვა ორგანიზაციები საქართველოს სახალხო დამცველად პარლამენტს სთავაზობენ უფლებადამცველისა და იურისტის, ლია მუხაშავრიას კანდიდატურას. სრულად წყარო: ginsc.net

აჭარა. 11 ოტომბერს, დემმოკრატიული ჩართულობის ცენტრში, ახალგაზრდულმა ორგანიზაციამ – „Art Way”, წარმოადგინა პროექტი – „რე–ანიმაცია". აღნიშნული პროექტი მიზნად ისახავს უსინათლო და დამოუკიდენლად გადაადგილებისათვის საჭირო ინფრასტრუქტურით ქალაქის უზრუნველყოფის თაობაზე რიგი რეკომენდაციების შემუშავებას, ცენტრალური და ადგილობრივი ხელისუფლებისთვის. ასევე, უსინათლოთა საზოგადოებაში ინტეგრაციის ხარისხის ამაღლების ხელშეწყობას. პროექტის ხანგრძლივობაა 6 თვე, ამ დროის განმავლობაში ქალაქის მასშტაბის მოეწყობა და გაიმართება სხვადასხვა საღამოები და აქციები. პროექტი ხორციელდება აღმოსავლეთ დასავლეთის მართის ინსტიტუტის (EWMI) ფინანსური მხარდაჭერით.

  მცხეთა–მთიანეთი. დუშეთის განვითარების ფონდი ახორციელებს „სოციალური განვითარების ცენტრის" პროექტს. მისი მიზანია ხელი შეუწყოს მოსახლეობის პიროვნული ზრდასა და განვითარებას, ასევე მათ თეორიულ და პრაქტიკულ მომზადებას ცხოვრების პირობების გასაუმჯობესებლად. პროექტის ფარგლებში დაფუძნდა ტრენინგ ცენტრი. პირველ ეტაპზე შეირჩნენ და ტრენერებად გადამზადდნენ ბენეფიციარები. მეორე ეტაპზე გადამზადდა 200 ბენეფიციარი. სრულად  

12 ოქტომბერს, 14:00 საათზე  საქართველოს მცირე და საშუალო საწარმოთა ასოციაცია კონგრესს გამართავს.  დღის წესრიგით  სხვადასხვა საკითხებთან ერთად გათვალისწინებულია პრეზიდენტისა და სამეთვალყურეო საბჭოს ახალი შემადგენლობის არჩევა. ასევე, ახალი წესდების დამტკიცება.  

სამცხე–ჯავახეთი. 11 ოქტომბერს, ორგანიზაციამ „საერთაშორისო განათლების ცენტრმა” ახალციხეში  ამერიკის და ევროპის უნივერსიტეტების სასწავლო პროგრამებისა და სტიპენდიების შესახებ პრეზენტაცია გაიმართა. პირველი შეხვედრა ახალციხის სახელმწიფო უნივერსიტეტის სამეცნიერო ბიბლიოთეკის დარბაზში გაიმართა, სადაც ცენტრის წარმომადგენლებმა სტუდენტებს სხვადასხვა სასწავლო პროგრამები  და საზღვარგარეთ სწავლების ძირითადი მოთხოვნები გააცნეს. ასევე უპასუხეს სტუდენტების შეკითხვებს და მონაწილეებს საინფორმაციო ბუკლეტები დაურიგეს. „საერთაშორისო განათლების ცენტრი” ფონდ „ღია საზოგადოება – საქართველოს"  პროგრამის - საერთაშორისო განათლების საკონსულტაციო ცენტრის ბაზაზე შეიქმნა. ორგანიზაციის მიზანია სტუდენტებისა და პროფესიონალების დახმარება, რათა ისარგებლონ საერთაშორისო განათლების შესაძლებლობებით და აიმაღლონ ცოდნა. 

12 ოქტომბერს 19:00 საათზე, საზოგადოება „ბათომის" ინიციატივით, ევროპის მოედანზე  გაიმართება სამოქალაქო აქცია. აპოლიტიკური აქციის მიზანია ხელისუფლებასა და საზოგადოება შეახსენოს ევროპის მოედანზე მდებარე, კულტურული მემკვიდრეობის ძეგლის – ფოსტის შენობის ფასადის მდგომარეობა. მისამართი: ბათუმი, ევროპის მოედანი

შიდა ქართლი. 10 და  11  ოქტომბერს საზოგადოება „ბილიკში", „სამოქალაქო განათლებისა და პედაგოგთა გადამზადების პროგრამის" ფარგლებში გორის და გორის მუნიციპალიტეტის სკოლის მოსწავლეებისათვის  ჩატარდა ტრენინგი  თემაზე: „ადვოკატირება - სოციალური ცვლილებების საფუძვლები". ტრენინგის პირველი დღე თეორიულ ცოდნას დაეთმო, განიხილეს ადვოკატირების არსი და მიზნები, ეფექტური ადვოკატრების  კამპანია და მისი ეტაპები, პროცესის წარმმართველის სხვადასხვა როლი, ადვოკატირების სახეები, ადვოკატირების შედეგების მართვა და მონიტორინგი. მეორე დღეს მოეწყო ჯგუფური მუშაობა - მონაწილეებმა აირჩიეს მათთვის აქტუალური პრობლემა და იმსჯელეს მისი გადაწყვეტის გზებზე. ჯგუფური მუშაობის შემდგომ გააკეთეს პრეზენტაციები, თუ როგორ დაგეგმავდნენ არჩეული პრობლემების მოსაგვარებლად ადვოკატორების პროცესს. მონაწილეებმა გამოთქვეს სურვილი  მსგავს თემაზე ტრენინგები ჩაატარონ უშუალოდ სასკოლო კლუბებში და თანატოლთა განათლების მიზნით სხვა მოსწავლეებსაც მიაწოდონ ინფორმაცია ადვოკატირების შესახებ. ტრენინგში მონაწილეობა მიიღო სხვადასხვა სკოლის 22 მოზარდმა. უახლოეს პერიოდში იგეგმება ტრენინგის „ადვოკატირება - სოციალური ცვლილებების საფუძველი" ჩატარება ხაშურისა და კასპის მუნიციპალიტეტის საჯარო სკოლების მოსწავლეებისათვის.

სამცხე–ჯავახეთი. 11 ოქტომბერს,  ,,დემოკრატ მესხთა კავშირში" პროექტის –,,ნდობის მშენებლობა სამხრეთ კავკასიაში" – ფარგლებში ჩატარდა ტრენინგი სახელწოდებით – ,,ინფორმაციის მოპოვების ეფექტური გზები". ტრენინგს ფსიქოლოგიის მეცნიერებათა დოქტორი გულიკო ბექაური უძღვებოდა.  ,,ნდობის მშენებლობა სამხრეთ კავკასიაში"  წარმოადგენს საქართველოსა და შვედეთის გაეროს ასოციაციათა ერთობლივ პროგრამას, რომელიც ორიენტირებულია სხვადასხვა ჯგუფებს შორის ნდობის მშენებლობაზე, სამოქალაქო საზოგადოების ხელშეწყობაზე და მოიცავს დისკუსიებს, ტრენინგებს, ერთობლივ ბანაკებს ახალგაზრდა ლიდერთათვის. 

აჭარა. 10 ოქტომბერს ბათუმის ხელოვანთა სახლმა „არგანმა"  გამართა შეხვედრა  ბათუმის საერთაშორისო კინოფესტივალის  მოხალისეებთან.  შეხვედრა მიზნად ისახავდა  BIAFF  2012–ის ერთგვარ შეჯამებას. ასევე მოხალისეების მოსაზრებების გაცნობას ჩატარებული  კინოფესტივალის ხარისხის შესახებ. მოხალისეები გარდა იმისა, რომ პროექტში  იყვნენ ჩართულნი საორგანიზაციო კუთხით,  ისინი პარალელურად სწავლობდნენ BIAFF საზაფხულო კინოსკოლაში. სადაც მათ შეიძინეს კინორეჟისორისთვის აუცილებელი უნარჩვევები. პროექტი განხორციელდა ფონდი „ღია საზოგადოება – საქართველო" და აჭარის განათლების, კულტურისა და  სპორტის სამინისტროს ფინანსური მხარდაჭერით.

12 ოქტომბერს, 12:00 საათზე მედია ცენტრში გაიმართება ანგარიშის „სახელმწიფო აუდიტის მონიტორინგი" პრეზენტაცია. მისამართი: თბილისი, ქობულეთის ქუჩა #34/36, მეოთხე სართული

გურია. 10 ოქტომბერს, ოზურგეთის დემოკრატიული ჩართულობის ცენტრში გაიმართა შეხვედრა, სადაც საზოგადოების თანამონაწილეობით განიხილეს ოზურგეთის ისტორიული აბანოების არქეოლოგიური ნაშთების სამომავლო ბედი. დისკუსიაში მონაწილეობდნენ კულტურული მემკვიდრეობის დაცვის ეროვნული სააგენტოსა და ოზურგეთის ისტორიული მუზეუმის  წარმომადგენლები, აგრეთვე ისტორიკოსები, ჟურნალისტები და რიგითი მოქალაქეები.

თბილისი. 13 ოქტომბერს ჰოსპისისა და პალიატიური მზრუნველობის საერთაშორის დღესთან დაკავშირებით ფონდი „ღია საზოგადოება-საქართველო" აწყობს ფოტო გამოფენას – „ცხოვრება სიცოცხლის ბოლომდე". ასევე გაიმართება დოკუმენტური ფილმის „დების" პრეზენტაცია, რომელიც ეხება ფერისცვალების დედათა მონასტერთან არსებული ჰოსპისის საქმიანობას. 13 ოქტომბერი ჰოსპისისა და პალიატიური მზრუნველობის საერთაშორის დღე საქართველოში აღინიშნება დევიზით „ცხოვრება სიცოცხლის ბოლომდე: პალიატიური მზრუნველობა ხანდაზმულთათვის". სრულად წყარო: ორგანიზაციის გვერდი სოციალურ ქსელში

იმერეთი. საქართველოს ახალგაზრდა იურისტთა ასოციაციის წარმომადგენლები სამართლის ფაკულტეტის სტუდენტებს შეხვდნენ. შეხვედრა ქუთაისის აკაკი წერეთლის სახელმწიფო უნივერსიტეტის დარბაზში შედგა, სადაც საუბარი წარიმართა იმ პროექტებზე, რომელსაც ასოციაცია ახორციელებს. საიას ქუთაისის ფილიალმა სტუდენტებს შესთავაზა რამდენიმე პროექტი, როგორიცაა თანაშემწის პროგრამა იურიდიული დახმარების ცენტრში, სემინარების პროგრამა, რომელიც სწავლების ფასიან კურსს მოიცავს და დებატ-კლუბის პროგრამა. ღია კარის დღეზე სტუდენტთა დაინტერესება დებატ-კლუბის პროგრამამ გამოიწვია. პროგრამის ფარგლებში მონაწილეებს საშუალება ექნებათ შეისწავლონ დებატების და კამათის კულტურა. ასევე პროგრამა დაეხმარება სტუდენტებს შეიძინონ იურისტისთვის საჭირო უნარ-ჩვევები. 

თბილისი. 39 ორგანიზაცია საქართველოს პარლამენტს მიმართავს რეკომენდაციით საქართველოს სახალხო დამცველის პოზიციაზე წარადგინონ და აირჩიონ, იურისტი თამარ გურჩიანი. „დარწმუნებულები ვართ, რომ თამარ გურჩიანი, როგორც სახალხო დამცველი, იქნება პროდუქტიული, რადგან ის კარგად ერკვევა სოციალურ, კულტურულ, ეკონომიკურ, სამოქალაქო და პოლიტიკურ პრობლემებში და მგრძნობიარე ყველა საზოგადოებრივი ჯგუფის მიმართ" – ნათქვამია განცხადებაში სრულად წყარო: gyla.ge

იმერეთი. ასოციაცია „ასას" ხელმძღვანელმა, დემოკრატიული ჩართულობის ცენტრში, ჟურნალისტებთან შეხვედრა გამართა. შეხვედრა იმ კვლევის შედეგების გაცნობას ეხებოდა, რომელიც 2012 წლის აგვისტო-სექტემბერში ჩატარდა. გამოკითხვის თემა - „საზოგადოებრივი აზრი ქუთაისის კომუნალური მეურნებობის შესახებ" იყო . სულ 1200 ადამიანი გამოიკითხა. გამოკითხულთა უმრავლესობა ყველაზე მეტად ელექტროენერგიითა და გაზითაა კმაყოფილი, ყველაზე დაბალი შეფასება კი წყალმომარაგებამ მიიღო. როგორც კვლევამ აჩვენა, მოსახლეობა არასათანადოდ არის ტარიფების შესახებ ინფორმირებული. როგორც ზაზა ხელაძემ განაცხადა, კვლევის შედეგები შესაბამის ორგანოებს გადაეგზავნება. 

იმერეთი. საქველმოქმედო–ჰუმანატრული ცენტრი „აფხაზეთი" აქვეყნებს ახალ პუბლიკაციას  „შემოსავლების გენერირებისა და ეკონომიკური გაძლიერების პროექტის ბენეფიციართა კატალოგი". მასში მოცემულია ინფორმაცია 2004-2012 წლების მანძილზე განხორციელებული შემოსავლების გენერირების პროექტების მოსარგებლე 32 ბენეფიციარის შესახებ.  ბენეფიციართა კატალოგი წყარო: chca.org.ge

თბილისი. კონსულტაციების და ტრენინგების ცენტრი ახორციელებს პროექტს – „დიალოგი სამოქალაქო სექტორის განვითარებისათვის", რომლის მიზანია საზოგადოებრივი ორგანიზაციების ძლიერი და სუსტი მხარეების შესახებ საჯარო დისკურსის წარმართვის ხელშეწყობა, სექტორში არსებული პრობლემების გადალახვის გზების ძიება.  პროექტის ფარგლებში ჩატარდა ოთხი თემატური დისკუსია იმ საკითხებზე, რომელიც g-pac–ის მიერ ჩატარებული კვლევის – „საზოგადოების დამოკიდებულება სამოქალაქო საზოგადოების ორგანიზაციების მიმართ" – მთავარი საკითხებია. ეს საკითხებია: სამოქალაქო საზოგადოების ორგანიზაციებისა და სახელმწიფოს ურთიერთობები, სამოქალაქო საზოგადოების ორგანიზაციებისა და დონორების, საერთაშორისო საზოგადოების ურთიერთობები და სამოქალაქო საზოგადოების ორგანიზაციების სტანრდარტები და თვითრეგულირება. ყოველი დისკუსიის შემდეგ, მასში მონაწილე საზოგადოებრივი ორგანიზაციებისგან შექმნილმა სამუშაო ჯგუფებმა (ოთხი თემატური ჯგუფი) იმუშავეს პრობლემების ანალიზსა და რეკომენდაციების შემუშავებაზე. შემუშავდა ოთხი თემატური სარეკომენდაციო დოკუმენტი. საზოგადოების დამოკიდებულება სამოქალაქო საზოგადოების ორგანიზაციების მიმართ. 2012, აპრილი–მაისი (თემატურ ჯგუფში მუშაობდნენ ევრაზიის თანამშრომლობის ფონდის, სამოქალაქო საზოგადოების ინსტიტუტის,საქართველოს ახალგაზრდა იურისტთა ასოციაციის, სამოქალაქო განვითარების სააგენტოს, სბო თემქა–ზღვის უბნის, eef–ის, მშვიდობის, დემოკრატიის და განვითარების კავკასიური ინსტიტუტის, კავკასიური სახლის, კონსულტაციებისა და ტრენინგების ცენტრის, სათემო განვითარების ცენტრის წარმომადგენლები). სამოქალაქო საზოგადოების ორგანიზაციებისა და სახელმწიფოს ურთიერთობები. 2012, მაისი–ივნისი (თემატურ ჯგუფში მუშაობდნენ მშვიდობის, დემოკრატიის და განვითარების კავკასიური ინსტიტუტის, საქართველოს ზრდასრულთა ასოციაციის, სამოქალაქო საზოგადოების ინსტიტუტის, კავკასიური სახლის, ტფილისის ჰამქარის, საქართველოს სტრატეგიული კვლევებისა და განვითარების ცენტრის, სამოქალაქო საბჭო თავდაცვისათვის, კონსულტაციებისა და ტრენინგების ცენტრის, სათემო განვითარების ცენტრის წარმომადგენლები). სამოქალაქო საზოგადოების ორგანიზაციებისა და დონორების დამოკიდებულება. 2012, ივნისი–ივლისი (თემატურ ჯგუფში მუშაობდნენ ევრაზიის თანამშრომლობის ფონდის, ფონდ „ღია საზოგადოება – საქართველოს", სამოქალაქო საზოგადოების, სბო თემქა ზღვის უბნის, გეას, მშვიდობის, დემოკრატიის და განვითარების კავკასიური ინსტიტუტის, თანხმობის, კავკასიური სახლის, კონსულტაციებისა და ტრენინგების ცენტრის, სათემო განვითარების ცენტრის წარმომადგენლები). სამოქალაქო საზოგადოების ორგანიზაციების სტანდარტები და თვითრეგულირება. 2012, ივლისი (თემატურ ჯგუფში მუშაობდნენ სამოქალაქო საზოგადოების ინსტიტუტის, ენერგოეფექტურობის ფონდის, თბილისის ჰამქარის, მშვიდობის, დემოკრატიის და განვითარების კავკასიური ინსტიტუტის, კონსულტაციებისა და ტრენინგების ცენტრის, სათემო განვითარების ცენტრის წარმომადგენლები). პროექტის ბოლოს, სამუშაო ჯგუფების მიერ შექმნილი თემატური სარეკომენდაციო დოკუმენტების საფუძველზე, შემუშავდება ერთიანი ანალიტიკური და სარეკომენდაციო ხასიათის დოკუმენტი, რომელიც განსახილველად შარედგინება ფართო საზოგადოებას. პროექტი „დიალოგი სამოქალაქო სექტორის განვითარებისათვის" ხორციელდება აღმოსავლეთ–დასავლეთის მართვის ინსტიტუტის (EWMI) პროგრამის – „საქართველოში საჯარო პოლიტიკის, ადვოკატირებისა და სამოქალაქო საზოგადოების განვითარების" (G-PAC) ფარგლებში.

თბილისი. ევრაზიის თანამშრომლობის ფონდმა, 11 ოქტომბერს გაავრცელა განცხადება გადაცემა „ევროპული არჩევანის" თაობაზე.  განცხადება წყარო: epfound.ge