თბილისი. საქართველოს ახალგაზრდა იურისტთა ასოციაციის (საია) ინფორმაციით, 10 ივნისს, პირველი ინსტანციის სასამართლომ საქმეზე გამოაცხადა გადაწყვეტილება, რომლის მიხედვითაც სასამართლომ ეკა კვესიტაძის სამსახურიდან გათავისუფლება მიიჩნია კანონიერად და სამაუწყებლო კომპანიას დააკისრა მხოლოდ ნამუშევარი პერიოდის სახელფასო ანაზღაურების გადახდა. მოსარჩელეს კი სამაუწყებლო კომპანიის სასარგებლოდ დაეკისრა 25 000 ლარის გადახდა შრომითი ხელშეკრულების პირობების დარღვევის გამო, რაც გულისხმობდა ჟურნალისტის ახლადშექმნილ სამაუწყებლო კომპანიაში („მთავარი არხი“) მუშაობის გაგრძელებას. საიას პოზიციით, ორგანიზაციისთვის სრულიად მიუღებელია სასამართლოს მიერ გადაწყვეტილების გამოცხადებისას გაჟღერებული პოზიციები. მას შემდეგ, რაც მხარეს ჩაბარდება დასაბუთებული გადაწყვეტილება, მოსარჩელე მას გაასაჩივრებს სააპელაციო წესით. სრულად...  წყარო: gyla.ge

თბილისი. ინფორმაციის თავისუფლების განვითარების ინსტიტუტის (IDFI) ინფორმაციით, 9 ივნისი, არქივების საერთაშორისო საბჭოს (ICA) მიერ დაფუძნებული - „არქივების საერთაშორისო დღეა“. IDFI წარმოგიდგენთ ორგანიზაციის მიერ თავმოყრილ საარქივო დოკუმენტებს, ე.წ. „სტალინურ სიებს“, რომლის საფუძველზეც საქართველოში 3,600-ზე მეტი ადამიანი ემსხვერპლა რეპრესიებს, მათ შორის უმეტესობა გასამართლდა „პირველი კატეგორიით“ და მიესაჯა დახვრეტა და ქონების კონფისკაცია. საარქივო დოკუმენტები მოიცავს 1937 წლის 31 მაისიდან - 1938 წლის 12 სექტემბრამდე პერიოდს და მათში ჩამოთვლილია ის პირები, რომლებიც დაექვემდებარნენ დახვრეტას ან სხვადასხვა ვადით გადასახლებას. 13-დან 11 სიას უშუალოდ სტალინი აწერს ხელს. სრულად... წყარო: historyproject.ge

სამცხე-ჯავახეთი. 31 მაისს, ახალციხეში სამოქალაქო კამპანია ეს ქვეყანა შენია-ს ფარგლებში, ახალგაზრდებთან საჯარო შეხვედრა გაიმართა. შეხვედრაზე, გიორგი მშვენიერაძე, ნინო ზაუტაშვილი და მარიამ მჭედლიშვილი, ახალგაზრდებს ესაუბრნენ სამოქალაქო საზოგადოებაზე, სამოქალაქო ღირებულებებზე და საზოგადოებრივი ორგანიზაციების საქმიანობაზე. შეხვედრაზე ასევე გამოცხადდა უკვე ტრადიციული კონკურსი „ეს ქვეყანა შენია“, რომლის მიზანია ახალგაზრდების სამოქალაქო პასუხისმგებლობის გაზრდა, აქტივიზმის ხელშეწყობა და ახალგაზრდების წახალისება ჩაერთონ ქვეყანაში სამოქალაქო საზოგადოების გაძლიერებაში. სამოქალაქო კამპანია „ეს ქვეყანა შენია“ მიმდინარეობს ევროკავშირისა და კონრად ადენაუერის ფონდის მხარდაჭერით, პროექტის „სამოქალაქო საზოგადოების ინიციატივა:  მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში. პროექტს ახორციელებს კონსორციუმი კონრად ადენაუერის ფონდის (KAS) ხელმძღვანელობით შემდეგ არასამთავრობო ორგანიზაციებთან ერთად - საქართველოს სტრატეგიული კვლევებისა და განვითარების ცენტრი (CSRDG), სამოქალაქო საზოგადოების ინსტიტუტი (CSI), კონსულტაციის და ტრენინგის ცენტრი (CTC), განათლების განვითარების და დასაქმების ცენტრი (EDEC) და ევროპული პოლიტიკის ინსტიტუტი (IEP). სრულად...  წყარო: ორგანიზაციის გვერდი სოციალურ ქსელში

სამეგრელო. საქართველოს ახალგაზრდა იურისტთა ასოციაციის (საია) ზუგდიდის ოფისი იცავდა არასრულწლოვანის ინტერესებს სისხლის სამართლის საქმეში, რომელიც ეხებოდა 16 წლის ასაკს მიუღწეველი პირის სხეულში სექსუალური ხასიათის შეღწევის ფაქტს (ორ ეპიზოდს). ორგანიზაციის ცნობით, ქუთაისის სააპელაციო სასამართლოს სისხლის სამართლის საქმეთა პალატამ, განიხილა მხარეთა საჩივრები და ცვლილება შეიტანა ზუგდიდის რაიონული სასამართლოს განაჩენში. საბოლოოდ, სააპელაციო სასამართლომ ბრალდებული დამნაშავედ ცნო საქართველოს სსკ-ის 140-ე მუხლის პირველი ნაწილით გათვალისწინებული დანაშაულის ჩადენაში და სასჯელის სახედ და ზომად განუსაზღვრა 07 წლის ვადით თავისუფლების აღკვეთა. სააპელაციო სასამართლოს გადაწყვეტილება მსჯავრდებულმა გაასაჩივრა უზენაეს სასამართლოშიც, თუმცა, საჩივარი დაუშვებლად იქნა ცნობილი და სააპელაციო სასამართლოს მიერ გამოტანილი განაჩენი დარჩა უცვლელი. სრულად... წყარო: gyla.ge

თბილისი. პარტნიორობა ადამიანის უფლებებისთვის ინფორმაციით, ორგანიზაციამ გაეროს ბავშვის უფლებათა კომიტეტში პირველი დავა მოიგო. „აღსანიშნავია, რომ ეს არის გაეროს ბავშვის უფლებათა კომიტეტის პირველი გადაწყვეტილება ბავშვის სხეულებრივ დასჯასთან დაკავშირებით, სადაც კომიტეტმა სახელმწიფოს დარღვევა დაუდგინა. კომიტეტმა დაადგინა, რომ სახელმწიფომ არ აიღო პასუხისმგებლობა იმის შესახებ, რომ ბავშვმა დაზიანებები საჯარო ბაღში ყოფნის პერიოდში მიიღო, ამიტომ სახელმწიფოს პასუხისმგებლობა მოექცა გაეროს ბავშვის უფლებათა კონვენციის მე-19 მუხლის ფარგლებში“. სრულად... წყარო: phr.ge

თბილისი. ღია საზოგადოების ფონდის ინფორმაციით, ორწლიანი პაუზის შემდეგ ბავშვთა ჰოსპისი ციცინათელების ქვეყანა/Firefly World დასახმარებლად გამართული საქველმოქმედო აუქციონზე 140 000 ამერიკული დოლარი შეგროვდა, საიდანაც ნაწილი ხარკოვის ბავშვთა ჰოსპისს გადაერიცხება. „ბავშვთა ჰოსპისის მშენებლობა 2016 წელს ღია საზოგადოების ფონდის ინიციატივით, პრეზიდენტ გიორგი მარგველაშვილის ფონდის და კომპანია ევექსის მხარდაჭერით დაიწყო, რომელსაც ასობით მოქალაქე, მაღალი სოციალური პასუხისმგებლობის მქონე კომპანია და ხელოვანები შეურთდნენ. კავკასიაში პირველი, ევროპული სტანდარტის ბავშვთა ჰოსპისის არსებობა ამ ერთიანობის შედეგია. ქრონიკული დაავადების მქონე ბავშვები პალიატიური მზრუნველობის მომსახურებას ჰოსპისში უფასოდ იღებენ. დაავადების სიმძიმის მიუხედავად, ბავშვები და მშობლები ჰოსპისში თავს დაცულად და მშვიდად გრძნობენ. დიდი მადლობა თითოეულ მხატვარს, კომპანიას, ორგანიზაციას და გულშემატკივარ მოქალაქეს, ვინც ჰოსპისის შექმნის და განვითარების გზას ჩვენთან ერთად გადის უკვე ექვსი წელია“, ამბობს ქეთი ხუციშვილი. სრულად... წყარო: ორგანიზაციის გვერდი სოციალურ ქსელში

გურია. ევროკავშირის მხარდაჭერით, 8 ივნისს, ოზურგეთში დასაქმების ფორუმი ჩატარდა. მისი მიზანი იყო ახალგაზრდებისთვის, იძულებით გადაადგილებული, სამუშაო გამოცდილების არმქონე, ხანგრძლივი პერიოდის განმავლობაში უმუშევარი პირებისა და სხვა მოწყვლადი ჯგუფების დასაქმების ხელშეწყობა. ამასთანავე, ფორუმის ამოცანა იყო იმის გააზრება, თუ რა მნიშვნელობა აქვს სექტორთა შორის თანამშრომლობას დასაქმების შესაძლებლობების გაუმჯობესებისთვის საქართველოს რეგიონებში. დასაქმების ფორუმი გაიმართა ევროკავშირის დაფინანსებით და მისი ორგანიზატორები გახლდნენ ინოვაციებისა და ცვლილებების ინსტიტუტი (ICI), პროექტი „უნარები დასაქმებისა და თანამშრომლობისთვის – პერსპექტივები საქართველოს რეგიონებისთვის/SECTORs“; განათლების განვითარების და დასაქმების ცენტრი (EDEC) პროექტი „სწავლა, წვრთნა, მიღწევა და კავშირების დამყარება დასაქმებისთვის! (ისწავლე დასაქმებისთვის!) LEARN“; საქართველოს გაეროს ასოციაცია (UNAG) პროექტი „ცოდნისა და უნარების განვითარების ქსელებისა და პლატფორმების გაძლიერება/LINKS”; დასაქმების ხელშეწყობის სახელმწიფო სააგენტო (SESA). სრულად...  წყარო: eu4georgia.eu

10 ივნისს, 11:30 საათზე, ახალგაზრდები მთელი საქართველოდან USAID-ის, იუნისეფისა და Helping Hand-ის ერთობლივი პროექტის დახურვის ღონისძიებაზე საზოგადოებრივი ჯანდაცვის კამპანიის შედეგებს წარმოადგენენ. მისამართი: თბილისი, თავისუფლების მოედანი #4, სასტუმრო „ქორთიად მერიოტი“.

თბილისი. ღირსეული შრომის პლატფორმა სოლიდარობას უცხადებს ღირსეული ანაზღაურებისთვის და შრომითი პირობებისთვის ექთნებისა და სანიტრების მიერ დაწყებულ პროფკავშირულ ბრძოლას, რომლის დაშლასაც კლინიკის ადმინისტრაციები ცდილობენ. „არსებული უმძიმესი შრომითი პირობებისა და დაბალი ანაზღაურების ფონზე, სამედიცინო დაწესებულებები ხელს უშლიან სამუშაო ადგილზე პროფესიული კავშირების საქმიანობას, დევნიან და აშინებენ იმ თანამშრომლებს, რომლებიც ახორციელებენ პროფკავშირულ საქმიანობას ან/და სურთ პროფკავშირში გაწევრიანება“. სრულად...  წყარო: socialjustice.org.ge

სამცხე-ჯავახეთი. ბორჯომში, საპროექტო განაცხადის მომზადების შესახებ სემინარები გაიმართა. ღია საზოგადოების ფონდის ინფორმაციით, სემინარების ციკლში მონაწილეობას მიიღებენ  აჭარის, გურიის, ქვემო ქართლისა და შიდა ქართლის პროფესიული სასწავლებლების წარმომადგენლები. ამ ინიციატივას ღია საზოგადოების ფონდი და საქართველოს გაეროს ასოციაცია ახორციელებენ ევროკავშირის მხარდაჭერილი პროექტის  „ცოდნისა და უნარების განვითარების ქსელებისა და პლატფორმების გაძლიერება“ ფარგლებში. სრულად... წყარო: ორგანიზაციის გვერდი სოციალურ ქსელში

იმერეთი. 8 ივნისს საქართველოს ახალგაზრდა იურისტთა ასოციაციის ქუთაისის ფილიალში, იურიდიული დახმარების ცენტრის თანაშემწე/სტაჟიორებისათვის ჩატარდა ტრენინგი თემაზე: „ნატო საქართველოს სტრატეგიული პარტნიორი და ევროკავშირთან დაახლოების ეტაპები“. სრულად... წყარო: ორგანიზაციის გვერდი სოციალურ ქსელში

თბილისი. საქართველოს სამოქალაქო საზოგადოების ორგანიზაციების ნაწილი მოუწოდებს პრეზიდენტს ვეტო დაადოს ფარული მიყურადების გაუარესებულ კანონმდებლობას. „7 ივნისს საქართველოს პარლამენტმა მხარი დაუჭირა საკანონმდებლო ცვლილებებს, რომლის თანახმად მნიშვნელოვნად უარესდება ფარული საგამოძიებო მოქმედებების დროს ადამიანის უფლებათა დაცვის უზრუნველყოფის სტანდარტი. მიღებული კანონი არ შეესაბამება ადამიანის უფლებათა დაცვის საერთაშორისო ნორმებს და ადამიანის უფლებათა დაცვის ევროპული სასამართლოს პრაქტიკას. მიღებული კანონი აზრს უკარგავს იმ დადებით ცვლილებებს, რომელიც კანონმდებლობაში 2014 წელს განხორციელდა სამოქალაქო საზოგადოებისა და ევროპის საბჭოს ექსპერტების აქტიური ჩართულობით. ყოველივე ზემოაღნიშნულიდან გამომდინარე, მოვუწოდებთ საქართველოს პრეზიდენტს გამოიყენოს კონსტიტუციით მინიჭებული უფლებამოსილება და ვეტო დაადოს შესაბამის საკანონმდებლო ცვლილებებს და მოტივირებული შენიშვნებით დაუბრუნოს ის პარლამენტს“. სრულად... წყარო: idfi.ge

სამცხე-ჯავახეთი. 8 ივნისს, ახალციხის მუნიციპალიტეტის სოფელ სვირში, „ფონდი ტასოს“ გუნდის წევრებმა, ჩაატარეს ტრენინგი თემაზე „თვითმმართველობა - არსი, სტრუქტურა და კომპეტენციები“. ტრენინგის მიზანი იყო სოფელ ბოგაში და სვირში, ახალი ქალთა თვითდახმარების ჯგუფებისთვის, თვითმმართველობის - არსის, სტრუქტურისა და კომპეტენციების შესახებ, ცნობიერების გაზრდა. პროექტი ხორციელდება გაეროს ქალთა ორგანიზაციასთან, კახეთის რეგიონალური განვითარების ფონდსა და ქეა საერთაშორისო კავკასიაში პარტნიორობით. პროექტის მხარდამჭერია შვეიცარიის განვითარების და თანამშრომლობისა (SDC) და ავსტრიის განვითარების თანამშრომლობის (ADC) სააგენტოების მიერ. სრულად... წყარო: ორგანიზაციის გვერდი სოციალურ ქსელში

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი…

თბილისი. „საერთაშორისო გამჭვირვალობა - საქართველოს“ გადაცემათა ციკლი „ვილიკლიკოთ ევროპაზე - დათო ლიკლიკაძესთან ერთად“ გრძელდება. გადაცემის თემა იყო: რატომ ვირჩევთ დასავლურ გზას, რამდენად მნიშვნელოვანია ჩვენთვის დასავლური კურსი, რა საფრთხეები მოდის რუსეთისგან, რა გამოწვევები აქვს ჩვენს ქვეყანას დღეს? გადაცემას სტუმრობდნენ: მათე ჩაფიჩაძე - „აღმოსავლეთ ევროპის ცენტრი მრავალპარტიული დემოკრატიისთვის", ქუთაისის სკოლის კოორდინატორი; ირაკლი მხეიძე - საქართველოს პროფესიული კავშირების გაერთიანების იმერეთის კოორდინატორი; სრულად... წყარო: ორგანიზაციის გვერდი სოციალურ ქსელში

თბილისი. საქართველოს ახალგაზრდა იურისტთა ასოციაციის იურიდიული დახმარების ცენტრის თანაშემწეებს სტაჟირების წარმატებით დასრულების შემდეგ სერტიფიკატები გადაეცათ. ორგანიზაციის ცნობით, სტაჟირება როგორც სამოქალაქო/ადმინისტრაციული, ისე - სისხლის სამართლის მიმართულებით სულ 22-მა მონაწილემ გაიარა. სრულად... წყარო: ორგანიზაციის გვერდი სოციალურ ქსელში

9 ივნისს, 17:00 საათზე, მედიის განვითარების ფონდი (MDF), გაეროს ბავშვთა ფონდთან პარტნიორობითა და აშშ-ის საერთაშორისო განვითარების სააგენტოს (USAID) მხარდაჭერით გამართავს ვებინარს მშობლებისთვის: „დეზინფორმაცია და კიბერუსაფრთხოება“. სრულად...

9 ივნისს, 14:00 საათზე, სახალხო დამცველი ნინო ლომჯარია ბორჯომში, საწარმოს გაფიცულ თანამშრომლებს შეხვდება.

შიდა ქართლი. „საერთაშორისო გამჭვირვალობა - საქართველოს“ ორგანიზებით, საქართველოს სხვადასხვა რეგიონში, ბესო სოლომონაშვილის ფილმის „ბოსტანი კონფლიქტის ზონაში“ ჩვენება გაიმართება. ამჯერად, ფილმის ჩვენება გაიმართა კასპის მუნიციპალიტეტის სოფელ ქვემო გომში, სადაც ფილმის გადაღებები მიმდინარეობდა. „ფილმის შემქმნელებს და აუდიტორიას აერთიანებდათ სურვილი, რომ, ჩვენ, ყველამ ერთად გადავდგათ ნაბიჯი ევროპისკენ, რომელიც მშვიდობის და უსაფრთხოების სივრცეა, რომლის ერთადერთი მტერი დღეს - ჩვენი საერთო მტერი - რუსეთია“, ნათქვამია გამჭვირვალობის ვებგვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს შეფასებას ფულის გათეთრებისა და ტერორიზმის დაფინანსების აღკვეთის ხელშეწყობის შესახებ საქართველოს კანონში შეტანილ ცვლილებებთან დაკავშირებით. ორგანიზაცია მიიჩნევს, რომ „ფულის გათეთრებისა და ტერორიზმის დაფინანსების აღკვეთის ხელშეწყობის შესახებ“ კანონში შეტანილი ცვლილებები არ არის საკმარისი ქვეყანაში ამ მიმართულებით არსებული გამოწვევების აღმოსაფხვრელად და აუცილებელია, საქართველოს მთავრობამ ამბიციური საპასუხო ნაბიჯები გადადგას. „მნიშვნელოვანია, ხელისუფლებამ ძალისხმევა არ დაიშუროს MONEYVAL-ისა და FATF-ის რეკომენდაციების, მათ შორის, ბენეფიციარ მესაკუთრეებთან მიმართებით არსებული რეკომენდაციების შესასრულებლად, რამდენადაც აღნიშნული რეკომენდაციები წარმოადგენს ძირითად ფუნდამენტს, რომლის შესრულებითაც სახელმწიფოებმა ფულის გათეთრებისა და ტერორიზმის დაფინანსებასთან ბრძოლის საერთო მიზანს შეიძლება მიაღწიონ“, ნათქვამია შეფასებაში. სრულად... წყარო: idfi.ge

თბილისი. ასოციაცია „ანიკა“ ჩაერთო ტრენინგ კურსში, რომელიც ითვალისწინებს თბილისში მოძრავი მუნიციპალური ავტობუსის მძღოლებისა და კონტროლიორების გადამზადებას შშმ პირების მომსახურებისა და მოძრაობის სტანდარტების მიმართულებით. სრულად... წყარო: ორგანიზაციის გვერდი სოციალურ ქსელში

სამეგრელო. სოციალური სამართლიანობის ცენტრი აგრძელებს პოდკასტების ციკლს „დაკარგული ხმები“. ამ პოდკასტებში ორგანიზაცია შემოგთავაზებთ იმ სოციალური ჯგუფებისა და ადამიანთა ისტორიებს, რომელთა ხმები საზოგადოებას სუსტად, ან საერთოდ არ ესმის. „დღევანდელი პოდკასტი გვინდა დავუთმოთ ფოთში, ჯავახიშვილის ქუჩაზე მცხოვრებ ლუბა ჩალაიას. ლუბა ერთ-ერთი მშობელია, რომლის შვილსაც 2021 წელს ჩატარებული კვლევის შედეგად სისხლში ტყვიის გადამეტებული შემცველობა აღმოაჩნდა“. სრულად... წყარო: socialjustice.org.ge