თბილისი. ტიხრული მინანქრის საწარმო „იკორთა“, 2023 წლის სოციალური საწარმო გახდა. სოციალური მეწარმეობის ფორუმი ყოველწლიურად იმართება, სადაც წლის სოციალური საწარმო სახელდება. „იკორთა“ წეროვნის დევნილთა დასახლებაში მდებარე სოციალური საწარმოა, რომელიც ადგილობრივი ქალების ეკონომიკურ გაძლიერებას ისახავს მიზნად. სოციალური მეწარმეობის ფორუმის ორგანიზატორია სოციალურ საწარმოთა ალიანსი, რომელიც ევროკავშირის ფინანსური მხარდაჭერით გაიმართა.  წყარო: სოციალურ საწარმოთა ალიანსი ვიდეო „იკორთას“ საქმიანობის შესახებ

სამოქალაქო საზოგადოების განცხადება: საქართველოს მოქალაქეებო, გილოცავთ ევროკომისიის დადებით რეკომენდაციას! სიმბოლურია, რომ დღეს, 8 ნოემბერს, ილია ჭავჭავაძის დაბადების დღეს, ჩვენ შევიკრიბეთ აკაკისა და ილიას ძეგლთან, რომ ვისაუბროთ მომავლის იმ გზაზე, რომელიც ილიამ დაგვისახა. ჩვენს ევროპელ მეგობრებს ყოველთვის ესმოდათ ქართველი ხალხის ხმა, ჩვენი სურვილი და მისწრაფება, ვიყოთ ევროპული ოჯახის ნაწილი. ევროკომისიამ მხედველობაში მიიღო ჩვენი ურყევი, საერთო ბრძოლა ევროპული მომავლისთვის და საქართველოსთვის ევროკავშირის წევრობის კანდიდატი ქვეყნის სტატუსის მიღების რეკომენდაცია გასცა.  ევროკომისიის პრეზიდენტმა დღეს განაცხადა, „ევროკავშირი სრულად უჭერს მხარს ქართველი ხალხის აბსოლუტური უმრავლესობის ევროპულ მისწრაფებას. ეს მისწრაფება ხელისუფლებამ მეტად უნდა გაითვალისწინოს. ხელისუფლებამ უნდა გააღრმავოს თანამშრომლობა ოპოზიციასთან და სამოქალაქო საზოგადოებასთან, და ფოკუსირდეს 12 რეკომენდაციაზე“.  საერთო ეროვნული მიზანი - გავხდეთ ევროკავშირის წევრი - ყოველგვარ პოლიტიკურ თუ სხვა განსხვავებებზე მაღლა დგას. ეს მიზანი მთელ საზოგადოებას, ყველა მოქალაქეს გვაერთიანებს. ამას ელის ევროკავშირი ჩვენგან. დღეს, ჩვენი ხმა უნდა გავაერთიანოთ ჩვენი მომავლისთვის და მივაწვდინოთ ევროკავშირის 27 სახელმწიფოს ლიდერს. დეკემბერში საქართველოსთვის კანდიდატის სტატუსის მისანიჭებლად, საბოლოო გადაწყვეტილების მიღებისას, ქართველი ხალხის ხმა გადამწყვეტი იქნება.  ჩვენ წინაშე ახალი ამოცანა დგას - დღეიდან, დეკემბერში საბოლოო გადაწყვეტილების მიღებამდე, ჩვენი, ქართველი ხალხის მტკიცე ნება და ხმა კიდევ ერთხელ გავაგონოთ ევროკავშირის წევრ სახელმწიფოებს, ჩვენს ერთგულ და ძლიერ ევროპელ მეგობრებს. სრულად... წყარო: gyla.ge

თბილისი. ეკონომიკური პოლიტიკის კვლევის ცენტრი და რადიო თავისუფლება, ლიეტუვის საელჩოს მხარდაჭერით, პოდკასტების სერიის EU ფორიას, დამამთავრებელ ეპიზოდს წარმოადგენს.  მერვე ეპიზოდში განხილულია ევროპულ პერსპექტივებთან კანდიდატის სტატუსთან დაკავშირებული საკითხები, არსებული ვითარება და პერსპექტივები. სრულად.... წყარო: ეკონომიკური პოლიტიკის კვლევის ცენტრი

კახეთი. 4-5 ნოემბერს, ყვარლის მუნიციპალიტეტში, ახალსოფლის ახალგაზრდულ ცენტრში, „უფლებები საქართველოს“ ექსპერტებმა ადგილობრივი ახალგაზრდებისათვის უნარების გაძლიერების ტრენინგი ჩაატარეს, რომელსაც მუნიციპალიტეტში მცხოვრები არადომინანტური ეთნიკური ჯგუფის წარმომადგენლებიც დაესწრნენ.  ტრენინგი ჩატარდა პროექტის - „ეთნიკური უმცირესობების ახალგაზრდათა ჩართულობის და ინკლუზიური მმართველობის ხელშეწყობა ლაგოდეხის და ყვარლის მუნიციპალიტეტებში“ - ფარგლებში, რომელსაც „უფლებები საქართველო“, „ლელიანის ზრდასრულთა განათლების ცენტრთან“ და „ახალსოფლის ახალგაზრდულ ცენტრთან“ პარტნიორობით, და „ომისა და მშვიდობის გაშუქების ინსტიტუტის“ (IWPR) მხარდაჭერით ახორციელებს. სრულად... წყარო: უფლებები საქართველო

სამოქალაქო საზოგადოების ინსტიტუტის (CSI) ონლაინ სასწავლო პროგრამაზე „ჟურნალისტიკა სოციალური ცვლილებებისთვის“ სწავლება დაიწყო. 154 მონაწილემ გამოთქვა კურსის გავლის სურვილი, ამ ეტაპზე 93 მონაწილე ჩარიცხა. კურსის მსმენელები საქართველოს სხვადასხვა რეგიონში მომუშავე საზოგადოებრივი ორგანიზაციების წარმომადგენლები, სტუდენტები, სამოქალაქო აქტივისტები და ჟურნალისტები არიან. კურსის მიზანია მონაწილეებმა განივითარონ ინფორმაციის მოძიების და გავრცელების უნარ-ჩვევები. ისწავლონ სხვადასხვა ინოვაციური პლატფორმების საშუალებით ინფორმაციის გადამოწმება, ასევე დეზინფორმაციისაგან თავის დაცვა და საზოგადოებაში არსებული სტერეოტიპების და სტიგმების შემცირება.  სწავლა დისტანციურ რეჟიმში წარიმართება და 25 დეკემბერს დასრულდება. პირველი გაცნობითი ხასიათის შეხვედრა უკვე გაიმართა 7 ნოემბერს და სასწავლო პროცესის მიმოხილვას დაეთმო. სასწავლო კურსი „ჟურნალისტიკა სოციალური ცვლილებებისთვის„ განთავსებულია სამოქალაქო საზოგადოების ინსტიტუტის (CSI) ონლაინ პლატფორმაზე – http://e-learning.ge.  აღნიშნული კურსზე სწავლება ხორციელდება ევროკავშირისა და კონრად ადენაუერის ფონდის მიერ დაფინანსებული პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ ფარგლებში.

თბილისი. სამართლიანი არჩევნები 18 ოქტომბრიდან 1 ნოემბრის ჩათვლით, ფეისბუქზე გავრცელებული ინფორმაციების მონიტორინგის შედეგებს აქვეყნებს – „დისკრედიტაციული და პროპაგანდისტული გზავნილები: 18 ოქტომბერი01 ნოემბერი“. სოციალური მედიის მონიტორინგის ფარგლებში „სამართლიანი არჩევნები” აღწერს იმ გზავნილებს, რომლებიც ეხმიანება პოლიტიკურ საკითხებს, სოციალურ ქსელში (მეტნაკლებად) ვირუსულად ცირკულირებს და მის გავრცელებაში ერთზე მეტი აქტორი, ანგარიში თუ გვერდია ჩართული.  სრულად...   წყარო: სამართლიანი არჩევნები

კავკასიის გარემოსდაცვითი არასამთავრობო ორგანიზაციათა ქსელმა (CENN) ევროკავშირის მხარდაჭერით, ქვემო ქართლსა და სამცხე-ჯავახეთში მომუშავე არასამთავრობო ორგანიზაციებისა და ადგილობრივი ხელისუფლების წარმომადგენლებისთვის ჩეხეთის რესპუბლიკაში სოციალური სერვისების სასწავლო ტურს უმასპინძლა. სასწავლო ვიზიტი განხორციელდა პროექტის „სამოქალაქო საზოგადოების გაძლიერება ინკლუზიური და მწვანე პოსტ-კოვიდ აღდგენისათვის“ ფარგლებში, რომელსაც კავკასიის გარემოსდაცვითი არასამთავრობო ორგანიზაციათა ქსელი პარტნიორ ორგანიზაციებთან ერთად ევროკავშირის ფინანსური მხარდაჭერით ახორციელებს. სასწავლო ვიზიტის ადგილობრივი პარტნიორი ჩეხეთის რესპუბლიკის კარიტასი იყო.  სრულად... წყარო: კავკასიის გარემოსდაცვითი არასამთავრობო ორგანიზაციათა ქსელი

თბილისი.გაეროს ასოციაციების მსოფლიო ფედერაციის (WFUNA) 43-ე პლენარულ ასამბლეაზე დასასწრებად, თბილისს გაეროს 36 ასოციაციის წარმომადგენელი ეწვია. ასამბლეის წამყვანი თემაა "ერთად - შედეგისათვის".  ასამბლეის ფარგლებში დელეგატებმა იმსჯელეს ფედერაციის წინაშე არსებული გამოწვევებისა და სამომავლო განვითარების გეგმის შესახებ.  გაეროს ასოციაციების მსოფლიო ორგანიზაცია (WFUNA) წარმოადგენს საერთაშორისო არასამთავრობო ორგანიზაციას, რომელშიც 100-ზე მეტ გაეროს ასოციაციას აერთიანებს მსოფლიოს მასშტაბით.  სრულად... წყარო: საქართველოს გაეროს ასოციაცია

სამცხე-ჯავახეთი.“სამართლიანმა არჩევნებმა” სოციალური მედიის მონიტორინგის გუნდთან ერთად ახალციხეში ორი სამუშაო შეხვედრა გამართა სოციალურ მედიაში გავრცელებული პროპაგანდისტული ნარატივებისა და დეზინფორმაციის შესახებ.  შეხვედრებზე ასევე განხილული იყო აღნიშნულ თემასთან დაკავშირებით არსებული უახლესი კვლევები და მიგნებები.  სრულად... წყარო: სამართლიანი არჩევნები

ბათუმი. 7 ნოემბერს 17:00 საათზე, თავისუფალ ჟურნალისტთა სახლი თემაზე „მედიის როლი მიგრაციის საკითხების გაშუქებაში“ დისკუსიას გამართავს.  დისკუსიაზე მოწვეულნი არიან ის მოქალაქეები, რომლებმაც საკუთარ თავზე გამოსცადეს მრავალწლიანი ემიგრაცია და საბოლოოდ სამშობლოში დაბრუნება გადაწყვიტეს.  სრულად...   წყარო: თავისუფალ ჟურნალისტთა სახლი

შიდა ქართლი.სოციალური სამართლიანობის ცენტრი განცხადებას ავრცელებს თამაზ გინტურის მკვლელობის საქმეზე.  „თამაზ გინტურის მკვლელობის საქმისა და საოკუპაციო ხაზთან არსებული უმძიმესი უსაფრთხოების კონტექსტის გათვალისწინებით, მიგვაჩნია, რომ არსებითია საქართველოს ხელისუფლებამ:  დაიწყოს გამოძიება თამაზ გინტურის მკვლელობის საქმეზე და უზრუნველყოს დამნაშავე პირების იდენტიფიცირება და დასჯა;  გააძლიეროს ძალისხმევა დაკავებული ლევან დოთიაშვილის დროული გათავისუფლების მიზნით;  საოკუპაციო ხაზთან მდებარე სოფლებში დაუყოვნებლივ დანერგოს ადრეული შეტყობინების სისტემა და არსებითად გააძლიეროს ამ სოფლებში საპოლიციო მუშაობა საქართველოს მოქალაქეების სიცოცხლის, უსაფრთხოებისა და ღირსების დაცვის მიზნით. გააძლიეროს საერთაშორისო დონეზე პოლიტიკური და დიპლომატიური მუშაობა საქართველოში რუსეთის ოკუპაციისა და მისგან მომდინარე მასობრივი უფლების დარღვევის ფაქტების აღიარებისა და რუსეთზე საგარეო პოლიტიკური ზეწოლის გაძლიერების მიზნით.  სამწუხაროდ, ამ მიმართულებით პოლიტიკური ძალისხმევა შემცირებული და დასუსტებული ჩანს; გამოიყენოს საერთაშორისო სამართლებრივი მექანიზმები აგვისტოს ომის შემდეგ უფლების დარღვევის უმძიმესი ფაქტებზე დავისთვის და მსხვერპლების ინტერესების დაცვისთვის.“ - ნათქვამია განცხადებაში  სრულად... წყარო: სოციალური სამართლიანობის ცენტრი

თბილისი.სახელმწიფო სერვისები თანაბრად უნდა იყოს მისაწვდომი ყველასთვის, მათ შორის შშმ პირებისთვის. სწორედ ამ მიზნით ცხრამეტი სხვადასხვა საჯარო უწყების თანამშრომელმა გაიარა სასწავლო პროგრამა „სერვისის მიწოდებისას შეზღუდული შესაძლებლობის მქონე პირებთან კომუნიკაციის სტანდარტი “ საჯარო მოხელეები, რომელთაც ყოველდღიური შეხება აქვთ მოქალაქეებთან, გაეცნენ ინკლუზიური კომუნიკაციის საფუძვლებსა და შშმ პირებისთვის სერვისების გაწევის ეთიკის ნორმებს.  ინციატივა ხორციელდება სახელმწიფო სერვისების განვითარების სააგენტოს მიერ, გაეროს განვითარების პროგრამისა და ბრიტანეთის მთავრობის ხელშეწყობით, მათი უფრო ფართო პროგრამის ფარგლებში, რომელიც საქართველოში საჯარო მმართველობის რეფორმის განხორციელების ხელშეწყობას ემსახურება.  სრულად...  წყარო: გაეროს განვითარების პროგრამა

თბილისი. კოალიცია დამოუკიდებელი და გამჭვირვალე მართლმსაჯულებისთვის განცხადებას ავრცელებს და ეხმიანება 1 ნოემბერს იუსტიციის უმაღლესი საბჭოს გადაწყვეტილებას. რომლის მიხედვითაც უარი ეთქვა ბოლნისის რაიონული სასამართლოს მოსამართლეს ნინო გიორგაძეს უვადო მოსამართლედ გადანიშვნაზე. „მიღებული გადაწყვეტილება, ნინო გიორგაძის საჯარო პოზიციონირება და სასამართლო სიატემაში არსებული უმციმესი პრობლემები აჩენს დასაბუთებულ ეჭვს იმის თაობაზე, რომ გადაწყვეტილების მიღება არ მომხდარა კანონის საფუძველზე“, ნათქვამია განცხადებაში.  სრულად...  წყარო: www.coalition.ge

კახეთი. ფერმერთა ასოციაციის ორგანიზებით, თელავის მუნიციპალიტეტის ზოგადსაგანმანათლებლო სკოლების დამამთავრებელი კლასის გოგონებისთვის ტრენინგების სერია გაიმართა. ტრენინგების თემატური სერია მთელი თვის მანძილზე კახეთის სხვადასხვა მუნიციპალიტეტში ჩატარდება ისეთ საკითხებზე როგორიც არის მიგრაცია, უმუშევრობის დაძნელა, განათლების ხელმისაწვდომობა, გენდერული ძალადობა და გამოწვევები, სამეწარმეო უნარ–ჩვევების გაძლიერება და ასე შემდეგ. სრულად ...  წყარო: ფერმერთა ასოციაცია

თბილისი.სათემო ლიდერთა ლიდერთა ფორუმის ერთი–ერთი პანელი დაეთმობა თვითმმართველობასთან თანამშრომლობის საკითხებსა და დისკუსიას. საუბარი შეეხება დადებით პრაქტიკებს, არსებულ გამოწვევებს. კერძოდ ისეთ საკითხებს, როგორიცაა მუნიციპალიტეტის მიერ სათემო ორგანიზაციების დაფინანსების მექანიზმები, სათემო ორგანიზაციისთვის მუნიციპალურ საკუთრებაში არსებული ფართის სარგებლობის უფლებით გადაცემის საკითხი და ასე შემდეგ.  სათემო ლიდერთა ფორუმს, საქართველოს სტრატეგიული კვლევებისა და განვითარების ცენტრი ყოველ წელს მართავს, წელს იგი,16-17 ნოემბერს გაიმართება.  გაეცანით ინფორმაციას სრულად და გაიგეთ ვინ გამოვლენ ამ საკითხებზე. წყარო: საქართველოს სტრატეგიული კვლევებისა და განვითარების ცენტრი

თბილისი.პლატფორმა კომენტარი ანალიტიკურ სტატიას აქვეყნებს, რომელშიც განხილულია სოციალური შემწეობის სისტემები და საქართველოში არსებული გამოწვევები. „სოციალური დაცვის სქემების მიზანი უნდა იყოს, დაეხმაროს საზოგადოების დაუცველ წევრებს, რათა მეტად გაძლიერდნენ, დაძლიონ სიღარიბე და შეძლონ, შრომის ბაზარზე ღირსეულად დასაქმდნენ. ... საქართველოში სოციალური შემწეობის სისტემას აქვს ხარვეზები და არ არის სრულყოფილი. შედეგად, ის ვერ ამცირებს სიღარიბის დონეს სოციალურად დაუცველებისათვის“, ნათქვამია პლატფორმის გვერდზე სოციალურ ქსელში.  სრულად... წყარო: პლატფორმა კომენტარი

თბილისი. საბჭოთა წარსულის კვლევის ლაბორატორია უკვე TikTok–ზე. არ გამოგრჩეთ, ესტუმრეთ და უყურეთ საინტერესო ვიდეობს: https://www.tiktok.com/@sov.lab წყარო: საბჭოთა წარსულის კვლევის ლაბორატორია.

ქვემო ქართლი. 1, 2 და 3 ნოემბერს არასამთავრობო ორგანიზაცია „სიქას“ ორგანიზებით ბოლნისის #1, მარნეულის #6 და რუსთავის #4 საჯარო სკოლებში გაიმართა სესიები "ფინანსური განათლება მოსწავლეებისთვის", რომელსაც უძღვებოდნენ საქართველოს ეკონომიკური წიგნიერების ინიციატივის (GELi) მოწვეული სპიკერები. მათ ისაუბრეს ფინანსური განათლების მნიშვნელობაზე და მოსწავლეებთან ერთად განიხილეს ისეთი მნიშვნელოვანი საკითხები, როგორებიცაა ბიუჯეტირება, დანაზოგი, დივერსიფიკაცია და ა.შ. სესიის ბოლოს მოსწავლეებს გადაეცათ სერტიფიკატები და სტიკერები. სესიები განხორციელდა „USAID-ის სამოქალაქო განათლების პროგრამისა“ და საქართველოს ბანკის თანამშრომლობით. სრულად...  წყარო: ორგანიზაცია „სიქა“

იმერეთი. 2 ნოემბერს, ქუთაისში, ინფორმაციის თავისუფლების განვითარების ინსტიტუტმა, რეგიონული ინიციატივების ცენტრის ,,ნათელი მომავლის“ პროექტის "ახალგაზრდების ინფორმირებულობა ჩართულობის გზით" ფარგლებში, საშემოდგომო სკოლის მონაწილეებისთვის ლექცია გამართა. ლექციის ფარგლებში, საუბარი შეეხო საბჭოთა ოკუპაციასა და მის შედეგებს საქართველოს მეხსიერებაში. ასევე, დამსწრე ახალგაზრდებს წარედგინათ საქართველოს პირველი დემოკრატიული რესპუბლიკის გამორჩეული პოლიტიკური მოღვაწისა და დიპლომატის, აკაკი ჩხენკელის (1874-1959) მემორიალური ალბომი. სრულად... წყარო: ინფორმაციის თავისუფლების განვითარების ინსტიტუტი

ქვემო ქართლი. 7 ნოემბერს, რუსთავში, სოციალურ კაფე–ბარში, 17:00 საათზე, „პროფესიო“ გაიმართება ორგანიზაცია „მწვანე პოლუსის“ წიგნის „ეკო რჩევების“ პრეზენტაცია. იგი საქართველოს სკოლებში გარემოსდაცვითი ცნობიერების ამაღლების ხელშეწყობის მიზნით შეიქმნა. რუსთავში პროექტის მხარდამჭერი არის „სიქა - საგანმანთლებლო ინიციატივების ქართული ასოციაცია“ და „პროფესიო - პიროვნული და პროფესიული განვითარების ცენტრი“. სრულად...  წყარო: ორგანიზაცია „სიქა“

თბილისი. სათემო ორგანიზაცია „ნუკრიანი“ და სათემო განვითარების ცენტრი რამდენიმე თვეა „ანდრონიკაანთ უბანს“ იკვლევენ.  «ანდრონიკაანთ უბანი» სოფელ ნუკრიანში მდებარეობს და ის არქიტექტურულად გამორჩეული განაშენიანების ქუჩაა: ვინ აშენებდა ამ დღემდე დიდებული იერის მქონე სახლებს? ვინ ცხოვრობდა აქ და რა ბედი ეწიათ მათ. რა აწუხებთ დღეს უბნის მაცხოვრებლებს და როგორ ცდილობენ იზრუნონ იმ მემკვიდრეობაზე, სახლებისა და მეხსიერების სახით რომ ერგოთ მამა-პაპისგან. როგორ შეგვიძლია ერთობლივად ვიზრუნოთ უბნის იერსახის შენარჩუნებაზე? სამუშაო პროცესი სწორედ ამ შეკითხვების გარშემო ტრიალებს. ე.წ. «ანდრონიკაანთ უბანში» თითოეული სახლი თავის ამბავს ჰყვება, ხოლო უბანი მთლიანობაში, სიღნაღის ისტორიის განუყოფელი ნაწილია, რომელიც შესწავლას, დაწერას და ზრუნვას საჭიროებს.  პროექტის მხარდასაჭერად 24 ნოემბერს, გაიმართება ანა მარგველაშვილის ნახატების სერიის „მარგვიკეთში“ – გამოფენა–გაყიდვა. შემოსული თანხა ე.წ. „ანდრონიკაანთ უბნის“ კვლევას მოხმარდება. არ გამოტოვოთ, გელოდებიან «მარგვიკეთში»!  24 ნოემბერს, 16 საათიდან. მისამართი: თბილისი, ოთარ ჩხეიძის 5, ე.წ. შანხაის უბანი, საბურთალოზე. სრულად...  წყარო: კონსულტაციისა და ტრენინგის ცენტრი

თბილისი.ერთწლიანი პაუზის შემდეგ, კატო მიქელაძის პრემია ბრუნდება. კონკურსი მონაწილეთა რეგისტრაციის ბოლო ვადაა 20 ნოემბერი, ხოლო დაჯილდოება 22 დეკემბერს გაიმართება. კატო მიქელაძის პრემიის დაწესების უმთავრესი მიზანია ქალი უფლებადამცველების აღიარება და დაფასება, მათი მნიშვნელოვანი საქმიანობის შესახებ საზოგადოების ცნობიერების ამაღლება, ქალთა უფლებების დამცველთათვის უსაფრთხო სამუშაო გარემოს შექმნა და ქალთა უფლებების დაცვის სფეროში ახალი სახეების წახალისება. კატო მიქელაძის საკონკურსო განაცხადი...  წყარო: ქალთა ფონდი საქართველოში