თბილისი. საერთაშორისო გამჭვირვალობა - საქართველო (TI) აქვეყნებს მასალას ახალციხის მინიციპალიტეტის ჯანდაცვის ზედამხედველობის სფეროში არსებული ვითარების შესახებ.  ორგანიზაციის ინფორმაციით, - „ახალციხის მუნიციპალიტეტის ააიპ “საზოგადოებრივი ჯანდაცვის ცენტრის” დირექტორი ნაირა ხაბულიანი რამდენიმე ანაზღაურებად საქმიანობას ითავსებს. მათ შორის ერთ-ერთი „ახალციხის კლინიკა იმედში“ ეპიდემიოლოგის პოზიციაა. იგი, როგორც ააიპ-ის ხელმძღვანელი, ეპიდზედამხედეველობას საკუთარ თავსაც უწევს. გარდა ამისა, კორონავირუსის დროს სამცხე-ჯავახეთში შექმნილ ცხელების ორივე ცენტრში ხაბულიანი ეპიდემიოლოგად ერთდროულად მუშაობდა, რასაც კანონი კრძალავდა. სამსახურს კი, რომელიც ეპიდზედამხედველობას მთელ რეგიონში ახორციელებს, ნაირა ხაბულიანის შვილი ხელმძღვანელობს - ნინო ზედგინიძე დაავადებათა კონტროლის ეროვნული ცენტრის სამცხე-ჯავახეთის განყოფილების უფროსია“.  სრულად...   წყარო: ორგანიზაციის ვებგვერდი

თბილისი. „უფლებები საქართველომ“ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს წინააღმდეგ სასამართლოში შეიტანა სარჩელი, რომელითაც ითხოვს ბათუმის ერთ-ერთ სასტუმროში, კარანტინში მოთავსებული მცირეწლოვანი ბავშვის უფლებების ხელყოფის ფაქტის დადგენას, აგრეთვე მოსარჩელისათვის მორალური ზიანის ანაზღაურებას. „უფლებები საქართველო“ მიიჩნევს, რომ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო და უფლებამოსილი პირები, არ ითვალისწინებდნენ რა ბავშვის საუკეთესო ინტერესების უპირატესი დაცვის პრინციპებს, უხეშად ხელყოფდნენ როგორც საერთაშორისო კონვენციების მოთხოვნებს, ისე ეროვნულ კანონმდებლობას. ორგანიზაციის განცხადებით, ეს ფაქტი განსაკუთრებით შემაშფოთებელია იმ ფონზე, როდესაც ქვეყანამ მიიღო ბავშვთა უფლებების კოდექსი, რითაც გადადგა ნაბიჯი ბავშვთა უფლებების სფეროში ეროვნული კანონმდებლობის საერთაშორისო აქტებთან შესაბამისობაში მოსაყვანად.  სრულად...   წყარო: ორგანიზაციის ვებგვერდი

თბილისი. საია იცავდს ოჯახში ძალადობის მსხვერპლ ქალს, რომელსაც პროკურატურა ყოფილი ქმრის მიმართ ძალადობას და ცრუ დასმენას ედავებოდა.  პროკურატურის მიერ სასამართლოში წარმოდგენილი მტკიცებულებებით, გონივრულ ეჭვს მიღმა არ დადასტურდა არცერთი დანაშაულებრივი ქმედების ჩადენის ფაქტი. შესაბამისად, თბილისის საქალაქო სასამართლომ გაიზიარა დაცვის მხარის არგუმენტები და ოჯახში ძალადობის მსხვერპლი ქალი წარდგენილ ბრალდებებში უდანაშაულოდ სცნო. საქმეზე მიღებული გამამართლებელი განაჩენი არ არის შესული კანონიერ ძალაში და პროკურატურას მისი სააპელაციო სასამართლოში გასაჩივრების უფლება აქვს.  სრულად...  წყარო: ორგანიზაციის ვებგვერდი

თბილისი. სახალხო დამცველმა ერთიანი ეროვნული გამოცდების ორგანიზების პროცესში რელიგიური საჭიროებების გათვალისწინებასთან დაკავშირებით საქართველოს განათლების, მეცნიერების, კულტურისა და სპორტის სამინისტროს წინადადებით მიმართა. სახალხო დამცველის აპარატმა საკითხი რელიგიის თავისუფლებისა და თანასწორობის უფლების ჭრილში შეისწავლა და დაადგინა რომ ერთიანი ეროვნული გამოცდების მარეგულირებელი კანონმდებლობა რეგისტრაციის პროცესში აბიტურიენტებს არ აძლევს შესაძლებლობას საკუთარი რელიგიური საჭიროებების შესახებ განაცხადონ. ასევე, არ არსებობს გამოცდების ორგანიზების პროცესში აღნიშნული მხედველობაში მიღების მექანიზმიც. სახალხო დამცველის შეფასებით, აბიტურიენტები, რომლებიც საკუთარი რელიგიური მრწამსიდან გამომდინარე იძულებულები იყვნენ უარი ეთქვათ კონკრეტულ დღეს გამოცდაში მონაწილეობაზე, არათანაბარ მდგომარეობაში იყვნენ იმ აბიტურიენტებთან მიმართებით, რომელთა რელიგიაც განსხვავებული შეხედულების არის მსგავს საკითხებზე. სრულად...  წყარო: ორგანიზაციის ვებგვერდი

თბილისი. სახალხო დამცველმა საქართველოს პარლამენტს მიმართა ზოგადი წინადადებით, მოამზადოს საკანონმდებლო ცვლილებები საჯარო დაწესებულებებში ანაზღაურებადი სტაჟირების დანერგვის და სტაჟიორებისთვის უფრო ფართო დასაქმების შესაძლებლობის მიცემის მიზნით. სახალხო დამცველი ხაზს უსვამს სტაჟირების მნიშვნელობას ახალგაზრდების პროფესიული უნარების განვითარებისთვის და მიუთითებს რომ საქართველოში არსებული სისტემა ხელს უწყობს იმ პირთა სოციალურ გარიყვას, რომელთაც, ფინანსური თვალსაზრისით არ აქვთ აუნაზღაურებელი სტაჟირების და შესაბამისად, პროფესიული განვითარების ადრეული ეტაპიდან დაწყების საშუალება. სრულად...  წყარო: ორგანიზაციის ვებგვერდი

პროექტის, ,,ახალგაზრდული მოხალისეობა COVID 19-ის საპასუხოდ საქართველოში“, ფარგლებში, საქართველოს მასშტაბით, 150 ახალგაზრდა მოხალისე მუშაობას შეუდგა... მოხალისეობრივი აქტივობები ხორციელდება ისეთი მიმართულებებით, როგორიცაა: ინტელექტუალური მხარდაჭერა; ფსიქოლოგიური კონსულტაცია; არტ-თერაპია; სწავლა-სწავლება; პროგრამირება; არაფორმალური განათლება; თემში პრობლემების გადაწყვეტასა და სათანადო ჯგუფების მხარდაჭერა, სხვა. პროექტს საზოგადოებრივი ორგანიზაცია „ჰელფინგ ჰენდი“ მიერ გაეროს ბავშვთა ფონდის (UNICEF) მხარდაჭერით, ახალგაზრდობის სააგენტოსთან პარტნიორობით ახორციელებს. სრულად...  წყარო: გვერდი სოციალურ ქსელში

თბილისი. ადამიანის უფლებების სწვალებისა და მონიტორინგის ცენტრმა (EMC) მოამზადა ვიდეომასალა - „რეფორმები სასამართლო სისტემაში“.  საქართველო-ევროკავშირის ასოცირების ფარგლებში, სახელმწიფომ აიღო სასამართლო სისტემაში რეფორმების გატარების ვალდებულება, თუმცა: რეფორმების გასატარებლად შემუშავებული 2017-2018 წლების სამოქმედო გეგმის 92 აქტივობიდან: შესრულებულია - 35, ნაწილობრივ შესრულებულია - 31, შეუსრულებელია - 26; დღემდე არ არის დამტკიცებული 2019-2020 წლების სამოქმედო გეგმა; უკანასკნელი წელიწად-ნახევრის განმავლობაში სამუშაო ჯგუფის მხოლოდ 3 შეხვედრა ჩატარდა“, - ვკითხულობთ EMC-ის ვებგვერდზე.  სრულად...   წყარო: ორგანიზაციის ვებგვერდი

რამდენად ასრულებს საქართველო ევროკავშირთან ასოცირების შეთანხმების შედეგად აღებულ ვალდებულებებს? გაეცანით პუბლიკაციებს ასოცირების შეთანხმების შესახებ, რომელიც ევროკავშირის მხარდაჭერით შეიქმნა.  სრულად...  წყარო: გვერდი სოციალურ ქსელში

12 აგვისტო ახალგაზრდობის საერთაშორისო დღეა.  ორგანიზაცია UN Women Georgia მას ახალგაზრდების ხმების, ქმედებებისა და მოძრაობების გაძლიერებით აღნიშნავს.  იხილეთ ბმული  სრულად...   წყარო: გვერდი სოციალურ ქსელში

12 აგვისტოს, 18:00 საათზე, გაიმართება ონლაინ ტრენინგი ყრუ-უსინათლო ადამიანებთან კომუნიკაცია - ლორმის ანბანი. ბმული

12 აგვისტოს, 13:00 საათზე, თბილისის საქალაქო სასამართლო საია-ს სარჩელს განიხილავს, რომელიც გერმანიაში მცხოვრები საქართველოს მოქალაქის სახელით არის წარდგენილი. სარჩელი შეეხება ქვეყანაში დაბრუნებისას, საქართველოს მოქალაქეების სავალდებულო კარანტინში მოთავსების წესის დისკრიმინაციულად ცნობას.

დღეისთვის, ევროკომისიამ (ევროკავშირის სახელით) რვა პარტნიორ ქვეყანასთან მაკროფინანსური დახმარების პროგრამებთან დაკავშირებული ურთიერთგაგების მემორანდუმები შეათანხმა. ეს შეთანხმებები კორონავირუსის პანდემიით გამოწვეული სოციალურ-ეკონომიკური შედეგების შესარბილებლად ევროკავშირის გაფართოების კანდიდატი და სამეზობლო ათი პარტნიორი ქვეყნის მხარდაჭერის მიზნით 3 მილიარდი ევროს ოდენობის მაკროფინანსური დახმარების პაკეტის შემადგენელ ნაწილს წარმოადგენს.  ურთიერთგაგების მემორანდუმები უკვე შეთანხმებულია ალბანეთთან, იორდანიასთან, კოსოვოსთან, მოლდოვასთან, მონტენეგროსთან, საქართველოსთან, უკრაინასა და ჩრდილოეთ მაკედონიასათან. ოთხ ქვეყანასთან – კოსოვო, მოლდოვა, ჩრდილოეთ მაკედონია და უკრაინა – მემორანდუმები უკვე ოფიციალურად გაფორმდა, ხოლო ბოსნია და ჰერცეგოვინასა და ტუნისთან მოლაპარაკებები ჯერ კიდევ მიმდინარეობს.  საქართველოსთვის 150 მილიონი ევროს ოდენობის მაკროფინანსური დახმარების პროგრამის პირობები პოლიტიკის სფეროში უკავშირდება სახელმწიფო ფინანსების მართვის გაძლიერებას, მმართველობის გაუმჯობესებას, სექტორულ რეფორმებს და შრომის ბაზართან დაკავშირებულ პოლიტიკას. სრულად...  წყარო: eeas.europa.eu

აჭარა. სამუშაო შეხვედრის ფარგლებში, აჭარის უმაღლესი საბჭოს ღია მმართველობის საბჭომ და საბჭოსთან არსებული საკონსულტაციო ჯგუფის წევრებმა უმაღლესი საბჭოს ღია მმართველობის 2020-2021 წლების სამოქმედო გეგმის შემუშავების მიზნით წარდგენილ ინიციატივებზე იმსჯელეს. სამუშაო შეხვედრაზე სამოქმედო გეგმის ვალდებულებებთან დაკავშირებით რეკომენდაციები და წინადადებები წარადგინეს უმაღლესი საბჭოს წევრებმა, უმაღლესი საბჭოს აპარატმა, გაეროს განვითარების პროგრამის (UNDP), ინფორმაციის თავისუფლების განვითარების ინსტიტუტის (IDFI), საერთაშორისო გამჭვირვალობა - საქართველოს (TI), მმართველობის მონიტორინგის ცენტრის აჭარის ბიუროს, დემოკრატიის ინსტიტუტის, სამოქალაქო საზოგადოების ინსტიტუტის, დემოკრატიული ჩართულობის ცენტრების ქსელის, „კოალიცია დამოუკიდებელი ცხოვრებისათვის - შშმპ მხარდაჭერის და საინფორმაციო უზრუნველყოფის ცენტრისა“ და ახალგაზრდული ორგანიზაცია „ცვლილებები თანაბარი უფლებებისათვის“ წარმომადგენლებმა. წარდგენილი ინიციატივები მიზნად ისახავს საკანონმდებლო ორგანოს საქმიანობის ღიაობისა და ანგარიშვალდებულების გაძლიერებას, სამოქალაქო ჩართულობისა და საჯარო მომსახურების გაუმჯობესებას. სრულად...  წყარო: idfi.ge

თბილისი. 2020 წლის მარტიდან ივლისამდე კოვიდ-19 ინფექციის გავრცელების პრევენციისა და ყველაზე დაუცველი მოქალაქეებისთვის პანდემიით გამოწვეული შედეგების შემსუბუქების მიზნით ღია საზოგადოების ფონდმა საქართველოში დამატებით 900 ათას აშშ დოლარამდე ოდენობის დაფინანსება გამოყო. კოვიდ-19 შედეგებთან გამკლავებისთვის გაწეულმა მხარდაჭერამ რამდენიმე მიმართულება მოიცვა, მათ შორის მოქალაქეთა შრომის უფლებების დაცვა, სოციალურ-ეკონომიკურ დახმარებები, ჯანდაცვის ინსტიტუციების და სამედიცინო პერსონალის გაძლიერება, ეთნიკური უმცირესობების, შეზღუდული შესაძლებლობების მქონე პირების და რეგიონული მოსახლეობის ინფორმირება, უფასო სამართლებრივი და ფსიქოლოგიური სერვისები მოქალაქეებისთვის, მოსწავლეების ხელშეწყობა ონლაინ სწავლების პროცესში. სრულად...  წყარო: ორგანიზაციის ვებგვერდი

თბილისი. 12 აგვისტოს, თბილისის საქალაქო სასამართლო განიხილავს საია-ს სარჩელს, რომელიც გერმანიაში მცხოვრები საქართველოს მოქალაქის სახელით არის წარდგენილი. სარჩელი შეეხება ქვეყანაში დაბრუნებისას, საქართველოს მოქალაქეების სავალდებულო კარანტინში მოთავსების წესის დისკრიმინაციულად ცნობას. საია მიიჩნევს, რომ აღნიშნული რეგულაცია მოქალაქეობის ნიშნით დისკრიმინაციას იწვევს და მისი ბათილად ცნობის საფუძველია. სრულად...  წყარო: ორგანიზაციის ვებგვერდი

თბილისი. სახალხო დამცველის აპარატის სვანეთის ოფისი დაბა მესტიაში, ლენჯერსა და უშგულში შექმნილი ეპიდემიოლოგიური სიტუაციის გამო მუშაობის საგანგებო რეჟიმში გადადის. ამის შესახებ საქართველოს სახალხო დამცველის აპარატი იტყობინება. საკარანტინო შეზღუდვების გათვალისწინებით, სახალხო დამცველის აპარატი დახმარებას გაუწევს ყველას, ვინც მიიჩნევს, რომ მისი უფლებები დაირღვა. საჭიროების შემთხვევაში, შეგიძლიათ დარეკოთ შემდეგ ტელეფონის ნომრებზე: ცხელ ხაზზე - 1481; დასავლეთ საქართველოს რეგიონული სამმართველოს უფროსი, მადონა ბასილაძე - +995 577 553 381; სახალხო დამცველის სვანეთის ოფისის წარმომადგენელი, ირინა გურჩიანი - +995 591 508 262. სრულად...  წყარო: ორგანიზაციის ვებგვერდი

განათლების განვითარების და დასაქმების ცენტრმა (EDEC) შიდა ქართლსა და სამეგრელოში მცხოვრები იძულებით გადაადგილებული და კონფლიქტის შედეგად დაზარალებული ახალგაზრდებისთვის პროფესიული ორიენტაციის და კარიერის დაგეგმვის – CV ტრენინგი ჩაატარა. “CV ტრენინგში” 323–მა ადამიანმა მიიღო მონაწილეობა. მათ შეისწავლეს CV-ის სწორედ შევსება და სამოტივაციო წერილის შედგენა, ასევე, მიიღეს ინფორმაცია დამსაქმებელთან კომუნიკაციის ეტაპებისა და ეფექტური გასაუბრების ტექნიკების შესახებ. მიღებული ცოდნა მონაწილეებს დაეხმარება უკეთ წარმოაჩნონ საკუთარი უნარები, შეადგინონ დამსაქმებლისთვის საინტერესო რეზიუმე და პირველი ნაბიჯი გადადგან წარმატებული კარიერის შექმნისთვის. სრულად...  წყარო: გვერდი სოციალურ ქსელში

თბილისი. საქართველოს სტრატეგიისა და საერთაშორისო ურთიერთობების კვლევის ცენტრი აქვეყნებს ფონდის უფროსი მკვლევარის, ვლადიმერ პაპავას ბლოგს - „საქართველოს ევროპული გზა პანდემიური დეგლობალიზაციის პირობებში“. „COVID-19-ის პანდემიამ სერიოზული ზეგავლენა იქონია როგორც ცალკეული ადამიანების ცხოვრებაზე, ისე მსოფლიო ეკონომიკაზე, რის გამოც მთელი რიგი საკითხებისა ახლებურად არის გასააზრებელი. მათ შორის განსაკუთრებულ ყურადღებას იმსახურებს გლობალიზაციის პრობლემა. კერძოდ კი, COVID-19-ის პანდემია ხომ არ გამოიწვევს გლობალიზაციის, როგორც ასეთის, დასრულებას, სრულად და საბოლოოდ ხომ არ ჩაანაცვლებს გლობალიზაციას დეგლობალიზაცია, რომელიც იზოლაციონიზმით უნდა დასრულდეს?“, - აღნიშნავს ავტორი. სრულად...  წყარო: ორგანიზაციის ვებგვერდი

თბილისი. ადამიანის უფლებების სწავლებისა და მონიტორინგის ცენტრი (EMC) აგვისტოს ომის მე-12 წლისთავს ეხმიანება. „ომმა არაერთი ადამიანის სიცოცხლე შეიწირა და დევნის, ჩამორთმევისა და დაუცველობის მძიმე ტრავმა და მეხსიერება დაგვიტოვა. ომმა ერთმანეთს დააშორა ოჯახები, მეზობლები და მოძმე ხალხი. მან ჩვენი ათასობით მოქალაქე დევნილად აქცია, წაართვა საცხოვრებელი სახლი და მშობლიური გარემო. ე.წ. საზღვრისპირა სოფლებში მცხოვრები ადამიანები კი უსაფრთხოების, სიღარიბისა და განუჭვრეტელი მომავლის უმძიმეს რეალობაში ცხოვრობენ. ომის შემდეგ კვლავ არ გაუმჯობესებულა აფხაზეთისა და სამხრეთ ოსეთის რეგიონებში მცხოვრები ადამიანების ყოფა. ეს რეგიონები და de facto პოლიტიკური სისტემები არსებითად არიან ეკონომიკურად და პოლიტიკურად დამოკიდებულნი რუსეთზე და მისი დაქვემდებარების, მოთვინიერებისა და კონტროლის პირობებში უწევთ არსებობა. მათი ეკონომიკები სრულად არის დამოკიდებული რუსეთის საბიუჯეტო სუბსიდიებზე და ადგილობრივი ელიტებისა და საზოგადოებრივი გაერთიანებების მხრიდან, ავტონომიის ნებისმიერი გამოვლინება რეგიონებს მძიმე სოციალურ და ეკონომიკურ ტვირთად და სასჯელად აწვებათ. უფრო მძიმე და უფლებააყრილია ამ რეგიონებში მცხოვრები ეთნიკურად ქართველი ოჯახების მდგომარეობა. კრიმინალი, კორუფცია, დევნა, სიღარიბე, ქართული ენისა და განათლების შევიწროება მათი ცხოვრების ყოველდღიური პრაქტიკაა“, - ნათქვამია EMC-ის მიერ გავრცელებულ განცხდებაში. სრულად...  წყარო: ორგანიზაციის ვებგვერდი

11 აგვისტოს, 12:00 საათზე, სოფელ ჯოყოლოში, რონდელის ფონდის პროექტში - „ჩემი სამყარო“ - მონაწილე პანკისის ხეობის სკოლების უფროსკლასელების დაჯილდოების საზეიმო ცერემონია გაიმართება. მისამართი: ნაზის სასტუმრო, პანკისის ხეობის სოფელი ჯოყოლო, ახმეტის მუნიციპალიტეტი.

თბილისი. მედიაში თამარ ბაჩალიაშვილის საქმის გაშუქებასთან დაკავშირებით, სამოქალაქო საზოგადოების ორგანიზაციები განცხადებას ავრცელებენ.  „საზოგადოებრივი ორგანიზაციები ვეხმიანებით თამარ ბაჩალიაშვილის საქმის მედიაში პრობლემური გაშუქების პროცესს, განსაკუთრებით კი 2020 წლის 9 აგვისტოს, 23:00 საათზე „მთავარ არხზე" გადაცემა „მთავარ აქცენტებში“ გასულ ინტერვიუს და მივიჩნევთ, რომ არსებითია მედიამ გაიაზროს პირადი ცხოვრების ხელშეუხებლობის მნიშვნელობა და საკუთარი პასუხისმგებლობა სამართლებრივი და დემოკატიული საზოგადოების მშენებლობის პროცესში, რომელიც ადამიანის უფლებებისა და ღირსების პატივისცემის იდეალებზე დგას.  „მთავარ არხზე" წამყვანის მიერ დასმული კითხვები, ისევე როგორც ზოგიერთი სხვა მედიასაშუალების მიერ მომზადებული მასალა, შეეხებოდა გარდაცვლილი თამარ ბაჩალიაშვილის პირადი ინტიმური ურთიერთობების დეტალებს, რაც, ერთის მხრივ, თავად გარდაცვლილის ხოლო, მეორეს მხრივ, მისი მეგობრების პირადი ცხოვრების უფლებაში უხეშ ჩარევას წარმოადგენს. მიუხედავად იმისა, რომ ჩვენ ძალიან კარგად გვესმის საქმის მიმართ არსებული მაღალი საზოგადოებრივი ინტერესი და მედიის განსაკუთრებული როლი, აკონტროლოს საჯარო ხელისუფლება, ასევე მიუხედავად იმისა, რომ ჩვენ ვხედავთ მიმდინარე გამოძიების ხარვეზულობასა და მისი ღიაობისა და გამჭირვალობის პრობლემას, არსებითი გვგონია საქმეზე საჯარო განხილვა ადამიანის უფლებების განუხრელი დაცვითა და პატივისცემით წარიმართოს. ამგვარ მიდგომას გადამწყვეტი მნიშვნელობა აქვს ბაჩალიაშვილის ოჯახის წევრების, ასევე მისი მეგობრების ღირსების, პირადი ცხოვრებისა და მორალური უსაფრთხოების დაცვის მიზნით“, - ვკითხულობთ განცხადებაში.  სრულად...   წყარო: emc.org.ge

თბილისი. რას ნიშნავს იყო ლიდერი ქალი თემში, იყო ლიდერი ქალი პოლიტიკაში, იყო ლიდერი ქალი ბიზნესში? რა არის წარმატება? რით იზომება? როდის სრულდება? სად გადის ზღვარი წარმატებასა და წარუმატებლობას შორის? რა დათმობებზე გვიწევს წასვლა? რა დგას ჩვენი გადაწყვეტილებების უკან? რატომ და როგორ ხდება ადამიანი აღიარებული ლიდერი? ამ შეკითხვებზე პასუხის გასაცემად, სტრატეგიული კვლევებისა და განვითარების ცენტრმა, დაინტერესებული ადამიანები ონლაინ კონფერენციაზე მიიწვია. პირველი შეხვედრა თინა ხიდაშელთან გაიმართა. მორიგი შეხვედრა, 14 აგვისტოს, 14:00 საათზე, სამოქალაქო აქტივისტ, რადიო „მარნეულის“ დამფუძნებელ კამილა მამედოვასთან გაიმართება.  კონფერენციაზე დასწრების მსურველებმა რეგისტრაცია უნდა გაიარონ ბმულზე   სრულად...  წყარო: გვერდი სოციალურ ქსელში