თბილისი. 14 აგვისტოს, სამოქალაქო საზოგადოების ინსტიტუტმა (CSI), 16-ე შეხვედრით, რეგიონებში, უფროსკლასელთა კონკურსის „ეს ქვეყანა შენიას“ გამარჯვებულთა დაჯილდოება და ახალგაზრდებთან შეხვედრები დაასრულა. თბილისის (ასევე, სოფ. გლოლას) გამარჯვებული გუნდების დაჯილდოება კი სექტემბერში გაიმართება. კონკურსის ბოლო ეტაპია სუპერ ფინალი, რომელშიც თითოეული რეგიონის და მათ შორის, თბილისის ერთი გუნდი მიიღებს მონაწილეობას. სუპერ ფინალი 2-3 დღით შეკრებას, საინტერესო შეხვედრებს, ვიქტორინებს გულისხმობს და ეპიდემიური სიტუაციის შესაბამისად დაიგეგმება. კონკურსი „ეს ქვეყანა შენია“ მთელი ქვეყნის მასშტაბით გაიმართა და მასში 150-მდე გუნდი მონაწილეობდა. გამარჯვებულ მოსწავლეებს და მათ კურატორ-მასწავლებლებს საჩუქრად გადაეცათ ნოუთ-ბუქები, პირბადეები, რუკები, რვეულები, ალმანახი „თავისუფლება, სამართლიანობა და დემოკრატია ქართულ აზროვნებაში“... ახალგაზრდებთან საჯარო შეხვედრები გამართეს საზოგადოებისთვის ცნობილმა მწერლებმა, გამომცემლებმა, ჟურნალისტებმა და განათლების ექსპერტებმა. მათ ისაუბრეს სამოქალაქო ღირებულებების, საზოგადოებრივი ორგანიზაციების საქმიანობის, სამოქალაქო პასუხისმგებლობის, აქტივიზმის და განათლების შესახებ. საერთო ჯამში, რეგიონულ შეხვედრებს 600-მდე ადამიანი დაესწრო. სამოქალაქო კამპანია „ეს ქვეყანა შენია“ მიმდინარებს „სამოქალაქო საზოგადოების განვითარების ინიციატივის“ ფარგლებში, რომელიც ხორციელდება კონრად ადენაუერის ფონდის (KAS) მიერ სამოქალაქო საზოგადოების ინსტიტუტთან (CSI), კონსულტაციის და ტრენინგის ცენტრთან (CTC), საქართველოს სტრატეგიული კვლევებისა და განვითარების ცენტრთან (CSRDG) და განათლების განვითარების და დასაქმების ცენტრთან (EDEC) თანამშრომლობით. პროექტს აფინანსებს ევროკავშირი და კონრად ადენაუერის ფონდი.

თბილისი. გაეროს ქალთა ფონდი აქვეყნებს დოკუმენტს: ქვეყნის გენდერული თანასწორობის პროფილი (საქართველო). „ქვეყნის გენდერული თანასწორობის პროფილი წარმოადგენს ცნობარს გენდერული თანასწორობისა და ქალთა გაძლიერების მიმართულებით არსებული მდგომარეობის შესაფასებლად. დოკუმენტში გენდერულ თანასწორობასთან დაკავშირებული ვითარება საქართველოში მდგრადი განვითარების ინდიკატორებზე დაყრდობითა და პეკინის სამოქმედო პლატფორმისა და CEDAW-ს გათვალისწინებითაა აღწერილი“, ნათქვამია ორგანიზაციის ვებგვერდზე. სრულად... წყარო: georgia.unwomen.org

თბილისი. „საერთაშორისო გამჭვირვალობა - საქართველოს“ სამოქალაქო საბჭოების ორგანიზებით, ორგანიზაციის წარმომადგენლები 4 მუნიციპალიტეტის 5 სოფლის და დასახლებული პუნქტის მოსახლეობას შეხვდნენ. „ადგილობრივებმა, ჩვენი ორგანიზაციის რეგიონული ოფისების წარმომადგენლებს თემებში არსებული პრობლემები გააცნეს, მათ შორის გამოიკვეთა სასმელი და სარწყავი წყლის სისტემის, შიდა გზების, გარე განათების, ხიდების, ტროტუარების მოწესრიგების და სხვა ინფრასტრუქტურული საჭიროებები“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

საქართველოს წითელი ჯვრის საზოგადოებამ USAID-ის მხარდაჭერით მესტიის მოსახლეობას 270 სასურსათო და 270 ჰიგიენური ამანათი გადასცა. ასევე, ადგილობრივებს ინფექციის რისკის შემცირების მიზნით მიეწოდათ ინფორმაცია ჰიგიენის წესებისა და პროფილაქტიკური ზომების შესახებ. ჰუმანიტარული დახმარება გათვალისწინებულია 70 წლის და უფროსი ასაკის მარტოდ მცხოვრები ადამიანებისთვის. საქართველოს წითელი ჯვრის საზოგადოებამ უკვე 100 000-ზე მეტი ამნათი დაარიგა ქვეყნის მასშტაბით. სრულად... წყარო: ორგანიზაციის გვერდი სოციალურ ქსელში

აჭარა. 11-13 აგვისტოს ბათუმში მეგობრობის ხიდი ქართლოსის ორგანიზებით და პოლონური ორგანიზაცია Fundacja HumanDoc ის პარტნიორობით პროექტის „საქართველოში ოჯახში ძალადობის პრევენციისა და მოძალადეთათვის თერაპიული დახმარების გაწევის ფარგლებში“ შიდა ქართლის ჯანდაცვის მუშაკებისათვის გაიმართა სწავლების პროგრამა, ტრენინგების პირველი ეტაპი ოჯახში ძალადობის წინააღმდეგ ბრძოლის თემაზე. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი აქვეყნებს ანალიტიკურ დოკუმენტს - საერთო სასამართლოების კონსტიტუციური წარდგინების პრობლემური საკითხები სისხლის სამართლის საქმის განხილვისას - ნარკოდანაშაულებზე არსებული პრაქტიკის ანალიზი.  „წლების განმავლობაში მოქმედი არაჰუმანური ნარკოპოლიტიკის სფეროში გარდამტეხი საკანონმდებლო ცვლილებების შეტანა საკონსტიტუციო სასამართლოს გადაწყვეტილებებმა განაპირობა. 2015 წლიდან მოყოლებული დღემდე, ნარკოტიკულ დანაშაულებზე დაწესებულ სასჯელთა ჰუმანიზაციის მიმართულებით მიღწეული პროგრესი, სწორედ საკონსტიტუციო სასამართლოს განვითარებული პრაქტიკის, მარიხუანის/კანაფის თუ სხვა ნარკოტიკული საშუალებების მოხმარებისა და ფლობის თაობაზე მანამდე არსებული საკანონმდებლო მიდგომების ძირეული შეცვლის შედეგია“, - ვკითხულობთ დოკუმენტში.  სრულად...  წყარო: ორგანიზაციის ვებგვერდი

თბილისი. საქართველოს სახალხო დამცველი გიორგი შაქარაშვილის მკვლელობის საქმეზე დაცვის მხარისთვის გაუთქმელობის ვალდებულების დაკისრებას ეხმიანება. სახალხო დამცველი მიიჩნევს, რომ დაცვის მხარისთვის გაუთქმელობის ვალდებულების დაუსაბუთებელი დაკისრებით, მოცემულ სიტუაციაში, შესაძლოა, დაირღვეს მხარეთა თანასწორობის უფლება. სრულად...  წყარო: ორგანიზაციის ვებგვერდი

თბილისი. სახალხო დამცველმა წელს პირველად წარმოადგინა სპეციალური ანგარიში, სადაც დეტალურად არის შეფასებული საქართველოში ადამიანის უფლებათა და თავისუფლებათა დაცვის მდგომარეობის შესახებ საქართველოს სახალხო დამცველის 2018 წლის ანგარიშის საფუძველზე, პარლამენტის 2019 წლის 20 სექტემბრის დადგენილებით სახელმწიფო უწყებებისთვის მიცემული დავალებების შესრულების მდგომარეობა. სახელმწიფო უწყებებსა და ადგილობრივი თვითმმართველობის ორგანოებს სახალხო დამცველმა 2018 წლის საპარლამენტო ანგარიშში 310 რეკომენდაციით მიმართა. საქართველოს პარლამენტმა აღნიშნული რეკომენდაციების დაახლოებით 78% (244 რეკომენდაცია) გაიზიარა და მათი შესრულების უზრუნველსაყოფად 259 დავალება გასცა. სრულად...  წყარო: ორგანიზაციის ვებგვერდი

თბილისი. ადამიანის უფლებათა ცენტრი აგრძელებს საერთო სასამართლოებში მიმდინარე სავარაუდოდ პოლიტიკურად მოტივირებული საქმეების სასამართლო პროცესებზე დაკვირვებას.  ამ დროისათვის, ადამიანის უფლებათა ცენტრის დაკვირვების ქვეშ მოექცა 20 საქმე, რომელთაგან ნაწილის განხილვა სასამართლოში დასრულებულია.  სრულად...  წყარო: ორგანიზაციის ვებგვერდი

თბილისი. „საერთაშორისო გამჭვირვალობა – საქართველომ“ აჭარაში 2019 წელს განხორციელებული ინვესტიციების შესახებ კვლევა მოამზადა... ორგანიზაციამ შეისწავლა აჭარის ავტონომიური რესპუბლიკის მთავრობის მიერ პირდაპირი მიყიდვის ფორმით, მათ შორის სიმბოლურ ფასად (1 ლარად), პირობიანი და უპირობო აუქციონით გასხვისებული ქონების მესაკუთრეები, პრივატიზაციის საფასური და ინვესტიციების მოცულობა.  სრულად...   წყარო: ორგანიზაციის ვებგვერდი

იმერეთი. ადგილობრივი დემოკრატიის სააგენტო საქართველომ ბაღდათისა და ვანის მუნიციპალიტეტში არსებული სამოქალაქო საზოგადოებრივი ორგანიზაციების წარმომადგენლებისათვის საკონსულტაციო შეხვედრა გამართა. შეხვედრა გაიმართა პროექტის "სამოქალაქო საზოგადოების განვითარების ინიციატივის" ფარგლებში და მისი მიზანი სამოქალაქო საზოგადოების ორგანიზაციების წარმომადგენლებისთვის, როგორც კონსულტაციების გაწევა, ასევე, პროექტით გათვალისწინებული და განხორციელებული აქტივობების შესახებ ინფორმაციის მიწოდება გახლდათ. პროექტი "სამოქალაქო საზოგადოების განვითარების ინიციატივა" ხორციელდება კონრად ადენაუერის ფონდის (KAS) მიერ სამოქალაქო საზოგადოების ინსტიტუტთან (CSI), ტრენინგის და კონსულტაციის ცენტრთან (CTC), საქართველოს სტრატეგიული კვლევის და განვითარების ცენტრთან (CSRDG) და განათლების განვითარების და დასაქმების ცენტრთან (EDEC) პარტნიორობით. სრულად...  წყარო: გვერდი სოციალურ ქსელში

20 აგვისტოს, 15:00 საათზე, გაიმართება ონლაინ კითხვა-პასუხის სესია იმ სამოქალაქო საზოგადოების ორგანიზაციებისთვის, რომლებიც დაინტერესებულნი არიან, მონაწილეობა მიიღონ საგრანტო კონკურსში - უფასო ოურიდიული დახმარება საგამოძიებო ჟურნალისტიკის მხარდასაჭერად... შეხვედრის ბმული საგრანტო კონკურსის შესახებ ინფორმაცია იხილეთ აქ

ფსიქოლოგმა ჯანა ჯავახიშვილმა მოამზადა სახელმძღვანელო მედია პროფესიონალებისთვის - „მედია, ფსიქიკური ჯანმრთელობა და ადამიანის უფლებები“... სახელმძღვანელო მომზადებულია პროექტის - „ფსიქიკური აშლილობებისა და ფსიქო-სოციალური ნიშნით შეზღუდული შესაძლებლობების მქონე პირთა უფლებების მხარდაჭერა საქართველოში“ - ფარგლებში, რომელსაც ფონდი „გლობალური ინიციატივა ფსიიატრიაში - თბილისი“, პარტნიორებთან ერთად, ევროკავშირის ფინანსური მხარდაჭერით ახორციელებს.  იხილეთ სახელმძღვანელო... 

თბილისი. 2020 წლის 3 აგვისტოს საქართველოს სახალხო დამცველმა საქართველოს გენერალურ პროკურორს წინადადებით მიმართა, რათა არ მოხდეს უკრაინის რესპუბლიკის მოქალაქე ვადიმ ალტმანის რუსეთის ფედერაციაში ექსტრადიცია. „საქმის გარემოებების შესწავლის შედეგად გაირკვა, რომ ვადიმ ალტმანი რუსეთ-უკრაინის შეირაღებული კონფლიქტის დროს მონაწილეობას იღებდა რუსეთის ფედერაციის წინააღმდეგ განხორციელებულ სხვადასხვა აქტივობებში. წარმოდგენილი დოკუმენტაციის თანახმად, იგი არის „ომის, შეიარაღებული ძალების ინვალიდთა და საომარი მოქმედებების მონაწილეთა სრულიად უკრაინის ორგანიზაციის ოდესის საოლქო ორგანიზაციის“ წევრი. ასევე, მონაწილეობდა უკრაინულ მოხალისეთა ჯგუფების შემადგენლობაში და აქტიურ როლს ასრულებდა უკრაინის არმიის აღჭურვა-მომარაგებაში“, - მიიჩნევს სახალხო დამცველი. სრულად...  წყარო: ორგანიზაციის ვებგვერდი

თბილისი. არის თუ არა სპორტი დაკავშირებული პოლიტიკასთან? უნდა გავმიჯნოთ თუ არა სპორტი და პოლიტიკა? რა კავშირები არსებობს სპორტსა და პოლიტიკას შორის? - ეს არის საკითხები, რომელსაც ინფორმაციის თავისუფლების განვითარების ინსტიტუტი (IDFI) ეხება თავის პუბლიკაციაში - „რუსული სპორტი და პოლიტიკა“.  „თანამედროვე ისევე, როგორც საბჭოთა რუსეთის ისტორიაში სპორტი და პოლიტიკა მნიშვნელოვნადაა დაკავშირებული ერთმანეთთან. თუკი საბჭოთა კავშირი სპორტს იყენებდა დასავლეთზე უპირატესობის დასამტკიცებლად და საბჭოთა რეჟიმის რეპუტაციის საერთაშორისო დონეზე გასაუმჯობესებლად, თანამედროვე პუტინის რეჟიმი სპორტს რამდენიმე მიზნით იყენებს: უპირველეს ყოვლისა, სპორტული ღონისძიებებისა და შესაბამისი პროპაგანდის მეშვეობით პუტინი ახდენს საკუთარი იმიჯის ასოცირებას გამარჯვებასა და ძლევამოსილებასთან; გარდა ამისა, ისეთ მასშტაბურ ღონისძიებებს, როგორებიცაა ოლიმპიური თამაშები და მსოფლიო თასი, პუტინის რეჟიმი იყენებს ერთი მხრივ საერთაშორიო დონეზე საკუთარი იმიჯის რებრენდინგისთვის, მეორე მხრივ კი რუსი ხალხის კონსოლიდაციისთვის მაშინ, როცა ქვეყანაში სერიოზული სოციო-ეკონომიკური პრობლემებია; ამასთანავე, სპორტულ სფეროში აქტიურად არიან ჩართული მსხვილი ბიზნესმენები პუტინის გარემოცვიდან, რომლებიც აკონტროლებენ სპორტული კლუბებისა და ორგანიზაციების უმრავლესობას და მათ იყენებენ სხვადასხვა სახის კორუფციული სქემების ასამუშავებლად. შესაბამისად, შეიძლება ითქვას, რომ თანამედროვე ისევე, როგორც საბჭოთა რუსეთში სპორტის გამიჯვნა პოლიტიკისგან ფაქტობრივად შეუძლებელია. დღემდე რუსეთი რჩება სახელმწიფოდ, სადაც ბიზნესი, კრიმინალი, სპორტი და პოლიტიკა მჭიდროდაა გადაჯაჭვული ერთმანეთთან“, - ვკითხულობთ პუბლიკაციაში.  სრულად...   წყარო: ორგანიზაციის ვებგვერდი

კახეთი. პანკისში, სოფელ ჯოყოლოში პროექტში, „ჩემი სამყარო“, მონაწილე ხეობის სკოლების უფროსკლასელების დაჯილდოების საზეიმო ცერემონია გაიმართა. პროექტში გამარჯვებულები გამოვლინდნენ ჟურნალ „ჩემი სამყაროს“ საფუძველზე ჩატარებულ ვიქტორინაში ნაჩვენები შედეგებისა და პროექტში აქტიური მონაწილეობის საფუძველზე. გამარჯვებულებს და მონაწილეებს გადაეცათ პრიზები და სერტიფიკატები.  პროექტი „ჩემი სამყარო“ რონდელის ფონდში, საქართველოში აშშ-ის საელჩოს მხარდაჭერით, 2013 წლიდან მიმდინარეობს და მიზნად ისახავს ქვეყნის მასშტაბით ახალგაზრდების სამოქალაქო ცნობიერების ამაღლებასა და საგარეო თუ საშინაო პოლიტიკის საკითხებში მათი ცოდნის გაფართოებას. პროექტის ძირითად სამიზნე ჯგუფებია: დევნილი ბავშვები აფხაზეთიდან და სამაჩაბლოდან, მაღალმთიანი აჭარის, გურიისა და პანკისის ხეობის რელიგიური და ეთნიკური უმცირესობები.  სრულად...   წყარო: ორგანიზაციის ვებგვერდი

თბილისის ადამიანის უფლებათა სახლი აქვეყნებს ადამიანის უფლებათა სახლის ფონდის განცხადებას, ბელარუსში მიმდინარე მოვლენებთან დაკავშირებით... „ადამიანის უფლებათა სახლის ფონდი მკაცრად გმობს ბელარუსის ხელისუფლების მიერ 9 აგვისტოს გამართული საპრეზიდენტო არჩევნებისას და მის შემდგომ პერიოდში ფართომასშტაბიანი და არაპროპორციული ძალის გამოყენებას. აუცილებელია დაუყოვნებლივ შეწყდეს მშვიდობიანი მომიტინგეების მიმართ ძალის გამოყენება და უზრუნველყოფილი იყოს ბელარუსელი ხალხის ფუნდამენტური უფლებების დაცვა. ”არჩევნების წინმდევი მოვლენები, გუშინდელი არჩევნები და ამ არჩევნების შემდგომ მშვიდობიანი მომიტინგეების მიმართ განხორციელებული ძალადობრივი ქმედებები იმის მაჩვენებელია, რომ ხელისუფლებას არ სურს უზრუნველყოს ბელარუსის მიერ ნაკისრი ადამიანის უფლებათა დაცვის საერთაშორისო ვალდებულებების შესრულება. ხელისუფლების მიერ განხორციელებული დევნა და ძალადობის შემთხვევები უფრო მეტად ცხადყოფს, რომ ბელარუსელი ხალხის ნება და მათი უფალებები სრულად უგულველყოფილია”,- აღნიშნულია განცხადებაში  სრულად...   წყარო: ორგანიზაციის ვებგვერდი

თბილისი. სამართლიანი არჩევნებისა და დემოკრატიის საერთაშორისო საზოგადოება (ISFED) Facebook-ზე მოქმედი კიდევ ერთი ორგანიზებული ქსელის შესახებ აცხადებს.  „სამართლიანი არჩევნები“ 2018 წლის საპრეზიდენტო არჩევნების წინა პერიოდიდან „ფეისბუქზე“ როგორც ოპოზიციური პარტიების, ისე მმართველი პარტიის წინააღმდეგ მოქმედი გვერდების ქცევას აკვირდება. ქართული გვერდების, ჯგუფებისა და ანგარიშების წინააღმდეგ „ფეისბუქის“ მიერ განხორციელებული ორი მასშტაბური ოპერაციის შედეგად დადასტურდა ამ გვერდების კავშირი მმართველ პარტია „ქართულ ოცნებასთან“ და ოპოზიციურ პარტია „ერთიან ნაციონალურ მოძრაობასთან“. 2020 წლის საპარლამენტო არჩევნების მოახლოებასთან ერთად, „ფეისბუქზე“ კიდევ ერთი პარტიის - „საქართველოს პატრიოტთა ალიანსის“ სასარგებლოდ მასშტაბური კამპანიაც შეინიშნება. საგულისხმოა, რომ მოცემული ქსელი „პატრიოტთა ალიანსის“ სასარგებლოდ პოზიტიურ კამპანიასთან ერთად, მიმართულია მკვეთრად ნეგატიური, დისკრედიტაციული აქტივობისკენ როგორც მმართველი პარტიის, ისე, განსაკუთრებით, სხვა ოპოზიციური პარტიების წინააღმდეგაც“, - ნათქვამია ISFED-ის მიერ გავრცელებულ ინფორმაციაში.  სრულად...   წყარო: ორგანიზაციის ვებგვერდი

თბილისი. „სამოქალაქო პლატფორმა 20/20“-მა, დღეს, საზოგადოებას 2020 წლის საპარლამენტო არჩევნების წინასაარჩევნო პროცესის შეფასება/ანგარიშში წარუდგინა.  „სახელმწიფომ უნდა უზრუნველყოს არჩევნების ჩატარება უსაფრთხო ეპიდემიოლოგიურ გარემოში და არსებული გამოწვევა არ უნდა გახდეს საარჩევნო პროცესზე მანიპულირების ინსტრუმენტი. საარჩევნო რეფორმის ჰარმონიზაციის ფარგლებში არ მოხდა ეუთო/ODHIR-ის პრიორიტეტული რეკომენდაციების ძირითადი ნაწილის გაზიარება, თუმცა, განხორციელებული ცვლილებები არის წინ გადადგმული ნაბიჯი. სახელმწიფო ინსტიტუტებმა უნდა უზრუნველყონ დემოკრატიული საარჩევნო გარემოს შექმნა. არჩევნების საყოველთაო, თავისუფალ, გამჭირვალე და კონკურენტულ საარჩევნო პირობებში ჩატარებაზე პასუხისმგებელი არის ცენტრალური საარჩევნო კომისიის ადმინისტრაცია. მნიშვნელოვანია, 2020 წლის საპარლამენტო არჩევნებში საერთაშორისო სადამკვირვებლო ორგანიზების ინტენსიური ჩართულობა“,- აღნიშნულია სამოქალაქო პლატფორმა 20/20-ის ანგარიშის დასკვნაში.  სრულად...   წყარო: გვერდი სოციალურ ქსელში

CsoGeorgia.org საზოგადოებრივ ორგანიზაციებს, ნებისმიერ დაინტერესებულ პირს ყოველ ხუთშაბათს კვირის საგრანტო კონკურსების, სტიპენდიების, ვაკანსიებისა და ტენდერების შესახებ ინფორმაციას სთავაზობს. ელ-ბიულეტენი...

თბილისი. „მითების დეტექტორი“ ავრცელებს მასალას „ქართული მარშის“ მიერ „ღია საზოგადოების ფონდთან“ დაკავშირებით გავრცელებული დეზინფორმაციების შესახებ.  „ანტილიბერალური პოლიტიკური გაერთიანება “ქართული მარში” ,,ღია საზოგადოების ფონდის” წინააღმდეგ კამპანიას განაგრძობს. ტვ “ობიექტივის” ეთერში “ქართული მარშის” წევრებმა ფონდის წინააღმდეგ ორი ინფორმაცია გააჟღერეს: 1. სოროსმა 4 მილიონი გამოყო მართლმადიდებლობასთან საბრძოველად. 2. სახალხო დამცველის აპარატი სახელმწიფო დაწესებულებაა და მისი დაფინანსება სოროსის ფონდის მიერ არის ,,მოქრთამვა” და თავად დაფინანსების მიზანშეწონილობა საეჭვოა. ამასთანავე ქართული მარშის ერთ-ერთმა ლიდერმა სანდრო ბრეგაძემ განაცხადა, რომ ისინი მიმართავენ პარლამენტს, აიკრძალოს უცხო ქვეყნის მიერ არასამთავრობო ორგანიზაციების დაფინანსება“, - ვკითხილობთ მასალაში, - “ქართული მარშის” მიერ გავრცელებული ცნობები დეზინფორმაციაა. 1. ფონდს პანდემიასთან ბრძოლის მიზნით დამატებითი თანხის სახით არა 4 მილიონი, არამედ 1 მილიონი გამოეყო და თანხის დანიშნულება კოვიდ-19-ის პანდემიასთან და არა მართლმადიდებლობასთან ბრძოლაა. 2. სახალხო დამცველის აპარატი არა სახელმწიფო, არამედ დამოუკიდებელი ორგანოა, რომელსაც კონსტიტუციით აქვს განსაზღვრული სახელმწიფოს კონტროლის უფლება და ის დაფინანსებას სოროსის ფონდიდან პატიმრების უფლებების დაცვის მიზნით იღებს”.  სრულად...  წყარო: ორგანიზაციის ვებგვერდი

თბილისი. 2020 წლის 20 ივლისს სახალხო დამცველმა სასამართლო-ფსიქიატრიული და კომპლექსური ფსიქიატრიულ-ფსიქოლოგიური ექსპერტიზის ჩატარებისას ასაკის ნიშნით დისკრიმინაციული პრაქტიკის თავიდან აცილების საკითხზე ზოგადი წინადადებით მიმართა საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრს და სსიპ ლევან სამხარაულის სახელობის სასამართლო ექსპერტიზის ეროვნული ბიუროს უფროსს. სახალხო დამცველმა განმარტა, რომ 10 წლამდე ასაკის ბავშვები, 10 წლის ზემოთ ასაკის ადამიანებთან შედარებით, მათი გონებრივი მომწიფების გათვალისწინებით, განსხვავებულ მოპყრობას საჭიროებენ. ის ფაქტი, რომ ამ ეტაპზე არ არსებობს არასრულწლოვანთა სასამართლო-ფსიქიატრიული და კომპლექსური ფსიქიატრიულ-ფსიქოლოგიური ექსპერტიზის ჩატარების წესის შესახებ სპეციალური სახელმძღვანელო პრინციპები, 10 წლამდე არასრულწლოვან პირებს არათანაბარ მდგომარეობაში აქცევს მათზე ასაკით უფროს პირებთან შედარებით. მსგავსი პრაქტიკა წარმოადგენს ასაკის ნიშნით დისკრიმინაციულ მოპყრობას, ვინაიდან არსებული საერთო წესი უარყოფითად აისახება 10 წლამდე ასაკის ბავშვებზე. სრულად...  წყარო: ორგანიზაციის ვებგვერდი