საქართველოს პირველი რესპუბლიკის მხედარმთავარი – "საქართველო თავისი მოწყობით არის ევროპული და არა აზიური". თავის დროზე იგი რადიო "თავისუფლებამ" ჩაწერა. სწორედ ამ ჩანაწერს ეყრდნობა ანიმირებული ვიდეო. (ტექსტი და ხმა აღებულია რადიო თავისუფლების არქივიდან)

ჭაქვინჯის ციხე–სიმაგრე ზუგდიდიდან ჩრდილო-აღმოსავლეთით მდებარეობს. ის II-III საუკუნეებშია აგებული და XVIII საუკუნემდე მოქმედი იყო. ჯერ კიდევ ელინისტურ ხანაში (323-33წწ. ჩვენს წელთაღრიცხვამდე) ეს ადგილი აბრეშუმის გზას უკავშირდებოდა.  ძეგლი, ბოლო ორ საუკუნეზე მეტი ხნის განმავლობაში მიტოვებული იყო და რთულმა კლიმატურმა პირობებმა მძიმედ დააზიანა. საბჭოთა ტოტალიტარული მმართველობის ხანაში, აქ კირის კარიერი გახსნეს, მიწის მასების გამოტანამ გამოიწვია კლდის რღვევის პროცესი, რამაც დიდი საფრთხე შეუქმნა ძეგლის საძირკველს.  სულ ახლახანს, ევროპა ნოსტრამ და ევროპის საინვესტიციო ბანკის ინსტიტუტმა, ჭაქვინჯის ციხე, 2023 წლის, ევროპის განსაკუთრებული საფრხის ქვეშ მყოფ, 7 ძეგლს შორის დაასახელეს. ევროპა ნოსტრა, ანუ „კულტურული მემკვიდრეობის ხმა ევროპაში“ – კულტურული და ბუნებრივი მემკვიდრეობის დაცვის ევროპული ქსელია. იგი 50–ზე მეტი ქვეყნის 250 საზოგადოებრივ ორგანიზაციას, 150 ასოცირებულ და 1500 ინდივიდუალურ წევრს აერთიანებს. მიზანი – კულტურული და ბუნებრივი მემკვიდრეობის ძეგლების გამოვლენა, დაცვაა. მიზნის მისაღწევად ფართომასშტაბიან კამპანიებს მართავს, საფრთხის ქვეშ მყოფი ძეგლების, შენობა–ნაგებობების გადასარჩენად.  ევროპა ნოსტრას ჯილდო – ევროკავშირის კულტურული მემკვიდრეობის პრიზია, რომელიც ევროკავშირის უმაღლესი შეფასება და აღიარებაა. იგი გაიცემა შემდეგი კატეგორიების მიხედვით: კონსერვაცია–რესტავრაცია, კვლევა, განათლება, საზოგადოების მონაწილეობა და ცნობიერების ამაღლების კამპანიები, „კულტურული მემკვიდრეობის ჩემპიონები“.  ევროპა ნოსტრას საფრთხის ქვეშ მყოფი 7 ძეგლის პროგრამა – ევროპაში განადგურების პირას მყოფი ძეგლების და ლანდშაფტების გადარჩენის კამპანიაა. ძეგლების შერჩევა ხდება მისი კულტურული ფასეულობის და ასევე, არსებული საფრთხის მიხედვით. „ევროპა ნოსტრას ნომინაციებში მოხვედრა არის აღიარება და ძეგლის მნიშვნელობის წარმოჩენა“, აცხადებს „ევროპა ნოსტრას“ წარმომადგენელი საქართველოში, ხელოვნების საერთაშორისო ცენტრის ხელმძღვანელი მაკა დვალიშვილი. მისი ინფორმაციით, ევროპის საინვესტიციო ბანკის ინსტიტუტის ფინანსური მხარდაჭერით, ექსპერტები ადგილზე შეისწავლიან ჭაქვინჯის ციხე–სიმაგრის საჭიროებებს და შეიმუშავებენ რეკომენდაციებს. ამავე დროს ძეგლი მიიღებს გადაუდებელი საჭიროებისთვის, სწრაფი რეაგირების 10 000 ევროს ოდენობით ევროპის საინვესტიციო ბანკის მემკვიდრეობის გრანტს. სულ ახლახანს, ევროკავშირის კულტურის პროექტის მხარდაჭერით, შემუშავდა ზუგდიდის კულტურული განვითარების სტრატეგია, რომელიც ითვალისწინებს ზუგდიდის, როგორც კულტურული მემკვიდრეობის ინოვაციების ქალაქის განვითარებას. ევროპა ნოსტრას ნომინაციებში მოხვედრა და ზუგდიდის სტრატეგია ჭაქვინჯის ციხე–სიმაგრის აღდგენისთვის საჭირო საერთაშორისო გრანტების მოზიდვის ხელსაყრელ გარემოს ქმნის. სხვათა შორის, ევროპის ამ პრესტიჟული კონკურსის, სხვადასხვა ნომინაციების გამარჯვებული, არაერთხელ ყოფილა ქართული კულტურული მემკვიდრეობის მატერიალური, თუ არამატერიალური ძეგლი, პროექტი. ევროპა ნოსტრას ჯილდოების მფლობელი ორგანიზაციები და მათ მიერ განხორციელებული გამარჯვებული პროექტები საქართველოდან: ევროპა ნოსტრას ჯილდოს მფლობელები 2021 წელს ევროპა ნოსტრას ჯილდო მიიღო – ვარძიის კლდეში ნაკვეთი კომპლექსის პროაქტიული კონსერვაციის და მონიტორინგის სისტემის პროექტმა (წარადგინა კულტურული მემკვიდრეობის ეროვნულმა სააგენტომ, იტალიის გარემოს დაცვისა დაკვლევების უმაღლესმა ინსტიტუტმა (ISPRA) და ილიას სახელმწიფო უნივერსიტეტის კულტურული მემკვიდრეობის და გარმოს კვლევის ცენტრთან თანამშრომლობით). 2019 წელს ევროპა ნოსტრას და „სახალხო რჩეული“ ჯილდო მიიღო ციხე–სოფელის მუცოს რეაბილიტაციის პროექტმა (წარადგინა კულტურული მემკვიდრეობის ეროვნულმა სააგენტომ). 2018 წელს სამეცნიერო კვლევით კატეგორიაში ევროპა ნოსტრას ჯილდო მიიღო პროექტმა „ქსოვილი საქართველოდან“ (წარადგინა ხელოვნების სასახლემ). 2017 წელს ტრენინგებისა და საზოგადოების გათვითცნობიერების კატეგორიაში, ევროპა ნოსტრას ჯილდო მიიღო პროექტმა „ტრადიციული რეწვის ინიციატივა საქართველოში“ (წარადგინა ხელოვნების საერთაშორისო ცენტრმა). 2006 წელს ევროპა ნოსტრას ჯილდო მიიღო ტიმოთესუბინის ფრესკების საკონსერვაციო სამუშაოების პროექტმა (წარადგინა ხელოვნების საერთაშორისო ცენტრმა, იტალიის პარტნიორ ორგანიზაციასთან (Conservazione Beni Culturali) ერთად თანამშრომლობით). ევროპა ნოსტრას ჟიურის სპეციალური აღნიშვნა 2018 წელს ცნობიერების ამაღლების კატეგორიაში, ევროპა ნოსტრას ჟიურის სპეციალური ჯილდოს მფლობელი გახდა კომპანია „არტარეას“ პროექტი – „თბილისური ტურები და თბილისური ეზოები“. 2017 წელს კონსერვაცია–რესტავრაციის კატეგორიაში, ევროპა ნოსტრას ჟიურის სპეციალური ჯილდოს მფლობელი გახდა თბილისის განვითარების ფონდის პროექტი – აღმაშენებლის გამზირის ისტორიული შენობების სარეაბილიტაციო სამუშაოები. 2016 წელს, კულტურული მემკვიდრეობის სფეროში გაწეული ღვაწლისთვის, ევროპა ნოსტრას ჟიურის სპეციალური ჯილდოს მფლობელი გახდა საქართველოს ხელოვნების სასახლე. 2015 წელს, კულტურული მემკვიდრეობის სფეროში გაწეული ღვაწლისთვის, ევროპა ნოსტრას ჟიურის სპეციალური ჯილდოს მფლობელი გახდა ხელოვნების საერთაშორისო ცენტრი. განსაკუთრებული საფრთხის ქვეშ მყოფი 7 ძეგლის პროგრამა 2023 წელს, ევროპა ნოსტრას „საფრთხის ქვეშ მყოფი 7 ძეგლის პროგრამის ფინალისტი გახდა ჭაქვინჯის ციხე–სიმაგრე (წარადგინა ხელოვნების საერთაშორისო ცენტრმა, ზუგდიდის მუნიციპალიტეტის მერიასთან თანამშრომლობით). 2021 წელს, ევროპა ნოსტრას „განსაკუთრებული საფრთხის ქვეშ მყოფი 12 ძეგლის ნომინანტი გახდა ციხე–სიმაგრე ნარიყალა (წარადგინა თბილისის განვითარების ფონდმა). 2018 წელს, ევროპა ნოსტრას „განსაკუთრებული საფრთხის ქვეშ მყოფი 12 ძეგლის ნომინანტი გახდა ჭიათურის საბაგირო გზების პროექტი (წარადგინა საქართველოს კულტურისა და ძეგლთა დაცვის სამინისტრომ). 2018 წელს, ევროპა ნოსტრას „საფრთხის ქვეშ მყოფი 7 ძეგლის პროგრამის ფინალისტი გახდა დავით გარეჯის სამონასტრო კომპლექსი (წარადგინა ხელოვნების საერთაშორისო ცენტრმა).

საერთაშორისო რესპუბლიკურმა ინსტიტუტმა (IRI), 25 აპრილს, საზოგადოებრივი აზრის კვლევა გამოაქვეყნა. შედეგების თანახმად, ევროკავშირში გაწევრიანებას საქართველოს მოქალაქეების მტკიცე მხარდაჭერა აქვს. საერთაშორისო რესპუბლიკურმა ინსტიტუტმა მოსახლეობას სთხოვა პოლიტიკური პარტნიორები და საფრთხეები დაესახელებინათ, შედეგები კი ასეთია: ყველაზე მნიშვნელოვან პოლიტიკურ პარტნიორებად 63%-მა ევროკავშირი, 47%-მა აშშ, 27%-მა უკრაინა, 18%-მა თურქეთი, 16%-მა კი აზერბაიჯანი დაასახელა.  ქვეყნისთვის მთავარ პოლიტიკურ საფრთხედ გამოკითხულთა 87%-ი რუსეთს, 8%-8%–ი აშშ-სა და თურქეთს, 4%–ი ირანს, 3%-3%–ი კი სომხეთს, აზერბაიჯანსა და ევროკავშირს მიიჩნევს. რაც შეეხება ეკონომიკურ პარტნიორებსა და საფრთხეებს, ქვეყნისთვის ყველაზე მნიშვნელოვან ეკონომიკურ პარტნიორად გამოკითხულთა 60%–ი ევროკავშირს მიიჩნევს, 43%–ი აშშ-ს, 30%–ი თურქეთს, 22%–ი აზერბაიჯანს, 21%–ი კი – უკრაინას.  ეკონომიკურ საფრთხეებს შორის 76%–ი რუსეთს ასახელებს, 6%–ი თურქეთს, 5%–ი აშშ-ს, 2%-2%–ი კი – ევროკავშირს, უკრაინას, ირანს, ჩინეთს, სომხეთსა და აზერბაიჯანს. გამოკითხვა ასევე ეხებოდა რუსეთთან დიალოგსაც, გამოკითხულთა 34%–ი კატეგორიულად ეწინააღმდეგება, 27%–ი ნაწილობრივ უჭერს მხარს, 26%–ი სრულად, 9%–ი მეტწილად ეწინააღმდეგება, 4%-მა კი – არ იცის ან უარს ამბობს პასუხზე. რესპონდენტების 30% ძალიან ნეგატიურად აფასებს საქართველოს მთავრობის რუსეთთან ურთიერთობების დინამიკას, ძალიან დადებითად კი – მხოლოდ 10%-ი. რას ფიქრობენ საქართველოს მთავრობის საგარეო კურსის შესახებ? გამოკითხულების 17%–ი ამბობს, რომ კურსი პროდასავლურია; 21%-ის მოსაზრებით, უფრო პროდასავლური, ვიდრე პრორუსული; 20%-ის მოსაზრებით, უფრო პრორუსული, ვიდრე პროდასავლური; 25%-ის აზრით კი – პრორუსული. რა დამოკიდებულებაა ევროკავშირში გაწევრიანების მიმართ? გამოკითხულთა 89%–ი სრულად ან მეტწილად ემხრობა; 8%–ი საერთოდ არ ემხრობა, ან მეტწილად არ ემხრობა; 3%-მა კი – არ იცის ან უარს ამბობს პასუხის გაცემაზე. ემხრობა თუ არა მოსახლება ნატოში გაწევრიანებას? ქვეყნის ჩრდილო ატლანტიკურ ალიანსში გაწევრიანება, სრულად, ან მეტწილად რესპონდენტების 80%-ს სურს. 14%–ი საერთოდ, ან მეტწილად არ ემხრობა; 6%-მა კი არ იცის ან უარს ამბობს პასუხზე. საზოგადოებრივი აზრის კვლევა, 2023 წლის 4-23 მარტს, „საერთაშორისო რესპუბლიკური ინსტიტუტის“ დაკვეთით, ბალტიის კვლევების/გელაპის (The Gallup) მიერ ჩატარდა და საქართველოს მასშტაბით (ოკუპირებული რეგიონების გარდა), საარჩევნო უფლების მქონე და შესაბამისი ასაკის 1 500 ადამიანი გამოიკითხა. კვლევის ავტორების განმარტებით, შედეგების საშუალო ცდომილების ზღვარი +/- 2.5%-ია. კვლევა სრულად... 

ჟესტური ენის ალტერნატიული სკოლა მოხალისეობრივი ინიციატივაა, რომელიც ბათუმში 5 წელზე მეტია მუშაობს. მიზანი – სმენის არმქონე ადამიანებთან ურთიერთობის გამარტივებაა. სწავლა განსაკუთრებით ახალგაზრდებსა და მესამე სექტორის წარმომადგენლებს აინტერესებთ, თუმცა საჯარო მოხელეებიც არიან ჩართულნი.  ყველაფერი იმით დაიწყო, რომ ორგანიზაციამ „ცვლილებები თანაბარი უფლებებისთვის“ შეზღუდული შესაძლებლობის მქონე პირებისთვის ადაპტირებული სივრცის შექმნა გადაწყვიტა. ბევრი ფიქრისა და მუშაობის შემდეგ, შეძლეს ბათუმში ერთ–ერთი ცნობილი, სოციალური კაფე – თავისუფალი სივრცე შეექმნათ.  პროექტის იდეის თანაავტორი ნინო ჩხაიძე იხსენებს, რომ სივრცე, სადაც ახლა კაფეა, საწყობად გამოიყენებოდა და მსგავსი ინიციატივა, საწყის ეტაპზე, ამბიციურად ჩანდა.  ორგანიზაციის ყველა თანამშრომელი და მეგობარი ცდილობდა სახსრების მოძიებას. მოხალისეობრივად ჩაერთვნენ – შეღებეს კედლები, მოაწესრიგეს იატაკი, გააკეთეს მაგიდები. მოკლედ, რაც შეეძლოთ საკუთარი ხელით გააკეთეს და მოაწესრიგეს.  ასე, ერთობლივად შექმნეს თავისუფალი სივრცე, რომელიც დღეს, არა მხოლოდ ერთ–ერთი ყველაზე ადაპტირებული გარემოა შეზღუდული შესაძლებლობების მქონე პირებისათვის, არამედ საგანმანათლებლო და შემეცნებითი სივრცეცაა ყველასთვის. ღონისძიებები, დისკუსიები, აზრთა გაზიარება, სიახლეების გაცნობა, საგანმანათლებლო პროგრამები – „თავისუფალი სივრცის“ მთავარი მამოძრავებელი ძალაა.  #გაიზიარეპასუხისმგებლობა, რადგან #ესქვეყანაშენია

სიძულვილის ენა მოიაზრებს გამოხატვის ყველა ფორმას, რომელიც ხელს უწყობს, პროვოცირებას უწევს, ან ამართლებს ქსენოფობიას, რასობრივ შუღლს, ანტისემიტიზმს, შეუწყნარებლობას. სიძულვილის ენა მოიცავს გამონათქვამებს, მტკიცებას, იდეებსა თუ შეხედულებებს, რომლებიც მიმართულია ამა თუ იმ სოციალური ჯგუფის წინააღმდეგ; ასევე ძალადობისკენ მოწოდებას, იქნება ეს ზოგადი ხასიათის, თუ კონკრეტული ადრესატისადმი მიმართული. სიძულვილის ენის ამსახველი ტექსტები ხშირად ეყრდნობა კონსპირაციულ თეორიას, დეზინფორმაციის ხასიათს ატარებს და ამავე დროს, კონტექსტიდან ამოგლეჯილ ერთ ფრაგმენტზე ამახვილებს ყურადღებას. სიძულვილის ენა საშიშია საზოგადოებისთვის, არა მხოლოდ უფლებებისა და თავისუფლებების დარღვევის კუთხით, არამედ საზოგადოებრივი, პოლიტიკური თუ ეკონომიკური ცხოვრებიდან სხვადასხვა ჯგუფის გარიყვის საშიშროების მხრივაც. სიძულვილის ენა საფრთხეს უქმნის საზოგადოების ჰარმონიულ თანაცხოვრებას. რა ფორმით შეიძლება გამოიხატოს სიძულვილის ენა?  ეს შეიძლება იყოს ფოტო, კარიკატურა, მიმი, სიმბოლო, რაიმე დოკუმენტი, ან სტატია, რომელიც ონლაინ ან რეალურ სივრცეშია განთავსებული. იყავი ყურადღებით და ნუ გაავრცელებ სიძულვილის ენის ამსახველ მასალას! #გაიზიარეპასუხისმგებლობა, რადგან #ესქვეყანაშენია

C ჰეპატიტი საწყის ეტაპზე უჩინარი, უსიმპტომო დაავადებაა, თუმცა დროული დიაგნოსტირებისა და ჩარევის შემთხვევაში განკურნების შესაძლებლობა იზრდება. საქართველო C ჰეპატიტის მაღალი გავრცელების მქონე ქვეყნებს მიეკუთვნება, ამიტომ 2015 წლიდან C ჰეპატიტთან საბრძოლველად ელიმინაციის პროგრამა ამოქმედდა. დიაგნოსტირება და მკურნალობა პაციენტისათვის სრულიად უფასო და კონფიდენციალურია. სახელმწიფო პროგრამას ძლიერი საერთაშორისო მხარდაჭერა აქვს – ჯანმრთელობის მსოფლიო ორგანიზაციისა და აშშ–ის დაავადებათა კონტროლის ეროვნული სააგენტოსგან. მათი ექსპერტებისგან შემდგარი მრჩევალთა ჯგუფი ყოველწლიურად ჩამოდის ქვეყანაში და მონაწილეობს ელიმინაციის გრძელვადიანი სტრატეგიის შემუშავებასა და სარეკომენდაციო სამუშაოებში.  პროგრამის შედეგები ამ ეტაპისთვის ასეთია: კვლევა ჩაუტარდა 2,8 მილიონ ადამიანს, მკურნალობის პროგრამაში ჩაერთო 81,550 ადამიანი, 56, 973 კი განიკურნა. ელიმინაციის პროგრამის სხვადასხვა უწყების წარმომადგენლები არიან ჩართულნი. წლებია ამ საკითხებზე აქტიურად მუშაობენ არასამთავრობო ორგანიზაციების წარმომადგენლები, განსაკუთრებით ზიანის შემცირების ქსელში შემავალი ორგანიზაციები. ისინი საქმიანობას ორი მიმართულებით ახორციელებენ – დაავადების პრევენციის მიზნით საინფორმაციო კამპანიების წარმოება და მეორე, უშუალოდ დაავადების დადგენა–მკურნალობაში მონაწილეობა.  ერთ–ერთი მათგანია ორგანიზაცია ჰეპა პლიუსი. იგი 2010 წელს C ჰეპატიტით ინფიცირებულმა პაციენტებმა და მათი ოჯახის წევრებმა დაარსეს. მიზანი C ჰეპატიტის დიაგნოსტირებასა და მკურნალობაზე ხელმისაწვდომის გაზრდაა. ორგანიზაციამ, 2015 წლიდან დღემდე, ელიმინაციის პროგრამაში ათასობით ადამიანის ჩართვას შეუწყო ხელი. ამჟამადაც აქტიურად მუშაობენ როგორც სკრინინგული, ასევე, რე–ინფიცირების შემთხვევების კვლევებზე. ორგანიზაციამ C ჰეპატიტის მიმართულებით მუშაობა ელიმინაციის პროგრამის შექმნამდე რამდენიმე წლით ადრე დაიწყო. კერძოდ, აწარმოებდა საინფორმაციო კამპანიებს ორგანიზაცია „ახალ ვექტორთან“ ერთად, მსოფლიო ექიმები – საფრანგეთის და ფონდ „ღია საზოგადოება საქართველოს“ მხარდაჭერით.  კამპანიები მოიცავდა ცნობიერების ამაღლების სკოლებს პაციენტებისთვის, საგანმანათლებლო ღონისძიებებს ჟურნალისტებისთვის, კამპანიებს ფართო საზოგადოებისთვის – რისკებისა და გადაცემის გზების შესახებ. შეიმუშავა „ცოცხალი ბიბლიოთეკის“ პროგრამა, რომლის საშუალებითაც ადამიანები ერთმანეთს უზიარებდნენ გამოცდილებას – თუ რა არის C ჰეპატიტი და რა გზა გაიარეს C ჰეპატიტისგან განსაკურნებლად. ორგანიზაცია ჩართული იყო სასჯელაღსრულების დაწესებულებებისთვის C ჰეპატიტის პროგრამის შემუშავებასა და ჯანმრთელობის დაცვის სამინისტროს მიერ შექმნილ ექსპერტთა ჯგუფში, რომელმაც შეიმუშავა მკურნალობის პროგრამა საზოგადოებრივი ჯანდაცვისთვის.  ჰეპა პლიუსი, სატელეფონო და ონლაინ კონსულტაციის საშუალებით, ყოველდღიურად აწვდის დაინტერესებულ პირებს ინფორმაციას – სად, როგორ და რა გზებით შეიძლება მკურნალობა, ან უბრალოდ, დაავადების თავიდან აცილება.  #გაიზიარეპასუხისმგებლობა, რადგან #ესქვეყანაშენია

21–ე საუკუნეში, ტექნოლოგიების განვითარება, ინფორმაციის ხელმისაწვდომობის ზრდას და სწრაფ გავრცელებას უწყობს ხელს. მნიშვნელოვანია ინფორმაციის წყაროების სანდოობა, რათა დეზინფორმაციის გავლენის ქვეშ არ მოვექცეთ, ან უნებლიედ მისი გამავრცელებელი არ გავხდეთ. დღეს ტროლებსა და ბოტებზე მოგიყვებით, რომელთა ფუნქციაც საზოგადოებისთვის დეზინფორმაციის „შეჩეჩებაა“. ვინ არიან ბოტები და ტროლები? ბოტი – სოციალურ ქსელში არსებული ავტომატიზებული პროფილია, რომელსაც რეალური პიროვნების მგავსი ქცევები აქვს. ექსპერტების თქმით, ბოტებს შესაძლოა, ქსელის სახე ჰქონდეს და მათ ერთი კონკრეტული მომხმარებელი, დისტანციურად მართავდეს.  ბოტების მიერ გავრცელებული აზრი მიკერძოებული, მცდარია, რომელსაც კონკრეტული მიზანი აქვს. მაგალითად, ბოტები გავლენას ახდენენ ონლაინ სივრცეში არსებულ დებატებზე, ცდილობენ აზრის ფორმირებას ან ცვლილებას.  ოქსფორდის უნივერსიტეტის ინტერნეტის ინსტიტუტი ბოტებს შორის გამოყოფს ერთ სახეობას პოლიტიკურ ბოტს. რაც, მათი აზრით, სპეციალურად შექმნილ კომპიუტერულ პროგრამას, ან კომპიუტერულ კოდს გულისხმობს. მათ არჩევნების ან რეფერენდუმის დროს ყალბი ამბების გავრცელებისთვის და პროპაგანდისთვის იყენებენ. ასევე, ამა თუ იმ სუბიექტის, ჯგუფის მიმართ ყალბი მხარდაჭერის ილუზიის შესაქმნელად – ინფორმაციის გაზიარებისთვის და მისი მოწონებებისთვის იყენებენ. ტროლი – რეალური ადამიანის მოპარული სურათებით და ინფორმაციით შექმნილი ყალბი ანგარიშია სოციალურ ქსელში, რომლის უკან სრულიად სხვა პიროვნება დგას. ანუ ტროლები რეალური ადამიანები არიან და სხვა ადამიანების ინფორმაციას იყენებენ.  ტროლები მათთვის საინტერესო თემებზე სოციალური ქსელების ჯგუფებში, ბლოგებზე, ასევე ვებ-პორტალების კომენტარების სექციაში აგრესიულ და არათემატურ კომენტარებს წერენ, რათა ყურადღება მიიქციონ და მომხმარებელთა ემოციური პროვოცირება მოახდინონ. ტროლსა და ბოტს საერთო მიზანი აერთიანებთ, ცრუ ინფორმაციის გავრცელება და საზოგადოებისთვის, საკუთარი მცდარი და მიზანმიმართულად შექმნილი აზრის მოხვევა. როგორ უნდა დავიზღვიოთ თავი ბოტებისა და ტროლების გავლენისგან?  პირველ რიგში, ნებისმიერი კომენტარი, სტატუსი თუ სტატია უნდა გადავამოწმოთ. თუკი, პოსტის ქვეშ გადავაწყდებით აგრესიულ, რადიკალურ, ან გაზვიადებულ კომენტარს, გამოხმაურებამდე დაფიქრდით, ხომ არ გვაქვს საქმე ბოტთან, ან ტროლთან.  ამოცნობის პირველი ნიშანი მათი კომენტარებია, რომლებიც ამოვარდნილია სადისკუსიო თემიდან, აგრესიულია, ხოლო ტექსტი გაუმართავია. გადაამოწმეთ ინფორმაცია, არ წამოეგოთ ბოტებისა და ტროლების „ხაფანგებს“ – ცრუ მოსაზრებებსა და ინფორმაციას, თავად არ გხდეთ ყალბი ინფორმაციის გამავრცელებლები.  იყავი ყურადღებით, რადგან #ესქვეყანაშენია  წყაროები:  www.millab.ge, www.tech.msu.edu

სოციალურად დაუცველ პირებს, რომლებსაც ზრუნვა სჭირდებათ "საქართველოს კარიტასის" შინმოვლის მომსახურებას სთავაზობს: თბილისში, გორში, რუსთავში, ქუთაისში, ოზურგეთში, ახალციხესა და ბათუმი. მომსახურებას ყოველწლიურად 1000–მდე ადამიანი იღებს. ბენეფიციარის შერჩევა ხდება სოციალური სტატუსის და საჭიროების მიხედვით. სოციალურად დაუცველი პირებისთვის მომსახურების ბინაზე მიწოდება სახელმწიფო სუბსიდირებული პროგრამის, შემოწირულობებისა და დონორი ორგანიზაციების ფინანსური მხარდაჭერით ხორციელდება. შინმოვლის პროგრამა გერმანულ გამოცდილებას ეფუძნება, რომელიც აერთიანებს სამედიცინო, სარეაბილიტაციო და ფსიქოლოგიურ მომსახურებას. ბენეფიციარების გარდა, პროექტი მათი ოჯახის წევრებსაც სხვადასხვა ტიპის დახმარებას უწევს – მათი ფსიქო-სოციალური რეაბილიტაციის მიზნით. ამ ეტაპზე, თბილისში „ზრუნვის სახლის“ საპილოტე პროექტი ხორციელდება იმ ადამიანებისათვის, რომლებსაც 24 საათიანი მომსახურება ესაჭიროებათ. შინმოვლის პროექტის თანამშრომლების კვალიფიკაციის ამაღლების მიზნით უწყვეტი განათლების პროგრამები ხორციელდება. 2014 წელს „საქართველოს კარიტასში“ შეიქმნა სასწავლო–საკონსულტაციო ცენტრი, რომელიც ყოველწლიურად 1000–მდე საექთნო განათლების სტუდენტს, ექთანს, ან არაფორმალურ მომვლელს უტარებს სწავლებას შინმოვლის, ავადმყოფის მოვლისა და გერიატრიის-გერონტოლოგიის მოდულების მიხედვით. სასწავლო მოდულები ცენტრის ექსპერტების მიერ შემუშავდა და განათლების სამინისტრომ ექთნების საგანმანათლებლო პროგრამების სავალდებულო საგნად შეიტანა.  შინმოვლა „საქართველოს კარიტასის“ საქმიანობის ერთ–ერთი მიმართულებაა. საქველმოქმედო ფონდი 1994 წლიდან მუშაობს და მისი მიზანია სოციალურად დაუცველ მოქალაქეებზე, შშმ პირებსა და მიუსაფარ ბავშვებზე ზრუნვა. საქართველოს კარიტასი მართავს მიუსაფარ ბავშვთა 2 ცენტრს თბილისსა და რუსთავში, რომელიც აერთიანებს მობილურ ჯგუფებს, დღის ცენტრებსა და 24 საათიან თავშესაფრებს. ბავშვებისთვის და ახალგაზრდებისთვის აქვს საგანმანათლებლო პროგრამები და სოციალური საწარმოები. ერთ–ერთი ბენეფიციარი მოკლედ ასე აღწერს „კარიტასს“ – „მიხარია აქ მოსვლა და მიყვარს ეს ადგილი. კარიტასმა ჩემს ცხოვრებაში ბევრი რამ შეცვალა!“

ძნელია ემოციების გარეშე უყურო თენგიზ აბულაძის ფილმ „მონანიებას“. ფილმი ღიად გვიყვება საბჭოთა სისასტიკეზე – პოლიტიკურ რეპრესიებზე, მანამდე ეს თემები კინოსა და ლიტერატურაში მინიშნებებით თუ იყო გადმოცემული. მის სცენარზე მუშაობა, გადაღება რამდენიმე წელი გრძელდებოდა. ხოლო დასრულებული ფილმი რამდენიმე წლის მანძილზე თაროზე იყო შემოდებული, რადგან საბჭოთა ხელისუფლება ეწინააღმდეგებოდა დიდ ეკრანზე მის ჩვენებას.  მიუხედავად ამისა, საზოგადოებაში ფილმის და მისი შინაარსის შესახებ მალე გავრცელდა ხმები. გარკვეულ წრეებში, მისი ფარულად ნახვაც შესაძლებელი იყო. რამდენიმე წლიანი ლოდინის შემდეგ ფილმი დიდ ეკრანზე გამოჩნდა. ფილმის სცენარის შექმნის უამრავი ვერსია არსებობს, თუმცა ერთი ცხადია: საბჭოთა რეპრესიების შესახებ შექმნილი ფილმის მთავარი გმირის ბარათელის ამბავი ძალიან ჰგავს 1937 წელს დიდი რეპრესიების დროს დახვრეტილი მხატვრის, დიმიტრი შევარდნაძის ამბავს. ფილმში ბარათელი დიმიტრი შევარდნაძის მსგავსად იცავს ტაძარს და მის დაცვას ეწირება. თენგიზ აბულაძის ფილმებს არასდროს აკლდა წარმატება, თუმცა „მონანიება“ მაინც გამორჩეულია და არაერთი ჯილდო მიიღო. იგი დღემდე ერთ–ერთი საუკეთესო ფილმია ქართულ კინოინდუსტრიაში. #გახსოვდესისტორია, რადგან #ესქვეყანაშენია

საქართველოს ყველა რეგიონში მუშაობენ საზოგადოებრივი ორგანიზაციები, რომელთა საქმიანობის ძირითადი მიმართულებაა სხვადასხვა ჯგუფების სოციალურ მდგომარეობაზე ზრუნვა. მათ ხშირად სოციალური სერვისების მიმწოდებელ (service provider) ორგანიზაციებსაც უწოდებენ. მათი საქმიანობის მიმართულება ფართოა – განათლება, ჯანდაცვა, ბავშვთა და მოზარდთა ცენტრები, თავშესაფრები, ინკლუზიური განათლება, სპეციალური საგანმანათლებლო პროგრამები, საადვოკატო სერვისები და ასე შემდეგ. მათი ნაწილის როლი და საქმიანობა განსაკუთრებით მას შემდეგ გახდა თვალსაჩინო, რაც ქვეყანაში სამზრუნველო დაწესებულებების დეინსტიტუციონალიზაციის პროცესი დაიწყო და იქ მყოფი ადამიანების მიმართ ზრუნვის საჭიროება დადგა დღის წესრიგში. ასეთ ორგანიზაციებს ბევრი ადამიანი იცნობს, განსაკუთრებით იმ თემის წარმომადგენლები, რომელთა განვითარებაზეც მიმართულია ორგანიზაციების რესურსები. მაგალითად სოციალური თერაპიის სახლი, პირველი ნაბიჯი, თემი „ქედელი“, ფსიქო–სოციალური და სამედიცინო რეაბილიტაციის ცენტრი, ზიანის შემცირების ქსელი და ასე შემდეგ. მათი სერვისების უმეტესობა (შინმოვლა, დღის ცენტრები სხვადასხვა ბენეფიციარებისთვის, ელიმინაციის თუ სხვა პროგრამები) უფასოა და იგი შემოწირულობებით, ბენეფიციართა ვაუჩერული დაფინანსების სისტემით და დონორი ორგანიზაციების ფინანსური მხარდაჭერით ხორციელდება.

ჩვენს გარშემო, შესაძლოა, მოულოდნელად წარმოიშვას კონფლიქტები, უთანხმოებები, დაირღვას ჩვენი უფლებები. მათი მიზეზი უამრავი შეიძლება იყოს: სამსახურიდან გათავისუფლება; ჯანმრთელობის მდგომარეობის გაუარესება ექიმის უყურადღებობის გამო; უსაფუძვლო ჯარიმა; და ასე შემდეგ. ეს არის იმ საკითხების მცირე ჩამონათვალი, რომლებიც აუცილებლად კანონის საფუძველზე უნდა გადაწყდეს. სასამართლო სწორედ ის ადგილია, სადაც დამოუკიდებლად, მიუკერძოებლად, მშვიდობიანად და კანონის შესაბამისად უნდა გადაწყდეს ჩვენთვის მნიშვნელოვანი საკითხები.  მოსამართლე კი, შესაბამისი განათლების მქონე პირია, რომელმაც ფიცი დადო, რომ დაიცავს კანონის უზენაესობას და განმარტავს რას ამბობს კანონი – დაირღვა თუ არა ის, და როგორ აგებს დამრღვევი კანონის წინაშე პასუხს. როგორი უნდა იყოს სასამართლო და მოსამართლე, რომ ჩვენი უფლებები დაიცვას?  იმისთვის, რომ სასამართლომ დაიცვას ჩვენი უფლებები, იგი უნდა იყოს:  დამოუკიდებელი; მიუკერძოებელი; ანგარიშვალდებული; გამჭვირვალე.  ჯერ კიდევ სოკრატე წერდა, რომ მოსამართლემ 4 როლი უნდა შეასრულოს: მოისმინოს თავაზიანად, უპასუხოს ბძნულად, განსაჯოს ფრთხილად და გადაწყვიტოს სამართლიანად.  სასამართლოს შესახებ ვრცლად... წყარო: coalition.ge

„გენერალი მაზნიაშვილი მამაცი კაცია. მაგრამ თუ შეიძლება ასე ითქვას, სწორედ ესაა მისი ნაკლი, მოჭარბებული სიმამაცე. ... ხშირად მოქცეულა ისე, რომ შეიძლებოდა თავი წაეგო და ხელიდან გამოგვცლოდა ისეთი კაცი, რომლის დაკარგვაც დიდ ზიანს მოგვიტანდა“, ასე წერდა გიორგი კვინიტაძე გენერალ გიორგი მაზნიაშვილის შესახებ. საბჭოთა დიდი ტერორის დროს გენერალი მაზნიაშვილი და მისი ვაჟი დახვრიტეს. გიორგი მაზნიაშვილი, მამის მსგავსად, სამხედრო კარიერაზე ოცნებობდა, იუნკრების სასწავლებლის დამთავრების შემდეგ არმიაში დაიწყო სამსახური. პირველი რესპუბლიკის დროს, იგი იყო საქართველოს რესპუბლიკის შეიარაღებული ძალების უმაღლესი მთავარსარდალი, 1921 წელს მეთაურობდა სამხედრო ნაწილებს წითელი არმიის წინააღმდეგ. სხვადასხვა დროს იყო აფხაზეთის გენერალ-გუბერნატორი, ახალციხე-ახალქალაქის გენერალ-გუბერნატორი, თბილისის გენერალ-გუბერნატორი. რუსეთის მიერ საქართველოს ოკუპაციამ გენერლის და პირველი რესპუბლიკის უამრავი მოქალაქის ცხოვრება რადიკალურად შეცვალა... თავგანწირული და აქტიური ბრძოლის მიუხედავად, რუსეთის წითელმა არმიამ თბილისი დაიკავა და ეროვნულ ძალებს სხვადასხვა მიმართულებით შეუტია. გენერალს, თბილისდან ბათუმამდე რამდენიმე ბრძოლის წარმოებაც მოუწია. ბათუმში ჩასულს სურათი შეცვლილი დახვდა – გენერალმა მაზნიაშვილმა, თანამებრძოლებთან და ათეულობით მოხალისესთან ერთად, თურქები ქალაქიდან განდევნა. იგი ემიგრაციაში აღარ წასულა. 1923 წელს, საბჭოთა რეჟიმმა აღმოაჩინა „სამხედრო ცენტრი“. ამ საქმეზე გენერალი მაზნიაშვილიც დააპატიმრა და საქართველოდან გააძევა. დევნილი გენერალი, ემიგრაციაში ვერ გაჩერდა და საქართველოში დაბრუნდა. მშობლიურ სოფელში დასახლდა და გლეხურ მეურნეობას მიჰყო ხელი. 1937 წელს, საბჭოთა დიდი ტერორის დროს, გენერალი და მისი შვილი დააპატიმრეს და დახვრიტეს. #გახსოვდესისტორია,რადგენ #ესქვეყანაშენია