თბილისი. 28 აპრილი სამუშაო ადგილზე დაშავებულთა და დაღუპულთა ხსოვნის საერთაშორისო დღეა. ამ დღესთან დაკავშირებით, 25 აპრილს საქართველოს პარლამენტის ეროვნულ ბიბლიოთეკაში სახალხო დამცველის მიერ ორგანიზებული რიგით მესამე საჯარო დებატები გაიმართა თემაზე - „ვის ეკისრება პასუხისმგებლობა შრომის უსაფრთხოებაზე?". სრულად წყარო: www.ombudsman.ge

თბილისი. 25 აპრილს, საქართველოს ახალგაზრდა იურისტთა ასოციაციამ პრესკონფერენცია გამართა. ორგანიზაციას მიმართა ასოციაცია ,,მომავლის იმედმა", რომლის მიერ მიწოდებული ინფორმაცია ეხება ჩვილი ბავშვების დაბადების მოწმობების გაყალბებას მათი საზღვარგარეთ უკანონოდ გაყვანის მიზნით. „საქმის მნიშვნელობიდან, ბავშვთა უფლებების სენსიტიურობიდან და მსგავსი დანაშაულის სამომავლო პრევენციის აუცილებლობიდან გამომდინარე, საია მოუწოდებს შინაგან საქმეთა სამინისტროსა და პროკურატურას, უზრუნველყონ საქმეზე სწრაფი, ობიექტური და ეფექტური გამოძიების წარმართვა", ნათქვამია საიას ვებ-გვერდზე. სრულად წყარო: gyla.ge

საერთაშორისო არასამთავრობო ორგანიზაცია „ამნესტი ინტერნეიშენალმა" ანტიდისკრიმინაციული კანონპროექტის შესახებ განცხადება გაავრცელა. „საქართველოს მთავრობამ უნდა გაითვალისწინოს სამოქალაქო საზოგადოების წუხილი და ისეთი კანონპროექტი შემოგვთავაზოს, რომელიც არა მხოლოდ ფურცელზე აკრძალავს დისკრიმინაციას, არამედ დისკრიმინაციის ყველა ფორმის აღმოფხვრას რეალობად აქცევს", ნათქვამია განცხადებაში. სრულად წყარო:identoba.com

თბილისი. ადამიანის უფლებები სწავლებისა და მონიტორინგის ცენტრში მაია ბარკაიამ მოხსენება წაიკითხა. „ინტერსექციური ჩაგვრის თეორია როგორც ალტერნატივა" - სამოქალაქო აქტივის ფარგლებში ჩატარდა. მოხსენება   წყარო:ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრმა გამოაქვეყნა პუბლიკაცია „იეჰოვას მოწმეთა მიმართ გამოვლენილი ძალადობის შემთხვევების" შესახებ. ორგანიზაცია პუბლიკაციაში ეყრდნობა სახალხო დამცველის 2013 წლის ანგარიშსს და ასევე თავად საქართველოს იეჰოვას მოწმეთა ქრისტიანული ორგანიზაციის მიერ მიწოდებულ ინფორმაციას. სრულად წყარო: emc.org.ge

კახეთი. თელავის დემოკრატიული ჩართულობის ცენტრში, წინასაარჩევნო გარემოსა და საარჩევნო კოდექსში შეტანილ ცვლილებებზე იმსჯელეს. შეხვედრა ,,ახალგაზრდა იურისტთა ასოციაციის თელავის ოფისის" მიერ იყო ორგანიზებული, რომელსაც დაინტერესებული პირები და არასამთავრობო ორგანიზაციების, საინიციატივო ჯგუფების და პოლიტიკური პარტიების წარმომადგენლები ესწრებოდნენ. მარეხ მგალობლიშვილი, საიას თელავის ოფისის ხელმძღვანელი: ,,შეხვედრის მიზანი იყო საზოგადოების ინფორმირება მათი როლის შესახებ წინასაარჩევნო პროცესებში, რათა თავიდან ავიცილოთ სერიოზული დარღვევები წინასაარჩევნოდ და ასევე არჩევნების დღეს”.

თბილისი. 22 აპრილს საქართველოს სახალხო დამცველის აპარატში დისკრიმინაციის ყველა ფორმის აღმოფხვრის შესახებ კანონისპროექტთან დაკავშირებით შეხვედრა გაიმართა. შეხვედრას საქართველოს სახალხო დამცველი, მისი აპარატის თანამშრომლები და არასამთავრობო ორგანიზაციების იმ ჯგუფის წარმომადგენლები ესწრებოდნენ, რომლებმაც 15 აპრილის განცხადებით ხელისუფლებას დისკრიმინაციის წინააღმდეგ ბრძოლისთვის ეფექტური მექანიზმების ამოქმედებისკენ მოუწოდეს.  სრულად წყარო: ombudsman.ge

აჭარა. 23 აპრილს, ბათუმის სახელმწიფო უნივერსიტეტში საინფორმაციო შეხვედრა  - „ლეგალური დასაქმების შესაძლებლობები საზღვარგარეთ" - გაიმართა. დასაქმების შეთავაზების სანდოობა, რა უნდა ვიცოდეთ საზღვარგარეთ გამგზავრებამდე, მიგრანტების უფლებები და მოვალეობები - ეს ის თემებია, რომლებზეც  შეხვედრაზე შოთა რუსთაველის სახელმწიფო უნივერსიტეტის სტუდენტებს მიგრაციის საერთაშორისო ორგანიზაციის წარმომადგენელი ესაუბრა. ღონისძიების მიზანი საქართველოში კანონიერი, უსაფრთხო მიგრაციის ხელშეწყობაა. შეხვედრა ევროკავშირის აღმოსავლეთ პარტნიორობის ინტეგრაციისა და თანამშრომლობის პროგრამის ფარგლებში გაიმართა. შეხვედრები ბათუმისა და ქობულეთის საჯარო სკოლებშიც ჩატარდება.

თბილისი. თბილისის ფსიქიკური ჯანმრთელობის ცენტრისა და პარტნიორობა ადამიანის უფლებების წარმომადგენლება, 22 აპრილს, სამუშაო შეხვედრა გამართეს. შეხვედრის მიზანს წარმოადგენდა ფსიქიკური ჯანმრთელობის ცენტრის სერვისის მიმღებ ქალთა საჭიროებების კვლევა. გამოვლინდა მთელი რიგი საკითხები, რომლის წინაშეც დგანან ფსიქო–სოციალური საჭიროებების მქონე ქალები დაწესებულებაში და მის გარეთ ოჯახებში, საზოგადოებაში. შეხვედრა გაიმართა ევროკავშირისა და საქართველოში ქალთა ფონდის მიერ მხარდაჭერილი პროექტის – „ფსიქიატრიულ დაწესებულებებში მყოფ და ფსიქო–სოციალური საჭიროებების მქონე ქალთა დაცვა ძალადობისგან" – ფარგლებში. წყარო: ორგანიზაციის ვებგვერდი სოციალურ ქსელში

თბილისი. ქართველთა მუსლიმთა კავშირმა, მედიის განვითარების ფონდმა (MDF) და ტოლერანტობის და მრავალფეროვნების ინსტიტუტმა (TDI) ტელეკომპანია „რუსთავი 2"-ს თვითრეგულირების ორგანოში უჩივლეს. „არასამთავრობო ორგანიზაციების უკმაყოფილება გადაცემა P.S.-ში 6 აპრილს გასულმა სიუჟეტმა გამოიწვია. ორგანიზაციები მიიჩნევენ, რომ ჟურნალისტმა აჭარაში მეჩეთის აშენების შესახებ მომზადებულ სიუჟეტში "მაუწყებელთა ქცევის კოდექსის" ხუთი პუნქტი დაარღვია, ფაქტების არასწორი ინტეპრეტაცია მოახდინა და საზოგადოება შეცდომაში შეიყვანა", იუწყება media.ge. სრულად წყარო: media.ge

თბილისი. საიას მედიის სამართლებრივი დაცვის ცენტრმა 18 აპრილს განცხადება გაავრცელა, რომლითაც ცენტრი ტელეკომპანია ტვ3–ის გადამღები ჯგუფის დაკავების შემთხვევას ეხმიანება. „როგორც 2014 წლის 15 აპრილს გორის რაიონის სოფელ აძვთან რუსი მესაზღვრეების მიერ დაკავებულმა, ტელეკომპანია ტვ3-ის გადამღები ჯგუფის წევრებმა, ჟურნალისტმა ბელა ზაქაიძემ, ოპერატორმა ვახტანგ ლეკიაშვილმა და ტექნიკურმა თანამშრომელმა მიხეილ მიხოევმა, განთავისუფლების შემდეგ მედიასთან საუბარში აღნიშნეს, რუსი მესაზღვრეების მიერ მათი დაკავება განხორციელდა საქართველოს სახელმწიფოს მიერ კონტროლირებად ტერიტორიაზე, საიდანაც ისინი შემდგომ გადაიყვანეს საქართველოს ტერიტორიის რუსეთის ფედერაციის მიერ ოკუპირებულ ნაწილში, სამხრეთ ოსეთის ტერიტორიაზე. აუცილებელია, საქართველოს სახელმწიფომ ჩაატაროს გამოძიება და დაადგინოს საქართველოს, კონკრეტულად, რომელ ტერიტორიაზე იქნა დაკავებული ტელეკომპანია ტვ3-ის გადამღები ჯგუფი, საქართველოს იურისდიქციის ქვეშ არსებულ ტერიტორიაზე თუ რუსეთის ფედერაციის მიერ ფაქტობრივად კონტროლირებად სამხრეთ ოსეთის ტერიტორიაზე და ხომ არ ჰქონდა ადგილი საქართველოს სისხლის სამართლის კოდექსის 143-ე და 154-ე მუხლებით გათვალისწინებულ დანაშაულებს. აღნიშნულის გარკვევა აუცილებელია, როგორც მომხდარზე ჭეშმარიტების დასადგენად, ისე მომავალში საქართველოში მომუშავე ჟურნალისტების უსაფრთხოების უზრუნველსაყოფად", ნათქვამია განცხადებაში.. სრულად წყარო: gyla.ge

თბილისი. 16 აპრილს, არასამთავრობო ორგანიზაციამ „კონსტიტუციის 42-ე მუხლმა" პრესკონფერენცია გამართა. ორგანიზაციის წარმომადგენლებმა ისაუბრეს სამხრეთ ოსეთის ე.წ. ადმინისტრაციულ საზღვართან მდებარე - სოფელ ატოცში მავთულხლართების გავლების შედეგად დაზარალებულთა ინტერესების დასაცავად ევროსასამართლოსათვის მიმართვის შესახებ.  პრესკონფერენციაზე ორგანიზაციამ შეშფოთება გამოთქვა  TV 3-ის ჟურნალისტ ბელა ზაქაიძის, ოპერატორ ვახო ლეკიაშვილისა და ტექნიკური თანამშრომლის მიხეილ მიხოევის რუსი სამხედროების მიერ თავისუფლების აღკვეთის ფაქტზე და მოუწოდა ხელისუფლებას, ყველა ზომას მიმართოს მათ გასათავისუფლებლად. სრულად წყარო: ორგანიზაციის გვერდი სოციალურ ქსელში.  

თბილისი. 15 აპრილს, საქართველოს ჟურნალისტური ეთიკის ქარტიამ განცხადება გაავრცელა, სადაც შეშფოთებას გამოთქვამს ტელეკომპანია TV3-ის გადამღები ჯგუფის დაკავების გამო. ტელეკომპანიის მიერ გავრცელებული ინფორმაციით, გადამღები ჯგუფის წევრები ბელა ზაქაიძე, ვახტანგ ლეკიაშვილი და მიხეილ მიხოევი კონფლიქტის ზონაში რუსმა სამხედროებმა დააკავეს. ისინი სოფელ აძვში საზღვრის გადმოწევის ფაქტის გასაშუქებლად იმყოფებოდნენ. ჟურნალისტური ეთიკის ქარტია მიმართავს სახელმწიფო უწყებებსა და საერთაშორისო ორგანიზაციებს, იზრუნონ ტელეკომპანიის წარმომადგენლების დაუყოვნებლივ გათავისუფლებაზე, ქარტია ასევე მიმართავს ცხინვალში მომუშავე კოლეგებს, დაინტერესდნენ შექმნილი ვითარებით. წყარო: qartia.org.ge

სამეგრელო. 14 აპრილს,  არასამთავრობო ორგანიზაციამ „საქართველოს დემოკრატიული ინიციატივა"  შოთა მესხიას ზუგდიდის სასწავლო უნივერსიტეტში სტუდენტებისთვის გამართა დისკუსია დისკრიმინაციის აკრძალვის და პირადი ცხოვრების  უფლების შესახებ. დისკუსიაზე ისაუბრეს ტოლერანტობის კულტურაზე, თანასწორობის პრინციპებსა და თანასწორობისა და დისკრიმინაციის აღმოფხვრის სამართლებრივ მექანიზმებზე. დისკუსიას  უძღვებოდნენ  ადამიანის უფლებათა სამართლის სპეციალისტები გიორგი მშვენიერაძე და ბესარიონ ბოხაშვილი. დისკუსიის მიზანი მიზანი იყო ხელი შეუწყოს ახალგაზრდებში ადამიანის უფლებების, ტოლერანტობის, დისკრიმინაციის აკრძალვისა და თანაშწორობის უზრუნველყოფის შესახებ ცნობირების ამაღლებას. ტრენინგები გაიმართა პროექტის – "ადამიანის უფლებათა დაცვის გაძლიერების ხელშეწყობა საქართველოში” ფარგლებში. პროექტი დაფინანსებულია ნიდერლანდების სამეფოს მთავრობის მიერ. წყარო:gdi.ge

11 აპრილს, საქართველოს ახალგაზრდა იურისტთა ასოციაციამ სამხრეთ ოსეთის გამყოფი ხაზის პირას მდებარე სოფელ დვანში მცხოვრები 19 მოქალაქის სახელით რუსეთის ფედარაციის წინააღმდეგ ადამიანის უფლებათა ევროპულ სასამართლოს მიმართა. საია ევროპულ სასამართლოში დვანის მაცხოვრებელთა მიწაზე და საცხოვრებელ სახლებზე საკუთრებით შეუფერხებელი სარგებლობის უფლების დარღვევას დავობს. სრულად წყარო: gyla.ge

თბილისი. ასოციაცია „ანიკამ" 12 აპრილს ფილარმონიიდან თავისუფლების მოედნისკენ მშვიდობიანი მსვლელობა მოაწყო.12 აპრილს შშმ პირთა უფლებების კონვენცია ოფიციალურად შედის ძალაში და ამ თარიღის აღსანიშნავად აქციის მონაწილეებმა მთავრობის წარმომადგენლებს, კერძო ბიზნესს და მოსახლეობას კიდევ ერთხელ შეახსენეს, რომ შეზღუდული შესაძლებლობის მქონე პირებს აქვთ უფლება იცხოვრონ თანაბარ პირობებში სხვა მოქალაქეებთან ერთად. აქციაში მონაწილეობა მიიღეს ასოციაცია „ანიკას" ბენეფიციარებმა, შეზღუდული შესაძლებლობის მქონე პირებმა, მათი მხარდამჭერებმა, ასოციაციის მოხალისეებმა,სამხატვრო აკადემიის კურსდამთავრებულებმა, პარტნიორი ორგანიზაციებმა. წყარო: ორგანიზაციის ვებგვერდი სოციალურ ქსელში

თბილისი. 12 აპრილს, ქუჩაში მცხოვრები და მომუშავე ბავშვების საერთაშორისო დღესთან დაკავშირებით, რუსთაველის მეტროდან თავისუფლების მეტრომდე მსველელობა გაიმართა. აქციის ორგანიზატორები იყვნენ არასამთავრობო ორგანიზაციები: არაძალადობრივი კომუნიკაციის ინსტიტუტი, წამების მსხვერპლთა ფსიქოსოციალური და სამედიცინო რეაბილიტაციის ცენტრი, პარტნიორობა ადამიანის უფლებებისთვის, კავშირი „საფარი", ასოციაცია „კამარა" და ამ საკითხით დაინტერესებული მოხალისეები. აქციის მიზანი იყო საზოგადოებისთვის და სახელმწიფოსთვის შეეხსენებინათ ის ვალდებულებები, რაც აქვთ ,,ქუჩაში მცხოვრები და მომუშავე ბავშვების" მიმართ. წყარო: ორგანიზაციის „პარტნიორობა ადამიანის უფლებებისთვის" ვებგვერდი სოციალურ ქსელში

თბილისი. საქართველოს მთავრობის მიერ პარლამენტში „დისკრიმინაციის ყველა ფორმის აღმოფხვრის შესახებ" კანონის პროექტის შესახებ სახალხო დამცველმა განცხადება გაავრცელა.პროექტით, დისკრიმინაციის აკრძალვაზე ზედამხედველობას განახორციელებს საქართველოს სახალხო დამცველი. სახალხო დამცველი გამოთქვამს მზადყოფნას, შეასრულოს დისკრიმინაციის აღმოფხვრისა და თანასწორობის უზრუნველყოფის საკითხებზე ზედამხედველობის ფუნქცია „...საქართველოს კონსტიტუციით ადამიანის უფლებებზე ზედამხედველობა სახალხო დამცველის კომპეტენცია და ვალდებულებაა. კანონპროექტი ამ შემთხვევაში გვთავაზობს განსხვავებულ მიდგომას და უფლებამოსილების ფორმებს, რომელიც საზედამხედველო კომპეტენციას უფრო ეფექტურს გახდის....წარმოდგენილ კანონის პროექტზე სახალხო დამცველის შენიშვნების ნაწილი ასახულ იქნა კანონის პროექტში. მიუხედავად ამისა, მაინც რჩება რამდენიმე პრობლემური საკითხი, რომლებზეც დამატებით გვსურს ყურადღების გამახვილება...", ნათქვამია ომბუცმენის ვებგვერდზე. სრულად წყარო: www.ombudsman.ge

კახეთი. ჰაინრიჰ ბიოლის ფონდი, თელავის მედიაკაფეში, 14 და 15 აპრილს გამართავს საჯარო ლექციების ციკლს – „ვის ეშინია ფემინიზმის საქართველოში". აღნიშნულის მთავარი მიზანია თანასწრობის იდეის შესახებ ცნობიერების ამაღლება. ლექციებს წაიკითხავენ ფილოსოფოსი, ქალთა უფლებების დამცველი ლელა გაფრინდაშვილი და დრამატურგი, დავით გაბუნია. ლექციების განრიგი წყარო: ბიოლის ფონდი

თბილისი. სახალხო დამცველის ვებ-გვერდზე განცხადება გამოქვეყნდა. „10 აპრილს სახალხო დამცველი ადამიანის უფლებათა დაცვის მდგომარეობის გაცნობის მიზნით, ზუგდიდის რაიონის სოფელ ხურჩას მოსახლეობას შეხვდა, რა დროსაც, სოფელს დაბალ სიმაღლეზე, ნელი ტემპით თვითმფრინავმა გადაუფრინა. გამყოფი ხაზის მიმდებარე ტერიტორიებიდან გრძელდება მოსახლეობის დაკავება რუსი მესაზღვრეების მიერ. მსგავსი ინციდენტები მიუთითებს, რომ რეგიონში უსაფრთხოების გამოწვევები არსებობს, რომელთა გადაჭრაც მოლაპარაკებების გზით უნდა მოხდეს. სახალხო დამცველი  მიიჩნევს, რომ აუცილებელია გადაიდგას ქმედითი ნაბიჯები გალში, ინციდენტების პრევენციისა და მონიტორინგის მექანიზმის აღსადგენად; რაც ხელს შეუწყობს  სიტუაციის განმუხტვასა და მოსახლეობის წინაშე არსებული გამოწვევების დაძლევას", ნათქვამია გავრცელებულ განცხადებაში. წყარო:ombudsman.ge

თბილისი. საერთაშორისო გამჭვირვალობა – საქართველომ გამოაქვეყნა მიხეილ კუკავას – „რა იცის საქართველოს მოსახლეობამ თავისი ჯანდაცვის უფლების შესახებ". „საზოგადოებრივი აზრის ჩვენი ბოლო მასშტაბური კვლევის მიხედვით, ქვეყანაში ჯანდაცვის ერთ-ერთ მთავარ პრობლემად საყოველთაო ჯანდაცვის და სახელმწიფო დაზღვევის პროგრამების მიმართ ნდობა და მათ შესახებ მოსახლეობის გაუთვითცნობიერებლობა რჩება. საინტერესოა, რომ მიუხედავად ამისა, გამოკითხულთა ⅓-ზე მეტი ჯანდაცვაზე ფინანსურ პასუხისმგებლობას სახელმწიფოსთან ერთად საკუთარ თავსაც აკისრებს, რაც, მოსახლეობის ამ საკმაოდ დიდი ნაწილის აშკარად ჯანსაღი მიდგომაა", ნათქვამია პუბლიკაციაში. სრულად წყარო: transparency.ge

თბილისი. საქართველოს სახალხო დამცველი საჯარო სამსახურის შესახებ კანონის გარდამავალ დებულებას არაკონსტიტუციურად მიიჩნევს. საკითხთან დაკავშირებით უჩა ნანუაშვილმა სარჩელით მიმართა საქართველოს საკონსტიტუციო სასამართლოს. სრულად წყარო: ombudsman.ge