თბილისი. 22 მაისს, თბილისის ადამიანის უფლებათა სახლში გაიმართა მრგვალი მაგიდა: „შეზღუდული შესაძლებლობების მქონე პირთა უფლებები საქართველოში". შეხვედრაზე მომხსენებლები იყვნენ „კონსტიტუციის 42-ე მუხლისა" და „პარტიორობა ადამიანის უფლებებისათვის" წარმომადგენლები. მრგვალ მაგიდაში მონაწილეობას იღებდნენ არასამთავრობო ორგანიზაციების წარმომადგენლები. წყარო:ადამიანის უფლებათა სახლის გვერდი სოციალურ ქსელში

გურია. 21 მაისს, „ახალგაზრდა პედაგოგთა კავშირის" საკონფერენციო დარბაზში გაიმართა საჯარო ფორმატის დებატი –  „მედიაში ბავშვთა უფლებების გაშუქების სტანდარტი დაცული უნდა იყოს". დებატებში ლიდერთა სკოლის მოსწავლეებთან ერთად მონაწილეობა მიიღეს „გურიის მოამბისა” და „გურია ნიუსის” ჟურნალისტებმა. დებატის თემა, ახალგაზრდების მედიაზე დაკვირვებით შეირჩა: „ჩვენს დროში, როცა საქველმოქმედო მიზნით, მასმედიის მიერ ხშირად შუქდება არასრულწლოვანთა პრობლემები – რამდენადაა დაცული ბავშვების უფლებები? ილახება თუ არა მოზარდის ღირსება მისი რამე ფორმით იდენტიფიცირების შემთხვევაში? რამდენად გამართულია სტანდარტი?". დებატის შემდეგ გამართულ დისკუსიაში საზოგადოება აქტიურად ჩაერთო. იყო განსხვავებული მოსაზრებები. წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრმა 2012-2014 წლებში, ლგბტ ადამიანების მიმართ განხორციელებული ძალადობის ანალიზი გამოაქვეყნა. ანალიზი, 2012-2014 წლებში, ლგბტპირების უფლებრივ მდგომარეობას აფასებს. შეფასებები ეფუძნება არასამთავრობო ორგანიზაციების - „იდენტობასა" და „ქალთა ინიციატივების მხარდამჭერი ორგანიზაციის" (WISG) კვლევებსა და აღნიშნული ორგანიზაციების იურისტებთან „ადამიანის უფლებების სწავლებისა და მონიტორინგის ცენტრის" (EMC) თანამშრომლების მიერ ჩაწერილ ინტერვიუებს. ასევე, სახალხო დამცველის 2013 წლის საპარლამენტო ანგარიშს. ანალიზი... წყარო: emc.org.ge

ქვემო ქართლი. 16 მაისს, გარდაბანში, არასამთავრობო ორგანიზაციამ „საქართველოს დემოკრატიული ინიციატივა" გამართა დისკუსია დამამთავრებელი კლასის მოსწავლეებისთვის და ახალგაზრდებისთვის დისკრიმინაციის აკრძალვისა და ტოლერანტობის საკითხებზე. დისკუსიას უძღვებოდნენ საქართველოს დემოკრატიული ინიციატივის იურისტი გიორგი მშვენიერაძე და თეოლოგი ბექა მინდიაშვილი დისკუსიაზე ისაუბრეს ტოლერანტობის კულტურაზე, თანასწორობის პრინციპებსა და თანასწორობის უზრუნველყოფისა და დისკრიმინაციის აღმოფხვრის სამართლებრივ მექანიზმებზე. საუბარი ასევე შეეხო ახლადმიღებულ კანონს დისკრიმინაციის ყველა ფორმის აღმოფხვრის შესახებ და ამ კანონის გარშემო ატეხილ აჟიოტაჟს. ახალგაზრდები დაინტერესდნენ, თუ რას მოუტანს ქვეყანას აღნიშნული კანონის მიღება და როგორ მოხდება მისი აღსრულება. დისკუსიის მიზანი იყო ხელი შეუწყოს ეთნიკურად მრავალფეროვანი რეგიონის ახალგაზრდებში ადამიანის უფლებების, ტოლერანტობის, დისკრიმინაციის აკრძალვისა და თანასწორობის უზრუნველყოფის შესახებ ცნობიერების ამაღლებას. წყარო: gdi.ge

თბილისი. ჯამპსტარტ ჯორჯიამ ჰომობიასთან და ტრანსფობიასთან ბრძოლის საერთაშორისო დღეს ახალი ინფოგრაფიკა გამოაქვეყნა. ასახავს 2013 წლის 17 მაისს განვითარებული მოვლენების ვიზუალურ ინფორმაციას. ვიზუალიზაცია... წყარო:feradi.info

თბილისი. სახალხო დამცველმა 16 მაისს, გაავრცელა განცხადება ჰომოფობიასა და ტრანსფობიასთან ბრძოლის საერთაშორისო დღესთან დაკავშირებით. სახალხო დამცველი მოუწოდებს დაინტერესებულ მხარეებს, გაძლიერდეს საზოგადოებასთან მუშაობა არსებული ჰომოფობიური გამოვლინებების აღკვეთისა და პრევენციისათვის; აგრეთვე განხორციელდეს სიძულვილის ნიადაგზე ჩადენილი დანაშაულებისა და სიძულვილით მოტივირებული სხვა შემთხვევების დროული, ეფექტური და ანგარიშვალდებული გამოძიება. „მიუხედავად იმისა, რომ საქართველოს კანონმდებლობა არ არის დისკრიმინაციული ლგბტ პირთა მიმართ, მისი პრაქტიკაში განხორციელება არ იძლევა უფლებადაცვის ადეკვატურ გარანტიებს. ...კვლავ პრობლემად რჩება საზოგადოებაში არსებული ჰომოფობიური დამოკიდებულება, რაც განაპირობებს სიძულვილის ნიადაგზე ჩადენილ დანაშაულებს და სხვა დისკრიმინაციულ ქმედებებს. არ ხორციელდება საზოგადოების ცნობიერების ამაღლებისაკენ მიმართული ღონისძიებები, რაც ხელს შეუწყობდა არსებული სტერეოტიპული დამოკიდებულებების რღვევას....", ნათქვამია სახალხო დამცველის განცხადებაში. სრულად... წყარო: ombudsman.ge

თბილისი. არასამთავრბო ორგანიზაციებმა ერთობლივი განცხადება გაავრცელეს 17 მაისთან დაკავშირებით. „ლგბტ უფლებებზე მომუშავე ძირითადი სათემო ორგანიზაციები იძულებულები გახდნენ უარი ეთქვათ მიმდინარე წლის 17 მაისს აიდაჰოს დღის საჯარო აღნიშვნასა და შეკრების თავისუფლებით სარგებლობაზე. ეს ერთი მხრივ, აჩვენებს ხელისუფლების სისუსტეს რეალურად დაიცვას ლგბტ პირთა გამოხატვის თავისუფლება, მეორე მხრივ კი ავლენს საზოგადოებაში ძალადობრივი და არასოლიდარული განწყობებს, რაც სახელმწიფოს, ეკლესიის, მედიისა და სამოქალაქო საზოგადოების მხრიდან სწორ გააზრებას მოითხოვს. აღსანიშნავია, რომ ლგბტ უფლებებზე მომუშავე ძირითადი სათემო ორგანიზაციების მიერ საჯარო აქციის ჩატარებაზე უარის თქმის მიუხედავად, სასულიერო პირები, ისევე როგორც სხვადასხვა საზოგადოებრივი და პოლიტიკური ჯგუფები, 17 მაისს თბილისში რამდენიმე შეკრების გამართვას გეგმავენ.... ხელისუფლებას მოვუწოდებთ მიმდინარე წლის 17 მაისს მიიღოს სათანადო პრევენციული ღონისძიებები წესრიგის, მშვიდობისა და ადამიანის უფლებების დასაცავად", ნათქვამია განცხადებაში. სრულად... წყარო: gyla.ge

თბილისი. ფრონტლაინ კლუბში, 13 მაისს, ფონდმა „ქალები ქალებისთვის" პირველი საჯარო ფორუმ–დისკუსია მოაწყო: „ქალები და მრავალფეროვანი დისკრიმინაცია". დისკუსიას ესწრებოდნენ ქალთა თემაზე მოუშავე არასამთავრობო ორგანიზაციები, მათ შორის ქალთა საინფორმაცი ცენტრი, საერთაშორისო და ადგილობრივი ფონდების წარმოამდგენლები, ასევე ექსპერტები გენდერის საკითხებში და რელიგიური კონფესიების წარმომადგენლები. წყარო: ქალთა საინფორმაციო ცენტრი

თბილისი. 10-11 მაისს, ევროკავშირის დაფინანსებული პროექტია ფარგლებში მედიისთვის ტრენინგი გაიმართა. შეხვედრის თემა იყო სოციალური რეაბილიტაციისა და ბავშვზე ზრუნვის ახალი პროგრამისა და ქუჩაში მცხოვრები და მომუშავე ბავშვების სახელმწიფო პროგრამის განხორციელებული პროგრესი. წყარო: ერთად შევეგებოთ ევროპას გვერდი სოციალურ ქსელში

აჭარა. 13 მაისს, ბათუმის დემოკრატიული ჩართულობის ცენტრში, ორგანიზაციის – „შშმ პირთა უფლებებისათვის" თავმჯდომარემ ბრიფინგი გამართა. მან „სპორტის, საჯარო სამსახურის" და „შეზღუდული შესაძლებლობების მქონე პირთა სოციალური დაცვის შესახებ კანონში" ცვლილებების შეტანის შესახებ ისაუბრა. თამაზ მჟავანაძემ კანონში არსებულ ხარვეზებზე ისაუბრა და განაცხადა, რომ „სპორტის შესახებ" კანონის მე-15 მუხლში და „საჯარო სამსახურის შესახებ" კანონის 49-ე მუხლში ნახსენებია ტერმინი „ინვალიდი", რომელიც უნდა შეიცვალოს. არასამთავრობო ორგანიზაცია ინიციატივით უმაღლეს საბჭოს უახლოეს მომავალში მიმართავს, რათა აჭარის საკანონმდებლო ორგანომ პარლამენტთან უშუამდგომლოს.

ადამიანის უფლებების დაცვის საკითხში ევროსაბჭოს კომისარმა გამოაქვეყნა ანგარიში. იგი საქართველოში თანასწორობისა და კანონის უზენაესობის კუთხით არსებულ გამოწვევს, მათ შორისფარული მიყურადღებისა და თვალთვალის მხრივ არსებულ პრობლემებს მიმოიხილავს. ადამიანის უფლებების დაცვის საკითხში ევროსაბჭოს კომისრის ანგარიში წყარო: საერთაშორისო გამჭვირვალობის ვებგვერდი სოციალურ ქსელში

თბილისი. თორმეტმა არასამთავრობო ორგანიზაციამ ანტიდისკრიმინაციულ კანონთან დაკავშირებით შემაჯამებელი შეფასება გამოაქვეყნა. "სამწუხაროა, რომ 40-მდე არასამთავრობო და რელიგიური ორგანიზაციის, ასევე სახალხო დამცველის პრინციპული მოთხოვნის მიუხედავად, არც პარლამენტმა და არც მთავრობამ კანონში არ ასახეს დაჯარიმების მექანიზმი, რაც მნიშვნელოვან წვლილს შეიტანდა დისკრიმინაციის ყველა ფორმის ეფექტიან აღმოფხვრაში. დასანანია, რომ საქართველოს მთავრობამ სამოქალაქო საზოგადოების ინფორმირების გარეშე შეცვალა და საგრძნობლად დაასუსტა იუსტიციის სამინისტროს მიერ ფართო საზოგადოებრივი ჩართულობის გზით მომზადებული პროგრესული კანონპროექტი. აღსანიშნავია ისიც, რომ გაუთვალისწინებელი ცვლილებები შევიდა კანონპროექტის ტექსტში პარლამენტის მიერ მისი მეორე მოსმენით პლენარულ სხდომაზე განხილვისას, რომელმაც დისკრიმინაციის დეფინიციაში ლეგიტიმურ მიზნებად საზოგადოებრივი წესრიგი და ზნეობა მიუთითა. ...მოვუწოდებთ საქართველოს ხელისუფლებას, ყველა ზომა გამოიყენოს მისი ცხოვრებაში დანერგვისა და პრაქტიკაში სათანადოდ იმპლემენტაციისათვის", ნათვამია განცხადებაში. სრულად  წყარო: gyla.ge

თბილისი. ფონდ ღია საზოგადოება - საქართველოს მხარდაჭერით 7 მაისს გამოქვეყნდა გზამკვლევი ჯანმრთელობისა და ადამიანის უფლებათა საკითხებზე. 744 გვერდიანი გამოცემა მოიცავს ადამიანის უფლებების საკითხებს, როგორიცაა პაციენტზე მზრუნველობა, პალიატიურ პაციენტთა უფლებები, აივ/შიდსით, ტუბერკულოზით ინფიცირებულთა უფლებები, შეზღუდული შესაძლებლობები და მათი ჯანმრთელობის უფლებები და სხვა უმცირესობათა ჯანმრთელობის საკითხები. შესაძლებელია მისი გამოყენება, როგორც თემატური და სასწავლო კურსების შესამუშავებლად, ასევე ჯანდაცვასთან დაკავშირებული სარჩელების მოსამზადებლად და სტრატეგიული სამართალწარმოების განსახორციელებლად. წყარო:ორგანიზაციის გვერდი სოციალურ ქსელში

თბილისი. სახალხო დამცველმა არასამთავრობო სექტორის, საერთაშორისო ორგანიზაციებისა და სამთავრობო უწყებების წარმომადგენლებს 2013  საქართველოს სახალხო დამცველის 2013 წლის ანგარიშის თავის „გენდერული თანასწორობა და ქალთა უფლებები" წარუდგინა. სრულად წყარო: ombudsman.ge

6 მაისს, ჟურნალისტთა საერთაშორისო ფედერაციამ 2011-2014 წლებში მედიის წარმომადგენელთა მკვლელობის, დაპატიმრების და მათზე ფიზიკური ზეწოლის ამსახველი ანგარიში გამოაქვეყნა. პრეზენტაცია შედგა პარიზში, იუნესკოს შტაბ-ბინაში, სადაც გაიმართა ყოველწლიური ფორუმი ჟურნალისტთა უსაფრთხოების თემაზე. ფედერაციის პერიოდული ანგარიში მიმოიხილავს მედიის თავისუფლების მდგომარეობას ბალკანეთსა და პოსტსაბჭოთა ქვეყნებში. ანგარიში წყარო:media.ge

თბილისი. „პარტნიორობამ ადამიანის უფლებებისთვის" პრესკონფერენცია გამართა. ღონისძიებაზე ორგანიზაციის წარმომადგენელმა სახელმწიფო უწყების მიერ, საპატრიარქოს ბავშვთა სახლებში ჩატარებულ მონიტორინგთან დაკავშირებულ ხარვეზებზე ისაუბრა: „მონიტორინგის პროცესმა ვერ უზრუნველყო ბავშვთა ძალადობის შემთხვევებზე ეფექტური რეაგირება. შრომის, ჯანმრთელობისა და სოციალური დაცვის მონიტორინგის ჯგუფმა ეფექტიანად არ შეისწავლა ბავშვთა არასათანადო მოპყრობის შემთხვევები".  წყარო:ორგანიზაციის გვერდი სოციალურ ქსელში

აჭარა. „პირველი ნაბიჯი საქართველოს" ბათუმის ფილიალის ოფისში ბენეფიციარების მშობლებისა და ადრეული ჩარევის სპეციალისტებისთვის ჩატარდა ტრენინგი თემაზე „ადვოკატირება", რომლის მიზანი სხვადასხვა სოციალური ჯგუფის უფლებებისა და ინტერესების დაცვის შესაძლებლობების შესახებ ინფორმაციის მიწოდება იყო. ტრენინგი ჩაატარა ადრეული ჩარევის პროგრამის ბათუმის კოორდინატორმა და ფსიქოლოგმა ნინო მახარაძემ, რომელმაც მონაწილეებს გააცნო ადვოკატირების საბაზისო ელემენტები და ტიპები და შესთავაზა მსმენელებს გზები და საშუალებები საკუთარი ცხოვრების და საზოგადოების მდგომარეობის გასაუმჯობესებლად. წყარო: ორგანიზაციის ვებგვერდი სოციალურ ქსელში

თბილისი. ადამიანის უფლებათა ცენტრი სასჯელაღსრულებისა და პრობაციის სამინისტროს გენერალურ ინსპექციას, ასევე მთავარ პროკურატურას მიმართავს. ცენტრი „შეშფოთებას გამოხატავს ბოლო დროს სასჯელაღსრულების დაწესებულებებში პატიმრების ცემისა და არაადამიანური მოპყრობის ფაქტებთან დაკავშირებით", ნათქვამია ცენტრის მიერ 1 მაისს გავრცელებულ მიმართვაში. ორგანიზაცია შესაბამისი უწყებებისგან დროულ რეაგირებასა და გამოძიებას ითხოვენ. სრულად წყარო: humanrights.ge

თბილისი. სახალხო დამცველმა შრომის საერთაშორისო დღესთან დაკავშირებით განცხადება გაავრცელა. 1 მაისი მშრომელთა საერთაშორისო დღეა. ამ დღეს საქართველოს სახალხო დამცველი კიდევ ერთხელ გამოთქვამს სურვილს ქვეყანაში მაქსიმალურად იქნეს დაცული მოქალაქეთა შრომითი უფლებები; უზრუნველყოფილი იქნეს უსაფრთხო და ჯანსაღი გარემო, სამართლიანი ანაზღაურება, ბავშვებისა და ქალთა შრომითი უფლებები, პროფესიული გადამზადების უფლება და სხვა. სრულად წყარო: ombudsman.ge

თბილისი. საქართველოს ახალგაზრდა იურისტთა ასოციაციამ პირველ მაისთან დაკავშირებით განცხადება გაავრცელა. „მაისს მშრომელთა საეთაშორისო დღე აღინიშნება. შრომის უფლება სოციალური უფლებების უმნიშვნელოვანესი ნაწილია და უკავშირდება სოციალური სახელმწიფოს არსს, რომლის მთავარი მიზანი ადამიანის ღირსეული ყოფის უზრუნველყოფაა. საქართველოს კონსტიტუცია იცავს შრომის უფლებას, რაც მოიცავს ადამიანის შესაძლებლობას დასაქმდეს მისი ნებისა და შესაძლებლობების შესაბამისად, არ დაექვემდებაროს იძულებით, დამამცირებელ ან ღირსებაშემლახავ შრომით გარემოს. კანონმდებლობით ასევე აღიარებულია უსაფრთხო და ჯანსაღი სამუშაო გარემოს უფლება. ასევე იკრძალება შრომით და წინასახელშეკრულებო ურთიერთობებში ნებისმიერი სახის დისკრიმინაცია რასის, კანის ფერის, ენის, ეთნიკური და სოციალური კუთვნილების, ეროვნების, წარმოშობის, ქონებრივი და წოდებრივი მდგომარეობის, საცხოვრებელი ადგილის, ასაკის, სქესის, სექსუალური ორიენტაციის, შეზღუდული შესაძლებლობის, რელიგიური, საზოგადოებრივი, პოლიტიკური ან სხვა გაერთიანებისადმი, მათ შორის, პროფესიული კავშირისადმი, კუთვნილების, ოჯახური მდგომარეობის, პოლიტიკური ან სხვა შეხედულების გამო. მიუხედავად კანონმდებლობაში დეკლარირებული გარანტიებისა, ხშირია შრომითი უფლებების დარღვევის შემთხვევები", ნათქვამია განცხადებაში. სრულად წყარო: gyla.ge

თბილისი. საერთაშორისო გამჭვირვალობა – საქართველომ ვიდეორგოლი მოამზადა – რა უნდა იცოდნენ საჯარო მოხელეებმა საკუთარი უფლებების შესახებ. ვიდეორგოლი წყარო: ორგანიზაციის ვებგვერდი სოციალურ ქსელში

აჭარა. 29 აპრილს, ბათუმში ვარდების სკვერში, ახალგაზრდულმა ორგანიზაციამ - „ცვლილებები თანაბარი უფლებებისათვის" პროექტის შემაჯამებელი ღონისძიება გამართა. შშმ მერიის წინ, სკოლის მოსწავლეებმა საზოგადოებას შშმ პირებთან დაკავშირებული სწორი და არასწორი ტერმინები სხვადასხვა გზით მიაწოდეს. აქციის მონაწილეთა ნაწილმა ტრანსფარანტებზე განათავსეს ტერმინები და მოწოდებები, რაც საზოგადოებაში შშმ პირთა ინტეგრაციას აფერხებს, ნაწილმა კი აღნიშნული ტერმინები ფერადი ცარცით ქვაფენილებზე დააწერეს. აქციაზე ასევე წარმოდგენილი იყო პერფორმანსი, რომელიც შშმ პირთა დასაქმების შესაძლებლობას უსვამდა ხაზს. პერფორმანსის შემდეგ პროექტის შესახებ გადაღებული დოკუმენტური ფილმის ჩვენება გაიმართა.