თბილისი. „იუნისეფ საქართველო" იწყებს ბავშვთა მიმართ ძალადობის საწინააღმდეგო „ფეისბუქ" კამპანიას. კამპანიის ფარგლებში საზოგადოებისთვის ცნობილი სხვადასხვა სფეროს წარმომადგენელი მშობლები მოყვებიან ისტორიებს საკუთარ შვილებზე და გამოცდილებაზე, თუ რა მეთოდებს იყენებენ ბავშვებთან ურთიერთობისას. იხილეთ სრულად კამპანიის შესახებ წყარო:UNICEF Georgia გვერდი სოციალურ ქსელში

თბილისი. საქართველოს ადვოკატთა ასოციაციის თავმჯდომარემ განცხადება გაავრცელა. „გაოგნებული ვარ საქართველოში დემოკრატიული ლოზუნგებით მოსული ხელსუფლების მხრიდან ჩემზე განხორცილებული ძალადობის გამო, რაც გამოიხატა ჩემი ფუნდამენტური უფლებების დარღვევაში. საქართველოს ხელისუფლებამ უკანონოდ მოისმინა ადვოკატთა ასოციაციის თავმჯდომარის სატელეფონო საუბარი და გამოაქვეყნა საჯაროდ. რასაც არანაირი კავშირი არ ჰქონდა სისხლის სამართლის საქმესთან", ნათქვამია ორგანიზაციის გვერდზე სოციალურ ქსელში. სრულად წყარო:ორგანიზაციის გვერდი სოციალურ ქსელში

თბილისი. სახალხო დამცველმა გამოაქვეყნა ანგარიში – ადამიანის უფლებათა მდგომარეობა საქართველოში – 2013. საქართველოს სახალხო დამცველის ანგარიში მიმოიხილავს სამოქალაქო-პოლიტიკურ, ეკონომიკურ, სოციალურ და კულტურულ უფლებათა ფართო სპექტრს. ასევე, ყურადღებას ამახვილებს საანგარიშო პერიოდში ადამიანის უფლებათა სფეროში გამოვლენილ დადებით და უარყოფით ტენდენციებზე, თავს უყრის სახალხო დამცველის მიერ ხელისუფლების სხვადასხვა შტოების მისამართით შემუშავებულ ძირითად რეკომენდაციებს, რომელთა შესრულების დროულობასა და ხარისხზე მნიშვნელოვანწილად იქნება დამოკიდებული ადამიანის უფლებათა დაცვის მაღალი სტანდარტების დამკვიდრება ქვეყანაში. ანგარიში წყარო: ombudsman.ge

თბილისი. „ადამიანის უფლებების სწავლებისა და მონიტორინგის ცენტრმა" (EMC) კვლევის „რელიგია საჯარო სკოლებში" პრეზენტაცია გამართა. კვლევაში „რელიგია საჯარო სკოლებში" მიმოხილულია მოქმედი საკანონმდებლო ჩარჩო რელიგიის თავისუფლების შუქზე. კვლევა ასევე სწავლობს სასკოლო სახელმძღვანელოების დისკურსს სხვადასხვა რელიგიური დენომინაციების შესახებ ინფორმაციის დაბალანსებულად წარმოჩენის კუთხით .დოკუმენტი აანალიზებს თბილისის რამდენიმე სკოლის მასწავლებელთა განწყობებს რელიგიურ უმცირესობებთან მიმართებით და მათი დამოკიდებულებეის გამოხატვის პრაქტიკას. სრულად წყარო: emc.org.ge

აჭარა. 2013 წელს აჭარის მთავრობასა და საზოგადოებრივ ორგანიზაცეიბს შორის გაფორმებული თანამშრომლობის მემორანდუმის საფუძველზე, შშმ პირებთან დაკავშირებით მომუშავე საზოგადეოებრივი ორგანიზაციების გაერთიანება მთავრობის წარმომადგენლებს შეხვდა, სადაც განხილეს აჭარაში შეზღუდული შესაძლებლობების მქონე ადამიანებს საზოგადოებაში ინტეგრაციისთვის ხელისშემშლელი ფაქტორები. შეხვედრის მონაწილეებმა საკონსულტაციო საბჭოს ჩამოყალიბების გადაწყვეტილება მიიღეს, რომელიც უზრუნველყოფს შშმ პირების უფლებებისა და ინტერესების დაცვა-გათვალისწინებას.

სამცხე-ჯავახეთი. 28 მარტს, ახალციხეში, დემოკრატ მესხთა კავშირში, საქართველოს დემოკრატიულმა ინიციატივამ გამართა დისკუსია ჟურნალისტებისათვის დისკრიმინაციის აკრძალვის, ქვეყანაში არსებულ და საერთაშორისო სტანდარტებზე; ასევე ტოლერანტობის კულტურასთან დაკავშირებული პრობლემებზე. დისკუსიას უძღვებოდნენ საქართველოს დემოკრატიული ინიციატივის იურისტი გიორგი მშვენიერაძე და თეოლოგი ბექა მინდიაშვილი. დისკუსიაში მონაწილეობდნენ ახალციხის მედიასაშუალებების წარმომადგენლები და ახალციხის უნივერსიტეტის ჟურნალისტიკის ფაკულტეტის სტუდენტები. დისკუსიის მსვლელობისას ისაუბრეს თანასწორობისა და ტოლერანტობის საკითხებზე, რეგიონში არსებულ მრავალფეროვნებაზე და მასთან დაკავშირებულ პრობლემებზე. გასულ წელს ადიგენის მუნიციპალიტეტის სოფელ ჭელაში განვითარებულ მოვლენებზე და ტოლერანტობის კუთხით ქვეყნაში მიმდინარე მნიშვნელოვან საკითხებზე. წყარო:gdi.ge

თბილისი. საქართველოს პენ–ცენტრის პრეზიდენტმა, რატი ამაღლობელმა გაზეთ „ასავალ–დასავალის" ჟურნალისტების, გიორგი გიგაურისა და ეთერ ჭელიძის წინააღმდეგ განცხადებით საქართველოს ჟურნალისტური ეთიკის ქარტიას მიმართა. ამის მიზეზი გაზეთის მიმდინარე წლის 13-23 და 24-30 მარტის ნომრებში გამოქვეყნებული სტატიებია, რომლებიც მწერალ ზურაბ ქარუმიძეს ეხება. სრულად წყარო: media.ge

სამცხე-ჯავახეთი. არასამთავრობო ორგანიზაციამ „საქართველოს დემოკრატიულმა ინიციატივას" ახალციხის ახალგაზრდული ცენტრის წევრებისათვის გამართა ტრენინგი დისკრიმინაციის აკრძალვის და პირადი ცხოვრების უფლების შესახებ. ტრენინგზე განიხილეს პირადი ცხოვრების უფლების დაცვის მექანიზმები, საერთაშორისო სტანდარტები და შიდა კანონმდებლობა, დისკრიმინაციის ნიშნები და ასევე დისკრიმინაციისგან დამცავი ნორმები. ტრენინგს უძღვებოდნენ ადამიანის უფლებათა სამართლის სპეციალისტები გიორგი მშვენიერაძე და ბესარიონ ბოხაშვილი. ტრენინგის მიზანი იყო ხელი შეუწყოს მოსწავლეებსა და ადამიანის უფლებების, ტოლერანტობის, დისკრიმინაციის შესახებ ცნობირების ამაღლებას. წყარო:gdi.ge

აჭარა. 27 მარტს, ბათუმის დემოკრატიული ჩართულობის ცენტრში შეზღუდული შესაძლებლობების მქონე პირთა პრობლემების მოგვარების კუთხით მომუშავე საზოგადოებრივი ორგანიზაციების შეხვედრა გაიმართა. შეხვედრის მიზანი შშმ პირთა საკითხების განხილვა და ადგილობრივი მთავრობის დონეზე მისი მოგვარების გზების ძიება იყო. შეხვედრის მონაწილეები შეთანხმდენენ, რომ აუცილებელია შეიქმნას აჭარის მთავრობასთან არსებული საკონსულტაციო საბჭო, რომელიც უზრუნველყოფს შშმ პირთა უფლებებისა და ინტერესების დაცვას, ასევე სამთავრობო პროგრამებისა და აჭარის ბიუჯეტის განსაზღვრა-დაგეგმის პროცესებში შშმ პირების უშუალო ჩართვას. მთავრობის დამჯდომარესთან საბჭოს დამტკიცების შესახებ მოლაპარაკება უკვე მიმდინარეობს.

გურია. „ახალგაზრდა პედაგოგთა კავშირის" საკონფერენციო დარბაზში გაიმართა ლიდერთა სკოლის ინტერაქტიური თეატრის მიერ მომზადებული სპექტაკლის პრემიერა. სპექტაკლი ბავშვთა იძულებით შრომას ეხებოდა.  წყარო:ორგანიზაციის გვერდი სოციალურ ქსელში

აჭარა. 27 მარტს, ბათუმის დემოკრატიული ჩართულობის ცენტრში ახალგაზრდა იურისტთა ასოციაციის ორგანიზებით შეხვედრა გაიმართა. მომხსენებლებმა ოჯახურ ძალადობასთან დაკავშირებით ისაუბრეს, სადაც აქცენტი ძალადობის გამომწვევ მიზეზებსა და საქართველოში არსებულ სტატისტიკაზე გაკეთდა. ასევე, საუბარი იყო ქალთა უფლებების დაცვის კუთხით არსებულ პრობლემებზე და გავრცელებულ სტერეოტიპეპზე, რომელიც ოჯახური ძალადობის ფაქტების რიცხვის შემცირებას უშლის ხელს. შეხვედრას ესწრებოდნენ, სამართალმცოდნეობის სპეციალობის სტუდენტები, იურისტები, მედია  და საზოგადოებრივი ორგანიზაციების წარმომადგენლები.

თბილისი. კამპანიის - „ეს შენ გეხება, ისევ გვისმენენ" - მონაწილეები პარასკევვს 28 მარტს კვლავ მართავენ აქციას  „1  საათი მოსმენების გარეშე". აქცია ფარული მიყურადებისა და უკანონო მოსმენების წინააღმდეგ მიმართული საკანონმდებლო პაკეტის პარლამენტში მიღებამდე,  ყოველ პარასკევს, 13:00-დან 14:00 საათამდე  მობილური ტელეფონების გამორთვას გულისხმობს. „მოქალაქეებს, რომელებსაც არ გსურთ ფარული მიყურადებისა და მოსმენების დანერგილი პრაქტიკის გაგრძელება და გინდათ შეცვალოთ მოქმედი კანონმდებლობა,  გამორთეთ  ტელეფონი და   ჩვენთან ერთად მოითხოვეთ საკანონმდებლო ცვლილებების მიღება". წყარო:esshengexeba.ge

თბილისი. 27 მარტს სახალხო დამცველმა „სასჯელის მოხდისაგან პირობით ვადამდე გათავისუფლებისას მსჯავრდებულთა უფლებრივი მდგომარეობა" კვლევის პრეზენტაცია გამართა. პრეზენტაციას ესწრებოდნენ სასჯელაღსრულებისა და პრობაციის მინისტრის მოადგილე გიგა გიორგაძე, ასევე საერთაშორისო და არასამთავრობო ორგანიზაციების წარმომადგენლები დაესწრნენ. სრულად წყარო: www.ombudsman.ge

იმერეთი. 26 მარტს ქუთაისის ახალგაზრდული ცენტრის წევრებისათვის გაიმართა დისკუსია თემაზე: „სიძულვილის ენა უნივერსიტეტში". დისკუსიას უძღვებოდა სტუდენტური მულტიმედია ჯგუფი „რეაქტორის" წარმომადგენელი. შეხვედრის მიზანს წარმოადგენდა სიძულვილის ენის პრობლემებზე ინფორმაციის მიწოდება ახალგაზრდებისათვის. შეხვედრაზე აჩვენეს დოკუმენტური ფილმი, რომლის გადაღების საფუძველი გახდა ბათუმის, ქუთაისისა და თბილისის უნივერსიტეტებში მომხდარი დისკრიმინაციული შემთხვევები. ფილმის დასრულების შემდეგ გაიმართა დისკუსია სამართლებრივ რეგულაციებზე და საზოგადოების ინფორმირებულობის ამაღლებაზე აღნიშნულ საკითხთან მიმართებაში. დისკუსია გაიმართა საქართველოში ეროვნული ინტეგრაციის გაძლიერების პროექტის (ANI) ფარგლებში, რომელსაც ახორციელებს გაეროს ასოციაცია (UNAG), აშშ-ის საერთაშორისო განვითარების სააგენტოს (USAID) მხარდაჭერით. წყარო:ორგანიზაციის გვერდი სოციალურ ქსელში

თბილისი. 26 მარტს ილიას სახელმწიფო უნივერსიტეტში გაიმართა დისკუსია, თემაზე „ქართულ პოლიტიკასა და მედიაში ქსენოფობიასთან და დისკრიმინაციასთან ბრძოლა". მედიის განვითარების ფონდის (MDF) და საქართველოს დემოკრატიული ინიციატივის (GDI) წარმომადგენლებმა სტუდენტებს კამპანია „არა ფობიის" ფარგლებში დაგეგმილი აქტივობები გააცნეს, ასევე წარუდგინეს MDF-ის მიერ 2013 წელს ჩატარებული მედია მონიტორინგის შედეგები და ძირითადი ტენდენციები. შეხვედრის დასასრულს გაიმართა დისკუსია. სტუდენტებმა გამოთქვეს თავიანთი მოსაზრებები, თუ როგორ შეიძლება ეფექტურად წარიმართოს კამპანია „არა ფობიას". წყარო: მედიის განვითარების ფონდის ვებგვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრმა აშშ–ის საელჩოს პროექტის ფარგლებში გამოსცა საქართველოში რელიგიის თავისუფლების დაცვის სახელმძღვანელო. სახელმძღვანელოში მიმოხილულია საქართველოს კანონმდებლობის ის ძირითადი ასპექტები, რომელიც აწესრიგებს საქართველოში რელიგიური უმცირესობების სამართლებრივ სტატუსსა და იმ ურთიერთობებს, რომლის სუბიექტებად ხშირად რელიგიური გაერთიანებები და მათი წარმომადგენლები გვევლინებიან. სახელმძღვანელოს მიზანია რელიგიური უმცირესობებისთვის რელიგიის თავისუფლების დაცვის ხელშეწყობა საკუთარი უფლებებისა და სამართლებრივი მექანიზმების თაობაზე ინფორმირებულობის ამაღლების გზით. სახელმძღვანელო წყარო: emc.org.ge

იმერეთი. 20 მარტს ქუთაისის ახალგაზრდული ცენტრის წევრებისათვის გაიმართა საჯარო ლექციას თემაზე: „ტოლერანტობის კულტურის დანერგვა და ეთნიკური უმცირსობების მდგომარეობა ქართულ საზოგადოებაში", რომელსაც საქართველოს პარლამენტის დეპუტატი ლევან ბერძენიშვილი უძღვებოდა. საჯარო ლექციის მიზანს წარმოადგენდა ახალგაზრდებს მიეღოთ ინფორმაცია ეთნიკური მრავალფეროვნების და სამოქალაქო ინტეგრაციის, ტოლერანტობის კულტურის დამკვიდრების, ეთნიკური უმცირესობების წინაშე მდგარი პრობლემების და სახელმწიფოს მიერ გატარებული პოლიტიკის შესახებ. მომხსენებელმა ახალგაზრდებს ესაუბრო ისეთ საკითხებზე, როგორიცაა: ეთნიკური უმცირესობების წინაშე მდგარი პრობლემები, ეთნიკური ერთობები და მათი ინტეგრირებულობის ხარისხი, ეროვნულ უმცირესობათა ენებზე განათლება საქართველოში, სამოქალაქო განათლების მნიშვნელობა უმცირესობებთან მიმართებაში, სახელმწიფო მმართველობის და საზოგადოებრივი ცხოვრების ყველა დონეზე უმცირესობათა წარმომადგენლების ჩართულობისა და მონაწილეობის ხარისხი, უმცირესობებისთვის ხელსაყრელი პოლიტიკური გარემო სახელმწიფოსთან ურთიერთობის, ფართო რეგიონალურ და გლობალურ კონტექსტში, სამოქალაქო ერთობის განვითარება, ქვეყნის სოციალური, ეთნიკური, რელიგიური და სამართლებრივი კუთხით ინტეგრაციაზე მიმრთული პოლიტიკის ფორმირება, კულტურათშორისი დიალოგისა და შემწყნარებლობის კლიმატის შექმნა და სხვა. საჯარო ლექცია გაიმართა „საქართველოში ეროვნული ინტეგრაციის გაძლიერების პროექტის" (ANI) ფარგლებში, რომელსაც ახორციელებს საქართველოს გაეროს ასოციაცია (UNAG), აშშ-ის საერთაშორისო განვითარების სააგენტოს (USAID) მხარდაჭერით. წყარო: ქუთაისის ახალგაზრდული ცენტრის ვებგვერდი სოციალურ ქსელში

იმერეთი. 21 მარტს ქუთაისის N1 და N 31 საჯარო სკოლებში გაიმართა დისკუსიები. კერძოდ, N1 სკოლაში ისაუბრეს ეთნიკური უმცირესობების პრობლემებსა და გამოწვევებზე, ხოლო N31 სკოლაში რელიგიის თავისუფლებისა და რელიგიური გაერთიანებების შესახებ. აღნიშნულ დისკუსიებს უძღვებოდნენ პროექტის „გააგრძელე დისკუსიის" პირველი ეტაპის მონაწილეები, რომლებიც კონკრეტულ სფეროშო მოღვაწე ექსპერტების მიერ გადამზადნენ ამ თემებთან დაკავშირებით. საერთო ჯამში ჩატარდება 10 დისკუსია ქუთაისის სხვადასხვა სკოლაში. დისკუსიები ტარდება პროექტის „გააგრძელე დისკუსიის" ფარგლებში, რომელსაც ახორციელებს ორგანზიაცია „იმპულსი 91" ფონდი „ღია საზოგადოება საქართველოს" მხარდაჭერით.

თბილისი. კამპანიის „ეს შენ გეხება! ისევ გვისმენენ!" მონაწილეები, 21 მარტს ფონდ „ღია საზოგადოება საქართველოს" ოფისში შეიკრიბნენ და პროტესტის ნიშნად ერთი საათით (13:00–დან 14:00–მდე) გამორთეს მობილური ტელეფონები. „აქციის სახელწოდებით „ერთი საათი მოსმენების გარეშე" მიზანია მოქალაქეების ინფორმირება საგამოძიებო ორგანოების მიერ ფარული მიყურადების უკანონოდ განხორციელების შესაძლებლობის შესახებ. ყველას მოვუწოდებთ, ყოველ პარასკევს ერთი საათით, 13:00-დან 14:00 საათამდე, გამორთონ მობილური ტელეფონები, სანამ პარლამენტი არ მიიღებს იმ კანონს, რომელიც სამართალდამცავების მიერ მოქალაქეების ტელეფონების უნებართვო მოსმენების პრაქტიკას დაასრულებს. ეს შენ გეხება, ერთად მოვითხოვოთ ცვლილება!", ნათქვამია საერთაშორისო გამჭვირვალობა საქართველოს ვებგვერდზე სოციალურ ქსელში. წყარო: საერთაშორისო გამჭვირვალობა საქართველოს ვებგვერდი სოციალურ ქსელში

თბილისი. პერსონალური ინფორმაციების დაცვის ინსპექტორმა თამარ ქალდანმა 19 მარტს წლიური ანგარიშის პრეზენტაცია გამართა. სრულად წყარო:www.media.ge

თბილისი. 20 მარტს, ჟურნალისტური ქარტიის საბჭომ განიხილა საქმე „კობა კობალაძე „რუსთავი2-ის" ჟურნალისტების წინააღმდეგ". კობა კობალაძის წარმომადგენელი ემზარ პაქსაძე ქარტიის საბჭოში შემოტანილ განცხადებაში ქარტიის არახელმომწერ ჟურნალისტებს ქარტიის პუნქტების დარღვევაში ედავებოდა. საბჭომ მსჯელობის შემდეგ განმცხადებლის მოთხოვნა ნაწილობრივ დააკმაყოფილა და დაადგინა, რომ „რუსთავი 2 ის ეთერში, 1 თებერვალს 21 საათიან კურიერში გასული სიუჟეტით დაირღვა ქარტიის 1-ლი პრინციპი, ხოლო მე-3, მე-4 და მე-11 პრინციპები არ დარღვეულა". გადაწყვეტილების სამოტივაციო ნაწილი მოგვიანებით გამოქვეყნდება. წყარო:qartia.org.ge

აჭარა. 17-19 მარტს, ბათუმის სამ  საჯარო სკოლაში შეზღუდული შესაძებლობების მქონე პირებმა, სკოლის დამამთავრებელი კლასის მოსწავლეებთან საინფორმაციო შეხვედრები გმართეს. შეხვედრის მიზანი შშმ პირების შესახებ მოსწავლეების ინფორმირების ხელშეწყობაა. ასევე სხვადასხვა სიმულაციებით იმ სტერეოტიპების მსხვრევის ხელშეწყობაა, რაც საზოგადოებაში  შშმ პირების ინტეგრაციას უშლის ხელს.  საინფორმაციო შეხვედრები სკოლის მოსწავლეებთან აპრილის ბოლომდე გაგრძელდება. ახალგაზრდული ორგანიზაცია „ცვლილებები თანაბარი უფლებებისათვის” პროექტის ბენეფიციარებიდან შეარჩევს ყველაზე აქტიური მოსწავლეებს, რომლებიც მომაზადებენ ქუჩის თეატრალიზირებულ პერფორმანს. პროექტი ხორციელდება აჭარის სპორტისა და ახალგაზრდობის საქმეთა დეპარტამენტის ფინანსური მხარდაჭერით.