თბილისი. საერთაშორისო გამჭვირვალობა - საქართველო აქვეყნებს ბლოგპოსტს: არის თუ არა საქართველო მიტაცებული სახელმწიფო. „ქართული არასამთავრობო ორგანიზაციები წლების განმავლობაში საუბრობდნენ საქართველოში არაფორმალური მმართველობის პრობლემაზე. 2018 წელს ეს შეფასება კიდევ უფრო დამძიმდა, როდესაც უკვე საერთაშორისო დონეზე დაიწყო დისკუსია ქვეყანაში დემოკრატიულ უკუსვლასა და სახელმწიფოს მიტაცების ნიშნების არსებობაზე. „ქართული ოცნების“ მმართველობის ორი ვადის გასვლის თავზე დაგროვილი მტკიცებულებები საკმარისია იმის სათქმელად, რომ კორუფციამ საქართველოში სახელმწიფოს მიტაცების ფორმა მიიღო“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. ადამიანის უფლებების სწავლებისა და მონიტორინგის ცენტრი (EMC) აფასებს 2019 წელს ორთაჭალაში ერთ-ერთ სამშენებლო ობიექტზე სამი მუშის გარდაცვალების ფაქტზე მიმდინარე გამოძიებისა და სისხლისსამართლებრივი დევნის პროცესს. „გამოძიების ფარგლებში კონკრეტულ პირთა სისხლისსამართლებრივი პასუხისმგებლობის გამოკვეთის მიუხედავად უნდა აღინიშნოს, რომ თავად გამოძიების პროცესი საკმაოდ გაჭიანურებული იყო, არ იქნა უზრუნველყოფილი ექსპერტიზის დასკვნის მომზადება, სხვადასხვა საგამოძიებო თუ საპროცესო მოქმედებების გონივრულ ვადებში ჩატარება. ამასთან ერთად, საგამოძიებო ორგანომ ვერ გამოკვეთა მაღალი მენეჯერული რგოლის შესაძლო სისხლისსამართლებრივი პასუხისმგებლობა“, ნათქვამია განცხადებაში. სრულად... წყარო: emc.org.ge

თბილისი. საერთაშორისო გამჭვირვალობა - საქართველო გვიხსნის თუ როგორ პარლამენტს მივიღებთ, თუკი საპარლამენტო ოპოზიცია უარს იტყვის შესვლაზე და საკანონდებლო ორგანო მხოლოდ „ქართული ოცნების” 90 დეპუტატით იქნება წარმოდგენილი. „საქართველო, კონსტიტუციის უკანასკნელი ცვლილებების თანახმად, საპარლამენტო რესპუბლიკაა და შესაბამისად, პარლამენტის გამართული ფუნქციონირება საკვანძო მნიშვნელობისაა ქვეყნის განვითარებისათვის. პარლამენტი ხალხის წარმომადგენლობითი ორგანოა, ის საქართველოს მოსახლეობის არჩევანსა და მის ნებას უნდა გამოხატავდეს. ერთპარტიული პარლამენტი ვერ შეასრულებს წარმომადგენლობითი ორგანოს ფუნქციას, ვერ შეძლებს გამართულად ფუნქციონირებას და მთავრობის კონტროლს. პარლამენტის თანამდებობები სრულად ვერ დაკომპლექტდება და ბევრ გადაწყვეტილებას პარლამენტი ვერ მიიღებს ხმათა არასაკმარისი რაოდენობის გამო. ოთხმოცდაათი წევრით წარმოდგენილი პარლამენტი ვერ მიიღებს ისეთ გადაწყვეტილებებს, რომელთა მიღებასაც 100 ან 113 ხმა ჭირდება და ძალიან გართულდება 90 ხმის მობილიზებაც. ასეთი გადაწყვეტილება კი არაერთია“, ნათქვამია ორგანიზაციის ვებგვერდზე. სრულად... წყარო: transparency.ge

თბილისი. 8 დეკემბერს, გაეროს უნივერსალური პერიოდული მიმოხილვის მე-3 ციკლის წინასასესიო ონლაინ შეხვედრა ჩატარდა, რომლის ფარგლებშიც, არასამთავრობო ორგანიზაციებისა და სახალხო დამცველის წარმომადგენლებმა გაეროში სხვა ქვეყნების მუდმივ წარმომადგენლებს მიაწოდეს ინფორმაცია ადამიანის უფლებათა დაცვის კუთხით ქვეყანაში არსებული მდგომარეობის შესახებ და გააჟღერეს კონკრეტული რეკომენდაციები, რომლებიც სასურველია შეხვედრაზე დამსწრე ქვეყნების წარმომადგენლებმა საქართველოს მისცენ. „წინასასესიო შეხვედრაზე მოხსენებით წარსდგა IDFI-ის კანონის უზენაესობისა და ადამიანის უფლებების მიმართულების ხელმძღვანელი - ქეთევან კუკავა, რომელმაც ისაუბრა მართლმსაჯულების/სამართლიანი სასამართლოს უფლებისა და გამოხატვის თავისუფლების/ინფორმაციის ხელმისაწვდომობის კუთხითსაქართველოში არსებულ მდგომარეობაზე. ქეთევან კუკავამ ასევე გააჟღერა კონკრეტული რეკომენდაციები, რომელთა გათვალისწინება აუცილებელია არსებული ხარვეზების აღმოსაფხვრელად“. სრულად... წყარო: idfi.ge

თბილისი. საქართველოს ახალგაზრდა იურისტთა ასოციაცია აქვეყნებს ვასილ ჟიჟიაშვილის, საკონსტიტუციო სამართალწარმოების იურისტის ბლოგპოსტს: [როგორი ირონიულიც არ უნდა იყოს] გილოცავთ ადამიანის უფლებების დღეს. „დღეს იუსტიციის უმაღლეს საბჭოში საქართველოს უზენაესი სასამართლოს მოსამართლის თანამდებობაზე ასარჩევად საქართველოს პარლამენტისათვის წარსადგენი კანდიდატების მოსმენის პროცედურა იწყება. ჩვენდა გაუკვირვებლად, უზენაეს სასამართლოს შემადგენლობას კიდევ შეემატებიან ის ადამიანები, რომელებიც ჩვენს საზოგადოებაში კლანის წევრებად მოიაზრებიან და რომელთა ინტერესსაც ადამიანის უფლებათა დაცვის საჭიროებაზე მაღლა კლანური ინტერესის დაყენება წარმოადგენს! როგორი ირონიულიც არ უნდა იყოს, ყველას გილოცავთ ადამიანის უფლებების დაცვის საერთაშორისო დღეს! ხოლო ადამიანის უფლებათა დამცველებს ადამიანის უფლებათა უნივერსალური დაცვისკენ მიმავალ უტოპიურ გზაზე გისურვებთ მხნეობასა და ნების სიძლიერეს“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. საქართველოს დემოკრატიული ინიციატივა წარმოგიდგენთ ანგარიშს, რომლის მიზანია 2020 წელს საქართველოში ადამიანის უფლებათა და თავისუფლებათა დაცვის მდგომარეობის მხრივ არსებული პრობლემებისა და გამოწვევების მოკლე მიმოხილვა. „დოკუმენტში განხილულია როგორც სამოქალაქო და პოლიტიკურ უფლებებთან, ასევე - კანონის უზენაესობასთან დაკავშირებული საკითხები. ქვეყანაში როგორც კონკრეტული კონსტიტუციური უფლებების, ასევე - კანონის უზენაესობის დაცვის ხარისხის ინდიკატორს უპირველესად ინდივიდუალური საქმეები და მოვლენები წარმოადგენს, რომლებშიც ჩანს ხელისუფლების, ერთი მხრივ, ნება და, მეორე მხრივ, უნარი, შეასრულოს კონსტიტუციით ნაკისრი ვალდებულებები. დოკუმენტის დიდი ნაწილი სწორედ ინდივიდუალური საქმეების/მოვლენების მიმოხილვას ეთმობა“, ნათქვამია ორგანიზაციის ვებგვერდზე. სრულად... წყარო: gdi.ge

თბილისი. ადამიანის უფლებების სწავლებისა და მონიტორინგის ცენტრის (EMC) შეფასებით, 2020 წელს ადამიანის უფლებათა მდგომარეობას ორი ძირითადი პოლიტიკური მოვლენა განაპირობებდა. „ერთი მხრივ, ეს იყო პანდემიასთან დაკავშირებული მძიმე სოციალური და ჰუმანიტარული კრიზისი და ამ პირობებში მთავრობის მიერ დადგენილი სამართლებრივი შეზღუდვები, რომელთა დაწესება და მართვა ზოგჯერ დემოკრატიული კონტროლის და კონსტიტუციური პრინციპების საწინააღმდეგოდ ხდებოდა. მეორე მოვლენა კი წინასაარჩევნო კონტექსტი და ჩვენი პოლიტიკური სისტემისა და ველისა ღრმა პოლარიზება იყო“. სრულად... წყარო: emc.org.ge

თბილისი. USAID/PROLoG-ის ფინანსური მხარდაჭერით, ივანე ჯავახიშვილის სახელობის სახელმწიფო უნივერსიტეტის მიერ გამოიცა 2020 წლის სტატიათა კრებული „ადამიანის უფლებათა დაცვა და სახელმწიფოს დემოკრატიული ტრანსფორმაცია“. 2020 წლის სტატიათა კრებული შეგიძლიათ იხილოთ აქ... წყარო: ewmi-prolog.org

თბილისი. საქართველოს ახალგაზრდა იურისტთა ასოციაციის შეფასებით, წლის განმავლობაში პრობლემურ თემებს შორის იყო საქართველოს პარლამენტის მიერ საკარანტინო ღონისძიებების განსაზღვრის უფლებამოსილების საქართველოს მთავრობაზე დელეგირება, მთელი რიგი მოწყვლადი ჯგუფების მთავრობის ანტიკრიზისული გეგმის მიღმა დატოვება. გარემოსდაცვით გადაწყვეტილებებში ადამიანის უფლებების გაუთვალისწინებლობა, საკონსტიტუციო სასამართლოს მოსამართლეების მიერ თანამდებობის გაუმჭვირვალე და დაუბალანსებელი პროცედურებით დაკავება, სისხლის სამართლის პროცესების საჯაროობის კუთხით არსებული პრობლემები, 2020 წლის საპარლამენტო არჩევნების დარღვევებით ჩატარება და სხვა საკითხები. ორგანიზაცია დადებითად აფასებს საქართველოს შრომის კოდექსში შესულ ცვლილებებს, რომლითაც გარკვეულწილად გაუმჯობესდა დასაქმებულთა შრომითი უფლებები. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება თბილისის მიუსაფართა მუნიციპალურ თავშესაფარში (ე.წ. „ლილოს თავშესაფარი“) COVID-19-ით ინფიცირების შემთხვევებს.  ორგანიზაცია თბილისის მუნიციპალიტეტსა და თავშესაფრის ადმინისტრაციას მოუწოდებს, მიიღოს ყველა ზომა ბენეფიციარების უსაფრთხოების, მათი სიცოცხლისა და ჯანმრთელობის დაცვის მიზნით. სრულად... წყარო: emc.org.ge

თბილისი. ინფორმაციის თავისუფლების განვითარების ინსტიტუტი (IDFI) აქვეყნებს ბლოგპოსტს: საქართველოს ანტიკორუფციული მაჩვენებლები უარესდება. „2020 წელს საქართველო რამდენიმე საერთაშორისო ორგანიზაციის მიერ გამოქვეყნებულ რეიტინგში მოხვდა. მათი უმეტესობა მიუთითებს ქვეყანაში კორუფციის მდგომარეობის გაუარესებაზე, რის ერთ-ერთ მიზეზად მაღალი დონის კორუფცია სახელდება. რეიტინგების ანალიზი ცხადჰყოფს, რომ ქვეყნის მიერ კორუფციასთან ბრძოლაში წლების წინ მიღწეული პროგრესი ძირითადად შეჩერებულია ან იკლებს“, ნათქვამია ორგანიზაციის ვებგვერდზე. სრულად... წყარო: idfi.ge

თბილისი. უფლებები საქართველო და ადამიანის უფლებების სწავლებისა და მონიტორინგის ცენტრი (EMC) მიიჩნევენ, რომ ირაკლი ბებუას მიმართ უხეშად ირღვევა ადამიანის უფლებათა დაცვის საერთაშორისო სტანდარტები, რაც საფრთხეს უქმნის მის ჯანმრთელობასა და უსაფრთხოებას. ორგანიზაციები თხოვნით მიმართავენ საქართველოს მთავრობასა და შესაბამის უწყებებს, გამოიყენონ მათ ხელთ არსებული ყველა დიპლომატიური, პოლიტიკური ზომა, რათა ხელი შეუწყონ ირაკლი ბებუას საქართველოს კონტროლირებად ტერიტორიაზე გადმოცემის პროცესს. ასევე, უზრუნველყონ ირაკლი ბებუას ჯანმრთელობის, უსაფრთხოებისა და სხვა ფუნდამენტური უფლებების დაცვა. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ქამრან მამედლის სტატიას: საჯარო სამსახურში დასაქმება - ეთნიკურ უმცირესობებთან დაკავშირებული პოლიტიკის ლაკმუსის ტესტი. „ქვეყანაში არსებული დეკლარაციული თანასწორობის მიუხედავად, არადომინანტური ჯგუფების სისტემური გარიყულობა და სტრუქტურული ჩაგვრა ყველაზე შიშვლად საჯარო სამსახურში დასაქმების კუთხით ვლინდება. ხაზგასასმელია, რომ ცენტრალური ხელისუფლების დონეზე, სამინისტროები, სააგენტოები, თუ სსიპ-ები მკვეთრი მონოეთნიკურობით გამოირჩევიან. ხოლო ადგილობრივ თვითმმართველობებში დასაქმებული არადომინანტური ეთნიკური ჯგუფების წარმომადგენელების ხვედრითი წილი მცირეა შესაბამის თვითმმართველობებში მცხოვრები მოსახლეობის პროცენტულ მაჩვენებელთან შედარებით“, ნათქვამია სტატიაში. სრულად... წყარო: emc.org.ge

თბილისი. J-Talks: „საუბრები მოსამართლეებთან“ სერიის ფარგლებში, გამოქვეყნდა იაგო კაჭკაჭიშვილისა (სოციოლოგი) და მანანა მესხიშვილის (თბილისის საქალაქო მოსამართლე) საუბარი თემაზე: მოსამართლის როლი ადამიანის უფლებათა დაცვაში. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს კვლევას: კულტურული დომინაციის და უმცირესობების კულტურის წაშლის ნიშნები ქვემო ქართლის რეგიონში. „კვლევის შედეგად მიღებული მონაცემები ქვემო ქართლში კულტურული დომინაციის კომპლექსურ სურათს ასახავს. კვლევის მონაცემებზე დაყრდნობით შეგვიძლია ვისაუბროთ, ერთი მხრივ, მიზანმიმართულ, თუმცა მეორე მხრივ, გაუაზრებელ სახელმწიფო პოლიტიკაზე, რომლის შედეგებიც უშუალოდ აზერბაიჯანული თემის ყოველდღიურობაზე მტკივნეულად აისახება. აზერბაიჯანული თემის წარმომადგენლებთან ჩატარებულ ინტერვიუებს ერთი საერთო ნარატივი აერთიანებს: ეს აღიარების მოლოდინია, რომელიც არადომინანტური კულტურის დანახვის, უკეთ გაცნობის ინტერესით გამოიხატება, ხოლო უპირველესი ამოცანა ქართულ საზოგადოებაში, მათი აზრით, პრობლების აღიარებაა“. სრულად...  წყარო: emc.org.ge

თბილისი. ევროკავშირი საერთაშორისო პარტნიორებთან ერთად მტკიცედ განაგრძობს ქალების, ბავშვების, უმცირესობებისა და იძულებით გადაადგილებული პირების უფლებების დაცვაზე მიმართული ღონისძიებების განხორციელებას, ისევე, როგორც სიკვდილით დასჯის, წამების, ადამიანებით ვაჭრობისა და დისკრიმინაციის წინააღმდეგ ბრძოლას უფრო ინკლუზიური საზოგადოებების ჩამოყალიბების მიზნით. ადამიანის უფლებების შესახებ განცხადებებისა და ისტორიების სანახავად თვალი ადევნეთ სოციალური მედიის გვერდებს და გაიგეთ მეტი ვებგვერდზე...  წყარო: ევროკავშირის გვერდი სოციალურ ქსელში

ქვემო ქართლი. საქართველოს ახალგაზრდა იურისტთა ასოციაციის ინფორმაციით, 3 წლიანი სასამართლო დავა სამსახურიდან უკანონოდ გათავისუფლებული ქალის სასარგებლოდ დასრულდა.  „სასამართლოს გადაწყვეტილებით, გარდაბნის მუნიციპალიტეტის მერიას უკანონოდ გათავისუფლებული თანამშრომლის სასარგებლოდ კომპენსაციის გადახდა დაეკისრა. მოპასუხე ადმინისტრაციულმა ორგანომ შტატგარეშე თანამშრომელთან დადებული შრომითი ხელშეკრულება 2017 წლის დეკემბერს შეწყვიტა. ხელშეკრულების შეწყვეტის საფუძვლად გარდაბნის მუნიციპალიტეტის მერიამ ,,სხვა ობიექტური გარემოება“ მიუთითა, თუმცა, ვერ დაასაბუთა გათავისუფლების რეალური საფუძველი“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. 2020 წლის 4, 5, 6 დეკემბერს იმართება პირველი საერთაშორისო კონგრესი ყრუუსინათლობის შესახებ საქართველოში: „ვხედავ და მესმის შეხებით.“  კონგრესის მიზანია გადაწყვეტილების მიმღები პირებისა და საზოგადოების ცნობიერების ამაღლება ყრუუსინათლობის შესახებ. ასევე, მათი ყურადღების მიპყრობა ორმაგი სენსორული დარღვევის ეფექტიანი მართვის სტანდარტის შექმნისა და დანერგვის მნიშვნელობაზე. სამი დღის განმავლობაში, დაგეგმილ ლექციებზე, დისკუსიებსა და ვორქშოფებზე, რომლებსაც დარგის ქართველი და უცხოელი ექსპერტები გაუძღვებიან, განიხილება ყრუ-უსინათლო პირთა წინაშე არსებული გამოწვევები საქართველოსა და მსოფლიოს სხვა ქვეყნებში, გაზიარდება საერთაშორისო გამოცდილება და საუკეთესო პრაქტიკები. იხ. პროგრამა... წყარო: ორგანიზაციის გვერდი სოციალურ ქსელში

აჭარა. საქართველოს ერთ-ერთმა დიდმა ქალაქმა - ბათუმმა აიღო ვალდებულება, შეუერთდეს 40-ზე მეტი ქვეყნის 3000 ქალაქს და ადგილობრივ თვითმმართველობას ბავშვზე მორგებული ქალაქების ინიციატივაში, რომელიც გაეროს ბავშვთა ფონდის მხარდაჭერით ხორციელდება. „ბავშვზე მორგებული ქალაქების ინიციატივა, რომელსაც უძღვება გაეროს ბავშვთა ფონდი, მხარს უჭერს მუნიციპალიტეტების მთავრობებს ადგილობრივ დონეზე ბავშვთა უფლებების განხორციელებაში, გაეროს ბავშვის უფლებათა კონვენციის გათვალისწინებით. ინიციატივა იმავდროულად წარმოადგენს ქსელს, რომელიც აერთიანებს მთავრობებს და სხვა პარტნიორებს - სამოქალაქო საზოგადოების ორგანიზაციებს, კერძო სექტორს, სამეცნიერო სექტორს, მედიას, და რაც ძალიან მნიშვნელოვანია, თავად ბავშვებს, რომლებსაც სურთ, რომ თავიანთ ქალაქებსა და მუნიციპალიტეტებში გაუმჯობესდეს ბავშვებზე მორგებული გარემო“, ნათქვამია ორგანიზაციის ვებგვერდზე. სრულად... წყარო: www.unicef.org

თბილისი. ადამიანის უფლებების სწავლებისა და მონიტორინგის ცენტრი (EMC) გთავაზობთ დოკუმენტს მარტივად წასაკითხ ფორმატში - „ქმედუნარიანობა და გადაწყვეტილების მიღებაში მხარდაჭერა“. „დოკუმენტით შშმ პირები (განსაკუთრებით, ინტელექტუალური და ფსიქოსოციალური ნიშნით შშმ პირები), მათი ოჯახის წევრები და ფართო საზოგადოება შეძლებს, მარტივად გასაგები ენით მიიღოს ინფორმაცია ქმედუნარიანობისა და მხარდაჭერის სისტემის შესახებ“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება 3 დეკემბერს - შშმ პირთა საერთაშორისო დღეს. ორგანიზაცია საქართველოს მთავრობას ინსტიტუციონალიზაციის პრაქტიკის დასრულებისკენ მოუწოდებს, რაც დიდი ზომის დაწესებულებების დახურვას და პარალელურად, ადამიანის უფლებებთან თავსებადი თემზე დაფუძნებული ალტერნატიული მხარდამჭერი სერვისების შექმნას გულისხმობს. „წლების მანძილზე სახელმწიფოს მიერ ფსიქოსოციალური და ინტელექტუალური ნიშნით შშმ პირთა საჭიროებების უგულვებელყოფა ასობით ადამიანს საზოგადოებაში ცხოვრების შესაძლებლობას ართმევს და ფსიქიატრიულ დაწესებულებებსა და პანსიონატებში ცხოვრებისთვის წირავს. დიდი ზომის დაწესებულებებში მყოფი ადამიანების უმეტესობა ცხოვრების დიდ ნაწილს ფსიქიატრიულ საავადმყოფოსა და პანსიონატებში ატარებენ, რაც საზოგადოებისაგან იზოლაციის პარალელურად, გულისხმობს ცხოვრებას ძალადობასა და უგულვებელყოფაში, შრომით ექსპლუატაციაში, ღირსების შემლახავ საცხოვრებელ გარემოში, ფიზიკური და ქიმიური შეზღუდვების, მუდმივი კონტროლისა და დისციპლინირების ქვეშ“, ნათქვამია ორგანიზაციის განცხადებაში. სრულად... წყარო: emc.org.ge

სამეგრელო. გაეროს ბავშვთა ფონდის წარმომადგენელი საქართველოში, ღასან ხალილი შოთა მესხიას სახელობის ზუგდიდის სახელმწიფო სასწავლო უნივერსიტეტს ეწვია. „ერთი წლის წინ გაეროს ბავშვთა ფონდსა და უნივერსიტეტს შორის პარტნიორობას ჩაეყარა საფუძველი, რომელიც სასწავლო სისტემაში ბავშვის უფლებების თემატიკის დანერგვას ითვალისწინებს. დღეს სწორედ ამ პარტნიორობის შედეგებსა და სამომავლო გეგმებზე ისაუბრეს. მოხარულები ვართ, რომ უნივერსიტეტში ისწავლება კურსი ბავშვის უფლებების შესახებ“. სრულად... წყარო: ორგანიზაციის გვერდი სოციალურ ქსელში