თბილისი. #USAID-ის და #UNAG-ის PITA-ას პროგრამის ტოლერანტობის კვირეულის კამპანიის ფარგლებში, წარმოგიდგენთ ვიდეოებს: ტოლერანტობა არის. რას ნიშნავს ტოლერანტობა? რატომ არის მნიშვნელოვანი ტოლერანტობა და მრავალფეროვნება ქვეყნის დემოკრატიული და ინკლუზიური განვითარებისთვის? - საუბრობს ევანგელურ-ბაპტისტური ეკლესიის ეპისკოპოსი რუსუდან გოცირიძე  სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) მიხაილოსთვის შინაპატიმრობის რეჟიმის გამკაცრებას ასაჩივრებს. „მიგვაჩნია, რომ დაუსაბუთებელი და უსამართლოა პრობაციის ბიუროს მიერ მიღებული გადაწყვეტილება, რომლითაც მიხაილოს 13 და 17 ოქტომბერს ღამის საათებში საცხოვრებელ ტერიტორიაზე არყოფნა არ ჩაეთვალა საპატიოდ. შესაბამისად, ასევე დაუსაბუთებელი თბილისის საქალაქო სასამართლოს მიერ 11 ნოემბერს მიღებული გადაწყვეტილება მიხაილოს მიმართ შინაპატიმრობის რეჟიმის გამკაცრების თაობაზე. ორივე ზემოაღნიშნულ გადაწყვეტილებებს EMC კანონით დადგენილი წესით ასაჩივრებს“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. კონსულტაციის და ტრენინგის ცენტრი გთავაზობთ თვითმართულ (self-paced) ონლაინ კურსებს „სექსუალური შევიწროება სამუშაო ადგილზე“. „კურსი განკუთვნილია საზოგადოებრივი, არაკომერციული, არასამთავრობო ორგანიზაციების მენეჯერებისა და ხელმძღვანელებისთვის - მათთვის, ვისაც ორგანიზაციაში ჯანსაღი და დისკრიმინაციისგან თავისუფალი გარემოს უზრუნველყოფა სურს. კურსი შექმნილია კონსულტაციის და ტრენინგის ცენტრის მიერ აღმოსავლეთ-დასავლეთის მართვის ინსტიტუტის სამოქალაქო საზოგადოების განვითარებისა და მოქალაქეების ჩართულობის პროექტის (ACCESS) ფარგლებში“. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ბლოგპოსტს: „შშმ პირების დამოუკიდებელი ცხოვრების უფლება – მძიმე რეალობა და მისი ალტერნატივა“. „შშმ პირების დამოუკიდებლობა და მათი საზოგადოებრივ ცხოვრებაში ჩართვა ერთ-ერთი ყველაზე პრობლემური და აქტუალური საკითხია. აღნიშნული ბლოგი სწორედ დამოუკიდებელი ცხოვრების უფლებასა და ამ მხრივ, ქართულ გამოცდილებას ეხება. სახელმწიფოს უმოქმედობის პარალელურად განსაკუთრებით სავალალო მდგომარეობაა ფსიქიატრიულ დაწესებულებებში. ეს ინსტიტუციები ხასიათდება პაციენტების დიდი რაოდენობით (ასეულობით ბენეფიციარით) და პერსონალის სიმწირით. მათ მნიშვნელოვან ნაწილში არის ღირსების შემლახავი მოპყრობა და დაბალი ხარისხის ინფრასტრუქტურა. ხშირია მცხოვრებლების, ასევე, მომსახურე პერსონალსა და მცხოვრებთა შორის კონფლიქტი და ძალადობა, ასევე, სერვისის მიმღებთა მიმართ სხვა ტიპის არასათანადო მოპყრობა“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. კოალიცია ეხმიანება 2020 წლის 14 ნოემბერს თემქაზე მომხდარ მ.მ.-ს მკვლელობის ფაქტს დასამართალდამცავ უწყებებს სავარაუდო ჰომოფობიური სიძულვილის მოტივის იდენტიფიცირების, ხოლო მედიას დისკრიმინაციის წახალისებისგან თავის შეკავებისკენ მოუწოდებს. „მედიაში გავრცელებული ინფორმაციით, „14 ნოემბერს, თემქაზე, ლ.შ.-ს სახლში მისი მეგობარი, მ.მ.-ს მეგობარ გოგონასთან ერთად მყოფმა ნ.ნ.-მ განსაკუთრებული სისასტიკით მოკლა, ხოლო ლ.შ. კი დაჭრა, რის შემდეგ სახლს ცეცხლი წაუკიდა და შემთხვევის ადგილიდან გოგონასთან ერთად მიიმალა“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ილია ზოსიმოვის ბლოგპოსტს: გზა დამოუკიდებელი ცხოვრებისკენ. „მე, ამ ბლოგის ავტორი, ილია ზოსიმოვი, ფსიქოსოციალური ნიშნით შშმ პირი ვარ. როდესაც ფსიქიკური ჯანმრთელობის პრობლემა შემექმნა, ვცხოვრობდი თბილისის ერთ-ერთი სათემო ორგანიზაციის საცხოვრისში და ვიყავი ილიას სახელმწიფო უნივერსიტეტის მეორე კურსის სტუდენტი. მიუხედავად დროული სამედიცინო ჩარევისა, ჩემი მდგომარეობა გამწვავდა, რის გამოც მომიწია უნივერსიტეტში სწავლის შეჩერება. ჯანმრთელობის მდგომარეობის გაუმჯობესების შემდეგ მომეცა იმედი, რომ კვლავ შევძლებდი აქტიურად ცხოვრებას. სწორედ ამიტომ გადავწყვიტე, ბედი პროფესიულ სასწავლებელში მეცადა, სადაც გავდიოდი ვებდეველოპერის კურსს. სწავლის დაწყებიდან მოკლე ხანში მომიწია კოლეჯის მიტოვება, რადგან სათემო ორგანიზაციაში ჩემი ცხოვრების ვადა ამოიწურა“.  სრულად... წყარო: emc.org.ge

თბილისი. ადამიანის უფლებათა ცენტრი დააკვირდა სამოქალაქო მოძრაობა „სირცხვილიას“ სამი აქტივისტის - ალექსი მაჭავარიანის, ნოდარ რუხაძისა და გიორგი მჟავანაძის (დამფუძნებლები და აქციის ორგანიზატორები) ადმინისტრაციული სამართალწარმოების სასამართლო პროცესს თბილისის საქალაქო სასამართლოში. „ადამიანის უფლებათა ცენტრის შეფასებით, საქმეში წარმოდგენილი მტკიცებულებებით არ იკვეთებოდა დაკავებულ პირთა მიერ სამართალდარღვევის ჩადენის ფაქტი. სასამართლოს გადაწყვეტილება არ ემყარება მტკიცებულებათა ერთობლიობას. მოსამართლე დაეყრდნო პატრულ-ინსპექტორების ჩვენებებს, რომლებიც არ იყო გამყარებული უშუალოდ სამართალდარღვევის ფაქტის ამსახველი ვიდეომტკიცებულებებით“, ნათქვამია ორგანიზაციის ვებგვერდზე. სრულად... წყარო: humanrights.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს ვიდეოს: COVID 19 და ქალთა უფლებები. „COVID 19-ის კრიზისით განსაკუთრებით ქალები დაზარალდნენ. პანდემიის შემდეგ ქალების საჭიროებები და სიღარიბე კიდევ უფრო გამწვავდა“. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) აქვეყნებს გიორგი ლანჩავას ანალიტიკურ დოკუმენტს: არაფორმალური საშინაო შრომა საერთაშორისო სტანდარტებისა და კარგი პრაქტიკების შუქზე. „არაფორმალურად დასაქმების ნაკლოვანებები ყველაზე მძაფრად სწორედ საშინაო შრომაში დასაქმებულების მაგალითზე ჩანს. შრომითი ხელშეკრულებების არარსებობისა და ურთიერთობის სამართლებრივი მოუწესრიგებლობის პირობებში, საშინაო მშრომელები განსაკუთრებულად დაუცველი და მოწყვლადი ჯგუფია. მინიმალური ანაზღაურება, დასვენებისა და შესვენების უფლების გარეშე ხანგრძლივი სამუშაო კვირა და შეზღუდული გადაადგილების უფლება, რასობრივი და გენდერული ნიშნით დისკრიმინაცია, სექსუალური და ფიზიკური ძალადობა საშინაო შრომასთან დაკავშირებული გავრცელებული პრაქტიკებია“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. სახალხო დამცველთან არსებული ტოლერანტობის ცენტრი, რელიგიათა და ეროვნულ უმცირესობათა საბჭოები, გილოცავთ ტოლერანტობის საერთაშორისო დღეს. „თამამად შეგვიძლია ვთქვათ, რომ მთელი ეს წლები ვიყავით თანასწორობის, თავისუფლების, ტოლერანტობის ღირებულებათა დაცვის საქმეში თანმიმდევრულები და პრინციპულები. სწორედ ამის გამო, ტოლერანტობის ცენტრისა და საბჭოების საქმიანობამ პოზიტიური გავლენა იქონია საქართველოში რელიგიის თავისუფლების დაცვასა და სამოქალაქო ინტეგრაციის პროცესზე“, ნათქვამია ომბუდსმენის ვებგვერდზე.  სრულად... წყარო: ombudsman.ge

თბილისი. საქართველოს ახალგაზრდა იურისტთა ასოციაციამ ნათია შავაძის სახელით კონსტიტუციური სარჩელით საქართველოს საკონსტიტუციო სასამართლოს მიმართა. „საია სადავოდ ხდის „პროფესიული ტესტირების ჩატარების დებულების დამტკიცების თაობაზე“ საქართველოს განათლებისა და მეცნიერების მინისტრის ბრძანების მუხლს. სადავო ნორმა პროფესიულ საგანმანათლებლო დაწესებულებაში მოხვედრის მსურველ აპლიკანტებს ასაკობრივი ნიშნით ყოფს, რის გამოც თითოეულ ასაკობრივ კატეგორიაში მყოფი აპლიკანტების სასურველ პროფესიულ სასწავლებელში მოხვედრის შესაძლებლობა ერთმანეთისგან მნიშვნელოვნად განსხვავდება. ორგანიზაცია მიიჩნევს, რომ სადავო ნორმით მოსარჩელეს ეზღუდება საქართველოს კონსტიტუციით დაცული თანასწორობისა და განათლების უფლებები. სადავო ნორმის მიხედვით, 19 წლამდე ასაკობრივი კატეგორიის აპლიკანტებს ყოველთვის 23 ქულიანი, ხოლო 19-დან 29 წლამდე ასაკის კატეგორიის აპლიკანტებს ყოველთვის 9 ქულიანი უპირატესობა აქვთ 29 წლის ზემოთ მყოფი ასაკობრივი კატეგორიის აპლიკანტებთან მიმართებით. ამდენად, უფრო რეალური შანსი აქვთ მოხვდნენ მათთვის სასურველ პროფესიულ პროგრამაზე და დაეუფლონ პროფესიას“. სრულად... წყარო: gyla.ge

თბილისი. საქართველოს საზოგადოებრივი ორგანიზაციების ნაწილი ეხმაურება ნამახვანი ჰესის მშენებლობის მოწინააღმდეგეთა აქციის საპოლიციო ძალის გამოყენებით დაშლას. „იმ ფონზე, როდესაც ადგილობრივ მოსახლეობას, საზოგადოებას და დარგის სპეციალისტებს არაერთი კრიტიკული დასკვნა და შეკითხვა აქვთ როგორც ჰესის მშენებლობის კანონიერების, ისე მისი უკიდურესად მაღალი ზეგავლენისა და რისკების შესახებ მასშტაბური ენერგეტიკული პროექტის მშენებლობა გაუმჭვირვალედ და ამ შეკითხვებისა და მოსაზრებების იგნორირებით, შეუფერხებლად მიმდინარეობს. ხელისუფლება ადგილობრივი მოსახლეობის წუხილებსა და მშვიდობიან პროტესტზე პასუხად რეპრესიულ მეთოდებს იყენებს და საპოლიციო ძალის მეშვეობით ცდილობს ადგილობრივების პროტესტის ჩახშობას, რითაც უხეშად არღვევს პროექტის ზეგავლენის ქვეშ მოქცეული მოსახლეობის ფუნდამენტურ უფლებებს“, ნათქვამია ორგანიზაციის გვერდზე სოციალურ ქსელში. სრულად... წყარო: gyla.ge

თბილისი. საქართველოს გაეროს ასოციაციის ცნობით, 16 ნოემბერს, მსოფლიო ტოლერანტობის საერთაშორისო დღეს აღნიშნავს. „ეს დღე, UNESCO-ს ინიციატივით, 1995 წლიდან აღინიშნება. მისი მიზანი ტოლერანტული გარემოს მნიშვნელობის შესახებ საზოგადოებრივი ცნობიერების ამაღლება და სხვადასხვა კულტურათა შორის პატივისცემის, დიალოგის და თანამშრომლობის აუცილებლობის შეხსენებაა. #USAID-ის #PITA პროგრამის ფარგლებში, ტოლერანტობის კვირეულის ფარგლებში სხვადასხვა ღონისძიება იგეგმება, მათ შორის ტოლერანტობის და მრავალფეროვნებისადმი მიძღვნილი საგრანტო და გაცვლითი პროგრამები, „ტოლერანტობა არის...“ ვიდეოების მომზადება და გამოქვეყნება, პროგრამის ახალგაზრდული ქსელის ცნობიერების ამაღლების კამპანია საქართველოს 13 ქალაქში“, ნათქვამია ორგანიზაციის გვერდზე სოციალურ ქსელში. სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება სოფელ წაბლანას სტიქიით დაზარალებული ადგილობრივი თემის პროტესტს და აჭარის მთავრობას სტიქიით დაზარალებული ოჯახების სათანადო საცხოვრისზე უფლების დაუყოვნებლივი უზრუნველყოფისკენ მოუწოდებს. „ამჟამად სოფელ წაბლანას მოსახლეობა აჭარელი ეკომიგრანტების დიდი ნაწილის მსგავსად, „გაორებულ“ მდგომარეობაში ცხოვრობს. იმის გამო, რომ ბათუმში მიღებული ბინების საცხოვრებლად ვარგის მდგომარეობამდე მისაყვანად მოსახლეობას არ გააჩნია საკმარისი თანხები, ისინი აგრძელებენ ცხოვრებს სოფლად მათ ძველ საცხოვრებელ სახლებში, რომელიც რეალურად სიცოცხლისთვის სახიფათო ზონაში მდებარეობს. „აჭარისწყალის“ ჰესის სამშენებლო სამუშაოების შედეგად სოფლის წყაროების ნაწილი დაშრა, რამაც სოფლისთვის ისედაც ნაკლებად სარგებლიანი სოფლის მეურნეობა კიდევ უფრო გაართულა. ამდენად ადგილობრივ თემს სიცოცხლისთვის საშიშ ზონაში, მძიმე სოციალურ პირობებში და სიღარიბეში უწევს ცხოვრება“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. „სამართლიანმა არჩევნებმა“ საქართველოს პარლამენტის კენჭისყრის დღის შემაჯამებელ ოქმებთან დაკავშირებით საერთო სასამართლოებში ჯამში 19 სარჩელი წარადგინა, რითაც 33 საარჩევნო უბანთან დაკავშირებით საოლქო საარჩევნო კომისიების მიერ კენჭისყრის შედეგების გადათვლაზე უარი ან საჩივრის განუხილვევლად დატოვების გადაწყვეტილებები გაასაჩივრა. წარდგენილი სარჩელების საფუძველზე სასამართლომ ორ საოლქო საარჩევნო კომისიას 4 საარჩევნო უბნის შედეგების გადათვლა დაავალა. ორგანიზაციის მიერ მიერ სასამართლოში წარდგენილი სარჩელების განხილვების პროცესში გამოიკვეთა რამდენიმე სამწუხარო ტენდენცია: სასამართლოებმა ვერ გაიაზრეს მათი როლი საარჩევნო პროცესში; აშკარად გამოიკვეთა საარჩევნო დავებზე მომუშავე მოსამართლეთა ნაწილის არაკომპეტენტურობა; გამოიკვეთა სასამართლოს ადმინისტრაციული ორგანოს სასარგებლოდ მიკერძოებულობის პრობლემა; სასამართლო გადაწყვეტილებები არასათანადოდაა დასაბუთებული; სასამართლო გადაწყვეტილების დაგვიანებით ჩაბარება. სრულად... წყარო: isfed.ge

თბილისი. საკონსტიტუციო სასამართლომ დააკმაყოფილა საქართველოს ახალგაზრდა იურისტთა ასოციაციის სარჩელი საქმეზე - „შპს ბექანასი“ საქართველოს პარლამენტის წინააღმდეგ. „საქმეში სადავოდ იყო გამხდარი ადმინისტრაციულ სამართალდარღვევათა კოდექსის 571 მუხლის ის ნორმატიული შინაარსი, რომელიც სანქციის სახით ითვალისწინებდა სამართალდარღვევის იარაღის უპირობო, სავალდებულო კონფისკაციას“, ნათქვამია ორგანიზაციის ვებგვერდზე. სრულად... წყარო: gyla.ge

თბილისი. ადამიანის უფლებების სწავლებისა და მონიტორინგის ცენტრი (EMC) ეხმიანება 10 ნოემბერს, საპატრულო პოლიციის მიერ კომენდანტის საათის დროს, უსახლკარო პირის მამუკა დიაკონიძის დაჯარიმების ფაქტს. ორგანიზაცია სამინისტროს მოუწოდებს შეწყვიტოს ქუჩაში მცხოვრები უსახლკარო ჯგუფების მიმართ რეპრესიული ღონისძიებების გატარება და მის ნაცვლად მიიღოს ყველა ზომა მათი თავშესაფრის უზრუნველყოფის მიზნით სოციალური და მუნიციპალური სამსახურების ჩასართავად. სრულად... წყარო: emc.org.ge

თბილისი. ღირსეული შრომის პლატფორმა ეხმაურება კომპანია „ქართული სახლის“ დასაქმებულების გაფიცვას, სოლიდარობას უცხადებს გაფიცულ მშრომელებს და უკანონოდ მიიჩნევს კომპანიის მხრიდან თანამშრომელთა გათავისუფლებას გაფიცვის პერიოდში, რაც ცალსახად ეწინააღმდეგება კანონმდებლობას და უხეშად ლახავს გაფიცვის ფუნდამენტურ უფლებას. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრი (EMC) ზელიმხან ხანგოშვილის მკვლელობის საქმეზე, გერმანიის ფედერაციული რესპუბლიკის ოფიციალურ უწყებებთან საქართველოს პროკურატურის თანამშრომლობის პროცესს აფასებს. ორგანიზაცია მიიჩნევს, რომ გამოძიების ამ ეტაპზეც საქართველოს პროკურატურის მცდელობები დაგვიანებული აღმოჩნდა.  „მიმდინარე წელს ჩატარებული საგამოძიებო მოქმედებები კიდევ ერთხელ აჩვენებს, რომ საქართველოს პროკურატურამ ზელიმხან ხანგოშვილზე თბილისში განხორციელებული თავდასხმის საქმეზე ვერ უზრუნველყო ეფექტიანი და ჯეროვანი გამოძიების ჩატარება და ყველა მნიშვნელოვანი საგამოძიებო მოქმედება აშკარა დაგვიანებით განახორციელა, რაც გაცნობიერებული გულგრილობისა და მისი მოქალაქის სამართლებრივი ინტერესებისა და უსაფრთხოების უგულებელყოფის განცდას ტოვებს“. სრულად... წყარო: emc.org.ge

შიდა ქართლი. გასულ კვირას პარტნიორობა ადამიანის უფლებებისთვის (PHR) იურისტმა, ანა თავხელიძემ გორში მცხოვრები ქალებისთვის სექსუალური შევიწროების თემაზე ონლაინ შეხვედრა ჩაატარა. „შეხვედრის მსვლელობისას ანა თავხელიძემ ისაუბრა შევიწროებასთან დაკავშირებულ ისეთ თემებზე, როგორიცაა: სექსუალური შევიწროების დეფინიცია, სახეები და ფორმები; სექსუალურ შევიწროებაზე რეაგირების მექანიზმები; მტკიცების ტვირთი და მტკიცებულებითი სტანდარტი“. შეხვედრაზე ორგანიზაციის იურისტმა განიხილა სექსუალური შევიწროების პრეცედენტული საქმეები.  სრულად... წყარო: ორგანიზაციის გვერდი სოციალურ ქსელში

თბილისი. ადამიანის უფლებების სწავლებისა და მონიტორინგის ცენტრის (EMC) ცნობით, 11 ნოემბერს, სასამართლომ არ დააკმაყოფილა თბილისის პრობაციის ბიუროს მოთხოვნა, მიხაილოს (მიხეილ თოდუას) მიმართ შინაპატიმრობის ნაცვლად გამოყენებული ყოფილიყო საპატიმრო სასჯელი. ამის ნაცვლად, სასამართლომ დაამძიმა შინა პატიმრობის წესები და თუკი აქამდე იგი ვალდებული იყო, საცხოვრებელ ადგილას ყოფილიყო 21:00-საათიდან 08:00 საათამდე, სასამართლოს გადაწყვეტილებით, მიხაილოს 19:00-საათიდან 08:00 საათამდე განესაზღვრა შინ ყოფნის ვადად. „აღნიშნულ საკითხზე დღეს სპეციალური განცხადება გააკეთა დანაშაულის პრევენციისა და პრობაციის ეროვნულმა სააგენტომ, სადაც ნათქვამია, რომ თითქოს მიხაილო შინაპატიმრობის ვალდებულებებს სისტემატურად არღვევდა და გასული წლის ბოლოდან მოყოლებული, მან 18-ჯერ დაარღვია დადგენილი რეჟიმი. აღნიშნული განცხადება არის ფაქტობრივად არაზუსტი და მიზნად ისახავს მიხაილოს მიმართ საზოგადოებაში უარყოფითი განწყობების შექმნას“, ნათქვამია ორგანიზაციის ვებგვერდზე. სრულად... წყარო: emc.org.ge

თბილისი. ადამიანის უფლებების სწავლებისა და მონიტორინგის ცენტრის ინფორმაციით, საქალაქო სასამართლომ არ დააკმაყოფილა თბილისის პრობაციის ბიუროს მოთხოვნა, მიხეილ თოდუას (მიხაილოს) მიმართ შინაპატიმრობის ნაცვლად გამოყენებული ყოფილიყო საპატიმრო სასჯელი. „მიხაილო კვლავაც რჩება შინაპატიმრობის რეჟიმში, თუმცა სასამართლომ მას დაუმძიმა შინა პატიმრობის წესები და თუკი აქამდე იგი ვალდებული იყო, საცხოვრებელ ადგილას ყოფილიყო 21:00-საათიდან 08:00 საათამდე, სასამართლოს გადაწყვეტილებით, მას 19:00-საათიდან 08:00 საათამდე განესაზღვრა შინ ყოფნის ვადად“. ორგანიზაცია აგრძელებს პირისთვის სამართლებრივი დახმარების გაწევას და სასამართლოს აღნიშნულ გადაწყვეტილებასაც გაასაჩივრებს კანონმდებლობით გათვალისწინებული წესით. სრულად... წყარო: ორგანიზაციის გვერდი სოციალურ ქსელში