სამცხე–ჯავახეთი. 27 ნოემბერს, ახალციხის დემოკრატიული ჩართულობის ცენტრში, ორგანიზაცია გარემოს დაცვისა და მდგრადი განვითარების ხელშემწყობი კავშირის „აწყურის" ინიციატივით სამოქალაქო კლუბებმა ახალგაზრდული ბანაკის ფარგლებში შემუშავებული პროექტების პრეზენტაცია გამართეს. ასევე ბანაკში გადაღებული ფილმის ჩვენება გაიმართა. ბოლოს კი მონაწილეებს საჩუქრები გადაეცათ. სამოქალაქო კლუბის 50-მდე წევრმა ტრენინგები გაიარა და პროექტების წერა ისწავლა. დაიწერა და განხორციელდა ექვსი პროექტი, თითოეული პროექტი 800 აშშ დოლარით დაფინანსდა. ბანაკი ბაკურიანში, ორგანიზაცია „აწყურის" პროექტის ფარგლებში, სამოქალაქო განათლებისა და პედაგოგთა გადამზადების პროგრამის ხელშეწყობით მოეწყო.

სამეგრელო. 27 ნოემბერს ასოციაცია „ათინათში" ახალგაზრდული ცენტრი „ორტუსი" სასწავლო ვიზიტის ფარგლებში ესტუმრა „ღურწკაის გიმნაზიას". ახალგაზრდებმა დაათვალიერეს გიმნაზია, გაეცნენ სკოლაში არსებულ სტრუქტურას, საგაკვეთილო პროცესს. ორტუსის წევრებმა მოსწვალეებს გააცნეს ახალგაზრდული ცენტრი და მისი საქმიანობა. ცენტრის წევრებმა გიმნაზიის მოსწავლეებთან ერთად სამომავლოდ ღონისძიებები დაგეგმეს. წყარო:ორგანიზაციის გვერდი სოციალურ ქსელში

თბილისი. 19-20 დეკემბერს „საქართველოს ახალგაზრდული ორგანიზაციების ფორუმი 2013" გაიმართება. ღონისძიება ტარდება საქართველოს სპორტისა და ახალგაზრდობის საქმეთა სამინისტრო და მშვიდობისა და განვითარების აკადამიის ორგანიზებით და ახალგაზრდული ორგანიზაციების მხარდაჭერით.  ფორუმზე მოწვეულნი იქნებიან ახალგაზრდული არასამთავრობო ორგანიზაციების წარმომადგენლები, რეგიონალურ და ეროვნულ დონეზე მომუშავე ხელისუფლების წარმომადგენლები და ასევე ახალგაზრდული პოლიტიკის განვითარების საკითხებზე მომუშავე სპეციალისტები და ექსპერტები ადგილობრივი და საერთაშორისო ორგანიზაციებიდან. ღონისძიება მოიცავს სამუშაო ფორმატსაც: პლენარული სხდომები, ჯგუფებში მუშაობა, საერთო დისკუსია. ორგანიზაციების გამოფენა გაიმართება „ღია სივრცის" მეთოდით სადაც დასწრების საშუალება ექნება ყველა დაინტერესებულ მსურველს. ფორუმში მონაწილეობას მიიღებენ ის ორგანიზაციები, რომლებიც შეავსებენ განაცხადის ფორმას.  განაცხადის ფორმა

თბილისი. საქართველოს ახალგაზრდული პარლამენტი მიმდინარე წლის განმავლობაში ეცნობოდა რეგიონებში არსებულ პრობლემებს. ორგანიზაციის წარმომადგენლები მთელი წლის განმავლობაში საქართველოს ყველა რეგიონში აწყობდნენ საჯარო შეხვედრებს ახალგაზრდებთან. დეკემბერში შემაჯამებელი დოკუმენტი, სადაც ასახული იქნება რეგიონებში არსებული ახალგაზრდული პრობლემები, მიეწოდება რეგიონული განვითარებისა და ინფრასტრუქტურის და სპორტისა და ახალგაზრდობის საქმეთა სამინისტროებს და მოეწყობა საჯარო განხილვები აღნიშნულ საკითხებზე. წყარო:ორგანიზაციის გვერდი სოციალურ ქსელში

გურია. გურიის ახალგაზრდული რესურსცენტრი 30 ნოემბერს მართავს ახალგაზრდულ ფორუმს, რომელშიც მონაწილეობას მიიღებენ სასკოლო სამოქალაქო კლუბის მოსწავლეები და სამოქალაქო განათლების პედაგოგები. ფორუმის მიზანია მოსწავლეთა აქტიური მონაწილეობით თემის ადგილობრივი საჭიროებების კვლევა, პრობლემების გადაჭრის გზების ძიება, რეკომენდაციების შემუშავება და თანამშრომლობა გადაწყვეტილების მიმღებ პირებთან. დამატებითი ინფორმაციისათვის დაუკავშირდი: გურიის ახალგაზრდული რესურსცენტრი სამოქალაქო განათლების და პედაგოგთა გადამზადების პროგრამის გურიის ოფისი მობ: 599 156384; ელ.ფოსტა: tamghlonti@gmail.com

ქვემო ქართლი. 25 ნოემბერს სიქას ორგანიზებით გაიმართა პროექტ – „მეგობრული გზების" – პრეზენტაცია. პრეზენტაციას უძღვებოდა ფონდის „პარტნიორობა საგზაო უსაფრთხოებისთვის" დირექტორი. რუსთავის სასკოლო სამოქალაქო კლუბების წევრების თხოვნის საფუძველზე ფონდმა რუსთაველ ახალგაზრდებს შესთავაზა გზებზე უსაფრთხო მოძრაობის შესახებ ტრენინგის გავლა, რის შემდეგაც ისინი შეძლებენ თანატოლებისა და თემის წევრებისათვის ჩაატარონ სემინარები აღნიშნულ თემაზე. წყარო:სიქას გვერდი სოციალურ ქსელში

თბილისი. ახალგაზრდული ასოციაცია „დრონის" ორგანიზებით გაიმართება პროექტ – „ახალგაზრდები ბარიერების გარეშეს" – დახურვის ღონისძიება. ღონისძიებაზე შეჯამდება პროექტის შედეგები, გაიმართება ბავშვების მიერ შექმნილი ნამუშევრების გამოფენა-გაყიდვა, გაიცემა მონაწილეობის დამადასტურებელი სერტიფიკატები, ნაჩვენები იქნება პროექტის განმავლობაში შექმნილი ფოტო და ვიდეო მასალა. გარდა ამისა, ღონისძიებაზე მისულ სტუმრებს საშუალება მიეცემათ იხილონ პოლონელი გრაფიკოსის ვოიტეკ კრავიეცის ნამუშევრების გამოფენა და გაეცნონ ასოციაცია „დრონის" მიერ განხორციელებულ სხვადასხვა პროექტს. მოსაწვევი წყარო:ორგანიზაციის გვერდი სოციალურ ქსელში

გურია. 25 ნოემბერს, ოზურგეთის მუნიციპალიტეტის ცენტრალურ ბიბლიოთეკას სხვადასხვა საჯარო სკოლის მოსწავლეები ესტუმრენ. ისინი ახალგაზრდული რესურსცენტრის პედაგოგის ინგა დუმბაძის ხელმძღვანელობით ჩართული არიან სხვადასხვა სამოქალაქო აქტივობებში, რომლის ფარგლებშიც დაათვალიერეს ცენტრალური ბიბლიოთეკა. გაეცნენ მის ისტორიას, ყოველდღიურ საქმიანობას, სამომავლო გეგმებს, რის შესახებაც მათ ესაუბრა ბიბლიოთეკის დირექტორი ქალბატონი ლიკა ბაქანიძე, უფროსი თაობის სამოქალაქო ჩართულობის შესახებ ბავშვების შეკითხვებს უპასუხა თეატრის მთავარმა რეჟისორმა ბატონმა ოთარ კუტალაძემ. წამყვანმა სპეციალისტმა თამარ ბილიხოძემ დაათვალიერებინა ბავშვებს ბიბლიოთეკის სხვადასხვა განყოფილებაში დაცული წიგნები და პერიოდიკა. შეხვედრას ესწრებოდნენ არასამთავრობო ორგანიზაციის წევრები, სტუდენტები და დაინტერესებული ქალბატონები.

შიდა ქართლი. გორის ინვალიდთა კლუბთან არსებული გორის ახალგაზრდული ცენტრი გენდერული ძალადობის წინააღმდეგ ბრძოლის კამპანიაში ჩაერთო. კამპანიის ფარგლებში ახალგაზრდულმა ცენტრმა ქალთა საკონსულტაციო ცენტრ „სახლთან" ერთად განახორციელა აქტივობა, მოეწყო ფილმ – „ძალადობა დანაშაულიას" – ჩვენება და განხილვა. გაიმართა დისკუსია, რომელიც ფსიქოლოგმა და გენდერზე მომუშავე სპეციალისტებმა წაიყვანეს. 16 დღიანი კამპანიის მიზანია ქალთა მიმართ ძალადობის საკითხებზე საზოგადოებრივი ცნობიერების ამაღლებასა და ქალთა უფლებების ირგვლივ სამოქალაქო კონსოლიდაციის გაძლიერებას. აქტივობა დაიგეგმა „ეროვნული ინტეგრაციის გაძლიერება საქრთველოში" პროექტის ფარგლებში, რომელსაც ახორციელებს საქართველოს გაეროს ასოციაციის მიერ, აშშ-ს საერთაშორისო განვითარების სააგენტოს (USAID) მხარდაჭერით. გორში პროექტის პარტნიორი ორგანიზაციაა „გორის ინვალიდთა კლუბი". წყარო:ორგანიზაციის გვერდი სოციალურ ქსელში

ქვემო ქართლი. 23 ნოემბერს რუსთავისა და ბოლნისის სამოქალაქო კლუბების აქტიური წევრები Etanews.ge-ს პრეზენტაციას დაესწრნენ. Etanews.ge-ს ეს არის საინფორმაციო პორტალი, რომელზეც სიახლეების განთავსება დარეგისტრირების შემთვევაში ნებისმიერ მსურველს შეუძლია. შეხვედრაზე პროექტის მენეჯერმა მონაწილეებს პროექტი ძირითადი დანიშნულება და მიზანი გააცნო. ახალგაზრდებმა მიიღეს ინფორმაცია თუ როგორ შეუძლიათ პროექტში ჩართვა. ახალგაზრდები საინფორმაციო პორტალის მეშვეობით საზოგადოებას მიაწვდიან ინფორმაციას მათ რეგიონში მიმდინარე ამბებისა და არსებული პრობლემების შესახებ. წყარო:სიქას გვერდი სოციალურ ქსელში

სამცხე–ჯავახეთი. ახალქალაქის ახალგაზრდული სამოქალაქო ცენტრის წევრებმა ქალების მიმართ ძალადობის აღმოფხვრის საერთაშორისო დღე აღნიშნეს. ღონისძიება ჩატარდა პროექტ – „ეროვნული ინტეგრაციის გაძლიერება საქართველოში" – ფარგლებში, რომელიც ხორციელდება საქართველოს გაეროს ასოციაციის მიერ, აშშ-ს საერთაშორისო განვითარების სააგენტოს ფინანსური მხარდაჭერით. წყარო:ორგანიზაციის გვერდი სოციალურ ქსელში

იმერეთი. 25 ნოემბერს, ქუთაისის ახალგაზრდული ცენტრი შეურთდა საერთაშორისო კამპანიას ქალთა მიმართ ძალადობის წინააღმდეგ. კამპანიის ფარგლებში ცენტრმა რამდენიმე აქტივობა განახორციელა. ახალგაზრდებმა მოამზადეს საინფორმაციო პოსტერები და მოაწყვეს ქალაქის ცენტრალურ უბანში მსვლელობა. გაიმართა ასევე სადისკუსიო კლუბის შეხვედრა თემაზე: „ქალთა მიმართ ძალადობა და გენდერული სტერეოტიპები". დისკუსიაზე მონაწილეებს საშუალება მიეღოთ პასუხები მათთვის საინტერესო საკითხების შესახებ. დისკუსიის მსვლელობისას ასევე ნაჩვენები იქნება დოკუმენტური ფილმი „ქალები საქართველოდან". ახალგაზრდული ცენტრის წევრებმა ორგანიზება გაუკეთეს თანატოლთა განათლების ტრენინგს: „ოჯახური ძალადობა და გენდერული სტერეოტიპები". ტრენინგის მიზანს წარმოადგენდა ოჯახური ძალადობის და გენდერის საკითხების შესახებ ცოდნისა და უნარ–ჩვევების განვითარება მოსწავლეებისათვის. წყარო:ორგანიზაციის გვერდი სოციალურ ქსელში

გურია. 25 ნოემბერს „ახალგაზრდა პედაგოგთა კავშირის" ბაზაზე არსებული ახალგაზდული ცენტრის წევრებმა ქალების მიმართ ძალადობის აღმოფხვრის საერთაშორისო დღის აღსანიშნავად ჩაატრეს თანატოლ განმანათლებელთა ტრენინგი გენდერული თანასწორობის შესახებ და ქალთა მიმართ ძალადობის წინააღმდეგ მოაწყვეს ფლეშ-მობი. მისი მიზანი იყო გაემახვილებინათ საზოგადოების ყურადღება ქალთა მიმართ ძალადობის ფაქტებზე. მისი შინაარსი ასახავდა საზოგადოების დამოკიდებულებას ძალადობასთან დაკავშირებით.

შიდა ქართლი. ცენტრი «აფხაზეთის» მიერ პროექტის - „ახალგაზრდების ჩართულობა და განვითარების" ფარგლებში ჩატარდა კონკურსი მცირე გრანტების მოსაპოვებლად ორგანიზაციის მიერ დაარსებული სასკოლო კლუბებისათვის (გორის მუნიციპალიტეტის 8 საჯარო სკოლა). კონკურსის თემატიკა მრავალფეროვანი იყო და კლუბებს შეძლოთ შეედგინათ საპროექტო განაცხადი წინასწარ შემუშავებული მარტივი ნიმუშის მიხედვით. კონკურსის გამოცხადების შემდეგ კონკურსში მონაწილე კლუბებისათვის ჩატარდა კონსულტაციები კონკურსის სპეციფიკისა და პროექტის წერის შესახებ. სულ კონკურსში განსახილველად შემვიდა 14 პროექტი. მათგან, განხილვის შემდეგ, გადაწყდა 5 პროექტის მხარდაჭერა. მომავლისთვის დაგეგმილია მსგავსი კონკურსების კიდევ ჩატარება და კლუბებს ექნებათ საშუალება კიდევ უფრო დახვეწონ საკუთარი უნარები პროექტების წერის საკითხში.

თბილისი. ადამიანის უფლებების სწავლებისა და მონიტორინგის ცენტრი ახალ ბლოგპოსტს აქვეყნებს: „ბავშვი და უხილავი ხელი" (ავტორი ვატო ჯორკოშვილი). იგი ახალგაზრდების სამოქალაქო განათლების საკითხებს ეხება. „სამოქალაქო ღირებულებების დროული დანერგვა მოზარდებში საზოგადოების დემოკრატიული განვითარების წინაპირობაა. მერაბ მამარდაშვილი, როგორც თავად ამბობდა, სკოლაში უბრალო მასწავლებლობაზე ოცნებობდა, რადგან თვლიდა, რომ სწორედ სკოლის ასაკში შეიძლება ჩამოუყალიბდეს ადამიანს თავისუფალი ცნობიერება. უკვე ზრდასრული ადამიანის თავისუფალ პიროვნებად გარდაქმნა, თუ ის უკვე ასეთი არ არის, შეუძლებელია", ნათქვამია პუბლიკაციაში. სრულად წყარო: emc.org.ge

თბილისი. საქართველოს ახალგაზრდა ეკონომისტთა ასოციაცია თბილისის 25 საჯარო სკოლის დამამთავრებელი კლასის მოსწავლეებისთვის ჩაატარა ტრენინგები მეწარმეობაში. 9–24 ნოემბერს ჩატარებული ტრენინგების მიზანი იყო სკოლის მოსწავლეებისთვის მეწარმეობრივი ცოდნისა და უნარების განვითარება, საუკეთესო მიღწევების გაზიარება. ტრენინგები თეორიულ საკითხებთან ერთად მოიცავდა ბიზნეს სიმულაციას, დისკუსიებს და პრაქტიკულ სამუშაოებს. პროექტი – „მეწარმეობრივი უნარების პილოტირება საქართველოს საჯარო სკოლებში" განხორციელდა აშშ–ის საელჩოს ფინანსური მხარდაჭერით. წყარო: .economists.ge

შიდა ქართლი. 22 ნოემბერს, ასოციაცია გორის ინვალიდთა კლუბთან არსებულმა გორის ახალგაზრდულმა ცენტრმა რადიოსა და ფილოსოფიის დღე აღნიშნა. ახალგაზრდებმა რადიოს დაარსებიდან დღემდე მის დანიშნულებაზე, ფილოსოფიის არსზე ისაუბრეს. აქტივობა დაიგეგმა პროექტის - „ეროვნული ინტეგრაციის გაძლიერება საქართველოში" -ფარგლებში. წყარო:ორგანიზაციის გვერდი სოციალურ ქსელში

აჭარა. „თავისუფალ ჟურნალისტთა სახლის" ბაზაზე ჩამოყალიბებულია „ბათუმის ახალგაზრდული ცენტრი" რომელიც სხვადასხვა აქტივობებს ახორციელებს. 23 ნოემბერს „ბათუმის ახალგაზრდული ცენტრის" წევრებმა მონაწილეობა მიიღეს სათემო და მოხალისეობრივ აქტივობაში რომელიც ქობულეთის მუნიციპალიტეტის სოფელ „ლეღვაში" განხორციელდა. ეს ღონისძიებები მიზნად ისახავს მოხალისეობრივი თვითშეგნების ამაღლებას. მსგავსი აქტივობები მომავალშიც იგეგმება. ღონისძიება გაიმართა პროექტის – „ეროვნული ინტეგრაციის გაძლიერება საქართველოში" (ANI) – ფარგლებში, რომელსაც ახორციელებს საქართველოს გაეროს ასოციაცია (UNAG) აშშ-ს საერთაშორისო განვითარების სააგენტოს (USAID) ფინანსური მხარდაჭერით. წყარო: ორგანიზაციის გვერდი სოციალურ ქსელში

სამცხე–ჯავახეთი. ახალციხის ახალგაზრდული სამოქალაქო ცენტრის წევრებისთვის საყოველთაო ჯანდაცვის შესახებ შეხვედრა ჩატარდა. ახალგაზრდებს სოციალური მომსახურების სააგენტოს სამცე-ჯავახეთის რეგიონალური საკოორდინაციო ცენტრის უფროსის მოადგილე ესაუბრა. შეხვედრა კითხვა პასუხის რეჟიმში წარიმართა, მისი დასრულების შემდეგ კი, მოსახლეობაში ინფორმაციის გავრცელების მიზნით, ქართულ და სომხურ ენოვანი საინფორმაციო ბუკლეტები დარიგდა. წყარო:ორგანიზაციის გვერდი სოციალურ ქსელში

თბილისი. 26-27 ნოემბერს გაიმართება საერთაშორისო კონფერენცია „ყველა ბავშვს აქვს უფლება ცხოვრობდეს ოჯახურ გარემოში". ღონისძიების მიზანია შეაჯამოს ბავშვზე ზრუნვის სისტემის რეფორმის განხორციელებისას მიღწეული პროგრესი. კონფერენციაში მონაწილეობენ საქართველოს მთავრობის, სამოქალაქო სექტორისა და საერთაშორისო ორგანიზაციების წარმომადგენლები, საერთაშორისო ექსპერტები, აღმოსავლეთ ევროპისა და დსთ-ს ქვეყნების სამთავრობო დელეგაციები, გაეროს ბავშვთა ფონდის რეგიონალური ოფისის წარმომადგენლები. წყარო:UNICEF Georgia

თბილისი. „კავკასიური სახლი" იწყებს სოფელ ხაიში საშუალო სკოლისა და საბავშვო ბაღის ბავშვებისთვის საშობაო საჩუქრების შეგროვებას. „ვისაც სურვილი და საშუალება გაქვთ საშობაო დღესასწაული გავულამაზოთ ხაიშელ ბავშვებს, მოგვმართეთ. ვაგროვებთ საშობა ნაძვისხისა და პლიუშის პატარა სათამაშოებს სასაჩუქრე ფუთებისთვის, რომელსაც ჩავუტანთ ბავშვებს", ნათქვამია ორგანიზაციის გვერდზე სოციალურ ქსელში. კავკასიურ სახლში საჩუქრები გროვდება 20 დეკემბრამდე.  წყარო:ორგანიზაციის გვერდი სოციალურ ქსელში

კახეთი. თელავის ახალგაზრდული ცენტრმა ბავშვთა ძალადობის წინააღმდეგ ბრძოლის დღე აღნიშნა.  რომლის ორგანიზებაც ადამიანის უფლებებისა და გენდერის ქვეჯგუფმა განახორციელა. ღონისძიების ფარგლებში მოეწყო ბავშვთა ძალადობის თემაზე ფილმის ჩვენება და შემდეგ დისკუსია, გაიმართა ქალაქის ქუჩებში მსვლელობა. ახმეტის მცირე საოჯახო ტიპის სახლში ჩატარდა ლექცია ბავშთა ძალადობისა და უფლებების საკითხებზე. ღონისძიება განხორციელდა „საქართველოში ეროვნული ინტეგრაციის გაძლიერების პროექტის" (ANI) ფარგლებში, რომელიც ხორციელდება საქართველოს გაეროს ასოციაციის (UNAG) მიერ, აშშ-ს საერთაშორისო განვითარების სააგენტოს (USAID) მხარდაჭერით. წყარო:ორგანიზაციის გვერდი სოციალურ ქსელში