თბილისი. ადამიანის უფლებების სწავლებისა და მონიტორინგის ცენტრმა „სამოქალაქო აქტივიზმის პლატფორმის" მიერ სამ სკოლაში მოწყობილი კინოჩვენების ანალიზი გამოაქვეყნა. „ცხადია, ჩვენი მიზანი არ იყო სამ სკოლაში ნაჩვენებ ფილმზე დისკუსიიდან და დაკვირვებიდან მიღებულ მწირ ინფორმაციაზე დაყრდნობა, რაიმე განმაზოგადების და მიზეზ-შედეგობრივი კავშირის დადგენა, რაც თავისთავად შეუძლებელია. თუმცა ვფიქრობთ, რომ რამდენიმე დასკვნის გაკეთების შესაძლებლობას ეს მცირე დაკვირვება მაინც იძლევა", ნათქვამია ორგანიზაციის ვებ-გვერდზე გამოქვეყნებულ პუბლიკაციაში „ბავშვები იატაკქვეშეთიდან და სკოლებიდან". სრულად წყარო: emc.org.ge

თბილისი. ლიბერალიზმის სასწავლო ცენტრში ლაშა ბუღაძის ლექცია- „მწერლები და ცენზურა" - გაიმართა. მათთვის, ვინც ვერ შეძლო ლექციაზე დასწრება, ცენტრი ვიდეო ჩანაწერს აქვეყნებს. ლექცია   წყარო:ორგანიზაციის გვერდი სოციალურ ქსელში

ქვემო ქართლი. ორგანიზაცია „სიქა" კლუბში - „უნარები პროფესიული წარმატებისათვის" - ახალი სეზონს იწყებს. კლუბის მიზანია დაეხმაროს ახალგაზრდებს შეიძინონ საკუთარი ცხოვრების დაგეგმვის უნარი და გახდნენ მეტად თავდაჯერებულები; მიღებული ცოდნისა და გამოცდილების საფუძველზე უკეთ მოახერხონ გარემოსთან ადაპტირება და გაეზარდოთ თვითრეალიზებისა და დასაქმების შანსები. კლუბის შესახებ  წყარო:ორგანიზაციის გვერდი სოციალურ ქსელში

სამცხე-ჯავახეთი. ახალციხის ახალგაზრდული ცენტრის წევრებმა თანატოლებისთვის პრეზენტაცია ფასილიტაციის შესახებ გამართეს. პრეზენტაცია მოიცავდა, როგორც თეორიულ ისე პრაქტიკულ სწავლებას. ღონისძიება განხორციელდა პროექტის - „ეროვნული ინტეგრაციის გაძლიერება საქართველოში" - ფარგლებში, პროექტს ახორციელებს საქართველოს გაეროს ასოციაცია (UNAG),აშშ-ს საერთაშორისო განვითარების სააგენტოს ( USAID/Georgia )ფინანსური მხარდაჭერით. წყარო:ორგანიზაციის გვერდი სოციალურ ქსელში

შიდა ქართლი. საზოგადოება „ბილიკმა" ორგანიზაციის ჟურნალისტიკის სტუდიის წევრების მიერ გადაღებული მოკლემეტრაჟიანი ფილმები გამოაქვეყნა. ფილმები სოფელ ძევერაში არსებული სკვერის ეკოლოგიურ პრობლემას და ნანგრევებად ქცეულ გასართობ კლუბს ეხება. ფილმი ძევერაში არსებულ ალ. ჯავახიშვილის სახელობის სკვერის ეკოლოგიურ პრობლემის შესახებ  ფილმი სოფელში ნანგრევებად ქცეული გასართობი კლუბის შესახებ წყარო:ორგანიზაციის გვერდი სოციალურ ქსელში

თბილისი. საქართველოს ბავშვთა და ახალგაზრდობის განვითარების ფონდი, სოციალური ფოტოგრაფიის ფონდი კავკასიაში და სტეფ ფორვარდი ახორციელებენ პროექტს „თითოეული ბავშვი მნიშვნელოვანია". პროექტის მიზანია სკოლამდელი განათლების სექტორის გაუმჯობესებული ხელმისაწვდომობა და ადრეულ ასაკში სწავლისა და განვითარების სტანდარტების ამაღლება. პროექტის ფარგლებში განსაკუთრებული ყურადღება მიპყრობილია ღარიბ ბავშვებზე, სოფლად მცხოვრებ და შეზღუდული შესაძლებლობების მქონე ბავშვებზე. პროექტის ფარგლებში მომზადდა ვიდეო, რომელიც იმ სირთულეებს ასახავს, რომლის წინაშეც სმენა და მეტყველბაშეზღუდული ბავშვები დგანან. აღნიშნული პროექტი ხორციელდება აღმოსავლეთ დასავლეთის მართვის ინსტიტუტის ფინანსური მხარდაჭერით. ვიდეო: „თითოეული ბავშვი მნიშვნელოვანია" წყარო: ორგანიზაციის გვერდი სოციალურ ქსელში

სამეგრელო. 30 დეკემბერს ასოციაცია „ათინათის" ახალგაზრდულმა ცენტრმა „ორტუსმა" საახალწლო ფლეშმობით დამდეგი შობა–ახალი წელი მიულოცა ადგილობრივ მოსახლეობას. ასევე ცენტრის წევრებმა მისალოცი ბარათები მოსახლეობას დაურიგეს. ღონისძიება პროექტის – „ეროვნული ინტერგრაციის გაძლიერება საქართველოში" – ფარგლებში გაიმართა, რომელსაც ახორციელებს საქართველოს გაეროს ასოციაცია, ამერიკის შეერთებული შტატების საერთაშორისო განვითარების სააგენტოს ფინანსური მხარდაჭერით. წყარო: ორგანიზაციის გვერდი სოციალურ ქსელში

თბილისი. 30 დეკემბერს, საქართველოს სპორტისა და ახალგაზრდობის საქმეთა სამინისტროს საკონფერენციო დარბაზში გაიმართა წლის ახალგაზრდულ ნომინაციებში გამარჯვებულების დაჯილდოება. აღნიშნული კონკურსის მიზანია ახალგაზრდულ სფეროში მომუშავე არასამთავრობო ორგანიზაციებისა და ახალგაზრდების მხარდაჭერა და წახალისება. სამინისტრომ გამოავლინა გამარჯვებულები: 1. წლის ახალგაზრდული ორგანიზაცია - „სიქა - საგანმანათლებლო ინიციატივების ქართული ასოციაცია", 2. წლის ახალგაზრდული პროექტი - „ბიზნეს მარათონი 20=200" 3. წლის ახალგაზრდა - სპეციალური საჭიროების მქონე ახალგაზრდების საზოგადოებაში ინტეგრაციისათვის შეტანილი წვლილისთვის - ყარამან-გიორგი ბერიძე 4. წლის ახალგაზრდა - სწავლასა და მეცნიერებაში მიღწეული განსაკუთრებული წარმატებებისათვის - დიმა ქარჩავა 5. წლის ახალგაზრდა - რომან კალანდაძე 6. წლის ახალგაზრდა მოხალისე - ავთანდილ მამალაშვილი წყარო: msy.gov.ge

თბილისი. „აჰუაჰუ – თანამედროვე ხელოვნების განვითარებისთვის", „სამოქალაქო საზოგადოების განვითარების ცენტრი" და „ჰელფინგ ჰენდი" ახორციელებენ პროექტს – „მეც მოქალაქე ვარ". პროექტი ქუჩაში მცხოვრები უსაბუთო ბავშვების უფლებრივი მდგომარეობის ხელშეწყობას ისახავს მიზნად. „კვლევის შედეგებიდან ერთ-ერთ მწვავე საკითხად იკვეთება პირადობის დამადასტურებელი საბუთების არქონა, რის გამოც, იურიდიული თვალსაზრისით, ისინი არ არიან იდენტიფიცირებული, ვერ იღებენ განათლებას, ჯანდაცვას და სახელმწიფოსგან თუ არასამთავრობო სექტორისგან მათთვის განკუთვნილ სარგებელს", ნათქვამია პროექტის ვებგვერდზე. ორგანიზაციები პეტიციას ავრცელებენ, რომელითაც მიმართავენ საქართველოს მთავრობასა და პარლამენტს „შემუშავდეს სპეციალური სამართლებრივი მექანიზმი ამ არასრუწლოვანთა უფლებების დაცვის მიზნით და მათთვის იურიდიული სტატუსის მისანიჭებლად". პეტიციაზე მიერთება ნებისმიერ მოქალაქეს შეუძლია. პეტიცია პროექტის ვებგვერდი სოციალურ ქსელში წყარო: პროექტის ვებგვერდი სოციალურ ქსელში

თბილისი. საქართველოს ჟურნალისტური ეთიკის ქარტია მოუწოდეს ტელეკომპანია „რუსთავი2" -ის გადაცემა "პროფილის" ავტორებს, დაიცვან მაუწყებელთა ქცევის კოდექსი, გამოიჩინონ განსაკუთრებული სიფრთხილე, როცა ბავშვებთან დაკავშირებულ საკითხებს აშუქებენ. განცხადება წყარო: qartia.org.ge

სამეგრელო. 26 დეკემბერს, ასოციაცია „ათინათის" ახალგაზრდულ ცენტრი „ორტუსის’" წევრებმა ჩაატარეს ღონისძიება რომელიც ეძღვნებოდა კამპანიას - „არა სიძულვილს". ღონისძიება დაიწყო გაცნობითი სამუშაოთი, ასევე ახალგაზრდებს მიეწოდათ ინფორმაცია კამპანიის შესახებ. ღონისძიების ბოლოს დაიგეგმა სხვადასხვა ღონისძიება, რომელსაც ახალგაზრდული ცენტრის მომავლი წლიდან განახორციელებს. ღონისძიება გაიმართა პროექტის –„ეროვნული ინტერგრაციის გაძლიერება საქართველოში" – ფარგლებში, რომელსაც ახორციელებს საქართველოს გაეროს ასოციაცია, ამერიკის შეერთებული შტატების საერთაშორისო განვითარების ფინანსური მხარდაჭერით. წყარო:ორგანიზაციის გვერდი სოციალურ ქსელში

შიდა ქართლი. ფონდმა „ღია საზოგადოება - საქართველომ"  სოფლების წითელუბნის და ხურვალეთის, ასევე ხურვალეთის დევნილთა ჩასახლების ბავშვებს სპექტაკლით მიულოცა ახალი წელი. სპექტაკლი „წელიწადის ოთხი დრო" ჩრდილების სახელმწიფო თეატრმა „ბუდრუგანა-გაგრამ" 25 დეკემბერს გორის თეატრში გამართა. სპექტაკლის შემდეგ ბავშვებს საახალწლო საჩუქრები - წიგნები, ტკბილეული და სათამაშოები დაურიგდათ. ფონდთან ერთად ღონისძიებას ორგანიზება გორში მოქმედმა არასამთავრობო ორგანიზაციამ საზოგადოება „ბილიკმა" გაუწია, რომელიც უკვე რამდენიმე წელია ეწევა საქმიანობას შიდა ქართლში და მისი მიზანი ბავშვების განათლებასა და განვითარებაზე ზრუნვაა. წყარო: osgf.ge

გურია. ოზურგეთისა და ლანჩხუთის ცენტრალურ ბიბლიოთკებში სამოქალაქო კლუბების წევრი მოსწავლეების ინიციატივით სამოქალაქო განათლების კუთხე მოეწყო. წინადადება კუთხის მოწყობის შესახებ მოსწავლეებმა ბიბლიოთეკებში ვიზიტის დროს გააჟღერეს. მოსწავლეებმა ბიბლიოთეკებში თავად განათავსეს სამოქალაქო განათლებისა და პედაგოგთა გადამზადების პროგრამის ფარგლებში გამოცემული სახელმძღვანელოები, პერიოდული გამოცემები თუ სხვა მასალები. აქვე პერიოდულად გამოიფინება პროგრამის ფარგლებში ჩატარებული სხვადასხვა აქტივობების, ღონისძიებების ფოტომასალა.  წყარო: პროგრამის ვებგვერდი

კახეთი. არასამთავრობო ორგანიზაცია „ვოლდ ვიჟენის",(World Vision) ინიციატივით, თელავის მედია კაფეში, ჟურნალისტური და შემოქმედებითი კლუბის მოსწავლეებს ჩაუტარდათ საინფორმაციო შეხვედრა ჟურნალისტური საქმიანობის შესახებ. რეგიონული გაზეთის „კახეთის ხმა" ჟურნალისტებმა სკოლის მოსწავლეებს მიაწოდეს ინფორმაცია და საკუთარი გამოცდილება გაუზიარეს გაზეთისთვის ინფორმაციის, რეპორტაჟებისა და სტატიების მომზადების შესახებ.

აჭარა. 24 დეკემბერს, ბათუმის დემოკრატიული ჩართულობის ცენტრში, საზოგადოებრივი ორგანიზაციის „დემოკრატიის ინსტიტუტისა" და საჯარო სკოლების სამოქალაქო კლუბების ორგანიზებით შეხვედრა გაიმართა. შეხვედრის თემა იყო: საჯარო სკოლის განათლების ხარისხი და კერძო სკოლის საგანმანათლებლო პროგრამას შორის განსხვავება. ასევე, მოსწავლეებმა განიხილეს რეპეტიტორის ინსტიტუტის დადებითი და უარყოფითი მხარეები, მოსწავლისთვის საკუთარი უფლებებისა და მოვალეობის ცოდნის მნიშვნელობა.

კახეთი. 24 დეკემბერს, თელავის განთლების განვითარების და დასაქმების ცენტრში, ჩატარდა ტრენინგი „გაეროს მოდელირება". ახალგაზრდული საბჭოს წევრი, ნანა შილდელაშვილი: ,,საქართველოში ამ პროგრამას ახორციელებს გაეროს ასოციაცია. აღნიშნული სემინარის მიზანი იყო ახალგაზრდული საბჭოს წევრების მომზადება მსოფლიოში აღიარებული და აპრობირებული თამაშისთვის - გაეროს მოდელირებისთვის". ტრენინგის მონაწილე, მარინა ბურნაძე: „გაეროს მოდელირების ტრენინგი ძალინ მნიშვნელოვანია და სამომავლოდ ხელს შეუწყობს მონაწილეთა განვითარებას. მოხარული ვიქნები, თუ ასეთი ტიპის ტრენინგები მომავალშიც ჩატარდება და მოგვეცემა საშუალება, ჩვენი შესაძლებლობები ინტელექუალურ თამაშში გამოვამჟღავნოთ".

თბილისი. „კავკასიური სახლის" შაბათ–კვირის მრავალეროვან სკოლაში შობა–ახალი წლის ზეიმი გაიმართა. შაბათ–კვირის სკოლას სტუმრობდნენ კულტურულ–საგანმანათლებლო ცენტრი და მსახიობები. სკოლის მსმენელებისთვის გაიმართა თეატრალიზებული წარმოდგენა, რომელსაც შემეცნებითი ხასიათი ჰქონდა. წყარო: ორგანიზაციის გვერდი სოციალურ ქსელში

შიდა ქართლი. 23 დეკემბერს, გორის ინვალიდთა კლუბთან არსებულმა გორის ახალგაზრდულმა ცენტრმა, გორის სახელმწიფო სასწავლო უნივერსიტეტის მოწვეულ სპეციალისტს უმასპინძლა. რომელმაც ჩაატარა სემინარი თემაზე „როგორ მივაღწიოთ დადებით განწყობას და მოვიპოვოთ კლიენტთა კმაყოფილება". შეხვედრის მიზანი იყო ეფექტური ურთიერთობების ტექნოლოგიების გაცნობა და ანალიზი. აქტივობა სემინარი გაიმართა ეროვნული ინტეგრაციის გაძლიერების პროექტის ფარგლებში, რომელიც ხორციელდება საქართველოს გაეროს ასოციაციის მიერ, აშშ-ს საერთაშორისო განვითარების სააგენტოს (USAID) მხარდაჭერით. გორში პროექტის პარტნიორი ორგანიზაციაა გორის ინვალიდთა კლუბი. წყარო: ორგანიზაციის გვერდი სოციალურ ქსელში

აჭარა. 19 დეკემბერს, ბათუმში, ინკლუზიური ჯგუფის მოსწავლეებმა წითელი ჯვრის მხარდაჭერით გამართეს წარმოდგენა, ქართველი მხატვრის, ნიკო ფიროსმანის ცხოვრების შესახებ და მისი მოღვაწეობის პერიოდი სცენაზე გადმოიტანეს. ბავშვებმა განასახიერეს ქართველი მწერლები, შეასრულეს ქართული ცეკვები და სიმღერები, წარმოდგენის პარალელურად კი მოსწავლეების ნამუშევრების გამოფენა გაიმართა. მსგავსი ღონისძიებები ხელს უწყობს შეზღუდული შესაძლებლობების მქონე მოზარდების საზოგადოებასში ინტეგრაციას. ღონისძიების დასასრულს საქართველოს წითელი ჯვრის საზოგადოების ბათუმის ფილიალმა მოსწავლეებს მიულოცა დამდეგი შობა-ახალი წელი და მათ საახალწლო საჩუქრები გადასცა. წყარო: ორგანიზაციის გვერდი სოციალურ ქსელში

სამეგრელო. სამოქალაქო მონიტორინგისა და კვლევების ცენტრმა სოციალურ ქსელში განცხადება გაავრცელა. „როგორც ჩვენთვის გახდა ცნობილი ზუგდიდის 2014 წლის ბიუჯეტით მუნიციპალური ტრანსპორტით მგზავრობისათვის შეღავათიანი ტარიფის დაწესება ზუგდიდში მოქმედი უმაღლესი სასწავლო დაწესებულებების მხოლოდ სოციალურად დაუცველი სტუდენტებისთვის იგეგმება. თუმცა ამ საკითხის თავდაპირველი განხილვისას შეღავათიანი ტარიფის დაწესება ყველა სტუდენტისათვის იყო განზრახული. გამომდინარე იქიდან, რომ ზუგდიდში სულ რამდენიმე უმაღლესი სასწავლო დაწესებულებაა და სტუდენტთა რაოდენობაც არ არის ძალიან დიდი ვფიქრობთ, რომ ზუგდიდის მუნიციპალიტეტს აქვს ფინანსური რესურსი მუნიციპალური ტრანსპორტით მგზავრობისათვის შეღავათიანი ტარიფის ყველა სტუდენტზე დასაწესებლად", ნათქვამია განცხადებაში. წყარო:ორგანიზაციის გვერდი სოციალურ ქსელში

აჭარა. 22 დეკემბერს ბათუმის ახალგაზრდული ცენტრის ორგანიზებით გენდერული თანასწორობის თემაზე, ბათუმის პრესკაფეში, თანატოლთა ტრენინგი ჩატარდა, რომელშიც მონაწილეობდნენ როგორც ცენტრის წარმომადგენლები, ასევე სხვადასხვა საჯარო სკოლის მოსწავლეები, სულ 40 მონაწილე. თანატოლთა ტრენინგი დაგეგმეს და განახორციელეს გენდერის თემატური სკოლის მონაწილეებმა. ტრენინგის დროს ჩატარდა სხვადასხვა სავარჯიშოები, გაიმართა მოკლემეტრაჟიანი ფილმების ჩვენება და პრეზენტაცია ისეთ საკითხებზე, როგორიცაა სქესსა და გენდერს შორის განსხვავება, გენდერული თანასწორობა, ფემინიზმი, გენდერული თანასწორობა საქართველოს ისტორიაში, გენდერული სტერეოტიპები, საკანონმდებლო ბაზა, დღევანდელი მდგომარეობა მსოფლიოში და საქართველოში, გენდერული უთანასწორობის განმაპირობებელი ფაქტორები და საზოგადოების როლი. აქტივობა განხორციელდა პროექტის ფარგლებში „ეროვნული ინტეგრაციის გაძლიერება საქართველოში" (ANI), რომელსაც ახორციელებს საქართველოს გაეროს ასოციაცია (UNAG) აშშ-ს საერთაშორისო განვითარების სააგენტოს (USAID) ფინანსური მხარდაჭერით. ბათუმში პარტნიორი ორგანიზაციაა „თავისუფალ ჟურნალისტთა სახლი" (IJH).

აჭარა. 20 დეკემბერს, ბათუმის მე-15-ე საჯარო სკოლის მოსწავლეებს ახალგაზრდული ორგანიზაცია „ცვლილებები თანაბარი უფლებებისათვისა" და კოალიცია დამოუკიდებელი ცხოვრებისათვის წარმომადგენლებმა შშმ პირებთან დაკავშირებით ესაუბრეს. სიკეთის გაკვეთილების ფარგლებში მოსწავლეებს ის ტერმინები გააცნეს, რაც შეზღუდული შესაძლებლობების მქონე პირების მიმართ გამოიყენება, ასევე, ისუბრეს საზოგადოების დამოკიდებულებაზე მათ მიმართ, შშმ პირების დასაქმების აუცილებლობასა და ცნობიერების ამაღლების საჭიროებაზე. სიკეთის გაკვეთილების ჩატარება მიზანად ისახავს, შშმ პირებთან დაკავშირებით უშუალოდ შშმ პირების მიერ მოსწავლეთა ინფორმირებულობას.